Mis va noyob metallar xom ashyosini qayta ishlashning texnologik zanjirlarini kengaytirish chora-tadbirlari toʻgʻrisida (PQ-295-son)

28.06.2022

Oʻzbekiston Respublikasi Prezidentining

Qarori

Mamlakatda mis xom ashyosini chuqur qayta ishlash asosida yuqori qoʻshilgan qiymatli tayyor mahsulotlar ishlab chiqarish quvvatlarini tashkil etish, ularga bogʻliq boʻlgan sanoat tarmoqlarida ishlab chiqarishni kengaytirish maqsadida, shuningdek, Oʻzbekiston Respublikasi Prezidentining 2021-yil 24-iyundagi “Kon-metallurgiya sanoati va unga bogʻliq sohalarni rivojlantirish boʻyicha qoʻshimcha chora-tadbirlar toʻgʻrisida”gi PQ-5159-son qaroriga muvofiq:

1. Iqtisodiy taraqqiyot va kambagʻallikni qisqartirish vazirligi, Investitsiyalar va tashqi savdo vazirligi, Qishloq xoʻjaligi vazirligi, Suv xoʻjaligi vazirligi, Toshkent viloyati hokimligining:

Toshkent viloyati Ohangaron tumanida mis va noyob metallarni qayta ishlash orqali yuqori qoʻshilgan qiymatli mahsulotlarni ishlab chiqarishga qaratilgan “Eltech Industrial” texnoparkini (keyingi oʻrinlarda — Texnopark) tashkil etish;

Texnoparkni joylashtirish uchun Toshkent viloyati Ohangaron tumanida 1-ilovaga muvofiq “Angren” erkin iqtisodiy zonasi hududidagi boʻsh turgan va qishloq xoʻjaligiga moʻljallangan jami 138,0 gektar, shundan 120,7 gektar sugʻoriladigan yer uchastkalarini erkin iqtisodiy zona tarkibidan chiqarish hamda ularni qishloq xoʻjaligiga moʻljallangan yerlar toifasidan sanoat maqsadlariga moʻljallangan yerlar toifasiga oʻtkazish toʻgʻrisidagi takliflariga rozilik berilsin.

2. Texnoparkning asosiy faoliyat yoʻnalishlari etib quyidagilar belgilansin:

mis, noyob metallar va boshqa maʼdanli mineral resurslarni qayta ishlashning koʻp pogʻonali texnologik zanjirlarini oʻzlashtirish orqali elektrotexnika, elektronika va boshqa yuqori qoʻshilgan qiymatli mahsulotlar ishlab chiqarish;

kon-metallurgiya va unga bogʻliq sanoat tarmoqlarida foydalaniladigan uskunalar va texnikalar, ular uchun ehtiyot va butlovchi qismlar, avtomatlashtirish vositalari hamda boshqa asbob-uskunalar ishlab chiqarish;

Texnopark hududida ekologiya va mehnatni muhofaza qilish standartlariga javob beradigan, energiya samarador va “yashil” texnologiyalarni qoʻllash asosida investitsiya loyihalarini amalga oshirish;

Texnopark hududida joylashtiriladigan investitsiya loyihalari uchun zarur ishlab chiqarish, muhandislik-kommunikatsiya, yoʻl-transport va ijtimoiy infratuzilmani barpo etish;

“Yagona darcha” tamoyili asosida texnopark ishtirokchilariga xalqaro standartlarni qoʻllash, mahsulotlar muvofiqligini baholash va sertifikatlashtirish, maʼmuriy, logistika, davlat organlaridan ruxsatnomalar olish va roʻyxatdan oʻtishga koʻmaklashish kabi xizmatlarni koʻrsatishni tashkil etish;

Texnopark ishtirokchilari va mahalliy korxonalar oʻrtasida ishlab chiqarish kooperatsiyasi uchun qulay shart-sharoit yaratish.

3. Texnopark faoliyatini tashkil etish boʻyicha “Yoʻl xaritasi” 2-ilovaga muvofiq tasdiqlansin.

4. Davlat aktivlarini boshqarish agentligi taʼsischiligida “Eltech Industrial” texnoparkini boshqarish direksiyasi” davlat muassasasi (keyingi oʻrinlarda — Direksiya) tashkil etilsin.

5. Direksiya faoliyatini samarali tashkil etish maqsadida:

Vazirlar Mahkamasi bir oy muddatda Direksiya faoliyatini tashkil etish boʻyicha Hukumat qarorini qabul qilsin;

Moliya vazirligi ikki oy muddatda Iqtisodiy taraqqiyot va kambagʻallikni qisqartirish vazirligining hisob-kitoblariga muvofiq Direksiya taʼminoti uchun 2022-yilda respublika budjetidan 2 milliard soʻm miqdorida mablagʻlarni ajratsin;

Davlat aktivlarini boshqarish agentligi Iqtisodiy taraqqiyot va kambagʻallikni qisqartirish vazirligi hamda Investitsiyalar va tashqi savdo vazirligi bilan birgalikda xalqaro konsultantlarni jalb qilgan holda uch oy muddatda Texnopark faoliyatini boshqarish uchun ushbu sohada ilgʻor tajribaga ega chet el kompaniyasini taklif qilsin.

6. Belgilansinki:

a) Direksiya faoliyati Oʻzbekiston Respublikasi Prezidentining 2021-yil 24-iyundagi PQ-5159-son qarori bilan tasdiqlangan Mis sanoati klasterini tashkil etish va rivojlantirish boʻyicha maxsus komissiya (keyingi oʻrinlarda — Maxsus komissiya) tomonidan muvofiqlashtiriladi;

b) Texnopark hududida:

investitsiya loyihalari mahalliy va chet el xususiy (davlat kafolatisiz) investitsiyalarini jalb qilish hisobiga amalga oshiriladi;

qonunchilikka muvofiq maxsus iqtisodiy zonalar ishtirokchilari va ularning direksiyalari uchun nazarda tutilgan alohida soliqlar va bojxona toʻlovlari boʻyicha imtiyozlar Texnopark ishtirokchilari va Direksiyaga nisbatan ham tatbiq etiladi;

investitsiya loyihalarini amalga oshirish toʻgʻrisida qaror Iqtisodiy taraqqiyot va kambagʻallikni qisqartirish vazirligi huzuridagi Geologiya, kon-metallurgiya va misni qayta ishlash sanoatini rivojlantirish loyiha ofisining (keyingi oʻrinlarda — Loyiha ofisi) xulosasi asosida Maxsus komissiya tomonidan qabul qilinadi;

Direksiya oʻz faoliyatini mustaqil yuritadi va Loyiha ofisiga har chorak yakuni boʻyicha amalga oshirilgan ishlar toʻgʻrisida hisobot kiritib boradi;

yer uchastkalari mahalliy va xorijiy investorlarga Oʻzbekiston Respublikasi Prezidentining 2018-yil 21-dekabrdagi “Erkin iqtisodiy zonalar faoliyatini muvofiqlashtirish va boshqarish tizimini yanada takomillashtirish chora-tadbirlari toʻgʻrisida”gi PF-5600-son Farmonida belgilangan tartibda ijaraga beriladi;

bino va inshootlarni ijaraga berish, sotish, lizingga berish yoki qiymatini boʻlib-boʻlib toʻlash shartlari asosida sotish (ijaraga berish) Maxsus komissiyaning qaroriga muvofiq auksion orqali amalga oshiriladi. Bunda, auksionda bitta ishtirokchi qatnashgan taqdirda ham savdolar oʻtkazilgan hisoblanadi;

Texnopark ishtirokchilariga Oʻzbekiston Respublikasi Prezidentining 2022-yil 13-iyundagi “Maxsus iqtisodiy, kichik sanoat, yoshlar sanoat va tadbirkorlik zonalari faoliyati samaradorligini oshirishning qoʻshimcha chora-tadbirlari toʻgʻrisida”gi PF-153-son Farmonining 4- va 5-bandlarida nazarda tutilgan tartib tatbiq etiladi;

ajratilgan yer maydonlarining 1 gektari uchun 2023-yil 1-yanvarga qadar yillik 10 mln soʻm miqdorida ijara toʻlovlari amalga oshiriladi, kelgusi yillar uchun ijara toʻlovlarining miqdori Iqtisodiy taraqqiyot va kambagʻallikni qisqartirish vazirligi tomonidan har hisobot yili inflyatsiya darajasidan hamda yer soligʻi stavkasidan kelib chiqib, eʼlon qilib boriladi.

