Isʼhoqxon Ibrat nomidagi Namangan davlat chet tillari institutini tashkil etish toʻgʻrisida (PQ-275-son)

09.06.2022

Oʻzbekiston Respublikasi Prezidentining

Qarori

Maʼrifatparvar olim, sharq va gʻarb tillarining bilimdoni Isʼhoqxon Ibratning yorqin xotirasi hamda nomini abadiylashtirish, Namangan viloyatida xorijiy tillarni mukammal egallagan, chuqur bilimga ega boʻlgan raqobatbardosh kadrlarni tayyorlash maqsadida, shuningdek, 2022 — 2026-yillarga moʻljallangan Yangi Oʻzbekistonning taraqqiyot strategiyasini “Inson qadrini ulugʻlash va faol mahalla yili”da amalga oshirishga oid Davlat dasturiga muvofiq:

1. Oliy va oʻrta maxsus taʼlim vazirligi, Xorijiy tillarni oʻrganishni ommalashtirish agentligi, Prezident taʼlim muassasalari agentligi hamda Namangan viloyati hokimligining Namangan shahrida Isʼhoqxon Ibrat nomidagi Namangan davlat chet tillari institutini (keyingi oʻrinlarda — Institut) tashkil etish toʻgʻrisidagi taklifi maʼqullansin.

Belgilansinki, Institut yuridik shaxs maqomiga ega boʻlgan davlat oliy taʼlim muassasasi hisoblanadi hamda Ixtisoslashtirilgan taʼlim muassasalari agentligi tizimida faoliyat yuritadi.

2. Quyidagilar Institut faoliyatining asosiy yoʻnalishlari etib belgilansin:

xalqaro baholash dasturlaridan (PISA, TALIS, PIRLS) foydalangan holda oʻqitishning zamonaviy shakllari hamda metodlarini joriy etish, ushbu bilim va koʻnikmalarga ega boʻlgan oliy maʼlumotli mutaxassislar va ilmiy-pedagogik kadrlarni tayyorlash;

oʻz taʼlim dasturlarini xalqaro tan olingan tashkilotlarning oliy taʼlim muassasalari reytingida birinchi 1000 talik roʻyxatga kirgan xorijiy oliy taʼlim muassasalarining dasturlari asosida shakllantirish;

chet tillarini oʻqitishning interfaol vositalarini ishlab chiqish va joriy etish hamda aholining keng qatlamlari oʻrtasida chet tillarini oʻrganishni ommaviylashtirishga koʻmaklashish;

taʼlimni zamonaviy pedagogik texnologiyalar asosida tashkil etish, oʻquv jarayoniga raqamli texnologiyalarni tatbiq qilish, talabalarda sinxron, badiiy, ketma-ket hamda ilmiy-texnik tarjima koʻnikmalarini shakllantirish;

chet tillar boʻyicha mahalliy va xorijiy professor-oʻqituvchilar bilan hamkorlikda yangi avlod oʻquv adabiyotlarini yaratish, axborot-resurs markazlarni zamonaviy oʻquv, oʻquv-metodik va ilmiy adabiyotlar bilan taʼminlash hamda ularni muntazam yangilab borish;

Institutning ilmiy-pedagogik salohiyatini oshirib borish, jumladan, professor-oʻqituvchilar stajirovkasi va malaka oshirishini nufuzli respublika va xorijiy oliy taʼlim hamda ilmiy-tadqiqot muassasalarida tashkil etish;

taʼlim va ilm-fan sohalarida xorijiy mamlakatlarning yetakchi taʼlim muassasalari, ilmiy-tadqiqot markazlari bilan uzoq muddatli aloqalarni rivojlantirish va mustahkamlash, qoʻshma taʼlim dasturlari hamda ilmiy loyihalarni amalga oshirish.

3. Quyidagilar:

Isʼhoqxon Ibrat nomidagi Namangan davlat chet tillari instituti faoliyatini tashkil etish boʻyicha chora-tadbirlar dasturi 1-ilovaga muvofiq;

Isʼhoqxon Ibrat nomidagi Namangan davlat chet tillari institutini 2026-yilga qadar rivojlantirishning maqsadli koʻrsatkichlari 2-ilovaga muvofiq;

Isʼhoqxon Ibrat nomidagi Namangan davlat chet tillari institutida tashkil etiladigan bakalavriat taʼlim yoʻnalishlari va magistratura mutaxassisliklari roʻyxati 3-ilovaga muvofiq tasdiqlansin.

4. Belgilab qoʻyilsinki:

a) Institutda oʻquv jarayoni 2022/2023 oʻquv yilidan boshlanadi;

b) Institutga qabul parametrlari belgilangan tartibda har yili tasdiqlanadigan respublika oliy taʼlim muassasalariga oʻqishga qabul qilishning davlat buyurtmasi va qoʻshimcha qabul parametrlaridan kelib chiqqan holda shakllantiriladi;

g) Institutda talabalarga ikkita xorijiy til boʻyicha kvalifikatsiya berish amaliyoti yoʻlga qoʻyiladi;

d) Institutning xorijiy tilda mutaxassislik fanlaridan dars beradigan S1 darajadan kam boʻlmagan milliy yoki unga tenglashtirilgan xalqaro tan olingan sertifikatga ega oʻqituvchilariga ularning bazaviy lavozim maoshiga nisbatan har oylik 50 foiz miqdorida qoʻshimcha ustama haqi toʻlab boriladi.

