7-modda. Pochta aloqasi sohasidagi vakolatli davlat organi

Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi pochta aloqasi sohasidagi vakolatli davlat organidir (bundan buyon matnda vakolatli davlat organi deb yuritiladi).

Vakolatli davlat organi:

pochta aloqasi sohasida yagona davlat siyosatini amalga oshiradi;

pochta aloqasi sohasidagi davlat dasturlarini va boshqa dasturlarni ishlab chiqadi hamda amalga oshiradi;

Pochta aloqasi xizmatlari koʻrsatish qoidalarini tasdiqlaydi;

pochta toʻlovining davlat belgilari namunalarini, Pochta toʻlovining davlat belgilari toʻgʻrisidagi nizomni tasdiqlaydi, pochta markalarining muomalaga kiritilishini va muomaladan chiqarilishini amalga oshiradi, shuningdek pochta markalarini kolleksiyalash turkumiga oʻtkazish toʻgʻrisida qaror qabul qiladi;

pochta toʻlovi davlat belgilarining davlat kolleksiyasini shakllantiradi, Pochta toʻlovining davlat belgilari davlat kolleksiyasi toʻgʻrisidagi nizomni tasdiqlaydi;

maxsus xotira shtempellarini tayyorlash va ulardan foydalanish tartibini belgilaydi;

universal pochta xizmatlariga oid tariflarni qonunchilikka muvofiq tasdiqlaydi;

pochta aloqasi tarmoqlari hamda xizmatlarini rivojlantirish masalalari boʻyicha pochta aloqasi operatorlari va provayderlarining faoliyatiga koʻmaklashadi, axborot xavfsizligini va pochta aloqasi xavfsizligini taʼminlash boʻyicha chora-tadbirlarni muvofiqlashtiradi;

pochta indekslarini, shuningdek pochta aloqasi operatorlari va provayderlari uchun majburiy boʻlgan pochta joʻnatmalari oʻtishining nazorat muddatlarini tasdiqlaydi;

frankirlash mashinalaridan foydalanish tartibini belgilaydi;

pochta va kuryerlik joʻnatmalarini tashish uchun foydalaniladigan pochta aloqasi milliy operatorining transport vositalariga joylashtiriladigan maxsus farqlash belgilarini tasdiqlaydi;

foydalanuvchilarning huquqlari va qonuniy manfaatlarini taʼminlashga koʻmaklashadi, pochta aloqasi operatorlari, provayderlari va foydalanuvchilar oʻrtasidagi oʻzaro munosabatlar masalalarini koʻrib chiqadi;

jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolining tarqatilishini moliyalashtirishga qarshi kurashish boʻyicha maxsus vakolatli davlat organi bilan birgalikda pochta aloqasining milliy operatori uchun Jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolining tarqatilishini moliyalashtirishga qarshi kurashish boʻyicha ichki nazorat qoidalarini tasdiqlaydi;