“Ustoz” Respublika jamgʻarmasi faoliyatini taʼminlash toʻgʻrisida (576-son)

30.12.1997

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Taʼlim-tarbiya va kadrlar tayyorlash tizimini tubdan isloh qilish, barkamol avlodni voyaga yetkazish toʻgʻrisida”gi Farmonini hamda Kadrlar tayyorlash milliy dasturini hayotga tatbiq etish, taʼlim muassasalari, birinchi navbatda oliy taʼlim muassasalari professor-pedagog xodimlari safidan yetuk oʻqituvchilar tayyorlash, ularning rivojlangan, demokratik xorijiy mamlakatlar taʼlimidagi ijobiy tajribalarni oʻrganishi, oʻqitishning yangi pedagogik texnologiyalari bilan tanishishi va chet ellarda tajriba orttirishini qoʻllab-quvvatlash maqsadida Vazirlar Mahkamasi qaror qiladi:

1. “Ustoz” respublika jamgʻarmasi tashkil etilganligi va Adliya vazirligi tomonidan belgilangan tartibda roʻyxatdan oʻtkazilganligi inobatga olinsin.

2. Oʻzbekiston Respublikasi Oliy va oʻrta maxsus taʼlim vazirligi, Xalq taʼlimi vazirligi, Tashqi ishlar vazirligi, Tashqi iqtisodiy aloqalar vazirligi, Fanlar akademiyasi, Fan va texnika davlat qoʻmitasi, Oʻzbekiston banklar uyushmasi, vazirliklar va idoralar, kompaniyalar, qoʻshma korxonalar, jamgʻarmalar, oliy oʻquv yurtlari va boshqa tashkilotlarning “Ustoz” respublika jamgʻarmasi muassislari sifatida ishtirok etishlari eʼtiborga olinsin (1-ilova) hamda ularning Jamgʻarmaga moliyaviy, moddiy-texnikaviy yordam koʻrsatish haqidagi takliflari qoʻllab-quvvatlansin.

Jamgʻarma barcha yuridik va jismoniy shaxslar, shu jumladan, xorijiy tashkilotlar, uyushmalar, jamgʻarmalar va fuqarolar uchun ochiq deb eʼlon qilingani maʼqullansin.

3. “Ustoz” respublika jamgʻarmasining boshqaruv tarkibi 2-ilovaga*, Jamgʻarmaning Nizomi va uning tuzilmasi 3 — 4-ilovalarga muvofiq maʼqullansin.

* 2-ilova berilmaydi.

4. Quyidagilar “Ustoz” respublika jamgʻarmasi faoliyatining asosiy yoʻnalishlari etib belgilansin:

Oʻzbekiston Respublikasi ijtimoiy-iqtisodiy hayotining ustuvor yoʻnalishlari boʻyicha taʼlim muassasalari, birinchi navbatda oliy taʼlim tizimi professor-pedagog xodimlari safidan yetuk oʻqituvchi kadrlar tayyorlashga koʻmaklashish;

iqtidorli yosh pedagoglarni aniqlash, ularning qobiliyati, ijodiy salohiyatlarini rivojlantirish, kasb malakasini yuksaltirish, rivojlangan demokratik davlatlarning yetuk oʻquv yurtlarida va markazlarida tajriba orttirishiga koʻmaklashish;

professor-pedagog kadrlarni xorijiy taʼlim muassasalarida malaka oshirishga yuborish maqsadida tanlovlar oʻtkazish;

xorijda malaka oshirayotgan va tajriba orttirayotgan professor-pedagoglarning taʼlim olish jarayoni, shuningdek, oʻqishdan keyingi mehnat faoliyati monitoringini olib borish, ularning ilmiy-pedagogik salohiyatidan samarali foydalanishga koʻmaklashish;

