Koreya Respublikasi Hukumatining grant mablagʻlari hisobiga Oʻzbekiston qishloq xoʻjaligiga ilgʻor texnologiyalarni joriy etish chora-tadbirlari toʻgʻrisida (PQ-321-son)

14.07.2022

Oʻzbekiston Respublikasi Prezidentining

Qarori

Oʻzbekiston Respublikasi qishloq xoʻjaligini rivojlantirishning 2020 — 2030-yillarga moʻljallangan strategiyasida belgilangan vazifalar ijrosini samarali taʼminlash, meva-sabzavotchilikda zamonaviy ilgʻor texnologiyalarni joriy qilish hamda Oʻzbekiston Respublikasi va Koreya Respublikasi oʻrtasidagi oʻzaro hamkorlikni yanada mustahkamlash maqsadida:

1. Yuqorichirchiq tumanida joylashgan Qishloq xoʻjaligida bilim va innovatsiyalar milliy markazi (AKIS) hududida Koreya Respublikasi Hukumati tomonidan:

“Oʻzbekistonda meva-sabzavotchilikda ilgʻor texnologiyalar oʻquv markazini tashkil etish” loyihasi (keyingi oʻrinlarda — Meva-sabzavotchilik loyihasi) uchun 2022 — 2026-yillarda 3,7 mln AQSH dollari;

“Oʻzbekistonda “aqlli qishloq xoʻjaligi” sanoat texnologiyalari innovatsion markazini tashkil etish” loyihasi (keyingi oʻrinlarda — Sanoat texnologiyalari innovatsion markazi loyihasi) uchun 2022 — 2026-yillarda 14 mln AQSH dollari;

“Qishloq xoʻjaligi mahsulotlari va ularning koʻchatlarini yetishtirish markazini tashkil etish” loyihasi (keyingi oʻrinlarda — Zamonaviy koʻchatchilik loyihasi) uchun 2022 — 2026-yillarda 3,7 mln AQSH dollari miqdoridagi grant mablagʻlari ajratilishi yuzasidan kelishuvga erishilganligi maʼlumot uchun qabul qilinsin.

2. Shunday tartib joriy etilsinki, unga koʻra Koreya Respublikasi Hukumatining mazkur grant mablagʻlari hisobiga amalga oshiriladigan loyihalar doirasida Qishloq xoʻjaligida bilim va innovatsiyalar milliy markazi (AKIS) tarkibida:

meva-sabzavotchilikning ilgʻor texnologiyalari boʻyicha oʻquv markazi va namunaviy xoʻjalik tashkil etiladi hamda bu orqali dehqon va fermer xoʻjaliklari xodimlari uchun zamonaviy asbob-uskunalarni joriy etish hamda ulardan samarali foydalanish boʻyicha oʻquv va malaka oshirish kurslari tashkil etiladi;

Koreya “aqlli qishloq xoʻjaligi” sanoat texnologiyalari innovatsion markazida va respublikaning 5 ta hududida hududiy tajriba issiqxonalari tashkil etiladi;

koreyalik mutaxassislar tomonidan dasturiy taʼminotlar bilan ishlash boʻyicha IT-mutaxassislar va yuqori malakali mahalliy trenerlar tayyorlanadi;

zamonaviy issiqxonalar uchun dasturiy taʼminot ishlab chiqiladi va issiqxona qurilishida foydalaniladigan asosiy jihozlar ishlab chiqarilishi mahalliylashtiriladi;

60 nafar mutaxassislar, shu jumladan sohadagi oliy taʼlim muassasalari magistrlari va ilmiy xodimlari malaka oshirish uchun Koreyaga yuboriladi.

