Qoraqalpogʻiston Respublikasini kompleks ijtimoiy-iqtisodiy rivojlantirish boʻyicha belgilangan chora-tadbirlar ijro etilishining borishi toʻgʻrisida (SQ-450-IV-son)

15.12.2021

Oʻzbekiston Respublikasi Oliy Majlisi Senatining

Qarori

Qoraqalpogʻiston Respublikasining ijtimoiy-iqtisodiy va investitsiya salohiyatidan samarali foydalanish, hududda muhandislik- kommunikatsiya, ishlab chiqarish infratuzilmalarini yaxshilash, iqtisodiyot tarmoqlarini barqaror rivojlantirish, shu asosda aholi bandligini taʼminlash va turmush darajasini oshirishga qaratilgan dasturlar hamda loyihalar amalga oshirilmoqda.

Jumladan, Oʻzbekiston Respublikasi Prezidentining 2020-yil 11-noyabrdagi “2020-2023-yillarda Qoraqalpogʻiston Respublikasini kompleks ijtimoiy-iqtisodiy rivojlantirish chora-tadbirlari toʻgʻrisida”gi PQ-4889-sonli qaroriga muvofiq 1 359 ta investitsiya loyihasini amalga oshirish belgilangan boʻlib, hozirda 1 065 ta (78 foiz) loyiha ishga tushirilgan hamda 8 372 ta yangi ish oʻrni tashkil etilgan.

Shuningdek, sharoiti ogʻir toifaga kiritilgan 45 ta mahalla va ovullarda xizmat koʻrsatish sohasida 74 ta yangi tadbirkorlik subyekti tashkil qilingan, barcha mahalla fuqarolar yigʻinlari kompyuter texnikalari va mebel jihozlari bilan taʼminlangan.

Bundan tashqari, Oʻzbekiston Respublikasining xorijiy mamlakatlardagi diplomatik vakolatxonalari tomonidan qiymati 23,9 mln AQSh dollariga teng 11 ta loyiha ishga tushirilgan.

Tijorat banklari tomonidan loyihalar uchun tarmoq jadvallari asosida kredit ajratilishiga erishilgan.

Amalga oshirilgan ishlar bilan birga ayrim muammoli masalalar ham yuzaga kelgan.

Xususan, 2020 — 2023-yillarda Qoraqalpogʻiston Respublikasini kompleks ijtimoiy-iqtisodiy rivojlantirish dasturiga kiritilgan 124 ta loyihani ishga tushirish muddatini uzaytirish zarurati mavjud.

Qoraoʻzak tumanida qiymati 3 mlrd soʻm va Qoʻngʻirot tumanida qiymati 5,5 mlrd soʻm boʻlgan avtomobillarga siqilgan gaz quyish shahobchalarini tashkil etish loyihalariga Energetika vazirligi tomonidan ruxsatnoma taqdim etish muddati kechiktirilmoqda.

Bundan tashqari, Qoraoʻzak tumanida vermikulit qazib olishni kengaytirish va uni chuqur qayta ishlash boʻyicha umumiy qiymati 8,9 mlrd soʻmga teng 3 ta loyiha boʻyicha Davlat geologiya va mineral resurslar qoʻmitasidan litsenziya olish uchun hujjatlar rasmiylashtirilmagan.

Mamlakatimizning xorijiy davlatlardagi vakolatxonalari tomonidan ilgari surilgan qiymati 555,5 mln AQSh dollariga teng boʻlgan 5 ta loyiha boʻyicha ishlar oxiriga yetkazilmagan, 280,3 mln AQSh dollari hajmidagi 13 ta loyiha esa qayta tahlil qilinishi lozim.

“Janubiy Qoraqalpogʻistonda suv resurslarini boshqarishni yaxshilash” loyihasi boʻyicha joriy yilda rejalashtirilgan 56,2 mln AQSh dollari hajmidagi kredit mablagʻlarning atigi 21,32 mln AQSh dollari (38 foiz) oʻzlashtirilgan.