Jamgʻarmaning Kadrlar tayyorlash milliy dasturini amalga oshirishni jadallashtirishga qaratilgan mukofotlarini taʼsis etish;

professor-pedagog va oʻqituvchilarning malakasini oshirish maqsadida homiylar, shu jumladan, xalqaro tashkilotlar va jamgʻarmalar bilan oʻzaro hamkorlik aloqalarini rivojlantirish, ichki hamda chet ellik sarmoyadorlarning investitsiyalarini yuqori malakali professor-pedagog va oʻqituvchi kadrlar tayyorlashga jalb qilish;

taʼlimga doir xalqaro loyiha va dasturlarda ishtirok etish, uzluksiz taʼlim va kadrlar tayyorlash tizimiga rivojlangan demokratik mamlakatlar taʼlim tizimining ilgʻor tajribalarini yoyish.

5. Oliy va oʻrta maxsus taʼlim vazirligi, Xalq taʼlimi vazirligi, Tashqi ishlar vazirligi, Tashqi iqtisodiy aloqalar vazirligi va Oʻzbekiston xorijiy mamlakatlar bilan doʻstlik va madaniy-maʼrifiy aloqalar jamiyatlari Kengashi:

rivojlangan demokratik mamlakatlarning taʼlim tizimidagi ijobiy tajribalari oʻrganiladigan chet el taʼlim muassasalari va markazlarini aniqlashda Jamgʻarmaga koʻmaklashsinlar;

chet elda bilim olayotgan va malaka oshirayotgan professor-pedagog kadrlarni Oʻzbekiston Respublikasining ijtimoiy-siyosiy va iqtisodiy hayotiga oid zarur axborot manbalari bilan uzluksiz taʼminlasinlar.

6. Moliya vazirligi Vazirlar Mahkamasining zaxira jamgʻarmasidan Jamgʻarma faoliyatini tashkil etish uchun 25 mln. soʻm mablagʻ ajratsin.

7. Pul-kredit siyosati boʻyicha Respublika komissiyasi Jamgʻarma faoliyatini amalga oshirishga yoʻnaltirilgan mablagʻlar konvertatsiyasini ustuvor tarzda taʼminlasin (matbuotda berilmaydi).

8. Oʻzbekiston Respublikasi Prezidenti huzuridagi Davlat va jamiyat qurilishi akademiyasi Jamgʻarmani oʻz binosiga joylashtirsin hamda kompyuter texnikasi va ofis jihozlari bilan taʼminlasin.

9. Oʻzbekiston Teleradiokompaniyasi, ommaviy axborot vositalari Jamgʻarma faoliyatini muntazam yoritib borishni taʼminlasinlar.

10. Oʻzbekiston Pochta va telekommunikatsiyalar agentligi Jamgʻarmani aloqa vositalari, shu jumladan, hukumat aloqasi bilan taʼminlasin.

11. “Toshshaharyoʻlovchitrans” uyushmasi Jamgʻarmaga xizmat koʻrsatish uchun ikkita yengil avtomobil, Oʻzbekiston Respublikasi Moliya vazirligi uning xarajatlari uchun zarur boʻlgan limit ajratsinlar.

12. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A. Azizxoʻjayev zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1997-yil 30-dekabr,

