Rossiya Federatsiyasida boʻlib turgan Oʻzbekiston Respublikasi fuqarolariga yangi namunadagi milliy haydovchilik guvohnomalarini berishda qulayliklar yaratish boʻyicha chora-tadbirlar toʻgʻrisida (667-son)
02.11.2021
Oʻzbekiston Respublikasi Vazirlar Mahkamasining
qarori
Rossiya Federatsiyasidagi yurtdoshlarimizning huquqiy himoyasini kuchaytirish, ularning mehnat faoliyatini amalga oshirishlari uchun qulay shart-sharoitlar yaratish, konsullik xizmatlarini hozirgi zamon talablariga mos ravishda rivojlantirish va Oʻzbekiston Respublikasi fuqarolariga yangi turdagi konsullik xizmati koʻrsatishni joriy etish maqsadida Vazirlar Mahkamasi qaror qiladi:
1. Quyidagilarni nazarda tutuvchi Oʻzbekiston Respublikasining Rossiya Federatsiyasidagi konsullik muassasalarida Oʻzbekiston Respublikasining eski namunadagi milliy haydovchilik guvohnomasini yangi namunadagi milliy haydovchilik guvohnomasiga almashtirish tartibi toʻgʻrisidagi vaqtinchalik nizom ilovaga muvofiq tasdiqlansin:
Rossiya Federatsiyasi hududida boʻlib turgan Oʻzbekiston Respublikasi fuqarolari va Oʻzbekiston Respublikasi hududida doimiy yashaydigan fuqaroligi boʻlmagan shaxslarning eski namunadagi milliy haydovchilik guvohnomasini yangi namunadagi milliy haydovchilik guvohnomasiga almashtirish yuzasidan Oʻzbekiston Respublikasining Rossiya Federatsiyasidagi konsullik muassasalariga murojaat qilish tartibi;
Oʻzbekiston Respublikasining Rossiya Federatsiyasidagi konsullik muassasalarida yangi namunadagi milliy haydovchilik guvohnomasini rasmiylashtirish va berish tartibi, shuningdek, ushbu harakatlarni amalga oshirganlik uchun yigʻimlar va toʻlovlar miqdori.
Belgilansinki, Vaqtinchalik nizom 2025-yil 1-yanvarga qadar amal qiladi.
2. Oʻzbekiston Respublikasi Tashqi ishlar vazirligi va Ichki ishlar vazirligi 2021-yil 25-noyabrga qadar Rossiya Federatsiyasida boʻlib turgan Oʻzbekiston Respublikasi fuqarolari va Oʻzbekiston Respublikasi hududida doimiy yashaydigan fuqaroligi boʻlmagan shaxslarning eski namunadagi milliy haydovchilik guvohnomasini yangi namunadagi milliy haydovchilik guvohnomasiga almashtirish xizmatini joriy etish maqsadida axborot tizimlari integratsiya qilinishini taʼminlasin.
3. Oʻzbekiston Respublikasi Ichki ishlar vazirligi 2021-yil 1-dekabrga qadar Oʻzbekiston Respublikasining Rossiya Federatsiyasidagi konsullik muassasalarini yangi namunadagi milliy haydovchilik guvohnomasini chop etish uskunalari va plastik kartalar bilan taʼminlovchi tashkilot bilan hamkorlikda eski namunadagi milliy haydovchilik guvohnomasini yangi namunadagi milliy haydovchilik guvohnomasiga almashtirish uchun zarur uskunalar bilan taʼminlasin.
