Oʻzbekiston davlat koinotni tadqiq etish agentligi masalalari toʻgʻrisida (59-son)

05.02.1993

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Koinot olamini tadqiq etish va undan foydalanish tuzilmalari toʻgʻrisida” 1992-yil 11-dekabrdagi Farmoniga muvofiq Vazirlar Mahkamasi qaror qiladi:

1. Oʻzbekiston davlat koinotini tadqiq etish (“Oʻzbekkoinot”) agentligi markaziy apparatining tuzilmasi 1-ilovaga muvofiq tasdiqlansin.

Oʻzbekiston davlat koinotni tadqiq etish agentligi boshqaruvining markaziy apparati xodimlari soni (xizmat koʻrsatuvchi xodimlardan tashqari) tegishli ish haqi fondi bilan 20 kishidan iborat qilib belgilansin. Oʻzbekiston davlat koinotni tadqiq etish agentligiga bosh direktorning bir nafar oʻrinbosari, 5 kishidan iborat hayʼat boʻlishiga ruxsat etilsin.

2. Oʻzbekiston davlat koinotni tadqiq etish agentligi toʻgʻrisidagi Nizom 2-ilovaga muvofiq tasdiqlansin.

Quyidagilar agentlikning asosiy vazifalari va faoliyat yoʻnalishlari qilib belgilansin:

davlatning koinotni tadqiqot etish sohasidagi siyosatini shakllantirish va uni amalga oshirish;

fundamental fanlarni rivojlantirish manfaatlarini koʻzlab Yerni, koinot olamini, boshqa sayyoralarni va Quyoshni tadqiq etish:

Koinot texnikasi va texnologiyasi yutuqlarini xalq xoʻjaligi, fan va taʼlimning turli sohalariga joriy etish;

koinotni tadqiq etish sohasida xalqaro hamkorlikni kengaytirish, koinot-tijorat faoliyatini rivojlantirish;

koinot texnologiyalari sohasida kadrlar tayyorlash.

3. Oʻzbekiston davlat koinotni tadqiq etish agentligi va uning tarkibiga kiruvchi tashkilotlar, korxonalar hamda muassasalar maqomi boʻyicha Vazirlar Mahkamasining 1992-yil 21-iyuldagi 337-son qaroriga muvofiq ilmiy-tadqiqot va ilmiy-ishlab chiqarish tashkilotlariga, bu tashkilotlar, korxonalar va muassasalarining xodimlari va Vazirlar Mahkamasining 1992-yil 8-oktabrdagi 465-son qaroriga muvofiq fan sohasining imtiyozli xodimlari bilan tenglashtirilsin.

Oʻzbekiston davlat koinotni tadqiq etish agentligining bosh direktoriga moddiy taʼminot, tibbiy va transport xizmati koʻrsatishning Oʻzbekiston Respublikasi vazirlarining birinchi oʻrinbosarlari uchun, uning oʻrinbosariga esa vazirlarning oʻrinbosarlari uchun nazarda tutilgan shart-sharoitlar joriy etilsin.

4. Oʻzbekiston Respublikasi Moliya vazirligi 1993-yildan boshlab budjetda Oʻzbekiston davlat koinotni tadqiq etish agentligi apparati xarajatlari uchun zarur miqdordagi mablagʻni nazarda tutsin, shuningdek 2 ta yengil avtomashina xarajatlari uchun limit ajratsin.

Toshkent shahar yoʻlovchilar tashish transporti korxonalari davlat uyushmasi Oʻzbekiston davlat koinotni tadqiq etish agentligiga xizmat koʻrsatish uchun 2 ta yengil avtomobil ajratsin.

5. Oʻzbekiston davlat koinotni tadqiq etish agentligi manfaatdor vazirliklar va idoralar bilan birgalikda ikki oy muddatda Oʻzbekiston Respublikasining koinotni tadqiq etish sohasidagi davlat siyosatining asosiy yoʻnalishlarini tasdiqlash uchun Vazirlar Mahkamasiga taqdim etsin.

6. Oʻzbekiston Respublikasi Aloqa vazirligi Oʻzbekiston davlat koinotni tadqiq etish agentligini bir oy muddatda ikkita hukumat aloqasi telefoni bilan taʼminlasin.