576-son

Vazirlar Mahkamasining 1997-yil 30-dekabrdagi 576-son qaroriga 1-ILOVA

“Ustoz” respublika jamgʻarmasi muassislarining

ROʻYXATI

1. Oliy va oʻrta maxsus taʼlim vazirligi

2. Xalq taʼlimi vazirligi

3. Tashqi ishlar vazirligi

4. Tashqi iqtisodiy aloqalar vazirligi

5. Oʻzbekiston Respublikasi Fanlar akademiyasi

6. Fan va texnika davlat qoʻmitasi

7. Davlat mulkini boshqarish va tadbirkorlikni qoʻllab-quvvatlash davlat qoʻmitasi

8. Davlat va jamiyat qurilishi akademiyasi

9. Oʻzbekiston banklar uyushmasi

10. Tashqi iqtisodiy faoliyat milliy banki

11. Respublika aksiyadorlik-tijorat sanoat-qurilish banki

12. Ixtisoslashtirilgan aksiyadorlik-tijorat “Paxta-bank”

13. Ixtisoslashtirilgan “Asaka” aksiyadorlik-tijorat banki

14. “Oʻzbekyengilsanoat” davlat uyushmasi

15. “Oʻzavtosanoat” uyushmasi

16. “Oʻzkimyosanoat” uyushmasi

17. “Oʻzbekneftgaz” milliy korporatsiyasi

18. “Oʻzbekiston havo yoʻllari” milliy aviakompaniyasi

19. “Oʻzbekturizm” milliy kompaniyasi

20. “Oʻzbekinvest” eksport-import milliy sugʻurta kompaniyasi

21. Olmaliq kon-metallurgiya kombinati

22. “Qizilqumnodirmetalloltin” davlat konserni

23. Toshkent aviatsiya ishlab chiqarish birlashmasi

24. “Oʻzbektelekom” konserni

25. “Zarafshon-Nyumont” Oʻzbekiston — Amerika qoʻshma korxonasi

26. “Oʻzplastital” Oʻzbekiston — Italiya qoʻshma korxonasi

27. “Oʻzdunrobita” Oʻzbekiston — Amerika qoʻshma korxonasi

28. “OʻzDEUavto” Oʻzbekiston — Koreya qoʻshma korxonasi

29. “Biznes-fond”

30. Jahon iqtisodiyoti va diplomatiya universiteti

31. Toshkent davlat universiteti

32. Toshkent davlat iqtisodiyot universiteti

33. Toshkent davlat texnika universiteti

34. Oʻzbekiston davlat jahon tillari universiteti

35. Qoraqalpogʻiston davlat universiteti

36. Samarqand davlat universiteti

37. Fargʻona davlat universiteti

Ushbu roʻyxat, mulkchilik shakllaridan qatʼi nazar, “Ustoz” jamgʻarmasiga muassis va homiy boʻlish istagini bildirgan korxonalar, tashkilotlar va muassasalar, jumladan, xorijiy korxonalar va tashkilotlar bilan toʻldirilishi mumkin.

Vazirlar Mahkamasining 1997-yil 30-dekabrdagi 576-son qaroriga 3-ILOVA

“Ustoz” respublika jamgʻarmasi

NIZOMI

I. UMUMIY QOIDALAR

1. “Ustoz” respublika jamgʻarmasi (keyingi oʻrinlarda Jamgʻarma deb ataladi) Oʻzbekiston Respublikasi Prezidentining “Taʼlim-tarbiya va kadrlar tayyorlash tizimini tubdan isloh qilish, barkamol avlodni voyaga yetkazish toʻgʻrisida”gi Farmoniga muvofiq tashkil etilgan boʻlib, taʼlim muassasalari, birinchi navbatda, oliy taʼlim muassasalari professor-pedagog xodimlari safidan yetuk oʻqituvchi kadrlar tayyorlash, ularning rivojlangan xorijiy mamlakatlar taʼlimidagi ijobiy tajribalarni oʻrganishi, oʻqitishning yangi pedagogik texnologiyalari bilan tanishishi va chet ellarda tajriba orttirishini taʼminlash maqsadini koʻzda tutgan notijorat xayriya jamgʻarmasi hisoblanadi.

2. Jamgʻarma oʻz faoliyatini Oʻzbekiston Respublikasi Konstitutsiyasiga, qonunlariga, Oʻzbekiston Respublikasi Prezidentining farmonlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, shuningdek, mazkur Nizomga muvofiq amalga oshiradi.

3. Jamgʻarma yuridik shaxs hisoblanadi, oʻz nomi yozilgan muhrga, shtamplarga, blanklarga va belgilangan tartibda roʻyxatdan oʻtkazilgan boshqa rekvizitlarga ega boʻladi hamda banklarda oʻz hisob raqamini ochadi.

