Daryo transportida davlat xizmatlari koʻrsatishning maʼmuriy reglamentini tasdiqlash toʻgʻrisida (167-son)
07.04.2022
Oʻzbekiston Respublikasi Vazirlar Mahkamasining
qarori
Oʻzbekiston Respublikasi Prezidentining “Transport sohasida davlat boshqaruvi tizimini tubdan takomillashtirish chora-tadbirlari toʻgʻrisida” 2019-yil 1-fevraldagi PF-5647-son Farmoni ijrosini taʼminlash hamda daryo transporti sohasida davlat xizmatlarini koʻrsatish tizimini yanada takomillashtirish maqsadida Vazirlar Mahkamasi qaror qiladi:
1. Quyidagilarni nazarda tutuvchi Daryo transportida davlat xizmatlari koʻrsatishning maʼmuriy reglamenti ilovaga muvofiq tasdiqlansin:
kemalarning roʻyxatga olish tartibi;
kema reyestrini yuritish, oʻzgartirish kiritish va reyestrdan chiqarish tartibi;
kemalarni qurish, yangidan jihozlash, taʼmirlash va ulardan foydalanish davrida texnik koʻrikdan oʻtkazish;
kemani dastlabki, navbatdagi, navbatdan tashqari va har yillik texnik koʻrikdan oʻtkazish;
kemani qurish davrida, yangidan jihozlash va taʼmirlash davrida texnik nazorat olib borish;
registr qoidalari talablarining bajarilishida aniqlangan kamchiliklarni bartaraf etish tartibi.
2. Oʻzbekiston Respublikasi Vazirlar Mahkamasining “Kemalarni qurishda, foydalanishda, yangidan jihozlashda va taʼmirlashda ularni majburiy koʻrikdan oʻtkazish tartibi toʻgʻrisidagi nizomni tasdiqlash toʻgʻrisida” 2016-yil 5-maydagi 141-son qarori oʻz kuchini yoʻqotgan deb hisoblansin.
3. Oʻzbekiston Respublikasi Transport vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.
4. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari A.J. Ramatov va Oʻzbekiston Respublikasi transport vaziri I.R. Maxkamov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2022-yil 7-aprel,
167-son
Vazirlar Mahkamasining 2022-yil 7-apreldagi 167-son qaroriga 1-ILOVA
Daryo transportida davlat xizmatlari koʻrsatishning
MAʼMURIY REGLAMENTI
1-bob. Umumiy qoidalar
1. Mazkur Daryo transportida davlat xizmatlari koʻrsatishning maʼmuriy reglamenti (keyingi oʻrinlarda Reglament deb yuritiladi) kemalarni roʻyxatga olish, kemalarni qurish, yangidan jihozlash, taʼmirlash va ulardan foydalanish davrida texnik koʻrikdan oʻtkazish boʻyicha davlat xizmatlari koʻrsatish tartibini belgilaydi.
2. Ushbu Reglamentda quyidagi tushunchalardan foydalaniladi:
kema — kemachilik maqsadida foydalanadigan, asosiy dvigateli 75 ot kuchidan kam boʻlmagan oʻziyurar va sigʻimi 80 registr tonnadan kam boʻlmagan oʻziyurmas suzuvchan qurilmalar, shu jumladan aralash (daryo — dengiz) suzish kemalari, paromlar, suv tubini chuqurlashtiruvchi va tozalovchi zemsnaryadlar, suzuvchan kran va shu kabi texnik qurilmalar;
Kema guvohnomasi — kemaga mulk huquqini belgilovchi va kemada mavjud boʻlishi shart hisoblangan hujjatlardan biri;
kema egasi — mulk huquqi yoki boshqa ashyoviy huquqlar bilan kemaga ega boʻlgan yuridik yoki jismoniy shaxs;
kema hujjatlari — texnik koʻrikni amalga oshirgan mansabdor shaxs tomonidan kemaning texnik koʻrik natijasiga asosan rasmiylashtiriladigan va kema bortida boʻlishi shart hisoblangan Klassifikatsiya guvohnomasi, Suzishga yaroqli ekanligi toʻgʻrisida guvohnoma, Neft oqova suvlar va chiqindilardan ifloslantirishning oldini olish toʻgʻrisida guvohnomalardan iborat hujjatlar toʻplami;
kemachilik registri inspektori — Oʻzbekiston Respublikasi Transport vazirligi huzuridagi Transport nazorati inspeksiyasining kemalarni klassifikatsiya va texnik nazorat qilish vakolati berilgan mansabdor shaxsi;
hududiy kemachilik registri inspektori — Transport vazirligi huzuridagi Transport nazorati inspeksiyasining Qoraqalpogʻiston Respublikasi, Surxondaryo, Xorazm va Toshkent viloyatlari hududiy boʻlinmalarining kemalarni klassifikatsiya va texnik nazorat qilish vakolati berilgan mansabdor shaxslari;
roʻyxatga olish — yuridik va jismoniy shaxslarga tegishli kemalarning hisobini yuritish, kema reyestriga kiritish va mulk huquqini tasdiqlovchi Kema guvohnomasi berish bilan bogʻliq jarayonlar;
sport kemalari — suv havzalarida musobaqalar oʻtkazish uchun moʻljallangan va maxsus loyiha asosida qurilgan eshkakli qayiqlar, baydarkalar, yelkanli qayiqlar, motorli katerlar va shu kabi boshqa suzuvchan vositalar;
texnik koʻrik — kemachilik registri inspektori tomonidan kema obyektlari va texnologik jarayonlarni nazorat qilish hamda tegishli hujjatlarni rasmiylashtirish;
texnik loyiha hujjatlari — kemalarni qurish va qayta jihozlash uchun vakolatli korxonalar tomonidan ishlab chiqilgan hujjatlar toʻplami;
xos raqam — kema reyestriga kiritilgan, har bir kema uchun berilgan raqam.
3. Ichki suv yoʻllarida foydalanishda boʻlgan, sport kemalaridan tashqari, kemalar hududiy kemachilik registri inspektorlari tomonidan roʻyxatga/qayta roʻyxatga olinadi va tegishli texnik koʻriklardan oʻtkaziladi.
Harbiy katerlarning texnik holatini aniqlash zarurati paydo boʻlganda harbiy qism komandirining qarori va oʻzaro tuzilgan shartnomaga asosan harbiy katerlar ham texnik koʻrikka taqdim etilishi mumkin.
4. Biror-bir kemaga tegishli boʻlgan qayiqlar va boshqa suzuvchi vositalar roʻyxatga olinmaydi, biroq ularning texnik holati tekshirishdan oʻtkaziladi.
5. Hududiy kemachilik registri inspektori vakolatiga quyidagilar kiradi:
kemalarni roʻyxatga olish uchun taqdim etilgan hujjatlarni qabul qilish;
kemalarni roʻyxatga olish uchun taqdim etilgan hujjatlarning qonun hujjatlariga muvofiqligini tekshirish;
ilgari roʻyxatga olingan va berilgan Kema guvohnomalari mavjudligini tekshirish;
kemalarni roʻyxatga/qayta roʻyxatga olish;
Kema guvohnomasini berish;
kema reyestrini yuritish va unga oʻzgartirishlar kiritish;
kemalarni qurish, yangidan jihozlash, taʼmirlash va ulardan foydalanish davrida texnik koʻrikdan oʻtkazish:
kemalarda texnik hujjatlar, ularga oʻrnatiladigan material va buyumlarda muvofiqlik sertifikatlari mavjudligini tekshirish;
kemaning nazorat ostida boʻlgan obyektlarini tekshirish, oʻlchash, amalda ishlatib koʻrish va sinov ishlarini oʻtkazish;
kemani qurish, yangidan jihozlash va taʼmirlash davrida nazorat ostida boʻlgan texnologik jarayonlarni kelishish va nazorat qilish;
kemaga oʻrnatilgan material va buyumlarning markirovka va tamgʻalarini tekshirish;
kemalarga ularning texnik holatini va suzishga yaroqli ekanligini tasdiqlovchi kema hujjatlarini berish.
6. Kemani roʻyxatga/qayta roʻyxatga olish va texnik koʻrikdan oʻtkazish, hududiy kemachilik registri inspektori tomonidan, kema joylashgan manzil boʻyicha, koʻrsatiladigan davlat xizmatlari uchun kema egasi tomonidan oldindan 100% toʻlov amalga oshirilgandan keyin 5 ish kuni ichida amalga oshiriladi.
7. Kemani roʻyxatga/qayta roʻyxatga olish va tegishli texnik koʻriklarni oʻtkazish kema egasi va Transport vazirligi huzuridagi Transport nazorati inspeksiyasining Qoraqalpogʻiston Respublikasi, Surxondaryo, Xorazm va Toshkent viloyatlari hududiy boʻlinmalari bilan oʻzaro tuzilgan shartnomalar asosida amalga oshiriladi.
8. Kemani roʻyxatga/qayta roʻyxatga olish va uni texnik koʻrikdan oʻtkazish toʻgʻrisida ariza kema egasi tomonidan Yagona interaktiv davlat xizmatlari portali yoki Transport vazirligi huzuridagi Transport nazorati inspeksiyasining veb-sayti orqali yoxud bevosita oʻzlari joylashgan manzil boʻyicha Transport nazorati inspeksiyasining tegishli hududiy boʻlinmalariga taqdim etiladi.
2-bob. Kemalarni roʻyxatga olish tartibi
9. Yuridik va jismoniy shaxslar kemalarni qonunchilik hujjatlarida belgilangan tartibda xarid qilgandan soʻng (shu jumladan ijara shartnomasi asosida olingan ekipajsiz kemalar), ularning texnik holatidan qatʼiy nazar, bir oy ichida roʻyxatga qoʻyish uchun, oʻzlari joylashgan manzil boʻyicha ushbu Reglamentning 1-ilovasidagi shaklga muvofiq ariza-anketa bilan Transport vazirligi huzuridagi Transport nazorati inspeksiyasining tegishli hududiy boʻlinmalariga murojaat etadilar.