7. Texnopark ishtirokchilarining innovatsion, ilmiy-tadqiqot va tajriba-konstruktorlik faoliyatini qoʻllab-quvvatlashning quyidagi mexanizmlari joriy etilsin:

mis va noyob metallar xom ashyosini qayta ishlash borasida energiya va suv resurslaridan samarali foydalanish, mehnat unumdorligini oshirish, ekologiya xavfsizligini taʼminlash, ishlab chiqarish va mahsulot sifatini axborot tizimlari orqali boshqarish va nazorat qilish boʻyicha ilmiy tadqiqotlar va tajriba-konstruktorlik ishlanmalarga sarflangan xarajatlarning 50 foiz miqdori, biroq 1 mlrd soʻmdan oshmaydigan qismi;

ushbu ilmiy tadqiqotlar va tajriba-konstruktorlik ishlanmalarini joriy qilish boʻyicha loyihalash, injiniring va texnologiyalar transferi xizmatlarini koʻrsatish (ishlarini bajarish) bilan bogʻliq xarajatlarning 20 foizigacha miqdori Oʻzbekiston Respublikasi respublika budjeti hisobidan qoplab beriladi.

Iqtisodiy taraqqiyot va kambagʻallikni qisqartirish vazirligi Innovatsion rivojlanish vazirligi, Moliya vazirligi hamda Investitsiyalar va tashqi savdo vazirligi bilan birgalikda ikki oy muddatda mazkur bandda nazarda tutilgan qoʻllab-quvvatlash mexanizmlarini amalga oshirish tartibini belgilash boʻyicha tegishli normativ-huquqiy hujjatlar loyihalarini Vazirlar Mahkamasiga kiritsin.

8. Iqtisodiy taraqqiyot va kambagʻallikni qisqartirish vazirligi, Innovatsion rivojlanish vazirligi, Davlat geologiya va mineral resurslar qoʻmitasi, “Navoiy KMK” AJ, “Olmaliq KMK” AJning kon-metallurgiya sohasida zamonaviy texnologiyalarni joriy etish, ishlab chiqarish jarayonlari samaradorligini oshirish boʻyicha ilgʻor xorijiy tajribalarni va innovatsion ishlanmalarni jalb qilishga ixtisoslashgan Navoiy shahrida Ilgʻor togʻ-kon texnologiyalari markazi faoliyatini tashkil etish toʻgʻrisidagi taklifiga rozilik berilsin.

Bunda, Markazni tashkil etish uchun talab etiladigan mablagʻlar “Navoiy KMK” AJ, “Olmaliq KMK” AJ tomonidan mos ravishda 65 foiz va 35 foiz ulushlarda moliyalashtirilishi belgilansin.

9. Mineral xom ashyo bazasini kengaytirishga yoʻnaltirilgan investitsiya loyihalarini tezkor ishga tushirish maqsadida 2022 — 2026-yillarga moʻljallangan geologiya-qidiruv ishlarining maqsadli dasturi doirasida “Oʻzbek geologiya qidiruv” aksiyadorlik jamiyati va uning ulushi mavjud boʻlgan ixtisoslashgan korxonalarga qimmatbaho, rangli va noyob metallarga batafsil geologik tadqiqotlarni oʻtkazish uchun oʻzaro toʻgʻridan-toʻgʻri shartnomalar asosida ishlarni tashkillashtirishga, istisno tariqasida, ruxsat berilsin.

10. Belgilab qoʻyilsinki:

Texnopark hududida joylashtiriladigan loyihalar uchun zarur boʻlgan tashqi muhandislik-kommunikatsiya infratuzilmalarini yaratish bilan bogʻliq tadbirlar Oʻzbekiston Respublikasi Prezidentining 2020-yil 18-dekabrdagi “Hududlarda muhandislik-kommunikatsiya infratuzilmasini yanada rivojlantirish chora-tadbirlari toʻgʻrisida”gi PQ-4929-son qarorida nazarda tutilgan mablagʻlar hisobidan hamda ushbu qarorda belgilangan tartibda moliyalashtiriladi;

Texnoparkni elektr energiyasi bilan taʼminlash maqsadida 220 kV kuchlanishli elektr uzatish tarmogʻi va podstansiyani qurish tadbirlari “Oʻzbekiston MET” AJ tomonidan unga respublika budjetidan kamida 5 yil muddatda qaytarish sharti bilan ajratiladigan imtiyozli budjet ssudasi hisobidan amalga oshiriladi.

11. Energetika vazirligi, Moliya vazirligi, Iqtisodiy taraqqiyot va kambagʻallikni qisqartirish vazirligi, “Oʻzbekiston MET” AJ 2023-yil 1-yanvarga qadar Texnoparkning tashqi elektr energiyasi taʼminotini yaratish uchun 220 kV kuchlanishli elektr uzatish tarmogʻi va podstansiyani qurish boʻyicha loyiha hujjatlarini ishlab chiqsin va pudratchilarni aniqlasin.

Bunda:

loyihaoldi va loyiha hujjatlari (shu jumladan tender hujjatlari)ni ishlab chiqish uchun tender oʻtkazish orqali loyiha instituti tanlab olinadi;

qurilish ishlarini qisqa muddatlarda va maqbul narxlarda amalga oshirish maqsadida tender oʻtkazish orqali “tayyor holda topshirish” sharti asosida pudratchi tanlab olinadi.

12. Belgilansinki, mazkur qarorga asosan qishloq xoʻjaligiga moʻljallangan yer uchastkalarining yer fondi toifasi oʻzgartirilishi bilan bogʻliq qishloq xoʻjaligi va oʻrmon xoʻjaligi ishlab chiqarishi nobudgarchiliklarining oʻrnini qoplash boʻyicha kompensatsiya toʻlovlari, istisno tariqasida, undirilmaydi.

13. Oliy va oʻrta maxsus taʼlim vazirligi hamda Iqtisodiy taraqqiyot va kambagʻallikni qisqartirish vazirligining 3-ilovaga muvofiq taʼlim muassasalari, Texnopark ishtirokchilari, shuningdek, elektrotexnika, elektronika, kon-metallurgiya va unga bogʻliq sohalarda faoliyat yurituvchi korxona va tashkilotlar oʻrtasida mutaxassislarni tayyorlash boʻyicha dual taʼlimni joriy etishga doir hamkorlikni yoʻlga qoʻyish toʻgʻrisidagi taklifi maʼqullansin.

Oliy va oʻrta maxsus taʼlim vazirligi Iqtisodiy taraqqiyot va kambagʻallikni qisqartirish vazirligi, “Navoiy KMK” AJ, “Olmaliq KMK” AJ va “Oʻzeltexsanoat” uyushmasi bilan birgalikda dual taʼlim shakli joriy etiladigan professional taʼlim muassasalariga va dual taʼlim tamoyili asosida ishlab chiqarish amaliyoti yoʻlga qoʻyiladigan oliy taʼlim muassasalariga taʼlim jarayonini tashkil etish, xususan oʻquv rejalari va oʻquv dasturlarini shakllantirishda har tomonlama koʻmaklashsin.

14. Savdo-sanoat palatasi Iqtisodiy taraqqiyot va kambagʻallikni qisqartirish vazirligi, Innovatsion rivojlanish vazirligi hamda “Hunarmand” uyushmasi bilan birgalikda ikki oy muddatda respublika hududlarida misga ishlov berish va undan tayyor buyumlar tayyorlash boʻyicha milliy hunarmandchilik (misgarlik) faoliyatini kengaytirish yuzasidan Hukumat qarori loyihasini Vazirlar Mahkamasiga kiritsin.

15. Moliya vazirligi Iqtisodiy taraqqiyot va kambagʻallikni qisqartirish vazirligi bilan birgalikda ikki oy muddatda mazkur qarordan kelib chiqib, “2022-yil uchun Oʻzbekiston Respublikasining Davlat budjeti toʻgʻrisida”gi Oʻzbekiston Respublikasining Qonuniga oʻzgartish va qoʻshimchalar kiritish boʻyicha qonun loyihasini Vazirlar Mahkamasiga kiritsin.

