Paxta-toʻqimachilik klasterlari faoliyatini yanada kengaytirish chora-tadbirlari toʻgʻrisida (747-son)

10.12.2021

Oʻzbekiston Respublikasi Vazirlar Mahkamasining

qarori

Qishloq xoʻjaligi ishlab chiqarishida tarkibiy islohotlarni yanada chuqurlashtirish va bozor munosabatlarini joriy qilish, paxta xom ashyosini qayta ishlash hamda toʻqimachilik mahsulotlari ishlab chiqaradigan tarmoqlar integratsiyalashuvini yanada kengaytirish maqsadida Vazirlar Mahkamasi qaror qiladi:

1. Vazirlar Mahkamasining “Paxta-toʻqimachilik ishlab chiqarishlari va klasterlari faoliyatini tashkil etish boʻyicha qoʻshimcha chora-tadbirlar toʻgʻrisida” 2018-yil 31-martdagi 253-son qaroriga muvofiq paxta tozalash korxonalari hamda paxta qabul qilish maskanlarining bino va inshootlarini paxta-toʻqimachilik klasterlariga baholangan qiymatda 5 yil muddatda boʻlib toʻlash sharti bilan sotish belgilanganligi maʼlumot uchun qabul qilinsin.

2. Qishloq xoʻjaligida iqtisodiy islohotlarni chuqurlashtirish boʻyicha respublika komissiyasi, Qoraqalpogʻiston Respublikasi Vazirlar Kengashi, viloyatlar hokimliklari, Oʻzbekiston Respublikasi Qishloq xoʻjaligi vazirligi, Davlat aktivlarini boshqarish agentligi va “Oʻzbekiston paxta-toʻqimachilik klasterlari” uyushmasining ushbu qarorga 1-ilovaga muvofiq paxta tozalash korxonalari va paxta qabul qilish maskanlarining bino va inshootlari hamda ulushini baholangan qiymatda 5 yil muddatga boʻlib toʻlash (teng miqdordagi yillik toʻlovlar) sharti bilan istisno tariqasida toʻgʻridan-toʻgʻri paxta-toʻqimachilik klasterlariga belgilangan tartibda sotish toʻgʻrisidagi takliflari maʼqullansin.

3. Belgilansinki:

paxta tozalash korxonalari va paxta qabul qilish maskanlarining bino va inshootlari ishlab chiqarishni 2 yildan ortiq boʻlmagan vaqt davomida modernizatsiya qilish sharti bilan sotiladi;

paxta tozalash korxonalari va paxta qabul qilish maskanlarining bino va inshootlarini sotish boʻyicha shartnomada nazarda tutilgan majburiyatlar oʻz vaqtida va toʻliq bajarilmagan taqdirda, tomonlar oʻrtasida tuzilgan shartnoma qonunchilik hujjatlarida belgilangan tartibda bekor qilinadi.

4. Oʻzbekiston Respublikasi Davlat aktivlarini boshqarish agentligi “Oʻzpaxtasanoat” AJni tugatish Loyiha ofisi bilan birgalikda ikki oy muddatda:

paxta tozalash korxonalarining boshqaruv organlarida 1-ilovaga muvofiq sotiladigan paxta tozalash korxonalari va paxta qabul qilish maskanlarining bino va inshootlarini xatlovdan oʻtkazish va belgilangan tartibda baholash hamda sotish tashabbusi bilan chiqilishini;

paxta tozalash korxonalarining boshqaruv organlari qarorlariga asosan paxta-toʻqimachilik klasterlari bilan tegishli shartnomalar tuzilishini taʼminlasin.

5. Oʻzbekiston Respublikasi Hukumatining ayrim qarorlariga 2-ilovaga muvofiq oʻzgartirishlar kiritilsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining agrar va oziq-ovqat sohalarini rivojlantirish masalalari boʻyicha oʻrinbosari Sh.M. Gʻaniyev zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2021-yil 10-dekabr,

747-son

Vazirlar Mahkamasining 2021-yil 10-dekabrdagi 747-son qaroriga 1-ILOVA

Paxta-toʻqimachilik klasterlariga sotiladigan paxta tozalash korxonalari, paxta qabul qilish maskanlarining bino va inshootlari

ROʻYXATI

* “Namangan mintaqaviy paxta terminali” MCHJning ustav kapitalidagi ulushi 10,0 mln AQSH dollari miqdorida investitsiya kiritish va 800 ta ish oʻrinlarini yaratish hamda paxta tolasini qayta ishlash va keyinchalik undan yuqori sifatli matolar ishlab chiqarishni tashkil etish sharti bilan sotiladi.

** “Gurlan baraka teks” MCHJning ustav kapitalidagi 100 foiz ulushi “Gurlan global teks” MCHJga oʻn yil muddatga boʻlib toʻlash sharti bilan baholash qiymatida sotiladi.

Vazirlar Mahkamasining 2021-yil 10-dekabrdagi 747-son qaroriga 2-ILOVA

Oʻzbekiston Respublikasi Hukumatining ayrim qarorlariga kiritilayotgan oʻzgartirishlar

1. Vazirlar Mahkamasining “Paxta-toʻqimachilik ishlab chiqarishlarini yanada rivojlantirishga doir qoʻshimcha chora-tadbirlar toʻgʻrisida” 2018-yil 19-sentabrdagi 744-son qaroriga (Oʻzbekiston Respublikasi QT, 2018-y., 38-son, 768-modda) 2-ilovaning rus tili matnida:

a) 22-pozitsiyaning “Xlopkozavodi i zagotovitelnie punkti” ustuni quyidagi tahrirda bayon etilsin:

“AO “Beshkent paxta tozalash” s zagotpunktami “Kavchun”, “Tallikurgan” i “Karshi”;

b) 32-pozitsiya oʻz kuchini yoʻqotgan deb hisoblansin;

v) 34-pozitsiyaning “Xlopkozavodi i zagotovitelnie punkti” ustuni quyidagi tahrirda bayon etilsin:

“AO “Kattakurgan paxta tozalash” i zagotpunkt “Kadan”;

g) 36, 43, 53, 55 va 57-pozitsiyalar oʻz kuchini yoʻqotgan deb hisoblansin.

2. Vazirlar Mahkamasining 2019-yil 18-noyabrdagi 914-son qarori bilan tasdiqlangan Paxta-toʻqimachilik ishlab chiqarishlari va klasterlari tashkilotchilari va ularga sotiladigan paxta tozalash korxonalari hamda paxta tayyorlash punktlari bino va inshootlari roʻyxatining 1, 15, 16, 18 va 20-pozitsiyalari oʻz kuchini yoʻqotgan deb hisoblansin.