4. Jamgʻarma muassislarning ixtiyoriy badallari hisobiga mablagʻ bilan taʼminlanadi va oʻz faoliyatini amalga oshiradi.

5. Jamgʻarmaning manzili — Oʻzbekiston Respublikasi, Toshkent shahri, Oʻzbekiston shoh koʻchasi, 45-uy.

II. JAMGʻARMANING MAQSADI VA VAZIFALARI

Jamgʻarmaning maqsadi va vazifalari quyidagilardan iborat:

Kadrlar tayyorlash milliy dasturiga muvofiq Oʻzbekiston ijtimoiy-iqtisodiy hayotining ustuvor yoʻnalishlari boʻyicha taʼlim muassasalari, birinchi navbatda, oliy taʼlim muassasalari professor-pedagog xodimlari safidan yetuk oʻqituvchi kadrlar tayyorlashga koʻmaklashish, shu maqsadda taʼlim tizimi professor-pedagoglarining rivojlangan demokratik mamlakatlar taʼlimidagi ijobiy tajribalar, oʻqitishning yangi pedagogik texnologiyalarini oʻrganishini va chet ellarda malaka oshirishini tashkil qilish va taʼminlash;

oliy, oʻrta maxsus, kasb-hunar taʼlim muassasalari uchun professor-oʻqituvchi kadrlarni chet eldagi yetakchi oʻquv va ilmiy markazlarda tayyorlash va ularning malakasini oshirish dasturlarini ishlab chiqish va amalga oshirish;

iqtidorli yosh pedagoglarni aniqlash, ularning qobiliyati, ijodiy salohiyatlarini rivojlantirish maqsadida kasb malakasini yuksaltirishga koʻmaklashish;

professor-pedagog kadrlarni xorijiy taʼlim muassasalarida malaka oshirishga yuborish maqsadida tanlovlar oʻtkazish;

xorijda malaka oshirayotgan va tajriba orttirayotgan professor-pedagoglarning taʼlim olish jarayoni, shuningdek, oʻqishdan keyingi mehnat faoliyati monitoringini olib borish, ularning ilmiy-pedagogik salohiyatidan samarali foydalanishga koʻmaklashish;

Jamgʻarmaning Kadrlar tayyorlash milliy dasturini amalga oshirishni jadallashtirishga qaratilgan mukofotlarini taʼsis etish;

pedagogik faoliyatning ijtimoiy maqomi va obroʻ-eʼtiborini oshirish borasida faoliyat koʻrsatish, chunonchi, “Yilning eng yaxshi tarbiyachisi”, “Yilning eng yaxshi oʻqituvchisi”, “Yilning eng yaxshi ilmiy rahbari” kabi Jamgʻarma sovrindorlarini aniqlash uchun koʻrik-tanlovlarni tayyorlash va oʻtkazish;

Professor-pedagog va oʻqituvchilarning malakasini oshirish maqsadida homiylar, shu jumladan, xalqaro tashkilotlar va jamgʻarmalar bilan oʻzaro hamkorlik aloqalarini rivojlantirish, ichki hamda chet ellik sarmoyadorlarning investitsiyalarini yuqori malakali professor-pedagog va oʻqituvchi kadrlar tayyorlashga jalb qilish;

taʼlimga doir xalqaro loyiha va dasturlarda ishtirok etish;

uzluksiz taʼlim va kadrlar tayyorlash tizimiga rivojlangan demokratik mamlakatlar taʼlim tizimining ilgʻor tajribalarini yoyish;

taʼlimni axborot bilan taʼminlash tizimini rivojlantirish, uzluksiz taʼlim tizimini jahon axborot tarmogʻi bilan ilgʻor axborot texnologiyalari asosida bogʻlashga koʻmaklashish, Kadrlar tayyorlash milliy dasturini amalga oshirish jarayonini qoʻllab-quvvatlash maqsadida yuqori malakali chet el mutaxassislarini jalb qilish;

Oʻzbekistonlik yetakchi professor-pedagoglar, olimlar va mutaxassislarning oʻquv-uslubiy, ilmiy asarlarini nashr etishga koʻmaklashish.

