Mudofaa vazirligi, Qoraqalpogʻiston Respublikasi vazirlar kengashi, viloyatlar, shaharlar va tumanlar hokimliklarining harbiy xizmatga chaqirishni tashkil etish va oʻtkazish yuzasidan masʼuliyatini oshirish toʻgʻrisida (333-son)

26.09.2002

Oʻzbekiston Respublikasi Vazirlar Mahkamasining

qarori

Davlatning mudofaa qobiliyatini yanada mustahkamlash, harbiy xizmatga chaqirishni tashkil etish va oʻtkazish uchun Mudofaa vazirligi, Qoraqalpogʻiston Respublikasi Vazirlar Kengashi, viloyatlar, shaharlar, tumanlar hokimliklari, manfaatdor vazirliklar va idoralar mansabdor shaxslarining shaxsiy masʼuliyatini oshirish, Qurolli Kuchlarni har tomonlama tayyorlangan chaqiriluvchilar bilan toʻldirish maqsadida Vazirlar Mahkamasi qaror qiladi:

1. Quyidagilar Oʻzbekiston Respublikasi Mudofaa vazirliga, Qoraqalpogʻiston Respublikasi Vazirlar Kengashi, viloyatlar, shaharlar, tumanlar hokimliklarining muhim vazifalari hisoblansin:

fuqarolarning har birining oʻziga xos xususiyatlarini chuqur oʻrganishni hisobga olgan holda ularni Qurolli Kuchlar safida muddatli harbiy xizmatni oʻtash uchun tanlash va chaqirishni tashkil etish va oʻtkazishning yuksak sifatini taʼminlash;

fuqarolarni muddatli harbiy xizmatga chaqirishni sifatli tashkil etish va oʻtkazish uchun mahalliy hokimiyat organlari, fuqarolarning oʻzini oʻzi boshqarish organlari, mudofaa ishlari boshqarmalari va boʻlimlarining masʼuliyatini oshirish;

fuqarolarni muddatli harbiy xizmatga chaqirishni tashkil etish, oʻtkazish uchun chaqiriq komissiyalari raislari va aʼzolarining shaxsiy javobgarligini oshirish, ular tomonidan qabul qilinadigan qarorlarning qonuniyligi va xolisligini taʼminlash;

Qurolli Kuchlarga chaqirishga jamoat tashkilotlarini jalb etish va tadbirlarga keng ijtimoiy ahamiyat baxsh etish;

yoshlarni harbiy xizmatga maʼnaviy-axloqiy va harbiy-texnik jihatdan tayyorlash tizimini takomillashtirish.

Fuqarolarni Qurolli Kuchlarga chaqirishni tashkil etish tizimi armiyaga chaqirilayotgan yoshlar uchun xolis, adolatli, Qonunga toʻla muvofiq tanlash shartlarini taʼminlashi, ular uchun harbiy xizmat konstitutsiyaviy burchni bajarishgina boʻlib qolmasdan, balki nufuzli ish, oʻzining jamiyatdagi oʻrnini oʻylab tanlash, jismoniy, maʼnaviy-axloqiy va ruhiy-psixologik chiniqish maktabiga aylanishiga koʻmaklashishi kerak.

2. Belgilansinki, Qoraqalpogʻiston Respublikasi Vazirlar Kengashi Raisining oʻrinbosari, viloyatlar, shaharlar va tumanlar hokimlarining ijtimoiy masalalar boʻyicha mutasaddi oʻrinbosarlari joylardagi chaqiriq komissiyalarining raislari etib tayinlanadilar.

4. Qoraqalpogʻiston Respublikasi Vazirlar Kengashi, viloyatlar, shaharlar va tumanlar hokimliklari:

bir hafta muddatda fuqarolarni muddatli harbiy xizmatga navbatdagi chaqirishni oʻtkazishga yoʻnaltirilgan kompleks chora-tadbirlarni amaldagi qonun hujjatlariga aniq muvofiq ravishda, chaqiriluvchilarni tanlashda subyektivizm namoyon boʻlishining har qanday imkoniyatini istisno etgan holda ishlab chiqsinlar va ularning amalga oshirilishini taʼminlasinlar;

chaqiriq komissiyalarini yigʻilish va chaqiriq punktlarida ishlash uchun zarur shart-sharoitlar, aloqa vositalari, avtomobil transporti bilan, shuningdek jamoat tartibi saqlanishini taʼminlasinlar;

chaqiriqning oshkoraligini, ochiqligini va komissiyalar ishlari ustidan samarali jamoat nazoratini amalga oshirish uchun chaqiriq komissiyalari tarkibiga Oʻzbekiston yoshlar ittifoqi, “Nuroniy” va “Mahalla” jamgʻarmalari, fuqarolarning oʻzini oʻzi boshqarish organlari, xotin-qizlar qoʻmitalari vakillarini kiritsinlar;

hamma joyda chaqiriluvchilarning tantanali ravishda kuzatilishini taʼminlasinlar, toki ushbu tadbir yangicha anʼana, Qurolli Kuchlarda muddatli xizmatga yuborilayotgan har bir chaqiriluvchi hayotida unutilmas voqea boʻlib qolsin;

harbiy xizmatning nufuzini va ahamiyatini oshirish boʻyicha kompleks chora-tadbirlarni amalga oshirish maqsadida fuqarolar chaqiruvini tashkil etish va oʻtkazishning ommaviy axborot vositalarida muntazam ravishda va har tomonlama yoritilishini taʼminlasinlar;

xar bir chaqiriq yakunlari boʻyicha oʻn kun muddatda uning natijalari chuqur tahlil qilinishini hamda yakuniy hisobotlarning Fuqarolarni muddatli harbiy xizmatga chaqirishni tashkil etish va oʻtkazishni nazorat qilish boʻyicha Respublika komissiyasiga taqdim etilishini taʼminlasinlar.

