Maktabgacha va maktab taʼlimini rivojlantirishga oid qoʻshimcha chora-tadbirlar toʻgʻrisida (PQ-241-son)

11.05.2022

Oʻzbekiston Respublikasi Prezidentining

Qarori

Oʻzbekiston Respublikasi Prezidentining 2022-yil 11-maydagi “2022 — 2026-yillarda maktab taʼlimini rivojlantirish boʻyicha milliy dasturni tasdiqlash toʻgʻrisida”gi PF-134-son Farmoni ijrosini taʼminlash maqsadida:

1. Umumiy oʻrta taʼlim muassasalarida maʼnaviy-maʼrifiy ishlar samaradorligini oshirish va bu borada maktab direktori, ota-onalar va mahalla raislari masʼuliyatini kuchaytirish maqsadida Maktabgacha va maktab taʼlimi vazirligi manfaatdor vazirlik va idoralar bilan birgalikda 2022-yil 1-sentabrdan boshlab respublikaning barcha tuman (shahar)lari kesimida namunali maktablar reytingini (keyingi oʻrinlarda — reyting) shakllantirsin va eʼlon qilib borsin.

Belgilansinki:

reyting doirasida har oʻquv yili yakunida umumiy oʻrta taʼlim muassasalarida olib borilayotgan maʼnaviy-maʼrifiy ishlar holati Maktabgacha va maktab taʼlimi vazirligi tomonidan tasdiqlangan mezonlar boʻyicha baholab boriladi;

umumiy oʻrta taʼlim muassasalarida olib borilayotgan maʼnaviy-maʼrifiy ishlar holatini baholash va reytingni yuritish uchun tuman (shahar) maktabgacha va maktab taʼlimi boʻlimlari boshliqlari rahbarligida maxsus komissiyalar tuziladi;

umumiy oʻrta taʼlim muassasalari reyting koʻrsatkichlari asosida “yashil”, “sariq” va “qizil” toifalarga ajratiladi;

reyting koʻrsatkichlari asosida “qizil” toifaga kiritilgan umumiy oʻrta taʼlim muassasalarida maʼnaviy-maʼrifiy ishlar samaradorligini oshirish boʻyicha zarur choralar koʻriladi.

2. Maktabgacha va maktab taʼlimi vazirligi (X. Umarova), Ichki ishlar vazirligi (P. Bobojonov), Mudofaa vazirligi (B. Kurbanov), Milliy gvardiya (R. Djurayev), Yoshlar ishlari agentligi (A. Saʼdullayev), Respublika Maʼnaviyat va maʼrifat markazi (M. Xodjimatov) boshqa vazirlik va idoralar bilan birgalikda 2022-yil 1-sentabrdan boshlab reyting koʻrsatkichlari asosida “qizil” toifaga kiritilgan umumiy oʻrta taʼlim muassasalarida:

ziyoli va nuroniylar, ilgʻor tadbirkorlar, klaster va sanoat korxonalari rahbarlari, mashhur sanʼatkor, sportchi va aktyorlar, taniqli blogerlarni jalb qilgan holda maktab oʻquvchilari bilan uchrashuvlar, motivatsion suhbatlar va mahorat darslarini tashkil etsin;

maktab oʻquvchilari uchun “Vatanparvarlik” darslarini va poligonlarda 2 kunlik harbiy dala mashgʻulotlarini oʻtkazish hamda ularni chavandozlar maktablariga jalb qilish choralarini koʻrsin, harbiy qism ofitserlari, serjantlari va Qurolli Kuchlar faxriylari ishtirokida “Vatan tinchligiga barchamiz masʼul!”, “Vatan ozodligi — baxt garovi!”, “Vatanga xizmat — oliy fazilat” mavzularida davra suhbatlarini tashkil qilsin;

oʻquvchilarning meʼmoriy va tarixiy obidalar, madaniyat muassasalari hamda muhofaza etiladigan tabiiy hududlarga tashrifini uyushtirsin;

oʻquvchilarning qiziqishlari, talab va istaklaridan kelib chiqib sport musobaqalari, konsert tomoshalari va sanʼat asarlari koʻrgazmalarini oʻtkazsin;

buyuk ajdodlarimizning ilmiy va madaniy merosi, ularning ibratli hayot yoʻli hamda jahon sivilizatsiyasini rivojlantirishga qoʻshgan hissalariga oid targʻibot ishlarini olib borsin, ulugʻ allomalarning tugʻilgan sanalariga bagʻishlangan ilmiy haftaliklar, seminar va anjumanlar tashkil etsin;

hayotiy misollar asosida ota-onalarning farzandlar tarbiyasidagi oʻrni, majburiyati va masʼuliyati haqida tushuntirish ishlarini olib borsin, ularni qiziqtirgan va xavotirga solayotgan masalalar boʻyicha ochiq muloqotlar hamda oʻquv-seminarlarni tashkil etsin.

Kambagʻallikni qisqartirish va bandilik vazirligi (B. Musayev) Qoraqalpogʻiston Respublikasi Vazirlar Kengashi, viloyatlar, Toshkent shahar va tuman (shahar) hokimliklari hamda fuqarolarning oʻzini oʻzi boshqarish organlari bilan birgalikda har chorakda namunali oʻquvchilarning ota-onalarini ragʻbatlantirish, ularga “minnatdorchilik xati”ni topshirish va sovgʻalar taqdim etish, shuningdek, faoliyatini ommaviy axborot vositalarida keng yoritish amaliyotini yoʻlga qoʻysin.

3. Maktabgacha va maktab taʼlimi vazirligi (X. Umarova):

2022-yil 1-avgustga qadar umumiy oʻrta taʼlim muassasasidagi ichki tartib va odob-axloq qoidalarini qayta koʻrib chiqsin va ularda maktab va ota-onaning bola tarbiyasidagi oʻrni va masʼuliyatini, ularning taʼlim va tarbiya jarayonidagi ishtiroki hamda majburiyatlarini belgilasin;

umumiy oʻrta taʼlim muassasasidagi ichki tartib va odob-axloq qoidalarini oʻzining rasmiy veb-sayti hamda “my. maktab. uz” axborot tizimida joylashtirsin;

2022-yil 1-sentabrdan boshlab, maktab oʻquvchilari ota-onalarini “my. maktab. uz” axborot tizimi orqali umumiy oʻrta taʼlim muassasasining ichki tartib va odob-axloq qoidalari bilan tanishtirib borsin.