“Oʻzbekistonning gʻarbiy qismida ichimlik suv taʼminoti tizimlarini rivojlantirish” loyihasi boʻyicha Nukus, Beruniy, Moʻynoq, Qoʻngʻirot, Qoraoʻzak va Amudaryo tumanlaridagi suv inshootlarini qurish hamda rekonstruksiya ishlari uchun joriy yilda oʻzlashtirilishi rejalashtirilgan 21,9 mln AQSh dollariga teng mablagʻning 1,7 mln AQSh dollari (8 foizi) oʻzlashtirilgan xolos.

“Oʻzbekiston Respublikasi Oliy Majlisining Senati toʻgʻrisida”gi Oʻzbekiston Respublikasi Konstitutsiyaviy Qonunining 9-moddasiga muvofiq Oʻzbekiston Respublikasi Oliy Majlisining Senati qaror qiladi:

1. Qoraqalpogʻiston Respublikasini kompleks ijtimoiy-iqtisodiy rivojlantirish boʻyicha belgilangan chora-tadbirlarning ijrosi yuzasidan Orolboʻyi mintaqasini rivojlantirish masalalari qoʻmitasi raisi B. Alixanovning axboroti maʼlumot uchun qabul qilinsin.

2. Oʻzbekiston Respublikasi Vazirlar Mahkamasi:

ishga tushirish muddatini uzaytirish zarurati mavjud boʻlgan 124 ta loyihani qayta tahlil qilish chorasini koʻrsin;

xizmat koʻrsatish bilan bogʻliq investitsiya loyihalariga Energetika vazirligi tomonidan dislokatsiya (ruxsatnoma), shuningdek, vermikulit qazib olishni kengaytirish va uni chuqur qayta ishlash boʻyicha loyihalarga Davlat geologiya va mineral resurslar qoʻmitasi tomonidan qisqa muddatlarda litsenziya berilishini nazoratga olsin;

Oʻzbekistonning xorijiy davlatlardagi vakolatxonalari tomonidan ilgari surilgan loyihalarni maqsadga muvofiqligini qayta koʻrib chiqsin;

xalqaro moliya institutlari ishtirokida amalga oshirilayotgan loyihalarda mablagʻlarning past darajada oʻzlashtirilishi boʻyicha tahlil oʻtkazsin;

2022-yilning 10-martiga qadar belgilangan vazifalar ijrosi yuzasidan Oliy Majlis Senatiga tahliliy maʼlumot kiritsin.

3. Qoraqalpogʻiston Respublikasi Joʻqorgʻi Kengesiga:

ijtimoiy-iqtisodiy rivojlantirish boʻyicha belgilangan chora-tadbirlar ijrosi ustidan qatʼiy deputatlik nazoratini tashkil etish;

ishga tushirilgan va amalga oshirilayotgan loyihalarning ahamiyatini jamoatchilik oʻrtasida keng targʻib qilish tavsiya etilsin.

4. Orolboʻyi mintaqasini rivojlantirish masalalari qoʻmitasi:

Qoraqalpogʻiston Respublikasini kompleks ijtimoiy-iqtisodiy rivojlantirish boʻyicha belgilangan chora-tadbirlar ijrosi ustidan parlament nazoratini kuchaytirsin;

har chorakda amalga oshirilgan ishlar toʻgʻrisida Oliy Majlis Senati Kengashiga tahliliy maʼlumot kiritib borsin.

5. Mazkur Qarorning ijrosini nazorat qilish Oʻzbekiston Respublikasi Oliy Majlisi Senati Raisining birinchi oʻrinbosari S. Safoyev zimmasiga yuklansin.

6. Ushbu Qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Senatining Raisi T. NARBAYEVA

Toshkent sh.,

2021-yil 15-dekabr,

SQ-450-IV-son