“Termiz” erkin iqtisodiy zonasi hududini kengaytirish chora-tadbirlari toʻgʻrisida (PF-37-son)

21.12.2021

Oʻzbekiston Respublikasi Prezidentining

Farmoni

Surxondaryo viloyatining Boysun tumanida farmatsevtika sohasiga qoʻshimcha ravishda boshqa sanoat yoʻnalishlarida toʻgʻridan-toʻgʻri investitsiyalar hisobiga loyihalarni amalga oshirish va yangi ish oʻrinlari yaratish, “Termiz” erkin iqtisodiy zonasi faoliyatini yanada kengaytirish maqsadida:

1. Surxondaryo viloyati hokimligi, Investitsiyalar va tashqi savdo vazirligi hamda Farmatsevtika tarmogʻini rivojlantirish agentligining “Boysun-farm” erkin iqtisodiy zonasi hududini (keyingi oʻrinlarda — “Boysun-farm” EIZ) “Termiz” erkin iqtisodiy zonasi (keyingi oʻrinlarda — “Termiz” EIZ) hududi tarkibiga qoʻshish hamda “Boysun-farm” erkin iqtisodiy zonasi direksiyasi” davlat unitar korxonasini tugatish toʻgʻrisidagi takliflari maʼqullansin.

2. Belgilansinki:

“Boysun-farm” EIZ ishtirokchilari “Boysun-farm” EIZ belgilangan tartibda tugatilgan kundan boshlab “Termiz” EIZ ishtirokchisi hisoblanadi. Bunda, ulardan “Termiz” EIZ ishtirokchilari reyestriga kiritilganlik uchun toʻlov undirilmaydi;

ushbu bandning ikkinchi xatboshisiga muvofiq “Termiz” EIZ ishtirokchisiga aylangan tadbirkorlik subyektlariga qonunchilikda belgilangan barcha imtiyozlar va kafolatlar toʻliq qoʻllaniladi;

“Termiz” erkin iqtisodiy zonasi direksiyasi” davlat unitar korxonasi “Boysun-farm” erkin iqtisodiy zonasi direksiyasi” davlat unitar korxonasining huquqlari, majburiyatlari va shartnomalari boʻyicha huquqiy vorisi hisoblanadi;

“Boysun-farm” erkin iqtisodiy zonasi direksiyasi” davlat unitar korxonasining ustav kapitalidagi mablagʻlar Vazirlar Mahkamasi zaxira jamgʻarmasiga qaytariladi;

“Termiz” EIZning hududida, shu jumladan qoʻshib berilgan hududlarda investitsiya loyihalarini amalga oshirish uchun yer uchastkalarini ajratish Oʻzbekiston Respublikasi Prezidentining 2018-yil 21-dekabrdagi “Erkin iqtisodiy zonalar faoliyatini muvofiqlashtirish va boshqarish tizimini yanada takomillashtirish chora-tadbirlari toʻgʻrisida”gi PF-5600-son Farmoniga muvofiq elektron onlayn-auksion orqali amalga oshiriladi;

Surxondaryo viloyati maxsus iqtisodiy zonalar va kichik sanoat zonalari maʼmuriy kengashiga zaruratga koʻra “Termiz” erkin iqtisodiy zonasi direksiyasi” davlat unitar korxonasi tuzilmasiga uning mablagʻlari hisobidan qoʻshimcha shtat birliklari qoʻshish huquqi beriladi.

3. Surxondaryo viloyati maxsus iqtisodiy zonalar va kichik sanoat zonalari maʼmuriy kengashi Investitsiyalar va tashqi savdo vazirligi bilan birgalikda bir oy muddatda “Boysun-farm” EIZ ishtirokchisi maqomini olgan tadbirkorlik subyektlarini “Termiz” EIZ ishtirokchisi maqomiga qayta rasmiylashtirish ishlarini yakunlasin.

4. Vazirlar Mahkamasi bir oy muddatda “Boysun-farm” EIZ va “Boysun-farm” erkin iqtisodiy zonasi direksiyasi” davlat unitar korxonasini tugatish komissiyasining tarkibi va vakolatlarini, shuningdek, tugatish tartibini belgilovchi qaror loyihasini qabul qilsin.

5. Oʻzbekiston Respublikasi Prezidentining 2017-yil 3-maydagi “Zomin-farm”, “Kosonsoy-farm”, “Sirdaryo-farm”, “Boysun-farm”, “Boʻstonliq-farm” va “Parkent-farm” erkin iqtisodiy zonalarini tashkil etish toʻgʻrisida”gi PF-5032-son Farmoniga ilovaga muvofiq oʻzgartirishlar kiritilsin.

6. Investitsiyalar va tashqi savdo vazirligi manfaatdor vazirlik va idoralar bilan birgalikda ikki oy muddatda mazkur Farmondan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

7. Mazkur Farmonning ijrosini samarali tashkil qilishga masʼul va shaxsiy javobgar etib investitsiyalar va tashqi savdo vazirining birinchi oʻrinbosari A.B. Voitov va Surxondaryo viloyati hokimi T.A. Bobolov belgilansin.

Farmon ijrosini muhokama qilib borish, ijro uchun masʼul idoralar faoliyatini muvofiqlashtirish va nazorat qilish Bosh vazir oʻrinbosari S.U. Umurzakov zimmasiga yuklansin.

Amalga oshirilgan chora-tadbirlarning natijadorligi toʻgʻrisida 2022-yil 1-aprelga qadar Oʻzbekiston Respublikasi Prezidentiga axborot kiritilsin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2021-yil 21-dekabr,

PF-37-son

Oʻzbekiston Respublikasi Prezidentining 2021-yil 21-dekabrdagi PF-37-son Farmoniga ILOVA

Oʻzbekiston Respublikasi Prezidentining 2017-yil 3-maydagi “Zomin-farm”, “Kosonsoy-farm”, “Sirdaryo-farm”, “Boysun-farm”, “Boʻstonliq-farm” va “Parkent-farm” erkin iqtisodiy zonalarini tashkil etish toʻgʻrisida”gi PF-5032-son Farmoniga kiritilayotgan oʻzgartirishlar

1. Nomlanishidan “Boysun-farm” soʻzlari chiqarib tashlansin.

2. Muqaddimadan, 1, 2, 8, 11, 13, 16 va 17-bandlardan “Surxondaryo” soʻzlari chiqarib tashlansin.

3. 1, 2, 3, 4, 8, 9, 10, 11, 13, 14, 15, 16, 17, 18, 19 va 20-bandlardan “Boysun-farm” va “Boysun-farm” EIZ” soʻzlari chiqarib tashlansin.