10. Kemalarni roʻyxatga olish uchun taqdim etiladigan arizaga kemaning tegishli ekanligini tasdiqlovchi quyidagi hujjatlardan biri ilova qilinadi:
kemani korxona balansiga qabul qilinganligi toʻgʻrisidagi buyruq nusxasi yoki kemaga mulk huquqini tasdiqlovchi hujjat;
kemaning oldi-sotdi shartnomasi nusxasi;
bojxona yuk deklaratsiyasi nusxasi (chet eldan olib kelingan kema uchun);
sud qarori nusxasi.
Chet eldan kirib kelayotgan kemalarni aniqlash va hisobini yuritish Oʻzbekiston Respublikasi Transport vazirligi huzuridagi Transport nazorati inspeksiyasi va Iqtisodiyot va moliya vazirligi huzuridagi Bojxona qoʻmitasining tegishli maʼlumotlar bazalarini bir-biriga integratsiya qilish yoʻli bilan amalga oshiriladi.
11. Yuridik shaxs qayta tashkil etilganda davlat roʻyxatidan oʻtgan, yangidan vujudga kelgan yuridik shaxsning taʼsis hujjatlari (yoki mavjud yuridik shaxsning oʻzgartirilgan taʼsis hujjatlari) va kemaga mulk huquqini tasdiqlovchi hujjat taqdim etiladi.
12. Arizani koʻrib chiqish va kemani roʻyxatga olish uchun Oʻzbekiston Respublikasida oʻrnatilgan bazaviy hisoblash miqdorining bir barobari miqdorida yigʻim undiriladi.
13. Kemani roʻyxatga qoʻyish uchun zarur hujjatlar ariza beruvchi tomonidan Yagona interaktiv davlat xizmatlari portali, Oʻzbekiston Respublikasi Transport vazirligi huzuridagi Transport nazorati inspeksiyasining veb-sayti orqali yoki tegishli transport boshqarmasiga shaxsan yoki olinganligi toʻgʻrisidagi bildirishnoma olingan holda pochta aloqasi orqali taqdim etiladi.
Veb-sayt orqali kelib tushgan ariza bir ish kunida tegishli hududiy kemachilik registri inspektoriga yuboriladi.
14. Ariza beruvchiga kemani roʻyxatga olish uchun hujjatlarning roʻyxati va qabul qilingan sanasi qayd etilgan tilxat beriladi yoki elektron shaklda xabarnoma yuboriladi.
15. Hududiy kemachilik registri inspektori kemani roʻyxatga olish toʻgʻrisidagi ariza kelib tushgandan soʻng bir ish kuni ichida uni koʻrib chiqadi va kemaning koʻrsatkichlari arizada qayd etilgan maʼlumotlarga muvofiq ekanligini aniqlash uchun uch ish kuni ichida kema joylashgan manzilga borib kemani koʻzdan kechiradi.
16. Kemaning koʻrsatkichlari arizada qayd etilgan maʼlumotlarga muvofiq boʻlganda hududiy kemachilik registri inspektori bir ish kuni ichida mazkur Reglamentning 2-ilovasidagi shaklga muvofiq Kema guvohnomasini rasmiylashtiradi, hududiy transport boshqarmasi boshligʻi imzosi bilan tasdiqlaydi va kema egasiga beradi.
17. Kema guvohnomasi hududiy kemachilik registri inspektori tomonidan yuridik shaxs vakiliga yoki jismoniy shaxsning oʻziga, kemalarni hisobga olish kitobiga, uni olganligi toʻgʻrisida imzo qoʻyilib topshiriladi.
18. Kemani roʻyxatga olish uchun taqdim etilgan arizani qabul qilish quyidagi hollarda rad etiladi:
kemani roʻyxatga olishni soʻragan ariza beruvchining kemasi mazkur Reglamentning 2-bandida koʻrsatilgan kemalar tarkibiga kirmaganda;
ariza beruvchining taqdim etgan hujjatlari lozim darajada rasmiylashtirilmaganda yoki ular toʻliq hajmda taqdim etilmaganda;
ariza beruvchining taqdim etgan hujjatlarida notoʻgʻri yoki buzib koʻrsatilgan maʼlumotlar mavjud boʻlganda.
19. Ariza beruvchi oʻn kun ichida bildirilgan kamchiliklarni bartaraf etishi va kemani roʻyxatga qoʻyish uchun arizani qaytadan taqdim etishi mumkin.
20. Ariza beruvchi kemani roʻyxatga olish toʻgʻrisidagi arizani qabul qilishni rad etish toʻgʻrisidagi qaror, shuningdek hududiy kemachilik registri inspektorining harakati (harakatsizligi) ustidan qonun hujjatlarida belgilangan tartibda shikoyat qilishga haqli.
21. Kema guvohnomasi yoʻqolganda, kema egasining arizasiga asosan, unga yangi Kema guvohnomasi beriladi.
22. Kema guvohnomasini qayta rasmiylashtirish va yoʻqolgan Kema guvohnomasining oʻrniga yangisini berish uchun Oʻzbekiston Respublikasida oʻrnatilgan bazaviy hisoblash miqdorining 0,5 barobari miqdorida yigʻim undiriladi.
3-bob. Kema reyestrini yuritish tartibi
23. Kema reyestri hududiy kemachilik registri inspektori tomonidan yuritiladi va har bir oʻzgartirishlar toʻgʻrisida maʼlumotlarni reyestrga kiritib boradi hamda elektron shaklda kemachilik registri inspektoriga taqdim etadi.
Kema reyestriga jismoniy shaxsning shaxsiy identifikatsiya raqami, yuridik shaxslar uchun — soliq toʻlovchining identifikatsion raqami, kemaning nomi, joylashgan manzili, chaqiruv signali (aralash (daryo-dengiz) suzish kemalari uchun), turi, vazifasi, klassi hamda asosiy texnik koʻrsatkichlari, shu jumladan yoʻlovchi sigʻimi, toʻla yuk koʻtarish qobiliyati, texnik koʻrikdan oʻtkazilgan sanasi, keyingi texnik koʻrikdan oʻtkazish sanasi koʻrsatiladi.
Kema reyestri Transport vazirligi huzuridagi Transport nazorati inspeksiyasining rasmiy veb saytida joylashtiriladi, axborot tarqatilishi cheklangan kemalar haqida maʼlumotlar bundan mustasno. Hududiy kemachilik registri inspektoridan olingan maʼlumotlar boʻyicha kemachilik registri inspektori Kema reyestriga tegishli oʻzgartirishlar kiritadi va veb-saytdagi axborotlarni yangilab boradi.
24. Kema reyestriga yuridik shaxsning toʻliq nomi va joylashgan manzili, jismoniy shaxsning familiyasi, ismi, otasining ismi va yashash manzili koʻrsatiladi. Telefon, elektron pochta manzili va boshqa maʼlumotlar qoʻshimcha kiritilishi mumkin.
25. Kema reyestrining ajralmas qismi boʻlib, hududiy kemachilik registri inspektori tomonidan yuritiladigan, roʻyxatga olingan kemalar, ularning egalari va berilgan Kema guvohnomalari toʻgʻrisidagi maʼlumotlarni oʻz ichiga olgan kemalarni hisobga olish kitobi hisoblanadi.
26. Kema reyestrining har bir qatori kemaga berilgan xos raqam bilan belgilanadi. Kemalarning hisobini yuritish uchun toʻrt raqamli tartib raqamdan foydalaniladi, bunda birinchi raqam kemaning turi va vazifasini bildiradi:
yoʻlovchi tashuvchi kemalar — 1;
oʻziyurar kemalar — 2;
oʻziyurmas kemalar — 3;
suzuvchan ponton koʻpriklar — 4;
maxsus kemalar — 5 bilan belgilanadi.
Keyingi uchta raqam tartib raqamini bildiradi.
Kemalarning xos raqamlari oldiga quyidagicha indekslar qoʻyiladi:
UZ — daryo portlari va suv yoʻllari texnik uchastkalarining kemalari uchun;
G — davlat korxonalarining kemalari uchun;
SO — nodavlat yuridik shaxslar va jismoniy shaxslar uchun;
SPS — qutqaruv stansiyalarining kemalari uchun.
27. Kema reyestridagi har bir yozuv kemani roʻyxatga olgan mansabdor shaxsning familiyasi va ismini, yozuv kiritilgan sanani koʻrsatgan holda, uning imzosi bilan yakunlanadi.
4-bob. Kema reyestriga oʻzgartirish kiritish
28. Kema reyestriga oʻzgartirish kiritish quyidagi hollarda amalga oshiriladi:
yuridik va jismoniy shaxsning joylashgan manzili oʻzgarganda;
kema egasi oʻzgarganda;
kemani qayta jihozlash natijasida uning konstruktiv oʻlchamlari, quvvati va klassi oʻzgarganda;
yuridik shaxs qayta tashkil etilganda va nomi oʻzgarganda.
29. Mazkur Reglamentning 28-bandida koʻrsatilgan holatlardan biri paydo boʻlganda yuridik va jismoniy shaxslar 30 kun ichida hududiy kemachilik registri inspektoriga ariza bilan murojaat etishlari kerak.
Hududiy kemachilik registri inspektori ariza kelib tushgandan soʻng bir ish kun ichida ariza beruvchiga kema guvohnomasini qayta rasmiylashtirib berishi va kema reyestriga tegishli oʻzgartirishlar kiritishi kerak.
30. Kema boshqa yuridik yoki jismoniy shaxs nomiga qayta rasmiylashtirilganda kemaga yangi xos raqam beriladi.
5-bob. Kema reyestridan chiqarish
31. Kema reyestridan quyidagi kemalar chiqariladi:
choʻkkan kemalar (agar ularni chiqarib olishning imkoni boʻlmasa);
konstruktiv eskirgan kemalar;
qayta jihozlash yoki boshqa oʻzgartirish kiritish natijasida loyihaviy sifatini (muvozanat, suzuvchanlik, choʻkmaslik) yoʻqotgan kemalar;
foydalanish va taʼmirlashga yaroqsiz deb topilgan kemalar.
