“Oʻzbekiston Respublikasining Konstitutsiyasiga oʻzgartish va qoʻshimchalar kiritish toʻgʻrisida”gi Oʻzbekiston Respublikasi Konstitutsiyaviy qonuni loyihasining umumxalq muhokamasi haqida (2304-IV-son)

15.07.2022

Oʻzbekiston Respublikasi Oliy Majlisi Qonunchilik palatasining

Qarori

Oʻzbekiston Respublikasi Oliy Majlisi Qonunchilik palatasi Korrupsiyaga qarshi kurashish va sud-huquq masalalari qoʻmitasi hamda Demokratik institutlar, nodavlat tashkilotlar va fuqarolarning oʻzini oʻzi boshqarish organlari qoʻmitasining “Oʻzbekiston Respublikasining Konstitutsiyasiga oʻzgartish va qoʻshimchalar kiritish toʻgʻrisida”gi Oʻzbekiston Respublikasi Konstitutsiyaviy qonuni loyihasining umumxalq muhokamasi haqida”gi axborotini eshitib, Oʻzbekiston Respublikasi Oliy Majlisining Qonunchilik palatasi taʼkidlaydiki, mamlakatimizda konstitutsiyaviy islohotlarni keng koʻlamda amalga oshirish, mazkur jarayonda fuqarolarning oʻz fikrini erkin bildirishi uchun barcha zarur tashkiliy-huquqiy choralar koʻrilmoqda.

Xususan, “Qonun loyihalarining umumxalq muhokamasi toʻgʻrisida”gi Oʻzbekiston Respublikasi Qonuni hamda Oʻzbekiston Respublikasi Oliy Majlisi Qonunchilik palatasining 2022-yil 24-iyundagi Qaroriga muvofiq “Oʻzbekiston Respublikasining Konstitutsiyasiga oʻzgartish va qoʻshimchalar kiritish toʻgʻrisida”gi Oʻzbekiston Respublikasi Konstitutsiyaviy qonuni loyihasi (bundan buyon matnda Konstitutsiyaviy qonun loyihasi deb yuritiladi) 2022-yil 25-iyundan 5-iyulga qadar umumxalq muhokamasiga qoʻyildi.

Konstitutsiyaviy qonun loyihasi “Xalq soʻzi”, “Narodnoye slovo” gazetalarida hamda “Meningkonstitutsiyam.uz” elektron platformasida eʼlon qilindi.

Konstitutsiyaviy islohotlarga jamoatchilikning eʼtibori yuqoriligi, Konstitutsiyaviy qonun loyihasi katta qiziqish bilan koʻrib chiqilayotganligi hamda fuqarolar tomonidan bildirilgan koʻplab takliflar va fikrlardan kelib chiqib, Oʻzbekiston Respublikasi Oliy Majlisi Qonunchilik palatasining 2022-yil 4-iyuldagi Qaroriga muvofiq Konstitutsiyaviy qonun loyihasining umumxalq muhokamasi 2022-yil 15-iyulga qadar uzaytirildi.

Oʻtgan davr mobaynida Konstitutsiyaviy qonun loyihasi yuzasidan umumxalq muhokamasi barcha hududlarda tashkil etilib, ushbu jarayon ommaviy axborot vositalarida keng yoritib borildi.

Deputatlar tomonidan hududlarga chiqilgan holda davlat organlari, fuqarolarning oʻzini oʻzi boshqarish organlari, korxonalar, muassasalar va tashkilotlarda fuqarolar ishtirokida qator uchrashuvlar tashkil etilib, konstitutsiyaviy islohotlarning mazmun-mohiyati va ahamiyatini keng jamoatchilikka tushuntirish ishlari olib borildi.

Umumxalq muhokamasi davomida Konstitutsiyaviy qonun loyihasi yuzasidan aholi va fuqarolik jamiyati institutlaridan 85 mingdan ziyod taklif kelib tushdi. Ushbu raqam umumxalq muhokamasi toʻgʻri tashkil etilganligini hamda fuqarolar islohotlarning faol ishtirokchisi boʻlishga intilayotganligini va konstitutsiyaviy islohotlarni har tomonlama, yakdillik bilan qoʻllab-quvvatlayotganligini koʻrsatmoqda.

Takliflarda inson huquqlari, erkinliklari va qadr-qimmatini yuksaltirish, ijtimoiy himoyani kuchaytirish, munosib mehnat sharoitlarini yaratish, yoshlarni har tomonlama qoʻllab-quvvatlash, taʼlim, ilm-fan sohalarini taraqqiy ettirish, xususiy mulk daxlsizligini yanada mustahkamlash, fuqarolik jamiyati institutlarining rolini oshirish, ekologik huquqlar va atrof-muhitni muhofaza qilish kabi masalalarga alohida eʼtibor qaratilgan.

