Mahallalarda ijtimoiy xizmatlarni koʻrsatish va ijtimoiy himoyaga muhtoj oilalarga yordam berish tizimini yangi bosqichga koʻtarish hamda xotin-qizlarni kasbga oʻrgatish ishlarini yanada jadallashtirish chora-tadbirlari toʻgʻrisida (PQ-300-son)

29.06.2022

Oʻzbekiston Respublikasi Prezidentining

Qarori

Mahallalarda ijtimoiy muammolarni aniqlash va hal etish ishlarini kompleks tashkil etish, ijtimoiy himoyaga muhtoj aholiga “oilabay” yondashuv tizimini joriy etish, koʻrsatilayotgan ijtimoiy xizmatlarning soni va sifatini oshirish, bunga javobgar boʻlgan vazirlik va idoralarning masʼuliyatini kuchaytirish hamda xotin-qizlarni kasbga oʻqitish tizimini yanada jadallashtirish maqsadida:

1. 2022-yil 1-iyuldan boshlab quyidagilarni nazarda tutuvchi Mahallalarda kompleks yondashuv asosida ijtimoiy xizmatlarni tashkil etish tizimi bosqichma-bosqich joriy qilinsin, bunda:

a) mahallalardagi xotin-qizlar faollariga quyidagi qoʻshimcha vazifalar yuklatilsin:

har bir xonadon ahvolini oʻrganib, oilalardagi haqiqiy holat va ijtimoiy xizmatlarga boʻlgan ehtiyojni aniqlash;

ijtimoiy yordamga muhtoj har bir oilani individual ijtimoiy himoya qilish rejasini ishlab chiqish;

aholi murojaatlari asosida va ijtimoiy himoya rejasining ijrosini oʻrganish jarayonida ijtimoiy xizmatlarning oʻz vaqtida va sifatli koʻrsatilishini doimiy nazorat qilib borish;

murakkab va yuqori texnologik tibbiy amaliyotlarga, nogironligi boʻlgan shaxslarning protez-ortopediya buyumlariga va shu kabi boshqa ijtimoiy xizmatlarga oilalarning ehtiyoji boʻyicha tavsiyalar va buyurtmalar berish;

ijtimoiy himoyaga masʼul barcha idoralar tomonidan ijtimoiy xizmatlar koʻrsatilishi ustidan monitoring olib borish;

b) Mahallalarda kompleks yondashuv tizimi asosida ijtimoiy xizmatlarni joriy qilishni muvofiqlashtirish boʻyicha respublika shtabi (keyingi oʻrinlarda — Muvofiqlashtirish shtabi) 1-ilovaga muvofiq tashkil etilsin va unga ijtimoiy himoyaga muhtoj oilalarni qoʻllab-quvvatlash borasida quyidagi vazifalar yuklatilsin:

oilalardagi ijtimoiy muammolarni hal etishda kompleks yondashuv tizimini yoʻlga qoʻyish;

oilalardagi ijtimoiy muammolarni aniqlash uchun xotin-qizlar faoli bilan hamkorlik qilish;

oilalarni iqtisodiy nochor ahvoldan chiqarish va mehnat orqali barqaror daromad manbai bilan taʼminlash choralarini koʻrish;

sogʻlom hayot tarzini targʻib qilish hamda tibbiy yordamga muhtoj oilalarga oʻz vaqtida sifatli tibbiy koʻmak koʻrsatilishini tashkillashtirish;

yuridik koʻmak koʻrsatish va huquqbuzarliklarning oldini olish choralarini koʻrish.

Muvofiqlashtirish shtabining ishchi organi etib Oila va xotin-qizlar davlat qoʻmitasi belgilansin.

Muvofiqlashtirish shtabi bir hafta muddatda Qoraqalpogʻiston Respublikasi, viloyatlar, Toshkent shahri hamda tuman (shahar)larda mutasaddi vazirlik, idora va Moliya vazirligi huzuridagi budjetdan tashqari Pensiya jamgʻarmasining hududiy boʻlinmalari masʼul xodimlaridan iborat Mahallalarda kompleks yondashuv tizimi asosida ijtimoiy xizmatlarni joriy qilishni muvofiqlashtirish boʻyicha hududiy shtabi (keyingi oʻrinlarda — Hududiy shtab) faoliyatini tashkil etsin.

Hududiy shtablar mahallardagi xotin-qizlar faollari tomonidan fuqarolarning ijtimoiy muammolari boʻyicha kiritilgan tavsiyalar va buyurtmalarning oʻz vaqtida koʻrib chiqilishi va tegishli xizmatlarning koʻrsatilishga masʼul etib belgilansin.

2. Belgilab qoʻyilsinki, 2022-yil 1-noyabrga qadar:

a) mahallalardagi xotin-qizlar faollari tomonidan har ikki haftada Hududiy shtablarga quyidagi maʼlumotlar kiritib boriladi:

mahallalarda xonadonlar ahvoli, oilalardagi haqiqiy holat asosida ularning ijtimoiy xizmatlarga boʻlgan ehtiyoji;

mahallalardagi oilalarni oʻrganish natijalari boʻyicha ularga aniq ijtimoiy xizmat koʻrsatish boʻyicha maʼlumotlar;

murakkab va yuqori texnologik operatsiyalarga, nogironligi boʻlgan shaxslarning protez-ortopediya buyumlariga va shu kabi boshqa ijtimoiy xizmatlarga oilalarning ehtiyoji boʻyicha tavsiyalar va buyurtmalar;

mahallalarda xonadonlar ahvolini kuzatib borish hamda aholi murojaatlari asosida ularga ijtimoiy xizmat koʻrsatilishining oʻz vaqtida va sifatli bajarilishi boʻyicha maʼlumot;

b) Hududiy shtablar mahallalardagi xotin-qizlar faollaridan kelib tushgan maʼlumotlarni oʻz hududi kesimida umumlashtirgan holda ikki kun muddatda ularni Muvofiqlashtirish shtabiga yuboradi;

v) Muvofiqlashtirish shtabi kelib tushgan maʼlumotlar asosida uch kun muddatda haqiqatda ijtimoiy xizmatga ehtiyojmand boʻlgan oilalarga Hududiy shtab aʼzosining masʼul xodimi tomonidan manzilli ijtimoiy xizmat koʻrsatilishini tashkillashtiradi.

3. Moliya vazirligi (T. Ishmetov) Oila va xotin-qizlar davlat qoʻmitasi (Z. Maxkamova) hamda Axborot texnologiyalari va kommunikatsiyalarini rivojlantirish vazirligi (Sh. Shermatov) bilan birgalikda YUNISEFning Oʻzbekistondagi Vakolatxonasi tomonidan koʻrsatilayotgan moliyaviy, texnik va ekspert koʻmagi asosida “Ijtimoiy himoya yagona reyestri” axborot tizimi negizida “Mahallada ijtimoiy xizmat” avtomatlashtirilgan maxsus elektron modulini (keyingi oʻrinlarda — “Mahallada ijtimoiy xizmat” moduli) 2022-yilning 1-avgustiga qadar ishlab chiqsin va uning ishga tushirilishini taʼminlasin.