32. Kemani mazkur Reglamentning 31-bandida koʻrsatilgan sabablar bilan kema reyestridan chiqarish uchun, kema egasi kema roʻyxatga turgan manzildagi hududiy kemachilik registri inspektoriga, bu toʻgʻrisida qaror qabul qilingan kundan boshlab 10 kun muddat ichida, yozma ariza bilan murojaat qilishi kerak.
Kema egasi kemani reyestrdan chiqarish toʻgʻrisidagi arizaga Kema guvohnomasini ilova etadi.
33. Hududiy kemachilik registri inspektori arizani koʻrib chiqqandan keyin bir ish kunida kemani Kema reyestridan chiqaradi va Kema reyestrining maxsus ustunida sanasini koʻrsatib yozuv kiritadi va imzosi bilan tasdiqlaydi.
6-bob. Kemalarni qurish, yangidan jihozlash, taʼmirlash va ulardan foydalanish davrida texnik koʻrikdan oʻtkazish
34. Kemalarni qurish, yangidan jihozlash, taʼmirlash va ulardan foydalanish, davrida hududiy kemachilik registri inspektori tomonidan quyidagi ishlar amalga oshiriladi:
kemalarni qurish davrida texnik nazorat olib borish;
kemalarni yangidan jihozlash davrida texnik nazorat olib borish;
kemalarni taʼmirlash davrida texnik nazorat olib borish;
kemalarni dastlabki texnik koʻrikdan oʻtkazish;
kemalarni har yillik texnik koʻrikdan oʻtkazish;
kemalarni navbatdagi texnik koʻrikdan oʻtkazish;
kemalarni navbatdan tashqari texnik koʻrikdan oʻtkazish.
35. Texnik koʻrikdan oʻtkazishning asosiy maqsadi quyidagilar hisoblanadi:
kemalarning texnik holatini samarali nazorat qilishni tashkil etish;
kemalar va jihozlarining texnik holatini texnik reglamentlarga muvofiqligiga baho berish;
kemalarning xavfsiz suzishini taʼminlash boʻyicha profilatik ishlarini tashkil etish;
kemalarda avariya holatini oldindan aniqlash va ularni bartaraf etish;
kemalarda aniqlangan kamchiliklarni bartaraf etish va ish samarasini oshirish boʻyicha choralar ishlab chiqishda kema egalariga koʻmaklashish.
36. Texnik koʻrik quyidagi tartibda oʻtkaziladi:
kemaga oʻrnatiladigan material va buyumlarda muvofiqlik sertifikatlar mavjudligini tekshirish;
nazorat ostida boʻlgan kema obyektlarini koʻzdan kechirish, oʻlchash ishlarini amalga oshirish, mexanizmlarni ish holatida tekshirish va ularni sinovdan oʻtkazish;
kemalarni qurish, yangidan jihozlash va taʼmirlash davrida amalga oshiriladigan texnologik jarayonlarni kelishish va nazorat qilish;
kemaga oʻrnatilgan, nazorat ostida boʻlgan material va buyumlarning markirovka va tamgʻalarini tekshirish;
kemani, hududiy kemachilik registri inspektori tomonidan rasmiylashtiriladigan kema hujjatlari bilan taʼminlash.
37. Kemalarni texnik koʻrikdan oʻtkazish uchun oʻzaro tuzilgan shartnomaga muvofiq Oʻzbekiston Respublikasi transport vazirligi huzuridagi Transport va logistikani rivojlantirish jamgʻarmasining maxsus gʻaznachilik hisob raqamiga mazkur Reglamentning 3-ilovasida keltirilgan “Kemalarni qurish, yangidan jihozlash, taʼmirlash va ulardan foydalanish davrida Registr xizmatlari uchun tariflar”ga muvofiq hisoblab chiqilgan miqdorda toʻlov amalga oshiriladi.
7-bob. Kemani dastlabki texnik koʻrikdan oʻtkazish
38. Kemani dastlabki texnik koʻrikdan oʻtkazish kemada qurish ishlari tugallangandan, kemaning asosiy elementlari, turi va vazifasini oʻzgarishiga olib kelgan yangidan jihozlash va kapital taʼmirlashdan keyin hamda kemani roʻyxatga olish davrida amalga oshiriladi.
39. Dastlabki texnik koʻrik, kemaning klassini belgilash va kema hujjatlarini berish uchun uning asosiy elementlarini texnik loyiha hujjatlariga va texnik topshiriqqa muvofiqligini aniqlash, shuningdek texnik loyiha hujjatlari taqdim etilmagan kemalarning korpusi, mexanizmlari, elektr jihozlari, radio jihozlari, qurilmalari va tizimlari Registr qoidalari talablariga muvofiq qurilganligi va texnik holatini aniqlash maqsadida oʻtkaziladi.
Dastlabki texnik koʻrikdan oʻtkazish navbatdagi texnik koʻrik hajmida amalga oshiriladi.
40. Kemaning texnik loyiha hujjatlarga muvofiq ekanligi aniqlangandan keyin hududiy kemachilik registri inspektori kemada, kema egasi tomonidan ajratilgan vakil ishtirokida (jismoniy shaxslarga tegishli kemalarda — kema boshqaruvchisi) quyidagi tekshirishlarni amalga oshiradi:
kema korpusi, qobigʻi, konstruksiyasi, asosiy mustahkamlovchi elementlari, payvandlash ishlarining sifatli bajarilganligi;
kemaning suv usti, suv osti bortlari va yuk markasi toʻgʻri belgilanganligi;
kemani ishlatish jarayonlarida uning bortida inson xavfsizligi taʼminlanganligi va toʻsiqlarning mavjudligi;
kema bortida qutqaruv vositalari mavjudligi va belgilangan meʼyorlarga muvofiqligi;
kema hayoti uchun kurashish avariya-qutqaruv jihozlari va belgilangan meʼyorlarga muvofiqligi;
yongʻinga qarshi texnik himoya va yongʻin oʻchirishning birlamchi vositalari bilan meʼyor talablariga muvofiq taʼminlanganligi va sozligi;
kemaning asosiy dvigatelini turli ish rejimida sinovdan oʻtkazish;
yordamchi dvigatelni ish jarayonida tekshirish, yetarli quvvat ishlab chiqarishini tekshirish;
kema qurilmalari: rul, shvartov, langar, shatak qurilmalarini koʻzdan kechirish va ishlash jarayonini sinovdan oʻtkazish;
kema tizimlari: yoqilgʻi-moylash, sovutish, shuningdek bortdan tashqari sovutish, ventilyatsiya, ichimlik suvi taʼminoti, oqova suv, tabiiy va sunʼiy havo almashish tizimlari;
elektr jihozlari, elektr taqsimlash qalqonlari, kabel trassalari va uzatish — qabul qilish priborlari;
navigatsiya chiroqlarining texnik loyiha hujjatlariga muvofiq oʻrnatilganligi va ularning toʻgʻri joylashtirilganligi;
ogohlantirish signallari va ularning toʻgʻri joylashtirilganligi;
suv havzalarini neft, oqova suvlar va chiqindilardan ifloslantirishning oldini olishga qaratilgan choralar koʻrilganligi, zarur hajmdagi idishlarning mavjudligi, quvur tizimlari.
41. Tekshirish ishlari tugagandan keyin hududiy kemachilik registri inspektori tomonidan mazkur Reglamentning 4-ilovasida keltirilgan shaklga muvofiq uch nusxada Kemani dastlabki texnik koʻrikdan oʻtkazish dalolatnomasi rasmiylashtiriladi. Dalolatnomaning bir nusxasi kema egasiga, ikkinchi nusxasi kemachilik registri inspektoriga yuboriladi, uchinchi nusxasi oʻzida qoladi.
42. Kemani dastlabki texnik koʻrikdan oʻtkazish dalolatnomasiga muvofiq hududiy kemachilik registri inspektori kemaga, uning klassini belgilovchi Klassifikatsiya guvohnomasini (mazkur Reglamentga 5-ilova), Suzishga yaroqli ekanligi toʻgʻrisida guvohnoma (mazkur Reglamentga 6-ilova) va Neft, oqova suvlar va chiqindilardan ifloslantirishning oldini olish toʻgʻrisida guvohnomalarni (mazkur Reglamentga 7-ilova) rasmiylashtiradi.
43. Kemani dastlabki texnik koʻrikdan oʻtkazish davrida, uning keyingi navbatdagi va har yillik texnik koʻrikdan oʻtkazish muddatlari belgilanadi. Navbatdagi va har yillik texnik koʻrikdan oʻtkazish muddatlari dastlabki texnik koʻrikdan oʻtkazilgan sanadan hisoblanadi.
44. Klassifikatsiya guvohnomasi, Suzishga yaroqli ekanligi toʻgʻrisida guvohnoma va Neft, oqova suvlar va chiqindilardan ifloslantirishning oldini olish toʻgʻrisida guvohnomalar, Kemani dastlabki texnik koʻrikdan oʻtkazish dalolatnomasining bir nusxasi bilan birgalikda kema egasiga taqdim etiladi.
8-bob. Kemani har yillik texnik koʻrikdan oʻtkazish
45. Kemani har yillik texnik koʻrikdan oʻtkazish navbatdagi texnik koʻriklar oraligʻida, kema korpusi, uning asosiy mustahkamlovchi elementlari, asosiy va yordamchi dvigatellari, mexanizmlari, qurilmalari, tizimlari, avariya qutqaruv jihozlari, elektr jihozlari, yongʻinga qarshi texnik himoya va yongʻin oʻchirishning birlamchi vositalari sozligini aniqlash va kema hujjatlarining amal qilish muddatini uzaytirish maqsadida amalga oshiriladi.