Oʻzbekiston Respublikasi Oliy Majlisi Qonunchilik palatasining Korrupsiyaga qarshi kurashish va sud-huquq masalalari qoʻmitasi hamda Demokratik institutlar, nodavlat tashkilotlar va fuqarolarning oʻzini oʻzi boshqarish organlari qoʻmitasi tomonidan turli sohalarning yetuk mutaxassislari, tajribali huquqshunoslar va ekspertlarni jalb qilgan holda Konstitutsiyaviy qonun loyihasini keng jamoatchilik takliflari asosida takomillashtirish ishlari olib borilmoqda.

Shu bilan birga aholining va fuqarolik jamiyati institutlarining Konstitutsiyaviy qonun loyihasi yuzasidan fikr-mulohaza bildirishda faolligi ortib borayotganligi, kelib tushayotgan takliflar soni tobora oshayotganligi hamda mazkur takliflarning mazmuni chuqur tahlilni va oʻrganishni talab etayotganligi umumxalq muhokamasining muddatini yana uzaytirish zaruratini yuzaga keltirmoqda.

Yuqoridagilardan kelib chiqib, Oʻzbekiston Respublikasi Oliy Majlisining Qonunchilik palatasi qaror qiladi:

1. “Oʻzbekiston Respublikasining Konstitutsiyasiga oʻzgartish va qoʻshimchalar kiritish toʻgʻrisida”gi Oʻzbekiston Respublikasi Konstitutsiyaviy qonuni loyihasi umumxalq muhokamasining muddati 2022-yil 1-avgustgacha uzaytirilsin.

2. Davlat organlariga, fuqarolarning oʻzini oʻzi boshqarish organlariga, korxonalarga, muassasalarga, tashkilotlarga, siyosiy partiyalarga hamda boshqa jamoat birlashmalariga va ommaviy axborot vositalariga, Oʻzbekiston Respublikasi Oliy Majlisi Qonunchilik palatasidagi siyosiy partiyalar fraksiyalariga, shuningdek Oʻzbekiston Respublikasi Oliy Majlisi Qonunchilik palatasi deputatlariga “Oʻzbekiston Respublikasining Konstitutsiyasiga oʻzgartish va qoʻshimchalar kiritish toʻgʻrisida”gi Oʻzbekiston Respublikasi Konstitutsiyaviy qonuni loyihasining umumxalq muhokamasini tashkil etish va oʻtkazishga doir tadbirlarni davom ettirish tavsiya qilinsin.

3. Davlat organlari “Oʻzbekiston Respublikasining Konstitutsiyasiga oʻzgartish va qoʻshimchalar kiritish toʻgʻrisida”gi Oʻzbekiston Respublikasi Konstitutsiyaviy qonuni loyihasining umumxalq muhokamasini davom ettirish uchun zarur shart-sharoitlarni taʼminlasin.

4. Oʻzbekiston Respublikasi Oliy Majlisi Qonunchilik palatasining Korrupsiyaga qarshi kurashish va sud-huquq masalalari qoʻmitasi hamda Demokratik institutlar, nodavlat tashkilotlar va fuqarolarning oʻzini oʻzi boshqarish organlari qoʻmitasi:

Konstitutsiyaviy qonun loyihasining umumxalq muhokamasi davomida kelib tushayotgan takliflar va mulohazalarni koʻrib chiqishga oid ishlarni jadallashtirsin;

Oʻzbekiston Respublikasi Konstitutsiyasiga oʻzgartish va qoʻshimchalar kiritish yuzasidan takliflarni shakllantirish va tashkiliy chora-tadbirlarni amalga oshirish boʻyicha Konstitutsiyaviy komissiya bilan hamkorlikda umumxalq muhokamasi davomida kelib tushgan taklif va mulohazalarni hisobga olish, umumlashtirish, oʻrganish hamda tahlil qilish va ular asosida Konstitutsiyaviy qonun loyihasini maromiga yetkazish boʻyicha ishlarni davom ettirsin;

Konstitutsiyaviy qonun loyihasining umumxalq muhokamasi yakunlari toʻgʻrisida umumlashtirilgan axborot tayyorlasin hamda uni Oʻzbekiston Respublikasi Oliy Majlisining Qonunchilik palatasi deputatlari eʼtiboriga yetkazsin.

5. Ushbu Qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Qonunchilik palatasining Spikeri N. ISMOILOV

Toshkent sh.,

2022-yil 15-iyul,

2304-IV-son