Oliy taʼlim tashkilotlariga kirish imtihonlarida abituriyentlarning taʼlim toʻgʻrisidagi hujjatlariga qoʻyilgan baholarini inobatga olish tartibini joriy etish chora-tadbirlari toʻgʻrisida (696-son)

19.11.2021

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Oʻzbekistonning yangi taraqqiyot davrida taʼlim-tarbiya va ilm-fan sohalarini rivojlantirish chora-tadbirlari toʻgʻrisida” 2020-yil 6-noyabrdagi PF-6108-son Farmonida belgilangan vazifalar ijrosini taʼminlash hamda yoshlarning bilim olishga boʻlgan qiziqishlarini yanada qoʻllab-quvvatlash, ularning taʼlim toʻgʻrisidagi hujjatlariga qoʻyilgan baholarini oliy taʼlim tashkilotlariga kirish imtihonlarida inobatga olish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Oʻzbekistonning yangi taraqqiyot davrida taʼlim-tarbiya va ilm-fan sohalarini rivojlantirish chora-tadbirlari toʻgʻrisida” 2020-yil 6-noyabrdagi PF-6108-son Farmonining 10-bandiga muvofiq 2022/2023 oʻquv yilidan boshlab umumiy oʻrta, oʻrta maxsus taʼlim muassasalari va kasb-hunar maktablari (keyingi oʻrinlarda — taʼlim tashkilotlari) bitiruvchilarining shahodatnomasi (diplomga ilova)ga majburiy 11 yillik taʼlimning soʻnggi 6 yillik baholari oʻrtacha koʻrsatkichi (keyingi oʻrinlarda — bitiruvchilar baholarining oʻrtacha koʻrsatkichi) kiritilishi va ushbu koʻrsatkich oliy taʼlim tashkilotiga kirish imtihonlarida inobatga olinishi belgilanganligi maʼlumot uchun qabul qilinsin.

2. Oʻzbekiston Respublikasi Vazirlar Mahkamasi huzuridagi Davlat test markazi (keyingi oʻrinlarda — Davlat test markazi), Taʼlim sifatini nazorat qilish davlat inspeksiyasi, Oliy va oʻrta maxsus taʼlim vazirligi hamda Xalq taʼlimi vazirligining taʼlim tashkilotlari bitiruvchilari baholarining oʻrtacha koʻrsatkichini elektron platformalar orqali hisoblash hamda bitiruvchilarning shahodatnomasi (diplomga ilova)da oʻz aksini toptirish toʻgʻrisidagi takliflariga rozilik berilsin.

3. Quyidagilarni nazarda tutuvchi Taʼlim tashkilotlari bitiruvchilari baholarining oʻrtacha koʻrsatkichini hisoblash va uni oliy taʼlim tashkilotlariga kirish imtihonlarida inobatga olish tartibi toʻgʻrisidagi nizom ilovaga muvofiq tasdiqlansin:

taʼlim tashkilotlari tomonidan majburiy 11 yillik taʼlimning soʻnggi 6 yillik baholarini aks ettiruvchi elektron platformalarni yuritish va baholarni mazkur platformalarga davriy ravishda kiritib borish;

bitiruvchilar baholarining oʻrtacha koʻrsatkichlarini hisoblash, ularni elektron platformalarda aks ettirish tartibi hamda maʼlumotlarni “Elektron hukumat” tizimi idoralararo integratsiyalashuv platformasi orqali Davlat test markazining “ABITUR” maxsus elektron dasturiga uzatish;

Davlat test markazi tomonidan oliy taʼlim tashkilotlariga oʻqishga qabul qilish boʻyicha test sinovlari yakunlanganidan soʻng taʼlim tashkilotlari tomonidan “Elektron hukumat” tizimi idoralararo integratsiyalashuv platformasi orqali “ABITUR” maxsus elektron dasturiga kiritilgan baholarning oʻrtacha koʻrsatkichlarini tanlov natijasini hisoblashda inobatga olish.