3. Koreya Respublikasi Hukumatining grant mablagʻlari hisobiga amalga oshiriladigan loyihalarni amalga oshirishda:

Koreya qishloq jamiyatlari korporatsiyasi (KRC) va Koreyaning Qishloq xoʻjaligida xalqaro hamkorlik instituti (DICA) Meva-sabzavotchilik loyihasini amalga oshiruvchilar hisoblanishi;

Koreya savdo-sanoat va energiya vazirligi, Koreya mashinasozlik sanoati assotsiatsiyasi (KOAMI), Texnologiyalarni rivojlantirish instituti (KIAT), CAMTIC ilgʻor mexatronika texnologiya instituti va “Agro Solution Korea” kompaniyalari Sanoat texnologiyalari innovatsion markazi loyihasini amalga oshiruvchilar hisoblanishi;

Koreya qishloq xoʻjaligi, oziq-ovqat va qishloq ishlari vazirligi va Koreya oziq-ovqat, qishloq xoʻjaligi, oʻrmon va baliqchilikda taʼlimni rivojlantirish va axborot xizmati agentligi (EPIS) Zamonaviy koʻchatchilik loyihasini amalga oshiruvchilar hisoblanishi maʼlumot uchun qabul qilinsin.

4. Qishloq xoʻjaligida bilim va innovatsiyalar milliy markazi:

Koreya Respublikasi Hukumatining grant mablagʻlari hisobiga amalga oshiriladigan loyihalarni amalga oshirish, shu jumladan, yangi oʻquv markazi, issiqxonalar, koʻchatxonalar, namunaviy xoʻjaliklar tashkil etish boʻyicha ijro etuvchi hamda masʼul organ sifatida belgilansin;

loyihalar doirasida yetkazib beriladigan asbob-uskunalar va materiallardan oqilona foydalanish va ularni saqlash uchun javobgar etib belgilansin;

Toshkent agrar universiteti, Xalqaro qishloq xoʻjaligi universiteti talabalari, magistrlari, ilmiy va ilmiy pedagogik xodimlarining mazkur loyihalar doirasida barpo etilayotgan muassasalar, tajriba maydonlarida amaliyot va stajirovkalar oʻtashi, ilmiy-tadqiqotlar olib borishi, yaratilgan yangi ishlanmalarni joriy qilishi, tajribalar oʻtkazishiga sharoitlar yaratsin.

5. Oʻzbekistonda Koreya Respublikasi Hukumatining grant mablagʻlari hisobiga amalga oshiriladigan loyihalar ijrosi boʻyicha “yoʻl xaritasi” ilovaga muvofiq tasdiqlansin.

6. Vazirlar Mahkamasi (Sh. Gʻaniyev), Qishloq xoʻjaligi vazirligi, Suv xoʻjaligi vazirligi, Toshkent viloyati hokimligining Koreya Respublikasi Hukumatining grant mablagʻlari hisobiga amalga oshiriladigan loyihalar uchun Toshkent viloyati Yuqorichirchiq tumani hokimligi zaxirasidagi qishloq xoʻjalik xaritasining 2261q-konturidagi 4,3 gektar yer uchastkasini sugʻoriladigan yerlar toifasidan aholi punktlarining qishloq xoʻjaligiga moʻljallanmagan boshqa yerlari hamda sanoat maqsadlariga moʻljallangan yerlar toifasiga oʻtkazish toʻgʻrisidagi xulosasi qabul qilinsin.

Toshkent viloyati hokimligi (Z. Mirzayev), Qishloq xoʻjaligi vazirligi (J. Xodjayev), Kadastr agentligi (F. Poʻlatov) bir oy muddatda mazkur yer uchastkasini Qishloq xoʻjaligida bilim va innovatsiyalar milliy markazining Toshkent viloyati Agroxizmatlar markaziga doimiy foydalanish huquqi asosida ajratilishini taʼminlasin.

Qishloq xoʻjaligi vazirligi (J. Xodjayev) Toshkent viloyati hokimligi (Z. Mirzayev) bilan birga 2022-yil oxiriga qadar xalqaro moliya institutlarining mablagʻlari hisobidan kamida 100 gektar yangi yer uchastkalarining oʻzlashtirilishi va sugʻoriladigan yerlar toifasiga kiritilishini taʼminlasin.

