“Reklama toʻgʻrisida”gi Oʻzbekiston Respublikasi Qonuniga oʻzgartishlar va qoʻshimchalar kiritish haqida (404-II-son)

30.08.2002

Hujjat kuchini yo‘qotgan 09.09.2022

Oʻzbekiston Respublikasining qonuni

Oʻzbekiston Respublikasi Oliy Majlisi qaror qiladi:

Oʻzbekiston Respublikasining 1998-yil 25-dekabrda qabul qilingan “Reklama toʻgʻrisida”gi Qonuniga (Oʻzbekiston Respublikasi Oliy Majlisining Axborotnomasi, 1999-yil, № 1, 14-modda) quyidagi oʻzgartishlar va qoʻshimchalar kiritilsin:

1) 4-moddasi:

ikkinchi xatboshisi quyidagi tahrirda bayon etilsin:

“reklama — bevosita yoki bilvosita foyda (daromad) olish maqsadida yuridik yoki jismoniy shaxslar, mahsulot, shu jumladan tovar belgisi, xizmat koʻrsatish belgisi va texnologiyalar toʻgʻrisida har qanday shaklda va har qanday vositalar yordamida qonun hujjatlariga muvofiq tarqatiladigan maxsus axborot”;

quyidagi mazmundagi toʻqqizinchi xatboshi bilan toʻldirilsin:

“aksilreklama — notoʻgʻri (insofsiz, bila turib yolgʻon) reklama keltirib chiqargan yoki keltirib chiqarishi mumkin boʻlgan oqibatlarni bartaraf etish maqsadida tarqatiladigan raddiya”;

2) 13-moddasining uchinchi qismidagi “vakolatli davlat organi” degan soʻzlar “Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasi yoki uning hududiy organlari (bundan buyon matnda vakolatli davlat organi deb yuritiladi)” degan soʻzlar bilan almashtirilsin;

3) 17-moddasi quyidagi mazmundagi beshinchi va oltinchi qismlar bilan toʻldirilsin:

“Dasturlarning reklama qismlari tovushini teleradiodasturning tovushiga nisbatan balandroq qilish taqiqlanadi.

Telekoʻrsatuvlar namoyish etilayotganda reklama maqsadlarida harakatlanuvchi satrlardan foydalanish taqiqlanadi, reklama berilayotgan paytdagi harakatlanuvchi satrlar bundan mustasno”;

beshinchi va oltinchi qismlari tegishincha yettinchi va sakkizinchi qismlar deb hisoblansin;

4) 20-moddasining:

birinchi qismi quyidagi tahrirda bayon etilsin:

“Tashqi reklamaga alohida maxsus konstruksiyalarda, taxtalavhalarda, ekranlarda, binolarda, inshootlarda, yoʻl chekkalarida, koʻcha yoritgichlarining tayanchlari va hokazolarda joylashtiriladigan reklama kiradi”;

toʻrtinchi qismidagi “va koʻrsatkich belgilar” degan soʻzlar chiqarib tashlansin;

oltinchi qismi quyidagi tahrirda bayon etilsin:

“Tashqi reklamani madaniy meros obyektlarida, yoʻl belgilarida va svetoforlarda, ularning tirgaklarida yoki harakatni tartibga solib turuvchi boshqa har qanday qurilmalarda, shuningdek dov-daraxtlarni payhon qilish va tutash hududdagi obodonlashtirish vositalarini buzish yoʻli bilan joylashtirish taqiqlanadi”;

5) 23-moddasi quyidagi tahrirda bayon etilsin:

“23-modda. Tamaki, tamaki mahsulotlari va alkogolli ichimliklar reklamasi

Tamaki, tamaki mahsulotlari va alkogolli ichimliklar reklamasi tamaki chekish va alkogolli ichimlikni isteʼmol qilishning zarari haqida ogohlantirish bilan qoʻshib olib borilishi kerak. Tamaki, tamaki mahsulotlari va alkogolli ichimliklar jami reklamasi maydonining kamida 5 foizi hamda televideniye va radiodagi alkogolli ichimliklar reklama roligi efir vaqtining kamida 5 sekundi ana shunday ogohlantirish uchun ajratilishi lozim.

