Jahon banki ishtirokida “Elektr energetika sektorini transformatsiya qilish va barqaror elektr uzatish” loyihasini amalga oshirish hamda respublika magistral elektr tarmoqlari tizimini rivojlantirish va uning samaradorligini oshirish chora-tadbirlari toʻgʻrisida (PQ-113-son)

03.02.2022

Oʻzbekiston Respublikasi Prezidentining

Qarori

Respublika magistral elektr tarmoqlari tizimini rivojlantirish, uning ishonchliligi va xavfsizligini oshirish, tizimli avariyalarning oldini olish, shuningdek, iqtisodiyot tarmoqlari va aholini elektr energiyasi bilan barqaror taʼminlash maqsadida:

1. Quyidagilar:

a) Jahon bankining direktorlar kengashi tomonidan 2021-yil 25-iyunda “Elektr energetika sektorini transformatsiya qilish va barqaror elektr uzatish” loyihasining quyidagi komponentlari (keyingi oʻrinlarda — Jahon banki loyihalari):

“Dispetcherlik boshqaruvi va maʼlumotlarni yigʻish dasturiy-apparat kompleksini (SCADA) joriy qilish”;

“Jahon banki ishtirokida magistral elektr tarmoqlari podstansiyalarini modernizatsiya va rekonstruksiya qilish (II-faza)”;

“Yangi 500 kV kuchlanishli “Halqa” nimstansiyasi va 220, 500 kV kuchlanishli havo elektr uzatish tarmoqlarini qurish”;

“Oʻzbekiston milliy elektr tarmoqlari” AJ resurslarini boshqarishning avtomatlashtirilgan tizimini (ERP) joriy etish” investitsiya loyihalarini Xalqaro taraqqiyot uyushmasining 330 mln AQSH dollariga teng imtiyozli va 50 mln AQSH dollariga teng imtiyozsiz kreditlari, Yashil iqlim jamgʻarmasining 43 mln AQSH dollariga teng imtiyozli krediti va 4 mln AQSH dollariga teng grant mablagʻlari hisobiga moliyalashtirishga kelishilganligi;

b) “Oʻzbekiston milliy elektr tarmoqlari” AJ (keyingi oʻrinlarda — OʻMET) hamda Yevropa tiklanish va taraqqiyot banki oʻrtasida 2021-yil 6-oktabrda “130 km uzunlikdagi 500 kVli Sarimoy (Xorazm viloyati) — Jonkeldi (Buxoro viloyati) yuqori kuchlanishli elektr uzatish tarmogʻini qurish” investitsiya loyihasini moliyalashtirish uchun davlat kafolatisiz korporativ kredit ajratilishi boʻyicha mandat xati imzolanganligi maʼlumot uchun qabul qilinsin.

2. Yagona energetika tizimining mustahkam va barqaror ishlashini taʼminlash, operativ-dispetcherlik boshqaruvi jarayonlarida inson omili bilan bogʻliq xavf-xatarlarni qisqartirish va tizimli avariyalarning oldini olish hamda elektr energiyasining texnologik sarfini kamaytirish orqali uni transportirovka qilish sarf-xarajatlarini qisqartirish maqsadida amalga oshirilayotgan:

“Dispetcherlik boshqaruvi va maʼlumotlarni yigʻish dasturiy-apparat kompleksini (SCADA) joriy qilish” investitsiya loyihasining asosiy texnik-iqtisodiy koʻrsatkichlari 1-ilovaga muvofiq;

“Jahon banki ishtirokida magistral elektr tarmoqlari podstansiyalarini modernizatsiya va rekonstruksiya qilish (II faza)” investitsiya loyihasining asosiy texnik-iqtisodiy koʻrsatkichlari 2-ilovaga muvofiq tasdiqlansin.

Bunda quyidagilar:

yagona elektr energetikasi tizimini, shu jumladan elektr tarmoqlari boʻyicha elektr energiyasi oqimini tezkor boshqarishning zamonaviy, avtomatlashtirilgan tizimi joriy etilishi hisobiga energetika tizimi uzluksiz va barqaror ishlashi taʼminlanishi;

22 ta podstansiyada jismonan va maʼnan eskirgan elektr uskunalar va jihozlarni yangisiga almashtirish, shu jumladan 10 ta podstansiyada 20 ta jamlanma yangi kuch transformatorlari va avtotransformatorlarni oʻrnatish orqali podstansiyalar quvvatining 912,7 MVAga oshirilishi;

uskunalarni mukammal taʼmirlash xarajatlarini va transformatorlar oʻz ehtiyoji uchun sarflanadigan elektr energiyasi hajmini oʻrtacha yillik 14,2 mln AQSH dollariga teng miqdorda kamaytirishga erishilishi maʼlumot uchun qabul qilinsin.

