Yaponiya Hukumatining begʻaraz yordamidan samarali foydalanish toʻgʻrisida (117-son)

04.04.2002

Oʻzbekiston Respublikasi Vazirlar Mahkamasining

qarori

Yaponiya Hukumatining qishloq xoʻjaligi texnikasi va asbob-uskunalari yetkazib berishni tashkil etish uchun 500 mln Yaponiya yeni miqdoridagi begʻaraz yordamidan samarali foydalanish maqsadida Vazirlar Mahkamasi qaror qiladi:

1. Oʻzbekiston Respublikasi Bosh vazirining oʻrinbosari T.X. Xoltoyev Oʻzbekiston Respublikasi Hukumati nomidan Ayirboshlash notasini imzolashga vakil qilinsin.

2.Quyidagilar:

begʻaraz yordamni olish uchun barcha tartibotlarni Yaponiya tomoni bilan kelishilgan muddatlarda rasmiylashtirish va begʻaraz asosda ajratilayotgan mablagʻlarga xizmat koʻrsatish Oʻzbekiston Respublikasi qishloq va suv xoʻjaligi vazirligiga;

yuqorida koʻrsatib oʻtilgan begʻaraz yordamga hisob-kitob xizmati koʻrsatish Oʻzbekiston Respublikasi Tashqi iqtisodiy faoliyat milliy bankiga yuklansin.

3. Begʻaraz yordam doirasida Oʻzbekiston Respublikasiga keltirilayotgan qishloq xoʻjaligi texnikasi, asbob-uskunalar, ehtiyot qismlar va xizmatlar bojxona toʻlovlari, soliqlar, yigʻimlar va Yoʻl jamgʻarmasiga ajratmalardan ozod qilinsin.

4. Oʻzbekiston Respublikasi Tashqi ishlar vazirligi qishloq va suv xoʻjaligi vazirligining buyurtmanomalariga koʻra loyihani amalga oshirishda qatnashayotgan xorijiy mutaxassislarni konsullik yigʻimlari undirmasdan belgilangan tartibda kelish vizalari bilan taʼminlasin.

5. Oʻzbekiston Respublikasi Ichki ishlar vazirligi qishloq va suv xoʻjaligi vazirligining buyurtmanomalariga koʻra loyihaning xorijiy qatnashchilarini davlat boji undirmasdan yashash joyida vaqtinchalik roʻyxatdan oʻtkazsin, vizalar va vaqtinchalik roʻyxatdan oʻtkazish muddatlarini uzaytirsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari T.X. Xoltoyev zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2002-yil 4-aprel,

117-son