7. Qishloq xoʻjaligi vazirligi (J. Xodjayev, A. Shukurov):

Toshkent viloyati hokimligi, Davlat soliq qoʻmitasi huzuridagi Kadastr agentligi bilan birgalikda belgilangan tartibda davlat yer kadastri maʼlumotlariga tegishli oʻzgartirishlar kiritish choralarini koʻrsin;

ikki oy muddatda Oʻzbekistonda meva-sabzavotchilikda ilgʻor texnologiyalar oʻquv markazi, Oʻzbekistonda “aqlli qishloq xoʻjaligi” sanoat texnologiyalari innovatsion markazi hamda Qishloq xoʻjaligi mahsulotlari va ularning koʻchatlarini yetishtirish markazining faoliyat tartibi hamda tashkiliy tuzilmalarini tasdiqlasin.

8. Quyidagilar maʼlumot uchun qabul qilinsin:

Bojxona kodeksining 297-moddasiga muvofiq davlatlar, hukumatlar, xalqaro tashkilotlar tomonidan texnik yordam koʻrsatish (grantlar) uchun olib kiriladigan tovarlar bojxona bojidan ozod etiladi;

Soliq kodeksining 246-moddasiga muvofiq davlatlar, hukumatlar, xalqaro tashkilotlar tomonidan texnik yordam koʻrsatish (grantlar) uchun Oʻzbekiston Respublikasi hududiga olib kiriladigan tovarlar qoʻshilgan qiymat soligʻidan ozod etiladi.

9. Belgilansinki, mazkur qaror doirasida Koreya Respublikasi Hukumatining grant mablagʻlari hisobiga amalga oshiriladigan loyihalar doirasida ajratiladigan qishloq xoʻjaligiga moʻljallangan yer uchastkasida imoratlar va inshootlar qurilishi natijasidagi qishloq xoʻjaligi ishlab chiqarishi nobudgarchiliklarining oʻrnini qoplash boʻyicha kompensatsiya toʻlovlari undirilmaydi.

10. Qishloq xoʻjaligi vazirligi mazkur qaror doirasida Koreya Respublikasi Hukumatining grant mablagʻlari hisobiga amalga oshiriladigan loyihalarni Oʻzbekiston Respublikasi Qishloq xoʻjaligi vazirligi bilan Koreya Qishloq xoʻjaligi, oziq-ovqat va qishloq ishlari vazirligi hamda Koreya Savdo-sanoat va energiya vazirligi oʻrtasida imzolangan Kelishuv hujjatlariga muvofiq amalga oshirsin.

11. Tashqi ishlar vazirligi Qishloq xoʻjaligi vazirligining viza talabnomalariga binoan, mazkur qaror doirasida Koreya Respublikasi Hukumatining grant mablagʻlari hisobiga amalga oshiriladigan loyihalarda ishtirok etuvchi xorijiy mutaxassislar uchun kirish vizalarining konsullik yigʻimlari va haqiqiy xarajatlarning oʻrnini qoplash hisobidan yigʻimlar undirilmasdan belgilangan tartibda rasmiylashtirilishini taʼminlasin.

12. Ichki ishlar vazirligi Qishloq xoʻjaligi vazirligining talabnomasiga asosan loyihada ishtirok etuvchi xorijiy mutaxassislarga koʻp martalik kirish vizalari berilishi va uzaytirilishi, shuningdek, Oʻzbekiston Respublikasida vaqtinchalik roʻyxatdan oʻtkazilishi hamda vaqtinchalik roʻyxatdan oʻtkazish muddati uzaytirilishini taʼminlasin.

13. Qishloq xoʻjaligi vazirligi manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

14. Mazkur qarorning ijrosini samarali tashkil qilishga masʼul va shaxsiy javobgar etib qishloq xoʻjaligi vaziri J.A. Xodjayev belgilansin.

