Qishloq xoʻjaligi va oziq-ovqat mahsulotlari yoʻqotishlarini qisqartirishga doir qoʻshimcha chora-tadbirlar toʻgʻrisida (574-son)

17.09.2021

Oʻzbekiston Respublikasi Vazirlar Mahkamasining

qarori

Mamlakatimizda qishloq xoʻjaligi va oziq-ovqat mahsulotlari yoʻqotishlarini qisqartirish, mahsulotlar isteʼmolida isrofgarchiliklarning oldini olish maqsadida Vazirlar Mahkamasi qaror qiladi:

1. Oʻzbekiston Respublikasi Qishloq xoʻjaligi vazirligi, Iqtisodiy taraqqiyot va kambagʻallikni qisqartirish vazirligi hamda Savdo-sanoat palatasining “ekin maydonidan savdo doʻkonigacha” boʻlgan zanjirda qishloq xoʻjaligi va asosiy turdagi oziq-ovqat mahsulotlari qoldiqlari toʻgʻrisida maʼlumot olish hamda onlayn rejimida mahsulotlar savdosini amalga oshirish imkonini beruvchi Qishloq xoʻjaligi vazirligi huzuridagi “Agrosanoatni raqamlashtirish markazi” MCHJ Elektron agrosanoat bozori portalini (keyingi oʻrinlarda — Elektron portal) tashkil etish boʻyicha takliflari maʼqullansin.

2. Quyidagilar Elektron portalning asosiy faoliyat yoʻnalishlari etib belgilansin:

Qoraqalpogʻiston Respublikasi, viloyatlar va Toshkent shahar, tuman (shahar)lar, xoʻjalik yurituvchi subyektlar, shu jumladan, ulgurji savdo tashkilotlari boʻyicha mavjud qishloq xoʻjaligi va oziq-ovqat mahsulotlari hajmi, zaxiralari va yetkazib berish boʻyicha kontraktatsiya shartnomalari toʻgʻrisidagi maʼlumotlarning real vaqt rejimida monitoringini yuritish;

asosiy turdagi qishloq xoʻjaligi va oziq-ovqat mahsulotlari narxlari va ularning dinamikasi boʻyicha maʼlumotlarni toʻplash va tahlil qilish;

ichki bozorni asosiy turdagi oziq-ovqat mahsulotlari bilan taʼminlash darajasini doimiy baholash;

xoʻjalik yurituvchi subyektlar oʻrtasida onlayn rejimda kooperatsiya aloqalarini yoʻlga qoʻyish va elektron savdolarni tashkil etish.

3. Belgilab qoʻyilsinki, Qoraqalpogʻiston Respublikasi Vazirlar Kengashi, viloyatlar, Toshkent shahar va tuman (shahar)lar hokimliklari, hududlarida faoliyat koʻrsatayotgan xoʻjalik yurituvchi subyektlar, shu jumladan, ulgurji savdo tashkilotlari tomonidan mavjud qishloq xoʻjaligi va oziq-ovqat mahsulotlari hajmi, zaxiralari va yetkazib berish boʻyicha kontraktatsiya shartnomalari toʻgʻrisidagi maʼlumotlarni Elektron portalga joylashtirishda amaliy yordam koʻrsatadi.

4. Oʻzbekiston Respublikasi Qishloq xoʻjaligi vazirligi:

a) Axborot texnologiyalari va kommunikatsiyalarini rivojlantirish vazirligi bilan birgalikda:

ikki oy muddatda Elektron portalga doir loyiha-texnik hujjatlarni ishlab chiqib, ishga tushirish choralarini koʻrsin hamda uning doimiy faoliyat yuritilishini taʼminlasin;

Elektron portal 2021-yil 1-oktabrdan 1-dekabrga qadar “test rejimida” ishlashini va 2022-yil 1-yanvardan boshlab toʻliq ishga tushirilishini taʼminlasin;

b) Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, Oʻzbekiston fermer, dehqon xoʻjaliklari va tomorqa yer egalari kengashi bilan birgalikda hududlarda Elektron portal faoliyatini 2022-yil 1-yanvarga qadar toʻliq yoʻlga qoʻyishga koʻmaklashsin;

v) Oʻzbekiston fermer, dehqon xoʻjaliklari va tomorqa yer egalari kengashi, Iqtisodiy taraqqiyot va kambagʻallikni qisqartirish vazirligi, Savdo-sanoat palatasi hamda boshqa manfaatdor vazirliklar va idoralar bilan birgalikda ikki oy muddatda Elektron portal faoliyatini tashkil etish va yuritish tartibini nazarda tutuvchi nizomni ishlab chiqib, tasdiqlasin.