Belgilansinki, “Mahallada ijtimoiy xizmat” moduli:

mahallalarda oilalarga ijtimoiy xizmatlar koʻrsatishni axborot-kommunikatsion texnologiyalar asosida amalga oshirish boʻyicha maxsus elektron dasturiy taʼminot hisoblanadi;

foydalanuvchisi Oila va xotin-qizlar davlat qoʻmitasi hisoblanadi;

“Ijtimoiy himoya yagona reyestri” axborot tizimining tarkibiy qismi boʻlib, uning funksional imkoniyatlarini kengaytirish, takomillashtirish hamda texnik qoʻllab-quvvatlash Moliya vazirligi tomonidan amalga oshiriladi;

mahallalarda davlat ijtimoiy xizmatini yoki yordamini koʻrsatishda davlat organlari va tashkilotlarining idoralararo elektron hamkorligini amalga oshirishga xizmat qiladi.

4. Belgilansinki:

a) 2022-yil 1-avgustdan boshlab, dastlab Surxondaryo viloyatining mahallalarida “Mahallada ijtimoiy xizmat” moduli orqali ijtimoiy xizmatlar koʻrsatish tizimi joriy etiladi.

Bunda, Surxondaryo viloyatining mahallalaridagi xotin-qizlar faollari YUNISEFning Oʻzbekistondagi Vakolatxonasining grant mablagʻlari hamda Surxondaryo viloyati mahalliy budjetining qoʻshimcha manbalari hisobidan planshetlar bilan taʼminlanadi;

b) 2022-yil 1-noyabrdan boshlab, respublikaning boshqa barcha mahallalarida “Mahallada ijtimoiy xizmat” moduli orqali ijtimoiy xizmatlar koʻrsatish tizimi toʻliq joriy etiladi.

Moliya vazirligi hamda Oila va xotin-qizlar davlat qoʻmitasining Xalqaro taraqqiyot uyushmasi ishtirokidagi “Aholini ijtimoiy muhofaza qilish tizimini mustahkamlash” loyihasi doirasida ajratilgan imtiyozli kredit mablagʻlari hisobidan xarid qilinadigan planshetlarni “Mahallada ijtimoiy xizmat” moduli orqali ijtimoiy xizmatlar koʻrsatish maqsadida mahallalardagi xotin-qizlar faollariga taqdim etish toʻgʻrisidagi taklifi maʼqullansin.

Oila va xotin-qizlar davlat qoʻmitasi raisi Z.B. Maxkamova va moliya vaziri oʻrinbosari J.I. Abruyev mazkur bandda belgilangan vazifalarni samarali va toʻlaqonli amaliyotga tatbiq etish boʻyicha shaxsan masʼul ekanligi belgilab qoʻyilsin.

5. Belgilansinki, mahallalarda xotin-qizlar faollari orqali “Mahallada ijtimoiy xizmat” modulini joriy etishning quyidagi uch bosqichini nazarda tutuvchi tartib belgilanadi:

a) birinchi bosqichda — “Mahallada ijtimoiy xizmat” moduli doirasida mahallalarda ijtimoiy xizmatlarga muhtoj boʻlgan oilalarning ehtiyojmandlik darajasi avtomatlashtirilgan tarzda obyektiv qaror qabul qilish orqali baholanadi.

Bunda, oilalarning maʼlum bir turdagi davlat ijtimoiy xizmatiga boʻlgan ehtiyoji fuqarolardan qoʻshimcha hujjatlar talab etmagan holda soʻrovnoma tarzda baholash mezonlariga muvofiq aniqlanadi;

b) ikkinchi bosqichda — “Mahallada ijtimoiy xizmat” modulida har bir ijtimoiy xizmatga muhtoj boʻlgan oilalar uchun individual ijtimoiy rejalar tuziladi.

Bunda, individual ijtimoiy rejalar oilalarga kompleks yoki maʼlum bir turdagi ijtimoiy xizmat koʻrsatilishiga qarab tuziladi;

v) uchinchi bosqichda — individual ijtimoiy rejalarga muvofiq oilalarga ijtimoiy xizmatlarning koʻrsatilishi jarayoni “Mahallada ijtimoiy xizmat” moduli orqali monitoring qilinadi.

Oila va xotin-qizlar davlat qoʻmitasi (Z. Maxkamova) Mahalla va nuroniylarni qoʻllab-quvvatlash vazirligi (S. Turdiyev), Moliya vazirligi (T. Ishmetov) hamda boshqa vazirlik va idoralar bilan birgalikda bir oy muddatda yangi tizim asosida muhtoj oila va fuqarolarning muammolarini kompleks oʻrganish va ularni hal etishga koʻmaklashish, ijtimoiy himoyaga muhtoj aholiga maqsadli yordam berish ishlarining mahallalardagi xotin-qizlar faollari tomonidan tashkil etilishini nazarda tutuvchi Hukumat qarori loyihasini Vazirlar Mahkamasiga kiritsin.

6. Oila va xotin-qizlar davlat qoʻmitasi (Z. Maxkamova):

Moliya vazirligi (T. Ishmetov) bilan birgalikda 2022-yil 1-noyabrga qadar planshetlarni “Mahallada ijtimoiy xizmat” modulidan foydalanilish dasturiy taʼminoti bilan taʼminlash choralarini koʻrsin;

Qoraqalpogʻiston Respublikasi Vazirlar Kengashi raisi, viloyatlar va Toshkent shahar hokimlari bilan birgalikda joylarda “Mahallada ijtimoiy xizmat” modulining samarali ishlashini va ijtimoiy himoyaga muhtoj aholiga yangi tizim asosida ijtimoiy xizmat koʻrsatish tizimini mahalla darajasida muvofiqlashtirib borsin.

7. Mahallalarda ijtimoiy xizmatlarni koʻrsatish va ijtimoiy himoyaga muhtoj oilalarga yordam berish tizimini yangi bosqichga koʻtarish hamda xotin-qizlarni kasbga oʻrgatish ishlarini yanada jadallashtirish boʻyicha “yoʻl xaritasi” 2-ilovaga muvofiq tasdiqlansin.

8. Xotin-qizlarni, eng avvalo, ijtimoiy himoyaga muhtoj oilalar tarkibidagi xotin-qizlarni kasb-hunarga oʻrgatish orqali ularni iqtisodiy nochor qatlamdan chiqarish hamda ular orasidagi ishsizlik darajasini kamaytirish maqsadida quyidagilar tasdiqlansin:

a) quyidagilarni nazarda tutuvchi Davlat va nodavlat taʼlim tashkilotlarida davlat buyurtmasi asosida xotin-qizlarni kasbga oʻqitish tartibi toʻgʻrisidagi nizom 3-ilovaga muvofiq:

xotin-qizlarni kasbga oʻqitish boʻyicha davlat buyurtmasini shakllantirish;

davlat buyurtmasi asosida xotin-qizlarni kasbga oʻqitishga yoʻnaltirish;

davlat buyurtmasi asosida kasbga oʻqitilgan xotin-qizlarning malaka darajasini baholash va ularga malaka sertifikatini berish;

xotin-qizlarni kasbga oʻqitishni moliyalashtirish;

b) 2022-2023-yillarda xotin-qizlarni kasb-hunarga oʻqitish va ularning bandligini taʼminlash prognoz koʻrsatkichlari 4-ilovaga muvofiq;

v) quyidagilarni nazarda tutuvchi Davlat buyurtmasi asosida umumiy oʻrta taʼlim maktablarining bitiruvchi sinf, akademik litsey va professional taʼlim muassasalarining bitiruvchi kurs oʻquvchi-qizlarini axborot texnologiyalari yoʻnalishlarida qoʻshimcha kurslarda oʻqitish tartibi toʻgʻrisidagi nizom 5-ilovaga muvofiq:

oʻquvchi-qizlarni axborot texnologiyalari boʻyicha qoʻshimcha kurslarda oʻqitish boʻyicha davlat buyurtmasini shakllantirish;

davlat buyurtmasi asosida oʻquvchi-qizlarni axborot texnologiyalari boʻyicha qoʻshimcha kurslarga yoʻnaltirish;

davlat buyurtmasi asosida qoʻshimcha kursda oʻqitilgan oʻquvchi-qizlarning malaka darajasini baholash va ularga malaka sertifikatini berish;

oʻquvchi-qizlarni qoʻshimcha kursga oʻqitishni moliyalashtirish.