16. Quyidagilarga:

Oʻzbekiston Respublikasi Bosh vazirining maslahatchisi B.F. Islamovga — rangli, nodir va noyob metallar boʻyicha geologiya-qidiruv ishlarini kengaytirish, geologik xizmatlar bozorini rivojlantirish, shuningdek, misni qayta ishlash sohasida koʻp pogʻonali texnologik zanjirlarni yaratishga qaratilgan strategik yoʻnalishlarni belgilash hamda Texnopark faoliyatini samarali tashkil etish;

iqtisodiy taraqqiyot va kambagʻallikni qisqartirish vaziri oʻrinbosari B.Q. Abdinazarovga — Texnopark faoliyatini boshqarish uchun ushbu sohada ilgʻor tajribaga ega chet el kompaniyasini jalb qilish, Texnoparkning asosiy faoliyat yoʻnalishlariga muvofiq yuqori samarador investitsiya loyihalarini tanlab olish, Texnopark hududida joylashtiriladigan investitsiya loyihalari uchun zarur muhandislik-kommunikatsiya infratuzilmasini barpo etish, texnopark ishtirokchilariga “Yagona darcha” tamoyili asosida xizmatlar koʻrsatilishini tashkil etish;

Toshkent viloyati hokimi v.b. Z.T. Mirzayevga — Toshkent viloyati Ohangaron tumanidagi “Angren” erkin iqtisodiy zonasi tarkibidan ajratib olinadigan yer uchastkalarini Texnoparkka doimiy foydalanish huquqi asosida ajratib berish hamda ushbu qaror bilan toifasi oʻzgartirilayotgan yer uchastkalari maydoniga teng miqdorda yangi sugʻoriladigan yer maydonlari oʻzlashtirilishini taʼminlash;

“Oʻzeltexsanoat” uyushmasi raisi M.M. Yunusovga — Texnopark hududida mis, noyob metallar va boshqa maʼdanli mineral resurslarni qayta ishlashning koʻp pogʻonali texnologik zanjirlarini oʻzlashtirish orqali elektrotexnika, elektronika va boshqa yuqori qoʻshilgan qiymatli mahsulotlar ishlab chiqarish quvvatlarini yaratishga qaratilgan loyihalarni ishlab chiqish;

“Navoiy kon-metallurgiya kombinati” AJ boshqaruvi raisi Q.S. Sanaqulov va “Olmaliq kon-metallurgiya kombinati” AJ boshqaruvi raisi A.X. Xursanovga — kon-metallurgiya va unga bogʻliq sanoat tarmoqlarida foydalaniladigan uskunalar va texnikalar, ular uchun ehtiyot va butlovchi qismlar ishlab chiqarishni tashkil etish, shuningdek, kon-metallurgiya sohasida zamonaviy texnologiyalarni joriy etish, ishlab chiqarish jarayonlari samaradorligini oshirish boʻyicha ilgʻor xorijiy tajribalarni va innovatsion ishlanmalarni jalb qilishga ixtisoslashgan Ilgʻor togʻ-kon texnologiyalari markazi faoliyatini tashkil etish;

oliy va oʻrta maxsus taʼlim vaziri A.X. Toshkulovga va “Oʻzeltexsanoat” uyushmasi raisi M.M. Yunusovga — professional va oliy taʼlim muassasalari, Texnopark ishtirokchilari, shuningdek, elektrotexnika, elektronika, kon-metallurgiya va unga bogʻliq sohalarda faoliyat yurituvchi korxona va tashkilotlar oʻrtasida mutaxassislarni tayyorlash boʻyicha dual taʼlimni joriy etishga doir hamkorlikni yoʻlga qoʻyish yuzasidan shaxsiy javobgarlik yuklansin.

17. Iqtisodiy taraqqiyot va kambagʻallikni qisqartirish vazirligi manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

18. Mazkur qaror ijrosini samarali tashkil qilishga masʼul va shaxsiy javobgar etib Oʻzbekiston Respublikasi Bosh vazirining oʻrinbosari J.A. Qoʻchqorov belgilansin.

Qaror ijrosini har chorakda muhokama qilib borish, ijro uchun masʼul idoralar faoliyatini muvofiqlashtirish va nazorat qilish Oʻzbekiston Respublikasining Bosh vaziri A.N. Aripov va Oʻzbekiston Respublikasi Prezidentining maslahatchisi R.A. Gulyamov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2022-yil 28-iyun,

PQ-295-son

Oʻzbekiston Respublikasi Prezidentining 2022-yil 28-iyundagi PQ-295-son qaroriga 1-ILOVA

Toshkent viloyati Ohangaron tumani hududidagi “Angren” erkin iqtisodiy zonasi tarkibidan chiqarilayotgan, qishloq xoʻjaligiga moʻljallangan yerlar toifasidan sanoat maqsadlariga moʻljallangan yerlar toifasiga oʻtkazilayotgan va Parkent tumani Qiziltogʻ qoʻrgʻonidagi, Xorazm viloyati Urganch tumani “Chakkasholikor” qishlogʻi “Al-Xorazmiy” massividagi hamda Fargʻona viloyati “Eko shahar” hududidagi “Eltech Industrial” texnoparkini boshqarish direksiyasiga doimiy foydalanish huquqi bilan ajratiladigan yer uchastkalari

ROʻYXATI

Hudud nomi Kontur raqami Jami yer uchastkasi (gektar) shundan: Tuproq bonitet bali sugʻoriladigan yerlar boshqa yerlar Ohangaron tumani Ohangaron massivi (1-uchastka) 895k 1,53 1,48 0,05 54 894k 4,88 4,80 0,08 54 884k 4,88 4,70 0,18 44 882k 4,04 3,85 0,19 44 882k, 881k 15,44 14,70 0,74 47 874k, 883 14,86 13,10 1,76 47 874k 6,35 6,10 0,25 44 851k, 854k 8,29 7,90 0,39 44 Ohangaron tumani Ohangaron massivi (1-uchastka) 870 0,70 0,70 37 871k 7,5 7,2 0,30 37 875k 15,76 15,40 0,36 47 877k 2,30 2,20 0,10 47 855 3,65 3,65 44 856 0,60 0,58 0,02 44 857 0,51 0,51 44 865k 0,31 0,25 0,06 44 866 0,97 0,89 0,08 44 867 0,12 0,12 44 868 0,55 0,43 0,12 869 0,48 0,43 0,05 44 851k 7,95 7,90 0,05 44 884k 6,50 6,30 0,20 47 Ohangaron tumani Ohangaron massivi (1-uchastka) 886 1,21 1,00 0,21 47 887k 1,02 0,90 0,12 47 888k 0,62 0,50 0,12 52 889k 0,47 0,40 0,07 47 890 0,55 0,40 0,15 47 891 14,50 13,90 0,60 44 840 0,20 0,20 44 841k 0,94 0,94 38 843 0,92 0,92 38 844 0,73 0,73 38 845 1,34 1,05 0,29 38 846 0,69 0,53 0,16 38 847 1,29 1,29 38 848 0,55 0,55 38 849 1,12 0,25 0,87 38 850, 852, 853 3,68 1,15 2,53 52 Ohangaron tumani Ohangaron massivi (2-uchastka) 831, 832, 833, 834, 835, 836, 837, 864, 865q 17,71 8,83 8,88 38 859, 860, 862, 863, 871q, 872, 873, 885q 27,55 24,94 2,61 35 874q, 885q, 4,5 4,0 0,5 37 874q, 885q, 3,42 3,01 0,41 37 911, 912q 2,52 2,27 0,25 35 909q, 884q, 886q, 887q, 888q, 889q, 890q, 841q, 842 q 19,3 17,2 2,1 37 Ohangaron tumani A. Navoiy massivi (3-uchastka) 1184q, 1185q, 1096, 1097, 1098, 1099q, 1176, 1177, 1179, 1178, 1186 52,95 41,75 11,2 48 1101, 1175, 1099q 17,0 13,8 3,2 47 1173,1160,1161 26,4 25,5 0,9 47 1170 2,1 2,1 42 1169, 1171, 1187q, 1167, 1168 7,9 6,5 1,4 46 1162q 5,75 5,45 0,3 49 1162q 9,3 9,0 0,3 49 1163q 3,6 3,5 0,1 52 “Al-Xorazmiy” majmuasi 545k 4 4 544k Fargʻona shahar Eko shahar” hududi 10 10 Parkent tumani Qiziltogʻ qoʻrgʻoni 11816q 10 10 Jami 362,0 286,45 75,55

Izoh: “Eltech Industrial” texnoparki tarkibiga kiruvchi Ohangaron tumanidagi hudud chegarasining tavsifi:

1-uchastka:

1-nuqtadan (40°56'0.53''S, 69°39'57.72''V) janubiy-sharqiy yoʻnalish boʻyicha 2-nuqtaga qadar 441,3 metr choʻzilgan.