5. Oliy va oʻrta maxsus taʼlim vazirligi (A. Toshkulov):

a) 2022-yil 1-avgustga qadar Institutni tanlov asosida amaliy tajriba va (yoki) ilmiy darajaga ega boʻlgan yuqori malakali professor-oʻqituvchilar bilan toʻldirish choralarini koʻrsin;

b) 2023/2024 oʻquv yilidan boshlab Institutning xorijiy tillar oʻqituvchilari S1 darajadan kam boʻlmagan milliy yoki unga tenglashtirilgan xalqaro tan olingan sertifikatga ega boʻlishini taʼminlasin;

v) 2024/2025 oʻquv yilidan boshlab:

Institutning oʻquv jarayoniga til egasi boʻlgan malakali xorijiy mutaxassislar jalb qilinishini tashkillashtirsin. Bunda, xorijiy mutaxassislarning oylik ish haqi Institut tomonidan bozor konyunkturasi asosida belgilanadi hamda Institutning budjetdan tashqari mablagʻlari va Oliy taʼlim muassasalarini rivojlantirish jamgʻarmasi hisobidan toʻlanadi;

Institutning mutaxassislik fanlari (xorijiy tildan tashqari) oʻqituvchilarining B2 darajadan kam boʻlmagan milliy yoki unga tenglashtirilgan xalqaro tan olingan sertifikatga ega boʻlishini taʼminlasin;

g) Institut talabalarining oʻquv va ilmiy amaliyotlarini xorijiy davlatlarda tashkil etishga koʻmaklashsin.

6. Xorijiy tillarni oʻrganishni ommalashtirish agentligi (S. Obidov) quyidagi yoʻnalishlarda Institutga yaqindan koʻmaklashsin:

xorijlik ekspertlarni jalb etgan holda Institutning professor-oʻqituvchilari va mutaxassislari uchun malaka oshirish, jumladan, badiiy va sinxron tarjima qilish koʻnikmalarini shakllantirish boʻyicha kurslarni tashkil qilishda;

Institut professor-oʻqituvchilarida zamonaviy oʻqitish koʻnikmalarini shakllantirishda va ularni chet tilini bilish darajasini aniqlash boʻyicha imtihonlarga tayyorlashda;

Institutning boʻsh auditoriyalarida xorijiy tillarni oʻqitish kurslarini tashkil etish orqali talabalarga qoʻshimcha daromad topishlari uchun zarur sharoit yaratishda;

aholi va taʼlim muassasalari uchun chet tillarini oʻrganishda koʻmak beruvchi kontentlarni shartnoma asosida yaratishda.

7. Institut Prezident taʼlim muassasalari agentligi huzuridagi Isʼhoqxon Ibrat nomidagi ijod maktabining (keyingi oʻrinlarda — Ijod maktabi) taʼlim hamkori etib belgilansin.

Institut zimmasiga quyidagi vazifalar yuklansin:

2023-yil 1-yanvarga qadar Institutda Ijod maktabi oʻquvchilari uchun “Tarjimonlar klubi”ni tashkil etish;

Institutning professor-oʻqituvchilari va iqtidorli talabalarini Ijod maktabining taʼlim jarayoniga keng jalb qilish;

Ijod maktabi uchun malakali va chet tillarni mukammal egallagan kadrlarni tayyorlash;

Ijod maktabi oʻqituvchilarini Institutga stajirovka oʻtashga jalb qilish;

Ijod maktabi oʻquv jarayoniga chet tillari boʻyicha zamonaviy taʼlim texnologiyalari, ilgʻor va innovatsion tajribalarni joriy etish;

Ijod maktabini chet tillaridagi oʻquv va ilmiy adabiyotlar hamda elektron oʻquv resurslari bilan taʼminlash.

8. Oliy va oʻrta maxsus taʼlim vazirligining:

Namangan muhandislik-qurilish institutining Namangan viloyati, Toʻraqoʻrgʻon tumani, “Yangiobod” MFY, Saodat koʻchasi, 28-uy manzilida joylashgan bino va inshootlarini tegishli hududi bilan birgalikda Institutga operativ boshqaruv huquqi asosida bepul berish;

Namangan viloyati, Toʻraqoʻrgʻon tumani, Toʻraqoʻrgʻon koʻchasi, 22-uy manzilida joylashgan Namangan davlat universiteti tizimidagi “Isʼhoqxon Ibrat — Qatagʻon qurbonlari xotirasi” muzeyini Institut tizimiga oʻtkazish toʻgʻrisidagi takliflari maʼqullansin.

9. Namangan viloyati hokimligi (Sh. Abdurazakov):

2023-yil 1-yanvarga qadar Institutga 1 000 oʻrinli yangi oʻquv binosi va 400 oʻrinli talabalar turar joyini qurish uchun doimiy foydalanish huquqi bilan zarur yer uchastkasi ajratilishini taʼminlasin;

Oliy va oʻrta maxsus taʼlim vazirligi (A. Toshkulov) bilan birgalikda Institut talabalarining amaliyotini hududdagi korxonalar, turizm va madaniy meros obyektlari, taʼlim va boshqa tashkilotlarda oʻtkazish hamda yuqori kurs talabalarini ish haqi toʻlanadigan tizim orqali band qilish choralarini koʻrsin;

mahalliy budjet mablagʻlari hisobidan Institutning axborot-resurs bazasini xorijiy oʻquv, badiiy va ilmiy adabiyotlar bilan boyitib borishga koʻmaklashsin;

olis hududlardan va xorijiy mamlakatlardan kelib dars beradigan professor-oʻqituvchilarni ish davri davomida uy-joy bilan taʼminlash maqsadida Institutga yaqin hududda joylashgan koʻp qavatli uy-joylardan xizmat uylarini Institutga tekin foydalanish huquqi asosida ajratsin.

10. Institutga budjetdan tashqari mablagʻlar hisobidan boshqa hududlardan jalb etilgan professor-oʻqituvchilar uchun qulay shart-sharoit yaratish va ijtimoiy qoʻllab-quvvatlash, xususan, uy-joy ijarasi uchun toʻlovni kompensatsiya qilishga ruxsat etilsin.