Jamgʻarma oʻqituvchi, professor-pedagog xodimlarning chet ellardagi yetakchi oʻquv muassasalari va markazlarida tajriba orttirishlariga oid dasturlar, loyihalar tuzadi, ularni shu maqsadda jamlangan mablagʻlar hisobiga amalga oshiradi.

III. MALAKA OShIRISh ShAKLLARI VA MUDDATLARI

Jamgʻarma yoʻllanmasi boʻyicha professor-pedagoglarni malakasini oshirish quyidagi shaklda olib boriladi:

professor-pedagoglarni qayta tayyorlash (6 oygacha);

malaka oshirish (3 oygacha);

tajriba almashish (2 oygacha).

IV. JAMGʻARMA GRANTLARINI OLISh TANLOVI TARTIBI

1. “Ustoz” jamgʻarmasi Oʻzbekiston Respublikasi taʼlim tizimidagi professor-pedagoglarning rivojlangan demokratik mamlakatlar taʼlimidagi ijobiy tajribalarni, oʻqitishning yangi pedagogik texnologiyalarini oʻrganishi, chet ellarda malaka oshirish va mutaxassislarni qayta tayyorlash boʻyicha tanlovlarni tashkil etadi hamda ular haqidagi axborotlarni matbuotda muntazam ravishda eʼlon qilib boradi.

Tanlov gʻoliblarining Jamgʻarma grantlari boʻyicha xorijiy mamlakatlarda malaka oshirishi (qayta tayyorlash) shartnoma asosida olib boriladi.

Tanlovning asosiy maqsadi obyektivlik, oshkoralik, keng qamrovlilikni taʼminlash, jamoatchilikning fikrini inobatga olgan holda vatanparvar, yuqori malakali, madaniyatli, jiddiy ilmiy talablarga javob bera oladigan, oʻz sohasining yetuk mutaxassislarini saralab olishdan iborat.

2. “Ustoz” jamgʻarmasi grantlarini olish tanlovlarida Oʻzbekiston fuqaroligiga ega boʻlgan, oliy maʼlumotli, taʼlim muassasalarining, birinchi navbatda oliy taʼlim muassasalarining quyidagi tanlov mezonlariga munosib boʻlgan professor-pedagoglari va xodimlari ishtirok etishlari mumkin:

tanlagan mutaxassisligi boʻyicha 5 yildan kam boʻlmagan uzluksiz mehnat tajribasiga ega boʻlgan va oʻz sohasini mukammal oʻzlashtirgan pedagoglar;

uzluksiz taʼlim sohasining tashabbuskori va ijodkorlari, yilning eng yaxshi oʻqituvchisi, yilning eng yaxshi tarbiyachisi, yilning eng yaxshi ilmiy rahbari kabi respublika va viloyatlar koʻrik-tanlovlari gʻoliblari;

ilmiy-uslubiy sohada izlanuvchan, uslubiy tavsiyalar, dasturlar, qoʻllanmalar, darsliklar, maqolalar, ixtirolar, yangi pedagogik texnologiyalarning mualliflari, taʼlim-tarbiya sohasida doktorlik ilmiy izlanishi olib borayotgan pedagog-xodimlar;

yuqori saviyada ijtimoiy-siyosiy, huquqiy, iqtisodiy bilimlarga ega boʻlgan pedagog-xodimlar;

oʻz sohasida xorijiy ilgʻor tajribalarni oʻrganishga istak bildirgan va shu mamlakat tilini biladigan, sogʻlom, vatanparvar, yuksak milliy madaniyat sohiblari.

