Toshkent shahar bolalar koʻp tarmoqli tibbiyot markazini tashkil etish toʻgʻrisida (232-son)

04.05.2022

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidenti tomonidan mamlakatimizda ilk marotaba 2022-yil 18-mart kuni oʻtkazilgan sogʻliqni saqlash sohasi vakillari bilan yangi formatdagi “Tibbiyotdagi islohotlar — inson qadri uchun” mavzusidagi “ochiq muloqoti” doirasida koʻtarilgan muammolarni hal etishga qaratilgan taklif va tashabbuslarni amalga oshirish hamda Toshkent shaharda bolalarga koʻrsatilayotgan tibbiy xizmatning sifati va samaradorligini oshirish maqsadida Vazirlar Mahkamasi qaror qiladi:

1. Oʻzbekiston Respublikasi Sogʻliqni saqlash vazirligi hamda Toshkent shahar hokimligining Toshkent shahar 4-son bolalar klinik shifoxonasi va 3-son yuqumli kasalliklar klinik shifoxonalarini qoʻshib yuborish orqali, 300 oʻringa moʻljallangan budjetdan moliyalashtiriladigan davlat muassasasi shaklidagi Toshkent shahar bolalar koʻp tarmoqli tibbiyot markazini (keyingi oʻrinlarda — Markaz) qayta tashkil etish toʻgʻrisidagi taklifiga rozilik berilsin.

Toshkent shahri, Chilonzor tumani, Bunyodkor koʻchasi, 42-a uy manzilida joylashgan Respublika ixtisoslashtirilgan gemotologiya va qon quyish ilmiy-amaliy tibbiyot markazining sobiq bino-inshootlari tegishli hududi bilan birga Markazga operativ boshqaruv huquqi asosida oʻtkazib berilsin.

2. Quyidagilar Markaz faoliyatining asosiy vazifalari va faoliyat yoʻnalishlari etib belgilansin:

bolalarni tekshirish, ularga yuqori malakali tibbiy-konsultativ yordam koʻrsatish;

bolalarga Oʻzbekiston Respublikasi Sogʻliqni saqlash vazirligi tomonidan tasdiqlangan standartlarga muvofiq yuqori malakali ixtisoslashtirilgan statsionar yordam koʻrsatish;

tuman tibbiyot birlashmalari mutaxassislariga konsultativ va tashkiliy-metodik yordam koʻrsatish;

Toshkent shahar davolash-profilaktika muassasalari amaliyotiga zamonaviy tibbiy texnologiyalarni va boshqarishning iqtisodiy metodlarini joriy etish;

tibbiyot xodimlarini tayyorlash, qayta tayyorlash va ularning malakasini oshirishda qatnashish;

tibbiyot muassasalarida davolash-profilaktika jarayoni sifatini ekspertizadan oʻtkazish.

3. Oʻzbekiston Respublikasi Sogʻliqni saqlash vazirligi bir oy muddatda belgilangan tartibda Markazning Nizomi va boshqa taʼsis hujjatlari tasdiqlanishini taʼminlasin.

Bunda, Markaz faoliyatiga Vazirlar Mahkamasining 2008-yil 18-martdagi 48-son qaroriga 2 va 2a ilovalari qoidalari tatbiq etiladi.

4. Axborot texnologiyalari va kommunikatsiyalarini rivojlantirish vazirligi bir oy muddatda Markazning buyurtmanomasi boʻyicha uni belgilangan tartibda tegishli aloqa turlari bilan taʼminlasin.

5. Quyidagilar Markaz faoliyatini moliyalashtirish manbalari etib belgilansin:

Davlat budjeti mablagʻlari;

pullik tibbiy xizmat koʻrsatishdan (tibbiy yordamning kafolatlangan hajmlari roʻyxatiga kiritilmagan) olinadigan mablagʻlar;

jismoniy va yuridik shaxslarning homiylik xayriyalari;

qonunchilik hujjatlari bilan taqiqlanmagan boshqa manbalar.

6. Belgilansinki:

a) Markaz Toshkent shahar 4-son bolalar klinik va 3-son yuqumli kasalliklar shifoxonalarning huquqlari, majburiyatlari va shartnomalari boʻyicha huquqiy vorisi hisoblanadi;

b) Toshkent shahar, Yakkasaroy tumani Kichik halqa yoʻli koʻchasi, Qushbegi mavzesi 26-uyda joylashgan Toshkent shahar 3-son yuqumli kasalliklar klinik shifoxonasining bino-inshoatlari tegishli hududi bilan birga Toshkent davlat stomatologiya institutiga;

Toshkent shahar, Shayxontoxur tumani Markaz-27, Bogʻ koʻchasi 20-uyda joylashgan Toshkent shahar 4-son bolalar klinik shifoxonasining bino-inshoatlari tegishli hududi bilan birga Oʻzbekiston Respublikasi Sogʻliqni saqlash vazirligiga operativ boshqaruv huquqi asosida beriladi.