11. Iqtisodiy taraqqiyot va kambagʻallikni qisqartirish vazirligi (A. Boboyev) Oliy va oʻrta maxsus taʼlim vazirligi (A. Toshkulov) bilan birgalikda tasdiqlangan loyiha-smeta hujjatlariga asosan:

Institutning Namangan viloyati hokimligi tomonidan ajratiladigan yer maydonida 1 000 oʻrinli oʻquv binosini qurish va jihozlash;

Institutga berilayotgan Namangan viloyati, Toʻraqoʻrgʻon tumani, “Yangiobod” MFY, Saodat koʻchasi, 28-uy manzilida joylashgan bino va inshootlarni rekonstruksiya qilish va jihozlash loyihalari Oʻzbekiston Respublikasining 2023 — 2025-yillarga moʻljallangan ijtimoiy va ishlab chiqarish infratuzilmasini rivojlantirish dasturiga belgilangan tartibda kiritilishini taʼminlasin.

Oliy va oʻrta maxsus taʼlim vazirligi (A. Toshkulov) Moliya vazirligi (T. Ishmetov) bilan birgalikda 2025-yil 1-yanvarga qadar Institutning 400 oʻrinli talabalar turar joyini davlat-xususiy sheriklik shartlari asosida qurilishini taʼminlasin.

12. Belgilab qoʻyilsinki:

Institut faoliyati Davlat budjeti mablagʻlari, toʻlov-kontrakt asosida oʻqitishdan tushadigan mablagʻlar, Institutning budjetdan tashqari mablagʻlari, xalqaro grantlar, xoʻjalik faoliyatidan va shartnoma asosida xizmatlar koʻrsatishdan tushadigan tushumlar, jismoniy va yuridik shaxslarning homiylik xayriyalari, qonunchilik hujjatlari bilan taqiqlanmagan boshqa manbalar hisobidan moliyalashtiriladi;

Institutning dastlabki faoliyatini yoʻlga qoʻyishda unga ajratilgan bino va inshootlarni joriy taʼmirlash va jihozlash (mebel, kompyuter texnikasi, oʻquv adabiyotlari va boshqa moddiy-texnika vositalarini xarid qilish, internet tarmogʻiga ulash) ishlari Namangan viloyatining mahalliy budjeti hamda Oliy va oʻrta maxsus taʼlim vazirligining Oliy taʼlim muassasalarini rivojlantirish jamgʻarmasi mablagʻlari hisobidan teng ulushda amalga oshiriladi;

mazkur qarorni amalga oshirish bilan bogʻliq xarajatlarni moliyalashtirish 2022-yilda Oʻzbekiston Respublikasining respublika budjetidan birinchi darajali budjet mablagʻlarini taqsimlovchi sifatida Oliy va oʻrta maxsus taʼlim vazirligiga ajratilgan mablagʻlar doirasida amalga oshiriladi, 2023-yildan boshlab — Davlat budjeti parametrlarida nazarda tutiladi.

13. Innovatsion rivojlanish vazirligi filologiya fanlari tarmogʻining tegishli ixtisosliklari boʻyicha yuqori malakali ilmiy va ilmiy-pedagog kadrlarga boʻlgan ehtiyojdan kelib chiqib, 2023-yildan boshlab Institutga doktorantura boʻyicha qabul kvotalari ajratilishini taʼminlasin.

14. Oliy va oʻrta maxsus taʼlim vazirligi manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

15. Mazkur qarorning ijrosini samarali tashkil qilishga masʼul va shaxsiy javobgar etib oliy va oʻrta maxsus taʼlim vaziri A.X. Toshkulov hamda Namangan viloyati hokimi Sh.Sh. Abdurazakov belgilansin.

Qaror ijrosini muhokama qilib borish, ijro uchun masʼul tashkilotlar faoliyatini muvofiqlashtirish va nazorat qilish Oʻzbekiston Respublikasining Bosh vaziri A.N. Aripov hamda Oʻzbekiston Respublikasi Prezidentining maslahatchisi A.A. Abduvaxitov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2022-yil 9-iyun,

PQ-275-son

Oʻzbekiston Respublikasi Prezidentining 2022-yil 9-iyundagi PQ-275-son qaroriga 1-ILOVA

Isʼhoqxon Ibrat nomidagi Namangan davlat chet tillari instituti faoliyatini tashkil etish boʻyicha