Vazirlar Mahkamasi bir oy muddatda Umumiy oʻrta taʼlim muassasalarida maʼnaviy-maʼrifiy hamda tarbiyaviy ishlar samaradorligini oshirish konsepsiyasini tasdiqlasin.

4. Umumiy oʻrta taʼlim muassasalarining axborot-kommunikatsiya texnologiyalari infratuzilmasini yaxshilash, kompyuter sinf xonalarini zamonaviy texnikalar va boshqa vositalar bilan taʼminlash uchun:

Xalq taʼlimi vazirligi (B. Saidov) Moliya vazirligi (T. Ishmetov), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan kelishgan holda 2022-yil 1-sentabrga qadar 2023-2024-yillarda maktablarda maʼnan eskirgan kompyuter sinflarini yangilash boʻyicha dasturni Vazirlar Mahkamasiga tasdiqlash uchun kiritsin;

Iqtisodiyot va moliya vazirligi (Sh. Kudbiyev), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 2023-2024-yillarda maktablarda maʼnan eskirgan kompyuter sinflarini yangilash boʻyicha dasturni moliyalashtirish uchun Oʻzbekiston Respublikasi respublika budjeti hisobidan 200 milliard soʻm, mahalliy budjetlar hisobidan 200 milliard soʻm miqdorda mablagʻlar ajratilishini taʼminlasin;

Raqamli texnologiyalar vazirligi (Sh. Shermatov), Maktabgacha va maktab taʼlimi vazirligi (X. Umarova), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda 2022/2023 oʻquv yilidan boshlab 400 nafargacha oʻquvchisi boʻlgan umumiy oʻrta taʼlim muassasalarida Internet tezligi kamida 40 Mbit/s, oʻquvchilar soni 400 nafardan yuqori boʻlganlarda — kamida 100 Mbit/s boʻlishini taʼminlasin;

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari umumiy oʻrta taʼlim muassasalarini yuqori tezlikdagi Internetga ulash uchun zarur mablagʻlarni ajratsin;

Maktabgacha va maktab taʼlimi vazirligi (X.Umarova) 2023-yildan boshlab har yili 1-avgustga qadar Investitsiyalar va tashqi savdo vazirligi hamda Moliya vazirligiga umumiy oʻrta taʼlim muassasalarida maʼnan eskirgan kompyuter texnikasi toʻgʻrisida maʼlumotlarni taqdim etib borsin;

Investitsiyalar, sanoat va savdo vazirligi (L. Kudratov) Iqtisodiyot va moliya vazirligi (Sh. Kudbiyev) bilan birgalikda 2024-yildan boshlab har yili Maktabgacha va maktab taʼlimi vazirligi tomonidan taqdim etiladigan maʼlumotlar asosida umumiy oʻrta taʼlim muassasalarini zamonaviy kompyuterlar bilan taʼminlash boʻyicha moliyalashtirish manbalarini aniqlasin.

5. Xalq taʼlimi vazirligi (B. Saidov) Bandlik va mehnat munosabatlari vazirligi (N. Xusanov) bilan birgalikda:

2022-yil 1-sentabrga qadar fan oʻqituvchisi va maktab direktori lavozimlari uchun tanlovda ishtirok etishga onlayn ariza topshirish va nomzod haqida maʼlumotlarni joylashtirish imkonini beradigan maxsus elektron portalni yaratsin;

maxsus elektron portalda amaldagi hamda istiqbolda kadrlarga boʻlgan ehtiyoj, shuningdek, vakant lavozimlar toʻgʻrisidagi maʼlumotlarni umumiy oʻrta taʼlim muassasalari va fanlar kesimida joylashtirish orqali milliy kadrlar zaxirasini shakllantirsin.

Bandlik va mehnat munosabatlari vazirligi (N. Xusanov), Oliy va oʻrta maxsus taʼlim vazirligi (A. Toshkulov), Axborot texnologiyalari va kommunikatsiyalarini rivojlantirish vazirligi (Sh. Shermatov) 2022-yil 1-avgustga qadar oʻz axborot tizimlarining “Elektron hukumat” idoralararo integratsiya platformasi orqali maxsus elektron portal bilan integratsiyasini taʼminlasin.

6. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, Iqtisodiyot va moliya vazirligi (Sh. Kudbiyev), Investitsiyalar, sanoat va savdo vazirligi (L. Kudratov), Qurilish va uy-joy kommunal xoʻjaligi vazirligi (B. Zokirov) hamda Maktabgacha va maktab taʼlimi vazirligi (X. Umarova) 2022 — 2026-yillarda umumiy oʻrta taʼlim muassasalarini qurish, rekonstruksiya qilish va mukammal taʼmirlash hisobiga 1,2 million oʻquvchi oʻrni miqdoridagi yangi quvvatlar yaratilishini taʼminlasin.

Bunda, maktabgacha, umumiy oʻrta va maktabdan tashqari taʼlim tashkilotlari hamda oʻquv kurslarini moddiy-texnik jihozlash boʻyicha talablar Taʼlimni rivojlantirish respublika ilmiy-metodik markazi tomonidan belgilanadi.

Belgilab qoʻyilsinki, asosiy prognoz koʻrsatkichlarga muvofiq umumiy oʻrta taʼlim muassasalarini qurish, rekonstruksiya qilish, mukammal taʼmirlash va jihozlash — Oʻzbekiston Respublikasining ijtimoiy va ishlab chiqarish infratuzilmasini rivojlantirish dasturlari doirasida ajratiladigan mablagʻlar, Davlat budjeti mablagʻlari, xalqaro moliya institutlarining kreditlari va grantlari, homiylik xayriyalari, xususiy sheriklar hamda nodavlat taʼlim tashkilotlari mablagʻlari, shuningdek, qonunchilik hujjatlarida taqiqlanmagan boshqa manbalar hisobidan amalga oshiriladi.

Iqtisodiyot va moliya vazirligi (Sh. Kudbiyev), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Oʻzbekiston Respublikasining ijtimoiy va ishlab chiqarish infratuzilmasini rivojlantirish dasturlari doirasida 2022 — 2026-yillarda umumiy oʻrta taʼlimda 700 ming oʻquvchi oʻrni miqdoridagi yangi quvvatlar yaratilishini taʼminlasin.