3. Moliya vazirligi Investitsiyalar va tashqi savdo vazirligi va OʻMET bilan birgalikda 2022-yil 1-martga qadar “Elektr energetika sektorini transformatsiya qilish va barqaror elektr uzatish” loyihasini moliyalashtirish boʻyicha Jahon banki bilan qarz bitimi imzolanishini taʼminlasin.

4. Moliya vaziriga xalqaro moliya institutlarining kreditlaridan foydalanish va oʻz vaqtida qaytarish boʻyicha Oʻzbekiston Respublikasi va OʻMET oʻrtasida qayta kreditlash toʻgʻrisidagi bitimlarni Oʻzbekiston Respublikasi nomidan belgilangan tartibda imzolash vakolati berilsin.

5. Xalqaro moliya institutlarining 3-ilovada keltirilgan loyihalarni amalga oshirish doirasida jalb qilingan kreditlari boʻyicha iqtisod qilinadigan mablagʻlarni, Investitsiyalar va tashqi savdo vazirligi, Moliya vazirligi, Energetika vazirligi va kreditorlar bilan kelishilgan holda, OʻMETning boshqa investitsiya loyihalarini moliyalashtirish uchun yoʻnaltirishga ruxsat berilsin.

6. Energetika vazirligi bir hafta muddatda OʻMET tomonidan amalga oshirilayotgan investitsiya loyihalarining samaradorligini oshirish boʻyicha chora-tadbirlarni tasdiqlash uchun Vazirlar Mahkamasiga kiritsin.

7. Ekologiya va atrof-muhitni muhofaza qilish davlat qoʻmitasi loyiha hujjatlarining belgilangan tartibda davlat ekologiya ekspertizasidan oʻtkazilishini hamda loyihalarni amalga oshirishda tabiatni muhofaza qilishga oid qonunchilik hujjatlari talablariga rioya etilishini taʼminlasin.

8. Energetika vazirligi, Moliya vazirligi va Davlat aktivlarini boshqarish agentligining 4-ilovada koʻrsatilgan “Issiqlik elektr stansiyalari” AJ tarkibidagi korxonalar va “Oʻzbekgidroenergo” AJ tasarrufida boʻlgan 110 — 500 kV kuchlanishli taqsimlovchi qurilmalarni OʻMET tasarrufiga balans (qoldiq) qiymati boʻyicha shtat birliklari bilan birga oʻtkazish toʻgʻrisidagi taklifiga rozilik berilsin.

Bunda, mazkur bandga muvofiq xoʻjalik jamiyatlarining bir tashkilotdan boshqa bir tashkilotga oʻtkazilayotgan mulki va mulkiy huquqlari soliqqa tortishning barcha turlari boʻyicha soliq solish obyekti hisoblanmaydi.

Vazirlar Mahkamasi oʻn kun muddatda ushbu takliflarni amalga oshirish boʻyicha “yoʻl xaritasi”ni tasdiqlasin.

9. Quyidagilarga:

energetika vaziri A.S. Sultanovga — loyiha boʻyicha qurilish-pudrat ishlari tizimli nazorat qilinishini taʼminlash, shuningdek, loyiha doirasida bajarilgan ishlarni doimiy tahlil qilish va aniqlangan kamchiliklarni oʻz vaqtida bartaraf etish;

“Oʻzbekiston milliy elektr tarmoqlari” AJ raisi D.A. Isakulovga — loyiha hujjatlari puxta ishlab chiqilishi, qurilish ishlari oʻz vaqtida va sifatli bajarilishini taʼminlash yuzasidan shaxsiy javobgarlik yuklansin.

10. Mazkur qaror ijrosini muhokama qilib borish, ijro uchun masʼul idoralar faoliyatini muvofiqlashtirish va nazorat qilish Bosh vazir oʻrinbosari J. Qoʻchqorov zimmasiga yuklansin.

