Oʻzbekiston Respublikasi Prezidenti huzuridagi Ijtimoiy himoya milliy agentligi tizimidagi tibbiy-ijtimoiy muassasalarda qoʻshimcha va yordamchi funksiyalarni autsorsing shartlarida tashkil etish tartibi toʻgʻrisidagi nizomni tasdiqlash haqida (3367-son)
10.05.2022
Oʻzbekiston Respublikasi Tibbiy-ijtimoiy xizmatlarni rivojlantirish agentligi direktorining
buyrugʻi
[Oʻzbekiston Respublikasi Adliya vazirligi tomonidan 2022-yil 10-mayda roʻyxatdan oʻtkazildi, roʻyxat raqami 3367]
Oʻzbekiston Respublikasi Prezidentining 2021-yil 25-martdagi PF-6195-son “Keksalar va nogironligi boʻlgan shaxslarni ijtimoiy qoʻllab-quvvatlash, “Saxovat” va “Muruvvat” internat uylari tizimini yanada rivojlantirish toʻgʻrisida”gi Farmoniga muvofiq buyuraman:
1. Oʻzbekiston Respublikasi Prezidenti huzuridagi Ijtimoiy himoya milliy agentligi tizimidagi tibbiy-ijtimoiy muassasalarda qoʻshimcha va yordamchi funksiyalarni autsorsing shartlarida tashkil etish tartibi toʻgʻrisidagi nizom ilovaga muvofiq tasdiqlansin.
2. Mazkur buyruq rasmiy eʼlon qilingan kundan eʼtiboran kuchga kiradi.
Direktor A. INAKOV
Toshkent sh.,
2022-yil 7-may,
76-ICH-son
Kelishildi:
Oʻzbekiston Respublikasi Sanitariya-epidemiologik osoyishtalik va jamoat salomatligi xizmati boshligʻi B. YUSUPALIYEV
2022-yil 28-aprel
Savdo-sanoat palatasi raisi D. VAXABOV
2022-yil 28-aprel
Moliya vaziri T. ISHMETOV
2022-yil 5-may
Oʻzbekiston Respublikasi Tibbiy-ijtimoiy xizmatlarni rivojlantirish agentligi direktorining 2022-yil 7-maydagi 76-ICH-son buyrugʻiga ILOVA
Oʻzbekiston Respublikasi Prezidenti huzuridagi Ijtimoiy himoya milliy agentligi tizimidagi tibbiy-ijtimoiy muassasalarda qoʻshimcha va yordamchi funksiyalarni autsorsing shartlarida tashkil etish tartibi toʻgʻrisidagi
NIZOM
Ushbu Nizom Oʻzbekiston Respublikasi Prezidenti huzuridagi Ijtimoiy himoya milliy agentligi (bundan buyon matnda Agentlik deb yuritiladi) tizimidagi Ijtimoiy qoʻllab-quvvatlash markazlari va “Muruvvat” nogironligi boʻlgan shaxslar uchun internat uylarida, Nogironligi boʻlgan shaxslarni reabilitatsiya qilish va protezlash milliy markazi, uning hududiy markazlarida, Keksalar, nogironligi boʻlgan shaxslar, urush va mehnat faxriylari uchun sanatoriylarda hamda Odam savdosi jabrdiydalariga yordam berish boʻyicha respublika reabilitatsiya markazida (bundan buyon matnda tibbiy-ijtimoiy muassasa deb yuritiladi) mazkur Nizomga 1-ilovada nazarda tutilgan qoʻshimcha va yordamchi funksiyalarni (bundan buyon matnda xizmatlar deb yuritiladi) autsorsing shartlarida tashkil etish tartibini belgilaydi.
1-bob. Umumiy qoidalar
1. Ushbu Nizomda quyidagi tushunchalardan foydalaniladi:
autsorsing — xizmatlarni shartnoma asosida autsorserga oʻtkazish;
autsorser — shartnoma asosida buyurtmachiga xizmatlarni koʻrsatuvchi tadbirkorlik subyekti;
buyurtmachi — tibbiy-ijtimoiy muassasalar.