7. Maktabgacha va maktab taʼlimi vazirligi (X. Umarova) Kambagʻallikni qisqartirish va bandlik vazirligi (B. Musayev) hamda Oliy taʼlim, fan va innovatsiyalar vazirligi (I. Abduraxmonov) bilan birgalikda 2022/2023 oʻquv yilidan boshlab:

boshlangʻich sinf oʻquvchilariga oʻquv rejaga kiritilgan fanlar doirasida mehnat bozorida mavjud boʻlgan turli kasblar toʻgʻrisida tushunchalar berib borsin;

kasb egalarining mehnat faoliyati bilan yaqindan tanishish maqsadida 5 — 7-sinf oʻquvchilari uchun turli uchrashuv va sayyor darslarni tashkil etsin;

7 — 9-sinf oʻquvchilarining kasbga moyilligini aniqlash boʻyicha tashxislar oʻtkazib borsin hamda natijalaridan kelib chiqib, ishlab chiqarish korxonalari, hunarmandchilik markazlari va boshqa tashkilotlarga ekskursiyalar tashkil qilsin;

hududlarning ijtimoiy-iqtisodiy salohiyati va oʻsish nuqtalariga muvofiq maktab oʻquvchilari uchun ustuvor kasblarni belgilasin hamda 10- va 11-sinf oʻquvchilarini ushbu kasblarga, shu jumladan kasb-hunarga oʻqitish markazlari, mahalla aholisini kasb-hunarga oʻqitish maskanlari, qisqa muddatli kurslar ochilgan taʼlim muassasalarida oʻqitish choralarini koʻrsin.

Xalq taʼlimi vazirligi (B. Saidov), Qurilish vazirligi (B. Zokirov), Bandlik va mehnat munosabatlari vazirligi (N. Xusanov) 2022-yil 1-avgustga qadar umumiy oʻrta taʼlim muassasalarining texnologiya fani ustaxonalari hamda kasb-hunar amaliyoti xonalari namunaviy loyihalarini ishlab chiqsin va tasdiqlasin.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 2022/2023 oʻquv yilidan boshlab tasdiqlangan namunaviy loyihalar asosida umumiy oʻrta taʼlim muassasalarining texnologiya fani ustaxonalarini hamda kasb-hunar amaliyoti xonalarini bosqichma-bosqich tashkil etish va jihozlash choralarini koʻrsin.

8. 2023-yil 1-yanvardan boshlab shunday tartib oʻrnatilsinki, unga muvofiq:

a) umumiy oʻrta taʼlim tashkilotlari har 11 yilda kamida bir marta majburiy tarzda attestatsiya va davlat akkreditatsiyasidan oʻtkaziladi. Bunda, umumiy oʻrta taʼlim tashkilotlari muddatdan oldin attestatsiya va davlat akkreditatsiyasidan shartnoma asosida oʻtishi mumkin;

b) umumiy oʻrta taʼlim tashkilotlari quyidagi tartibda attestatsiya va davlat akkreditatsiyasidan oʻtkaziladi:

faoliyat yuritayotgan umumiy oʻrta taʼlim tashkilotlari — amaldagi akkreditatsiya sertifikatining muddati tugaganidan soʻng 11 yil muddatga;

yangi tashkil etiladigan umumiy oʻrta taʼlim tashkilotlari — ular tashkil etilgan paytdan boshlab (belgilangan tartibda litsenziya olgan paytdan boshlab) 11 yil muddatga;

v) davlat umumiy oʻrta taʼlim tashkilotlarida xavf-xatarlar tahliliga asoslangan taʼlim sifati monitoringi joriy etiladi. Bunda:

monitoring natijalariga koʻra taʼlim sifatida pasayish kuzatilgan davlat umumiy oʻrta taʼlim tashkilotlarining faoliyati alohida rejaga muvofiq joyiga chiqqan holda oʻrganiladi;

joyiga chiqib oʻrganish natijasi boʻyicha davlat umumiy oʻrta taʼlim tashkiloti uchun faoliyat samaradorligini yaxshilash boʻyicha “yoʻl xarita”si ishlab chiqiladi;

“yoʻl xarita”sida belgilangan chora-tadbirlar oʻz vaqtida va lozim darajada bajarilishi uchun umumiy oʻrta taʼlim muassasasiga tuman (shahar) hokimliklari va xalq taʼlimi boʻlimlari koʻmak koʻrsatadi;

g) uzluksiz uch yil davomida faoliyat samaradorligi darajasi yuqori boʻlgan davlat va nodavlat umumiy oʻrta taʼlim tashkilotlarida tekshiruvlar tashkil etishga 3 yil muddatga moratoriy joriy qilinadi (potensial korrupsiogen holatlar bundan mustasno).

9. Taʼlim sifatini nazorat qilish davlat inspeksiyasi (U. Tashkenbayev) va Xalq taʼlimi vazirligi (B. Saidov) 2022-yil 1-oktabrga qadar:

davlat umumiy oʻrta taʼlim tashkilotlarida xavf-xatarlar tahliliga asoslangan taʼlim sifati monitoringini amalga oshirish tartibini;

umumiy oʻrta taʼlim tashkilotlarining faoliyatini ichki va tashqi baholashdan oʻtkazishning soddalashtirilgan tartibini belgilovchi Hukumat qarori loyihasini Vazirlar Mahkamasiga kiritsin.

10. Davlat test markazi (M. Karimov) Xalq taʼlimi vazirligi (B. Saidov) bilan birgalikda 2022-yil 1-sentabrga qadar 2024-yildan boshlab umumiy oʻrta va oʻrta maxsus taʼlim tashkilotlari hamda kasb-hunar maktablari bitiruvchilari uchun yakuniy davlat attestatsiyasini Davlat test markazi tomonidan imtihonlar shaklida oʻtkazishni nazarda tutuvchi Oʻzbekiston Respublikasi Prezidentining qarori loyihasini Vazirlar Mahkamasiga kiritsin.

11. Belgilab qoʻyilsinki, Maktabgacha va maktab taʼlimi vazirligining:

taʼlim berishga moʻljallangan binolari va inshootlarini taʼlim sohasidan tashqari boshqa maqsadlar uchun yuridik va jismoniy shaxslarga berilishi taqiqlanadi;

taʼlim berishga moʻljallangan, boʻsh turgan binolari hamda inshootlarini boshqa jismoniy va yuridik shaxslarga berish ular joylashgan hududning kamida 5 yillik demografik koʻrsatkichlarini inobatga olib, maktabgacha va maktab taʼlimi vazirining roziligini olgan holda amalga oshiriladi.