2-nuqtadan (40°55'56.48''S, 69°40'15.82''V) janubiy-sharqiy yoʻnalish boʻyicha 3-nuqtaga qadar 1231,3 metr choʻzilgan.

3-nuqtadan (40°55'28.54''S, 69°40'53.43''V) janubiy-sharqiy yoʻnalish boʻyicha 4-nuqtaga qadar 1003,6 metr choʻzilgan.

4-nuqtadan (40°55'4.70''S, 69°40'24.25''V) janubiy-gʻarbiy yoʻnalish boʻyicha 5-nuqtaga qadar 1094,7 metr choʻzilgan.

5-nuqtadan (40°55'29.49''S, 69°39'50.77''V) shimoliy-gʻarbiy yoʻnalish boʻyicha 1-nuqtaga qadar 970,8 metr choʻzilgan.

2-uchastka:

Avtomobil yoʻli boʻyida joylashgan nuqta boshlangʻich 1-nuqta deb qabul qilindi. (WGS-84 koordinatlar tizimida, shimoliy kenglik koordinatlari 40°56'00,313'', sharqiy uzoqlik koordinatlari 69°39'56,272'').

1-nuqtadan chegara chizigʻi avtomobil yoʻlining janub tomoni boʻylab sharqiy yoʻnalishda 257 metr masofani oʻtib, yoʻl boʻyida joylashgan 2-nuqtaga tutashadi, (shimoliy kenglik 40°56'00,203'', sharqiy uzoqlik 69°4'07,264'');

2-nuqtadan chegara chizigʻi avtomobil yoʻlining janub tomoni boʻylab umumiy sharqiy yoʻnalishda 800 metr masofani oʻtib, yoʻl boʻyida joylashgan 3-nuqtaga tutashadi, (shimoliy kenglik 40°56'02,284'', sharqiy uzoqlik 69°40'40,909'');

3-nuqtadan chegara chizigʻi avtomobil yoʻlining gʻarb tomoni bilan janubiy-janubiy-sharqiy yoʻnalishda 656 metr masofani oʻtib, yoʻl boʻyida joylashgan 4-nuqtaga tutashadi, (shimoliy kenglik 40°55'43,720'', sharqiy uzoqlik 69°40'53,899'');

4-nuqtadan chegara chizigʻi avtomobil yoʻlining gʻarb tomoni bilan janubiy-sharqiy yoʻnalishda 401 metr masofani oʻtib, yoʻl boʻyida joylashgan 5-nuqtaga tutashadi, (shimoliy kenglik 40°55'34,705'', sharqiy uzoqlik 69°41'06,223'');

5-nuqtadan chegara chizigʻi avtomobil yoʻlining gʻarb tomoni bilan janubiy-janubiy-sharqiy yoʻnalishda 431 metr masofani oʻtib, yoʻl boʻyida joylashgan 6-nuqtaga tutashadi, (shimoliy kenglik 40°55'21,985'', sharqiy uzoqlik 69°41'13,785'');

6-nuqtadan chegara chizigʻi avtomobil yoʻlining gʻarb tomoni bilan janubiy-sharqiy yoʻnalishda 90 metr masofani oʻtib, yoʻl boʻyida joylashgan 7-nuqtaga tutashadi, (shimoliy kenglik 40°55'19,787'', sharqiy uzoqlik 69°41'16,324'');

7-nuqtadan chegara toʻgʻri chiziq orqali janubiy-gʻarbiy yoʻnalishda ekin yer maydoni boʻylab 78 metr masofada ekin yer maydonida joylashgan 8-nuqtaga tutashadi, (shimoliy kenglik 40°55'18,302'', sharqiy uzoqlik 69°41'13,642'');

8-nuqtadan chegara toʻgʻri chiziq orqali gʻarbiy-shimoliy-gʻarbiy yoʻnalishda 359 metr masofada ekin yer maydonini kesib oʻtib, dala tuproq yoʻli boʻyida joylashgan 9-nuqtaga tutashadi, (shimoliy kenglik 40°55'24,213'', sharqiy uzoqlik 69°41'00,426'');

9-nuqtadan chegara toʻgʻri chiziq orqali gʻarbiy-shimoliy-gʻarbiy yoʻnalishda 273 metr masofada ekin yer maydonlarini kesib oʻtib, 10-nuqtaga tutashadi, (shimoliy kenglik 40°55'28,682'', sharqiy uzoqlik 69°40'50,378'');

10-nuqtadan chegara toʻgʻri chiziq orqali shimoliy-gʻarbiy yoʻnalishda 679 metr masofada ekin yer maydonlarini kesib oʻtib, 11-nuqtaga tutashadi, (shimoliy kenglik 40°55'44,077'', sharqiy uzoqlik 69°40'29,657'');

11-nuqtadan chegara toʻgʻri chiziq orqali shimoliy-gʻarbiy yoʻnalishda 553 metr masofada ekin yer maydonlarini kesib oʻtib, 12-nuqtaga tutashadi, (shimoliy kenglik 40°55'56,623'' ( sharqiy uzoqlik 69°40' 12,767'');

12-nuqtadan toʻgʻri chiziq orqali gʻarbiy-shimoliy-gʻarbiy yoʻnalishda 402 metr masofada ekin yer maydonlarini kesib oʻtib, boshlangʻich 1-nuqtaga tutashadi, (shimoliy kenglik 40°56'00,313'', sharqiy uzoqlik 69°39'56,272'').

3-uchastka:

Ariq boʻyida joylashgan nuqta boshlangʻich 1-nuqta deb qabul qilindi. (WGS-84 koordinatlar tizimida, shimoliy kenglik koordinatlari 40°56'03,346'', sharqiy uzoqlik koordinatlari 69°37'34,045'').

1-nuqtadan chegara chizigʻi ariqning suv oqimi boʻylab sharqiy yoʻnalishda 534 metr masofani oʻtib, ariq boʻyida joylashgan 2-nuqtaga tutashadi, (shimoliy kenglik 40°56'01,776'', sharqiy uzoqlik 69°37'56,760'');

2-nuqtadan chegara quruq chiziq orqali sharqiy yoʻnalishda 326 metr masofada dala tuproq yoʻlini kesib oʻtib 3-nuqtaga tutashadi, (shimoliy kenglik 40°56'02,420'', sharqiy uzoqlik 69°38'10,649'');

3-nuqtadan chegara quruq chiziq orqali ekin yer chegarasi boʻylab sharqiy yoʻnalishda 389 metr masofani oʻtib 4-nuqtaga tutashadi, (shimoliy kenglik 40°56'00,797'', sharqiy uzoqlik 69°38'27,157'');

4-nuqtadan chegara quruq chiziq orqali janubiy-janubiy-gʻarbiy yoʻnalishda 152 metr masofani oʻtib, ariq boʻyida joylashgan 5-nuqtaga tutashadi, (shimoliy kenglik 40°55'56,374'', sharqiy uzoqlik 69°38'24,328'');

5-nuqtadan chegara chizigʻi ariqning suv oqimi boʻylab oʻng tomoni bilan gʻarbiy yoʻnalishda 70 metr masofani oʻtib, ekin yer maydoni chegarasida joylashgan 6-nuqtaga tutashadi, (shimoliy kenglik 40°55'56,771'', sharqiy uzoqlik 69°38'21,361'');

