Oʻzbekiston Respublikasi Fanlar akademiyasining Oʻzbekiston tarixi muzeyi ekspozitsiyasini kengaytirishga doir qoʻshimcha chora-tadbirlar toʻgʻrisida (35-son)

16.01.1993

Oʻzbekiston Respublikasi Vazirlar Mahkamasining

qarori

Oʻzbekiston tarixini, uning badiiy madaniyatining, zargarlik va xalq amaliy sanʼatining rang-barangligini keng targʻib qilish, shuningdek muzeylarning moddiy-texnika negizlarini mustahkamlash maqsadida Vazirlar Mahkamasi qaror qiladi:

1. Oʻzbekiston Respublikasi Madaniyat ishlari vazirligining osori atiqa va zargarlik sanʼati muzeyi tugatilsin.

2. Oʻzbekiston Respublikasi Fanlar akademiyasining Oʻzbekiston tarixi muzeyi tarkibida Osori atiqa-zargarlik fondi tashkil etilsin.

3. Oʻzbekiston Respublikasi Madaniyat ishlari vazirligi:

1993-yilning 20-yanvariga qadar qimmatbaho metallardan va toshlardan yasalgan barcha muzey eksponatlarini Oʻzbekiston Davlat qimmatbaho buyumlar xazinasiga vaqtinchalik saqlashga topshirsin, qolgan eksponatlarni esa Oʻzbekiston tarixi muzeyining ekspozitsiya zallariga joylashtirsin;

1993-yilning 25-yanvariga qadar Oʻzbekiston tarixi muzeyiga ish haqi fondi bilan birga 14 nafar xodim, ixtisoslashtirilgan muzey jihozlari hamda sobiq osori atiqa va zargarlik sanʼati muzeyini saqlashga ilgari ajratilgan mablagʻlarning bir qismini bersin;

1993-yilning 1-fevraliga qadar osori atiqa va zargarlik sanʼati muzeyining boʻshayotgan binosini belgilangan tartibda Oʻzbekiston Respublikasi Tashqi ishlar vazirligi balansiga oʻtkazsin.

4. Oʻzbekiston Respublikasi Davlat qurilish ishlari qoʻmitasi Oʻzbekiston tarixi muzeyi binosida barpo etilayotgan Osori atiqa-zargarlik fondi uchun maxsus ombor qurilishining loyiha smeta hujjatlarini ishlab chiqsin. Oʻzbekiston Respublikasi Moliya vazirligi shu maqsadlar uchun Vazirlar Mahkamasining zaxira fondidan zarur mablagʻlar ajratsin.

5. Toshkent shahar hokimligi 1993-yilning 1-martiga qadar oʻz tasarrufidagi qurilish tashkilotlarining kuchi bilan osori atiqa va zargarlik sanʼati muzeyining boʻshatilayotgan binosida zarur taʼmirlash ishlarini oʻtkazsin.

6. Oʻzbekiston SSR Ministrlar Sovetining 1984-yil 18-oktabrdagi 442-r-son farmoyishining OʻzSSR davlat sanʼat muzeyi (osori atiqa va zargarlik sanʼati muzeyi) Osori atiqa-zargarlik fondiga doir qismi oʻz kuchini yoʻqotgan deb hisoblansin.

7. Mazkur qarorning bajarilishini nazorat qilish Bosh vazirning oʻrinbosarlari M.Q. Qoraboyev va K.N. Toʻlaganov oʻrtoqlar zimmasiga yuklatilsin.

Vazirlar Mahkamasining Raisi I. KARIMOV

Toshkent sh.,

1993-yil 16-yanvar,

35-son