5. Mudofaa vazirligi (Q.Gʻ.Gʻulomov);

Mudofaa vazirligi, harbiy okruglar mansabdor shaxslarining, mudofaa ishlari boshqarmalari va boʻlimlari boshliqlarining fuqarolarni muddatli harbiy xizmatga chaqirishning tashkil etilishi va oʻtkazilishi yuzasidan shaxsiy masʼuliyatini oshirishni taʼminlasin, buning uchun ularni vaqti-vaqti bilan attestatsiyadan oʻtkazishni amalda qoʻllansin;

ikki oy muddatda mudofaa ishlari boshqarmalari va boʻlimlarini qoʻshinlarda xizmat qilishda yetarli tajribaga ega boʻlgan, kasb boʻyicha eng yuqori darajada tayyorlangan va intizomli ofitser kadrlar bilan taʼminlasin;

Qurolli Kuchlarga xizmatga kelayotganlarni qoʻshinlarda psixologik va jismoniy jihatdan tezda moslashtirishga yoʻnaltirilgan chora-tadbirlar kompleksini bir oy muddatda ishlab chiqsin va joriy etsin;

2003-yil mobaynida Mudofaa vazirligida, harbiy okruglarda, mudofaa ishlari boshqarmalari va boʻlimlarida chaqiriqgacha yoshdagi va chaqiriq yoshidagilar harbiy hisobga toʻliq va toʻgʻri olinishini taʼminlash, ularni Qurolli Kuchlarda xizmat qilishga tayyorlash hamda muddatli harbiy xizmatga chaqirishning oʻtkazilishi ustidan tezkor nazoratni amalga oshirish uchun chaqiriluvchilarni hisobga olishning avtomatlashtirilgan tizimini joriy qilsin.

6. Sogʻliqni saqlash vazirligi (F.Gʻ.Nazirov) Mudofaa vazirligi, Qoraqalpogʻiston Respublikasi Vazirlar Kengashi, viloyatlar, shaharlar va tumanlar hokimliklari bilan birgalikda:

chaqiriluvchilarning yuqori malakali shifokorlar tomonidan tibbiy tekshiruvdan sifatli oʻtkazilishini tashkil etsin, chaqiriluvchilarni tibbiy tekshiruvdan oʻtkazish boʻyicha muqobil tibbiy komissiyalar tuzilishini taʼminlash tizimini yaratsin;

Sogʻliqni saqlash vazirligi mansabdor shaxslarining, chaqiriq komissiyalari ishiga jalb etiladigan tibbiyot xodimlarining ular tomonidan qabul qilinadigan qarorlarning asoslanganligi uchun shaxsiy masʼuliyatini oshirsin;

chaqiriluvchilar sogʻligʻining ahvoliga, qoʻshinlarning har xil turlarida xizmat qilishga tibbiy jihatdan ruxsat berishga nisbatan talablarni qatʼiylashtirsin va aniqlashtirsin, sogʻligʻining ahvoli qoʻyilayotgan talablarga muvofiq boʻlmagan shaxslarning xizmatga chaqirilishi imkoniyatlariga chek qoʻysin;

oʻsmirlar poliklinikalari, markazlar va davolash-profilaktika muassasalarining, chaqiriq va yigʻilish punktlari tibbiy komissiyalarining zarur zamonaviy davolash-diagnostika asbob-anjomlari bilan jihozlanishini taʼminlasin;

chaqiriqgacha yoshdagi va chaqiriluvchi yoshlar oʻrtasida davolash-sogʻlomlashtirish ishlarini tubdan yaxshilash, oʻsmirlarning davolash muassasalarini malakali tibbiy xodimlar bilan taʼminlash, oʻsmirlarga xizmat koʻrsatuvchi shifokorlar nufuzini oshirish boʻyicha aniq chora-tadbirlar koʻrsin.

Sogʻliqni saqlash vazirligi Mudofaa vazirligi (Q.Gʻ. Gʻulomov) bilan birgalikda Qurolli Kuchlar uchun yagona boʻlgan Tinchlik va urush vaqtida Oʻzbekiston Respublikasi Qurolli Kuchlarida tibbiy tekshiruvdan oʻtkazish toʻgʻrisidagi Nizomni ikki oy muddatda ishlab chiqsin va tasdiqlasin.

7. Mudofaa vazirligi (Q.Gʻ.Gʻulomov), Oliy va oʻrta maxsus taʼlim vazirligi (S.S.Gʻulomov) akademik litseylarda, kasb-hunar kollejlarida yoshlarni harbiy xizmatga chaqirishdan oldin tayyorlash dasturini harbiy islohotlar talablarini hisobga olgan holda ikki oy muddatda ishlab chiqsinlar va tasdiqlasinlar.

8. “Oʻzteleradio” kompaniyasi (A.K. Koʻchimov) Oʻzbekiston matbuot va axborot agentligi (R.Sh.Shogʻulomov) bilan birgalikda, harbiy xizmat nufuzini oshirish maqsadida yoshlarni Qurolli Kuchlarda xizmat qilishga tayyorlash, fuqarolarni muddatli harbiy xizmatga chaqirishni, chaqiriq komissiyalari ishlarini tashkil etish va oʻtkazish masalalarining ommaviy axborot vositalarida har tomonlama yoritilishini taʼminlasinlar.

9. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T.Sultonov va Oʻzbekiston Respublikasi Prezidenti huzuridagi Milliy xavfsizlik Kengashining Kotibi Gʻ.D.Obloyorov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2002-yil 26-sentabr,

333-son