Toshkent davlat-aksionerlik qurilish korporatsiyasi “Toshkent qurilish”ni tashkil etish va uning faoliyati masalalari (83-son)

15.02.1993

Oʻzbekiston Respublikasi Vazirlar Mahkamasining

qarori

“Toshkent davlat-aksionerlik qurilish korporatsiyasini tashkil qilish toʻgʻrisida”gi Farmonga va bozor iqtisodiyotiga oʻtish sharoitlarida qurilish korxonalari va tashkilotlarining samarali faoliyat koʻrsatishini taʼminlash maqsadida Vazirlar Mahkamasi qaror qiladi:

1. Belgilab qoʻyilsinki, Toshkent davlat-aksionerlik qurilish korporatsiyasi:

tugatilgan “Toshkentboshqurilish” boshqarmasining majburiyatlari boʻyicha huquqiy voris hisoblanadi va oʻz faoliyatida Oʻzbekiston Respublikasi Vazirlar Mahkamasiga hisob beradi;

muassislar tomonidan oʻziga berilgan huquqlar doirasida moliyaviy-iqtisodiy, xoʻjalik ijtimoiy faoliyat masalalarini mustaqil hal etadi, korporatsiya Kengashi qaroriga muvofiq markazlashtirilgan sugʻurta, zaxira va boshqa jamgʻarmalarni tashkil etadi;

korporatsiya tarkibiga kiruvchi birlashmalar, trestlar, korxonalar va tashkilotlarning davlat mulkini boshqaradi;

mehnat jamoalarining manfaatlarini hisobga olgan holda korporatsiya tarkibiga kiruvchi korxonalar va tashkilotlarni aksionerlik jamiyatlariga, jamoa korxonalariga va mulkchilikning boshqa shakllariga aylantirish toʻgʻrisida belgilangan tartibda takliflar kiritadi.

2. “Toshkentqurilish” korporatsiyasi tarkibiga 1-ilovaga* muvofiq oʻz xoʻjalik mustaqilliklarini va yuridik shaxs huquqlarini saqlab qoluvchi birlashmalar, trestlar, korxonalar va tashkilotlar kiritilsin.

* 1-ilova rus tilidagi matnda berilgan.

3. Oʻzbekiston Respublikasi Davlat mulki qoʻmitasi va “Toshkentqurilish” korporatsiyasi 1993-yil davomida korporatsiya tarkibiga kiruvchi birlashmalar, trestlar, korxonalar va tashkilotlarni aksionerlik jamiyatlariga, jamoa korxonalariga aylantirish boʻyicha tashkiliy tadbirlarni 2-ilovaga* muvofiq amalga oshirsinlar.

* 2-ilova rus tilidagi matnda berilgan.

4. Birlashmalar, trestlar, korxonalar va tashkilotlar:

ochiq turdagi aksionerlik jamiyatlariga aylantirilayotganda — davlatga tegishli aksiyalar ulushi 51 foiz miqdorida belgilansin, qolgan qismi mehnat jamoalari aʼzolariga imtiyozli sotib olish huquqi berilgan holda ochiq sotish yoʻli bilan tarqatilsin;

yopiq turdagi aksionerlik jamiyatlariga aylantirilayotganda — aksiyalarining 55 foizi davlat mulki qilib biriktirilsin, 25 foizi mehnat jamoalari aʼzolari, qolgan qismi esa korporatsiya korxonalari va tashkilotlari oʻrtasida tarqatilsin.

5. Belgilab qoʻyilsinki, Toshkent qurilishi korporatsiyasining ustav fondi korporatsiya tarkibiga kiruvchi birlashmalar, trestlar, korxonalar va tashkilotlari davlat tasarrufidan chiqarish va xususiylashtirishdan hosil boʻlgan aksionerlik jamiyatlarining davlatga tegishli boʻlgan aksiyalarining 60 foizi, shuningdek boshqa manfaatdor yuridik shaxslarning, shu jumladan, xorijiy yuridik shaxslarning paylari hisobiga shakllanadi.

6. Oʻzbekiston Respublikasi Moliya vazirligi huzuridagi Davlat mulki jamgʻarmasi korporatsiyaga:

davlatga tegishli aksiyalarning hissalariga muvofiq aksionerlik jamiyatlarining faoliyatiga rahbarlik qilish huquqini bersin;

davlatga tegishli aksiyalar boʻyicha dividendlarning bir qismini korporatsiyaning rivojlanishi uchun shartnoma asosida unga berishni amalda qoʻllasin.

7. Korporatsiyani boshqarishning yuqori organi uning Kengashi hisoblanadi, u Boshqaruvni va taftish komissiyasini saylaydi, korporatsiya xodimlari mehnatiga haq toʻlash shartlari va tizimini belgilaydi. Korporatsiya apparati tuzilmasi, xodimlarning cheklangan soni 48 nafardan iborat qilib belgilangan holda (xizmat koʻrsatuvchi xodimlardan tashqari), 3-ilovaga* muvofiq tasdiqlansin.

* 3-ilova rus tilidagi matnda berilgan.

Boshqaruv raisi va uning oʻrinbosarlari korporatsiya Kengashi tomonidan saylanadi va Vazirlar Mahkamasi tomonidan tasdiqlanadi. Korporatsiyaga raisning 3 nafar oʻrinbosari, shu jumladan, bir nafar birinchi oʻrinbosari boʻlishi tavsiya etilsin. Korporatsiya Boshqaruvi raisiga va uning oʻrinbosarlariga vazirliklar va idoralarning tegishli xodimlariga belgilangan moddiy-maishiy taʼminot, tibbiy va transport xizmati koʻrsatish shartlari joriy etilsin.

8. “Toshkentqurilish” korporatsiyasi bir oy muddatda korporatsiyaning Ustavini tasdiqlash uchun Vazirlar Mahkamasiga kiritsin.

9. Oʻzbekiston Respublikasi Aloqa vazirligi ilgari “Toshkentboshqurilish” boshqarmasi uchun oʻrnatilgan aloqa turlarini va telefonlarni korporatsiyaga saqlab qolsin.

10. Korporatsiya Toshkent shahar, Oʻzbekiston shoh koʻchasidagi 16-uyda joylashishi belgilab qoʻyilsin.

11. Oʻzbekiston SSR Ministrlar Sovetining “Oʻzbekiston SSRning Toshkent shahridagi qurilishlar boʻyicha Bosh boshqarmasini tashkil etish toʻgʻrisida” 1989-yil 16-noyabrdagi 374-son qarori oʻz kuchini yoʻqotgan deb hisoblansin.

12. Mazkur qarorning bajarilishini nazorat qilish Bosh vazirning oʻrinbosari oʻrtoq K.N. Toʻlaganov zimmasiga yuklatilsin.

Vazirlar Mahkamasining Raisi I. KARIMOV

Toshkent sh.,

1993-yil 15-fevral,

83-son