12. Shunday tartib oʻrnatilsinki, unga muvofiq 2022-yil 1-sentabrdan boshlab:

maktabgacha va maktab taʼlimi tizimidagi muassasa va tashkilotlar rahbarlariga budjetdan tashqari mablagʻlarini mustaqil tasarruf etish huquqi beriladi;

2030-yil 1-yanvarga qadar maktabgacha va maktab taʼlimi tizimidagi muassasa va tashkilotlarning (vazirlik markaziy apparati va uning hududiy boʻlinmalaridan tashqari) budjetdan tashqari mablagʻlari hisobidan amalga oshiriladigan ish haqi va unga tenglashtirilgan toʻlovlarga ijtimoiy soliq stavkasi 1 foiz miqdorida belgilanadi;

qoʻshimcha xizmat koʻrsatishdan tushgan budjetdan tashqari mablagʻlarni yashirgan, shuningdek, xodimlarga norasmiy ish haqi toʻlagan xalq taʼlimi tizimidagi muassasa va tashkilotlarning rahbarlari qonunchilikda belgilangan tartibda javobgarlikka tortiladi.

13. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari zimmasiga:

maktabgacha va maktab taʼlimi tizimini isloh qilish boʻyicha Qoraqalpogʻiston Respublikasi, viloyatlar va Toshkent shahar kengashlari tomonidan tasdiqlangan hududiy dasturlarda belgilangan vazifalarni oʻz vaqtida va sifatli amalga oshirilishini taʼminlash;

har chorakda hududiy dasturda belgilangan vazifalar ijrosini Qoraqalpogʻiston Respublikasi Joʻqorgʻi Kengesi va xalq deputatlari viloyat Kengashlari sessiyalarida muhokama etib borish hamda Maktab taʼlimi tizimini isloh qilish boʻyicha milliy kengashga bu haqida axborot kiritilishini taʼminlash;

hududdagi maktabgacha va maktab taʼlimi muassasalarining moddiy-texnik bazasini mustahkamlash hamda ularning infratuzilmasini yaxshilash;

maktabgacha va maktab taʼlimi muassasalarini qurish, rekonstruksiya qilish, kapital va joriy taʼmirlash, ularga tutash hududlarni obodonlashtirish, infratuzilmani (trotuarlar, yoʻllar va boshqalar) zarur holatda saqlash boʻyicha buyurtmachi funksiyasini amalga oshirish;

maktabgacha va maktab taʼlimi muassasalarini elektr energiyasi, tabiiy gaz, ichimlik suvi, zarur sanitariya-gigiyena sharoitlari va boshqa kommunal xizmatlar bilan uzluksiz taʼminlash;

tumanlar (shaharlar)ni kompleks ijtimoiy-iqtisodiy rivojlantirish boʻyicha sektor rahbarlari bilan birgalikda maktabgacha va maktab taʼlimi muassasalarini oʻquv yiliga va kuz-qish mavsumiga oʻz vaqtida va samarali tayyorlash tadbirlarini amalga oshirish;

umumiy oʻrta taʼlim muassasalarining xavfsizligini taʼminlash, shu jumladan hududlar atrofini oʻrash, ularga huquqbuzarliklar profilaktikasi boʻyicha inspektorlarni biriktirish, videokuzatuv kameralari va yongʻinga qarshi signalizatsiya tizimlarini oʻrnatish choralarini koʻrish;

maktabgacha va maktab taʼlimi muassasalari hududining va koʻchmas mulkining butunligini hamda daxlsizligini belgilangan tartibda taʼminlash;

umumiy oʻrta taʼlim muassasalarini rivojlantirish uchun investitsiyalarni va homiylik yordamini jalb qilishga koʻmaklashish;

maktabgacha va maktab taʼlimi muassasalariga koʻmaklashish masalalari boʻyicha vazirlik, idora va boshqa tashkilotlarning hududiy boʻlinmalari rahbarlarining hisobotlarini belgilangan tartibda eshitish;

oʻqituvchi kasbi maqomi va obroʻsini oshirish, ularga munosib mehnat sharoitlarini yaratish, pedagoglarning shaʼni va qadr-qimmati kamsitilishiga yoʻl qoʻymaslik va faoliyatiga aralashmaslik;

oʻquvchilar ongiga vatanparvarlik tuygʻularini va milliy qadriyatlarni singdirish, boy madaniy-tarixiy meros, milliy urf-odatlar, buyuk ajdodlarimiz maʼnaviy merosini oʻrganishlari uchun sharoitlarni yaratishda sektor rahbarlari va mutasaddi tashkilotlarni keng jalb etish;

soha xodimlari, taʼlim muassasalari rahbarlari, pedagoglarning Yangi Oʻzbekiston taraqqiyotidagi shaxsiy hissasi, oʻquvchilarni har tomonlama yetuk avlod etib tarbiyalashdagi masʼuliyatlarini his etishlari uchun targʻibot va tushuntirishlar olib borish;

rahbar va pedagog kadrlar tomonidan taʼlim tizimida amalga oshirilayotgan islohotlarni, sohada joriy qilinayotgan yangiliklarni yanada kengroq targʻib etilishi, oʻquvchilarning kasbiy va shaxsiy rivojlanishlari uchun kerakli boʻlgan maʼlumotlarni olishlari uchun imkoniyatlarni kengaytirish, ularning bilimi va tafakkurini oshirish maqsadida maktabgacha va maktab taʼlimi yoʻnalishidagi bosma nashrlarni taʼlim muassasalariga yetkazib berishni taʼminlash vazifalari yuklansin.

14. Oʻzbekiston Respublikasi Prezidentining ayrim qarorlariga 2-ilovaga muvofiq oʻzgartirish va qoʻshimchalar kiritilsin.

15. Xalq taʼlimi vazirligi manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

16. Mazkur qarorning ijrosini samarali tashkil qilishga masʼul va shaxsiy javobgar etib maktabgacha va maktab taʼlimi vaziri X. Umarova, iqtisodiyot va moliya vaziri Sh. Kudbiyev, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari belgilansin.