6-nuqtadan chegara quruq chiziq orqali janubiy-janubiy-gʻarbiy yoʻnalishda 130 metr masofani oʻtib, 7-nuqtaga tutashadi, (shimoliy kenglik 40°55'52,769'', sharqiy uzoqlik 69°38'19,638'');

7-nuqtadan chegara quruq chiziq orqali gʻarbiy yoʻnalishda 282 metr masofada ishlab chiqarish korxonasiga olib kiruvchi yoʻlni kesib oʻtib, yoʻl boʻyida joylashgan 8-nuqtaga tutashadi, (shimoliy kenglik 40°55'54,641'', sharqiy uzoqlik 69°38'07,850'');

8-nuqtadan chegara quruq chiziq orqali umumiy janubiy-janubiy-gʻarbiy yoʻnalishda 113 metr masofada ariqni kesib oʻtib, ariq boʻyida joylashgan 9-nuqtaga tutashadi, (shimoliy kenglik 40°55'53,901'', sharqiy uzoqlik 69°38'03,228'');

9-nuqtadan chegara quruq chiziq orqali janubiy yoʻnalishda 72 metr masofada ariqni, dala tuproq yoʻlini kesib oʻtib, ekin yer maydoni boʻyida joylashgan 10-nuqtaga tutashadi, (shimoliy kenglik 40°55'51,626'', sharqiy uzoqlik 69°38'02,605'');

10-nuqtadan chegara chizigʻi sharqiy-janubiy-sharqiy yoʻnalishda ekin yer maydoni chegarasi boʻylab 38 metr masofani oʻtib, 11-nuqtaga tutashadi, (shimoliy kenglik 40°55'51,280'', sharqiy uzoqlik 69°38'04,176'');

11-nuqtadan chegara toʻgʻri chiziq orqali janubiy yoʻnalishda 900 metr masofada ekin yer maydonlarini kesib oʻtib, ekin yer maydoni boʻyida joylashgan 12-nuqtaga tutashadi, (shimoliy kenglik 40°55'22,357'', sharqiy uzoqlik 69°37'59,200'');

12-nuqtadan chegara toʻgʻri chiziq orqali shimoliy-shimoliy-gʻarbiy yoʻnalishda ekin yer maydoni boʻylab 164 metr masofani oʻtib, 13-nuqtaga tutashadi, (shimoliy kenglik 40°55'27,508'', sharqiy uzoqlik 69°37'57,487'');

13-nuqtadan chegara toʻgʻri chiziq orqali gʻarbiy-janubiy-gʻarbiy yoʻnalishda 173 metr masofada dala tuproq yoʻlini kesib oʻtib, yoʻl boʻyida joylashgan 14-nuqtaga tutashadi, (shimoliy kenglik 40°55'26,154'', sharqiy uzoqlik 69°37'50,326'');

14-nuqtadan chegara chizigʻi dala tuproq yoʻlining gʻarb tomoni bilan janubiy-janubiy-sharqiy yoʻnalishda 243 metr masofada dala tuproq yoʻlini kesib oʻtib, yoʻl boʻyida joylashgan 15-nuqtaga tutashadi, (shimoliy kenglik 40°55'18,773'', sharqiy uzoqlik 69°37'53,901'');

15-nuqtadan chegara toʻgʻri chiziq orqali gʻarbiy-shimoliy-gʻarbiy yoʻnalishda 106 metr masofada dala tuproq yoʻlini, ekin yer maydonini kesib oʻtib, zovur boʻyida joylashgan 16-nuqtaga tutashadi, (shimoliy kenglik 40°55'19,609'', sharqiy uzoqlik 69°37'49,523'');

16-nuqtadan chegara toʻgʻri chiziq orqali gʻarbiy-shimoliy-gʻarbiy yoʻnalishda 816 metr masofada zovurni, ekin yer maydonini kesib oʻtib, ekin yer maydonida joylashgan 17-nuqtaga tutashadi, (shimoliy kenglik 40°55'26,067'', sharqiy uzoqlik 69°37'15,704'');

17-nuqtadan chegara toʻgʻri chiziq orqali shimoliy yoʻnalishda 205 metr masofada ekin yer maydonini kesib oʻtib, ariq boʻyida joylashgan 18-nuqtaga tutashadi, (shimoliy kenglik 40°55'32,696'', sharqiy uzoqlik 69°37'16,566'');

18-nuqtadan chegara toʻgʻri chiziq orqali shimoliy yoʻnalishda tomorqa chegarasi boʻylab 345 metr masofani oʻtib, ariq boʻyida joylashgan 19-nuqtaga tutashadi, (shimoliy kenglik 40°55'43,839'', sharqiy uzoqlik 69°37'18,016'');

19-nuqtadan chegara chizigʻi ariqning suv oqimiga qarshi tomoni boʻylab shimoliy-sharqiy yoʻnalishda 447 metr masofani oʻtib, zovur boʻyida joylashgan 20-nuqtaga tutashadi, (shimoliy kenglik 40°55'55,031'', sharqiy uzoqlik 69°37'30,173'');

20-nuqtadan chegara quruq chiziq orqali umumiy sharqiy-shimoliy-sharqiy yoʻnalishda barcha burilishlarni hisobga olgan holda 165 metr masofani oʻtib, dala tuproq yoʻli boʻyida joylashgan 21-nuqtaga tutashadi, (shimoliy kenglik 40°55'56,884'', sharqiy uzoqlik 69°37'36,539'');

21-nuqtadan chegara quruq chiziq orqali shimoliy-shimoliy-gʻarbiy yoʻnalishda 208 metr masofani oʻtib, boshlangʻich 1-nuqtaga tutashadi, (shimoliy kenglik 40°56'03,346'', sharqiy uzoqlik 69°37'34,045'').

Oʻzbekiston Respublikasi Prezidentining 2022-yil 28-iyundagi PQ-295-son qaroriga 2-ILOVA

Mis va noyob metallarni qayta ishlash orqali yuqori qoʻshilgan qiymatli mahsulotlarni ishlab chiqarishga qaratilgan “Eltech Industrial” texnoparki faoliyatini tashkil etish boʻyicha

“YOʻL XARITASI”