CHORA-TADBIRLAR DASTURI

T/r Tadbirlar nomi Amalga oshirish mexanizmi Moliyalashtirish manbalari Ijro muddati Masʼul ijrochilar I. Isʼhoqxon Ibrat nomidagi Namangan davlat chet tillari instituti faoliyatini yoʻlga qoʻyish, taʼlim jarayoniga yangi pedagogik texnologiyalar va oʻqitish metodlarini joriy etish 1. Isʼhoqxon Ibrat nomidagi Namangan davlat chet tillari instituti (keyingi oʻrinlarda — Institut) faoliyatini yoʻlga qoʻyishga oid hujjatlarni tayyorlash. 1. Institut ustavini ishlab chiqish, tasdiqlash va davlat roʻyxatidan oʻtkazish. - 2022-yil 1-iyul Oliy va oʻrta maxsus taʼlim vazirligi (Toshkulov), Institut 2. Amaldagi meʼyoriy hujjatlar asosida Institut tashkiliy tuzilmasini ishlab chiqish va tasdiqlash. 2022-yil 1-iyul 2. Institutning shtatlar jadvali va xarajatlar smetasini ishlab chiqish hamda tasdiqlash. 1. Institutning shtatlar jadvalini oʻrnatilgan tartibda tasdiqlash. - 2022-yil 1-avgust Oliy va oʻrta maxsus taʼlim vazirligi (Toshkulov), Moliya vazirligi (Ishmetov), Institut 2. Institutning 2022-yilga moʻljallangan xarajatlar smetasini oʻrnatilgan tartibda tasdiqlash. 2022-yil 1-avgust 3. Institutning professor-oʻqituvchilar tarkibiga zarur bilim va amaliy koʻnikmalarga ega kadrlarni jalb etish. 1. Institutni pedagog va ilmiy xodimlar bilan toʻldirish uchun boʻsh ish oʻrinlariga tanlov eʼlon qilish. 2. Mutaxassisligi (kvalifikatsiyasi) mos keluvchi pedagog xodimlarni tanlov asosida ishga saralab olish. - 2022-yil 1-avgust Oliy va oʻrta maxsus taʼlim vazirligi (Toshkulov), Bandlik va mehnat munosabatlari vazirligi (Xusanov), Institut 4. Institutga talabalarni qabul qilish jarayonini tashkil etish. 1. Institutda bakalavriat va magistratura bosqichlarida kadrlar tayyorlash boʻyicha davlat buyurtmasini shakllantirish. - Har yili iyun — avgust oylari Oliy va oʻrta maxsus taʼlim vazirligi (Toshkulov), Iqtisodiy taraqqiyot va kambagʻallikni qisqartirish vazirligi (Norkulov), Institut 2. Institutning bakalavriat va magistratura bosqichlariga qabulni tashkil etish. Har yili avgust-sentabr oylari 5. Oʻquv jarayonini ilgʻor xorijiy tajriba va kadrlar buyurtmachilari talablari asosida tashkil etish. 1. Oʻquv rejalaridagi fanlar sonini nomutaxassislik fanlar hisobiga bosqichma-bosqich kamaytirish hamda mustaqil taʼlim salmogʻini oshirish orqali Institutning taʼlim dasturlarini takomillashtirib borish. - 2022/2023 oʻquv yilidan boshlab Oliy va oʻrta maxsus taʼlim vazirligi (Toshkulov), Institut 2. Taʼlim dasturlari mazmunini kadrlar buyurtmachilari talablari hamda yetakchi xorijiy oliy taʼlim muassasalari tajribalari asosida shakllantirish. 2022-yil 1-sentabr 3. Institutda mutaxassislik fanlarini tegishli xorijiy tillarda oʻqitish tizimini joriy etish. Doimiy 4. Bitiruvchi kurs talabalari amaliyotini kelgusida talabalar ishga joylashishi mumkin boʻlgan tashkilotlarda tashkil etish. Doimiy 5. Xorijiy mutaxassislar ishtirokida maʼruza va amaliy mashgʻulotlar, mahorat darslarini oʻtkazish. 2022/2023 oʻquv yilidan boshlab 6. Oʻquv jarayoniga xorijiy mamlakatlar yetakchi oliy taʼlim muassasalarining taʼlim texnologiyalari va metodikalarini tatbiq etish. Doimiy 6. Institut professor-oʻqituvchilarining kasbiy mahoratini rivojlantirish, jumladan xorijiy oliy taʼlim va ilmiy-tadqiqot muassasalarida malaka oshirish hamda ilmiy stajirovka oʻtash tizimini yoʻlga qoʻyish. 1. Institut professor-oʻqituvchilarini nufuzli xorijiy oliy taʼlim va ilmiy-tadqiqot muassasalarining malaka oshirish kurslariga yuborish. Institutning budjetdan tashqari mablagʻlari, xalqaro moliya institutlari va xorijiy tashkilotlarning grantlari 2022/2023 oʻquv yilidan boshlab Oliy va oʻrta maxsus taʼlim vazirligi (Toshkulov), Institut 2. Professor-oʻqituvchilar uchun xorijiy ilmiy markazlar va oliy taʼlim muassasalarida, shuningdek, kadrlar buyurtmachilari boʻlgan tashkilot va korxonalarda stajirovkalar tashkil etish. Doimiy 7. Professor-oʻqituvchilar, yosh tadqiqotchilar va talabalar uchun zamonaviy badiiy, ilmiy va oʻquv adabiyotlarning elektron kataloglari hamda jahon taʼlim resurslaridan foydalanish imkoniyatlarini kengaytirish. 1. Ilgʻor xorijiy tajribalar asosida Institutning Axborot-resurs markazi foydalanuvchilari uchun kompleks elektron xizmatlar koʻrsatuvchi zamonaviy avtomatlashtirilgan axborot tizimini yaratish. Institutning budjetdan tashqari mablagʻlari, xalqaro moliya institutlari va xorijiy tashkilotlarning grantlari 2023-yil 1-iyun Oliy va oʻrta maxsus taʼlim vazirligi (Toshkulov), Axborot va ommaviy kommunikatsiyalar agentligi (Xodjayev), Institut 2. Veb-texnologiyalarni qoʻllagan holda Institut Axborot-resurs markazi raqamli resurslarining elektron katalogini yaratish. Doimiy 3. Institut professor-oʻqituvchilari, ilmiy xodimlari hamda talabalarining xorijiy kutubxonalar resurslari va ilmiy-texnik maʼlumotlar bazalaridan erkin hamda bepul foydalanishlari uchun zarur shart-sharoitlar yaratish. Doimiy 8. Institutning taʼlim jarayoni va ilmiy-tadqiqot faoliyatini zamonaviy oʻquv adabiyotlar bilan taʼminlash. 