Qaror ijrosini har chorakda muhokama qilib borish, ijro uchun masʼul idoralar faoliyatini muvofiqlashtirish va nazorat qilish Oʻzbekiston Respublikasining Bosh vaziri A.N. Aripov hamda Oʻzbekiston Respublikasi Prezidenti maslahatchisi A.A. Abduvaxitov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2022-yil 11-may,

PQ-241-son

Oʻzbekiston Respublikasi Prezidentining 2022-yil 11-maydagi PQ-241-son qaroriga 2-ILOVA

Oʻzbekiston Respublikasi Prezidentining ayrim qarorlariga kiritilayotgan oʻzgartirish va qoʻshimchalar

1. Oʻzbekiston Respublikasi Prezidentining 2012-yil 10-dekabrdagi “Chet tillarni oʻrganish tizimini yanada takomillashtirish chora-tadbirlari toʻgʻrisida”gi PQ-1875-son qarorining 1-bandida:

a) toʻrtinchi xatboshidagi “mablagʻlari hisobidan” soʻzlaridan keyin “qonunchilik hujjatlarida belgilangan tartibda” soʻzlari bilan toʻldirilsin;

b) beshinchi xatboshi chiqarib tashlansin.

2. Oʻzbekiston Respublikasi Prezidentining 2016-yil 22-dekabrdagi “Mahalliy ijroiya hokimiyati organlari faoliyatini yanada takomillashtirish toʻgʻrisida”gi PQ-2691-son qarori 41-bandining uchinchi xatboshisi quyidagi tahrirda bayon etilsin:

“Belgilansinki:

Qoraqalpogʻiston Respublikasi Vazirlar Kengashi Raisining oʻrinbosari, Andijon, Jizzax, Namangan, Navoiy, Sirdaryo, Surxondaryo va Fargʻona viloyatlari hokimlarining turizm, sport, madaniyat, madaniy meros va ommaviy kommunikatsiyalar masalalari boʻyicha oʻrinbosarlarining kotibiyatiga qoʻshimcha bir nafar shtat birligini ajratish Turizm va sport vazirligi tizimidagi sport-taʼlim muassasalarining shtat birliklarini qisqartirish hisobiga amalga oshiriladi;

Qoraqalpogʻiston Respublikasi xalq taʼlimi vaziri, viloyatlar xalq taʼlimi boshqarmasi boshliqlari, Toshkent shahar xalq taʼlimi bosh boshqarmasi boshligʻi, tuman (shahar) xalq taʼlimi boʻlimi mudirlari bir vaqtning oʻzida tegishincha Qoraqalpogʻiston Respublikasi Vazirlar Kengashi Raisi, viloyatlar va Toshkent shahar, tuman (shahar) hokimlarining taʼlim va tarbiya masalalari boʻyicha maslahatchilari hisoblanadi”.

3. Oʻzbekiston Respublikasi Prezidentining 2017-yil 14-martdagi “Oʻrta maxsus, kasb-hunar taʼlimi muassasalari faoliyatini yanada takomillashtirish chora-tadbirlari toʻgʻrisida”gi PQ-2829-son qarori 3-bandining yettinchi xatboshisi quyidagi tahrirda bayon etilsin:

“2017/2018 oʻquv yilidan boshlab akademik litseylar va kasb-hunar maktablari oʻquvchilarini umumiy oʻrta taʼlim muassasalari uchun moʻljallangan umumtaʼlim fanlari boʻyicha darsliklar bilan taʼminlash qonunchilik hujjatlarida belgilangan tartibda Oʻzbekiston Respublikasi Xalq taʼlimi vazirligi huzuridagi budjetdan tashqari Respublika maqsadli kitob jamgʻarmasining aylanma mablagʻlari hamda Davlat budjeti mablagʻlari hisobidan amalga oshiriladi”.

4. Oʻzbekiston Respublikasi Prezidentining 2018-yil 5-sentabrdagi “Xalq taʼlimi tizimiga boshqaruvning yangi tamoyillarini joriy etish chora-tadbirlari toʻgʻrisida”gi PQ-3931-son qarorida:

a) 2-band oʻz kuchini yoʻqotgan deb hisoblansin;

b) 3-bandning “a” va “b” kichik bandlari oʻz kuchini yoʻqotgan deb hisoblansin;

v) 4-bandda:

quyidagi mazmundagi oʻn toʻrtinchi xatboshi bilan toʻldirilsin:

“davlat umumiy oʻrta taʼlim muassasalari hududida oʻrnatilgan video kuzatuv kameralari va biometrik identifikatsiya tizimlari orqali qayd etilgan huquqbuzarliklar uchun Oʻzbekiston Respublikasining Maʼmuriy javobgarlik toʻgʻrisidagi kodeksiga muvofiq undiriladigan jarimalar summalarining 50 foizi”;

oʻn toʻrtinchi — yigirma oltinchi xatboshilari tegishincha oʻn beshinchi — yigirma yettinchi xatboshilar deb hisoblansin;

“v” kichik band oʻz kuchini yoʻqotgan deb hisoblansin;

g) 6-band quyidagi tahrirda bayon etilsin:

“6. Vazirlikka, uning hududiy boʻlinmalari va idoraviy boʻysunuvidagi tashkilotlarga hamda umumtaʼlim muassasalariga Vazirlik huzuridagi “Innovatsiya, texnologiya va strategiya markazi” davlat unitar korxonasi bilan toʻgʻridan-toʻgʻri shartnomalar tuzish huquqi berilsin va ushbu shartnomalar maxsus axborot portalida roʻyxatdan oʻtkazilsin”;

d) 10-bandda:

beshinchi xatboshi chiqarib tashlansin;

oltinchi — oʻn birinchi xatboshilar tegishincha beshinchi — oʻninchi xatboshilar deb hisoblansin;

e) 12-bandda:

beshinchi xatboshi chiqarib tashlansin;

oltinchi — toʻqqizinchi xatboshilar tegishincha beshinchi — sakkizinchi xatboshilar deb hisoblansin;

j) 10, 11 va 12-bandlardagi tegishli kelishikdagi “davlat-xususiy sheriklik toʻgʻrisidagi kelishuv” soʻzlari tegishli kelishikdagi “davlat-xususiy sheriklik toʻgʻrisidagi bitim” soʻzlari bilan almashtirilsin;

z) 23-band quyidagi tahrirda bayon etilsin:

“23. Vazirlikning markaziy apparati va “Xalq taʼlimi sohasida loyiha hujjatlariga texnik topshiriqlarni ishlab chiqish va qurilish obyektlari sifatini monitoring qilish boʻyicha injiniring kompaniyasi” DUK Toshkent shahri, Shayxontohur tumani, Navoiy koʻchasi, 2a-uyda joylashtirilsin”;

i) 1-ilovada:

“Xalq taʼlimi sohasida axborot-kommunikatsiya texnologiyalarini rivojlantirish markazi,” va “Xalq taʼlimini rivojlantirish jamgʻarmasi,” soʻzlari chiqarib tashlansin;

“Maktabdan tashqari taʼlim muassasalari” blokidan keyin “Xalq taʼlimi xodimlarini ragʻbatlantirish jamgʻarmalari” bloki bilan toʻldirilsin.

