“Udinet” qoʻshma korxonasini tashkil etish va uning faoliyati shart-sharoitlari toʻgʻrisida (479-son)

20.10.1997

Oʻzbekiston Respublikasi Vazirlar Mahkamasining

qarori

[Koʻchirma]

Xalqaro va shaharlararo telegraf-telefon tarmoqlarini modernizatsiya qilish hamda rivojlantirishni nazarda tutuvchi Oʻzbekiston Respublikasi telekommunikatsiya tarmogʻini 2010-yilgacha boʻlgan davrda rekonstruksiya qilish va rivojlantirish milliy dasturini amalga oshirishni jadallashtirish maqsadida Vazirlar Mahkamasi qaror qiladi:

1. Oʻzbekiston pochta va telekommunikatsiyalar agentligining, “Xalqaro Telekom” aksiyadorlik kompaniyasining Toshkent telegraf-telefon stansiyasi, Toshkent xalqaro elektraloqa markazi va Magistral aloqalar hamda televideniye hududiy ishlab chiqarish birlashmasi negizida “STET Interneyshnl Niderlandiya N.V.” (Niderlandiya) kompaniyasi orqali bogʻlangan “STET Interneyshnl S.r.A.” (Italiya) va “Simens AG” (Germaniya) kompaniyalari bilan birgalikda yopiq turdagi aksiyadorlik jamiyati shaklidagi “UDINET” korxonasini (keyingi oʻrinlarda qoʻshma korxona deb ataladi) tashkil etish toʻgʻrisidagi taklifi qabul qilinsin.

Quyidagilar qoʻshma korxonaning asosiy vazifalari hisoblanadi:

Oʻzbekiston Respublikasining umumiy foydalanishdagi kommutatsiya stansiyalari va tarmoqlarini, aloqaning kabel, radiorele, yoʻldosh liniyalari va tizimlarini yanada rivojlantirish hamda ulardan foydalanishni takomillashtirish;

Oʻzbekiston Respublikasi telekommunikatsiya tarmoqlarini boshqa mamlakatlarning aloqa tarmoqlari bilan oʻzaro bogʻlash boʻyicha integratsiya jarayonlarini taʼminlash va ularni yanada takomillashtirish;

Umumiy foydalanishdagi mahalliy aloqa tarmoqlarining shaharlararo va xalqaro telegraf-telefon aloqalari oqimining tranzitga boʻlgan ehtiyojlarini qondirish.

2. Maʼlumot uchun qabul qilinsinki:

qoʻshma korxona ustav jamgʻarmasining dastlabki miqdori ishlab chiqilgan investitsiya dasturiga asosan keyinchalik ilovaga* muvofiq 320 mln AQSh dollarigacha koʻpaytirilgan holda 123 mln AQSh dollarini tashkil etadi;

* Ilova berilmaydi.

ustav jamgʻarmasidagi ulushlar quyidagicha taqsimlanadi: Oʻzbekiston tomoni — 50 foiz, xorijiy ishtirokchilar — 50 foiz (shu jumladan, “STET Intekneyshnl Niderlandiya N.V.” — 42 foiz, “Simens AG” — 8 foiz);

Toshkent telegraf-telefon stansiyasi, Toshkent xalqaro elektr-aloqa markazi va Magistral aloqalar hamda televideniye hududiy ishlab chiqarish birlashmasining moddiy va nomoddiy aktivlari Oʻzbekiston tomonining qoʻshma korxona ustav jamgʻarmasidagi ulushi hisoblanadi;

quyidagilar:

qoʻshma korxona aksiyalarining oʻzbekistonlik ishtirokchiga tegishli boʻlgan bir qismini sotib olish, shuningdek, qoʻshma korxona ustav jamgʻarmasini shakllantirish va toʻldirishga moʻljallangan pul mablagʻlari;

shaharlararo va xalqaro aloqa tarmoqlari hamda vositalarini modernizatsiya qilish va rivojlantirishga moʻljallangan texnologik asbob-uskunalar xorijiy ishtirokchilarning ulushlari hisoblanadi.

3. “UDINET” qoʻshma korxonasi muassislarining koʻrsatiladigan xalqaro va shaharlararo telegraf-telefon aloqa xizmatlarini 3 baravar oshirish imkonini beruvchi, 2003-yilgacha 12 ming nomerli xalqaro va shaharlararo telefon stansiyalarini, uzunligi 4 mln kanal-kilometr boʻlgan radiorele va optik tolali aloqa liniyalarini foydalanishga topshirish boʻyicha taklifi maʼqullansin.