1. Institutning taʼlim jarayoni va ilmiy-tadqiqot faoliyati uchun zarur boʻlgan adabiyotlar roʻyxatini shakllantirish. Davlat budjetidan mazkur maqsadlar uchun ajratilgan mablagʻlar, Oliy taʼlim muassasalarini rivojlantirish jamgʻarmasi mablagʻlari, Institutning budjetdan tashqari mablagʻlari, xalqaro moliya institutlari va xorijiy tashkilotlarning grantlari 2022-yil 1-avgust Oliy va oʻrta maxsus taʼlim vazirligi (Toshkulov), Moliya vazirligi (Ishmetov), Institut 2. Zamonaviy oʻquv adabiyotlarni yaratish, xorijiy adabiyotlarni xarid qilish va tarjima qilish, Axborot-resurs markazi fondini muntazam ravishda yangilab borish. Doimiy 3. Barcha oʻquv-metodik majmualarni Institutning elektron kutubxona tizimiga kiritilishini taʼminlash. 2023-yil 1-yanvar 9. Institut talabalarining chet tilini bilish darajasini aniqlash boʻyicha tashqi baholash tizimini joriy etish. 1. Turli yoʻnalishlardan tanlab olingan bir guruh (kamida 20 nafar) yuqori kurs talabalari bilimini milliy yoki xalqaro tan olingan imtihon tizimlari orqali baholash. 2. Baholash natijasi boʻyicha taʼlim jarayoni va oʻquv dasturlarini takomillashtirish. Institutning budjetdan tashqari mablagʻlari, xalqaro moliya institutlari va xorijiy tashkilotlarning grantlari Har yili, oʻquv yili davomida Oliy va oʻrta maxsus taʼlim vazirligi (Toshkulov), Xorijiy tillarni oʻrganishni ommalashtirish agentligi (Obidov), Institut 10. Oʻquv jarayoniga raqamli texnologiyalarni joriy etish. 1. Institut oʻquv auditoriyalarini zamonaviy axborot-kommunikatsiya texnologiyalari bilan jihozlash. Oliy taʼlim muassasalarini rivojlantirish jamgʻarmasi mablagʻlari, Institutning budjetdan tashqari mablagʻlari 2022/2023 oʻquv yilidan boshlab doimiy Oliy va oʻrta maxsus taʼlim vazirligi (Toshkulov), Axborot texnologiyalari va kommunikatsiyalarini rivojlantirish vazirligi (Shermatov), Institut 2. “Oliy taʼlim jarayonlarini boshqarish — NEMIS” axborot tizimiga tegishli maʼlumotlarni oʻz vaqtida va sifatli kiritilishini taʼminlash. Doimiy 3. “Oliy taʼlim jarayonlarini boshqarish — NEMIS” axborot tizimi orqali elektron jurnal, elektron davomat va elektron dars jadvali tizimidan foydalanishni yanada kengaytirish. Doimiy 4. Oʻquv auditoriyalarini onlayn rejimda ishlaydigan veb-kameralar bilan jihozlash va har bir fakultetda maʼruza mashgʻulotlari uchun moʻljallangan “SMART” auditoriyalar yaratish. 2023-yil 1-sentabr II. Ilmiy-tadqiqot va innovatsion faoliyatni rivojlantirish hamda yoshlarni ilmiy faoliyatga keng jalb qilish 11. Institut professor-oʻqituvchilarining ilmiy salohiyatini oshirib borish hamda yoshlarni ilmiy faoliyatga jalb etish. 1. Institut professor-oʻqituvchilari, xodimlari hamda yosh tadqiqotchilarini ilmiy-tadqiqot ishlariga faol jalb etish. 2. Professor-oʻqituvchilar hamda yosh tadqiqotchilarning xorijiy mamlakatlarda oʻtkaziladigan xalqaro konferensiyalar, simpoziumlar va seminarlarda muntazam ravishda ishtirokini taʼminlash. 3. Professor-oʻqituvchilar hamda yosh tadqiqotchilarning ilmiy maqolalarini Web of Science, Scopus, Google Scholar kabi xalqaro maʼlumotlar bazalarida indekslanuvchi jurnallarda chop etish va ularning iqtiboslik darajasini oshirish choralarini koʻrish. Institutning budjetdan tashqari mablagʻlari 2022-yil 1-avgustdan boshlab doimiy Innovatsion rivojlanish vazirligi (Abduraxmonov), Oliy va oʻrta maxsus taʼlim vazirligi (Toshkulov), Institut 12. Institutda amaliy, fundamental va innovatsion tadqiqotlarni yoʻlga qoʻyish. 1. Amaliy, fundamental va innovatsion tadqiqotlar mavzularini tegishli sohalar muammolarini inobatga olgan holda ishlab chiqish. 2. Ilmiy-tadqiqot ishlariga davlat buyurtmasini shakllantirish uchun loyiha va takliflar kiritib borish. - 2022/2023 oʻquv yilidan boshlab doimiy Oliy va oʻrta maxsus taʼlim vazirligi (Toshkulov), Innovatsion rivojlanish vazirligi (Abduraxmonov), Institut 13. “Yosh filolog” oʻquv laboratoriyasini tashkil etish. 1. Laboratoriya uchun xonalarni tayyorlash va zamonaviy uskunalar bilan jihozlash. Institutning budjetdan tashqari mablagʻlari 2023-yil 1-fevral Oliy va oʻrta maxsus taʼlim vazirligi (Toshkulov), Institut 2. Laboratoriya faoliyatini yoʻlga qoʻyish. 2023-yil 1-mart 3. Talabalarning nazariy bilimlarini amaliyotda qoʻllash imkoniyatlarini kengaytirish. 2023-yildan boshlab doimiy 14. Talabalarning ilmiy-ijodiy salohiyatini oshirib borish. 1. Iqtidorli talabalarni saralab olish va ularga tajribali professor-oʻqituvchilarni biriktirish. Institutning budjetdan tashqari mablagʻlari 2022/2023 oʻquv yilidan boshlab doimiy Oliy va oʻrta maxsus taʼlim vazirligi (Toshkulov), Institut 2. Iqtidorli talabalarni ilmiy-tadqiqot ishlariga yoʻnaltirish. Doimiy 3. Ilmiy-tadqiqot ishlarida faol ishtirok etayotgan talabalarni ragʻbatlantirib borish. Doimiy 15. Institutning taʼlim va boshqaruv jarayonida IT-texnologiya infratuzilmasini rivojlantirish. 