5. Oʻzbekiston Respublikasi Prezidentining 2019-yil 22-apreldagi “Bola huquqlari kafolatlarini yanada kuchaytirishga oid qoʻshimcha chora-tadbirlar toʻgʻrisida”gi PQ-4296-son qarorining 6-bandi quyidagi tahrirda bayon etilsin:

“6. Quyidagilar uchun oliy taʼlim muassasalariga abituriyentlarni qabul qilishning umumiy soniga qoʻshimcha ravishda bir foizgacha davlat granti asosidagi qabul kvotalari ajratiladi:

2019/2020 oʻquv yilidan boshlab “Mehribonlik” uylari va bolalar shaharchalarining bitiruvchilari boʻlgan chin yetimlar uchun;

2021/2022 oʻquv yilidan boshlab SOS — bolalar mahallalari va oilaviy bolalar uylari bitiruvchilari, shuningdek, vasiylikka, homiylikka yoki oilaga tarbiyaga olingan (patronat) yetim bolalar (yigirma besh yoshga toʻlmagan) uchun”.

6. Oʻzbekiston Respublikasi Prezidentining 2019-yil 14-maydagi “Oliy taʼlim muassasalariga test sinovlari orqali qabul qilish tizimini takomillashtirish boʻyicha qoʻshimcha chora-tadbirlar toʻgʻrisida”gi PQ-4319-son qarorida:

a) 2-band quyidagi tahrirda bayon etilsin:

“Belgilab qoʻyilsinki:

test sinovi topshiriqlari davlat taʼlim standartlari va oʻquv dasturlari asosida tuziladi;

test sinovi materiallarining maʼno-mazmuni umumiy oʻrta taʼlim tizimidagi fanlarning oʻquv dasturlariga moslashtiriladi;

abituriyentlarning nazariy bilimlarni oʻzlashtirish darajasi bilan birga mantiqiy fikrlashi, masala va misollarni bajara olish qobiliyati va taʼlimning keyingi bosqichiga tayyorgarligini baholaydigan, kompetensiyaga asoslangan test topshiriqlari ishlab chiqiladi;

bakalavriat taʼlim yoʻnalishlariga mos test sinovi topshiriladigan fanlar majmuasi, baholash mezonlari, test topshiriqlari soni va test sinovlarini oʻtkazishning aniq muddatlari Oʻzbekiston Respublikasi taʼlim muassasalariga oʻqishga qabul qilish boʻyicha davlat komissiyasi tomonidan, Toshkent davlat yuridik universiteti bakalavriat taʼlim yoʻnalishlari boʻyicha test sinovlari topshiriladigan fanlar majmuasi esa universitet tomonidan belgilanadi;

bakalavriat taʼlim yoʻnalishlariga mos test sinovi topshiriladigan fanlar majmuasi har yili 15-oktabrga qadar eʼlon qilinadi;

Oʻzbekiston Respublikasining oliy taʼlim muassasalariga oʻqishga qabul qilishning davlat buyurtmasi parametrlari tasdiqlangandan soʻng, yangi bakalavriat taʼlim yoʻnalishlari tashkil etilgan taqdirda, ularga mos test sinovi topshiriladigan fanlar majmuasi alohida tasdiqlanadi;

2019/2020 oʻquv yili qabulidan boshlab Oʻzbekiston Respublikasi taʼlim muassasalariga oʻqishga qabul qilish boʻyicha davlat komissiyasi tomonidan belgilanadigan davlat oliy taʼlim muassasalariga bakalavriatga oʻqishga kirish uchun abituriyentlar Davlat xizmatlari markazlari yoki Oʻzbekiston Respublikasi Yagona interaktiv davlat xizmatlari portali orqali murojaat qiladilar”;

b) 4-bandning beshinchi xatboshisi “foizigacha” soʻzidan keyin “(ragʻbatlantirish koeffitsiyentini hisobga olgan holda)” soʻzlari bilan toʻldirilsin”.

7. Oʻzbekiston Respublikasi Prezidentining 2019-yil 30-sentabrdagi “Xalq taʼlimi tizimidagi maktabdan tashqari taʼlim samaradorligini tubdan oshirish chora-tadbirlari toʻgʻrisida”gi PQ-4467-son qarorida:

a) 1-bandning beshinchi xatboshisidagi “2020 — 2023-yillarda” soʻzlari “2025-yilga qadar” soʻzlari bilan almashtirilsin;

b) 5-bandning ikkinchi xatboshisidagi “2020/2021” raqamlari “2022/2023” raqamlari bilan almashtirilsin;

v) 13-bandning uchinchi xatboshisidagi “koʻchma kutubxonalar” soʻzlari “mahallalar kutubxonalari” soʻzlari bilan almashtirilsin;

g) 14-band oʻz kuchini yoʻqotgan deb hisoblansin;

d) 1-ilovada:

6-pozitsiyaning “Tadbirlar nomi” ustunidagi “vositalar uchun elektron formatdagi dasturiy loyihalarni” soʻzlari “vositalarning elektron formatlarini” soʻzlari bilan almashtirilsin;

8-pozitsiyaning “Tadbirlar nomi” ustunidagi “onlayn” soʻzi chiqarib tashlansin;

24, 31-pozitsiyalar chiqarib tashlansin;

26-pozitsiyaning “Tadbirlar nomi” ustunidagi “va onlayn kitoblar oʻqish” soʻzlari chiqarib tashlansin;

27-pozitsiyaning “Tadbirlar nomi” ustunidagi “600” raqami “120” raqami bilan almashtirilsin;

e) 4-ilovaning matni quyidagi tahrirda bayon etilsin:

“2019 — 2024-yillarda Xalq taʼlimi tizimidagi maktabdan tashqari taʼlim tizimini rivojlantirishning maqsadli koʻrsatkichlari