4. Oʻzbekiston Respublikasi Ichki ishlar vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.
5. Mazkur qarorning bajarilishini nazorat qilish Oʻzbekiston Respublikasi Bosh vazirining maslahatchisi — Xorijda vaqtinchalik mehnat faoliyatini amalga oshirayotgan Oʻzbekiston Respublikasi fuqarolari huquqlarini himoya qilish va xalqaro iqtisodiy hamkorlik masalalari departamenti boshligʻi M.A. Xayriddinov, Oʻzbekiston Respublikasi tashqi ishlar vaziri A.X. Kamilov hamda Oʻzbekiston Respublikasi ichki ishlar vaziri P.R. Bobojonov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2021-yil 2-noyabr,
667-son
Vazirlar Mahkamasining 2021-yil 2-noyabrdagi 667-son qaroriga ILOVA
Oʻzbekiston Respublikasining Rossiya Federatsiyasidagi konsullik muassasalarida Oʻzbekiston Respublikasining eski namunadagi milliy haydovchilik guvohnomasini yangi namunadagi milliy haydovchilik guvohnomasiga almashtirish tartibi toʻgʻrisida
VAQTINCHALIK NIZOM
1-bob. Umumiy qoidalar
1. Ushbu Vaqtinchalik nizom Oʻzbekiston Respublikasining Rossiya Federatsiyasidagi konsullik muassasalari (keyingi oʻrinlarda — konsullik muassasasi) tomonidan Rossiya Federatsiyasida boʻlib turgan Oʻzbekiston Respublikasi fuqarolari va Oʻzbekiston Respublikasida doimiy yashaydigan fuqaroligi boʻlmagan shaxslarning (keyingi oʻrinlarda — talabgor) eski namunadagi milliy haydovchilik guvohnomasini yangi namunadagi milliy haydovchilik guvohnomasiga almashtirish tartibini belgilaydi.
2. Yangi namunadagi milliy haydovchilik guvohnomasi konsullik muassasasi orqali Oʻzbekiston Respublikasi Ichki ishlar vazirligining Yoʻl harakati xavfsizligi bosh boshqarmasi (keyingi oʻrinlarda — Yoʻl harakati xavfsizligi bosh boshqarmasi) tomonidan rasmiylashtiriladi.
3. Yoʻqotilgan milliy haydovchilik guvohnomasini tiklash Vazirlar Mahkamasining “Avtomototransport vositalari va shahar elektr transport vositalari haydovchilarini tayyorlash, qayta tayyorlash va ularning malakasini oshirish hamda avtomototransport vositalarini boshqarish huquqini beruvchi haydovchilik guvohnomasini olish uchun nazariy va amaliy imtihonlarni oʻtkazish boʻyicha nodavlat taʼlim xizmatlari koʻrsatish faoliyatini litsenziyalash tartibini yanada takomillashtirish chora-tadbirlari toʻgʻrisida” 2018-yil 31-maydagi 408-son qaroriga muvofiq Oʻzbekiston Respublikasi hududida amalga oshiriladi.
4. Eski namunadagi milliy haydovchilik guvohnomasini yangi namunadagi milliy haydovchilik guvohnomasiga almashtirish ushbu Vaqtinchalik nizomga 1-ilovada keltirilgan sxemaga muvofiq amalga oshiriladi.
2-bob. Eski namunadagi milliy haydovchilik guvohnomasi yangi namunadagi milliy haydovchilik guvohnomasiga almashtirish boʻyicha talabgorning konsullik muassasasiga murojaat qilish tartibi
5. Talabgor eski namunadagi milliy haydovchilik guvohnomasini yangi namunadagi milliy haydovchilik guvohnomasiga almashtirish uchun konsullik muassasasiga ushbu Vaqtinchalik nizomga 2-ilovaga muvofiq shakl boʻyicha ariza bilan shaxsan murojaat qiladi.
Eski namunadagi milliy haydovchilik guvohnomasi yangi namunadagi milliy haydovchilik guvohnomasiga almashtirish boʻyicha talabgorning arizasi konsullik muassasasi mansabdor shaxsi (keyingi oʻrinlarda — konsullik mansabdor shaxsi) tomonidan qabul qilinadi.
