Davlat geologiya qoʻmitasi va Yaponiyaning Metall qazib oluvchi Agentligining birgalikdagi geologiya-qidiruv ishlari toʻgʻrisida (567-son)

24.12.1997

Oʻzbekiston Respublikasi Vazirlar Mahkamasining

qarori

Yaponiya Hukumatining begʻaraz yordami doirasida Davlat geologiya qoʻmitasining Yaponiyaning Metall qazib oluvchi Agentligi bilan birgalikdagi geologiya-qidiruv ishlari samarali oʻtkazilishini taʼminlash maqsadida Vazirlar Mahkamasi qaror qiladi:

1. Vazirlar Mahkamasining “Yaponiyaning Metall qazib oluvchi Agentligi bilan samarali hamkorlik qilishni taʼminlashga oid chora-tadbirlar toʻgʻrisida” 1994-yil 16-sentabrdagi 470-son qaroriga muvofiq, Oʻzbekiston Respublikasi Davlat geologiya va mineral resurslar qoʻmitasi tomonidan Yaponiya Agentligi bilan birgalikda Markaziy Qizilqumda geologiya-qidiruv ishlari oʻtkazilganligi, Sovutboy koni yuqori sathlarida qidiruv ishlari tugallanganligi va Bulutkon istiqbolli maydoni baholanganligi maʼlumot uchun qabul qilinsin.

2. Yaponiyaning Metall qazib oluvchi Agentligi bilan hamkorlikni yanada kengaytirish maqsadida Yaponiya tomoniga geologiyaga oid zarur materiallarni taqdim etgan holda 1997—1999-yillarda Janubiy Nurota togʻi (Navoiy viloyati) hududida birgalikdagi geologiya-qidiruv ishlarini tashkil etish yuzasidan Davlat geologiya qoʻmitasining taklifiga rozilik berilsin.

3. Oltinsoy konida va unga tutash Janubiy Nurota togʻi mintaqasiga qiruvchi hududlarda geologiya-qidiruv ishlarini oʻtkazish uchun Yaponiya tomonidan oʻtkaziladigan valyuta tushumlarining bir qismi Oʻzbekiston Respublikasi Markaziy bankiga majburiy ravishda sotishdan;

koʻrsatib oʻtilgan loyihaning yaponiyalik qatnashchilari geologiya tadqiqotlari oʻtkazish hamda shaxsiy ehtiyojlari uchun Oʻzbekiston Respublikasiga olib keladigan asbob-uskunalar, materiallar, mol-mulklar va ikkita yengil avtomobil uchun soliqlar, boj poshlinalari va yigʻimlar toʻlashdan ozod qilinsin.

4. Oʻzbekiston Respublikasi Tashqi ishlar vazirligi Yaponiya guruhi aʼzolariga konsullik yigʻimlari undirmasdan koʻp martalik vizalar berilishini taʼminlasin.

5. Oʻzbekiston Respublikasi Ichki ishlar vazirligi Davlat geologiya qoʻmitasining buyurtmanomasiga muvofiq yapon mutaxassislariga yigʻimlar va davlat poshlinasi undirmasdan koʻp martalik vizalar berilishini, ularning milliy pasportlari roʻyxatdan oʻtkazilishi hamda muddati uzaytirilishini taʼminlasin.

6. Oʻzbekiston Respublikasi Sogʻliqni saqlash vazirligi toʻlov asosida yapon guruhi aʼzolariga malakali xizmat koʻrsatilishini tashkil etishda koʻmaklashsin.

7. Mazkur qarorning bajarilishini nazorat qilish Bosh vazir Oʻ. T. Sultonov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1997-yil 24-dekabr,

567-son