2. Buyurtmachi xizmatlarni autsorsingga oʻtkazishda quyidagi shartlarga rioya qilishi shart:
autsorserga oʻtkaziladigan xizmatlarni oldingi sifatga teng yoki undan yuqori sifatda koʻrsatilishiga;
buyurtmachining autsorserga beriladigan xizmatlarni bajarish bilan band boʻlgan xodimlari shtat birliklarini qisqartirishga.
3. Autsorser xodimlari buyurtmachining tegishli hududiga buyurtmachiga oldindan taqdim etilgan roʻyxat asosida kiradi hamda tibbiy-ijtimoiy muassasa binosida harakatlanadi.
4. Tibbiy-ijtimoiy muassasalarda davolanuvchi hamda reabilitatsiya jarayonida boʻlgan shaxslarga (bundan buyon matnda isteʼmolchi deb yuritiladi) xizmatlarni tashkil etish uchun autsorser masʼul hisoblanadi.
5. Isteʼmolchilarga koʻrsatiladigan xizmatlar belgilangan sanitariya qoidalari, normalari va gigiyena normativlari asosida autsorser tomonidan tuzilgan va buyurtmachi tomonidan tasdiqlangan bir oylik reja asosida tashkil etiladi.
6. Autsorserni tanlash hamda u bilan shartnoma tuzish davlat xaridlari toʻgʻrisidagi qonunchilik hujjatlariga muvofiq amalga oshiriladi.
7. Autsorser xarid qilayotgan oziq-ovqat mahsulotlari va tovarlar, foydalaniladigan texnologik jihozlarning sanitariya qoidalari, normalari va gigiyena normativlariga mosligiga shaxsan masʼul hisoblanadi.
2-bob. Autsorserning huquq va majburiyatlari
8. Autsorser quyidagi huquqlarga ega:
ijara shartnomasi doirasida bino va inshootlarni ichki va tashqi qismida texnik jihatdan jihozlash va taʼmirlash ishlarini amalga oshirish;
koʻrsatilgan xizmatlar uchun toʻlovni shartnomada belgilangan miqdor va muddatda talab qilish;
isteʼmolchilarning soni va ovqatlanish jadvalini belgilangan tartibda olish;
xizmatlar tannarxi oʻzgarishi munosabati bilan shartnomaga oʻzgartirish kiritish taklifi bilan chiqish;
buyurtmachidan shartnoma shartlarining bajarilishini talab qilish.
9. Autsorser quyidagilarga majbur:
buyurtmachining bino-inshootlarida oʻz faoliyatini sanitariya qoidalari, normalari va gigiyena normativlariga muvofiq amalga oshirish;
isteʼmolchilarni sogʻlom ovqatlantirish xizmatini buyurtmachi oshxonasining oʻzida yoki oʻz oshxonasida toʻliq va sifatli tashkil etish;
buyurtmachi bilan rasmiylashtiriladigan shartnomada koʻzda tutilgan shartlarni toʻliq va sifatli bajarish.
3-bob. Buyurtmachining huquq va majburiyatlari
10. Buyurtmachi quyidagi huquqlarga ega:
autsorsing usulida xizmatlarni amalga oshirish uchun shartnomada autsorserga qoʻyilgan talablar bajarilishini oʻrganish;
autsorserning faoliyatiga aralashmagan holda, shartnoma shartlarining bajarilishini nazorat qilish;
autsorser bilan kelishilgan holda koʻrsatiladigan xizmatlar jadvaliga oʻzgartirish va qoʻshimchalar kiritish;
xarid qilayotgan oziq-ovqat mahsulotlari va tovarlar, foydalaniladigan texnologik jihozlarning sanitariya qoidalari, normalari va gigiyena normativlariga mosligini talab qilish.
11. Buyurtmachi quyidagilarga majbur:
koʻrsatilgan xizmatlar uchun shartnomada belgilangan miqdor va muddatda toʻlovni amalga oshirish;
autsorserga isteʼmolchilarning sonini va ularning ovqatlanish jadvalini oʻz vaqtida taqdim etish.
4-bob. Autsorsing xizmatlariga haq toʻlash, autsorser faoliyatini va xizmatlar nazoratini tashkil etish
12. Autsorsing xizmatlariga haq toʻlash miqdori buyurtmachi hamda autsorser oʻrtasida rasmiylashtiriladigan shartnomada belgilanadi.