T/r Chora-tadbirlar Amalga oshirish mexanizmi Ijro muddati Nazorat qiluvchi Masʼul ijrochilar I. “Eltech Industrial” texnoparki faoliyatini tashkil etish 1. Mis va noyob metallarni qayta ishlash orqali yuqori qoʻshilgan qiymatli mahsulotlar ishlab chiqarishga qaratilgan “Eltech Industrial” texnoparki boshqaruv direksiyasini tashkil etish. 1. Davlat aktivlarini boshqarish agentligi taʼsischiligida “Eltech Industrial” texnoparkining boshqaruv direksiyasini tashkil etish toʻgʻrisidagi Hukumat qarori loyihasini ishlab chiqish. Bunda: “Eltech Industrial” texnoparki (keyingi oʻrinlarda — Texnopark) boshqaruv direksiyasi faoliyatini muvofiqlashtirish haqida nizomni; Texnoparkni saqlash bilan bogʻliq xarajatlarning 2022-yil uchun hisob-kitoblarini; kelgusi yillar uchun Texnoparkni saqlash bilan bogʻliq xarajatlarni moliyalashtirish manbalarini belgilashni nazarda tutish. 2022-yil iyul Bosh vazirning maslahatchisi B. Islamov Iqtisodiy taraqqiyot vazirligi (B. Abdinazarov), Davlat aktivlarini boshqarish agentligi (A. Ortiqov), Moliya vazirligi (T. Ishmetov) 2. “Eltech Industrial” texnoparki boshqaruv direksiyasi” davlat muassasasini (keyingi oʻrinlarda — Direksiya) oʻrnatilgan tartibda davlat roʻyxatidan oʻtkazish. 2022-yil avgust Bosh vazirning maslahatchisi B. Islamov Davlat aktivlarini boshqarish agentligi (A. Ortiqov), Iqtisodiy taraqqiyot vazirligi (B. Abdinazarov), Adliya vazirligi (R. Davletov) 2. Texnoparkni joylashtirish uchun Toshkent viloyati Ohangaron tumani “Angren” erkin iqtisodiy zonasi hududidagi boʻsh turgan yer maydonini ajratish. 1. Toshkent viloyati Ohangaron tumanidagi “Angren” erkin iqtisodiy zonasi tarkibidagi boʻsh turgan va qishloq xoʻjaligiga moʻljallangan jami 138,0 gektar, shundan 120,7 gektar sugʻoriladigan yer uchastkalarini erkin iqtisodiy zona tarkibidan chiqarish hamda tuman zaxirasiga oʻtkazish; 2022-yil iyul Bosh vazir oʻrinbosari Sh. Gʻaniyev, Bosh vazirning maslahatchisi B. Islamov Toshkent viloyati hokimligi (Z. Mirzayev), Kadastr agentligi (F. Pulatov), Iqtisodiy taraqqiyot vazirligi (B. Abdinazarov) 2. “Angren” erkin iqtisodiy zonasi tarkibidagi boʻsh turgan va qishloq xoʻjaligiga moʻljallangan jami 138,0 gektar qishloq xoʻjaligiga moʻljallangan yerlarni sanoat maqsadlariga moʻljallangan yerlar toifasiga oʻtkazish. 2022-yil iyul 3. Sanoat maqsadlariga moʻljallangan yerlar toifasiga oʻtkazilgan jami 138,0 gektar yer maydonini doimiy foydalanish huquqi asosida Direksiyaga ajratish. 2022-yil avgust 3. Texnopark bosh rejasini ishlab chiqish va tasdiqlash. 1. Texnopark bosh rejasini “ToshboshplanLITI” DUK tomonidan ishlab chiqish. 2. Ishlab chiqilgan Texnopark bosh rejasini tasdiqlash uchun Mis sanoati klasterini tashkil etish va rivojlantirish maxsus komissiyasiga kiritish. 2022-yil sentabr Bosh vazirning birinchi oʻrinbosari A. Ramatov Iqtisodiy taraqqiyot vazirligi (B. Abdinazarov) 4. Texnopark faoliyatini samarali tashkil etish uchun Direksiyaga malakali kadrlarni jalb qilish. 1. Nomzodlar roʻyxatini shakllantirish va ular oʻrtasida tanlov oʻtkazish. 2. Tanlov natijalariga koʻra, malakali mutaxassislar bilan Direksiya shtat birliklarini toʻldirish. 2022-yil avgust Bosh vazirning maslahatchisi B. Islamov Iqtisodiy taraqqiyot vazirligi (B. Abdinazarov), “Oʻzeltexsanoat” uyushmasi (M. Yunusov), Oliy va oʻrta maxsus taʼlim vazirligi (A. Toshqulov) 5. Texnopark faoliyatini ilgʻor xorijiy tajribadan kelib chiqib rivojlantirish uchun xorijiy boshqaruv kompaniyasini jalb qilish. 1. Mis klasteri doirasida jalb qilingan xorijiy konsultantlar bilan birga maxsus sanoat zonalarini boshqarish tajribasiga ega chet el kompaniyalari roʻyxatini shakllantirish va ularga soʻrovnoma yuborish. 2022-yil iyul Bosh vazir oʻrinbosari J. Qoʻchqorov Iqtisodiy taraqqiyot vazirligi (B. Abdinazarov), Investitsiyalar va tashqi savdo vazirligi (Sh. Vafayev) 2. Soʻrovnomaga muvofiq tijorat taklifini taqdim etgan xorijiy kompaniyalar roʻyxatini shakllantirish hamda ular boʻyicha tahliliy materiallarni tayyorlash. 2022-yil avgust 3. Tahlil natijalariga koʻra jalb qilinishi rejalashtirilgan xorijiy kompaniya haqidagi taklifni Mis sanoati klasterini tashkil etish va rivojlantirish maxsus komissiyasiga kelishish uchun kiritish. 2022-yil sentabr 4. Texnoparkni boshqarish, loyihalarni tanlash va joylashtirish boʻyicha xorijiy kompaniya faoliyatini taʼminlash. 2022-yil oktabr oyidan boshlab Bosh vazir oʻrinbosari J. Qoʻchqorov Iqtisodiy taraqqiyot vazirligi (B. Abdinazarov) 6. Texnoparkni tashkil etishning ahamiyati va mazmun-mohiyatini ommaviy axborot vositalarida keng yoritish. 1. Texnopark faoliyati toʻgʻrisida videoroliklar, telekoʻrsatuvlar tayyorlash. 2022-yil sentabr Bosh vazirning maslahatchisi B. Islamov Iqtisodiy taraqqiyot vazirligi (B. Abdinazarov), OʻzMTRK (A. Xadjayev), Oʻzbekiston Milliy axborot agentligi (A. Koʻchimov) 2. Tayyorlangan videoroliklar, telekoʻrsatuvlarni markaziy va hududiy teleradiokanallarda, shuningdek, ijtimoiy tarmoqlarda (kundalik) yoritib borish. 2022 — 2024-yillarda II. Muhandislik-kommunikatsiya va yoʻl infratuzilmasini barpo etish 7. Texnoparkni elektr energiyasi bilan taʼminlash maqsadida 220 kVt kuchlanishli elektr uzatish tarmogʻi va podstansiyasini qurish. 1. Nufuzli tajribaga ega loyiha institutini tanlab olish boʻyicha tender oʻtkazish. 2022-yil avgust Bosh vazirning maslahatchisi B. Islamov “Oʻzbekiston MET” AJ (D. Isaqulov), Energetika vazirligi (A. Axmedxadjayev), Iqtisodiy taraqqiyot vazirligi (B. Abdinazarov, A. Boboyev) 2. Loyiha hujjatlarini ishlab chiqish va ekspertizadan oʻtkazish. 2022-yil noyabr 3. Qurilish ishlarini moliyalashtirish uchun respublika budjetidan imtiyozli ssuda ajratish toʻgʻrisida Hukumat farmoyishi loyihasini Vazirlar Mahkamasiga kiritish. 2022-yil dekabr Moliya vazirligi (T. Ishmetov), Iqtisodiy taraqqiyot vazirligi (B. Abdinazarov) 4. Qurilish ishlarini qisqa muddatlarda va maqbul narxlarda amalga oshirish maqsadida “tayyor holda topshirish” sharti asosida pudratchi tashkilotni tanlash. 2022-yil dekabr “Oʻzbekiston MET” AJ (D. Isaqulov), Energetika vazirligi (A. Axmedxadjayev), Iqtisodiy taraqqiyot vazirligi (B. Abdinazarov, A. Boboyev) 5. Texnoparkni elektr energiyasi bilan taʼminlash maqsadida 220 kVt kuchlanishli elektr uzatish tarmogʻi va podstansiyasini qurish va foydalanishga topshirish. 2023-yil iyun 8. Texnopark hududiga yuqori bosimli tabiiy gaz taʼminoti tarmogʻini tortib kelish. 1. Loyiha hujjatlarini ishlab chiqish. 2022-yil noyabr Bosh vazirning maslahatchisi B. Islamov Energetika vazirligi (A. Axmedxadjayev), “Oʻztransgaz” AJ (B. Narmatov), “Hududgaztaʼminot” (B. Eshmuratov), Iqtisodiy taraqqiyot vazirligi (B. Abdinazarov) 2. Qurilish ishlarini moliyalashtirish uchun respublika budjetidan imtiyozli ssuda ajratish toʻgʻrisida Hukumat farmoyishi loyihasini Vazirlar Mahkamasiga kiritish. 2022-yil dekabr Moliya vazirligi (T. Ishmetov), Iqtisodiy taraqqiyot vazirligi (B. Abdinazarov, A. Boboyev) 3. “Ohangaron-1” gaz taqsimlash shoxobchasida sanoat tarmogʻini hamda shoxobchadan Texnopark hududigacha yetarli hajmda tabiiy gazni yetkazib berish tarmogʻini qurish va foydalanishga topshirish. 2023-yil may “Hududgaztaʼminot” (B. Eshmuratov), “Oʻztransgaz” AJ (B. Narmatov) 9. Texnopark hududiga ichimlik suv va oqova suv taʼminoti tarmoqlarini tortish. 1. Loyiha hujjatlarini ishlab chiqish. 2022-yil oktabr Bosh vazirning birinchi oʻrinbosari A. Ramatov Uy-joy kommunal xizmat koʻrsatish vazirligi (Sh. Hidoyatov), “Oʻzsuvtaʼminot” AJ (S. Saifnazarov), Moliya vazirligi (T. Ishmetov) 2. Texnopark hududigacha yetarli hajmda ichimlik suv va oqova suv tarmogʻini qurish. 2023-yil mart 10. Texnopark ichki va tashqi avtomobil yoʻllarini qurish va rekonstruksiya qilish. 1. Ichki va tashqi avtomobil yoʻllarini qurish boʻyicha loyiha hujjatlarini ishlab chiqish. 2022-yil dekabr Bosh vazirning birinchi oʻrinbosari A. Ramatov Transport vazirligi (I. Maxkamov), Avtomobil yoʻllari qoʻmitasi (A. Abduvaliyev), Moliya vazirligi (T. Ishmetov) 2. Texnopark ichki va tashqi avtomobil yoʻllarini qurish va rekonstruksiya qilish. 2023-yil oktabr 11. Texnopark hududida temir yoʻl tarmogʻini qurish. 