9. Belgilab qoʻyilsinki:

mehnat bozorida teng sharoitlarda raqobatlasha olmaydigan xotin-qizlarni kasbga oʻqitish bilan bogʻliq xarajatlar Bandlikka koʻmaklashish davlat jamgʻarmasi mablagʻlari hisobidan hamda tegishli vazirlik va idoralarning ushbu maqsadlar uchun ajratilgan mablagʻlari hisobidan moliyalashtiriladi. Bunda, nodavlat taʼlim tashkilotlarida oʻquv kurslarini tamomlagan har bir bitiruvchi xotin-qizga kasbga oʻqitish uchun sarflangan xarajatlarning 70 foizi, biroq har bir bitiruvchiga bazaviy hisoblash miqdorining 4 barobaridan oshmagan miqdori davlat tomonidan qoplab beriladi;

bitiruvchi kurs oʻquvchi-qizlarni qoʻshimcha kurslarga oʻqitish bilan bogʻliq xarajatlar Bandlikka koʻmaklashish davlat jamgʻarmasi hamda Oila va xotin-qizlarni qoʻllab-quvvatlash davlat maqsadli jamgʻarmasi mablagʻlari hisobidan moliyalashtiriladi. Bunda, axborot texnologiyalari yoʻnalishida nodavlat taʼlim tashkilotlarida oʻqigan va tegishli malakaga ega boʻlgan oʻquvchi-qizlarni oʻqitish xarajatlarining 70 foizi, biroq har bir bitiruvchiga bazaviy hisoblash miqdorining 4 barobaridan oshmagan miqdori davlat tomonidan qoplab beriladi;

Bandlik va mehnat munosabatlari vazirligi tizimidagi kasb-hunarga oʻqitish markazlarining boʻsh turgan bino-inshootlari tadbirkorlik subyektlariga nodavlat taʼlim tashkilotlari va “Oʻquv-ishlab chiqarish poligoni”ni tashkil etish hamda xotin-qizlarni kasbga tayyorlash, qayta tayyorlash va ularning bandligiga koʻmaklashish uchun qonunchilikda belgilangan tartibda ijaraga beriladi;

xotin-qizlarni kasb-hunarga tayyorlash faoliyatini amalga oshiruvchi muhandis-ustalarning malakasi xorijiy mutaxassislarni jalb etgan holda oshirib boriladi.

10. Bandlik va mehnat munosabatlari vazirligi bir oy muddatda “Bandlik xizmati” axborot tizimida xotin-qizlarni kasbga oʻqitish boʻyicha quyidagilarni nazarda tutuvchi alohida modul ishlab chiqsin:

xotin-qizlarning oʻquv yoʻnalishlari, oʻqish muddatlari, kasbga oʻqitish kurslaridagi davomati;

xotin-qizlarga ajratilgan mablagʻlar (subsidiya, stipendiya), ularning oʻqishni tugatgan vaqti hamda bandligi holati kabi maʼlumotlar.

11. Oila va xotin-qizlar davlat qoʻmitasi (Z. Maxkamova) bir oy muddatda:

Oila va xotin-qizlar ilmiy-tadqiqot instituti hamda YUNISEFning Oʻzbekistondagi vakolatxonasi bilan kelishgan holda mahallalardagi xotin-qizlar faollarini “Mahallada ijtimoiy xizmat” modulida ishlash boʻyicha amaliy koʻnikmalarni shakllantirish” mavzusidagi oʻquv-kurslarida oʻqitish, shu jumladan ularga masofaviy tarzdagi seminarlarni tashkil etish choralarini koʻrsin;

Moliya vazirligi, Oliy va oʻrta maxsus taʼlim vazirligi va Davlat boshqaruvi akademiyasi bilan birgalikda mahallalardagi xotin-qizlar faollari hamda ijtimoiy himoyaga masʼul vazirlik va idoralarning mutaxassislarida kompleks yondashuv tizimi asosida ijtimoiy xizmatlarni koʻrsatishga oid bilim va amaliy koʻnikmalarni shakllantirish maqsadida anʼanaviy va masofaviy oʻquv kurslarini tashkil qilish choralarini koʻrsin.

Belgilansinki, oʻquv kurslari va seminarlarni oʻtkazish bilan bogʻliq xarajatlar Oila va xotin-qizlarni qoʻllab-quvvatlash davlat maqsadli jamgʻarmasi hamda qonunchilik bilan taqiqlanmagan mablagʻlar hisobidan moliyalashtiriladi.

12. Boshqaruv samaradorligi agentligi (U. Xusainov) Oila va xotin-qizlar qoʻmitasi (Z. Maxkamova) bilan birgalikda mahallalardagi xotin-qizlar faollarini ikki yillik mehnat faoliyatining ijobiy natijalarini hisobga olgan holda ularning xizmat pogʻonasini koʻtarish boʻyicha vazirlik va idoralar, shuningdek, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga takliflar kiritib borsin.

13. Oila va xotin-qizlar davlat qoʻmitasi (Z. Maxkamova) ijtimoiy himoyaga muhtoj aholiga kompleks yondashuv tizimi asosida yordam berish ishlarini tashkil qilish va takomillashtirishda keng jamoatchilik, shu jumladan fuqarolik jamiyati institutlari, xalqaro va boshqa tashkilotlar bilan hamkorligini yoʻlga qoʻysin.

14. Belgilansinki, masʼul vazirlik va idoralar boʻlinmalari tomonidan tegishliligi boʻyicha kelib tushgan ijtimoiy xizmatlarni koʻrsatish toʻgʻrisidagi yoʻllanmalar oʻz vaqtida koʻrib chiqilishi, tegishli ijtimoiy xizmatlarning toʻlaqonli koʻrsatilishiga masʼul vazirlik va idoralarning birinchi rahbarlari shaxsan javobgar hisoblanadi.

15. Oila va xotin-qizlar davlat qoʻmitasi, Iqtisodiy taraqqiyot va kambagʻallikni qisqartirish vazirligi, Moliya vazirligi, Oʻzbekiston milliy teleradiokompaniyasi, Oʻzbekiston milliy axborot agentligi, Axborot va ommaviy kommunikatsiyalar agentligi manfaatdor vazirlik va idoralar bilan birgalikda ushbu qarorning mazmun va mohiyati, ahamiyati hamda vazifalarini ommaviy axborot vositalarida va Internet tarmogʻida keng yoritish ishlarini tashkil qilsin.

16. Oila va xotin-qizlar davlat qoʻmitasi bir oy muddatda manfaatdor vazirlik va idoralar bilan birgalikda qonunchilik hujjatlariga mazkur qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

17. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosarlari J.A. Qoʻchqorov va Z.B. Maxkamova zimmasiga yuklansin.