T/r Koʻrsatkichlar nomi Oʻlchov birligi Yillar kesimida 2019 2020 2021 2022 2023 2024 I. Maktabdan tashqari taʼlim tizimini tashkil qilish va boshqarishni takomillashtirish 1. “Barkamol avlod” bolalar maktablarini oliy maʼlumotli mutaxassislar bilan toʻldirish. Foizda (jami toʻgarak rahbarlari soniga nisbatan) 25 30 35 37 40 43 2. Oʻquvchilarni “Barkamol avlod” bolalar maktablariga qamrab olish. Foizda (jami umumtaʼlim maktablardagi oʻquvchilar soniga nisbatan) 2,4 4,5 5,7 5,8 5,9 6,0 3. “Barkamol avlod” bolalar maktablarida “STEAM — taʼlim” (Science — tabiiy fanlar, Technology — texnologiyalar, Engineering — muhandislik, Art — sanʼat, Mathematics — matematika) dasturini amaliyotga joriy etish. Foizda (jami maktablar soniga nisbatan) mavjud emas 7 20 22 24 25 4. “Barkamol avlod” bolalar maktablarida “Axborot texnologiyalari”, “Dasturlash”, “Mexatronika” va “Robototexnika” yoʻnalishlari boʻyicha toʻgarak aʼzolari sonini oshirish. Ishtirok etuvchi oʻquvchilar foizda (jami toʻgarakka jalb etilgan oʻquvchilar soniga nisbatan) 12 14 16 18 20 22 II. Oʻquvchilar oʻrtasida kitobxonlikni targʻib qilish va kitob mutolaasini rivojlantirish 5. Umumtaʼlim maktablari oʻquvchilari oʻrtasida kitob mutolaasi va kitobxonlik madaniyatini shakllantirish orqali kitobxonlar sonini oshirish. Foizda (jami umumtaʼlim maktablaridagi oʻquvchilar soniga nisbatan) 12 14 15 16 18 20 6. “Bolalar kutubxonalari” va maktab kutubxonalari uchun milliy adabiyot va jahon adabiyoti durdonalariga kiruvchi asarlarning audiokitob shaklini yaratish. Dona 60 80 90 100 110 120 7. Oilaviy kitobxonlikni targʻib qilish, kelajakda yosh shoir va yozuvchilarning yetuk shogirdlarini yetishtirish maqsadida turli tanlovlar tashkil etish. Tadbirlarsoni 2 3 4 5 6 7 III. Maktabdan tashqari taʼlim muassasalarida axborot-kommunikatsiya texnologiyalarini keng joriy etish, jihozlar bilan taʼminlash va davlat-xususiy sheriklikni yoʻlga qoʻyish 8. Davlat-xususiy sheriklik asosida robototexnika va injenerlik toʻgaraklari ulushi. Foizda (jami maktablar soniga nisbatan) mavjud emas 3 5 6 7 8 9. Xorijiy tillar toʻgaraklarini tashkil etishda xususiy sektor vakillarining ulushi. Foizda (jami maktablar soniga nisbatan) mavjud emas 12 14 15 16 17 10. “Barkamol avlod” bolalar maktablari va “Bolalar kutubxonalari”dagi mavjud hujjatlar, statistik maʼlumotlar hamda hisobotlarni raqamlashtirish. Foizda mavjud emas 15 20 22 25 30 11. “Barkamol avlod” bolalar maktablarini keng polosali Internet tarmogʻiga ulash. Foizda (jami maktablar soniga nisbatan) 5 30 60 85 100 - 12. “Bolalar kutubxonalari”da xorijiy davlatlar kutubxonalariga onlayn sayohatlar uyushtirish imkoniyatini beruvchi virtual maydonlar tashkil etish. Foizda (jami kutubxonalar soniga nisbatan) mavjud emas 2 4 5 6 7 13. “Barkamol avlod” bolalar maktablarida mamlakatimiz va xorijiy davlatlar madaniyati, urf-odatlari, diqqatga sazovor joylari bilan oʻquvchilarni yaqindan tanishtirishga qaratilgan onlayn sayohatlarni oʻz ichiga olgan virtual maydonlar tashkil etish. Foizda (jami maktablar soniga nisbatan) mavjud emas 2 4 5 6 7 14. “Barkamol avlod” bolalar maktablaridagi oʻquv dasturlari, oʻquv qoʻllanmalari va koʻrgazmali vositalarning elektron formatlarini ishlab chiqish. Foizda mavjud emas 20 35 38 40 43 15. “Barkamol avlod” bolalar maktablarida texnik ijodiyot yoʻnalishi boʻyicha onlayn toʻgaraklar tashkil etish. Foizda (jami maktablar soniga nisbatan) mavjud emas 5 8 10 12 15 16. Kitoblardan foydalanish samaradorligini hisobga olish uchun QR-kodlar yordamida elektron kitoblar toʻgʻrisidagi maʼlumotlarni joylashtirish va ularni mobil qurilmalarga yuklab olish hamda oʻqish imkoniyatini yaratish. Foizda (jami maktablar soniga nisbatan) mavjud emas 2 5 7 9 10 17. “Barkamol avlod” bolalar maktablari toʻgarak aʼzolarining xalqaro miqyosdagi tadbirlardagi munosib ishtiroki. Ishtirok etuvchi oʻquvchilar foizda (jami toʻgarak aʼzolari soniga nisbatan) 0,2 0,7 1,2 1,5 1,7 1,9 ”.

8. Oʻzbekiston Respublikasi Prezidentining 2019-yil 9-dekabrdagi “Byurokratik toʻsiqlarni yanada qisqartirish hamda davlat organlari va tashkilotlari faoliyatiga zamonaviy boshqaruv tamoyillarini joriy qilish chora-tadbirlari toʻgʻrisida”gi PQ-4546-son qarorining 1-ilovasi 10-pozitsiyasi “Mahalliy ijro etuvchi hokimiyat organlarining funksiyalari (vakolatlari) beriladigan subyekt” ustunidagi “Qoraqalpogʻiston Respublikasi Xalq taʼlimi vazirligi va viloyat xalq taʼlimi boshqarmalari” soʻzlari “Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasi” soʻzlari bilan almashtirilsin.