46. Kemani har yillik texnik koʻrikdan oʻtkazish kema hujjatlarida belgilangan muddatlarda oʻtkaziladi. Kema egasining arizasiga muvofiq har yillik texnik koʻrik kema hujjatlarida belgilangan muddatdan uch oy oldin yoki uch oy keyin oʻtkazilishi mumkin.
47. Kemani har yillik texnik koʻrikdan oʻtkazish davrida hududiy kemachilik registri inspektori tomonidan quyidagi tekshirishlar amalga oshiriladi:
kema korpusi va uning asosiy mustahkamlovchi elementlarini koʻzdan kechirish;
asosiy va yordamchi dvigatellarni ishlatib tekshirish;
rul, langar, shvartov va shataklovchi qurilmalarni ishlatib tekshirish;
tizimlar, neft, oqova suvlar va chiqindi quvurlarini koʻzdan kechirish;
avariya qutqaruv jihozlari mavjudligi va texnik holatini tekshirish;
elektr jihozlarining yaroqliligi va texnik holatini tekshirish;
kema borti yongʻinga qarshi texnik himoya va yongʻin oʻchirishning birlamchi vositalari bilan meʼyor talablariga muvofiq taʼminlanganligi va sozligini tekshirish;
navigatsiya chiroqlarining toʻgʻri ishlashi va texnik holatini tekshirish.
48. Agar kemani har yillik texnik koʻrikdan oʻtkazish davrida kema korpusi qismini dokka chiqarib koʻrikka taqdim etish koʻzda tutilmagan boʻlsa va hududiy kemachilik registri inspektoriga kemaning suv osti qobigʻi shubha uygʻotsa, kema egasidan kemani dokka chiqarish yoki boshqa usul bilan suv osti qobigʻini tekshirish lozimligini talab qilishga haqli. Kemadan foydalanish toʻgʻrisidagi qaror suv osti qobigʻini tekshirish natijalari boʻyicha qabul qilinadi.
49. Korpusi yogʻoch va kompozit materialdan tayyorlangan hamda yoʻlovchi tashuvchi kemalarning suv osti qismi har yillik texnik koʻrik davrida tekshiriladi.
50. Kemani har yillik texnik koʻrikdan oʻtkazish natijasi boʻyicha hududiy kemachilik registri inspektori tomonidan mazkur Reglamentning 8-ilovasidagi shaklga muvofiq ikki nusxada kemani har yillik texnik koʻrikdan oʻtkazish toʻgʻrisida xabarnoma rasmiylashtiriladi. Xabarnomada nazorat ostidagi obyektlarning texnik holati toʻgʻrisida qayd etiladi.
51. Hududiy kemachilik registri inspektori xabarnomada qayd etilgan maʼlumotlarga asosan kema hujjatlarining tegishli qismlariga maʼlumotlarni kiritadi va kema hujjatlarining amal qilish muddatini uzaytiradi. Xabarnomaning bir nusxasi va kema hujjatlari kema egasiga taqdim etiladi.
9-bob. Kemani navbatdagi texnik koʻrikdan oʻtkazish
52. Kemani navbatdagi texnik koʻrikdan oʻtkazish kema korpusi, uning asosiy elementlari, jihozlari, mexanizmlari, qurilmalari, tizimlari va taʼminotining texnik holatini aniqlash maqsadida, kemaning qurilgan yili hisobga olingan holda oʻtkaziladi. Navbatdagi texnik koʻrik natijasi boʻyicha kemaning belgilangan vazifasi va klassiga muvofiq suzish xavfsizligini taʼminlashga yoʻnaltirilgan talablar oʻrnatiladi.
53. Kemani navbatdagi texnik koʻrikdan oʻtkazish har toʻrt yilda bir marta kemani dokka (qirgʻoqqa) chiqarib oʻtkaziladi.
Kemani navbatdagi texnik koʻrikdan oʻtkazish yilida har yillik texnik koʻrik oʻtkazilmaydi.
54. Kemani navbatdagi texnik koʻrikdan oʻtkazish davrida quyidagi tekshirishlar amalga oshiriladi:
yemirilish qiymati va shikastlanishlarning mavjudligini umumiy va mahalliy mustahkamligi taʼminlanishidagi taʼsir darajasiga baho bergan holda kema korpusi konstruksiyasining qoidalar talablariga muvofiq saqlanganligi va suv oʻtkazmasligi;
korpus konstruksiyasi va qobiqning qoldiq qalinligi;
kema turi va qurilgan yiliga qarab, foydalanish davrida xizmat koʻrsatish qiyin, agressiv muhit, terlash, havo almashinuvi yetarli boʻlmagan va namlik darajasi yuqori boʻlgan joylarda joylashgan korpus konstruksiyalarining texnik holati;
ustqurmalari alyumin qorishmasidan tayyorlangan kemalarda metall bilan biriktirilgan joylarining texnik holati;
kema korpusida zanglash mavjudligi va ularning paydo boʻlishi sabablari;
kema qurilmalari, jihozlari va taʼminotining texnik holati:
rul, langar, shvartov va shataklovchi qurilmalarni ishlatib tekshirish;
signal machtalari va takellajlarining texnik holati;
avariya taʼminoti va yongʻinga qarshi himoya vositalarining texnik holati;
mexanik qurilma va mashina boʻlimining jihozlari, ularning konstruksiyalari, joylashuvi va texnik holati;
asosiy va yordamchi ichki yonuv dvigatellari detallarini koʻzdan kechirish, detal va uzellari tirqishlarini va yemirilishini oʻlchash. Agar bunga imkon boʻlmasa va dvigatellar ish rejimida nominal koʻrsatkichlarini saqlab qolgan boʻlsa silindr bloklarini tashqi koʻzdan kechirish;
uzatma, mufta va eshkak valining texnik holati;
elektr va avtomatika jihozlarining texnik holati;
signal machtasi va navigatsiya chiroqlarining texnik holati;
neft, oqova suvlar va chiqindilar uchun moʻljallangan idishlarning va quvur tizimlarining texnik holati.
55. Kemani navbatdagi texnik koʻrikdan oʻtkazish natijasi boʻyicha hududiy kemachilik registri inspektori mazkur reglamentning 4-ilovasidagi shaklga muvofiq ikki nusxada Kemani navbatdagi texnik koʻrikdan oʻtkazish dalolatnomasi rasmiylashtiradi.
56. Kemani navbatdagi texnik koʻrikdan oʻtkazish dalolatnomasiga asosan kema klassi tasdiqlanadi/tiklanadi, kema hujjatlari yangidan rasmiylashtiriladi va dalolatnomaning bir nusxasi bilan birgalikda kema egasiga taqdim etiladi.
57. Kema egasining arizasi va kemaning texnik holati foydalanishga yaroqli toʻgʻrisidagi dalolatnomaga asosan kemani navbatdagi texnik koʻrikdan oʻtkazish davri bir yilgacha, zarur hollarda, kema egasining arizasiga muvofiq yana bir yilga uzaytirilishi mumkin, yoʻlovchi kemalari bundan mustasno. Kemani navbatdagi texnik koʻrikdan oʻtkazish davrini uzaytirish ikki yildan oshmasligi kerak.
10-bob. Kemani navbatdan tashqari texnik koʻrikdan oʻtkazish
58. Kemani navbatdan tashqari texnik koʻrikdan oʻtkazish quyidagi hollarda amalga oshiriladi:
kemada shikastlanishlar paydo boʻlgandan keyin, ularni bartaraf etmasdan xavfsiz foydalanish taʼminlanmaganda;
shikastlanishlar bartaraf etilgandan keyin. Bu holda suzishga yaroqli ekanligi toʻgʻrisidagi guvohnoma barcha talablar bajarilgandan soʻng rasmiylashtiriladi;
kemada suzish xavfsizligini taʼminlashga shubha uygʻotuvchi nosozliklar paydo boʻlganda;
oʻz kuchini yoʻqotgan kema hujjatlarining amal qilishini tiklash uchun kemaning texnik holati va suzish hududini belgilash davrida;
kema konstruksiyasi va klassi boʻyicha suzish hududi belgilanmagan hududdan bir martalik oʻtish zarurati tugʻilganda;
qirgʻoqqa koʻtarish koʻzda tutilgan kema korpusining tag qismi holatini aniqlashda;
kemani har yillik texnik koʻrikdan oʻtkazish natijasi boʻyicha kemadan foydalanish toʻxtatilgan kemada, barcha talablar bajarilganda;
navbatdagi texnik koʻrikdan oʻtkazish muddatini uzaytirish ehtiyoji paydo boʻlganda;
kema egasining arizasiga muvofiq, agar kemada suzish xavfsizligi taʼminlanishiga shubha uygʻotuvchi nosozliklar paydo boʻlganda.
59. Kemada avariya holatlari sodir etilganda kema egasi zudlik bilan oʻzi joylashgan hududiy kemachilik registri inspektoriga bu haqida xabar qilishi kerak. Olingan shikastlanish darajasiga qarab kemada navbatdan tashqari texnik koʻrik oʻtkaziladi.
Kemani navbatdan tashqari texnik koʻrikdan oʻtkazish davrida yigʻim faqat kemada shikastlanish paydo boʻlgan qurilma (kema korpusi, asosiy dvigatellar, harakatlantiruvchi mexanizmlar, elektr jihozlari) boʻyicha har yillik texnik koʻrikdan oʻtkazish hajmida undiriladi.
60. Hududiy kemachilik registri inspektori avariya holatlarini tahlil qiladi va avariya sabablarini aniqlaydi (kemaning konstruktiv kamchiliklari, olingan shikastlanishlar darajasi va uning suzish xavfsizligiga taʼsiri, ob havo sharoiti, shamol, toʻlqin, oqim tezligi va kema ekipajining malakasi) va avariya holatlarini aniqlash boʻyicha tashkil etilgan komissiya ishida ishtirok etadi va mazkur Reglamentning 9-ilovasidagi shaklga muvofiq uch nusxada Kema bilan sodir etilgan avariya toʻgʻrisida dalolatnoma tuzadi. Dalolatnomaning bir nusxasi kema egasiga, ikkinchi nusxasi kemachilik registri inspektoriga yuboriladi, uchinchi nusxasi oʻzida qoladi.