13. Autsorser tomonidan koʻrsatiladigan xizmatlarning buyurtmachi va autsorser oʻrtasida tuzilgan shartnomada belgilangan talablarga muvofiqligi buyurtmachi rahbari, uning oʻrinbosari, hamshira, tarbiyachi hamda boshqa xodimlardan (zarur hollarda, ota-onalar, isteʼmolchilarning qonuniy vakillari qoʻshilishi mumkin) iborat komissiya tomonidan nazorat qilinadi.
Bunda, ushbu Nizomga 1-ilovada nazarda tutilgan taom tayyorlash sifatini nazorat qilish yakunlari mazkur Nizomga 2-ilovadagi shaklga muvofiq tayyor taomlar sifatini nazorat qilish boʻyicha maʼlumotlarni qayd etish daftarida har kuni qayd qilib boriladi.
Shuningdek, mazkur Nizomga 1-ilovada belgilangan kir yuvish va tozalash xizmatlari sifatini nazorat qilish boʻyicha ushbu Nizomning 3-ilovasiga muvofiq shaklda maʼlumotlarni qayd etish daftari yuritiladi.
Mazkur Nizomning 2 va 3-ilovalarida nazarda tutilgan daftarlarning birinchi sahifasida komissiyani tasdiqlash haqidagi buyruqdan koʻchirma boʻlishi, daftarlar raqamlangan, ip oʻtkazib tikilgan va buyurtmachi rahbari tomonidan sana koʻrsatilgan holda imzolanib, muhrlangan boʻlishi lozim.
14. Autsorser tomonidan sanitariya qoidalari, normalari va gigiyena normativlari bajarilishi holatining monitoringini olib borish hamda kunlik taom tarqatilishidan 15 — 20 daqiqa oldin sinamalar olish buyurtmachi hamshirasi zimmasiga yuklanadi.
15. Keyingi kunga koʻrsatiladigan xizmatlar roʻyxati, shu jumladan taomnoma rejasini tuzish uchun buyurtmachi autsorserga bir kun oldin soat 16.00 gacha bir kun oldingi isteʼmolchilar soniga nisbatan buyurtma taqdim qiladi.
Shuningdek, shanba, yakshanba va bayram kunlarida qolgan isteʼmolchilarning soni bir kun oldin taqdim qilinadi.
16. Mazkur Nizomga 1-ilovada nazarda tutilgan xizmatlar uchun bir kunlik oʻrtacha sarflanadigan mahsulotlarning miqdori va ularning qiymati chiqarilgan holda autsorser tomonidan ushbu Nizomga 4 — 6-ilovalarda keltirilgan shakllarga muvofiq taom tayyorlash, kir yuvish va tozalash hamda axborot-kommunikatsiya taʼminoti va texnik xizmat varaqalari ikki nusxada bir kun oldin soat 18.00 gacha tuziladi hamda buyurtmachi rahbari bilan kelishiladi. Birinchi nusxasi autsorserga, ikkinchi nusxasi buyurtmachiga beriladi.
17. Buyurtmachi har oʻn kunlik blankalarni ip oʻtkazib bogʻlangan holda oldindan raqamlaydi, muhrlaydi va alohida daftarda roʻyxatdan oʻtkazadi.
18. Blankada xizmatlar turi, narxi, sarflangan mahsulotlar turi va ularning miqdorlari koʻrsatiladi.
19. Ushbu Nizomga 7-ilovada nazarda tutilgan shaklga muvofiq sifati tez buziluvchi oziq-ovqat va boshqa mahsulotlarni qayd etish daftari autsorser tomonidan yuritiladi.
20. Autsorser har oʻn kunda tasdiqlangan koʻrsatilgan xizmatlar boʻyicha hisob-faktura hujjatlarini buyurtmachi buxgalteriyasiga taqdim etadi.
5-bob. Yakunlovchi qoidalar
21. Mazkur Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javob beradilar.
22. Ushbu Nizom Oʻzbekiston Respublikasi Moliya vazirligi, Sanitariya-epidemiologik osoyishtalik va jamoat salomatligi xizmati va Savdo-sanoat palatasi bilan kelishilgan.