Amalga oshirilayotgan chora-tadbirlar natijadorligi yuzasidan har chorak yakunida Oʻzbekiston Respublikasi Prezidentiga axborot berilsin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2022-yil 3-fevral,

PQ-113-son

Oʻzbekiston Respublikasi Prezidentining 2022-yil 3-fevraldagi PQ-113-son qaroriga 1-ILOVA

“Dispetcherlik boshqaruvi va maʼlumotlarni yigʻish dasturiy-apparat kompleksini (SCADA) joriy qilish” investitsiya loyihasining asosiy texnik-iqtisodiy

KOʻRSATKICHLARI

T/r Koʻrsatkichning nomlanishi Oʻlchov birligi Jami* shu jumladan “Oʻzbekiston milliy elektr tarmoqlari” AJning oʻz mablagʻlari Jahon banki krediti Oʻzbekiston Respublikasi hissasi *** 1 Loyiha umumiy qiymati, shu jumladan:* ming AQSH doll. ekv. 125 000 6 000 115 000 4 000 1.1. Montaj ishlari:SCADA/EMS ming AQSH doll. ekv. 12 745 - 12 745 - 1.2. Telekommunikatsiya tarmogʻi ming AQSH doll. ekv. 86 631 - 86 631 - 1.3. RTU va moslashtirish ishlari ming AQSH doll. ekv. 14 844 - 14 844 - 1.4. Trening va oʻqitish ming AQSH doll. ekv. 780 - 780 - 1.5. Soliq va bojxona imtiyozlari ming AQSH doll. ekv. 4 000 - - 4 000 1.6. Investitsiya davridagi moliyaviy xarajatlar:** ming AQSH doll. ekv. 6 000 6 000 - -

Izoh.

* Investitsiya loyihasining yakuniy qiymati loyiha-smeta hujjatlarini ishlab chiqish hamda tovarlar (ishlar va xizmatlar) yetkazib berish boʻyicha tender savdo natijalari asosida belgilanadi;

** Moliyaviy xarajatlar kreditning haqiqatda ishlatilishi qiymati va sanasidan kelib chiqib oʻzgarishi mumkin;

*** Oʻzbekiston Respublikasining hissasi sifatida hisobga olinadigan soliq va bojxona imtiyozlari.

Oʻzbekiston Respublikasi Prezidentining 2022-yil 3-fevraldagi PQ-113-son qaroriga 2-ILOVA

“Jahon banki ishtirokida magistral elektr tarmoqlari podstansiyalarini modernizatsiya va rekonstruksiya qilish (II faza)” investitsiya loyihasining asosiy texnik-iqtisodiy

KOʻRSATKICHLARI

T/r Koʻrsatkichning nomlanishi Oʻlchov birligi Jami* shu jumladan “Oʻzbekiston milliy elektr tarmoqlari” AJning oʻz mablagʻlari Jahon banki krediti Oʻzbekiston Respublikasi hissasi *** 1. Loyiha umumiy qiymati, shu jumladan:* ming AQSH doll. ekv. 174 839,3 10 032,6 150 160,0 14 646,7 1.1. qurilish-montaj ishlari: ming AQSH doll. ekv. 27 850,2 - 27 850,2 - chet el valyutasida 27 850,2 - 27 850,2 - milliy valyutada - - - - 1.2. mashina va uskunalar: ming AQSH doll. ekv. 122 309,8 - 122 309,8 - chet el valyutasida 122 309,8 - 122 309,8 - milliy valyutada - - - - 1.2.1. shu jumladan: innovatsion texnologiyalarni rivojlantirish uchun ming AQSH doll. ekv. 4 365,7 - 4 365,7 - 1.3. boshqa xarajatlar: ming AQSH doll. ekv. 1 965,4 1 965,4 - - chet el valyutasida 1 965,4 1 965,4 - - milliy valyutada - - - - 1.4. soliq va bojxona imtiyozlari ming AQSH doll. ekv. 14 646,7 - - 14 646,7 chet el valyutasida 14 646,7 - - 14 646,7 milliy valyutada - - - - 1.5. investitsiya davridagi moliyaviy xarajatlar:** ming AQSH doll. ekv. 8 067,2 8 067,2 - - chet el valyutasida 8 067,2 8 067,2 - - milliy valyutada - - - - 2. Loyiha quvvati 22 ta magistral tarmoq podstansiyalarini modernizatsiya qilish, quvvatlarini 912,7 MVAga oshirish

Izoh.

