Amerika Qoʻshma Shtatlari bilan hamkorlikni yanada rivojlantirish chora-tadbirlari toʻgʻrisida (116-son)

04.04.2002

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining Amerika Qoʻshma Shtatlariga rasmiy tashrifi (2002-yil 11—14-mart) davomida erishilgan bitimlar va ikki tomonlama hamkorlik sohasidagi ahdlashuvlarning keng koʻlamda va oʻz vaqtida roʻyobga chiqarilishini taʼminlash maqsadida Vazirlar Mahkamasi qaror qiladi:

1. Amerika Qoʻshma Shtatlari bilan erishilgan ahdlashuvlarni amalga oshirish va ikki tomonlama hamkorlikni yanada rivojlantirishga doir tadbirlar 1-ilovaga* muvofiq tasdiqlansin.

*1-ilova berilmaydi.

2. Oʻzbekiston Respublikasi Tashqi ishlar vazirligi, Iqtisodiyot vazirligi, Tashqi iqtisodiy aloqalar vazirligi, boshqa manfaatdor vazirliklar va idoralar AQSH hukumati tomonidan Oʻzbekiston Respublikasiga 2-ilovaga* muvofiq yoʻnalishlar boʻyicha berilayotgan yordamdan samarali foydalanilishini taʼminlasinlar.

* 2-ilova berilmaydi.

3. Oʻzbekiston Respublikasi Iqtisodiyot vazirligi, Tashqi iqtisodiy aloqalar vazirligi manfaatdor vazirliklar va idoralar bilan birgalikda:

AQSH savdo va rivojlantirish agentligi (TDA) bilan imzolangan oʻzaro bir-birini tushunish toʻgʻrisidagi memorandumlarga binoan 3-ilovaga* muvofiq yoʻnalishlar boʻyicha birgalikda amalga oshirish uchun taklif qilingan loyihalarning ishlab chiqilishini taʼminlasinlar;

* 3-ilova berilmaydi.

moʻljallangan loyihalarni amalga oshirishda paydo boʻladigan masalalarni oʻz vaqtida hal etish chora-tadbirlarini koʻrsinlar;

yilning har choragida loyihalarning amalga oshirilishi toʻgʻrisida axborot maʼlumotnomalarini tayyorlasinlar va ularni koʻrib chiqish uchun Oʻzbekiston Respublikasi Prezidenti Devoniga kiritsinlar.

4. Oʻzbekiston Respublikasi Tashqi ishlar vazirligi, Tashqi iqtisodiy aloqalar vazirligi Oʻzbekiston Respublikasining Amerika Qoʻshma Shtatlaridagi elchixonasi hamda Amerika—Oʻzbekiston savdo palatasining oʻzaro hamkorlikka doir quyidagi ustuvor yoʻnalishlar boʻyicha birgalikdagi faoliyatini faollashtirish yuzasidan zarur chora-tadbirlar koʻrsinlar:

elektrenergetika, kimyo, kon qazib olish, metallurgiya sanoati va sanoatning boshqa ustuvor tarmoqlari korxonalarini modernizatsiya qilish va texnika bilan qayta jihozlashga, transport, telekommunikatsiyalar, turizm, taʼlim tizimini rivojlantirishga hamda yirik irrigatsiya inshootlarini rekonstruksiya qilishga Amerikaning energiya va resurslarni tejovchi ilgʻor texnologiyalarini va investitsiyalarini jalb etish;

moliyaviy hamkorlikni, Amerika kompaniyalarining korxonalarni xususiylashtirish va aksiyalashtirish jarayonlaridagi ishtirokini kengaytirish, Qoʻshma korxonalar barpo etishga toʻgʻridan-toʻgʻri investitsiyalarni keng jalb etish;

Oʻzbekiston Respublikasi elchixonasining, shuningdek Oʻzbekiston Respublikasi Tashqi iqtisodiy aloqalar vazirligi “Oʻzekspomarkaz” Respublika savdo-koʻrgazma markazining imkoniyatlaridan faol foydalangan holda Vashington shahrida va Toshkent shahrida Qoʻshma biznes-seminarlar, tahdimotlar, koʻrgazmalar oʻtkazish;

Oʻzbekistonlik talabalarning iqtisodiyot mutaxassisliklari boʻyicha oʻqishini, shuningdek respublika vazirliklari va idoralarining marketing, menejment, real iqtisodiyot va moliya sohasi mutaxassislarining tajriba orttirishini tashkil etish.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S.Azimov va Oʻzbekiston Respublikasi Tashqi ishlar vaziri A. Komilov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2002-yil 4-aprel,

116-son