Qizilqum fosforit kombinati qurilishi toʻgʻrisida (87-son)

16.02.1993

Oʻzbekiston Respublikasi Vazirlar Mahkamasining

qarori

Fosforli oʻgʻitlar ishlab chiqaruvchi respublika korxonalarini Navoiy viloyatidagi Jeroy-Sardara konidan qazib olinadigan mahalliy fosfat xomashyosi bilan taʼminlash maqsadida Vazirlar Mahkamasi qaror qiladi:

1. Jeroy-Sardara koni negizida har yili 2320 ming tonna fosforit konsentrati ishlab chiqaradigan Qizilqum fosforit kombinati qurilishi amalga oshirilsin.

2. Oʻzbekiston davlat kimyo sanoati konserni kombinat qurilishi buyurtmachisi, Oʻzbekiston sanoat va xoʻjalik qurilishi davlat korporatsiyasi bosh pudratchi etib belgilansin. 1995-yilda kombinatning har yili 1190 ming tonna fosforit konsentrati ishlab chiqaradigan birinchi navbatini, 1996-yilda ikkinchi navbatini ishga tushirish taʼminlansin.

3. Oʻzbekiston davlat kimyo sanoati konserni manfaatdor vazirliklar va idoralarning loyiha tashkilotlari bilan birgalikda:

qurilishni 1993-yil aprel oyidan kechiktirmay boshlashni hisobga olgan holda kombinatni loyihalashtirishni taʼminlasin;

1993-yilda Oʻzbekiston sanoat va xoʻjalik qurilishi davlat korporatsiyasiga qurilish rayonida ishlab chiqarish bazasini tashkil etish uchun hisob-kitoblarga muvofiq hamda oʻzlashtirilishiga koʻra mablagʻ ajratsin.

4. Vazirlar Mahkamasining 1993-yil 12-fevraldagi 78-son qarori bilan “Oʻzdavkimyo” konserniga 1993-yilga 1,8 mlrd soʻmlik imtiyozli kreditlar ajratilganligi maʼlumot uchun qabul qilinsin. “Oʻzdavkimyo” konserni 1993-yil fevral-mart oylarida ajratilgan mablagʻlardan loyiha-qidiruv va tayyorgarlik ishlarini mablagʻ bilan taʼminlasin.

“Oʻzistiqbolstat” davlat qoʻmitasi har yili respublika investitsiya dasturida mazkur kombinat qurilishiga zarur mablagʻlar ajratsin.

5. Oʻrta Osiyo Temir yoʻl boshqarmasi, Energetika va elektrlashtirish vazirligi, Neft va gaz sanoati davlat konserni, “Oʻzavtotrans” korporatsiyasi, Aloqa vazirligi, “Oʻzsuvqurilish” davlat konserni, “Oʻzbektransqurilish” davlat uyushmasi, “Oʻzdehqonchilikqurilish”, “Oʻzkolxozqurilish” birlashmalari bosh pudratchilar sifatida temir yoʻllar, elektr uzatish liniyalari, gazoprovodlar, avtomobil yoʻllari, suv oqizgichlar va boshqa muhandislik kommunikatsiyalarini loyihalash, butlash va qurishni belgilangan muddatlarda taʼminlasinlar.

6. Oʻzbekiston davlat kimyo sanoati konserni, “Oʻzsanoatxoʻjalikqurilish” korporatsiyasi, “Oʻzmontajmaxsusqurilish” uyushmasi subpudrat tashkilotlarni jalb qilgan holda kon, boyitish fabrikasi, turar joy shaharchasi, ijtimoiy-madaniy-maishiy inshootlar qurilishini amalga oshirsinlar hamda ularning 1993 — 1996-yillarda ishga tushirilishini taʼminlasinlar, bunda loyihalash va qurilish ishlari bir vaqtning oʻzida olib borilsin. Qurilish-montaj ishlariga, haqiqatda bajarilgan ishlar boʻyicha haq toʻlashga ruxsat berilsin.

7. Oʻzbekiston shartnomalar va savdo boʻyicha davlat-aksionerlik uyushmasi, “Oʻzqurilishmateriallari” davlat konserni va respublikaning boshqa taʼminot-sotish tashkilotlari kombinat qurilishi qatnashchilari boʻlgan tashkilotlarga kapital mablagʻlarning tasdiqlangan hajmlari doirasida biriktirilgan nomenklatura boʻyicha kvotalangan mahsulotlarni ajratsinlar, shuningdek, mahsulot yetkazib beruvchilar bilan shartnoma asosida xoʻjalik aloqalari oʻrnatilishiga koʻmaklashsinlar.

8. “Oʻzbekistonqishloq” xoʻjaligi mashinasozligi davlat konserni, “Qizilqumnodirmetalloltin” konserni va Oʻzbekiston Respublikasi Davlat qimmatbaho metallar qoʻmitasi Oʻzbekiston davlat kimyo sanoati konserni va qurilish qatnashchilari boʻlgan tashkilotlarning buyurtmanomalari boʻyicha nostandart asbob-uskunalar, detallar va uzellarning oʻz vaqtida tayyorlanishini taʼminlasinlar.

9. Navoiy viloyati hokimligi:

kon, boyitish fabrikasi, uy-joylar, muhandislik va transport kommunikatsiyalari qurilishi hamda qurilishning boshqa inshootlari uchun yer uchastkasi tanlash va ajratishni belgilangan tartibda amalga oshirsin;

Oʻzbekiston “Savdo” davlat-aksionerlik uyushmasi va Oʻzbekbirlashuv bilan birgalikda inshootlarda ishlovchilarni oziq-ovqat va kundalik ehtiyoj mollari bilan taʼminlasin.

10. Vazirliklar va idoralarga qayd qilib oʻtilgan kombinat qurilishida bevosita band boʻlgan qurilish, montaj, ishga tushirish-sozlash tashkilotlari ishchilari va mutaxassislari mehnatiga xodimlar lavozim maoshlarining 30 foizgacha oshirilgan tarif stavkalari boʻyicha haq toʻlashga ruxsat berilsin, bu xarajatlar qurilish smetasiga kiritilsin. Xizmat safariga yuboriladigan xodimlarga sutkalik xarajatlar belgilangan eng kam ish haqining 0,08 foizi miqdorida belgilansin.

Vazirlar Mahkamasining Raisi I. KARIMOV

Toshkent sh.,

1993-yil 16-fevral,

87-son