5. Belgilansinki:

Oʻzbekiston Respublikasi Qishloq xoʻjaligi vazirligi huzuridagi “Agrosanoatni raqamlashtirish markazi” MCHJ Elektron portalni shakllantirish, yuritish, texnik qoʻllab-quvvatlash va takomillashtirib borish uchun masʼul organ hisoblanadi;

Elektron portalni ishga tushirish va uning faoliyatini taʼminlash bilan bogʻliq xarajatlar Oʻzbekiston Respublikasi Qishloq xoʻjaligi vazirligi huzuridagi Qishloq xoʻjaligini rivojlantirish va oziq-ovqat taʼminoti jamgʻarmasi mablagʻlari hisobidan amalga oshiriladi.

6. Meva-sabzavotlarni saqlash, tashish va chakana savdoda muzlatkichlardan foydalanishni ragʻbatlantirish maqsadida shunday tartib oʻrnatilsinki, unga muvofiq “E-AUKSION” elektron savdo platformasi orqali ajratilgan davlat mulki hisoblangan yer uchastkalari va bino-inshootlar qiymati tadbirkorlik subyekti tomonidan, istisno tariqasida, savdo oʻtkazilgan sanadan boshlab bir yil davomida teng ulushlarda boʻlib-boʻlib toʻlash mexanizmi joriy qilinadi.

7. Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi Qishloq xoʻjaligi vazirligi, Moliya vazirligi, Sogʻliqni saqlash vazirligi, Investitsiyalar va tashqi savdo vazirligi huzuridagi Oʻzbekiston texnik jihatdan tartibga solish agentligi, Fanlar akademiyasi, Iqtisodiy tadqiqotlar markazi, ilmiy-tadqiqot institutlari, Birlashgan Millatlar Tashkilotining Qishloq xoʻjaligi va oziq-ovqat tashkiloti hamda Jahon banki ekspertlari bilan birgalikda ikki oy muddatda xorijiy tajribani chuqur oʻrgangan holda respublikada oziq-ovqat mahsulotlari isrofgarchiligini kamaytirish, ushbu mahsulotlarni yigʻib olish va ularni xayriya tarzida aholining ehtiyojmand qatlamiga tarqatish faoliyatini amalga oshiruvchi “Food Banking” tashkilotlari tizimini joriy etish yuzasidan Vazirlar Mahkamasiga asoslangan takliflar kiritsin.

8. Oʻzbekiston Respublikasi Mahalla va nuroniylarni qoʻllab-quvvatlash vazirligi:

tegishli davlat organlari va jamoat tashkilotlari, soha boʻyicha xususiy sektorning ekspertlari va mutaxassislari bilan yaqindan hamkorlikda tomorqa xoʻjaligi egalari va isteʼmolchilar bilan oziq-ovqat mahsulotlarini ishlab chiqarish (yetishtirish), tashish, saqlash va isteʼmol qilish davrida oziq-ovqat yoʻqotishlarini qisqartirish choralarini koʻrish, isrofgarchilikni oldini olish boʻyicha keng qamrovli targʻibot ishlarini amalga oshirsin;

mahalla fuqarolar yigʻinlari va mahalla faollari bilan birgalikda umumiy ovqatlanish tashkilotlarida, toʻylar, oilaviy tantanalar, maʼraka va marosimlarda oziq-ovqat mahsulotlarining jismoniy va yuridik shaxslar tomonidan sababsiz isrof qilinishi holatlarining oldini olish yuzasidan manzilli choralar koʻrsin.

9. Oʻzbekiston Milliy teleradiokompaniyasi, Oʻzbekiston Musulmonlari idorasiga ommaviy axborot vositalari orqali aholi oʻrtasida mavjud resurslardan oqilona foydalanish, isrofgarchiliklar oldini olishga, shu jumladan umumiy ovqatlanish shaxobchalari oziq-ovqat mahsulotlarini sababsiz isrof qilish holatlariga yoʻl qoʻymaslikka qaratilgan maʼlumotlar bilan jihozlanishi va xizmat koʻrsatuvchi xodimlar isteʼmolchilarni buyurtma berishdan oldin ogohlantirishi lozimligi boʻyicha suhbatlar, koʻrsatuv va eshittirishlarni tashkil etish tavsiya etilsin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining agrar va oziq-ovqat sohalarini rivojlantirish masalalari boʻyicha oʻrinbosari Sh.M. Gʻaniyev, Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2021-yil 17-sentabr,

574-son