3. Tanlovga quyidagi hujjatlar topshiriladi:

tanlov komissiyasi nomiga ariza;

oʻquv muassasasi tavsiyanomasi;

taʼlim, ilmiy daraja va unvonlar toʻgʻrisidagi hujjatlarning tasdiqlangan nusxalari;

mazkur hujjatlarning xorijiy taʼlim olib boriladigan tildagi tarjimasi;

chop etilgan uslubiy tavsiyalar, darsliklar, oʻquv qoʻllanmalari, ilmiy asarlar va ixtirolar roʻyxati;

rasmiy anketa;

mehnat daftarchasidan koʻchirma;

tibbiy maʼlumotnoma;

fotosurat;

yuqori malaka mutaxassisligini belgilaydigan boshqa hujjatlar.

4. Tanlov ikki bosqichda oʻtkaziladi.

Birinchi bosqich Respublika Oliy va oʻrta maxsus taʼlim vazirligi va Qoraqalpogʻiston Respublikasi Vazirlar Kengashi, Toshkent shahar va viloyatlar hokimliklari hamkorligida tashkil etiladigan joylardagi tanlov komissiyalari tomonidan amalga oshiriladi. Komissiya tarkibiga “Ustoz” jamgʻarmasi vakili kiritiladi.

Komissiya tanlovda qatnashish istagini bildirgan pedagoglar, tarbiyachilar va professor-oʻqituvchilarning hujjatlarini oʻquv muassasalari tavsiyasiga asosan qabul qiladi va tanlovni tashkil etadi.

Tanlovning mazkur bosqichi yuqorida keltirilgan mezonlar boʻyicha tuzilgan maxsus testlar asosida amalga oshiriladi.

Ikkinchi bosqich “Ustoz” jamgʻarmasi huzuridagi markaziy tanlov komissiyasi tomonidan amalga oshiriladi va sohalar yoʻnalishlari boʻyicha hamda chet tili boʻyicha sinov-suhbatlar shaklida tashkil etiladi.

Markaziy tanlov komissiyasi tarkibi Kadrlar tayyorlash milliy dasturini amalga oshirish Respublika komissiyasi bilan kelishilgan holda tasdiqlanadi.

5. Tanlovlar “Ustoz” jamgʻarmasi boshqaruvi tasdiqlagan jadval asosida amalga oshiriladi.

6. Tanlov bosqichlaridan muvaffaqiyatli oʻtgan nomzodlar oʻz sohalari va toifalariga muvofiq “Ustoz” jamgʻarmasi rejasi asosida xorijga borishga yoʻllanmalar oladilar.

7. “Ustoz” jamgʻarmasi tanlovidan oʻtgan va oʻqishga jalb etilgan nomzodlarning asosiy ish joylaridagi lavozimlari va maoshlari saqlanib qoladi.

V. JAMGʻARMANING HUQUQLARI

Jamgʻarma quyidagi huquqlarga egadir:

1. Oʻzbekiston Respublikasi hududida va xorijiy mamlakatlarda oʻz nomidan yuridik va jismoniy shaxslar bilan oʻz vakolati doirasida shartnomalar va boshqa yuridik hujjatlar tuzish.

2. Nizom maqsadlari doirasida respublika hududida va uning tashqarisida koʻrgazmalar, konferensiyalar va boshqa tadbirlar majmuini tayyorlash va oʻtkazish.

3. Oʻzbekiston Respublikasining qonunlariga rioya qilgan holda, Nizom maqsadlarini bajarish uchun zarur boʻlgan taʼlim sohasida xizmatlar koʻrsatishni uyushtiradigan kichik va qoʻshma korxonalar, markazlar taʼsischisi boʻlish.

