“Aloqa-DEU” Oʻzbekiston-Koreya qoʻshma korxonasini rivojlantirish va uning faoliyati masalalari (480-son)

20.10.1997

Oʻzbekiston Respublikasi Vazirlar Mahkamasining

qarori

[Koʻchirma]

Oʻzbekiston Respublikasi telekommunikatsiya tarmogʻini 2010-yilgacha boʻlgan davrda rekonstruksiya qilish va rivojlantirish milliy dasturini bajarish, Oʻzbekiston Respublikasi telekommunikatsiyalar bozorini zamonaviy raqamli kommutatsiya tizimlari bilan toʻldirish, vatanimizning eksportga moʻljallangan va importning oʻrnini bosuvchi sanoat ishlab chiqarishini yanada rivojlantirish maqsadida Vazirlar Mahkamasi qaror qiladi:

1. Quyidagilar:

Oʻzbekiston pochta va telekommunikatsiyalar agentligi va Janubiy Koreyaning “DEU Telekom” firmasi tomonidan telekommunikatsiya asbob-uskunalarini yigʻish boʻyicha, keyinchalik butlovchi materiallarni joyning oʻzida ishlab chiqargan holda, “Aloqa-DEU" (Urganch shahri) qoʻshma korxonasi tashkil etilganligi;

ustav jamgʻarmasi 6,5 mln. AQSH dollari, shu jumladan, Oʻzbekiston tomoni ulushi 3,185 mln. AQSH dollari (49 foiz), Janubiy Koreya tomoni ulushi 3,315 mln. AQSH dollari (51 foiz) miqdorida belgilanganligi;

ishlab chiqarish binolari, inshootlar qurilishi, mahsulot ishlab chiqarish uchun texnologik liniyalarni montaj qilish nihoyasiga yetkazilganligi, mahsulot chiqarish boshlanganligi;

imzolangan taʼsis shartnomasiga muvofiq Koreya tomoni qoʻshma korxona mahsulotining kamida 30 foizini eksportga sotish majburiyatini oʻz zimmasiga olganligi maʼlumot uchun qabul qilinsin.

2. Oʻzbekiston pochta va telekommunikatsiyalar agentligi "Oʻzeltexsanoat" uyushmasi bilan birgalikda 1997-yil IV choragi mobaynida kommutatsiya tizimlari ishlab chiqarishini, 2000-yilda uni 60 foizga yetkazishni nazarda tutgan holda, joyning oʻzida yoʻlga qoʻyish dasturini ishlab chiqsin va uning amalga oshirilishini taʼminlasin.

3. "Aloqa-DEU" qoʻshma korxonasi yetkazib beriladigan kommutatsiya tizimlari va telefon apparatlari turkumiga kiruvchi chetdan olib kelinadigan materiallar, butlovchi buyumlar, yordamchi asbob-uskunalar, ishlab chiqarishni tashkil etish va mahsulot chiqarish uchun zarur boʻlgan texnologik asbob-uskunalar uchun boj toʻlovlari toʻlashdan 5 yilga ozod qilinsin.

5. Oʻzbekiston Respublikasi Makroiqtisodiyot va statistika vazirligi "Aloqa-DEU" qoʻshma korxonasi loyihalarini va butlovchi materiallarni joyning oʻzida ishlab chiqarish dasturlarini Oʻzbekiston Respublikasining 1998-yilgi Investitsiya dasturiga kiritsin.

6. Oʻzbekiston Respublikasi Tashqi ishlar vazirligi, Ichki ishlar vazirligi "Aloqa-DEU" loyihasi boʻyicha ishga keluvchi xorijiy mutaxassislarga belgilangan tartibda koʻp martalik kelish vizalari berilishini taʼminlasinlar.

7. "Aloqa-DEU" qoʻshma korxonasi masalalari boʻyicha ishlash uchun keladigan xorijiy mutaxassislarga Oʻzbekiston Respublikasi hududida yashash va transportning barcha turlarida yurishlari uchun Oʻzbekiston Respublikasi fuqarolari uchun nazarda tutilgan tariflar boʻyicha haq toʻlash huquqi berilsin.

8. Oʻzbekiston Respublikasi Oliy va oʻrta maxsus taʼlim vazirligi "Aloqa-DEU" qoʻshma korxonasini butlash uchun shartnoma asosida kadrlar tayyorlashni taʼminlasin.

9. Xorazm viloyati hokimligi Janubiy Koreyalik mutaxassislar va ular oilasining uzoq muddat yashashlari uchun shart-sharoitlar yaratsin.

10. Mazkur qarorning bajarilishini nazorat qilish Bosh vazir oʻrinbosari K.R.Rahimov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1997-yil 20-oktabr,

480-son