1. Institut binolarini optik tolali simlar bilan jihozlash va yagona tarmoq boshqaruvini yaratish. Institutning budjetdan tashqari mablagʻlari Reja-jadvalga muvofiq Oliy va oʻrta maxsus taʼlim vazirligi (Toshkulov), Axborot texnologiyalari va kommunikatsiyalarini rivojlantirish vazirligi (Shermatov), Institut 2. Institutning b?rcha binolarida Wi-Fi tizimi orqali Internet tarmogʻidan keng foydalanish imkoniyatini yaratish. 2022-yil 1-oktabr 3. Professor-oʻqituvchilar va talabalarda video, audio va animatsion materiallar ustida ishlash koʻnikmalarini shakllantirish. Doimiy III. Xalqaro hamkorlikni rivojlantirish 16. Institutning oʻquv dasturlarini xalqaro tan olingan tashkilotlarda akkreditatsiyadan oʻtkazish. 1. Institutning oʻquv dasturlarini akkreditatsiyadan oʻtkazish uchun xalqaro tan olingan tashkilotlar bilan aloqalarni oʻrnatish. Institutning budjetdan tashqari mablagʻlari, xalqaro moliya institutlari va xorijiy tashkilotlarning grantlari 2022/2023 oʻquv yili davomida Oliy va oʻrta maxsus taʼlim vazirligi (Toshkulov), Taʼlim sifatini nazorat qilish davlat inspeksiyasi (Tashkenbayev), Institut 2. Oʻquv dasturlarini akkreditatsiyadan oʻtkazish. 2025/2026 oʻquv yiliga qadar 17. Xorijiy oliy taʼlim va ilmiy-tadqiqot muassasalari bilan hamkorlik aloqalarini rivojlantirish. 1. Xorijiy oliy taʼlim muassasalari bilan hamkorlik shartnomalari doirasida yuqori ilmiy salohiyatga ega professor-oʻqituvchilar va mutaxassislarni Institut doktorant va mustaqil tadqiqotchilariga ilmiy maslahatchi sifatida biriktirish. 2. Xorijiy hamkor oliy taʼlim muassasalari bilan mutaxassislik fanlari boʻyicha vebinarlar tashkil qilish. 3. Xorijiy ilmiy-tadqiqot markazlari va ilmiy fondlarning grant mablagʻlarini jalb etish. Xalqaro grantlar, Institutning budjetdan tashqari mablagʻlari 2022/2023 oʻquv yilidan boshlab doimiy Oliy va oʻrta maxsus taʼlim vazirligi (Toshkulov), Institut 18. Institutda tahsil oluvchi xorijiy talabalar ulushini oshirish. 1. Institutda xalqaro talabalar anjumanlarini oʻtkazish va ularda xorijiy talabalar ishtirokini taʼminlash. Institutning budjetdan tashqari mablagʻlari, xalqaro moliya institutlari va xorijiy tashkilotlarning grantlari Reja-jadvalga muvofiq Oliy va oʻrta maxsus taʼlim vazirligi (Toshkulov), Institut 2. Xorijiy fuqarolarni Institutga jalb qilish boʻyicha taʼlim agentliklari bilan kelishuv imzolash. 2023/2024 oʻquv yili davomida 3. Kelishuv doirasida xorijiy, avvalambor, MDH davlatlarida Institut faoliyatini targʻib qilish. Reja-jadvalga muvofiq 19. Xorijiy universitetlar bilan hamkorlikda talabalar akademik almashinuvi va qoʻshma ilmiy tadqiqotlarni tashkil etish. 1. Yetakchi xorijiy oliy taʼlim muassasalari va ilmiy markazlar bilan qoʻshma ilmiy tadqiqotlar olib borishni yoʻlga qoʻyish. 2. Talabalarning xalqaro ilmiy konferensiyalarda ishtirokini taʼminlash. 3. Xorijiy hamkor oliy taʼlim muassasalari bilan talabalar akademik almashinuvi amaliyotini yoʻlga qoʻyish. Institutning budjetdan tashqari mablagʻlari 2022/2023 oʻquv yilidan boshlab doimiy Oliy va oʻrta maxsus taʼlim vazirligi (Toshkulov), Institut IV. Talabalarning boʻsh vaqtini mazmunli tashkil etish va ularning bandligini taʼminlash 20. Institut talabalariga oʻqishdan boʻsh vaqtda qoʻshimcha daromad topishga koʻmaklashish. 1. Dars mashgʻulotlaridan keyin Institutning boʻsh auditoriyalarida talabalar tomonidan til oʻrgatish kurslarini tashkil etish orqali ularga qoʻshimcha daromad topish uchun sharoit yaratib berish. Institutning budjetdan tashqari mablagʻlari, homiylik xayriyalari 2022/2023 oʻquv yilidan boshlab doimiy Oliy va oʻrta maxsus taʼlim vazirligi (Toshkulov), Xorijiy tillarni oʻrganishni ommalashtirish agentligi (Obidov), “Hunarmand” uyushmasi (Abdullayev), Institut 2. Institut talabalarining tikuvchilik va toʻquvchilik bilan shugʻullanishi uchun xona ajratish va uni kerakli dastgohlar bilan jihozlash choralarini koʻrish. Doimiy 3. Talabalarni jalb etgan holda “Tarjimonlik markazi”ni tashkil etish hamda tarjima xizmatini koʻrsatish. 2022-yil 1-oktabr 4. Hunarmandchilik sohasida yuqori natijalarga erishgan ustalar tomonidan talabalarga qoʻshimcha hunar oʻrgatishga qaratilgan mashgʻulotlar tashkil etish. Doimiy 21. Institutda beshta muhim tashabbusni keng joriy etish maqsadida yuridik shaxs maqomiga ega boʻlmagan “Yoshlar markazi”ni tashkil qilish. 1. Markaz nizomi va chora-tadbirlar dasturini ishlab chiqish va tasdiqlash. Institutning budjetdan tashqari mablagʻlari 2022-yil 1-dekabr Oliy va oʻrta maxsus taʼlim vazirligi (Toshkulov), Institut 2. Institutga tegishli binolarda Markaz uchun beshta muhim tashabbusni qamrab oladigan xonalar ajratish. 2023-yil 1-yanvar 3. Xonalarni beshta muhim tashabbus doirasidagi zarur texnika va jihozlar bilan taʼminlash. 2023-yil 1-mart 22. Institutda beshta muhim tashabbus doirasida toʻgaraklar faoliyatini yoʻlga qoʻyish. 