61. Hududiy kemachilik registri inspektori tekshirish natijalari boʻyicha aniqlangan kamchiliklar qayd etib oʻtilgan va bu kamchiliklarni bartaraf etish talablari oʻrnatilgan kemani navbatdan tashqari texnik koʻrikdan oʻtkazish toʻgʻrisida dalolatnomani uch nusxada tuzadi. Dalolatnomaning bir nusxasi kema egasiga, ikkinchi nusxasi Kemachilik registri inspektoriga yuboriladi, uchinchi nusxasi oʻzida qoladi.
11-bob. Kemani qurish davrida texnik nazorat olib borish
62. Kemani qurish davrida nazorat qilishni kemachilik registri inspektori tomonidan kelishilgan texnik loyiha hujjatlari asosida hududiy kemachilik registri inspektori amalga oshiradi.
Chet davlatlardan Oʻzbekiston Respublikasiga olib kelinadigan kemalarni qurish davrida nazorat qilish kemachilik registri inspektori tomonidan amalga oshiriladi.
63. Qurish davrida yetarli darajada texnik nazorat olib borish uchun, kema qurish korxonasi har bir texnik jarayonni boshlashdan bir kun oldin hududiy kemachilik registri inspektorini xabardor qiladi.
Hududiy kemachilik registri inspektorini xabardor qilish, uni nazorat obyektida boʻlishi tartibi va muddati oʻzaro tuzilgan shartnomalarda belgilab qoʻyiladi.
64. Kemani qurish davrida texnik nazorat normativ hujjatlar, maʼqullangan texnik loyiha va ish hujjatlariga asosan oʻtkaziladi. Kemada qurish ishlari tugallangandan keyin texnik koʻrikdan oʻtkazish ishlari tugallangan hamda kemaga Klassifikatsiya guvohnomasi va kema hujjatlari berilgan sana kemani dastlabki texnik koʻrikdan oʻtkazilgan sanasi hisoblanadi.
65. Kemani qurish davrida texnik nazorat olib borish quyidagi tartibda amalga oshiriladi:
kema korpusi boʻyicha:
kema korpusi va biriktiruvchi elementlarining oʻlchamlari va joylashuvi boʻyicha texnik loyiha va ishchi hujjatlarni oʻrganib chiqish;
kema konstruksiyasini tayyorlash jarayonida texnik loyiha hujjatlarida belgilangan “payvandlash” qismi talablari bajarilishi;
kema konstruksiyasini bogʻlovchi elementlarining oʻlchamlari, ularda bosimga zaxira boʻlishi;
konstruksiya elementlari va konstruksiyaning oʻzida mustahkamlik talablarining bajarilishi;
konstruksiya tayyorlashda qoʻllanilayotgan material va buyumlarning oʻlchamlari;
qoʻllanilayotgan material va buyumlarda muvofiqlik sertifikatlarining mavjudligi;
konstruksiya jihozlari oraligʻi oʻlchamlarining taʼminlanganligi;
kemada mustahkamlik, ustuvorlik, choʻkmaslik, barqarorlik va suzuvchanlikka qoʻyilgan talablarning bajarilishi;
korpusni boʻlinmalarga ajratish, suv oʻtkazmaydigan pereborkalari uchun oʻrnatilgan talablarning bajarilishi;
koʻndalang va boʻylama mustahkamlikning taʼminlanganligi;
kema tashqi qobigʻi bir qismdan ikkinchi qismga oʻtganda tekis oʻtishi, keskin burilishlarga yoʻl qoʻymaslik;
suv usti va suv osti bortlari, yuk markasining toʻgʻri belgilanishi;
ustqurmalar va rubkaning toʻgʻri joylashtirilishi;
texnik loyiha hujjatlarida belgilangan usulda qobiqning suv oʻtkazmaslikka tekshirish;
shtevnlar, kil, rul, eshkak vali, eshkak vintining qoʻzgʻalmas kronshteynlariga oʻrnatilgan talablarning bajarilishi;
asosiy mexanizmlarni oʻrnatishga moʻljallangan fundamentlarni tayyorlash va ularni joylashtirish boʻyicha talablarning bajarilishi;
mashina boʻlimi konstruksiyasi, elektr jihozlari va tizimlarni oʻtkazish uchun moʻljallangan teshiklarni toʻgʻri joylashtirilganligi;
falshbort va himoya toʻsiqlariga oʻrnatilgan talablarning bajarilishi;
yongʻinga qarshi himoya choralarining toʻgʻri tanlanganligi.
Asosiy va yordamchi dvigatellar, mexanizm va qurilmalar boʻyicha:
asosiy va yordamchi dvigatellarning texnik loyiha hujjatlariga muvofiq tanlanganligi va ularda texnik pasport va sertifikatlarning mavjudligi, fundamentga toʻgʻri va ishonchli oʻrnatilganligi;
mexanizm va qurilmalarning texnik loyiha hujjatlariga muvofiq tanlanganligi va ularda muvofiqlik sertifikatlarining mavjudligi, fundamentga toʻgʻri va ishonchli oʻrnatilganligi;
rul, langar, shvartov va shatak qurilmalari uchun tanlangan buyumlarning texnik loyiha hujjatlariga muvofiq tanlanganligi.
Elektr jihozlari boʻyicha:
bosh elektr taqsimlagich qalqoni va elektr kabellarining texnik loyiha hujjatlariga muvofiq tanlanganligi;
elektr kabellari trassasining kema korpusi boʻylab oʻtkazilishi, xavfsizlik taʼminlanganligi;
elektr kabellarni ulash joylarining sifati;
radioaloqalar uchun tanlangan uskunaning texnik loyiha hujjatlariga muvofiq tanlanganligi;
signal machtasidagi farqlovchi chiroqlar va navigatsiya chiroqlarining texnik loyiha hujjatlariga muvofiq tanlanganligi va ularni toʻgʻri oʻrnatilganligi;
Kema tizimlari boʻyicha:
kemaning sovutish, bortdan tashqari sovutish, yoqilgʻi, ichimlik suv taʼminoti tizimlarining texnik loyiha hujjatlariga muvofiq oʻtkazilganligi;
neft, oqova suv va chiqindilar uchun moʻljallangan idishlarning oʻlchamlari va kemada oʻrnatilishi;
qoʻl va elektr nasoslarining oʻrnatilishi.
66. Hududiy kemachilik registri inspektori qurishning har bosqichida kemani qurish davrida texnik koʻrikdan oʻtkazish toʻgʻrisida dalolatnomani rasmiylashtirish orqali bajarilgan ishlarni texnik loyiha hujjatlariga muvofiq ekanligi toʻgʻrisida qayd etib borishi mumkin.
67. Qurish ishlari tugallangandan keyin kemani suvga tushirishdan oldin hududiy kemachilik registri inspektori kema korpusi, mexanizmlari, qurilmalari, tizimlari holatini sinchiklab oʻrganib chiqadi va kemani suvga tushirish uchun ruxsat beradi.
68. Kemada sinov ishlarini amalga oshirish uchun kema qurish korxonasi tomonidan masʼul shaxslardan iborat qabul qilish komissiyasi tashkil etiladi. Komissiya tarkibiga hududiy kemachilik registri inspektori kiritiladi.
69. Kema suvga tushirilgandan keyin kemada sinov ishlarini amalga oshirish uchun masʼul shaxslar hududiy kemachilik registri inspektori ishtirokida kema korpusining suv oʻtkazmaslikka ishonch hosil qilish uchun kema boʻlinmalarini birma-bir tekshirib chiqadilar. Aniqlangan kamchiliklar zudlik bilan bartaraf etiladi.
70. Kema mexanigi kemaning asosiy dvigatelini ishga tushiradi va kema, kema qatnaydigan yoʻlga chiqariladi va parametr koʻrsatkichlari qayd etilgan holda asosiy dvigatel barcha rejimda ishlatilib tekshiriladi, rul, langar, shatak qurilmasi, elektr jihozlari, signal machtasi va navigatsiya chiroqlari ishlatib tekshiriladi va qayd etilgan holda shvartov va yurish sinovlari oʻtkaziladi.
71. Sinov natijalari boʻyicha aniqlangan kamchiliklarni bartaraf etish choralari koʻriladi.
72. Oʻtkazilgan sinovning ijobiy natijalari boʻyicha hududiy kemachilik registri inspektori tomonidan barcha koʻrsatkichlar qayd etilgan holda uch nusxada dastlabki texnik koʻrikdan oʻtkazish toʻgʻrisida dalolatnoma tuziladi. Dalolatnomaning bir nusxasi kema egasiga, ikkinchi nusxasi kemachilik registri inspektoriga yuboriladi, uchinchi nusxasi oʻzida qoladi.
12-bob. Kemani yangidan jihozlash va taʼmirlash davrida texnik nazorat olib borish
73. Kemani yangidan jihozlash davrida nazorat qilishni kemachilik registri inspektori tomonidan kelishilgan texnik loyiha hujjatlari asosida, taʼmirlash davrida esa tuzilgan nuqsonlar va bajariladigan ishlar roʻyxati asosida hududiy kemachilik registri inspektori amalga oshiradi.
74. Kemani yangidan jihozlash maʼqullangan texnik loyiha va ish hujjatlariga asosan oʻtkaziladi. Texnik loyiha hujjatlari asoslangan hisob kitob ishlariga muvofiq ishlab chiqilgani oʻrganib chiqiladi. Kiritilgan konstruktiv oʻzgartirishlar davrida kemadan xavfsiz foydalanish talablari bajarilgan boʻlishi kerak.
75. Kemani yangidan jihozlash va taʼmirlash davrida nazorat olib borish hududiy kemachilik registri inspektori va kema egasi oʻrtasida tuzilgan oʻzaro shartnoma asosida amalga oshiriladi.