9. Oʻzbekiston Respublikasi Prezidentining 2020-yil 10-fevraldagi “Oʻzbekiston Respublikasida gematologiya va transfuziologiya xizmatlarini rivojlantirish hamda onkogematologik va davolash qiyin boʻlgan kasalliklarga chalingan shaxslarni yanada qoʻllab-quvvatlash chora-tadbirlari toʻgʻrisida”gi PQ-4592-son qarorining 10-bandida:

a) quyidagi mazmundagi oltinchi xatboshi bilan toʻldirilsin:

“Sogʻliqni saqlash vazirligi tomonidan tasdiqlangan roʻyxat asosida ogʻir kasallikka chalingan yetim bolalar va ota-ona qaramogʻidan mahrum boʻlgan bolalarning respublikada yoʻlga qoʻyilmagan jarrohlik amaliyotlari boʻyicha xorijiy davlatlardagi jarrohlik operatsiyalari bilan bogʻliq xarajatlarni qoplash uchun”;

b) oltinchi xatboshi yettinchi xatboshi deb hisoblansin.

10. Oʻzbekiston Respublikasi Prezidentining 2020-yil 7-maydagi “Matematika sohasidagi taʼlim sifatini oshirish va ilmiy-tadqiqotlarni rivojlantirish chora-tadbirlari toʻgʻrisida”gi PQ-4708-son qarorida:

a) 5-bandning uchinchi xatboshisi chiqarib tashlansin;

b) 8-bandning yettinchi xatboshisi chiqarib tashlansin.

11. Oʻzbekiston Respublikasi Prezidentining 2020-yil 12-avgustdagi “Kimyo va biologiya yoʻnalishlarida uzluksiz taʼlim sifatini va ilm-fan natijadorligini oshirish chora-tadbirlari toʻgʻrisida”gi PQ-4805-son qarorida:

a) 6-bandning toʻrtinchi va beshinchi xatboshilari chiqarib tashlansin;

b) 5-ilovada:

13-pozitsiyaning “Ijro muddati” ustunidagi “2021/2022” raqamlari “2022/2023” raqamlari bilan almashtirilsin;

14-pozitsiyaning “Ijro muddati” ustunidagi “2022/2023” raqamlari “2023/2024” raqamlari bilan almashtirilsin.

12. Oʻzbekiston Respublikasi Prezidentining 2020-yil 6-oktabrdagi “Axborot texnologiyalari sohasida taʼlim tizimini yanada takomillashtirish, ilmiy tadqiqotlarni rivojlantirish va ularni IT-industriya bilan integratsiya qilish chora-tadbirlari toʻgʻrisida”gi PQ-4851-son qarorining 9-bandi oʻz kuchini yoʻqotgan deb hisoblansin.

13. Oʻzbekiston Respublikasi Prezidentining 2021-yil 19-martdagi “Fizika sohasidagi taʼlim sifatini oshirish va ilmiy tadqiqotlarni rivojlantirish chora-tadbirlari toʻgʻrisida”gi PQ-5032-son qarori 6-bandining ikkinchi xatboshisi chiqarib tashlansin.

14. Oʻzbekiston Respublikasi Prezidentining 2021-yil 15-apreldagi “Jamoat xavfsizligini taʼminlash sohasida professional kadrlarni tayyorlash tizimini yanada takomillashtirish chora-tadbirlari toʻgʻrisida”gi PQ-5077-son qarorining 2-bandida:

a) quyidagi mazmundagi toʻrtinchi xatboshi bilan toʻldirilsin:

“harbiy vatanparvarlik, maʼnaviy-maʼrifiy tarbiya va yoshlar bilan ijtimoiy ishlash yoʻnalishida oʻquv-tarbiya muassasalari tarbiyachilarini qayta tayyorlash va malakasini oshirish”;

b) toʻrtinchi — oltinchi xatboshilar tegishincha beshinchi — yettinchi xatboshilar deb hisoblansin.

15. Oʻzbekiston Respublikasi Prezidentining 2021-yil 19-maydagi “Oʻzbekiston Respublikasida xorijiy tillarni oʻrganishni ommalashtirish faoliyatini sifat jihatidan yangi bosqichga olib chiqish chora-tadbirlari toʻgʻrisida”gi PQ-5117-son qarorining 5-bandi “a” va “b” kichik bandlari quyidagi tahrirda bayon etilsin:

“a) taʼlim muassasalarining kamida S1 darajadagi milliy yoki unga tenglashtirilgan mos darajadagi xalqaro tan olingan sertifikatga ega xorijiy tillar (ingliz, fransuz, nemis, ispan, italyan, arab, xitoy, yapon, koreys, turk, fors, pushtu, dari, urdu, hind) oʻqituvchilariga ularning bazaviy tarif stavkasiga nisbatan har oylik 50 foiz miqdorida qoʻshimcha ustama haqi toʻlab borilsin.

Bunda, umumiy oʻrta, oʻrta maxsus va professional taʼlim muassasalari oʻqituvchilarining kamida S1 darajadagi xalqaro sertifikatni olish uchun imtihon topshirish bilan bogʻliq xarajatlari Davlat budjetidan pedagog kadrlar malakasini oshirish uchun ajratiladigan mablagʻlar, davlat oliy taʼlim muassasalari oʻqituvchilarining xarajatlari esa oliy taʼlim muassasalarining oʻz mablagʻlari hisobidan qoplanishi belgilansin;

b) umumiy oʻrta, oʻrta maxsus va professional taʼlim muassasalarining kamida S1 darajadagi milliy yoki unga mos darajadagi xalqaro sertifikatga ega xorijiy tillar (ingliz, fransuz, nemis, ispan, italyan, arab, xitoy, yapon, koreys, turk, fors, pushtu, dari, urdu, hind) oʻqituvchilari attestatsiya jarayonida malaka sinovi uchun maksimal ball bilan baholanib, xorijiy til moduli boʻyicha sinovdan ozod etilsin.

Bunda, mazkur sertifikatni olish muqobil malaka oshirish shakli sifatida tan olinsin”.

16. Oʻzbekiston Respublikasi Prezidentining 2021-yil 29-iyundagi PQ-5168-son qarori bilan tasdiqlangan Yuridik xizmat koʻrsatish markazlari toʻgʻrisidagi nizom quyidagi mazmundagi 21-band bilan toʻldirilsin:

“21. Yetim bolalar va ota-ona qaramogʻidan mahrum boʻlgan bolalar hamda ularni farzandlikka yoki vasiylikka (homiylikka, patronatga) olgan fuqarolarga Markazlar tomonidan bepul yuridik xizmat koʻrsatiladi”.

Izoh: mazkur ilovaning 10, 11, 12 va 13-bandlari 2022-yil 1-sentabrdan eʼtiboran kuchga kiradi.