1. Texnopark hududiga temir yoʻl tarmogʻi tortish boʻyicha loyiha hujjatlarini ishlab chiqish. 2022-yil oktabr Bosh vazirning birinchi oʻrinbosari A. Ramatov Transport vazirligi (I. Maxkamov), “Oʻzbekiston temir yoʻllari” AJ (X. Xasilov) 2. Texnopark hududida temir yoʻl tarmogʻini qurish va foydalanishga topshirish. 2023-yil mart Transport vazirligi (I. Maxkamov), “Oʻzbekiston temir yoʻllari” AJ (X. Xasilov) 12. “Eltech Industrial” texnoparki boshqaruv direksiyasi” davlat muassasasining maʼmuriy binosini qurish va moddiy-texnika bazasini shakllantirish. 1. Texnopark maʼmuriy binosini yengil konstruksiya asosida qurish loyiha chizmasini ishlab chiqish va qurish ishlarini olib borish. 2022-yil avgust Bosh vazirning maslahatchisi B. Islamov “Olmaliq KMK” AJ (A. Xursanov), Iqtisodiy taraqqiyot vazirligi (B. Abdinazarov) 2. Texnopark maʼmuriy binosini zaruriy aloqa, orgtexnika va mebel inventarlari bilan jihozlash. Bunda, ushbu ishlar “Olmaliq kon-metallurgiya kombinati” aksiyadorlik jamiyatining xayriya mablagʻlari hisobidan amalga oshiriladi. 2022-yil sentabr III. Kadrlarni tayyorlash va qayta tayyorlash, ularning malakasini oshirish hamda sohada tajriba-konstruktorlik va ilmiy izlanishlar koʻlamini kengaytirish 13. Respublikadagi professional va oliy taʼlim muassasalari bilan elektrotexnika, elektronika, kon-metallurgiya va unga bogʻliq sohalarda faoliyat yurituvchi korxona va tashkilotlar oʻrtasida mutaxassislarni tayyorlash boʻyicha dual taʼlimni joriy etish. 1. Elektrotexnika, elektronika, kon-metallurgiya va unga bogʻliq sohalarda mutaxassislarni tayyorlash yuzasidan dual taʼlimni joriy etish boʻyicha xalqaro tajribani oʻrganish. 2022-yil iyul Bosh vazirning maslahatchisi B. Islamov Oliy va oʻrta maxsus taʼlim vazirligi (A. Toshqulov), Iqtisodiy taraqqiyot vazirligi (B. Abdinazarov), Davlat geologiya qoʻmitasi (A. Kadirxodjayev), “Navoiy KMK” AJ (Q. Sanaqulov), “Olmaliq KMK” AJ (A. Xursanov), “Oʻzeltexsanoat” uyushmasi (M. Yunusov) 2. Professional taʼlim muassasalarida dual taʼlim shakli asosida mutaxassislar tayyorlash boʻyicha kasblar va yoʻnalishlar roʻyxatini tasdiqlash hamda oʻquv rejalari va oʻquv dasturlarini shakllantirish. 2022-yil sentabr 3. Oliy taʼlim muassasalarida dual taʼlim tamoyili asosida amaliyotni joriy etish. 2022-yil sentabr 14. Chili Katolik universiteti bilan mahalliy oliy taʼlim muassasalari oʻrtasida hamkorlik aloqalarini oʻrnatish. Chili Katolik universiteti, Navoiy davlat konchilik va texnologiyalar universiteti va Olmaliq shahridagi kon-metallurgiya sohasidagi oliy taʼlim muassasalari oʻrtasida: talabalarni Chili davlatiga magistratura bosqichida oʻqishga yuborish; universitetlar va institutlar olimlari hamkorligida tadqiqot ishlarini olib borishni yoʻlga qoʻyish. 2023-yil iyun oyidan boshlab Bosh vazirning maslahatchisi B. Islamov Oliy va oʻrta maxsus taʼlim vazirligi (A. Toshqulov), Iqtisodiy taraqqiyot vazirligi (B. Abdinazarov), Navoiy davlat konchilik va texnologiyalar universiteti (B. Mardonov), “MISiS” Olmaliq filiali (F. Umarov), Toshkent davlat texnika universiteti Olmaliq filiali (A. Samadov), “El-yurt umidi” jamgʻarmasi (A. Bekmurodov) 15. Madrid politexnika universiteti va Navoiy davlat konchilik va texnologiyalar universiteti oʻrtasida konchilik, metallurgiya, kimyoviy texnologiya yoʻnalishlari boʻyicha akademik almashuvni hamda qoʻshma dasturlarni amalga oshirish. 1. Madrid politexnika universitetida Navoiy davlat konchilik va texnologiyalar universiteti professor-oʻqituvchilarining malakasini oshirish va ilmiy stajirovkalarini amalga oshirishni tizimli yoʻlga qoʻyish. 2022-yil dekabr Bosh vazirning maslahatchisi B. Islamov Oliy va oʻrta maxsus taʼlim vazirligi (A. Toshqulov), Iqtisodiy taraqqiyot vazirligi (B. Abdinazarov), Innovatsion rivojlanish vazirligi (I. Abduraxmonov), “El-yurt umidi” jamgʻarmasi (A. Bekmurodov), Navoiy davlat konchilik va texnologiyalar universiteti (B. Mardonov) 2. Mahalliy va xorijiy moliyaviy institutlar grantlari asosida akademik almashuv va universitet salohiyatini oshirishga oid xalqaro loyihalarni joriy qilish. 2023-yil sentabrdan boshlab 3. Konchilik, metallurgiya va kimyoviy texnologiya tarmoqlari boʻyicha qoʻshma taʼlim dasturlari doirasida kadrlar tayyorlashni yoʻlga qoʻyish. 2023-yil sentabrdan boshlab 16. Texnopark ishtirokchilarining innovatsion, ilmiy-tadqiqot va tajriba-konstruktorlik faoliyatini qoʻllab-quvvatlash mexanizmini joriy etish. Texnopark ishtirokchilarining innovatsion, ilmiy-tadqiqot va tajriba-konstruktorlik faoliyatini qoʻllab-quvvatlash tartibini ishlab chiqish. Bunda: mis va noyob metallar xom ashyosini qayta ishlash borasida energiya va suv resurslaridan samarali foydalanish mezonini; mehnat unumdorligini oshirish mezonini; ekologiya xavfsizligini taʼminlashning minimal talablarini; ilmiy tadqiqotlar va tajriba-konstruktorlik ishlanmalarini joriy qilish boʻyicha loyihalash ishlarini rivojlantirishni; injiniring va texnologiyalar transferi xizmatlarini koʻrsatish (ishlar bajarish)ni ragʻbatlantirishni nazarda tutish. 2022-yil avgust Bosh vazir oʻrinbosari J. Qoʻchqorov Innovatsion rivojlanish vazirligi (I. Abduraxmonov), Moliya vazirligi (T. Ishmetov), Iqtisodiy taraqqiyot vazirligi (B. Abdinazarov), “Navoiy KMK” AJ (Q. Sanaqulov), “Olmaliq KMK” AJ (A. Xursanov) 17. Kon-metallurgiya sohasida ishlab chiqarish jarayonlari samaradorligini oshirish boʻyicha ilgʻor xorijiy tajribalarni va innovatsion ishlanmalarni jalb qilishga ixtisoslashgan Ilgʻor togʻ-kon texnologiyalari markazi faoliyatini tashkil etish. 1. Ilgʻor togʻ-kon texnologiyalari markazini tashkil etishda Chilining CORFO tashkiloti tajribasini oʻrganish. 2022-yil iyul Bosh vazirning maslahatchisi B. Islamov “Navoiy KMK” AJ (Q. Sanaqulov), “Olmaliq KMK” AJ (A. Xursanov), Iqtisodiy taraqqiyot vazirligi (B. Abdinazarov), Davlat geologiya qoʻmitasi (A. Kadirxodjayev) 2. Geologiya, kon-metallurgiya va misni qayta ishlash sanoatini rivojlantirish loyiha ofisi negizida Ilgʻor togʻ-kon texnologiyalari markazi faoliyatini tashkil etish boʻyicha Hukumat qarori loyihasini ishlab chiqib, tasdiqlash uchun kiritish. 2022-yil sentabr 3. Navoiy shahrida Ilgʻor togʻ-kon texnologiyalari markazini tashkil etish. 2022-yil oktabr 4. Ilgʻor togʻ-kon texnologiyalari markaziga malakali kadrlarni jalb chiqish choralarini koʻrish. 2023-yil yanvar IV. Boshqa masalalar 18. Xalqaro moliya tashkilotlari, investitsiya banklari, xalqaro konsultantlar va investorlar, togʻ-kon sanoati kompaniyalari, sanoat uyushmalari hamda tadqiqot institutlari ishtirokida Mis sanoati xalqaro konferensiyasini tashkil etish. 1. Mis sanoati xalqaro konferensiyasini tashkil etish va oʻtkazish konsepsiyasi va dasturini ishlab chiqish. 2022-yil iyun Bosh vazirning maslahatchisi B. Islamov Iqtisodiy taraqqiyot vazirligi (B. Abdinazarov), “Olmaliq KMK” AJ (A. Xursanov), “Navoiy KMK” AJ (Q. Sanaqulov) 2. Xalqaro moliya tashkilotlari, investitsiya banklari, xalqaro konsultantlar va investorlar, togʻ-kon sanoati kompaniyalari, sanoat uyushmalari hamda tadqiqot institutlari roʻyxatini shakllantirish va ularga soʻrovnoma yuborish. 2022-yil iyul 3. Mis sanoati xalqaro konferensiyasini tashkil etish va oʻtkazish dasturini tasdiqlash toʻgʻrisidagi Hukumat qarori loyihasini tasdiqlash uchun Vazirlar Mahkamasiga kiritish. 2022-yil avgust Iqtisodiy taraqqiyot vazirligi (B. Abdinazarov), “Olmaliq KMK” AJ (A. Xursanov), “Navoiy KMK” AJ (Q. Sanaqulov) 4. Mis sanoati xalqaro konferensiyasini oʻtkazish. 2022-yil oktabr 19. Respublika hududlarida misga ishlov berish va undan tayyor buyumlar tayyorlash boʻyicha milliy hunarmandchilik (misgarlik) faoliyatini rivojlantirish. 1. Misga ishlov berish va undan tayyor buyumlar tayyorlash boʻyicha milliy hunarmandchilik (misgarlik) sohasida vujudga kelayotgan muammolarni tahlil qilish. 2022-yil avgust Bosh vazir oʻrinbosari J. Qoʻchqorov Savdo-sanoat palatasi (V. Vahobov), “Hunarmand” uyushmasi (U. Abdullayev), Iqtisodiy taraqqiyot vazirligi (B. Abdinazarov), Moliya vazirligi (O. Nasriddinxujayev) 2. Misga ishlov berish va undan tayyor buyumlar tayyorlash boʻyicha milliy hunarmandchilikni rivojlantirish boʻyicha Hukumat qarori loyihasini Vazirlar Mahkamasiga kiritish. 2022-yil sentabr