4. Mavjud qonunchilik doirasida noshirlik faoliyatini amalga oshirish.

5. Nizom maqsadlarini bajarish uchun Oʻzbekiston Respublikasining amaldagi qonunchiligi bilan taqiqlanmagan va Nizomga zid boʻlmagan tashqi iqtisodiy faoliyat va boshqa faoliyatlarni amalga oshirish.

VI. JAMGʻARMANING BOShQARUV ORGANI

1. Jamgʻarmaning rahbar organi Boshqaruv boʻlib, u Kadrlar tayyorlash milliy dasturini amalga oshirish Respublika komissiyasiga hisobot beradi.

2. Boshqaruv Jamgʻarmaning hayʼat organi boʻlib, uning tarkibi va raisi Oʻzbekiston Respublikasi Vazirlar Mahkamasi tomonidan tasdiqlanadi. Boshqaruv yigʻilishlariga Rais rahbarlik qiladi.

Rais oʻz faoliyatini jamoatchilik asosida amalga oshiradi.

Boshqaruv yigʻilishlari zaruriyatga koʻra (kamida 6 oyda bir marta) oʻtkaziladi, Boshqaruv qarorlari Rais imzosi bilan rasmiylashtiriladi.

Boshqaruvning vazifalari doirasiga quyidagilar kiradi:

Jamgʻarma faoliyatining uning maqsadlariga doir yoʻnalishlarini ishlab chiqish va nazorat qilish;

yetakchi professor-oʻqituvchi kadrlar tayyorlash maqsadida rivojlangan demokratik davlatlardagi ilgʻor taʼlim muassasalari va markazlarini aniqlash hamda ular bilan hamkorlik munosabatlarini oʻrnatish;

Jamgʻarma homiylari bilan aloqalar oʻrnatish va hamkorlik qilish, moliyaviy mablagʻlar, shuningdek, chet el investitsiyalarini izlab topish va yuqori malakali chet el mutaxassislarini yetakchi professor-pedagog va oʻqituvchi kadrlarni tayyorlash jarayoniga jalb etish;

Jamgʻarma grantlarining har yillik sonini belgilash hamda ularni taqsimlash, Markaziy tanlov komissiyasi tarkibini tasdiqlash;

joylardagi Jamgʻarma tanlov komissiyalari faoliyatini tashkil etish va muvofiqlashtirish;

chet ellarda malakasini oshirgan hamda qayta tayyorlangan professor-pedagoglar va oʻqituvchilarning mehnat faoliyati monitoringini olib borish;

ijro etuvchi direktor tomonidan taqdim qilingan Jamgʻarma faoliyatining har yillik rejalarini tasdiqlash;

Jamgʻarmaning yillik hisobotini muhokama qilish va tasdiqlash.

3. Oʻzbekiston Respublikasi Vazirlar Mahkamasi tomonidan tayinlanadigan Rais oʻrinbosari — ijro etuvchi direktor Jamgʻarmaning joriy faoliyati bilan bogʻliq boʻlgan barcha masalalarni amalga oshirishga rahbarlik qiladi.

Ijro etuvchi direktor vazifalari doirasiga quyidagilar kiradi:

Jamgʻarma faoliyatining uning maqsadlari asosida belgilangan yoʻnalishlarini amalga oshirish;

Boshqaruv qarorlarini hayotga tatbiq etish;

respublika mintaqalari boʻyicha chet el tajribalarini oʻrganishga va malakasini oshirishga munosib professor-pedagog kadrlarni aniqlashga doir tanlovlarni tashkil qilish va natijalarini umumlashtirish;

tanlov natijasida belgilangan Jamgʻarma grantlari boʻyicha grant sovrindori bilan chet davlatda malaka oshirish (qayta tayyorlash) yuzasidan shartnoma tuzish va uning bajarilishini taʼminlash;

Jamgʻarma vazifalarini amalga oshirish uchun yetakchi mutaxassislardan iborat ishchi va ekspert guruhlarini tashkil etish va ularning faoliyatini taʼminlash;

taʼlimning ustuvor yoʻnalishlari boʻyicha tajriba orttirayotgan va malaka oshirayotgan professor-oʻqituvchilarning xizmat va ijtimoiy faoliyatlariga doir monitoringni amalga oshirish, ular bilan doimiy aloqada boʻlish.