6. Talabgorning eski namunadagi milliy haydovchilik guvohnomasini yangi namunadagi milliy haydovchilik guvohnomasiga almashtirish boʻyicha arizasiga quyidagi hujjatlar ilova qilinadi:
xorijga chiqish biometrik pasporti yoki fuqarolik biometrik pasporti (identifikatsiya ID-karta) (konsullik mansabdor shaxsi tomonidan nusxa olinadi va asli talabgorga qaytarib beriladi);
eski namunadagi haydovchilik guvohnomasi va uning taloni (konsullik mansabdor shaxsi tomonidan nusxa olinadi va asli talabgorga qaytarib beriladi);
ushbu Vaqtinchalik nizomning 7-bandida belgilangan miqdorda konsullik yigʻimi va haqiqiy xarajatlarning oʻrnini qoplash hisobidan yigʻim, shuningdek, haydovchilik guvohnomasini berganlik uchun toʻlov toʻlaganligi toʻgʻrisida kvitansiya.
Talabgordan boshqa hujjatlarni talab qilish taqiqlanadi.
7. Konsullik muassasasi orqali eski namunadagi milliy haydovchilik guvohnomasi yangi namunadagi milliy haydovchilik guvohnomasiga almashtirish uchun quyidagilar undiriladi:
bazaviy hisoblash miqdorining 70 foizi miqdorida toʻlov. Bunda toʻlov tegishli toʻlov amalga oshiriladigan kunda Oʻzbekiston Respublikasi Markaziy banki tomonidan oʻrnatilgan kurs boʻyicha xorijiy valyutada qabul qilinadi;
20 AQSH dollari miqdorida konsullik yigʻimi;
20 AQSH dollari miqdorida haqiqiy xarajatlarning oʻrnini qoplash uchun yigʻim.
8. Ushbu Vaqtinchalik nizom 7-bandining ikkinchi xatboshisida nazarda tutilgan toʻlovni Oʻzbekiston Respublikasi Ichki ishlar vazirligining hisobvaragʻiga oʻtkazish tartibi Tashqi ishlar vazirligi, Ichki ishlar vazirligi va Moliya vazirligi tomonidan belgilanadi.
3-bob. Oʻzbekiston Respublikasining Rossiya Federatsiyasidagi konsullik muassasalarida yangi namunadagi milliy haydovchilik guvohnomasini rasmiylashtirish tartibi
9. Konsullik mansabdor shaxsi tomonidan milliy haydovchilik guvohnomasini almashtirish axborot almashinuvi elektron tizimi orqali mazkur Vaqtinchalik nizomga 3-ilovaga keltirilgan shakl boʻyicha anketa toʻldiriladi.
10. Elektron anketa toʻldirilgach, talabgor konsullik mansabdor shaxsi tomonidan fotosuratga olinadi va maʼlumotlar toʻgʻriligi tekshirilib, ushbu anketa talabgor tomonidan maxsus elektron qurilmaga oʻz imzosini qoʻygan holda tasdiqlanadi.
11. Konsullik mansabdor shaxsi tasdiqlangan anketani bir ish kuni ichida axborot almashinuvi elektron tizimi orqali Yoʻl harakati xavfsizligi bosh boshqarmasiga yuboradi.
12. Yoʻl harakati xavfsizligi bosh boshqarmasi bir ish kuni ichida anketani oʻrganib chiqadi va talabgorning milliy haydovchilik guvohnomasi qonunchilik hujjatlariga muvofiq berilganligi maʼlumotlar bazasi orqali tasdiqlangandan soʻng, shu kunning oʻzida yangi namunadagi milliy haydovchilik guvohnomasini belgilangan tartibda rasmiylashtiradi.
Belgilangan tartibda rasmiylashtirilgan milliy haydovchilik guvohnomasini Yoʻl harakati xavfsizligi bosh boshqarmasi diplomatik kanallar orqali konsullik muassasalariga joʻnatish va talabgorga berish uchun Oʻzbekiston Respublikasi Axborot texnologiyalari va kommunikatsiyalarini rivojlantirish vazirligining Davlat feldyegerlik xizmati orqali Oʻzbekiston Respublikasi Tashqi ishlar vazirligining Konsullik-huquqiy departamentiga yuboradi.