Mazkur qaror ijrosini har chorakda muhokama qilib borish, ijro uchun masʼul idoralar faoliyatini muvofiqlashtirish va nazorat qilish Bosh vazir oʻrinbosari Sh.M. Gʻaniyev zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2022-yil 14-iyul,

PQ-321-son

Oʻzbekiston Respublikasi Prezidentining 2022-yil 14-iyuldagi PQ-321-son qaroriga ILOVA

Oʻzbekistonda Koreya Respublikasi Hukumatining grant mablagʻlari hisobiga amalga oshiriladigan loyihalar ijrosi boʻyicha

“YOʻL XARITASI”

T/rLoyiha doirasida amalga oshiriladigan tadbirlarAmalga oshirish mexanizmlariBajarish muddatiMasʼul ijrochilar“Oʻzbekistonda meva-sabzavotchilikda ilgʻor texnologiyalar oʻquv markazini tashkil etish” loyihasi boʻyicha amalga oshiriladigan ishlar1.Meva-sabzavotchilikda ilgʻor texnologiyalar oʻquv markazini tashkil etish.1. Loyihani boshlash uchun Koreyalik mutaxassislarning Oʻzbekistonga kelishi.2022-yil sentabrQishloq xoʻjaligida bilim va innovatsiyalar milliy markazi2. Oʻquv markazi binosini qurish uchun yer maydoni tanlash.2022-yil sentabr3. Qurilish ishlarini boshlash.2022-yil noyabr4. Zarur asbob-uskunalarni olib kelish va oʻrnatish.2022-2023-yillar5. Oʻquv markazi binosini toʻliq foydalanishga topshirish.2025-yil yakuniga qadar2.Oʻquv-seminarlarni samarali tashkillashtirish va olingan bilimlarni amaliyotga qoʻllash uchun namunaviy xoʻjaliklar tashkil etish.1. Namunaviy xoʻjaliklar tashkil etiladigan maydonchalarni tanlash.2022-yil sentabrQishloq xoʻjaligida bilim va innovatsiyalar milliy markazi2. Qurilish ishlarini boshlash.2023-yil fevral3. Zarur asbob-uskunalarni olib kelish va oʻrnatish.2023-yil sentabr4. Namunaviy xoʻjaliklarni foydalanishga topshirish.2023-yil dekabr3.Dehqon va fermer xoʻjaliklari xodimlarini oʻqitish va malakasini oshirish boʻyicha davomli oʻquv-seminarlari tashkil etish.1. Mahalliy mutaxassislarning ilgʻor tajribani oʻrganish maqsadida Koreyaga yuborilishini tashkil etish.2023 — 2026-yillarQishloq xoʻjaligi vazirligi2. Dehqon va fermer xoʻjaliklari xodimlarini oʻqitish va malakasini oshirish boʻyicha oʻquv-seminarlarini tashkil etish.2023-yil mart4.Qilingan ilmiy-tadqiqotlar va soha rivojlanishi oʻrtasida bogʻliqlikni taʼminlash.1. Oʻzbek tilida turli xildagi oʻquv materiallar va qoʻllanmalar tayyorlash.2022-2023-yillarQishloq xoʻjaligida bilim va innovatsiyalar milliy markazi2. Vazirlik veb-sayti orqali Koreyalik mutaxassislar tomonidan soha vakillariga keng miqyosda tavsiyalar berib borilishini taʼminlash.2022-2023-yillar“Oʻzbekistonda aqlli qishloq xoʻjaligi sanoat texnologiyalari innovatsion markazini tashkil etish” loyihasi boʻyicha amalga oshiriladigan ishlar5.Loyiha amalga oshiriladigan hududlarni aniqlash va yer maydonlarini ajratish.1. Loyiha maqsadidan kelib chiqib, loyiha amalga oshiriladigan hududlar taklifini tayyorlash.2022-yil sentabrQishloq xoʻjaligi