Oʻzbekiston sanoati va xoʻjalik qurilishi (“Oʻzsanoatxoʻjalikqurilish”) davlat korporatsiyasini tashkil etish va uning faoliyati masalalari (33-son)

14.01.1993

Oʻzbekiston Respublikasi Vazirlar Mahkamasining

qarori

“Oʻzbekiston sanoat va xoʻjalik qurilishi (“Oʻzsanoatxoʻjalikqurilish”) davlat korporatsiyasini tuzish toʻgʻrisida”gi Farmonga muvofiq va qurilish ishlab chiqarishini boshqarish samaradorligini oshirish, tarmoqda davlat tasarrufidan chiqarish va xususiylashtirish chora-tadbirlarini amalga oshirish maqsadida Vazirlar Mahkamasi qaror qiladi:

1. Belgilab qoʻyilsinki, Oʻzbekiston sanoat va xoʻjalik qurilishi (“Oʻzsanoatxoʻjalikqurilish”) davlat korporatsiyasi:

oʻz faoliyatida Oʻzbekiston Respublikasi Vazirlar Mahkamasiga hisob beradi;

oʻziga berilgan huquqlar doirasida toʻla xoʻjalik hisobi va oʻzini oʻzi boshqarish prinsiplari asosida ishlab chiqarish-xoʻjalik va moliya faoliyati, ijtimoiy rivojlantirish masalalarini mustaqil hal etadi, markazlashtirilgan zaxira sugʻurta, investitsiya va boshqa jamgʻarmalarni tashkil etadi;

eng muhim xalq xoʻjaligi obyektlari qurilishiga kvotalar boʻyicha ajratiladigan moddiy-texnika resurslari fondlarini saqlovchi hisoblanadi.

2. Belgilab qoʻyilsinki, korporatsiyaning dastlabki ustav jamgʻarmasi korporatsiya tarkibiga kiruvchi birlashmalar, trestlar, korxonalar va tashkilotlarni davlat tasarrufidan chiqarish natijasida tashkil topadigan aksionerlik jamiyatlari (kompaniyalari)ning davlatga tegishli boʻlgan aksiyalarining 60 foizi, shuningdek, boshqa manfaatdor yuridik shaxslarning, shu jumladan, xorijiy yuridik shaxslarning paylari hisobiga hosil qilinadi.

3. “Oʻzsanoatxoʻjalikqurilish” tarkibiga kiruvchi birlashmalar, trestlar, korxonalar va tashkilotlarning roʻyxati, ularning xoʻjalik mustaqilligi va yuridik shaxs huquqlari saqlab qolingan holda, 1-ilovaga* muvofiq tasdiqlansin.

* 1-ilova rus tilidagi matnda berilgan.

4. “Oʻzgiproogʻirsanoat” instituti, iqtisodiyot va qurilishni tashkil etish ilmiy-tadqiqot instituti tarkibida tajriba ishlab chiqarishi boʻlgan Konstruktorlik-texnologiya markazi, moddiy bazalari bilan birgalikda, Oʻzbekiston Respublikasi Davlat qurilish ishlari qoʻmitasi ixtiyoridan olinib “Oʻzsanoatxoʻjalikqurilish” korporatsiyasiga berilsin.

5. Oʻzbekiston Respublikasi Davlat mulki qoʻmitasi “Oʻzsanoatxoʻjalikqurilish” korporatsiyasi ishtirokida 1993-1994-yillarda mehnat jamoalarining tayyorligiga qarab korporatsiya tarkibiga kiruvchi birlashmalar, trestlar, korxonalar va tashkilotlarni amaldagi qonunchilikka muvofiq aksionerlik jamiyatlariga (kompaniyalarga), jamoa korxonalariga aylantirishni amalga oshirsin;

2-ilovaga* muvofiq davlat tasarrufidan chiqarish va xususiylashtirish boʻyicha tashkiliy tadbirlarni oʻtkazishda quyidagilar maqsadga muvofiq deb topilsin:

* 2-ilova rus tilidagi matnda berilgan.