Hududiy kemachilik registri inspektorini kemani yangidan jihozlash toʻgʻrisida xabardor qilish, uni nazorat obyektida boʻlishi tartibi va muddati oʻzaro tuzilgan shartnomalarda belgilab qoʻyiladi.
76. Hududiy kemachilik registri inspektori faqat kemaning yangidan jihozlanayotgan va taʼmirlanayotgan obyektida amalga oshiriladigan ishlarni texnik nazorat qiladi. Qoʻllanilayotgan material va buyumlarda ularning muvofiqlik sertifikatlari mavjudligini tekshiradi.
77. Kemada yangidan jihozlash va taʼmirlash ishlari tugallangandan keyin hududiy kemachilik registri inspektori tomonidan kemani navbatdagi texnik koʻrikdan oʻtkazish toʻgʻrisida ikki nusxada dalolatnoma rasmiylashtiriladi.
78. Kemani navbatdagi texnik koʻrikdan oʻtkazish toʻgʻrisida dalolatnomaga asosan kemaga yangi klass oʻrnatilgan/tasdiqlangan Klassifikatsiya guvohnomasi va kema hujjatlari yangidan rasmiylashtiriladi va dalolatnomaning bir nusxasi bilan birgalikda kema egasiga taqdim etiladi.
14-bob. Registr qoidalari talablarining bajarilishida aniqlangan kamchiliklarni bartaraf etish
89. Kemachilik registri inspektori va hududiy kemachilik registri inspektori kemalardan foydalanish davrida aniqlangan kamchiliklar va qoidabuzarliklarni bartaraf etish boʻyicha quyidagi ishlarni amalga oshiradi;
kemalardan foydalanish, tabelda qayd etilgan taʼminot va inventar bilan butlash, suzish va foydalanish xavfsizligini taʼminlash boʻyicha talablar bajarilishi boʻyicha kema egalariga taqdimnoma beradi;
xavfsiz suzish sharoitlari, odamlar hayotini muhofaza qilinishi, ichki kema yoʻllarida yuklarning ishonchli tashilishi, kemalardan ifloslantirishning oldi olinishini taʼminlash boʻyicha suzish vositalariga qoʻyiladigan texnik talablar bajarilishini texnik nazorat qiladi;
kema qurish, yangidan jihozlash va taʼmirlash davrida uning konstruksiyasi mustahkamligiga taʼsir qiluvchi, shuningdek, inson salomatligi va hayotiga tahdid soluvchi konstruktiv nuqsonlar aniqlangan holatlarda, ularni bartaraf etilishi majburiy boʻlgan yozma koʻrsatmalar beradi;
kema bortida kema guvohnomasi nusxasi va kema hujjatlari boʻlmaganda, kema hujjatlarining amal qilish muddati tamom boʻlganda, kemalar malakali ekipaj bilan butlanmaganda, kema bortida avariya-qutqaruv, yongʻinga qarshi texnik himoya va yongʻin oʻchirishning birlamchi vositalari, kema qurilmalarida odamlarning xavfsizligiga tahdid soluvchi nuqsonlar mavjud boʻlganda, kemalardan foydalanish, yongʻin va sanitariya xavfsizligi qoidalari talablari buzilganda ulardan foydalanishni taqiqlaydi.
90. Aniqlangan texnik nosozliklar toʻgʻrisida Suzishga yaroqli ekanligi toʻgʻrisida guvohnomaning tegishli qismida qayd etiladi va aniqlangan kamchiliklar bartaraf etilgunga qadar kemadan foydalanishga cheklov oʻrnatiladi.
91. Foydalanish boʻyicha cheklov oʻrnatilgan kemada qayd etib oʻtilgan texnik nosozliklar bartaraf etilgandan soʻng kema egasi, bu haqda hududiy kemachilik registri inspektorini xabardor qiladi. Hududiy kemachilik registri inspektori kemada qayd etilgan kamchiliklar bartaraf etilganligiga ishonch hosil qilgandan soʻng, kemani navbatdan tashqari texnik koʻrikdan oʻtkazish toʻgʻrisida dalolatnoma tuzadi va Suzishga yaroqli ekanligi toʻgʻrisida guvohnoma tiklanganligi toʻgʻrisida uning tegishli qismiga yozuvlar kiritadi va tasdiqlaydi.
92. Kemani navbatdagi va har yillik texnik koʻrik natijasi boʻyicha tuzilgan dalolatnomalarda oʻrnatilgan talablarni bartaraf etilgandan soʻng hududiy kemachilik registri inspektoriga, bartaraf etilganligi toʻgʻrisida kema egasi tomonidan surat yoki videolavhalar ilova etilgan holda maʼlumot yuboriladi.
15-bob. Yakunlovchi qoida
93. Daryo transporti sohasidagi faoliyatni amalga oshirishda ushbu Reglament talablarini buzgan shaxs qonun hujjatlariga muvofiq javob beradi.
Daryo transportida davlat xizmatlari koʻrsatishning maʼmuriy reglamentiga 1-ILOVA
Daryo transportida davlat xizmatlari koʻrsatishning maʼmuriy reglamentiga 2-ILOVA
OʻZBEKISTON RESPUBLIKASIRESPUBLIKA UZBEKISTANTHE REPUBLIC OF UZBEKISTANKEMA GUVOHNOMASI SUDOVOYE SVIDETELSTVO SHIPʻS CERTIFICATE DT №Oʻzbekiston Respublikasi Transport vazirligi huzuridagi Transport nazorati inspeksiyasining Kemachilik registri kemalar roʻyxatiga asosan quyida koʻrsatilgan kemaning egasi: Na osnovanii sudovogo reyestra Cudoxodnogo registra Inspeksii po nadzoru v sfere transporta pri Ministerstve transporta Respubliki Uzbekistan ukazannoye nije s udno prinadlejit: According to the ships list of the Shipping Register of the Inspection of transport supervision under Ministry of Transport of the Republic of Uzbekistan indicated below ship belongs to: ____________________________________________________________________________________________1. Kema nomi yoki raqami Nazvaniye sudna ili nomer ______________________________________________________________________ Name of the ship or its number2. Turi va vazifasi Tip i naznacheniye _____________________________________________________________________________ Type and purpose3. Roʻyxat № Reyestroviy № ________________________________________________________________________________ Indicated №4. Qurilgan yili va joyi God i mesto postroyki _________________________________________________________________________ Year and Place of construction5. Korpus materiali Material korpusa _____________________________________________________________________________ Material of hull6. Kemaning gabariti Gabaritnie razmeri sudna Ship dimensions:uzunligi dlina _____ m, engthkengligi shirina _____ m, widthtoʻla yuk bilan suvga botishi osadka v polnom gruzu _____ m, full draughtboʻsh holda botishi osadka porojnem _______ m. draught without loadustki qavati bilan balandligi (boʻsh holda botishidan) naibolshaya visota s nadstroykami (ot osadki porojnem) ________m max height with superstructure (from the draught without load)7. Belgilangan yuk koʻtarishi____________ tonna, yoʻlovchi sigʻimi __________ kishi Ustanovlennaya gruzopodyemnost ______ tonn, passajirovmestimost ____ chelovek. Gross tonnage _______ton, passengers capacity___________men.8. Suzish hududi Rayon plavaniya _______________________________________________________________________________ Region of sailingBoshliq Nachalnik __________________ Head20___ “____” ______________
Daryo transportida davlat xizmatlari koʻrsatishning maʼmuriy reglamentiga 3-ILOVA
Kemalarni qurish, yangidan jihozlash, taʼmirlash va ulardan foydalanish davrida Registr xizmatlari uchun tariflar
I bob. Umumiy qoidalar
1. Kemalarni qurish, yangidan jihozlash, taʼmirlash va ulardan foydalanish davrida Registr xizmatlari uchun toʻlovlarni hisoblash shartli birliklarda ifodalanadi va aniqlangan shartli birliklar Oʻzbekiston Respublikasida oʻrnatilgan bazaviy hisoblash miqdorining (keyingi oʻrinlarda — BHM) 0,042 barobariga koʻpaytiriladi.
2. Registr tomonidan koʻrsatilgan quyidagi xizmatlar uchun toʻlov undiriladi:
kemalarni loyihalashtirish davrida texnik loyiha hujjatlarini koʻrib chiqish va xulosa berish;
kemalarni qurish, yangidan jihozlash, taʼmirlash va ulardan foydalanish davrida texnik nazorat olib borish;
kemalarni davriy texnik koʻriklardan oʻtkazish.
3. Registrning ish joyidan kemani texnik koʻrik oʻtkazish joyiga borib-kelish uchun transport xarajatlariga alohida toʻlov undirilmaydi.
4. Tariflarda bir nechta koeffitsiyentlar qoʻllanilganda, ular oʻzaro koʻpaytiriladi.
Tariflar boʻyicha yakuniy hisob natijalari 0,3 koeffitsiyentga koʻpaytiriladi.
5. Ushbu tariflar asosida hisoblangan texnik koʻrik bahosi butun birliklargacha yaxlitlanadi.
II bob. Kemalarni qurish, yangidan jihozlash va taʼmirlash davrida texnik nazorat olib borish
7. Kema qurish davrida texnik nazorat olib borish uchun toʻlovlar quyidagi miqdorlarda belgilanadi:
oʻziyurar kema uchun BHMning 75 barobari miqdorida;
oʻziyurmas kema uchun BHMning 50 barobari miqdorida.
8. Kemalarni yangidan jihozlash davrida texnik nazorat olib borish uchun toʻlov BHMning 25 barobari miqdorida;
kemalarni taʼmirlash davrida texnik nazorat olib borish uchun toʻlov BHMning 20 barobari miqdorida belgilanadi.
