Toshkent viloyatining Ohangaron shahri va Ohangaron tumanining chegaralarini oʻzgartirish, shuningdek Ohangaron shahrini viloyat boʻysunuvidagi shaharlar turkumiga kiritish toʻgʻrisida (1051-III-son)

18.08.2017

Oʻzbekiston Respublikasi Oliy Majlisi Qonunchilik palatasining

Qarori

Oʻzbekiston Respublikasi Konstitutsiyasining 78-moddasi hamda “Oʻzbekiston Respublikasida maʼmuriy-hududiy tuzilish masalalarini hal etish tartibi toʻgʻrisida”gi Oʻzbekiston Respublikasi Qonunining 5 va 10-moddalariga muvofiq, Oʻzbekiston Respublikasi Oliy Majlisining Qonunchilik palatasi qaror qiladi:

1. Oʻzbekiston Respublikasi Vazirlar Mahkamasining taklifi qabul qilinib:

Toshkent viloyatining Ohangaron shahri va Ohangaron tumanining chegaralari oʻzgartirilsin hamda Ohangaron tumani hududi 316933,0 gektar va Ohangaron shahri hududi 1784,0 gektar etib belgilansin;

Ohangaron shahri viloyat boʻysunuvidagi shaharlar turkumiga kiritilsin.

2. Belgilab qoʻyilsinki, Toshkent viloyatining Ohangaron shahri tarkibiga oʻtkazilayotgan Ohangaron tumani saylov okruglaridan (6, 7, 8, 9, 10, 11, 12 va 13-sonli) saylangan xalq deputatlari Ohangaron tuman Kengashining deputatlari xalq deputatlari Ohangaron shahar Kengashining deputatlari hisoblanadi.

3. Toshkent viloyati Ohangaron shahri chegarasining tavsifi va grafik chizmasi hamda Ohangaron tumani chegarasining grafik chizmasi Oʻzbekiston Respublikasi Vazirlar Mahkamasi tomonidan taqdim etilgan 1 — 3-ilovalarga* muvofiq tasdiqlansin.

* 1 — 3-ilovalar berilmaydi.

4. Oʻzbekiston Respublikasi Vazirlar Mahkamasi ushbu Qarorning ijrosi boʻyicha kompleks chora-tadbirlar amalga oshirilishini taʼminlasin.

5. Ushbu Qaror Oʻzbekiston Respublikasi Oliy Majlisi Senatiga yuborilsin.

6. Ushbu Qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Qonunchilik palatasining Spikeri N. ISMOILOV

Toshkent sh.,

2017-yil 18-avgust,

1051-III-son