4. Ijro etuvchi direktor Jamgʻarma xodimlarining ishini tashkil qiladi va boshqaradi, Jamgʻarma nomidan faoliyat koʻrsatadi, shu jumladan, uning moliyaviy-xoʻjalik ishlarini amalga oshiradi, Jamgʻarma nomidan bitimlar tuzadi, Jamgʻarma xodimlari bajarishi majburiy boʻlgan buyruqlar chiqaradi va koʻrsatmalar beradi. Ijro etuvchi direktor Jamgʻarmaning Nizom doirasidagi barcha faoliyati uchun masʼuldir.

5. Jamgʻarmaning ijro etuvchi direktori maqomiga koʻra, mehnatga haq toʻlash, ijtimoiy-maishiy, tibbiy va transport xizmati koʻrsatish sharoitlari boʻyicha vazirning birinchi oʻrinbosariga, ijro etuvchi direktor oʻrinbosari esa vazir oʻrinbosariga tenglashtiriladi.

VII. JAMGʻARMANING MOL-MULKI VA MOLIYAVIY MABLAGʻLARI

1. Jamgʻarmaning mol-mulki asosiy fondlar (binolar, inshootlar, asbob-uskunalar, transport vositalari va shu kabilar)dan, aylanma mablagʻlardan, shuningdek, mablagʻ bilan taʼminlashning barcha manbalari hisobiga olingan moliyaviy resurslar va boshqa moddiy boyliklardan iborat boʻladi.

Jamgʻarma mol-mulkining qiymati uning mustaqil balansida aks ettiriladi.

2. Jamgʻarma mablagʻlari:

Jamgʻarmaning Nizomdagi faoliyatini amalga oshirish uchun zarur boʻlgan budjet ajratmalari;

muassislar ajratmalari;

xayriya, homiylik tushumlari, xolisona tushumlar, shu jumladan, chet el investitsiyalari, grantlari va boshqa Oʻzbekiston Respublikasi qonun hujjatlari bilan taqiqlanmagan mablagʻlari hisobiga shakllanadi.

3. Jamgʻarmaning xayriya, homiylik tushumlari va xolisona tushumlar hisobiga sotib olgan mol-mulklari, chet el investitsiyalari, grantlari Jamgʻarmaning oʻz mulki hisoblanadi.

4. Jamgʻarma asosiy fondlarni va boshqa moddiy boyliklarni qonunchilikda belgilangan tartibda tasarruf etadi.

5. Jamgʻarma oʻz majburiyatlari boʻyicha oʻziga biriktirilgan, amaldagi qonunchilikka muvofiq toʻlov undirib olinishi mumkin boʻlgan mol-mulk bilan javob beradi.

VIII. HISOB VA HISOBOT

Jamgʻarma oʻz faoliyati natijalarini amaldagi qonun va qoidalarga binoan tezkorlik bilan tahlil qiladi va buxgalteriya hisobini amalga oshiradi, hisobot maʼlumotlari va balans hisob-kitoblarining ishonchliligini taʼminlaydi.

IX. JAMGʻARMA FAOLIYATINI TOʻXTATISh VA QAYTA TAShKIL ETISh

Jamgʻarma faoliyatini toʻxtatish yoki qayta tashkil qilish Oʻzbekiston Respublikasi Prezidentining Farmoniga yoki Oʻzbekiston Respublikasining qonunlariga binoan amalga oshiriladi.

Vazirlar Mahkamasining 1997-yil 30-dekabrdagi 576-son qaroriga 4-ILOVA

“Ustoz” respublika jamgʻarmasi

TUZILMASI