III bob. Kemalardan foydalanish davrida texnik koʻrikdan oʻtkazish uchun qoʻllaniladigan koeffitsiyentlar
1-§. Kema qobigʻi
9. Kema qobigʻini texnik koʻrikdan oʻtkazish uchun toʻlovlarni hisoblash davrida quyidagi asosiy gabarit oʻlchamlari hisobga olinadi:
L — gabarit uzunligi, m; V — gabarit kengligi, m; N — bort balandligi, m.
10. Kemalarning turiga qarab quyidagi koeffitsiyentlar qoʻllaniladi:
a) daryo kemalari 0,65; b) quruq yuk kemalari 1,00; v) shatakka oluvchi, neft tashuvchi kemalar 1,15; g) suzuvchan doklar, kema koʻtargichlar 1,20; d) kechuvlar, ov kemalari, texnik flot kemalari 1,30; e) tezyurar kemalar, havo yostiqli kemalar, suv osti qanotli kemalar 1,50; j) yoʻlovchi kemalari (12 dan ortiq yoʻlovchi), maxsus kemalar 2,00.
11. Qurilganiga 5 yilgacha boʻlgan kemalarning qobigʻini texnik koʻrikdan oʻtkazish uchun toʻlov mazkur Yoʻriqnomaning 1-jadvaliga muvofiq belgilanadi.
Qurilganiga 5 yildan ortiq boʻlgan kemalarni texnik koʻrikdan oʻtkazish uchun toʻlovlarni belgilashda ularning qurilgan yiliga qarab quyidagi koeffitsiyentlar qoʻllaniladi:
5 yildan 10 yilgacha 1,25; 10 yildan 15 yilgacha 1,75; 15 yildan 20 yilgacha 2,00; 20 yildan 25 yilgacha 2,25; 25 yildan ortiq 2,50.
12. Har yillik texnik koʻrik uchun toʻlovlarni hisoblashda mazkur Yoʻriqnomaning 1-jadvaliga muvofiq 0,25 qoʻshimcha koeffitsiyent qoʻllaniladi.
2-§. Kema mexanik qurilmasi
13. Kema mexanik qurilmalarini navbatdagi texnik koʻrikdan oʻtkazish uchun toʻlovlar mazkur Yoʻriqnomaning 2-jadvaliga muvofiq belgilanadi.
Hisoblash davrida kemaning asosiy va yordamchi dvigatellari, shu jumladan avariya-zaxira dvigatellarining umumiy quvvati kVt — N hisobga olinadi.
14. Toʻlovlarni belgilashda kemaning turiga qarab quyidagi koeffitsiyentlar qoʻllaniladi:
15. Mexanik qurilmaning turidan qatʼiy nazar toʻlovlar 2-jadvalda koʻrsatilgan koeffitsiyentlarni qoʻllagan holda belgilanadi.
16. Harakatlantiruvchi qurilmaning konstruksiyasidan qatʼiy nazar toʻlovlar 1.1 koeffitsiyentni qoʻllagan holda belgilanadi.
Har yillik texnik koʻrik uchun toʻlovlar qoʻshimcha 0,22 koeffitsiyent qoʻllangan holda belgilanadi.
3-§. Kema elektr jihozlari
17. Kema elektr jihozlarini navbatdagi texnik koʻrikdan oʻtkazish uchun toʻlovlar mazkur Yoʻriqnomaning 3-jadvaliga muvofiq belgilanadi.
Asosiy va yordamchi generatorlar, valogeneratorlar va avariya-zaxira generatorlarini hisobga olgan holda generatorlarning umumiy nominal quvvati — R (kVA, kVt) qabul qilinadi.
18. Kema turiga qarab elektr jihozlarini texnik koʻrikdan oʻtkazish uchun toʻlovlar quyidagi koeffitsiyentlar qoʻllangan holda belgilanadi:
a) daryo kemalari 0,9; b) oʻziyurmas kemalar 0,5; v) shataklovchi kemalar 0,8; g) quruq yuk kemalari 1,0; d) neft tashuvchi kemalar 1,5; e) tezyurar kemalar 1,5; j) yoʻlovchi tashuvchi kemalar, kechuvlar va maxsus kemalar 1,7.
19. Har yillik texnik koʻrikdan oʻtkazish uchun toʻlovlar 0,25 koeffitsiyent qoʻllanilgan holda belgilanadi.
4-§. Kemaning eshkak vallari va deydvud qurilmalarini texnik koʻrikdan oʻtkazish
20. Eshkak vallari va deydvud qurilmalarining barcha turdagi texnik koʻriklardan oʻtkazish uchun toʻlovlar mazkur Yoʻriqnomaning 4-jadvaliga muvofiq belgilanadi.
21. Har bir eshkak vali (deydvud qurilmasi) uchun texnik koʻrik turiga qarab quyidagi koeffitsiyentlar qoʻllaniladi:
a) toʻliq texnik koʻrikdan oʻtkazish (eshkak valini chiqarib olib) 1,0; b) eshkak valini chiqarib olmasdan texnik koʻrikdan oʻtkazish 0,7.
5-§. Kemalarning Konvensiya jihozlarini texnik koʻrikdan oʻtkazish, Konvensiya hujjatlarini berish va tasdiqlash
22. Neft, oqova suvlar va axlat bilan ifloslantirishning oldini olish toʻgʻrisidagi guvohnoma berish maqsadida oʻtkazilgan texnik koʻrik uchun toʻlovlar kema dvigatellarining umumiy quvvati (N.kVt) boʻyicha mazkur Yoʻriqnomaning 5-jadvaliga muvofiq belgilanadi.
23. Kemalarni texnik koʻriklar uchun toʻlovlarni hisoblashda quyidagicha koeffitsiyent qoʻllaniladi:
navbatdagi koʻrikdan oʻtkazish uchun 0,15;
har yillik koʻrikdan oʻtkazish uchun 0,10.
Izoh: Oʻziyurmas kemalarni texnik koʻrikdan oʻtkazish boʻyicha tariflarni shakllantirish davrida mexanik qurilma, eshkak vallari va deydvud qurilmalar hisobga olinmaydi.
Toʻlovlarni hisoblashda kemalarning oʻlchamlari va dvigatellarining quvvatiga muvofiq qoʻllaniladigan koeffitsiyentlar
1-jadval S = L (B + N) Koʻrik uchun toʻlov, shartli birlikda 100 gacha 250 101 — 2000 250 + (S-100) x 0,35 2001 — 5000 915+ (S-2000) x 0,20 5001 dan ortiq 1515+ (C-5000) x 0,15
2-jadval N, kVt Koʻrik uchun toʻlov, shartli birlikda 500 gacha 565 501 — 2000 gacha 565 + (N-500) x 0,37 2001 dan ortiq 1120 + (N-2000) x 0,13
3-jadval R, kVt Koʻrik uchun toʻlov, shartli birlikda 50 gacha 220 51 — 100 gacha 220 + (R-50) x 0,90 101 — 500 gacha 265 + (P-100) x 0,58 501 — 1000 gacha 497 + (P-500) x 0,29 1001 dan ortiq 642 + (P-100) x 0,09
4-jadval Eshkak vali bilan beriladigan quvvat N1, kVt Koʻrik uchun toʻlov, shartli birlikda 500 gacha 74 501 — 2000 gacha 74 + (N1-500) x 0,016 2001 — 5000 gacha 98 + (N1-2000) x 0,007 5001 — 10000 gacha 121 + (N1-000) x 0,003 10001 dan ortiq 136 + (N1-10000) x 0,002
5-jadval N. kVt Koʻrik uchun toʻlov, shartli birlikda 500 gacha 200 501 dan ortiq 200 + (N-500) x 0,23
Registr xizmatlari uchun tariflarni shakllantirish boʻyicha NAMUNA
Qurilganiga 5 yilgacha boʻlgan 1606, 1606AD loyihadagi shatakka oluvchi teploxodlar uchun
Kema qobigʻi
Kemaning gabarit oʻlchamlari L — uzunligi, V — eni, N — bort balandligi.
L = 17,1 m, V = 3,54 m, N = 1,6 m;
Kt = 1,15 × 0,65 , Ky = 0,25 — (1,15 shatakka oluvchi, 0,65 daryo kemasi, 0,25 har yillik texnik koʻrik uchun).
S = L × (V + N) = 17,1 × (3,54 + 1,6) = 87,9
87.9 < 250
1-jadvaldan
N.k. = 250 × 1,15 × 0,65 = 187 sh.b.
Y.k. = 0,25 × N = 0,25 × 187 = 47 sh.b.
Bu yerda: N.k. — navbatdagi texnik koʻrik;
Y.k. — har yillik texnik koʻrik.
Kema mexanik qurilmasi
N = 110 ÷ 221 kVt < 500 kVt
Kt = 0,7 × 0,8 Ky = 0,22 — (0.7 daryo kemasi, 0,8 shatakka oluvchi, Ky = 0,22 har 4 yilda oʻtkaziladigan navbatdagi va yillik texnik koʻriklarning oʻrtacha bahosini hisoblash uchun).
2-jadvaldan
N.k. = 565 × Kt = 565 × 0,7 × 0,8 = 316 sh.b.
Y.k. = 0,22 × N = 0,22 × 316 = 70 sh.b.
Kema elektr jihozlari
R t = 0,9 × 0,8, Ky = 0,22 — (0,9 daryo kemasi, 0,8 shatakka oluvchi, Ky = 0,22 har 4 yilda oʻtkaziladigan navbatdagi va yillik texnik koʻriklarning oʻrtacha bahosini hisoblash uchun).
3-jadvaldan
N.k. = 220 × Kt = 220 × 0,9 × 0,8 = 158,4 sh.b.
Y.k. = 0,22 × N = 0,22 × 158,4 = 35 sh.b.
Kema eshkak vallari va deydvud qurilmalari
4-jadvaldan
N.k. = 74 sh.b.
Y.k. = 52 sh.b.
Kema Konvensiya jihozlari
5-jadvaldan
N.k. = 200 x 0,15 = 30 sh.b.
Y.k. = 200 x 0,1 = 20 sh.b.