Amalga oshirilayotgan chora-tadbirlar natijadorligi yuzasidan har olti oy yakunlari boʻyicha Oʻzbekiston Respublikasi Prezidentiga axborot berib borilsin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2022-yil 29-iyun,

PQ-300-son

Oʻzbekiston Respublikasi Prezidentining 2022-yil 29-iyundagi PQ-300-son qaroriga 1-ILOVA

Mahallalarda kompleks yondashuv tizimi asosida ijtimoiy xizmatlarni joriy qilishni muvofiqlashtirish boʻyicha Respublika shtabi

TARKIBI

1. J.A. Qoʻchqorov — Bosh vazir oʻrinbosari, Shtab rahbari 2. Z.B. Maxkamova — Bosh vazir oʻrinbosari — Oila va xotin-qizlar davlat qoʻmitasining raisi, Shtab rahbarining oʻrinbosari 3. S. Turdiyev — Mahalla va nuroniylarni qoʻllab-quvvatlash vazirining birinchi oʻrinbosari 4. S.B. Artikova — Bosh prokuror oʻrinbosari 5. B.T. Abdullayev — Ichki ishlar vaziri oʻrinbosari 6. J.I. Abruyev — Moliya vaziri oʻrinbosari 7. M.M. Mirzayev — Davlat soliq qoʻmitasi raisining birinchi oʻrinbosari 8. M.M. Ikramov — Adliya vaziri oʻrinbosari 9. E.I. Basitxanova — Sogʻliqni saqlash vaziri oʻrinbosari 10. A.K. Inakov — Tibbiy-ijtimoiy xizmatlarni rivojlantirish agentligi direktori 11. Lavozimi boʻyicha — Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari

Izoh. Shtab aʼzolari boshqa ishga oʻtgan taqdirda, uning tarkibiga ushbu lavozimlarga yangi tayinlangan yoki zimmasiga tegishli funksiyalarni bajarish yuklangan shaxslar kiritiladi.

Oʻzbekiston Respublikasi Prezidentining 2022-yil 29-iyundagi PQ-300-son qaroriga 2-ILOVA

Mahallalarda ijtimoiy xizmatlarni koʻrsatish va ijtimoiy himoyaga muhtoj oilalarga yordam berish tizimini yangi bosqichga koʻtarish hamda xotin-qizlarni kasbga oʻrgatish ishlarini yanada jadallashtirish boʻyicha

“YOʻL XARITASI”

T/r Tadbirlar nomi Amalga oshirish mexanizmi Muddati Masʼul ijrochilar I. Mahallalarda ijtimoiy xizmatlarni koʻrsatish va ijtimoiy himoyaga muhtoj oilalarga yordam berish 1. Mahallalarda kompleks yondashuv tizimi asosida ijtimoiy xizmatlarni joriy qilishni muvofiqlashtirish boʻyicha respublika shtabi faoliyatini tashkil etish. Qoraqalpogʻiston Respublikasi, viloyatlar, Toshkent shahri hamda tuman (shahar)larda mutasaddi vazirlik, idora va Moliya vazirligi huzuridagi budjetdan tashqari Pensiya jamgʻarmasining hududiy boʻlinmalari masʼul xodimlaridan iborat Mahallalarda kompleks yondashuv tizimi asosida ijtimoiy xizmatlarni joriy qilishni muvofiqlashtirish boʻyicha hududiy shtabi faoliyatini tashkil etish. Bir hafta muddatda Iqtisodiy taraqqiyot va kambagʻallikni qisqartirish vazirligi (J. Qoʻchqorov), Oila va xotin-qizlar davlat qoʻmitasi (Z. Maxkamova) Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 2. Ijtimoiy himoya yagona reyestri” axborot tizimi negizida “Mahallada ijtimoiy xizmat” avtomatlashtirilgan maxsus elektron moduli faoliyatini tashkil etish. “Mahallada ijtimoiy xizmat” moduli asosida: mahallalarda oilalarga ijtimoiy xizmatlar koʻrsatish; mahallalarda davlat ijtimoiy xizmatini yoki yordamini koʻrsatishda davlat organlari va tashkilotlarining idoralararo elektron hamkorligini amalga oshirish. 2022-yilning 1-avgustiga qadar Moliya vazirligi (T. Ishmetov), Oila va xotin-qizlar davlat qoʻmitasi (Z. Maxkamova), Axborot texnologiyalari va kommunikatsiyalarini rivojlantirish vazirligi (Sh. Shermatov) 3. Surxondaryo viloyatining mahallalarida “Mahallada ijtimoiy xizmat” moduli orqali ijtimoiy xizmatlar koʻrsatish tizimi joriy etish. Surxondaryo viloyatining mahallalaridagi xotin-qizlar faollarini YUNISEFning Oʻzbekistondagi Vakolatxonasining grant mablagʻlari hamda Surxondaryo viloyati mahalliy budjetining qoʻshimcha manbalari hisobidan planshetlar bilan taʼminlash. 2022-yil 1-avgustdan boshlab Oila va xotin-qizlar davlat qoʻmitasi (Z. Maxkamova), Moliya vazirligi (J. Abruyev), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, YUNISEFning Oʻzbekistondagi Vakolatxonasi (kelishuv asosida) 4. Respublikaning barcha mahallalarida “Mahallada ijtimoiy xizmat” moduli orqali ijtimoiy xizmatlar koʻrsatish tizimi toʻliq joriy etish. Xalqaro taraqqiyot uyushmasi ishtirokidagi “Aholini ijtimoiy muhofaza qilish tizimini mustahkamlash” loyihasi doirasida ajratilgan imtiyozli kredit mablagʻlari hisobidan planshetlarni xarid qilish hamda ularni “Mahallada ijtimoiy xizmat” moduli orqali ijtimoiy xizmatlar koʻrsatish maqsadida mahallalardagi xotin-qizlar faollariga taqdim etish. 2022-yil 1-noyabrdan boshlab Oila va xotin-qizlar davlat qoʻmitasi (Z. Maxkamova), Moliya vazirligi (J. Abruyev), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, YUNISEFning Oʻzbekistondagi Vakolatxonasi (kelishuv asosida) 5. Yangi tizim asosida muhtoj oila va fuqarolarning muammolarini kompleks oʻrganish va ularni hal etishga koʻmaklashish, ijtimoiy himoyaga muhtoj aholiga maqsadli yordam berish ishlarining mahallalardagi xotin-qizlar faollari tomonidan tashkil etilishini yoʻlga qoʻyish. Hukumat qarori loyihasini ishlab chiqish hamda Vazirlar Mahkamasiga oʻrnatilgan tartibda kiritish. Bir oy muddatda Oila va xotin-qizlar davlat qoʻmitasi (Z. Maxkamova), Mahalla va nuroniylarni qoʻllab-quvvatlash vazirligi (S. Turdiyev), Moliya vazirligi (T. Ishmetov), manfaatdor vazirlik va idoralar 6. Planshetlarni “Mahallada ijtimoiy xizmat” modulidan foydalanilish dasturiy taʼminoti bilan taʼminlash. Qoraqalpogʻiston Respublikasi Vazirlar Kengashi raisi, viloyatlar va Toshkent shahar hokimlari bilan birgalikda joylarda “Mahallada ijtimoiy xizmat” modulining samarali ishlashini va ijtimoiy himoyaga muhtoj aholiga yangi tizim asosida ijtimoiy xizmat koʻrsatish tizimini mahalla darajasida muvofiqlashtirib borish. 2022-yil 1-noyabrga qadar Oila va xotin-qizlar davlat qoʻmitasi (Z. Maxkamova), Moliya vazirligi (T. Ishmetov), Axborot texnologiyalari va kommunikatsiyalarini rivojlantirish vazirligi (Sh. Shermatov) 7. Yangi tizim asosida Mahallalardagi xotin-qizlar faollari hamda ijtimoiy himoyaga masʼul vazirlik va idoralarning mutaxassislarida tegishli koʻnikmalarni shakllantirish. 1. Mahallalardagi xotin-qizlar faollarini “Mahallada ijtimoiy xizmat” modulida ishlash boʻyicha amaliy koʻnikmalarni shakllantirish” mavzusidagi oʻquv-kurslarida oʻqitish, shu jumladan ularga masofaviy tarzdagi seminarlarni tashkil etish choralarini koʻrish. 2. Mahallalardagi xotin-qizlar faollari hamda ijtimoiy himoyaga masʼul vazirlik va idoralarning mutaxassislarida kompleks yondashuv tizimi asosida ijtimoiy xizmatlarni koʻrsatishga oid bilim va amaliy koʻnikmalarni shakllantirish maqsadida anʼanaviy va masofaviy oʻquv kurslarini tashkil qilish choralarini koʻrish. Bir oy muddatda Oila va xotin-qizlar davlat qoʻmitasi (Z. Maxkamova), Moliya vazirligi (J. Abruyev), YUNISEFning Oʻzbekistondagi Vakolatxonasi (kelishuv asosida), manfaatdor vazirlik va idoralar II. Xotin-qizlarni kasbga oʻrgatish ishlarini yanada jadallashtirish 8. “Bandlik xizmati” axborot tizimida xotin-qizlarni kasbga oʻqitish boʻyicha quyidagilarni nazarda tutuvchi alohida modul ishlab chiqish. Quyidagilarni nazarda tutish: xotin-qizlarning oʻquv yoʻnalishlari, oʻqish muddatlari, kasbga oʻqitish kurslaridagi davomati; xotin-qizlarga ajratilgan mablagʻlar (subsidiya, stipendiya), ularning oʻqishni tugatgan vaqti hamda bandligi holati kabi maʼlumotlar. Bir oy muddatda Bandlik va mehnat munosabatlari vazirligi (N. Xusanov) 9. Mehnat bozorida teng sharoitlarda raqobatlasha olmaydigan xotin-qizlarni kasbga oʻqitish boʻyicha davlat buyurtmasini shakllantirib borish. Mehnat bozorining joriy va istiqboldagi ehtiyojlari asosida xotin-qizlarni kasbga oʻqitish uchun kelgusi yilning I yarim yilligi uchun har yili dekabrga qadar, II yarim yilligi uchun har yili iyunga qadar davlat buyurtmasini shakllantirish. Har yili iyun va dekabr oylarida Bandlik va mehnat munosabatlari vazirligi (N. Xusanov), Oila va xotin-qizlar davlat qoʻmitasi (Z. Maxkamova), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 10. Umumiy oʻrta taʼlim maktablarining bitiruvchi sinf, akademik litsey va professional taʼlim muassasalarining bitiruvchi kurs oʻquvchi-qizlarini axborot texnologiyalari yoʻnalishlarida qoʻshimcha kurslarda oʻqitish boʻyicha davlat buyurtmasini shakllantirib borish. Umumiy oʻrta taʼlim maktablari, kasb-hunar maktablari, akademik litseylar va professional taʼlim muassasalari bitiruvchi kurs oʻquvchi qizlarini asosiy taʼlim jarayoniga taʼsir etmagan holda qisqa muddatli davlat va nodavlat taʼlim tashkilotlarida axborot texnologiyalari boʻyicha tashkil etilgan taʼlim kurslarida oʻqitish boʻyicha har yili dekabr oyida davlat buyurtmasini shakllantirish. Har yili dekabr oyida Oila va xotin-qizlar davlat qoʻmitasi (Z. Maxkamova), Bandlik va mehnat munosabatlari vazirligi (N. Xusanov), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari

Oʻzbekiston Respublikasi Prezidentining 2022-yil 29-iyundagi PQ-300-son qaroriga 3-ILOVA

Davlat va nodavlat taʼlim tashkilotlarida davlat buyurtmasi asosida xotin-qizlarni kasbga oʻqitish tartibi toʻgʻrisida

NIZOM

1-bob. Umumiy qoidalar

1. Mazkur Nizom mehnat bozorining joriy va istiqboldagi ehtiyojlari asosida shakllantirilgan davlat buyurtmasiga muvofiq davlat va nodavlat taʼlim tashkilotlarida xotin-qizlarni kasbga oʻqitish hamda ularga malaka sertifikati berishni tashkil etish tartibini belgilaydi.

2. Ushbu Nizomda quyidagi asosiy tushunchalardan foydalaniladi:

davlat va nodavlat taʼlim tashkilotlari — davlat buyurtmasi asosida xotin-qizlarni kasbga oʻqitish boʻyicha xizmat koʻrsatuvchi tashkilotlar;

xotin-qizlarni kasbga oʻqitish boʻyicha davlat buyurtmasi (keyingi oʻrinlarda — davlat buyurtmasi) — mehnat bozorining joriy va istiqboldagi ehtiyojlari asosida xotin-qizlarni kasbga oʻqitish uchun beriladigan buyurtma.

3. Xotin-qizlarni kasbga oʻqitish quyidagi hollarda amalga oshiriladi:

kasbi (mutaxassisligi) mavjud boʻlmaganda;

mavjud kasbiy koʻnikmalariga maqbul ish yoʻqligi sababli kasbni (mutaxassislikni) oʻzgartirish zarurati boʻlganda;

kasbiy koʻnikmalari mavjud boʻlmaganligi yoki yetarli boʻlmaganligi, kasbiga (mutaxassisligiga) doir talablar oʻzgartirilganligi bois malaka oshirishi zarur boʻlganda;

avvalgi kasbi (mutaxassisligi) boʻyicha ish bajarish qobiliyati yoʻqotilganda.

4. Xotin-qizlarni kasbga oʻqitish:

Bandlik va mehnat munosabatlari vazirligi tizimidagi “Ishga marhamat” monomarkazlari, kasb-hunarga oʻqitish markazlari hamda mahallalarda tashkil etilgan kasbga oʻqitish maskanlarida;

vazirlik va idoralar tizimidagi professional taʼlim muassasalarida tashkil etilgan qisqa muddatli kasb-hunarga oʻqitish kurslarida;

nodavlat kasb-hunarga oʻqitish tashkilotlarida amalga oshiriladi.

2-bob. Davlat buyurtmasini shakllantirish

5. Davlat va nodavlat taʼlim tashkilotlarida davlat buyurtmasi asosida xotin-qizlarni kasbga oʻqitish ushbu Nizomga ilovada keltirilgan sxemaga muvofiq amalga oshiriladi.