4. Tizimida taʼlim tashkilotlari boʻlgan vazirliklar va idoralar, shuningdek, Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasi (nodavlat taʼlim tashkilotlari boʻyicha) 2022-yil 10-iyunga qadar elektron platformalarni ishga tushirsin hamda taʼlim tashkilotlarida 2022/2023 oʻquv yili va keyingi oʻquv yillari bitiruvchilarining soʻnggi 6 yillik baholarini elektron platformalarga kiritish va bitiruvchilar baholarining oʻrtacha koʻrsatkichlari hisoblab borilishini taʼminlasin.

5. 2022-yil 10-iyunga qadar tizimida taʼlim tashkilotlari boʻlgan vazirliklar va idoralar, Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasi, Xalq taʼlimi vazirligi oʻz elektron platformalarini “Elektron hukumat” tizimi idoralararo integratsiyalashuv platformasiga integratsiya qilsin.

6. Belgilansinki, elektron platformalar va dasturlarni yaratish hamda texnik jihatdan qoʻllab-quvvatlash, integratsiya qilish masalalari bilan bogʻliq xarajatlar tegishli vazirliklar va idoralarning budjetdan tashqari mablagʻlari hisobidan qoplanadi.

7. Davlat test markazi, Oliy va oʻrta maxsus taʼlim vazirligi, Xalq taʼlimi vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

8. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari, Vazirlar Mahkamasi huzuridagi Davlat test markazi direktori M.M. Karimov, Vazirlar Mahkamasi huzuridagi Taʼlim sifatini nazorat qilish davlat inspeksiyasi boshligʻi U.N. Tashkenbayev, xalq taʼlimi vaziri B.O. Saidov hamda oliy va oʻrta maxsus taʼlim vaziri A.H. Toshkulov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2021-yil 19-noyabr,

696-son

Vazirlar Mahkamasining 2021-yil 19-noyabrdagi 696-son qaroriga ILOVA

Taʼlim tashkilotlari bitiruvchilari baholarining oʻrtacha koʻrsatkichini hisoblash va uni oliy taʼlim tashkilotlariga kirish imtihonlarida inobatga olish tartibi toʻgʻrisida

NIZOM

1-bob. Umumiy qoidalar

1. Mazkur Nizom umumiy oʻrta, oʻrta maxsus taʼlim muassasalari va kasb-hunar maktablari (keyingi oʻrinlarda — taʼlim tashkilotlari) bitiruvchilarining shahodatnomasi (diplomga ilova)ga majburiy 11 yillik taʼlimning soʻnggi 6 yillik baholari oʻrtacha koʻrsatkichini oliy taʼlim tashkilotlariga kirish imtihonlarida inobatga olish tartibini belgilaydi.

Ushbu Nizom Oʻzbekistonda faoliyat olib borayotgan xorijiy oliy taʼlim tashkilotlari hamda ularning filiallariga nisbatan tatbiq etilmaydi.

2. Taʼlim tashkilotlari bitiruvchilari baholarining oʻrtacha koʻrsatkichini oliy taʼlim tashkilotlariga kirish imtihonlarida inobatga olish ushbu Nizomga ilovaga muvofiq sxema asosida amalga oshiriladi.

3. Bitiruvchilarning taʼlim toʻgʻrisidagi hujjatlariga qoʻyilgan baholarining soʻnggi 6 yillik oʻrtacha koʻrsatkichi elektron platformaga taʼlim tashkilotlari tomonidan davriy ravishda kiritib boriladi va maʼlumotlarning toʻgʻri kiritilganligi uchun taʼlim tashkilotlarining birinchi rahbarlari shaxsan masʼul hisoblanadi.

4. Taʼlim tashkilotlari bitiruvchilari bahosining oʻrtacha koʻrsatkichi 3 — 5 baholar oraligʻida boʻlib, mazkur koʻrsatkich shahodatnoma va diplomga ilovada aks ettiriladi.

