“Markaziy va Janubiy Osiyo: mintaqaviy oʻzaro bogʻliqlik. Tahdidlar va imkoniyatlar” mavzusidagi xalqaro konferensiyada Oʻzbekiston Respublikasi Prezidenti Sh.M. Mirziyoyev tomonidan bayon etilgan gʻoyalar va tashabbuslarni ilgari surish toʻgʻrisida (1187-IV-son)

24.07.2021

Oʻzbekiston Respublikasi Oliy Majlisi Qonunchilik palatasining

Qarori

Soʻnggi yillarda Oʻzbekiston xalqaro miqyosda tinchlikparvarlik, bagʻrikenglik va hamdoʻstlik siyosatini ilgari surayotgan mamlakat sifatida dunyo hamjamiyatining eʼtiborini oʻziga qaratmoqda. Bu ayniqsa, Oʻzbekiston Respublikasi Prezidentining 2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasida belgilangan vazifalarning izchillik bilan amalga oshirilishi, global miqyosda davlat rahbari tomonidan ilgari surilayotgan tashabbuslarning roʻyobi natijasida mintaqada kuzatilayotgan ijobiy oʻzgarishlarda yaqqol namoyon boʻlmoqda.

Oʻzbekiston Respublikasi Prezidenti Sh.M. Mirziyoyev tashabbusi bilan joriy yilning 15-16-iyul kunlari Toshkent shahrida “Markaziy va Janubiy Osiyo: mintaqaviy oʻzaro bogʻliqlik. Tahdidlar va imkoniyatlar” mavzusida xalqaro konferensiya oʻtkazilganligi mamlakatimizning Markaziy Osiyo mintaqasi davlatlari bilan yaxshi qoʻshnichilik, doʻstlik rishtalarini mustahkamlash, mintaqaning ulkan tarixiy-madaniy va ijtimoiy-siyosiy salohiyatini yuzaga chiqarish yoʻlidagi tashabbuskorligini hamda Oʻzbekistonning xalqaro maydondagi yangi strategik qarashlarini oʻzida ifoda etdi.

Mamlakatimizda kechayotgan ijtimoiy-siyosiy, sotsial-iqtisodiy islohotlar natijasi oʻlaroq jamiyatimizda yuz berayotgan oʻzgarishlar, saylovchilarning katta qiziqishi va eʼtiboriga sabab boʻlgan masalalarni Oʻzbekiston Respublikasi Oliy Majlisi Qonunchilik palatasining majlislarida muhokama qilish boʻyicha qaror topgan anʼanaga muvofiq Qonunchilik palatasi deputatlari tomonidan mazkur nufuzli xalqaro konferensiya yakunlari atroflicha muhokama qilinib, jami 44 ta mamlakat va 30 ga yaqin xalqaro tashkilot delegatsiyalari, nufuzli xorijiy ilmiy-tadqiqot va tahlil markazlari rahbarlari ishtirok etgan ushbu konferensiya xalqaro maydonda Oʻzbekistonning yangilangan va konstruktiv tashqi siyosatini ifodalashda muhim platforma vazifasini bajarganligi eʼtirof etildi.

Toshkent konferensiyasidagi Oʻzbekiston Respublikasi Prezidentining tarixiy nutqida Markaziy va Janubiy Osiyo mintaqalari oʻrtasidagi tarixiy yaqinlik, uni bugungi kunda oʻzaro ishonch hamda manfaatdorlik asosida mustahkamlash boʻyicha bir qator aniq va konstruktiv takliflar ilgari surildi.

Jumladan, ikki mintaqaning transport va tranzit salohiyatidan amalda foydalanish, istiqbolli bozorlarga chiqish, eksportni kengaytirish, investitsiyalar, innovatsiyalar va texnologiyalarni jalb etish, ilmiy, madaniy-gumanitar va sayyohlik sohalaridagi oʻzaro aloqalarni faollashtirish masalalariga alohida eʼtibor qaratildi.