4. Oʻzbekiston Respublikasi Makroiqtisodiyot va statistika vazirligi qoʻshma korxonaning mazkur loyihasini Oʻzbekiston Respublikasining Investitsiya dasturiga kiritsin.

5. “UDINET” qoʻshma korxonasiga quyidagi huquq va imtiyozlar berilsin:

har qanday valyutada schyotlar ochish va ulardan foydalanish, respublika hududida hisob-kitoblar milliy valyutada yuritilishini nazarda tutib Oʻzbekiston Respublikasi Markaziy banki tomonidan belgilangan tartibda xorijiy valyuta olish, ulardan foydalanish va ularni Oʻzbekiston va uning tashqarisidagi banklarda saqlash;

valyuta tushumining majburiy 30 foizini elektr aloqasi xizmati uchun oʻzaro hisob-kitoblarning xalqaro prinsiplariga muvofiq saldo asosida hisobot beriladigan chorak tugaganidan soʻng sotish;

qoʻshma korxona masalalari boʻyicha ishlash uchun keladigan xorijiy mutaxassislar tomonidan vizalarni rasmiylashtirish, respublika hududida yashash va transportning barcha turlarida yurish uchun Oʻzbekiston Respublikasi fuqarolari uchun nazarda tutilgan tariflar boʻyicha haq toʻlash;

qoʻshma korxonani oʻz ishlab chiqarish ehtiyojlari uchun import qilinadigan barcha asbob-uskunalar, mexanizmlar va moddiy-texnik resurslar uchun barcha import boj poshlinalari va yigʻgʻimlari (bojxona tartibotlari oʻtkazilganligi uchun boj yigʻimidan tashqari) toʻlashdan ozod qilish;

uning xodimlariga — Oʻzbekiston Respublikasi norezidentlariga nisbatan Pensiya jamgʻarmasiga ajratmalardan ozod qilish.

6. Oʻzbekiston pochta va telekommunikatsiyalar agentligi qoʻshma korxonaga shaharlararo, xalqaro aloqa liniyalari, maʼlumotlarni uzatish tarmoqlarini loyihalashtirish, qurish va ulardan foydalanish uchun ruxsatnoma (litsenziya) uning faoliyatining barcha muddatiga berilishini taʼminlasin.

10. Belgilab qoʻyilsinki, “UDINET” qoʻshma korxonasi telekommunikatsiya asbob-uskunasi yetkazib berish, shaharlararo va xalqaro telefon-telegraf aloqasi xizmatlari koʻrsatish uchun xorijiy kompaniyalar bilan tuzilgan kontraktlar, shuningdek, Oʻzbekiston TOYE segmenti qurilishiga konsern tomonidan olingan kreditlarni uzish yuzasidan majburiyatlar boʻyicha “Oʻzbektelekom” konsernining huquqiy vorisi hisoblanadi”.

Oʻzbekiston Respublikasi Tashqi iqtisodiy faoliyat milliy banki Oʻzbekiston TOYE segmenti boʻyicha kredit shartnomalarini “UDINET” qoʻshma korxonasiga qayta rasmiylashtirsin.

Oʻzbekiston Respublikasi Moliya vazirligi qayta rasmiylashtirilgan kredit shartnomalari boʻyicha Tashqi iqtisodiy faoliyat milliy bankiga berilgan Hukumat kafolatlariga tegishli qoʻshimchalar bersin.

11. Oʻzbekiston Respublikasi Vazirlar Mahkamasining “Oʻzbekiston pochta va telekommunikatsiyalar agentligi faoliyatini tashkil etish toʻgʻrisida” 1997-yil 31-iyuldagi 380-son qaroriga 1a, 4, 4a-ilovalardagi “Shaharlararo aloqa va televideniye hududiy birlashmasi” aksiyadorlik jamiyati, “Toshkent telegraf-telefon stansiyasi”, “Toshkent xalqaro elektraloqa markazi” soʻzlari “UDINET” qoʻshma korxonasi” soʻzlari bilan almashtirilsin, shuningdek, mazkur qarorga 6-ilovaning 2-boʻlimidan 1, 2, 3-banddar chiqarib tashlansin, ulushlar “UDINET” qoʻshma korxonasiga taqsimlansin.

12. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari K.R. Rahimov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1997-yil 20-oktabr,

479-son