* Investitsiya loyihasining yakuniy qiymati loyiha-smeta hujjatlarini ishlab chiqish hamda tovarlar (ishlar va xizmatlar) yetkazib berish boʻyicha tender savdo natijalari asosida belgilanadi;

** Moliyaviy xarajatlar kreditning haqiqatda ishlatilishi qiymati va sanasidan kelib chiqib oʻzgarishi mumkin;

*** Soliq va bojxona imtiyozlari.

Oʻzbekiston Respublikasi Prezidentining 2022-yil 3-fevraldagi PQ-113-son qaroriga 3-ILOVA

“Oʻzbekiston milliy elektr tarmoqlari” AJning investitsiya loyihalarini moliyalashtirish uchun jalb qilingan va mablagʻlar iqtisod qilinishi kutilayotgan xalqaro moliya institutlarining kreditlari

ROʻYXATI

mln AQSH dollari T/r Loyiha nomi Loyiha quvvati XMI nomi Kredit shartnomasi / qarz bitimi sanasi va raqami umumiy qiymati shundan, iqtisod qilinishi kutilayotgan mablagʻlar 1. Navoiy IESdan 220 kVli “Besopan” oʻchirib-yoqish punktigacha 177 km uzunlikdagi 220 kV boʻlgan elektr uzatish tarmogʻini 500 kV gabaritda qurish HL-220 kV 177 km Yevropa tiklanish va taraqqiyot banki 20.11.2019-y. 50691-son 80,285 25,4* 2. 3x167 MVt boʻlgan ikkita avtotransformatorni oʻrnatish orqali 500/220 kV boʻlgan “Muruntov” nimstansiyasini qurish 500/220 kV 3x167 MVA Yevropa tiklanish va taraqqiyot banki 08.10.2018-y. 50117-son 82,5 29,3* 3. “Respublikasi hududida 500 kVli Gʻuzor-Regar (L-507) elektr uzatish tarmogʻini tiklash” va “Sirdaryo IES”da 220 kVli havo tarmogʻini va 220 kVli “Zafarobod” nimstansiyasini qurish” HL-500 kV 64 km, HL-220 kV 2x140 km Osiyo taraqqiyot banki 12.11.2015-y. 3285-UZB-son 150 31,8 4. Magistral elektr tarmoq podstansiyalarini modernizatsiya va rekonstruksiya qilish (I faza) 22 ta podstansiyadagi 220 va 500 kVli uskunalarni yangilash Jahon banki 20.09.2017-y. MAR 5917-UZ-son, MAR 5916-UZ-son, MBRR 8664-UZ-son 150 25

*Izoh. Ushbu summalar marketing tahlillar natijasida olingan boʻlib, tender savdolari yakuniga koʻra aniqlanadi.

Oʻzbekiston Respublikasi Prezidentining 2022-yil 3-fevraldagi PQ-113-son qaroriga 4-ILOVA

“Issiqlik elektr stansiyalari” AJ tarkibidagi korxonalar va “Oʻzbekgidroenergo” AJ tasarrufida boʻlgan, balans (qoldiq) qiymati boʻyicha “Oʻzbekiston milliy elektr tarmoqlari” AJga oʻtkaziladigan 110 — 500 kV kuchlanishli ochiq taqsimlovchi qurilmalar

ROʻYXATI

T/r Elektr stansiyasi nomi Ochiq taqsimlash qurilmasining kuchlanishi (kV) Issiqlik elektr stansiyalari 1. Sirdaryo IES 500/220 2. Yangi-Angren IES 500/220 3. Toshkent IES 500/220/110 4. Navoiy IES 220/110 5. Tolimarjon IES 500/220 6. Toʻraqoʻrgʻon IES 220 7. Taxiatosh IES 220/110 8. Angren IES 220/110/35 9. Muborak IEM 220 Gidroelektr stansiyalar 10. Chorvoq GES 220 11. Toʻpalang, Zarchob-1,2 GESlari 220/110 12. Xojikent GES 110