2-bob. Elektron platformalarda maʼlumotlarni shakllantirish

5. Tizimida taʼlim tashkilotlari boʻlgan vazirliklar va idoralar, Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasining (nodavlat taʼlim tashkilotlari boʻyicha) elektron platformalari “Elektron hukumat” tizimi idoralararo integratsiyalashuv platformasiga integratsiya qilinadi hamda ushbu vazirliklar va idoralarga “Elektron hukumat” tizimi idoralararo integratsiyalashuv platformasi orqali axborot almashish imkoniyati yaratiladi.

6. Tizimida taʼlim tashkilotlari boʻlgan vazirliklar va idoralar, Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasi (nodavlat taʼlim tashkilotlari boʻyicha) har yili 15-iyunga qadar:

oʻz elektron platformalariga bitiruvchilar haqidagi maʼlumotlar bilan birga ularning bilim koʻrsatkichiga qoʻyilgan baholarning oʻrtacha koʻrsatkichini shakllantirish uchun taʼlim tashkilotlari tomonidan platformalarga oʻquvchilarning fanlar boʻyicha yillik baholari kiritilishini taʼminlaydi;

elektron platformalarda shakllantirilgan bitiruvchilar haqidagi maʼlumotlar hamda ularning baholarining oʻrtacha koʻrsatkichi “Elektron hukumat” tizimi idoralararo integratsiyalashuv platformasiga uzluksiz uzatib borilishi uchun barcha tashkiliy tadbirlarni amalga oshiradi.

7. Taʼlim tashkilotlari tomonidan bitiruvchilar haqidagi maʼlumotlarni va fanlar boʻyicha baholarining oʻrtacha koʻrsatkichini elektron platformada shakllantirib, ularning shahodatnomasi (diplomga ilova)da oʻz aksini toptirish uchun oʻquvchilarning fanlar boʻyicha yillik baholari har yili 15-iyunga qadar elektron platformaga kiritib boriladi.

Elektron platformaga kiritilgan baholar qatʼiy hisoblanib, ularga oʻzgartirish va qoʻshimchalar kiritilishiga yoʻl qoʻyilmaydi.

8. Taʼlim tashkilotlarini xorijiy davlatda tamomlagan va hujjati tan olingan (Oʻzbekiston Respublikasi fuqarosi), eksternat tartibida yakuniy davlat attestatsiyasidan oʻtgan abituriyentlarning shahodatnomasidagi (diplomga ilovadagi umumtaʼlim fanlari boʻyicha) baholari taalluqliligi boʻyicha Qoraqalpogʻiston Respublikasi Xalq taʼlimi vazirligi, Toshkent shahar xalq taʼlimi bosh boshqarmasi, viloyatlar xalq taʼlimi boshqarmalari va Oliy va oʻrta maxsus taʼlim vazirligining Qoraqalpogʻiston Respublikasi, Toshkent shahar va viloyatlar Kasbiy taʼlimni rivojlantirish va muvofiqlashtirish hududiy boshqarmalari (keyingi oʻrinlarda — taʼlimni boshqaruvchi hududiy boshqarmalar) tomonidan oʻz elektron platformalariga kiritiladi.

Kiritilgan maʼlumotlarning haqqoniyligi uchun taalluqliligi boʻyicha taʼlimni boshqaruvchi hududiy boshqarma boshliqlari shaxsan masʼul hisoblanadi.

3-bob. Umumiy oʻrta taʼlim tashkilotlari bitiruvchilari baholarining oʻrtacha koʻrsatkichini hisoblash

9. Umumiy oʻrta taʼlim tashkiloti bitiruvchilarining 6 — 11-sinflardagi fanlar boʻyicha yillik baholari, yakuniy davlat attestatsiyasi baholari elektron platformaga har oʻquv yilining yakuni boʻyicha 15-iyunga qadar kiritiladi.

10. Bitiruvchilar bahosining oʻrtacha koʻrsatkichini hisoblashda 6 — 11-sinflardagi yillik baholarning umumiy yigʻindisi har bir sinfdagi oʻqitilgan fanlar sonining umumiy yigʻindisiga nisbati olinadi.