6. Tuman (shahar) hokimliklari, aholi bandligiga koʻmaklashish markazlari oila va xotin-qizlar boʻlimlari bilan birgalikda kelgusi yilning I yarim yilligi uchun har yili 10-dekabrga qadar, II yarim yilligi uchun har yili 10-iyunga qadar:

hududlarda faoliyat yuritayotgan davlat va nodavlat tashkilotlarining malakali kadrlarga boʻlgan talab va ehtiyojlarini oʻrganadi;

kasbga oʻqitishga ehtiyoji boʻlgan xotin-qizlarning kasb yoʻnalishlari kesimida davlat buyurtmasini ishlab chiqadi;

ishlab chiqilgan davlat buyurtmasini tasdiqlash uchun Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi Kasbiy malaka va bilimlarni rivojlantirish boʻyicha hududiy kengashlarga (keyingi oʻrinlarda — hududiy kengashlar) taqdim etadi.

7. Hududiy kengashlar taqdim etilgan davlat buyurtmalarini umumlashtirib, tahlil qiladi va besh kun ichida tasdiqlaydi.

Davlat buyurtmasiga tegishli oʻzgartirish va qoʻshimchalar kiritish hududiy kengashlar tomonidan amalga oshiriladi.

3-bob. Davlat buyurtmasi asosida xotin-qizlarni kasbga oʻqitishga yoʻnaltirish

8. Qoraqalpogʻiston Respublikasi Oila va xotin-qizlar qoʻmitasi, viloyatlar va Toshkent shahar oila va xotin-qizlar boshqarmalari Qoraqalpogʻiston Respublikasi Bandlik va mehnat munosabatlari vazirligi, viloyatlar va Toshkent shahar bandlik bosh boshqarmalari bilan birgalikda:

ushbu Nizomning 4-bandida koʻrsatilgan kasbga oʻqitish boʻyicha belgilangan taʼlim tashkilotlarining yillik oʻqitish ehtiyojlaridan kelib chiqqan holda oʻqitish taqsimotini ishlab chiqadi;

oʻqitish taqsimotiga asosan taʼlim tashkilotlarida xotin-qizlarni kasbga oʻqitish ishlarini tashkil etadi;

kasbga oʻqitish jarayonlarini monitoring qilib boradi;

kasbga oʻqitilgan xotin-qizlarning malaka darajasini baholash uchun Malakani baholash markazlariga yuboradi.

4-bob. Davlat buyurtmasi asosida kasbga oʻqitilgan xotin-qizlarning malaka darajasini baholash

9. Qoraqalpogʻiston Respublikasi Oila va xotin-qizlar qoʻmitasi, viloyatlar hamda Toshkent shahar oila va xotin-qizlar boshqarmalari, Qoraqalpogʻiston Respublikasi Bandlik va mehnat munosabatlari vazirligi, viloyatlar va Toshkent shahar bandlik bosh boshqarmalari davlat buyurtmasi asosida davlat va nodavlat taʼlim tashkilotlarida kasbga oʻqigan xotin-qizlarning malaka darajasini baholash uchun ularning malakani baholash markazlariga, shu jumladan “Ishga marhamat” monomarkazlarida tashkil etilgan malakani baholash markazlariga yuborilishiga koʻmaklashadi.

Bunda, nodavlat taʼlim tashkilotlarida kasbga oʻqigan xotin-qizlar malaka darajasini baholatish uchun oʻzlari tegishli tartibda ixtiyoriy ravishda murojaat qilishi mumkin.

10. Malakani baholash markazlari tomonidan:

Oʻzbekiston Respublikasi Prezidentining 2020-yil 31-dekabrdagi PQ-4939-son qarori bilan tasdiqlangan Malaka darajalariga erishish sxemasi asosida kasbga oʻqitilgan xotin-qizlar malakasi baholanadi;

baholashdan muvaffaqiyatli oʻtgan xotin-qizlarga oʻn kun ichida malaka sertifikati beriladi.

5-bob. Xotin-qizlarni kasbga oʻqitishni moliyalashtirish

11. Xotin-qizlarni kasbga oʻqitish bilan bogʻliq faoliyat Bandlikka koʻmaklashish davlat jamgʻarmasi mablagʻlari hisobidan hamda tegishli vazirlik va idoralarning ushbu maqsadlar uchun ajratilgan mablagʻlari hisobidan tasdiqlangan xarajatlar smetasi doirasida moliyalashtiriladi.

Bunda, nodavlat taʼlim tashkilotlarida oʻquv kurslarini tamomlagan har bir bitiruvchi xotin-qizga kasbga oʻqitish uchun sarflangan xarajatlarning 70 foizi, biroq har bir bitiruvchiga bazaviy hisoblash miqdorining 4 barobaridan oshmagan miqdori davlat tomonidan qoplab beriladi.

6-bob. Yakunlovchi qoida

12. Mazkur Nizom talablarining buzilishida aybdor boʻlgan shaxslar qonunchilikda belgilangan tartibda javobgar boʻladilar.

Davlat va nodavlat taʼlim muassasalarida davlat buyurtmasi asosida xotin-qizlarni kasbga oʻqitish tartibi toʻgʻrisidagi nizomga ILOVA

Davlat va nodavlat taʼlim muassasalarida davlat buyurtmasi asosida xotin-qizlarni kasbga oʻqitishni amalga oshirish

SXEMASI

Bosqichlar Subyektlar Tadbirlar Bajarish muddatlari 1-bosqich Tuman (shahar) hokimliklari, aholi bandligiga koʻmaklashish markazlari, oila va xotin-qizlar boʻlimlari 1. Hududlarda faoliyat yuritayotgan davlat va nodavlat tashkilotlarining malakali kadrlarga boʻlgan talab va ehtiyojlarini oʻrganadi. 2. Kasbga oʻqitishga ehtiyoji boʻlgan xotin-qizlarning kasb yoʻnalishlari kesimida davlat buyurtmasini ishlab chiqadi. 3. Ishlab chiqilgan davlat buyurtmasini hududiy kengashlarga tasdiqlash uchun kiritadi. Har yili 10-dekabrga qadar (kelgusi yilning I yarim yilligi uchun), Har yili 10-iyunga qadar (II yarim yillik uchun) 2-bosqich Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining Kasbiy malaka va bilimlarni rivojlantirish boʻyicha hududiy kengashlari 1. Taqdim etilgan xotin-qizlarni kasbga oʻqitish boʻyicha davlat buyurtmalarini umumlashtirib, tahlil qiladi. 2. Davlat buyurtmasini tasdiqlaydi. 5 kun ichida 3-bosqich Qoraqalpogʻiston Respublikasi Oila va xotin-qizlar qoʻmitasi, viloyatlar va Toshkent shahar oila va xotin-qizlar boshqarmalari, Qoraqalpogʻiston Respublikasi Bandlik va mehnat munosabatlari vazirligi, viloyatlar va Toshkent shahar bandlik bosh boshqarmalari 1. Tasdiqlangan davlat buyurtmasi asosida taʼlim tashkilotlarining yillik oʻqitish ehtiyojlaridan kelib chiqqan holda oʻqitish taqsimotini ishlab chiqadi. 2. Oʻqitish taqsimotiga asosan taʼlim tashkilotlarida xotin-qizlarni kasbga oʻqitish ishlarini tashkil etadi. 3. Kasbga oʻqitish jarayonlarini monitoring qilib boradi. 4. Kasbga oʻqitilgan xotin-qizlarning malaka darajasini baholash uchun malakani baholash markazlariga yuboradi. Doimiy ravishda 4-bosqich Malakani baholash markazlari 1. Kasbga oʻqitilgan xotin-qizlarning malakasini baholaydi. 2. Baholashdan muvaffaqiyatli oʻtgan xotin-qizlarga malaka sertifikatini beradi. 10 kun ichida