Izoh. Oʻzbekiston Respublikasi Prezidentining 2021-yil 24-iyundagi PQ-5159-son qarori bilan tasdiqlangan Mis sanoati klasterini tashkil etish va rivojlantirish boʻyicha maxsus komissiyaga ushbu “yoʻl xaritasi”ga zaruratga koʻra oʻzgartirish va qoʻshimchalar kiritish huquqi beriladi.

Oʻzbekiston Respublikasi Prezidentining 2022-yil 28-iyundagi PQ-295-son qaroriga 3-ILOVA

“Eltech Industrial” texnoparki ishtirokchilari, shuningdek, elektrotexnika, elektronika, kon-metallurgiya va unga bogʻliq sohalarda faoliyat yurituvchi korxona va tashkilotlar bilan dual taʼlim shakli asosida mutaxassislar tayyorlanadigan taʼlim muassasalari

ROʻYXATI

T/r Hudud nomi Tuman (shahar) nomi Taʼlim muassasasining nomi I. Kasb-hunar maktablari 1. Jizzax viloyati Gʻallaorol tumani Gʻallaorol tuman 1-son kasb-hunar maktabi 2. Navoiy viloyati Zarafshon shahri Zarafshon shahar kasb-hunar maktabi 3. Uchquduq tumani Uchquduq tuman kasb-hunar maktabi 4. Navoiy shahri Navoiy shahar kasb-hunar maktabi 5. Samarqand viloyati Qoʻshrabot tumani Qoʻshrabot tuman 2-son kasb-hunar maktabi 6. Surxondaryo viloyati Denov tumani Denov tuman 4-son kasb-hunar maktabi 7. Sariosiyo tumani Sariosiyo tumani 1-son kasb-hunar maktabi 8. Toshkent viloyati Angren shahri Angren shahar 1-son kasb-hunar maktabi 9. Angren shahar 2-son kasb-hunar maktabi 10. Ohangaron shahri Ohangaron shahar kasb-hunar maktabi 11. Olmaliq shahri Olmaliq shahar kasb-hunar maktabi II. Kollejlar 1. Qoraqalpogʻiston Respublikasi Qoʻngʻirot tumani Qoʻngʻirot kimyo sanoati kolleji 2. Qashqadaryo viloyati Dehqonobod tumani Dehqonobod kimyo sanoati kolleji 3. Surxondaryo viloyati Jarqoʻrgʻon tuman Jarqoʻrgʻon toʻqimachilik kolleji 4. Navoiy viloyati Gʻozgʻon shahri Nurota sanoat konchilik kolleji 5. Toshkent viloyati Olmaliq shahri Olmaliq kon-metallurgiya kolleji III. Texnikumlar 1. Qashqadaryo viloyati Gʻuzor tumani Gʻuzor energetika sanoati texnikumi 2. Navoiy viloyati Zarafshon shahri Zarafshon sanoat texnikumi 3. Uchquduq tumani Uchquduq sanoat texnikumi 4. Toshkent viloyati Angren shahri Angren texnologiya texnikumi 5. Angren kon-metallurgiya texnikumi 6. Olmaliq shahri Olmaliq arxitektura-qurilish texnikumi IV. Oliy taʼlim muassasalari (dual taʼlim tamoyili asosida ishlab chiqarish amaliyoti shaklida) 1. Toshkent shahri Toshkent shahri Islom Karimov nomidagi Toshkent davlat texnika universiteti 2. Italiya Piza universitetining Toshkent shahridagi filiali 3. Navoiy viloyati Navoiy shahar Navoiy davlat konchilik va texnologiyalar universiteti 4. Toshkent viloyati Olmaliq shahrida “MISiS” Federal davlat avtonom oliy taʼlim muassasasining Olmaliq shahridagi filiali

Izoh: Oliy va oʻrta maxsus taʼlim vazirligi Oʻzbekiston Respublikasi Prezidentining 2021-yil 24-iyundagi PQ-5159-son qarori bilan tasdiqlangan Mis sanoati klasterini tashkil etish va rivojlantirish boʻyicha Maxsus komissiya bilan kelishgan holda dual taʼlim joriy etiladigan taʼlim muassasalari roʻyxatiga oʻzgartirish va qoʻshimchalar kiritish huquqi ega.