vazirligi2. Taklif etilgan hududlarni donor tashkilot bilan kelishish.2022-yil noyabr3. Loyihani amalga oshirish uchun yer maydonlarini ajratish.2022-yil dekabr7.Tanlangan hududlarda zamonaviy issiqxonalar tashkil etish.1. Issiqxona tashkil etiladigan yer maydonini tanlash va yerga birlamchi ishlov berish.2023-yil mayQishloq xoʻjaligida bilim va innovatsiyalar milliy markazi2. Qurilish ishlarini boshlash.2023-yil iyul3. Zarur asbob-uskunalarni olib kelish va oʻrnatish.2023-yil sentabr4. Zarur infratuzilma obyektlarini tashkil etish.2025-yil yakuniga qadar5. Issiqxonalarni toʻliq foydalanishga topshirish.2025-yil yakuniga qadar8.“Aqlli fermer xoʻjaligi”ni boshqarish boʻyicha davomli oʻquv-seminarlarini tashkil etish.1. Oʻquv-seminarlarini tashkil etish.2023-yil sentabrQishloq xoʻjaligida bilim va innovatsiyalar milliy markazi2. Mahalliy mutaxassislarning Koreyaga yuborilishini tashkil etish.2024 — 2026-yillar3. Oʻzbek tilida turli xildagi oʻquv materiallar va qoʻllanmalar tayyorlash.2022-2023-yillar4. Vazirlik veb-sayti orqali Koreyalik mutaxassislar tomonidan soha vakillariga keng miqyosda tavsiyalar berib borilishini taʼminlash.2022-2023-yillar“Qishloq xoʻjaligi mahsulotlari va ularning koʻchatlarini yetishtirish markazini tashkil etish” loyihasi boʻyicha amalga oshiriladigan ishlar9.Loyiha amalga oshiriladigan hududlarni aniqlash va yer maydonlarini ajratish.1. Taklif etilgan hududlarni aniqlash va donor tashkilot bilan kelishish.2022-yil sentabrQishloq xoʻjaligi vazirligi2. Loyihani amalga oshirish uchun yer maydonlarini ajratish.2022-yil noyabr10.In-vitro laboratoriyasi va koʻchatxona tashkil etish.1. Qurilishni amalga oshiruvchi pudratchi tashkilotni tanlash.2022-yil dekabrQishloq xoʻjaligida bilim va innovatsiyalar milliy markazi2. Laboratoriya va koʻchatxona qurilishini amalga oshirish.2023-yil sentabr3. Zarur asbob-uskunalar va materiallarni olib kelish va oʻrnatish.2023-yil dekabr4. In-vitro laboratoriyasi va koʻchatxonani toʻliq ishga tushirish.2024-yil yanvar11.Zamonaviy issiqxona tashkil etish.1. Issiqxona tashkil etiladigan yer maydonini tanlash va yerga birlamchi ishlov berish.2023-yil fevralQishloq xoʻjaligida bilim va innovatsiyalar milliy markazi2. Qurilish ishlarini boshlash.2023-yil mart3. Zarur asbob-uskunalarni olib kelish va oʻrnatish.2023-yil dekabr4. Zarur infratuzilma obyektlarini tashkil etish.2024-yil aprel5. Issiqxonalarni toʻliq foydalanishga topshirish.2024-yil may12.Koreya koʻchatchilik tajribasini oʻrganish boʻyicha oʻquv-seminarlarini tashkil etish.1. Oʻquv-seminarlarini tashkil etish.2023-yil sentabrQishloq xoʻjaligi vazirligi2. Har yili 10 ta mahalliy mutaxassislarning ilgʻor tajribani oʻrganish maqsadida Koreyaga yuborilishini tashkil etish.2022-2023-yillar3. Oʻzbek tilida turli xildagi oʻquv materiallar va qoʻllanmalar tayyorlash.2022-2023-yillar