1. Maqom, estrada, teatr, rassomchilik va sport yoʻnalishlarida toʻgaraklar hamda badiiy havaskorlik jamoalarini tashkil etish va yoshlarni mazkur toʻgaraklarga jalb etish. Institutning budjetdan tashqari mablagʻlari, homiylik xayriyalari 2022/2023 oʻquv yilidan boshlab doimiy Oliy va oʻrta maxsus taʼlim vazirligi (Toshkulov), Yoshlar ishlari agentligi (Saʼdullayev), Institut 2. Institut talabalari oʻrtasida sogʻlom turmush tarzini targʻib etishga qaratilgan sport tadbirlarini tashkil etish. Doimiy 3. Talabalarning badiiy adabiyotlarga boʻlgan qiziqishini oshirish maqsadida “Men sevgan badiiy asar” kabi tanlovlarni muntazam tashkil etib borish. Doimiy 23. Talabalarni oʻz ustida muntazam ishlashga undash maqsadida taniqli mutaxassislarni jalb qilgan holda tadbirlar oʻtkazish. 1. Respublikada va xorijiy davlatlarda faoliyat yuritayotgan mutaxassislar va notiqlar roʻyxatini shakllantirish. 2. Shakllantirilgan roʻyxatga muvofiq seminar, ochiq muloqot va boshqa tadbirlarni, shu jumladan masofaviy tarzda tashkil qilish. Institutning budjetdan tashqari mablagʻlari, xalqaro moliya institutlari va xorijiy tashkilotlarning grantlari 2022/2023 oʻquv yilidan boshlab Oliy va oʻrta maxsus taʼlim vazirligi (Toshkulov), Institut 24. Institutda talabalarni ish bilan taʼminlash maqsadida “Karyera markazi” faoliyatini yoʻlga qoʻyish. 1. “Karyera markazi” uchun alohida xona ajratish va uni kerakli moddiy-texnik baza, koʻrgazmali qurollar bilan taʼminlash hamda Markazning nizomini ishlab chiqish. Institutning budjetdan tashqari mablagʻlari, homiylik xayriyalari 2023-yil 1-iyul Oliy va oʻrta maxsus taʼlim vazirligi (Toshkulov), Bandlik va mehnat munosabatlari vazirligi (Xusanov), Yoshlar ishlari agentligi (Saʼdullayev), Institut 2. “Karyera markazi” tomonidan Institut taʼlim yoʻnalishlariga mos tashkilot va korxonalar bilan hamkorlik aloqalarini oʻrnatish. 2023-yil 1-sentabr 3. Hamkor korxona va tashkilot vakillariga Institut talabalarini saralab olishi uchun tegishli sharoit yaratish. Reja-jadval asosida 25. Institut talabalarini hududdagi umumiy oʻrta, oʻrta maxsus va professional taʼlim muassasalariga biriktirish. 1. Hududdagi umumiy oʻrta, oʻrta maxsus va professional taʼlim muassasalari bilan hamkorlik shartnomalarini imzolash. - 2023-yil 1-sentabr Oliy va oʻrta maxsus taʼlim vazirligi (Toshkulov), Xalq taʼlimi vazirligi (Saidov), Institut 2. Talabalarga doimiy ravishda mazkur taʼlim muassasalarida amaliyot oʻtash va oʻz bilimlarini mustahkamlash uchun sharoit yaratish. Doimiy 26. Romanlar, hikoyalar va kinofilmlar orqali yoshlar ongida xalq qahramonlari haqida chuqur tasavvur uygʻotish maqsadida targʻibot-tashviqot ishlarini keng yoʻlga qoʻyish. 1. Amir Temur, Jaloliddin Manguberdi, Temur Malik, Najmiddin Kubro, Isʼhoqxon Ibrat, Qatagʻon qurbonlari, Ikkinchi jahon urushi davrida oʻz jonini fido qilgan qahramonlarning hayoti va faoliyatiga bagʻishlangan ijodiy kechalar va uchrashuvlarni tashkil etish. Institutning budjetdan tashqari mablagʻlari, homiylik xayriyalari Reja-jadval asosida Oliy va oʻrta maxsus taʼlim vazirligi (Toshkulov), Madaniyat vazirligi (Nazarbekov), Yozuvchilar uyushmasi (Saidov), Institut 2. Talabalar ijodiy ishlari tanlovlarini oʻtkazish. Har yili aprel oyida 3. Obroʻli va el-yurt hurmatiga sazovor boʻlgan keksa avlod vakillari bilan doimiy uchrashuvlar, davra suhbatlari tashkil etish. Doimiy 27. Institutda “Tarjimonlar klubi” faoliyatini tashkil etish. 1. Institutda Prezident taʼlim muassasalari agentligi huzuridagi Isʼhoqxon Ibrat nomidagi ijod maktabi oʻquvchilari uchun “Tarjimonlar klubi”ni tashkil etish. 2. Klubda ijod maktabi oʻquvchilarining darsdan boʻsh vaqtlarida xorijiy tillarni oʻrganishi, tarjimonlik mahoratini egallashi uchun toʻgaraklar va mahorat darslari tashkil etish. Institutning budjetdan tashqari mablagʻlari, homiylik xayriyalari 2022-yil 1-oktabr Oliy va oʻrta maxsus taʼlim vazirligi (Toshkulov), Institut 28. Namangan davlat universiteti tizimidagi “Isʼhoqxon Ibrat — Qatagʻon qurbonlari xotirasi” muzeyini Institut tizimiga oʻtkazish va faoliyatini lozim darajada tashkil etish. 1. Muzeyda mavjud eksponatlarni va moddiy qimmatliklarni inventarizatsiyadan oʻtkazish. Institutning budjetdan tashqari mablagʻlari, homiylik xayriyalari 2022-yil 1-avgust Madaniy meros agentligi (Abdikarimov), Namangan viloyat hokimligi (Abdurazakov), Namangan davlat universiteti (Turgʻunov), Institut 2. Muzeyni Institut tizimiga oʻtkazish boʻyicha topshirish-qabul qilish dalolatnomasini rasmiylashtirish. 2022-yil 1-sentabr 3. Muzey faoliyatini lozim darajada tashkil etish va uning moddiy-texnika bazasini rivojlantirish. Doimiy 4. Institut talabalarining muzeyga tashrif buyurish reja-jadvalini tasdiqlash. Har oʻquv yili boshida 5. Reja-jadval asosida talabalarning muzeyga tashrif buyurishlarini taʼminlash. Reja-jadval asosida