Oʻzbekiston Respublikasi Prezidentining 2022-yil 29-iyundagi PQ-300-son qaroriga 4-ILOVA

2022-2023-yillarda xotin-qizlarni kasb-hunarga oʻqitish va ularning bandligini taʼminlash

PROGNOZ KOʻRSATKICHLARI*

nafar T/r Hudud nomi 2022-2023-yilda bandligiga koʻmaklashiladigan xotin-qizlar soni shundan, quyidagilar hisobiga: Kasb-hunarga oʻqitish Tadbirkorlik koʻnikmalari va moliyaviy savodxonlikka oʻqitish Ishga joylashishga koʻmaklashish Haq toʻlanadigan jamoat ishlariga jalb qilish Tadbirkorlik va oʻzini oʻzi band qilishni ragʻbatlantiruvchi subsidiyalar ajratish 2022-yil 2023-yil 2022-yil 2023-yil 2022-yil 2023-yil 2022-yil 2023-yil 2022-yil 2023-yil 2022-yil 2023-yil Respublika boʻyicha 383 565 444 215 81 271 111 994 7 490 8 240 185 684 203 956 80 683 88 748 28 437 31 277 1. Qoraqalpogʻiston Respublikasi 24 423 29 203 4 131 6 782 420 462 12 926 14 319 5 830 6 413 1 116 1 227 2. Andijon viloyati 43 434 47 071 7 350 7 480 754 829 25 447 27 892 7 044 7 748 2 839 3 122 3. Buxoro viloyati 23 580 28 675 3 856 7 082 250 275 9 221 10 043 4 580 5 035 5 673 6 240 4. Jizzax viloyati 22 088 24 725 5 080 6 115 236 260 7 151 7 766 8 916 9 808 705 776 5. Qashqadaryo viloyati 29 381 33 533 7 518 9 482 482 531 11 454 12 601 7 312 8 043 2 615 2 876 6. Navoiy viloyati 11 761 15 292 3 185 5 857 309 340 5 115 5 628 2 223 2 445 929 1 022 7. Namangan viloyati 37 053 42 208 7 576 9 883 313 345 19 833 21 715 5 847 6 432 3 484 3 833 8. Samarqand viloyati 35 218 40 790 6 310 8 992 272 299 18 260 20 086 8 263 9 089 2 113 2 324 9. Surxondaryo viloyati 26 730 30 158 7 735 9 263 708 779 9 006 9 907 7 459 8 205 1 822 2 004 10. Sirdaryo viloyati 18 444 21 937 4 576 6 683 44 48 7 189 7 908 5 442 5 986 1 193 1 312 11. Toshkent viloyati 29 237 35 375 4 769 8 460 555 611 16 667 18 334 5 284 5 812 1 962 2 158 12. Fargʻona viloyati 46 067 50 520 9 152 9 914 1 942 2 136 26 588 29 247 6 617 7 279 1 768 1 944 13. Xorazm viloyati 23 949 28 601 5 835 8 675 1 108 1 219 10 998 12 098 4 255 4 681 1 753 1 928 14. Toshkent shahri 12 200 16 127 4 198 7 326 97 106 5 829 6 412 1 611 1 772 465 511

Izoh:* Ushbu prognoz koʻrsatkichlari qonunchilikda belgilangan mexanizmlar asosida barcha manbalar hisobidan amalga oshiriladi. Mehnat bozoridagi vaziyatdan kelib chiqib, Bandlik va mehnat munosabatlari vazirligiga prognoz koʻrsatkichlari yoʻnalishlari va miqdor koʻrsatkichlariga oʻzgartirish va qoʻshimchalar kiritish huquqi beriladi.

Oʻzbekiston Respublikasi Prezidentining 2022-yil 29-iyundagi PQ-300-son qaroriga 5-ILOVA

Davlat buyurtmasi asosida umumiy oʻrta taʼlim maktablarining bitiruvchi sinf, akademik litsey va professional taʼlim muassasalarining bitiruvchi kurs oʻquvchi-qizlarini axborot texnologiyalari yoʻnalishlarida qoʻshimcha kurslarda oʻqitish tartibi toʻgʻrisida

NIZOM

1-bob. Umumiy qoidalar

1. Mazkur Nizom davlat buyurtmasi asosida umumiy oʻrta taʼlim maktablari, kasb-hunar maktablari, akademik litseylar va professional taʼlim muassasalari bitiruvchi kurs oʻquvchi-qizlarini asosiy taʼlim jarayonlaridan boʻsh vaqtlarda axborot texnologiyalari boʻyicha qoʻshimcha kurslarda oʻqitishni (keyingi oʻrinlarda — qoʻshimcha kurs) tashkil etish va amalga oshirish tartibini belgilaydi.

2. Axborot texnologiyalari boʻyicha qoʻshimcha kurslar iqtisodiyotning rivojlanish istiqbollari va ustuvor vazifalarini, zamonaviy texnika va texnologik yangilanishlarni hisobga olib, mehnat bozoridagi oʻquvchi-qizlarning shu sohada oʻz oʻrnini topish va malakali kasb egalari boʻlishiga moʻljallangan.

3. Ushbu Nizomda quyidagi asosiy tushunchalardan foydalaniladi:

oʻquvchi-qizlar — umumiy oʻrta taʼlim maktablarining bitiruvchi sinf hamda kasb-hunar maktablari, akademik litseylar va professional taʼlim muassasalarining bitiruvchi kurs oʻquvchi-qizlari;

qoʻshimcha kurs — asosiy taʼlim jarayoniga taʼsir etmagan holda qisqa muddatli davlat va nodavlat taʼlim tashkilotlarida axborot texnologiyalari boʻyicha tashkil etilgan taʼlim kursi.

4. Oʻquvchi-qizlarni qoʻshimcha kurslarda oʻqitish, oʻz ixtiyoriga koʻra taʼlim jarayonlariga taʼsir etmagan holda amalga oshiriladi.

5. Oʻquvchi-qizlarni qoʻshimcha kurslarda oʻqitish:

Bandlik va mehnat munosabatlari vazirligi tizimidagi “Ishga marhamat” monomarkazlari va kasb-hunarga oʻqitish markazlarida;

Oliy va oʻrta maxsus taʼlim vazirligi hamda boʻysunuviga koʻra vazirlik va idoralar tizimidagi professional taʼlim muassasalarida;

nodavlat taʼlim tashkilotlarida tashkil etiladi.

2-bob. Davlat buyurtmasini shakllantirish

6. Oʻquvchi-qizlarni axborot texnologiyalari yoʻnalishlarida qoʻshimcha kurslarda oʻqitish boʻyicha davlat buyurtmasini shakllantirish ushbu Nizomga ilovada keltirilgan sxemaga muvofiq amalga oshiriladi.

7. Xalq taʼlim vazirligi, Oliy va oʻrta maxsus taʼlim vazirligi hamda tizimida professional taʼlim muassasalari mavjud boʻlgan vazirlik va idoralar tomonidan har yili 1-dekabrga qadar:

oʻquvchi-qizlarning manzilli roʻyxatiga asosan davlat buyurtmasi shakllantiriladi;

shakllantirilgan davlat buyurtmasini Bandlik va mehnat munosabatlari vazirligi hamda Oila va xotin-qizlar davlat qoʻmitasiga tasdiqlash uchun taqdim etadi.