Shuningdek bugungi kunda dolzarb masalaga aylanib ulgurgan oziq-ovqat xavfsizligini taʼminlash, mintaqaviy xavfsizlik va barqarorlikni mustahkamlash, ekologiyani asrash, “yashil” iqtisodiyotni rivojlantirish zarurligi alohida taʼkidlandi.

Butun dunyoda yoshlarga qaratilgan eʼtiborni yanada kuchaytirish masalasida samarali hamkorlikni yoʻlga qoʻyish maqsadida doimiy faoliyat yuritadigan Markaziy va Janubiy Osiyo mamlakatlari yoshlari kengashini tuzish taklif qilindi.

Oʻzbekiston rahbarining Toshkent konferensiyasida ilgari surgan barcha tashabbuslari mintaqalararo birdamlikni, tinchlik va osoyishtalikni taʼminlash, har ikki mintaqa davlatlari hayotida tub burilish yasash, azaliy qardosh xalqlarni jipslashtirishga qaratilganligi bilan ahamiyatlidir.

Shu nuqtai nazardan, mamlakatimiz Prezidenti nutqida ilgari surilgan gʻoya va tashabbuslarni ilgari surishda parlament oldida turgan vazifalarni aniq belgilab olish, bu borada parlament diplomatiyasi imkoniyatlaridan toʻliq foydalanish talab etiladi.

Davlatimiz rahbari tomonidan ilgari surilgan tashabbuslarni parlamentlararo hamkorlik mexanizmlari orqali faol targʻib etish, iqtisodiyot, investitsiyalar, energetika, innovatsiyalar va “yashil” texnologiyalar sohasida hamkorlik qilishning huquqiy asoslarini mustahkamlash, ekologik muammolarni hal etish hamda tabiiy ofatlarni bartaraf etish boʻyicha aniq chora-tadbirlarni ishlab chiqish va amalga oshirishga koʻmaklashish borasidagi tashabbuslarning roʻyobga chiqarilishi ustidan taʼsirchan parlament nazoratini oʻrnatish muhim ahamiyat kasb etadi.

Shuningdek mamlakatimiz Prezidenti tomonidan ilgari surilgan tashabbuslarni hayotga tatbiq etishning huquqiy asoslarini yaratish va ularning amalda samarali ishlashini taʼminlash ham parlamentning muhim vazifalaridan biridir. Mazkur tashabbuslarni roʻyobga chiqarishda deputatlar korpusining faol ishtirok etishi va saylov okruglarida saylovchilar bilan oʻtkaziladigan uchrashuvlarda xalqaro konferensiyaning davlatimiz hamda mintaqa istiqboli uchun dolzarb ahamiyatga ega ekanligini keng jamoatchilikka tushuntirish, ularning mazmun-mohiyatini xalqimizga yetkazishga alohida eʼtibor qaratish talab etiladi.

Shu bilan birga Markaziy va Janubiy Osiyo mintaqalari mamlakatlari bilan parlamentlararo aloqalarni Oʻzbekiston Respublikasi Prezidenti tomonidan ilgari surilgan gʻoyalar va tashabbuslar nuqtai nazaridan yanada takomillashtirish hamda kengaytirish va yangi bosqichga olib chiqish boʻyicha zarur choralarni amalga oshirish muhim ahamiyat kasb etadi.

Yuqoridagilardan kelib chiqib hamda bildirilgan takliflarni inobatga olgan holda, Oʻzbekiston Respublikasi Oliy Majlisining Qonunchilik palatasi qaror qiladi:

1. “Markaziy va Janubiy Osiyo: mintaqaviy oʻzaro bogʻliqlik. Tahdidlar va imkoniyatlar” mavzusidagi xalqaro konferensiyada Oʻzbekiston Respublikasi Prezidenti Sh.M. Mirziyoyev tomonidan bayon etilgan gʻoyalar va tashabbuslar toʻliq qoʻllab-quvvatlansin.