U quyidagi formula asosida hisoblanadi:

Kbboʻk — bitiruvchi bahosining oʻrtacha koʻrsatkichi;

∑6b — 6-sinfdagi barcha fanlar boʻyicha yillik baholar yigʻindisi;

∑7b — 7-sinfdagi barcha fanlar boʻyicha yillik baholar yigʻindisi;

∑ 8b — 8-sinfdagi barcha fanlar boʻyicha yillik baholar yigʻindisi;

∑9b — 9-sinfdagi barcha fanlar boʻyicha yillik baholar yigʻindisi;

∑10b — 10-sinfdagi barcha fanlar boʻyicha yillik baholar yigʻindisi;

∑11b — 11-sinfdagi barcha fanlar boʻyicha yillik baholar yigʻindisi;

6f — 6-sinfda yillik baho chiqarilgan barcha fanlar soni;

7f — 7-sinfda yillik baho chiqarilgan barcha fanlar soni;

8f — 8-sinfda yillik baho chiqarilgan barcha fanlar soni;

9f — 9-sinfda yillik baho chiqarilgan barcha fanlar soni;

10f — 10-sinfda yillik baho chiqarilgan barcha fanlar soni;

11f — 11-sinfda yillik baho chiqarilgan barcha fanlar soni.

11. Umumiy oʻrta taʼlim tashkiloti tomonidan bitiruvchilar bilimiga qoʻyiladigan baholash mezonlari farq qilganda baholash tizimidagi maksimal ball 100 foiz sifatida qabul qilinadi va ballar baho tizimiga quyidagicha konvertatsiya qilinadi: 86 — 100 foiz uchun — 5 baho, 71 — 85 foiz uchun — 4 baho, 56 — 70 foiz uchun — 3 baho va 56 foizgacha — 2 baho.

4-bob. Oʻrta maxsus taʼlim tashkilotlari va kasb-hunar maktablari bitiruvchilari baholarining oʻrtacha koʻrsatkichini hisoblash

12. Oʻrta maxsus taʼlim tashkilotlari va kasb-hunar maktablari bitiruvchilarining 1-2-bosqichlardagi umumtaʼlim fanlari boʻyicha yillik baholari, yakuniy davlat attestatsiyasi baholari elektron platformaga har oʻquv yilining yakuni boʻyicha 15-iyunga qadar kiritiladi.

Bitiruvchilarning 6 — 9-sinflardagi yillik baholari Xalq taʼlimi vazirligining “Elektron kundalik” elektron dasturiga, shuningdek, tizimida taʼlim tashkilotlari boʻlgan vazirliklar va idoralar tomonidan barcha taʼlim tashkilotlarida joriy etilgan elektron platformalarga integratsiya qilish orqali olinadi.

13. Bitiruvchilar bahosining oʻrtacha koʻrsatkichini hisoblashda 6 — 9-sinflardagi hamda 1-2-bosqichlardagi umumtaʼlim fanlari boʻyicha yillik baholarning umumiy yigʻindisi har bir sinf va bosqichdagi oʻqitilgan umumtaʼlim fanlari sonining umumiy yigʻindisiga nisbati olinadi.

U quyidagi formula asosida hisoblanadi:

Kbboʻk— bitiruvchi bahosining oʻrtacha koʻrsatkichi;

∑6b — 6-sinfdagi barcha fanlar boʻyicha yillik baholar yigʻindisi;

∑7b — 7-sinfdagi barcha fanlar boʻyicha yillik baholar yigʻindisi;

∑ 8b— 8-sinfdagi barcha fanlar boʻyicha yillik baholar yigʻindisi;

∑9b — 9-sinfdagi barcha fanlar boʻyicha yillik baholar yigʻindisi;

∑1 b — 1-bosqichdagi umumtaʼlim fanlari boʻyicha yillik baholar yigʻindisi;

∑2b — 2-bosqichdagi umumtaʼlim fanlari boʻyicha yillik baholar yigʻindisi;

6f — 6-sinfda yillik baho chiqarilgan barcha fanlar soni;

7f — 7-sinfda yillik baho chiqarilgan barcha fanlar soni;

8f — 8-sinfda yillik baho chiqarilgan barcha fanlar soni;

9f — 9-sinfda yillik baho chiqarilgan barcha fanlar soni;

1b — f — 1-bosqichda yillik baho chiqarilgan umumtaʼlim fanlari soni;

2b — f— 2-bosqichda yillik baho chiqarilgan umumtaʼlim fanlari soni.