Tamaki, tamaki mahsulotlari va alkogolli ichimliklar reklamasi chekish va alkogolli ichimliklarni isteʼmol qilish jarayonlarini namoyish etishdan iborat boʻlmasligi, bu jarayonlar ijtimoiy va sport yutugʻiga erishish uchun yoki isteʼmolchilarning jismoniy va ruhiy holati yaxshilanishi uchun muhim ahamiyatga ega, degan taassurot tugʻdirmasligi kerak.

Alkogolli ichimliklar reklamasi tibbiy, sport, maktabgacha tarbiya muassasalari, shuningdek umumiy oʻrta, oʻrta maxsus, kasb-hunar va oliy taʼlim muassasalaridan kamida besh yuz metr narida joylashtirilishi kerak.

Quyidagilar taqiqlanadi:

quvvati 28 darajadan ortiq boʻlgan alkogolli ichimliklarni reklama qilish;

quvvati 28 darajagacha boʻlgan alkogolli ichimliklarni televideniye va radioda ertalab soat 7 dan kech soat 22 gacha reklama qilish;

tamaki, tamaki mahsulotlari va alkogolli ichimliklar namunalarini reklama maqsadida voyaga yetmagan shaxslarga tekin tarqatish;

asosan voyaga yetmaganlarga moʻljallangan tadbirlarga, agar ularda tamaki, tamaki mahsulotlari yoki alkogolli ichimliklarning nomi, tovar belgisi yoxud tasviridan foydalaniladigan boʻlsa, homiylik qilish;

voyaga yetmaganlarga tamaki, tamaki mahsulotlari va alkogolli ichimliklarning nomi, tovar belgisi tushirilgan tovarlarni (futbol maykalari, bosh kiyimlar, oʻyinlar va shu kabilarni) tarqatish, shu jumladan sotish;

voyaga yetmaganlarga moʻljallangan bosma nashrlarda tamaki, tamaki mahsulotlari va alkogolli ichimliklarni reklama qilish;

gazetalarning birinchi va oxirgi sahifalarida, jurnallarning va boshqa davriy nashrlarning muqovalarida, shuningdek bunday nashrlarning teleradiodasturlar eʼlon qilinayotgan sahifalarida alkogolli ichimliklarni reklama qilish;

ommaviy axborot vositalarida, tibbiy, sport, maktabgacha tarbiya, taʼlim muassasalarida, transport vositalarida (tamakini va tamaki mahsulotlarini tashishga ixtisoslashtirilganlaridan tashqari), shu jumladan umumiy foydalanishdagi yoʻlovchilar transport vositalarining salonlarida, shuningdek tashqi reklama yordamida tamakini va tamaki mahsulotlarini reklama qilish”;

6) 27-moddasining:

birinchi qismidagi “zimmasiga reklama toʻgʻrisidagi qonun hujjatlariga rioya etilishi ustidan nazorat olib borish yuklatilgan davlat organlarining talabiga koʻra ular belgilagan” degan soʻzlar “vakolatli davlat organining talabiga koʻra u belgilagan” degan soʻzlar bilan almashtirilsin;

ikkinchi qismidagi “monopoliyaga qarshi davlat organining” degan soʻzlar “vakolatli davlat organining” degan soʻzlar bilan almashtirilsin;

toʻrtinchi qismidagi “Monopoliyaga qarshi davlat organi yoki reklama toʻgʻrisidagi qonun hujjatlariga rioya etilishi ustidan davlat nazoratini amalga oshiruvchi boshqa organning” degan soʻzlar “vakolatli davlat organining” degan soʻzlar bilan almashtirilsin;

7) 29-moddasi ikkinchi qismining:

birinchi xatboshisidagi “monopoliyaga qarshi davlat organi” degan soʻzlar “vakolatli davlat organi” degan soʻzlar bilan almashtirilsin;

ikkinchi xatboshisidagi “tashqi” soʻzi chiqarib tashlansin;

uchinchi xatboshisidagi “ushbu Qonunning 27-moddasida koʻrsatilgan davlat organlariga” degan soʻzlar “vakolatli davlat organiga” degan soʻzlar bilan almashtirilsin.

Oʻzbekiston Respublikasining Prezidenti I. KARIMOV

Toshkent sh.,

2002-yil 30-avgust,

404-II-son