Oʻzbekiston Respublikasi Oliy Majlisi Senati aʼzolarini maʼnaviy va moddiy ragʻbatlantirish faoliyatini takomillashtirish toʻgʻrisida (KQ-329-IV-son)

05.04.2022

Oʻzbekicton Respublikasi Oliy Majlisi Senati Kengashining

qarori

Oʻzbekiston Respublikasi Oliy Majlisi Senatining Kengashi qaror qiladi:

1. Oʻzbekiston Respublikasi Oliy Majlisi Senati aʼzolarini maʼnaviy va moddiy ragʻbatlantirish boʻyicha komissiya ilovaga muvofiq tarkibda tuzilsin.

2. Oʻzbekiston Respublikasi Oliy Majlisi Senati Kengashining 2020-yil 14-fevraldagi “Oʻzbekiston Respublikasi Oliy Majlisi Senati aʼzolarini maʼnaviy va moddiy ragʻbatlantirish boʻyicha komissiya tuzish toʻgʻrisida”gi KQ-8-IV-sonli Qarorining 1-bandi oʻz kuchini yoʻqotgan deb hisoblansin.

3. Oʻzbekiston Respublikasi Oliy Majlisi Senati Kengashining 2017-yil 25-dekabrdagi KQ-278-III-sonli Qarori bilan tasdiqlangan Oʻzbekiston Respublikasi Oliy Majlisi Senati aʼzolarini maʼnaviy va moddiy ragʻbatlantirish toʻgʻrisidagi nizomga quyidagi oʻzgartishlar kiritilsin:

1) 10-bandidagi “rais va olti nafar aʼzolardan” degan soʻzlar “rais, uning oʻrinbosari va kamida olti nafar aʼzolardan” degan soʻzlar bilan almashtirilsin;

2) 17-bandining:

ikkinchi xatboshisidagi “eng kam oylik ish haqining” degan soʻzlar “bazaviy hisoblash miqdorining” degan soʻzlar bilan almashtirilsin;

uchinchi xatboshisi quyidagi tahrirda bayon etilsin:

“ — Senat Raisining farmoyishi bilan tasdiqlanadigan shakldagi sertifikatlar beriladi”;

3) 19-bandidagi “jami 16 nafar” degan soʻzlar “jami 20 nafar” degan soʻzlar bilan almashtirilsin;

4) 24-bandining:

ikkinchi va uchinchi xatboshilari quyidagi tahrirda bayon etilsin:

“ — bazaviy hisoblash miqdorining 8 baravari miqdorida bir martalik pul mukofoti;

— Senat Raisining farmoyishi bilan tasdiqlanadigan shakldagi sertifikatlar”.

4. Oʻzbekiston Respublikasi Oliy Majlisi Senati Kengashining 2017-yil 25-dekabrdagi KQ-278-III-sonli Qarori bilan tasdiqlangan Xalq deputatlari mahalliy Kengashlari deputatlarini maʼnaviy va moddiy ragʻbatlantirish toʻgʻrisidagi namunaviy nizomga quyidagi oʻzgartishlar kiritilsin:

1) 7-bandidagi “sotsial-iqtisodiy” degan soʻzlar “ijtimoiy-iqtisodiy” degan soʻzlar bilan almashtirilsin;

2) 16-bandining uchinchi xatboshisidagi “tomonidan” degan soʻz chiqarib tashlansin;

3) 17 va 18-bandlari quyidagi tahrirda bayon etilsin:

“17. “Faxriy deputat” maqomi har yili tuman, shahar Kengashlarining bir nafar, viloyatlar va Toshkent shahar Kengashlarining uch nafar vakolat muddati tugagan sobiq deputatlariga beriladi.

18. “Faxriy deputat” maqomi uchun mahalliy Kengashning partiya guruhlari tomonidan har bir oʻrin uchun 2 nafardan nomzod tavsiya etilib, oʻrganib chiqish va baholab berish uchun Komissiyaga tavsiya etiladi”;

4) 19-bandidagi “13 — 15-bandlarida” degan soʻzlar “12-13-bandlarida” degan soʻzlar bilan almashtirilsin;

5) 21-bandining ikkinchi xatboshisi quyidagi tahrirda bayon etilsin:

“ — tuman, shahar Kengashlarining sobiq deputatlariga bazaviy hisoblash miqdorining 3 baravari, viloyatlar va Toshkent shahar Kengashlari sobiq deputatlariga 5 baravari miqdorida bir martalik toʻlanadigan pul mukofoti”.

5. Ushbu Qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Senatining Raisi T. NARBAYEVA

Toshkent sh.,

2022-yil 5-aprel,

KQ-329-IV-son

Oʻzbekiston Respublikasi Oliy Majlisi Senati Kengashining 2022-yil 5-apreldagi KQ-329-IV-sonli Qaroriga ILOVA

Oʻzbekiston Respublikasi Oliy Majlisi Senati aʼzolarini maʼnaviy va moddiy ragʻbatlantirish boʻyicha KOMISSIYA TARKIBI

1. Lavozimiga koʻra — Oʻzbekiston Respublikasi Oliy Majlisi Senati Raisining oʻrinbosari, komissiya raisi 2. Sayfullayev Baxtiyor Sayfullayevich — Senatning Yoshlar, madaniyat va sport masalalari qoʻmitasi raisi, Oʻzbekiston davlat muassasalari va jamoat xizmati xodimlari kasaba uyushmasi Oʻzbekiston Respublikasi Oliy Majlisi Senati xodimlarining kasaba uyushmasi qoʻmitasi raisi, Komissiya raisi oʻrinbosari 3. Madumarov Tolibjon Abdumalikovich — Oʻzbekiston Respublikasi Oliy Majlisi Senati Mudofaa va xavfsizlik masalalari qoʻmitasi raisi oʻrinbosari, Mahalliy hokimiyat vakillik organlari faoliyatini kuchaytirishga koʻmaklashuvchi komissiyasi raisi 4. Kadirxanova Malika Akbarovna — Senatning Xotin-qizlar va gender tenglik masalalari qoʻmitasi raisi 5. Siddiqov Riskul Ergashboyevich — Senatning Agrar va suv xoʻjaligi masalalari qoʻmitasi raisi oʻrinbosari 6. Orziyeva Dilbar Adizovna — Navoiy viloyati Karmana tumani xalq taʼlimi boʻlimi tasarrufidagi “Yangi zamon bolalari” oilaviy mehribonlik uyi tarbiyachisi, Senatning Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qoʻmitasi aʼzosi 7. Jalmenov Ulikbek Abilayevich — Qoraqalpogʻiston Respublikasi Kasaba uyushmalari tashkilotlari birlashmasi raisi, Senatning Xotin-qizlar va gender tenglik masalalari qoʻmitasi aʼzosi 8. Uralova Dilfuza Djumanovna — Sirdaryo viloyati Boyovut tumani hokimi, Senatning Sud-huquq masalalari va korrupsiyaga qarshi kurashish qoʻmitasi aʼzosi 9. Boʻtayeva Baxtigul Abraxmatovna — Surxondaryo viloyati Qiziriq tumani 17-umumiy oʻrta taʼlim maktabi direktori Senatning Fan, taʼlim va sogʻliqni saqlash masalalari qoʻmitasi aʼzosi