13. Milliy haydovchilik guvohnomasi rasmiylashtirilganidan soʻng, Yoʻl harakati xavfsizligi bosh boshqarmasi axborot almashinuvi elektron tizimiga guvohnoma muvaffaqiyatli rasmiylashtirilganligi yoki guvohnoma berish rad etilganligi haqida tegishli maʼlumotni kiritadi.
14. Milliy haydovchilik guvohnomasini konsullik muassasasiga hamda konsullik muassasasi orqali Oʻzbekiston Respublikasiga yetkazib berish navbatdagi diplomatik pochta orqali, shuningdek, Oʻzbekiston Respublikasi Tashqi ishlar vazirligi bilan kelishgan holda navbatdan tashqari pochta orqali amalga oshiriladi.
4-bob. Oʻzbekiston Respublikasining Rossiya Federatsiyasidagi konsullik muassasalarida yangi namunadagi milliy haydovchilik guvohnomasini berish tartibi
15. Konsullik mansabdor shaxs diplomatik pochta orqali qabul qilgan milliy haydovchilik guvohnomasini talabgorga ushbu Vaqtinchalik nizomga 2-ilovaga muvofiq avval toʻldirilgan arizasiga hamda hisobga olish kitobiga olganligi toʻgʻrisida imzo qoʻydirib topshiradi.
Yangi namunadagi milliy haydovchilik guvohnomasini talabgorga topshirilgan vaqtda eski namunadagi haydovchilik guvohnomasi va uning taloni olib qoʻyilishi shart.
Talabgorning eski namunadagi milliy haydovchilik guvohnomasini konsullik mansabdor shaxsi keyinchalik Oʻzbekiston Respublikasi Axborot texnologiyalari va kommunikatsiyalarini rivojlantirish vazirligining Davlat feldyegerlik xizmati orqali Yoʻl harakati xavfsizligi bosh boshqarmasiga qonunchilik hujjatlarida belgilangan tartibda yoʻq qilish maqsadida yuborish uchun diplomatik kanallar orqali Oʻzbekiston Respublikasi Tashqi ishlar vazirligi Konsullik-huquqiy departamentiga joʻnatadi.
16. Talabgor anketada ishonchsiz maʼlumotlar koʻrsatganligi, konsullik yigʻimi va haqiqiy xarajatlarning oʻrnini qoplash hisobidan yigʻim hamda toʻlov stavkasini toʻliq amalga oshirmaganligi, hujjatlarning toʻliq taqdim etilmaganligi yoki qalbaki hujjatlar taqdim etilganligi yangi namunadagi milliy haydovchilik guvohnomasini almashtirib berishni rad etish uchun asos boʻladi.
17. Yangi namunadagi milliy haydovchilik guvohnomasi qatʼiy hisobot beriladigan hujjat hisoblanadi. Milliy haydovchilik guvohnomasi egasining shaxsan oʻziga topshiriladi, notarial tasdiqlangan ishonchnoma asosida murojaat qiluvchi uchinchi shaxslar bundan mustasno.
18. Yangi namunadagi milliy haydovchilik guvohnomasi berilganligining hisobini yuritish mazkur Vaqtinchalik nizomga 4-ilovaga muvofiq shakl boʻyicha Hisobga olish kitobida qayd etiladi.
5-bob. Yakunlovchi qoidalar
19. Talabgor konsullik muassasasining mansabdor shaxslari va boshqa tashkilotlar xodimlarining xatti-harakatlari ustidan qonunchilik hujjatlarida belgilangan tartibda shikoyat qilishi mumkin.