14. Oʻrta maxsus taʼlim tashkilotlari va kasb-hunar maktablari tomonidan bitiruvchilar bilimiga qoʻyiladigan baholash mezonlari farq qilganda baholash tizimidagi maksimal ball 100 foiz sifatida qabul qilinadi va ballar baho tizimiga quyidagicha konvertatsiya qilinadi: 86 — 100 foiz uchun — 5 baho, 71 — 85 foiz uchun — 4 baho, 56 — 70 foiz uchun — 3 baho va 56 foizgacha — 2 baho.

5-bob. Bitiruvchilar baholarining oʻrtacha koʻrsatkichini elektron platformada tasdiqlash

15. Abituriyent oliy taʼlim tashkilotiga oʻqishga kirish imtihonlarida ishtirok etish uchun roʻyxatdan oʻtish jarayonida shaxsiy maʼlumotlarini kiritgandan soʻng uning shahodatnomadagi yoki diplomga ilovadagi umumtaʼlim fanlari baholarining oʻrtacha koʻrsatkichi hosil boʻladi.

Abituriyent tomonidan baholarining oʻrtacha koʻrsatkichi uning shahodatnomadagi yoki diplomga ilovadagi baholarining oʻrtacha koʻrsatkichi bilan tekshirilib, tasdiqlash tugmasi bosiladi.

Abituriyent tomonidan baholarining oʻrtacha koʻrsatkichi tasdiqlanmagunga qadar unga kirish imtihonlarida ishtirok etish uchun ruxsatnoma shakllantirilmaydi.

16. Abituriyentning shaxsiy kabinetida aks etgan shahodatnomadagi yoki diplomga ilovadagi umumtaʼlim fanlari baholari va ularning oʻrtacha koʻrsatkichi hamda shahodatnomadagi yoki diplomga ilovaning aslidagi baholar oʻrtasida tafovut aniqlanganda abituriyent tegishli taʼlimni boshqaruvchi boshqarmaga murojaat qiladi. Oʻz oʻrnida hududiy boshqarmalar mavjud muammo bartaraf etilishini taʼminlaydi.

Bunda abituriyentning shaxsiy kabinetida aks etgan shahodatnomadagi yoki diplomga ilovadagi umumtaʼlim fanlari baholari va ularning oʻrtacha koʻrsatkichi oʻzgaradi va abituriyent maʼlumotlarning toʻgʻriligi boʻyicha tasdiqlash tugmasini bosadi. Tasdiqlash tugmasi bosilganidan soʻng maʼlumotlar toʻgʻriligiga abituriyentning shaxsan oʻzi javobgar hisoblanadi.

17. Davlat test markazi oliy taʼlim tashkilotlarining bakalavriatiga oʻqishga kirish uchun “ABITUR” maxsus elektron dasturi orqali ariza topshirgan, ammo elektron platformada baholarining oʻrtacha koʻrsatkichi kiritilmagan abituriyentlar haqidagi maʼlumotni ariza qabul qilingan kunda tegishli vazirliklar va idoralarga elektron platformasi orqali yuboradi.

18. Tegishli vazirliklar va idoralar bir ish kunida maʼlumotni abituriyentning shahodatnomasi yoki diplomi berilgan taʼlimni boshqaruvchi hududiy boshqarmaga yuboradi.