8. Oila va xotin-qizlar davlat qoʻmitasi Bandlik va mehnat munosabatlari vazirligi bilan birgalikda har yili 10-dekabrga qadar davlat buyurtmasini oʻrganib chiqib, tasdiqlaydi.

3-bob. Davlat buyurtmasi asosida qoʻshimcha kurslarga yoʻnaltirish

9. Oila va xotin-qizlar davlat qoʻmitasi, Bandlik va mehnat munosabatlari vazirligi:

ushbu Nizomning 5-bandida koʻrsatilgan kasbga oʻqitish boʻyicha belgilangan taʼlim tashkilotlarining yillik oʻqitish ehtiyojlaridan kelib chiqqan holda ularga davlat buyurtmasi asosida oʻquvchi-qizlarning oʻzlariga qulay boʻlgan taʼlim tashkilotlarida oʻqitish boʻyicha taqsimlaydi;

oʻquvchi-qizlarni axborot texnologiyalari yoʻnalishida oʻqitishda qoʻshimcha kurslarni tashkil etadi;

axborot texnologiyalari yoʻnalishida oʻqitishda uslubiy jihatdan taʼminlaydi va amalga oshirilishini monitoring qilib boradi.

4-bob. Davlat buyurtmasi asosida qoʻshimcha kursga oʻqitilgan oʻquvchi-qizlarning malaka darajasini baholash

10. Qoraqalpogʻiston Respublikasi Oila va xotin-qizlar qoʻmitasi, viloyatlar hamda Toshkent shahar oila va xotin-qizlar boshqarmalari, Qoraqalpogʻiston Respublikasi Bandlik va mehnat munosabatlari vazirligi, viloyatlar va Toshkent shahar bandlik bosh boshqarmalari davlat buyurtmasi asosida davlat va nodavlat taʼlim tashkilotlarida qoʻshimcha kurslarda oʻqigan oʻquvchi-qizlarning malaka darajasini baholash uchun ularning malakani baholash markazlariga, shu jumladan “Ishga marhamat” monomarkazlarida tashkil etilgan malakani baholash markazlariga yuborilishiga koʻmaklashadi.

Bunda, nodavlat taʼlim tashkilotlarida qoʻshimcha kurslarda oʻqigan oʻquvchi-qizlar malaka darajasini baholatish uchun belgilangan tartibda oʻzlari ixtiyoriy ravishda murojaat qilishi mumkin.

11. Malakani baholash markazlari tomonidan:

Oʻzbekiston Respublikasi Prezidentining 2020-yil 31-dekabrdagi PQ-4939-son qarori bilan tasdiqlangan Malaka darajalariga erishish sxemasi asosida bitiruvchi oʻquvchi-qizlar malakasi baholanadi;

baholashdan muvaffaqiyatli oʻtgan bitiruvchi oʻquvchi-qizlarga oʻn kun ichida malaka sertifikati beriladi.

5-bob. Oʻquvchi-qizlarni qoʻshimcha kursda oʻqitishni moliyalashtirish

12. Qoʻshimcha kurslarda oʻqitish bilan bogʻliq faoliyat xarajatlari Bandlikka koʻmaklashish davlat jamgʻarmasi hamda Oila va xotin-qizlarni qoʻllab-quvvatlash davlat maqsadli jamgʻarmasi mablagʻlari hisobidan moliyalashtiriladi.

Bunda, axborot texnologiyalari yoʻnalishida nodavlat taʼlim tashkilotlarida oʻqigan va tegishli malakaga ega boʻlgan oʻquvchi-qizlarni oʻqitish xarajatlarining 70 foizi, biroq har bir bitiruvchiga bazaviy hisoblash miqdorining 4 barobaridan oshmagan miqdori davlat tomonidan qoplab beriladi.

6-bob. Yakunlovchi qoida

13. Mazkur Nizom talablarining buzilishida aybdor boʻlgan shaxslar qonunchilikda belgilangan tartibda javobgar boʻladilar.

Davlat buyurtmasi asosida umumiy oʻrta taʼlim maktablarining bitiruvchi sinf, akademik litsey va professional taʼlim muassasalarining bitiruvchi kurs oʻquvchi-qizlarini axborot texnologiyalari yoʻnalishlarida qoʻshimcha kurslarda oʻqitish tartibi toʻgʻrisidagi nizomga ILOVA

Umumiy oʻrta taʼlim maktablarining bitiruvchi sinf, akademik litsey va professional taʼlim muassasalarining bitiruvchi kurs oʻquvchi-qizlarini axborot texnologiyalari yoʻnalishlarida qoʻshimcha kurslarda oʻqitish boʻyicha davlat buyurtmasini shakllantirish

SXEMASI

Bosqichlar Subyektlar Tadbirlar Bajarish muddatlari 1-bosqich Xalq taʼlimi vazirligi, Oliy va oʻrta maxsus taʼlim vazirligi, tizimida professional taʼlim muassasalari mavjud boʻlgan vazirlik va idoralar 1. Axborot texnologiyalari yoʻnalishi boʻyicha oʻquvchi-qizlarning manzilli roʻyxatini ishlab chiqadi hamda davlat buyurtmasini shakllantiradi. 2. Davlat buyurtmasini Bandlik va mehnat munosabatlari vazirligiga hamda Oila va xotin-qizlar davlat qoʻmitasiga tasdiqlash uchun taqdim etadi. Har yili 1-dekabrga qadar 2-bosqich Bandlik va mehnat munosabatlari vazirligi, Oila va xotin-qizlar davlat qoʻmitasi 1. Taqdim etilgan davlat buyurtmalarini umumlashtirib, tahlil qiladi. 2. Oʻquvchi-qizlarni qoʻshimcha kurslarda oʻqitish boʻyicha davlat buyurtmasini tasdiqlaydi. Har yili 10-dekabrga qadar 3-bosqich Qoraqalpogʻiston Respublikasi Oila va xotin-qizlar qoʻmitasi, viloyatlar va Toshkent shahar oila va xotin-qizlar boshqarmalari, Qoraqalpogʻiston Respublikasi Bandlik va mehnat munosabatlari vazirligi, viloyatlar va Toshkent shahar bandlik bosh boshqarmalari 1. Davlat buyurtmasi asosida oʻquvchi-qizlarni oʻzlariga qulay boʻlgan taʼlim tashkilotlarida oʻqitish boʻyicha taqsimlaydi. 2. Oʻquvchi-qizlarni axborot texnologiyalari yoʻnalishida oʻqitishda qoʻshimcha kurslarni tashkil etadi. 3. Axborot texnologiyalari yoʻnalishida oʻqitish boʻyicha uslubiy jihatdan taʼminlaydi va ularning amalga oshirilishini monitoring qilib boradi. 4. Taʼlim tashkilotlarida kursga oʻqib tugatgan oʻquvchi-qizlarni ularning malaka darajasini baholash uchun malakani baholash markazlariga yuborilishini taʼminlaydi. Doimiy ravishda 4-bosqich Malakani baholash markazlari 1. Malakani baholash markazlari bitiruvchi oʻquvchi-qizlarning kasbiy malakasini baholaydi. 2. Baholashdan muvaffaqiyatli oʻtgan bitiruvchi oʻquvchi-qizlarga malaka sertifikatini beradi. 10 kun ichida