20. Mazkur Nizom qoidalari buzilishida aybdor boʻlgan shaxslar qonunchilik hujjatlariga muvofiq javob beradi.
Oʻzbekiston Respublikasining Rossiya Federatsiyasidagi konsullik muassasalarida Oʻzbekiston Respublikasining eski namunadagi milliy haydovchilik guvohnomasini yangi namunadagi milliy haydovchilik guvohnomasiga almashtirish tartibi toʻgʻrisidagi vaqtinchalik nizomga 1-ILOVA
Konsullik muassasasida eski namunadagi milliy haydovchilik guvohnomasini yangi namunadagi milliy haydovchilik guvohnomasiga almashtirish
SXEMASI
Bosqichlar Subyektlar Tadbirlar Bajarish muddati 1-bosqich Talabgor 1. Eski namunadagi milliy haydovchilik guvohnomasini yangi namunadagisiga almashtirish uchun konsullik muassasasiga murojaat qilish. 1. Xohishiga koʻra 2. Nizomning 6 va 7-bandlariga muvofiq zarur boʻlgan hujjatlarni taqdim qilish. 2. Murojaat qilinganda 2-bosqich Konsullik muassasasi Talabgor nomidan soʻrovnomani toʻldirish va uni axborot tizimi orqali Ichki ishlar vazirligi Yoʻl harakati xavfsizligi bosh boshqarmasiga (keyingi oʻrinda — IIV YHXBB) yuborish. Bir ish kunida 3-bosqich IIV YHXBB 1. Taqdim etilgan maʼlumotlarni koʻrib chiqish. 2. Talabgorning eski namunadagi milliy haydovchilik guvohnomasi qonunchilik hujjatlariga muvofiq berilganligi maʼlumotlar bazasi orqali tasdiqlash (guvohnoma tasdiqlanmagan holda asoslangan sabablarga koʻra rad etish xabarnomasini konsullik muassasasiga axborot tizimi orqali yuborish). 3. Yangi namunadagi milliy haydovchilik guvohnomasini rasmiylashtirish. 4. Rasmiylashtirilgan yangi namunadagi milliy haydovchilik guvohnomasini Tashqi ishlar vazirligi Konsullik-huquqiy departamentiga (keyingi oʻrinda — TIV KHD) yuborish. Bir ish kunida 4-bosqich TIV KHD Yangi namunadagi milliy haydovchilik guvohnomasini konsullik muassasasiga diplomatik pochta orqali yuborish. Diplomatik pochta jadvaliga muvofiq 5-bosqich Konsullik muassasasi 1. YHXBBdan yangi namunadagi milliy haydovchilik guvohnomasini yoki asoslangan sabablarga koʻra rad etish xabarnomasini olish. 2. Eski haydovchilik guvohnomasi va uning talonini olib qoʻyish. 3. Yangi namunadagi milliy haydovchilik guvohnomasini egasiga berish yoki asoslangan sabablarga koʻra rad etish. Bir ish kunida
Oʻzbekiston Respublikasining Rossiya Federatsiyasidagi konsullik muassasalarida Oʻzbekiston Respublikasining eski namunadagi milliy haydovchilik guvohnomasini yangi namunadagi milliy haydovchilik guvohnomasiga almashtirish tartibi toʻgʻrisidagi vaqtinchalik nizomga 2-ILOVA
Oʻzbekiston Respublikasining Rossiya Federatsiyasidagi konsullik muassasalarida Oʻzbekiston Respublikasining eski namunadagi milliy haydovchilik guvohnomasini yangi namunadagi milliy haydovchilik guvohnomasiga almashtirish tartibi toʻgʻrisidagi vaqtinchalik nizomga 3-ILOVA
Oʻzbekiston Respublikasining Rossiya Federatsiyasidagi konsullik muassasalarida Oʻzbekiston Respublikasining eski namunadagi milliy haydovchilik guvohnomasini yangi namunadagi milliy haydovchilik guvohnomasiga almashtirish tartibi toʻgʻrisidagi vaqtinchalik nizomga 4-ILOVA
Yangi namunadagi milliy haydovchilik guvohnomasini berilganligini hisobini yuritish
KITOBI
T/r F.I.O. Pasport yoki identifikatsiya ID-karta seriyasi va raqami Eski haydovchilik guvohnomasining seriyasi va raqami Yangi haydovchilik guvohnomasining seriyasi va raqami Berilgan sana Talabgorning imzosi 1. 2. 3. 4. 5. 6. 7.