“Chorsu” mehmonxona kompleksini rekonstruksiya qilish chora-tadbirlari toʻgʻrisida (408-son)

26.11.2002

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Vazirlar Mahkamasining “Oʻzbekiston Respublikasida mehmonxona biznesi va xalqaro turizmni yanada rivojlantirish chora-tadbirlari toʻgʻrisida” 2002-yil 2-sentabrdagi 310-son qarorini bajarish yuzasidan hamda “Chorsu” mehmonxona kompleksini rekonstruksiya qilishni jadallashtirish maqsadida Vazirlar Mahkamasi qaror qiladi:

1. “Oʻzbekturizm” milliy kompaniyasi va “Emsash” (Turkiya) firmasining ustav jamgʻarmasi 10 mln AQSH dollaridan iborat boʻlgan masʼuliyati cheklangan jamiyat shaklidagi “Chorsu Otel” qoʻshma korxonasini tashkil etish toʻgʻrisidagi taklifiga rozilik berilsin. Oʻzbekiston tomonining ulushi “Chorsu” mehmonxona kompleksi tarzida 3 mln AQSH dollari miqdorida va “Emsash” firmasining ulushi asbob-uskunalar va pul mablagʻlari tarzida 7 mln AQSH dollari miqdorida belgilansin.

2. “Chorsu” mehmonxona kompleksini rekonstruksiya qilish investitsiya loyihasining asosiy texnik-iqtisodiy koʻrsatkichlari 1, 2-ilovalarga* muvofiq tasdiqlansin.

*Ilovalar berilmaydi.

3. Oʻzbekiston Respublikasi Davlat mulki qoʻmitasi:

“Chorsu” mehmonxonasini rekonstruksiya qilish davri uchun “Chorsu” mehmonxonasini rekonstruksiya qilish uchun jalb etilayotgan kredit mablagʻlarini taʼminlashda garov (ipoteka) shartnomasini “Buxara Palas” mehmonxonasiga rasmiylashtirish huquqini “Oʻzbekturizm” milliy kompaniyasiga bersin;

Oʻzbekiston tomonining “Chorsu Otel” qoʻshma korxonasi ustav jamgʻarmasidagi 3 mln AQSH dollari miqdoridagi ulushini rekonstruksiya qilishdan keyin 5 yil mobaynida teng ulushlar bilan sotish yuzasidan “Emsash” firmasi bilan shartnoma tuzsin.

4. “Emsash” firmasi tomonidan “Chorsu” mehmonxona kompleksini rekonstruksiya qilish tugallangungacha Tashqi iqtisodiy faoliyat milliy banki kreditini taʼminlash sifatida rekonstruksiya qilish tugallangandan keyingi davr uchun birinchi klass xorijiy bankning bank kafolati berilishi maʼlumot uchun qabul qilinsin.

5. Oʻzbekiston Respublikasi Tashqi iqtisodiy faoliyat milliy banki Turkiyaning eksport-import banki (Turkeksimbank) bilan 12950 ming AQSH dollari summasiga kredit bitimi tuzsin va Turkeksimbank mablagʻlarining “Chorsu Otel” qoʻshma korxonasi uchun qayta moliyalashtirilishini taʼminlasin.

6. Oʻzbekiston Respublikasi Vazirlar Mahkamasining 2001-yil 3-yanvardagi 4-f-son farmoyishi oʻz kuchini yoʻqotgan deb hisoblansin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari K.N.Toʻlaganov zimmasiga yuklansin.

Oʻzbekiston Respublikasining Bosh vaziri Oʻ. SULTONOV

Toshkent sh.,

2002-yil 26-noyabr,

408-son