qurilish trestlarini ularning tuzilmasidagi boʻlinmalari bilan birga ochiq turdagi davlat qurilish aksionerlik jamiyatlariga aylantirish;

8-trest negizida, tarkibiga “Fargʻonaqurilish” trestini va 15-qurilish trestini, ularni yuridik shaxs huquqlariga ega boʻlgan shuʼba korxonalariga aylantirgan holda kiritib, “Fargʻonasanoatxoʻjalikqurilish” aksionerlik qurilish kompaniyasini tashkil etish;

10 va 12-qurilish trestlari negizida “Namanganqurilish” davlat qurilish aksionerlik jamiyatini tuzish;

“Oʻzshaharqurilish” ishlab chiqarish-qurilish-montaj birlashmasini, tarkibiga kiruvchi uysozlik kombinatlarini yuridik jihatdan mustaqil boʻlgan ochiq turdagi aksionerlik jamiyatlariga ajratgan holda “Oʻzshaharqurilish” aksionerlik qurilish kompaniyasiga aylantirish;

“Oʻzqurilishdetal” ishlab chiqarish birlashmasini aksiyalashtirish tariqasida, yogʻochsozlik zavodlarini yuridik shaxs huquqlariga ega boʻlgan shuʼba korxonalarga aylantirgan holda, “Oʻzqurilishdetal” xolding kompaniyasini tuzish;

“Oʻzqurilishkonstruksiya” hududiy ishlab chiqarish birlashmasi negizida, birlashma tarkibiga kiruvchi xoʻjalik subyektlarini yuridik shaxs huquqlariga ega boʻlgan tarmoq korxonalariga aylantirgan holda, “Oʻzqurilishkonstruksiya” davlat sanoat aksionerlik kompaniyasini tuzish;

“Oʻzqurilishmexanizatsiya”, “Oʻztransmaxsusqurilish” va “Oʻzqurilishtrans” ixtisoslashtirilgan va avtotransport hududiy ishlab chiqarish birlashmalarini yopiq turdagi davlat aksionerlik kompaniyalariga aylantirish, Oʻzbekiston Respublikasi Moliya vazirligi huzuridagi “Oʻzdavjamgʻarma” orqali davlat, korporatsiya tarkibiga kiruvchi kompaniya, korxona va boʻlinmalarning jamoalari, shuningdek, “Oʻzsanoatxoʻjalikqurilish” korporatsiyasining aksionerlik jamiyatlari (kompaniyalari) uning ishtirokchilari boʻlishi mumkin.

7. Belgilab qoʻyilsinki, “Oʻzsanoatxoʻjalikqurilish” korporatsiyasi ustavga muvofiq oʻz ijroiya organi xodimlari mehnatiga haq toʻlash shartlarini va tizimini mustaqil ravishda hal etadi.

Korporatsiyaning boshqaruv apparati tuzilmasi, xodimlarning cheklangan soni 81 nafardan iborat qilib belgilangan holda (xizmat koʻrsatuvchi xodimlardan tashqari), 3-ilovaga* muvofiq tasdiqlansin.

* 3-ilova rus tilidagi matnda berilgan.

Korporatsiya boshqaruvining raisi, rais oʻrinbosarlari korporatsiya Kengashi tomonidan saylanadilar va Vazirlar Mahkamasi tomonidan tasdiqlanadilar, Korporatsiyaga boshqaruv raisining 4 nafar oʻrinbosariga, shu jumladan, bir nafar birinchi oʻrinbosariga ega boʻlish tavsiya etilsin.

Korporatsiya boshqaruvining raisi maqomi, maishiy taʼminot, tibbiy va transport xizmati koʻrsatish shartlari boʻyicha respublika vaziriga, raisning birinchi oʻrinbosari — vazirning birinchi oʻrinbosariga, rais oʻrinbosarlari — vazir oʻrinbosarlariga tenglashtirilsin.