2. Mamlakatimiz Prezidenti tomonidan “Markaziy va Janubiy Osiyo: mintaqaviy oʻzaro bogʻliqlik. Tahdidlar va imkoniyatlar” mavzusidagi xalqaro konferensiyada bayon etilgan gʻoyalar va tashabbuslarni ilgari surish boʻyicha Oʻzbekiston Respublikasi Oliy Majlisi Qonunchilik palatasi deputatlaridan iborat ishchi guruh ilovaga muvofiq tarkibda tuzilsin.

3. Ishchi guruh “Markaziy va Janubiy Osiyo: mintaqaviy oʻzaro bogʻliqlik. Tahdidlar va imkoniyatlar” mavzusidagi xalqaro konferensiyada Oʻzbekiston Respublikasi Prezidenti Sh.M. Mirziyoyev tomonidan bayon etilgan gʻoyalar va tashabbuslarni ilgari surish boʻyicha “yoʻl xaritasi” loyihasini qisqa muddatda ishlab chiqsin hamda uni Oʻzbekiston Respublikasi Oliy Majlisi Qonunchilik palatasining Kengashiga kiritsin.

4. Ushbu Qarorning ijrosini nazorat qilish Oʻzbekiston Respublikasi Oliy Majlisi Qonunchilik palatasi Spikerining birinchi oʻrinbosari A. Saidov zimmasiga yuklatilsin.

5. Ushbu Qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Qonunchilik palatasining Spikeri N. ISMOILOV

Toshkent sh.,

2021-yil 24-iyul,

1187-IV-son

Oʻzbekiston Respublikasi Oliy Majlisi Qonunchilik palatasining 2021-yil 24-iyuldagi 1187-IV-sonli qaroriga ILOVA

“Markaziy va Janubiy Osiyo: mintaqaviy bogʻliqlik. Tahdidlar va imkoniyatlar” mavzusidagi xalqaro konferensiyada Oʻzbekiston Respublikasi Prezidenti Sh.M. Mirziyoyev tomonidan bayon etilgan gʻoyalar va tashabbuslarni ilgari surish boʻyicha Oʻzbekiston Respublikasi Oliy Majlisi Qonunchilik palatasi deputatlaridan iborat ishchi guruh

TARKIBI

FAYZIYEVA Dilorom Xusnitdinovna — Xalqaro ishlar va parlamentlararo aloqalar qoʻmitasi raisi, “OʻzLiDep” fraksiyasi aʼzosi DJURAYEV Qodir Asadovich — Xalqaro ishlar va parlamentlararo aloqalar qoʻmitasi raisining oʻrinbosari, “Adolat” SDP fraksiyasi aʼzosi JUMAYEV Nodir Xosiyatovich — Xalqaro ishlar va parlamentlararo aloqalar qoʻmitasi aʼzosi, “OʻzLiDep” fraksiyasi aʼzosi ASLONOV Abdullo Ubaydulloyevich — Xalqaro ishlar va parlamentlararo aloqalar qoʻmitasi aʼzosi, “OʻzLiDep” fraksiyasi aʼzosi VAFAYEV Ulugbek Nazarovich — Sanoat, qurilish va savdo masalalari qoʻmitasi aʼzosi, “XDP” fraksiyasi aʼzosi AGZAMOVA Gulrux Anvarovna — Demokratik institutlar, nodavlat tashkilotlar va fuqarolarning oʻzini oʻzi boshqarish organlari qoʻmitasi aʼzosi, “Adolat” SDP fraksiyasi aʼzosi KARIMOV Tulkinjon Payziyevich — Mudofaa va xavfsizlik masalalari qoʻmitasi aʼzosi, “OʻzLiDep” fraksiyasi aʼzosi ABDUXALIMOV Shuxrat Abduxalimovich — Fuqarolarning sogʻligʻini saqlash masalalari qoʻmitasi aʼzosi, “Ekologik partiya” fraksiyasi aʼzosi DJABBOROV Umidjon Raxmonovich — Innovatsion rivojlanish, axborot siyosati va axborot texnologiyalari masalalari qoʻmitasi aʼzosi, “Milliy tiklanish” DP fraksiyasi aʼzosi OTAXONOV Foziljon Xaydarovich — Qonunchilik muammolari va parlament tadqiqotlari instituti direktori