19. Hududiy taʼlimni boshqaruvchi boshqarma tuman xalq taʼlimi boʻlimi orqali shu kunning oʻzida maʼlumotni taʼlim tashkilotiga yuboradi, taʼlim tashkiloti rahbari uch ish kunida abituriyentning shahodatnomasidagi yoki diplomga ilovadagi umumtaʼlim fanlari baholari elektron platformaga toʻgʻri kiritilishini taʼminlaydi.

Abituriyentning shaxsiy kabinetida shahodatnomadagi yoki diplomga ilovadagi umumtaʼlim fanlari baholarining oʻrtacha koʻrsatkichi shu kunning oʻzida aks etadi.

20. Tugatilgan yoki qayta tashkil etilgan taʼlim tashkilotlari bitiruvchilari baholarining oʻrtacha koʻrsatkichi (zarur hollarda arxiv hujjatlari asosida) tegishli taʼlimni boshqaruvchi hududiy boshqarmalar tomonidan hujjatning asli asosida Davlat test markazining elektron platformasiga toʻgʻri kiritilishi taʼminlanadi.

21. Tegishli vazirliklar va idoralar belgilangan vazifalar taʼlim tashkilotlari tomonidan oʻz vaqtida bajarilishi boʻyicha nazoratni olib boradi va taʼminlaydi.

6-bob. Bitiruvchilar baholarining oʻrtacha koʻrsatkichini oliy taʼlim tashkilotlariga kirish imtihonlarida inobatga olish

22. Davlat test markazi tomonidan oliy taʼlim tashkilotlariga oʻqishga qabul qilish boʻyicha test sinovlari yakunlanganidan soʻng, belgilangan muddatda, tanlovga qadar abituriyentlarning test sinovi jarayonida toʻplagan ballariga tegishli taʼlim tashkilotlari tomonidan kiritilgan bitiruvchilar baholarining oʻrtacha koʻrsatkichlari qoʻshiladi va tanlov jarayoni amalga oshiriladi.

23. Oliy taʼlim tashkilotiga oʻqishga qabul qilish jarayonida abituriyent tomonidan qabul komissiyasiga taqdim etilgan shahodatnomadagi yoki diplomga ilovadagi baholarning oʻrtacha koʻrsatkichi bilan elektron platformaga kiritilgan baholar oʻrtacha koʻrsatkichi orasida tafovut aniqlansa, u holda abituriyentning keyingi holati kirish imtihonlarida (talabalikka qabul qilingan boʻlsa) talabalikka qabul qilingan taʼlim yoʻnalishi doirasida qayta koʻrib chiqiladi. Agar kiritilgan oʻzgarishlar tufayli abituriyent toʻplagan ball qabul chegarasidan past boʻlsa, mazkur abituriyent oliy taʼlim tashkilotiga qabul qilinmaydi.

7-bob. Yakunlovchi qoidalar

24. Mazkur Nizomni amalga oshirishda yuzaga keladigan nizolar qonunchilik hujjatlarida belgilangan tartibda, shu jumladan, sud tartibida hal etiladi.

25. Ushbu Nizom talablari buzilishida aybdor boʻlgan shaxslar qonunchilik hujjatlariga muvofiq javob beradilar.

Taʼlim tashkilotlari bitiruvchilari baholarining oʻrtacha koʻrsatkichini hisoblash va uni oliy taʼlim tashkilotlariga kirish imtihonlarida inobatga olish tartibi toʻgʻrisidagi nizomga ILOVA

Taʼlim tashkilotlari bitiruvchilari baholarining oʻrtacha koʻrsatkichini oliy taʼlim tashkilotlariga kirish imtihonlarida inobatga olish