8. “Oʻzsanoatxoʻjalikqurilish” korporatsiyasiga quyidagi huquqlar berilsin:

obyektlarni toʻliq qurish uchun zarur boʻlgan mablagʻlarni jamlash maqsadida korporatsiya tuzilmasida belgilangan tartibda tijorat investitsiya banki va sugʻurta jamgʻarmasini tuzish;

korporatsiya huzurida, korporatsiya tarkibiga kiruvchi korxonalar va tashkilotlarni davlat tasarrufidan chiqarish va xususiylashtirishdan budjetga tushadigan mablagʻlarning 10 foizini unga oʻtkazish hisobiga, raqobatga bardoshli qurilish mashinalari, asbob-uskunalar va materiallar turlarini ishlab chiqarishni tashkil etish, qoʻshimcha ishchi oʻrinlari yaratish, ishdan boʻshaydigan xodimlarni qayta oʻqitish uchun investitsiya jamgʻarmasini tuzish.

9. Oʻzbekiston Respublikasi Moliya vazirligi huzuridagi Davlat mulki jamgʻarmasi oʻziga berilgan huquqlarga muvofiq:

korporatsiyaga kiruvchi aksionerlik jamiyatlari (kompaniyalari)ning ishonch shartnomalari (trastlari) asosida nominal qiymati boʻyicha davlat tomonidan korporatsiyaning ustav jamgʻarmasiga qoʻyilgan mablagʻga toʻgʻri keladigan aksiyalarni “Oʻzsanoatxoʻjalikqurilish” korporatsiyasiga oʻtkazsin;

davlatga tegishli aksiyalar paketlariga muvofiq “Oʻzsanoatxoʻjalikqurilish” korporatsiyasiga aksionerlik jamiyatlari (kompaniyalar) faoliyatini boshqarish huquqlarini berishni amalda qoʻllasin;

davlatga tegishli aksiyalar boʻyicha dividendlarning bir qismini shartnoma asosida “Oʻzsanoatxoʻjalikqurilish” korporatsiyasiga, aksionerlik jamiyatlariga (kompaniyalariga) ularni rivojlantirish uchun oʻtkazsin.

10. Oʻzbekiston sanoat va xoʻjalik qurilishi davlat korporatsiyasi bir oy muddat ichida korporatsiyaning Ustavini ishlab chiqsin va kelishib olish uchun Vazirlar Mahkamasiga kiritsin, soʻngra taʼsis konferensiyasi yakunlari boʻyicha tasdiqlash uchun taqdim etsin.

11. Oʻzbekiston Respublikasi Aloqa vazirligi Oʻzbekiston Respublikasi Qurilish vazirligi uchun oʻrnatilgan aloqa turlarini “Oʻzsanoatxoʻjalikqurilish” korporatsiyasida saqlab qolsin.

12. “Oʻzsanoatxoʻjalikqurilish” korporatsiyasining ijroiya apparati Toshkent shahar, Proletar koʻchasi, 17-uyga, ilgari Oʻzbekiston Respublikasi Qurilish vazirligi egallab kelgan binoga joylashtirilsin.

13. Oʻzbekiston SSR Ministrlar Sovetining 1990-yil 3-yanvardagi 3-son va 1990-yil 10-sentabrdagi 310-son qarorlarining Qurilish vazirligiga taalluqli qismi oʻz kuchini yoʻqotgan deb hisoblansin.

14. Vazirlar Mahkamasining Qurilish, transport va aloqa majmui bir oy muddat ichida Oʻzbekiston Respublikasi Qurilish vazirligini tugatish hamda Oʻzbekiston sanoat va xoʻjalik qurilishi (“Oʻzsanoatxoʻjalikqurilish”) davlat korporatsiyasini tuzishga doir tashkiliy tadbirlarni amalga oshirsin.

15. Mazkur qarorning bajarilishini nazorat qilish Bosh vazir oʻrinbosari oʻrtoq K.N. Toʻlaganov zimmasiga yuklatilsin. Qarorning qanday bajarilayotganligi 1993-yil mart oyida koʻrib chiqilsin.

Vazirlar Mahkamasining Raisi I. KARIMOV

Toshkent sh.,

1993-yil 14-yanvar,

33-son