7. Oʻzbekiston Respublikasi Sogʻliqni saqlash vazirligi Toshkent shahar hokimligi bilan birgalikda 2022-yil yakunigacha:

markaz bino va inshoatlarida belgilangan tartibda qurilish va taʼmirlash ishlarini oʻtkazish orqali moslashtirish;

markazni uning faoliyatini tashkil etish uchun zarur tibbiy texnika va jihozlar bilan taʼminlash choralarini koʻrsin.

Bunda:

bino-inshoatlarda (keyingi oʻrinlarda — obyekt) amalga oshiriladigan qurilish-taʼmirlash ishlari teng ulushlarda Onkogematologik va davolash qiyin boʻlgan kasalliklarga chalingan bemorlarni sogʻlomlashtirishga koʻmaklashish jamgʻarmasi va Toshkent shahar mahalliy budjeti mablagʻlari hisobidan moliyalashtiriladi;

tibbiy texnika va jihozlar bilan taʼminlash Toshkent shahar hokimligining asoslangan talabnomasiga hamda belgilangan stavka boʻyicha qaytarish sharti bilan 3 yildan koʻp boʻlmagan muddatga ajratiladigan budjet ssudasi hisobidan moliyalashtiriladi.

8. Moliya vazirligi bir oy muddatda Oʻzbekiston Respublikasi Prezidentining “Aholiga tibbiy xizmatlar koʻrsatish sifatini yaxshilash va sogʻliqni saqlash sohasida kadrlar salohiyatini yanada oshirishga oid qoʻshimcha chora-tadbirlar toʻgʻrisida” 2021-yil 11-noyabrdagi PQ-6-son qaroriga asosan Sogʻliqni saqlash vazirligi talabnomalariga muvofiq Markazga zamonaviy tibbiy uskunalar xarid qilish hamda ulardagi mutaxassislarning yetakchi xorijiy tibbiy muassasalarda malakasini oshirish uchun Tiklanish va taraqqiyot jamgʻarmasi hisobidan milliy valyutada yillik 2 foiz stavkada kredit mablagʻlari ajratish choralarini koʻrsin.

9. Obyekt boʻyicha, istisno tariqasida:

a) quyidagilar:

Toshkent shahar hokimligining “Yagona buyurtmachi xizmati” injiniring kompaniyasi — buyurtmachi etib belgilansin;

bosh loyiha va bosh pudrat tashkilot qonunchilikda belgilangan tartibda aniqlanadi.

Bunda, bosh pudrat tashkilotini qurilish-pudrat tashkilotlari elektron reytingida kamida “V” reyting bahosiga ega boʻlgan pudrat tashkilotlari orasidan aniqlanadi;

b) buyurtmachi, bosh loyiha va bosh pudrat tashkilotlariga:

asoslangan hisob-kitoblarga koʻra qurilish-taʼmirlash va jihozlash ishlari uchun 30 foiz avans toʻlovlari hamda zarur qurilish materiallarini xarid qilish uchun 50 foiz oldindan mablagʻ ajratishga;

v) salohiyatli ishlab chiqaruvchilarni (yetkazib beruvchilar) eng yaxshi takliflar tanlovi asosida aniqlash yoʻli bilan tibbiy asbob-uskunalar va jihozlarni xarid qilish boʻyicha shartnomalarni “Loyihalar va import kontraktlarini kompleks ekspertiza qilish markazi” DUKda kompleks ekspertizadan oʻtkazgan hamda kontrakt tuzilganligi toʻgʻrisidagi axborotni maxsus axborot portaliga joylashtirgan holda xarid qilishga ruxsat berilsin.

10. Mazkur qarorning bajarilishini nazorat qilish Oʻzbekiston Respublikasi sogʻliqni saqlash vaziri B.A. Musayev, Toshkent shahar hokimi J.A. Artikxodjayev zimmasiga hamda Vazirlar Mahkamasining Taʼlim, sogʻliqni saqlash va sport masalalari kotibiyatiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2022-yil 4-may,

232-son