“G.V. Plexanov nomidagi rossiya iqtisodiyot universiteti” oliy kasb taʼlimi federal Davlat budjeti taʼlim muassasasining Toshkent shahridagi filiali faoliyatini tashkil etish toʻgʻrisida (318-son)

05.09.2002

Oʻzbekiston Respublikasi Vazirlar Mahkamasining

qarori

“Taʼlim toʻgʻrisida”gi Oʻzbekiston Respublikasi Qonuniga muvofiq hamda mamlakatning ijtimoiy-iqtisodiy rivojlanishida iqtidorli yoshlarning salohiyatini roʻyobga chiqarish va ulardan samarali foydalanish, taʼlim sohasida xalqaro hamkorlikni kengaytirish maqsadida Vazirlar Mahkamasi qaror qiladi:

2. “G.V. Plexanov nomidagi Rossiya iqtisodiyot universiteti” oliy taʼlim Federal davlat budjeti taʼlim muassasasining Toshkent shahridagi filialiga (keyingi oʻrinlarda filial deb ataladi) Oʻzbekiston Respublikasi hududida oliy kasb taʼlimi sohasida taʼlim faoliyatini yuritish huquqi berilsin.

Oliy taʼlim sifatiga qoʻyiladigan umumiy eʼtirof etilgan xalqaro talablarga hamda “Taʼlim toʻgʻrisida”gi Oʻzbekiston Respublikasi Qonuniga muvofiq yuqori malakali mutaxassislar tayyorlash filialning asosiy vazifasi hisoblansin.

3. Belgilab qoʻyilsinki:

Filial “G.V. Plexanov nomidagi Rossiya iqtisodiyot universiteti” oliy kasb taʼlimi Federal davlat budjeti taʼlim muassasasining alohida tarkibiy boʻlinmasi — oliy taʼlimning barcha bosqichida bakalavriat va magistratura boʻyicha mutaxassislar tayyorlashni, shuningdek oliy taʼlimdan keyingi taʼlimni hamda kadrlar malakasini oshirish va ularni qayta tayyorlashni amalga oshiradigan oliy taʼlim muassasasi hisoblanadi;

filialda oʻqitish Oʻzbekiston Respublikasi davlat taʼlim standartlari talablarini hisobga olgan holda, universitetning oʻquv rejalari va dasturlari boʻyicha toʻlov-kontrakt asosida olib boriladi;

filialning joriy faoliyatini mablagʻ bilan taʼminlash, binolar va inshootlarni rekonstruksiya qilish, mukammal taʼmirlash, moddiy-texnika va oʻquv-metodik bazani jihozlash universitetning oʻz mablagʻlari, talabalarni toʻlov-kontrakt asosida oʻqitish uchun tushumlar, homiylar ajratadigan mablagʻlar va boshqa manbalar hisobiga amalga oshiriladi;

filialga abituriyentlar qabul qilish, shuningdek filial bitiruvchilarini attestatsiyadan oʻtkazish universitet tomonidan belgilangan tartibda va muddatlarda amalga oshiriladi;

bakalavrlar tayyorlash dasturi boʻyicha oʻqitish uchun filialga har yili qabul qilinuvchilar 150 kishini, magistrlar tayyorlash dasturi boʻyicha esa — 75 kishini tashkil etadi.

Belgilansinki, filialning bitiruvchilariga universitetning Oʻzbekiston Respublikasida oliy taʼlim toʻgʻrisidagi hujjat sifatida tan olinadigan belgilangan namunadagi diplomi beriladi.

4. Oʻzbekiston Respublikasi Oliy va oʻrta maxsus taʼlim vazirligi universitet bilan birgalikda bakalavriat taʼlim yoʻnalishlari va magistratura mutaxassisliklari roʻyxatini belgilasin.

5. Universitet:

ilgʻor pedagogik va axborot texnologiyalarini, fan va oliy taʼlimning eng yangi yutuqlarini oʻquv jarayoniga doimiy ravishda joriy etishga;

bakalavriat va magistratura dasturlari boʻyicha qobiliyatli va iqtidorli yoshlarni oʻqitish uchun grantlar ajratishga;

oʻz mablagʻlari hisobiga filialning professor-oʻqituvchilari tarkibi malakasini oshirish va ularni qayta tayyorlashga;

filialning kutubxona fondini shakllantirish hamda zamonaviy oʻquv, oʻquv-metodik va ilmiy adabiyotlar bilan toʻldirishga koʻmaklashishi maʼlumot uchun qabul qilinsin.

6. Oʻzbekiston Respublikasi Oliy va oʻrta maxsus taʼlim vazirligi mutaxassislar tayyorlash sifatini nazorat qilsin va filialning professor-oʻqituvchilari tarkibini belgilangan tartibda attestatsiyadan oʻtkazsin.

7. Filialga Rossiyadan va xorijdan oʻqituvchilik va ilmiy ish uchun taklif etilgan professorlar va oʻqituvchilarning yashashi va transport xarajatlari (aviachiptalar bundan mustasno) uchun Oʻzbekiston fuqarolariga belgilangan tariflar boʻyicha milliy valyutada haq toʻlashga ruxsat berilsin.

8. Toshkent shahridagi filial quyidagi manzilga joylashtirilsin: Toshkent shahri, Oʻzbekiston shoh koʻchasi, 49, 7-korpus.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari H.S. Karomatov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2002-yil 5-sentabr,

318-son