SXEMASI

Bosqich Masʼullar Chora-tadbirlar Bajarish muddati 1-bosqich Umumiy oʻrta, oʻrta maxsus taʼlim tashkilotlari va kasb-hunar maktablari Umumiy oʻrta taʼlim tashkilotlari tomonidan 6 — 11-sinflar oʻquvchilarining, oʻrta maxsus taʼlim tashkilotlari va kasb-hunar maktablari 1-2-bosqichlari oʻquvchilarining umumtaʼlim fanlari boʻyicha yillik baholarini elektron platformaga kiritish. Har oʻquv yilining yakuni boʻyicha 15-iyunga qadar 2-bosqich Abituriyent 1. Abituriyent Davlat test markazining “ABITUR” maxsus elektron dasturi orqali roʻyxatdan oʻtganda shaxsiy kabinetida aks etgan shahodatnomadagi yoki diplomga ilovadagi umumtaʼlim fanlari baholari oʻrtacha koʻrsatkichini shahodatnomadagi yoki diplomga ilovadagi baholarning oʻrtacha koʻrsatkichi bilan taqqoslaydi va tasdiqlash tugmasi bosiladi. Har yili oʻqishga qabul qilish jarayonida onlayn roʻyxatdan oʻtish vaqtida Davlat test markazi 2. Abituriyent tomonidan tasdiqlash tugmasi bosilgandan soʻng abituriyentga kirish imtihonlarida ishtirok etish uchun ruxsatnoma shakllantiriladi. 3-bosqich Abituriyent 1. Abituriyent Davlat test markazining ABITUR” maxsus elektron dasturi orqali roʻyxatdan oʻtganda shaxsiy kabinetidagi umumtaʼlim fanlari baholari oʻrtacha koʻrsatkichi hamda shahodatnomadagi yoki diplomga ilovaning aslidagi baholar oʻrtacha koʻrsatkichi oʻrtasida tafovut aniqlanganda abituriyent tegishli taʼlimni boshqaruvchi boshqarmaga murojaat qiladi. Maʼlumot olingan kunning oʻzida Taʼlimni boshqaruvchi hududiy boshqarma 2. Oʻz oʻrnida hududiy boshqarmalar mavjud muammo bartaraf etilishini taʼminlaydi. Shu kunning oʻzida 4-bosqich Davlat test markazi 1. Oliy taʼlim tashkiloti bakalavriatiga oʻqishga kirish uchun ABITUR maxsus dasturi orqali ariza topshirgan, ammo elektron platformaga baholarining oʻrtacha koʻrsatkichi kiritilmagan abituriyentlar haqidagi maʼlumotni tegishli vazirliklar va idoralarga yuborish. Har yili qabul jarayonida onlayn roʻyxatdan oʻtishda maʼlumotlar tasdiqlangan kunning oʻzida Tegishli vazirliklar va idoralar 2. Davlat test markazidan olingan maʼlumotni abituriyentning shahodatnomasi yoki diplomi berilgan taʼlim tashkiloti joylashgan taʼlimni boshqaruvchi hududiy boshqarmaga yuborish. Maʼlumot qabul qilingan kundan boshlab bir ish kunida 5-bosqich Taʼlimni boshqaruvchi hududiy boshqarma 1. Davlat test markazidan olingan baholarning oʻrtacha koʻrsatkichi kiritilmagan abituriyent toʻgʻrisidagi maʼlumotni taʼlim tashkilotiga yuborish. Maʼlumot olingan kunning oʻzida Taʼlim tashkiloti rahbari 2. Abituriyentning shahodatnomasidagi yoki diplomga ilovadagi umumtaʼlim fanlari baholarini elektron platformaga kiritish va tasdiqlash tugmasini bosish. Uch ish kuni davomida Abituriyent 3. Abituriyent tomonidan umumtaʼlim fanlari baholarining oʻrtacha koʻrsatkichi shahodatnomadagi yoki diplomga ilovadagi umumtaʼlim fanlari baholari bilan taqqoslanadi va tasdiqlash tugmasi bosiladi. Maʼlumot olingan kunning oʻzida 6-bosqich Davlat test markazi Abituriyentlarning test sinovi jarayonida toʻplagan ballariga tegishli taʼlim tashkilotlari tomonidan kiritilgan bitiruvchilar baholarining oʻrtacha koʻrsatkichini qoʻshish va tanlov jarayonida inobatga olish. Oliy taʼlim tashkilotlariga oʻqishga qabul qilish boʻyicha test sinovlari yakunlanganidan soʻng, tanlovga qadar