Navoiy viloyatining Xatirchi va Qiziltepa tumanlari hududidagi yer uchastkalarining yer fondi toifasini oʻzgartirish toʻgʻrisida (198-son)

19.04.2022

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Yer kodeksining 4, 9 va 36-moddalari hamda “Oʻrmon toʻgʻrisida”gi Oʻzbekiston Respublikasi Qonunining 12-moddasiga muvofiq, shuningdek, Navoiy viloyatining Xatirchi va Qiziltepa tumanlaridagi davlat oʻrmon fondi toifasiga kiritilgan sugʻorilmaydigan yaylov yer maydonlaridan samarali foydalanish maqsadida Vazirlar Mahkamasi qaror qiladi:

1. Oʻzbekiston Respublikasi Oʻrmon xoʻjaligi davlat qoʻmitasi, Davlat soliq qoʻmitasi huzuridagi Kadastr agentligi va Navoiy viloyati hokimligining:

Navoiy viloyati Xatirchi tumanining Oltinsoy massivi hududidagi Xatirchi davlat oʻrmon xoʻjaligining 1 389-konturdagi 15,0 gektar, Qiziltepa tumanidagi “Toʻdakoʻl” suv ombori atrofida joylashgan Navoiy davlat oʻrmon xoʻjaligining 25, 139, 141, 156, 157, 159, 161, 162, 163, 170, 241, 247, 248, 251, 252, 256, 257, 258-konturlardagi 90,0 gektar — jami 105,0 gektar oʻrmon fondi toifasiga kiritilgan sugʻorilmaydigan yaylov yer maydonlarini (keyingi oʻrinlarda — yer maydoni) tuman zaxirasiga qaytarish;

yer maydonlarini oʻrmon fondi yerlari toifasidan sanoat, transport, aloqa, mudofaa va boshqa maqsadlarga moʻljallangan yerlar toifasiga oʻtkazish toʻgʻrisidagi taklifiga rozilik berilsin.

2. Oʻzbekiston Respublikasi Davlat soliq qoʻmitasi huzuridagi Kadastr agentligi, Oʻrmon xoʻjaligi davlat qoʻmitasi va Navoiy viloyati hokimligi:

yer maydonlariga boʻlgan doimiy foydalanish huquqini tugatish, ushbu yer maydonlarini tuman zaxira yerlari hisobiga qaytarish va uni davlat roʻyxatiga olish;

yer maydonlarini oʻrmon yerlari toifasidan sanoat, transport, aloqa, mudofaa va boshqa maqsadlarga moʻljallangan yerlar toifasiga oʻtkazish;

qonunchilik hujjatlarida belgilangan tartibda Navoiy viloyatining yer fondiga tegishli oʻzgartirishlar kiritish choralarini koʻrsin.

3. Navoiy viloyati hokimligi mazkur qarorga asosan yer fondi toifasi oʻzgartirilayotgan yerlardan samarali foydalanishni taʼminlasin.

4. Belgilansinki, yer maydonlari oʻrmon fondi yerlari toifasidan sanoat, transport, aloqa, mudofaa va boshqa maqsadlarga moʻljallangan yerlar toifasiga oʻtkazilishi munosabati bilan qishloq xoʻjaligi va oʻrmon xoʻjaligi ishlab chiqarishi nobudgarchiligining oʻrnini qoplash boʻyicha kompensatsiya toʻlovlari, istisno tariqasida, undirilmaydi.

5. Mazkur qarorning bajarilishini nazorat qilish Oʻzbekiston Respublikasi Bosh vazirining agrar va oziq-ovqat sohalarini rivojlantirish masalalari boʻyicha oʻrinbosari Sh.M. Gʻaniyev hamda Navoiy viloyati hokimi vazifasini bajaruvchi N.T. Tursunov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2022-yil 19-aprel,

198-son