Oʻzbekiston Respublikasi Prezidenti huzuridagi Ijtimoiy himoya milliy agentligi tizimidagi tibbiy-ijtimoiy muassasalarda qoʻshimcha va yordamchi funksiyalarni “autsorsing” xizmati orqali amalga oshirish tartibi toʻgʻrisidagi nizomga 1-ILOVA
Oʻzbekiston Respublikasi Prezidenti huzuridagi Ijtimoiy himoya milliy agentligi tizimidagi tibbiy-ijtimoiy muassasalarda autsorsingga oʻtkaziladigan qoʻshimcha va yordamchi funksiyalar
ROʻYXATI
1. Taom tayyorlash;
2. Kir yuvish;
3. Tozalash;
4. Texnik xizmat koʻrsatish;
5. Axborot-kommunikatsiya taʼminoti.
Oʻzbekiston Respublikasi Prezidenti huzuridagi Ijtimoiy himoya milliy agentligi tizimidagi tibbiy-ijtimoiy muassasalarda qoʻshimcha va yordamchi funksiyalarni “autsorsing” xizmati orqali amalga oshirish tartibi toʻgʻrisidagi nizomga 2-ILOVA
Tayyor taomlar sifatini nazorat qilish boʻyicha maʼlumotlarni qayd etish
DAFTARI
Tayyor ovqatning nomlanishi Baholanishi Sinama olingan vaqt Tibbiyot xodimining ruxsati Imzo Taomnomaning bajarilishi Sifati Ovqat tayyorlash texnologiyasiga rioya qilinganligi 20____ yil _____ _________________ Nonushta Tushlik Ikkinchi tushlik Kechki ovqat Yengil ovqatlanish 20____ yil _____ _________________ Nonushta Tushlik Ikkinchi tushlik Kechki ovqat Yengil ovqatlanish
Oʻzbekiston Respublikasi Prezidenti huzuridagi Ijtimoiy himoya milliy agentligi tizimidagi tibbiy-ijtimoiy muassasalarda qoʻshimcha va yordamchi funksiyalarni “autsorsing” xizmati orqali amalga oshirish tartibi toʻgʻrisidagi nizomga 3-ILOVA
Kir yuvish va tozalash xizmatlari sifatini nazorat qilish boʻyicha maʼlumotlarni qayd etish
DAFTARI
T/r Oylar Oydagi kunlar soni Oʻlchov birligi Kir yuvish va tozalash ashyolar nomlari Xizmat birliklari soni Sifati Kir yuvish va tozalash texnologiyasiga rioya qilinganligi Masʼul xodim imzosi 1. 2. 3. 1. 2. 1. 2. Xizmatlarning soni
Oʻzbekiston Respublikasi Prezidenti huzuridagi Ijtimoiy himoya milliy agentligi tizimidagi tibbiy-ijtimoiy muassasalarda qoʻshimcha va yordamchi funksiyalarni “autsorsing” xizmati orqali amalga oshirish tartibi toʻgʻrisidagi nizomga 4-ILOVA
Oʻzbekiston Respublikasi Prezidenti huzuridagi Ijtimoiy himoya milliy agentligi tizimidagi tibbiy-ijtimoiy muassasalarda qoʻshimcha va yordamchi funksiyalarni “autsorsing” xizmati orqali amalga oshirish tartibi toʻgʻrisidagi nizomga 5-ILOVA
Oʻzbekiston Respublikasi Prezidenti huzuridagi Ijtimoiy himoya milliy agentligi tizimidagi tibbiy-ijtimoiy muassasalarda qoʻshimcha va yordamchi funksiyalarni “autsorsing” xizmati orqali amalga oshirish tartibi toʻgʻrisidagi nizomga 6-ILOVA
Oʻzbekiston Respublikasi Prezidenti huzuridagi Ijtimoiy himoya milliy agentligi tizimidagi tibbiy-ijtimoiy muassasalarda qoʻshimcha va yordamchi funksiyalarni “autsorsing” xizmati orqali amalga oshirish tartibi toʻgʻrisidagi nizomga 7-ILOVA
Sifati tez buziluvchi oziq-ovqat va boshqa mahsulotlarni qayd etish
DAFTARI
T/r Taʼminotchi yuridik shaxsning nomi Yuk xati raqami, mahsulot olib kelingan vaqt va sana Sifati tez buziluvchi mahsulotlar nomi Sifati tez buziluvchi mahsulotlar miqdori Sifati haqida maʼlumot Ishlatish muddatining oxirgi sanasi va vaqti Imzo 1. 2. 3. 4. 5.