Oʻzbekiston Respublikasi Prezidentining 2022-yil 9-iyundagi PQ-275-son qaroriga 2-ILOVA

Isʼhoqxon Ibrat nomidagi Namangan davlat chet tillari institutini 2026-yilga qadar rivojlantirishning

MAQSADLI KOʻRSATKICHLARI

T/r Ustuvor vazifa Maqsadli koʻrsatkich Yillar kesimida Oʻsish koʻrsatkichi (2023-yilga nisbatan) 2023-yil 2024-yil 2025-yil 2026-yil 1. Xorijiy tillar boʻyicha milliy yoki unga mos darajadagi xalqaro tan olingan sertifikatga ega talabalar ulushini oshirish Jami talabalar soniga nisbatan, foizda 30 45 60 100 3,3 baravar 2. Yuqori malakali ilmiy va ilmiy-pedagog kadrlarni tayyorlash Ilmiy salohiyat, foizda 24 32 43 57 2,4 baravar 3. Himoya qilinadigan falsafa doktori dissertatsiyalari (PhD) soni 6 13 19 22 3,7 baravar 4. Himoya qilinadigan fan doktori dissertatsiyalari (DSc) soni 2 4 6 8 4 baravar 5. Falsafa doktori ilmiy darajasini olishga talabgor doktorantlar (PhD) soni 10 12 16 22 2,1 baravar 6. Fan doktori ilmiy darajasini olishga talabgor doktorantlar (DSc) soni 2 4 6 6 3 baravar 7. Mustaqil izlanuvchilar soni 6 14 19 24 4 baravar 8. Professor-oʻqituvchilarning ilmiy-uslubiy faoliyati natijadorligini oshirish Darsliklar soni 2 5 8 10 5 baravar 9. Oʻquv qoʻllanmalar soni 4 8 15 20 5 baravar 10. Monografiyalar soni 4 6 8 10 2,5 baravar 11. Scopus, Web of Science maʼlumotlar bazasiga kiritilgan maqolalar soni 16 40 70 100 6,3 baravar 12. Respublika jurnallarida eʼlon qilingan ilmiy maqolalar soni 30 70 100 120 4 baravar 13. Scopus, Web of Science maʼlumotlar bazasiga kiritilgan har bir maqolaga toʻgʻri keluvchi iqtiboslar soni 0,5 1,0 1,5 2,0 4 baravar 14. Ilmiy-tadqiqot faoliyati natijalarini amaliyotga tatbiq etishdan olingan mablagʻlar (mlrd soʻm hisobida) Xorijiy ilmiy-tadqiqot markazlari va ilmiy fondlardan olingan mablagʻlar 0,1 0,3 0,8 1 10 baravar 15. Davlat grantlari asosida oʻtkazilgan ilmiy tadqiqotlardan olingan mablagʻlar 0,1 0,2 0,3 0,5 5 baravar 16. Xalqaro ilmiy-texnik hamkorlikni kengaytirish Jahonning yetakchi universitetlari va ilmiy markazlariga xizmat safarlariga yuboriladigan Institut professor-oʻqituvchilari soni 8 10 15 20 2,5 baravar 17. Institutga kamida bir oy muddatga tashrif buyuradigan xorijiy olimlar soni 2 2 4 8 4 baravar 18. Institutda tahsil oladigan xorijiy talabalar soni 5 10 30 50 10 baravar 19. Akademik almashinuv dasturlarida ishtirok etuvchi talabalar soni 10 30 50 80 8 baravar 20. Institut professor-oʻqituvchilarining xorijiy olimlar bilan hammualliflikda chop etgan maqolalari soni 5 10 15 20 4 baravar

Oʻzbekiston Respublikasi Prezidentining 2022-yil 9-iyundagi PQ-275-son qaroriga 3-ILOVA

Isʼhoqxon Ibrat nomidagi Namangan davlat chet tillari institutida tashkil etiladigan bakalavriat taʼlim yoʻnalishlari va magistratura

MUTAXASSISLIKLARI ROʻYXATI

T/r Bakalavriat taʼlim yoʻnalishlari va magistratura mutaxassisliklari I. Bakalavriat taʼlim yoʻnalishi 2022/2023 oʻquv yilidan boshlab tashkil etiladigan 1. Xorijiy til va adabiyot: ingliz tili 2. Maktabgacha va boshlangʻich taʼlimda xorijiy til: ingliz tili 3. Oʻzga tilli guruhlarda rus tili 4. Filologiya va tillarni oʻqitish: ingliz tili 5. Filologiya va tillarni oʻqitish: fransuz tili 6. Filologiya va tillarni oʻqitish: nemis tili 7. Filologiya va tillarni oʻqitish: rus tili 8. Tarjima nazariyasi va amaliyoti: ingliz tili 9. Gid hamrohligi va tarjimonlik faoliyati: ingliz tili 2023/2024 oʻquv yilidan boshlab tashkil etiladigan 10. Tarjima nazariyasi va amaliyoti: nemis tili 11. Filologiya va tillarni oʻqitish: fors tili 12. Filologiya va tillarni oʻqitish: koreys tili 13. Filologiya va tillarni oʻqitish: xitoy tili 14. Filologiya va tillarni oʻqitish: yapon tili II. Magistratura mutaxassisliklari 2022/2023 oʻquv yilidan boshlab tashkil etiladigan 1. Xorijiy til va adabiyot: ingliz tili 2. Ona tili va adabiyoti: rus tili va adabiyoti 3. Adabiyotshunoslik: ingliz adabiyoti 4. Lingvistika: ingliz tili 5. Lingvistika: fransuz tili 6. Lingvistika: nemis tili 2023/2024 oʻquv yilidan boshlab tashkil etiladigan 7. Sinxron tarjima (tillar boʻyicha) 8. Badiiy tarjima (tillar boʻyicha)