Jami:
N.k. = 187 + 316 + 158,4 + 74 + 30 = 805,4 sh.b.
Y.k. = 47 + 70 + 35 + 52 + 20 = 224 sh.b.
Foydalanishda boʻlgan kemalarni texnik koʻrikdan oʻtkazish uchun oʻrtacha toʻlov quyidagi formula yordamida hisoblab chiqiladi:
0,75 Y.k. + 0,25 N.k. + 0,2 Y.k.
0,75 x 224 + 0,25 x 805,4 + 0,2 x 224 = 414,15
414,15 x 0,3 = 124.4 sh.b.
0,75 Y.k. — zavod taʼmiridan keyin kemaning toʻrt yillik hayot bosqichini hisobga oladigan kattalik, yaʼni 75% kemalar har yili har yillik texnik koʻrik uchun taqdim etilishi kerak.
0,25 N.k. — zavod taʼmiriga chiqishdan oldin kemaning toʻrt yillik hayot bosqichini hisobga oladigan kattalik, yaʼni 25% kemalar har yili navbatdagi texnik koʻrik uchun taqdim etilishi kerak.
0,2 Y.k. — Registrning kemani texnik koʻrikdan oʻtkazish joyiga borib kelishi va yashashi xarajatlarini hisobga oladigan koeffitsiyent.
Qurilganiga 25 yildan ortiq boʻlgan BMK-130 loyihadagi kema uchun Kema qobigʻi
L = 7,85 m, V = 2,1 m, N = 1,4 m
Kt = 1,15 × 0,65, x 2.5. Ky = 0,25
S = L × (V+N) = 7,85 × (2,1 + 1,4) = 27,5
N.k. = 250 × 1,15 × 0,65 x 2,5 = 467,2 sh.b.
Y.k. = 0,25 × N.k. — 0,25 × 467,2 = 116.8 sh.b.
Kema mexanik qurilmasi
N = 110 ÷ 221 kVt < 500 kVt
Kt = 0,7 × 0,8 Ky = 0,25
N.k. = 565 × K = 565 × 0,7 × 0,8 = 316 sh.b.
Y.k. = 0,25 × N.k. = 0,25 × 316 = 79 sh.b.
Kema elektr jihozlari
R t = 0,9 × 0,8, Ke = 0,25
N.k. = 220 × Kt = 220 × 0,9 × 0,8 = 158,4 sh.b.
Y.k.= 0,25 × N.k. = 0,25 × 158.4 = 39.6 sh.b.
Kema eshkak vallari va deydvud qurilmalari
N.k. = 74 sh.b.
Y.k.= 52 sh.b.
Jami:
Jami:
Y.k. = 116,8 + 79 + 39,6 + 52 = 287.4 sh.b.
0,75 Y.k. + 0,25 N.k. + 0,2 Y.k.
0,75 x 287.4 + 0,25 x 1015,6 + 0,2 x 287.4 = 526.93
526.93 x 0,3 = 158,079 sh.b.
Qurilganiga 25 yildan ortiq boʻlgan 1606 va 1606AD loyihadagi shatakka oluvchi teploxodlar uchun Kema qobigʻi
Kemaning gabarit oʻlchamlari L — uzunligi, V — eni, N — bort balandligi.
L = 17,1 m, V = 3,54 m, N = 1,6 m;
Kt = 1,15 × 0,65, Ky = 0,25, KQ = 2,50 — (1,15 shatakka oluvchi, 0,65 daryo kemasi, 0,25 har yillik texnik koʻrik uchun, 2,50 — qurilganiga 25 yildan ortiq boʻlgan kema uchun).
S = L × (V + N) = 17,1 × (3,54 + 1,6) = 87,9
87,9 < 250
1-jadvaldan
N.k. = 250 × 1,15 × 0,65 x 2,50 = 467,18 sh.b.
Y.k. = 0,25 × N = 0,25 × 467,18 = 116,8 sh.b.
Kema mexanik qurilmasi
N = 110 ÷ 221 kVt < 500 kVt
Kt = 0,7 × 0,8 Ky = 0,22 — (0.7 daryo kemasi, 0.8 shatakka oluvchi, Ky = 0,22 har 4 yilda oʻtkaziladigan navbatdagi va yillik texnik koʻriklarning oʻrtacha bahosini hisoblash uchun).
2-jadvaldan
N.k. = 565 × Kt = 565 × 0,7 × 0,8 = 316 sh.b.
Y.k. = 0,25 × N = 0,25 × 316 = 79 sh.b.
Kema elektr jihozlari
R t = 0,9 × 0,8, Ky = 0,22 — (0,9 daryo kemasi, 0,8 shatakka oluvchi, Ky = 0,22 har 4 yilda oʻtkaziladigan navbatdagi va yillik texnik koʻriklarning oʻrtacha bahosini hisoblash uchun).
3-jadvaldan
N.k. = 220 × Kt = 220 × 0,9 × 0,8 = 158,4 sh.b.
Y.k. = 0,25 × N = 0,25 × 158.4 = 39.6 sh.b.
Kema eshkak vallari va deydvud qurilmalari
4-jadvaldan
N.k. = 74 sh.b.
Y.k. = 52 sh.b.
Kema Konvensiya jihozlari
5-jadvaldan
N.k. = 200 x 0,15 = 30 sh.b.
Y.k. = 200 x 0,1 = 20 sh.b.
Jami :
N.k. = 467,18 + 316 + 158,4 + 74 + 30 = 1045,58 sh.b.
Y.k. = 116,8 + 79 + 39.6 + 52 + 20 = 307.4 sh.b.
Foydalanishdagi kemalarni nazorat qilish uchun oʻrtacha toʻlov quyidagi formula yordamida hisoblab chiqiladi:
0,75 Y.k. + 0,25 N.k. + 0,2 Y.k.
0,75 x 307.4 +0,25 x 1045,58 + 0,2 x 307.4 = 553.425 x 0,3 = 166.0 sh.b.
Bunda 0,25 N.k. — zavod sharoitida taʼmirga chiqishdan oldin kemaning toʻrt yillik hayot bosqichini hisobga oladigan kattalik, yaʼni 25% kemalar har yili navbatdagi texnik koʻrikdan oʻtkazish uchun taqdim etilishi kerak.
Daryo transportida davlat xizmatlari koʻrsatishning maʼmuriy reglamentiga 4-ILOVA
(4-ilovaning matni Oʻzbekiston Respublikasi Vazirlar Mahkamasining 2024-yil 28-oktabrdagi 710-sonli qarori tahririda — Qonunchilik maʼlumotlari milliy bazasi, 31.10.2024-y., 09/24/710/0867-son)
Daryo transportida davlat xizmatlari koʻrsatishning maʼmuriy reglamentiga 5-ILOVA
(5-ilovaning matni Oʻzbekiston Respublikasi Vazirlar Mahkamasining 2024-yil 28-oktabrdagi 710-sonli qarori tahririda — Qonunchilik maʼlumotlari milliy bazasi, 31.10.2024-y., 09/24/710/0867-son)
Daryo transportida davlat xizmatlari koʻrsatishning maʼmuriy reglamentiga 6-ILOVA
(6-ilova Oʻzbekiston Respublikasi Vazirlar Mahkamasining 2024-yil 28-oktabrdagi 710-sonli qarori tahririda — Qonunchilik maʼlumotlari milliy bazasi, 31.10.2024-y., 09/24/710/0867-son)
Daryo transportida davlat xizmatlari koʻrsatishning maʼmuriy reglamentiga 7-ILOVA
(7-ilovaning matni Oʻzbekiston Respublikasi Vazirlar Mahkamasining 2024-yil 28-oktabrdagi 710-sonli qarori tahririda — Qonunchilik maʼlumotlari milliy bazasi, 31.10.2024-y., 09/24/710/0867-son)
Daryo transportida davlat xizmatlari koʻrsatishning maʼmuriy reglamentiga 8-ILOVA
(8-ilovaning matni Oʻzbekiston Respublikasi Vazirlar Mahkamasining 2024-yil 28-oktabrdagi 710-sonli qarori tahririda — Qonunchilik maʼlumotlari milliy bazasi, 31.10.2024-y., 09/24/710/0867-son)
Daryo transportida davlat xizmatlari koʻrsatishning maʼmuriy reglamentiga 9-ILOVA
Vazirlar Mahkamasining 2022-yil 7-apreldagi 167-son qaroriga 2-ILOVA
Oʻzbekiston Respublikasi Hukumatining oʻz kuchini yoʻqotgan deb eʼtirof etilayotgan qarorlari
ROʻYXATI
1. Vazirlar Mahkamasining “Kemalarni qurishda, foydalanishda, yangidan jihozlashda va taʼmirlashda ularni majburiy koʻrikdan oʻtkazish tartibi toʻgʻrisidagi nizomni tasdiqlash toʻgʻrisida” 2016-yil 5-maydagi 141-son qarori (Oʻzbekiston Respublikasi QT, 2016-y., 5-son, 38-modda).
2. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar va qoʻshimchalar kiritish toʻgʻrisida (Oʻzbekiston Respublikasi Prezidentining “Avtomobil transportini boshqarish tizimini yanada takomillashtirish chora-tadbirlari toʻgʻrisida” 2018-yil 6-martdagi PQ-3589-son qarori)” 2018-yil 10-dekabrdagi 1002-son qaroriga ilovaning 2-bandi.
3. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek, baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Transport sohasida davlat boshqaruvi tizimini tubdan takomillashtirish chora-tadbirlari toʻgʻrisida” 2019-yil 1-fevraldagi PF-5647-son Farmoni va Oʻzbekiston Respublikasi Prezidentining “Yuk va yoʻlovchi tashish tizimini tubdan takomillashtirish chora-tadbirlari toʻgʻrisida” 2019-yil 6-martdagi PQ-4230-son qarori)” 2020-yil 8-maydagi 271-son qaroriga 1-ilovaning 40-bandi.