7. Oʻzbekiston Respublikasi Vazirlar Mahkamasi huzuridagi Gidrometeorologiya bosh boshqarmasi “Gidrometpribor” ilmiy-ishlab chiqarish birlashmasi (X. Asomov koʻchasi, 4-uy) binosidan 1500 kvadrat metr hajmidagi xizmat joyini Oʻzbekiston davlat koinotni tadqiq etish agentligi uchun ajratib bersin.

Vazirlar Mahkamasining Raisi I. KARIMOV

Toshkent sh.,

1993-yil 5-fevral,

59-son

Vazirlar Mahkamasining 1993-yil 5-fevraldagi 59-son qaroriga 1-ILOVA

Oʻzbekiston davlat koinotni tadqiq etish (“Oʻzbekkoinot”) agentligi markaziy apparatining

TUZILMASI

Rahbariyat

Davlat dasturlarini tuzish va amalga oshirishni taʼminlash boʻlimi

Xalq xoʻjaligi va ilmiy-koinot tadqiqotlar boʻlimi

Kompleks tizimlar boʻlimi

Xalqaro hamkorlik, tashqi aloqalar va huquqiy masalalarni hal etish boʻlimi

Birinchi boʻlim

Kadrlar boʻlimi

Izoh. Boʻlinmalarning soni koʻpayishi mumkin, shuningdek, xoʻjalik hisobi faoliyati hisobiga yangi boʻlinmalar tashkil etilishi mumkin.

Vazirlar Mahkamasining 1993-yil 5-fevraldagi 59-son qaroriga 2-ILOVA

Oʻzbekiston davlat koinotni tadqiq etish (“Oʻzbekkoinot”) agentligi toʻgʻrisida

NIZOM

I. Umumiy qoidalar

1. Oʻzbekiston Respublikasi Vazirlar Mahkamasi huzuridagi Oʻzbekiston davlat koinotni tadqiq etish (“Oʻzbekkoinot”) agentligi (bundan keyin Agentlik deyiladi) koinotni tadqiq qilish sohasida davlat siyosatini ishlab chiqadigan va amalga oshiradigan davlat boshqaruv organi hisoblanadi. Agentlik oʻz faoliyatini xoʻjalik hisobi, oʻzini oʻzi mablagʻ bilan taʼminlash va oʻzini oʻzi boshqarish prinsiplari asosida, shuningdek Oʻzbekiston Respublikasi budjetidan pul bilan taʼminlash hisobiga yuritadi.

2. Agentlik oʻz faoliyatida Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Oliy Kengashining boshqa qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, koinotni tadqiq qilish sohasidagi xalqaro shartnomalarga, shuningdek mazkur Nizomga amal qiladi.

3. Agentlik oʻziga yuklatilgan vazifalar va funksiyalarning bajarilishi uchun Oʻzbekiston Respublikasi Vazirlar Mahkamasi, Agentlik tarkibiga kiruvchi korxonalar va muassasalar oldida javob beradi.

4. Respublikaning koinot faoliyati masalalari boʻyicha Agentlik tomonidan qabul qilinadigan qarorlarning bajarilishi barcha respublika tashkilotlari, korxonalar va muassasalar uchun Agentlikka tegishli vakolat doirasida majburiy hisoblanadi.

5. Agentlik yuridik shaxs hisoblanadi, bank mussasalarida soʻmlarda va chet el valyutasida maxsus schyotlar ochadi. Tushumlar va sarflangan mablagʻlarning hisobi soʻmlarda va chet el valyutasida alohida-alohida amalga oshiriladi. Agentlik korxonalarning egasi huquqi bilan ijara va qonunda nazarda tutilgan boshqa asoslarda alohida mulkni tasarruf etadi, mustaqil balansga ega boʻladi, oʻz nomidan mulkiy huquqni olish va majburiyatli boʻlish, sudda yoki xoʻjalik sudida daʼvogar va javob beruvchi boʻlishi mumkin. Agentlik qonun boʻyicha undirib olinishi mumkin boʻlgan oʻziga tegishli mulklarga oʻz majburiyatlari boʻyicha javob beradi. Davlat va uning idoralari Agentlik majburiyatlari boʻyicha javob bermaydilar, shuningdek Agentlik ham davlat va uning idoralarining majburiyatlari boʻyicha javob bermaydi.

6. Agentlik shtamplarga, blankalarga va boshqa rekvizitlarga, shuningdek Oʻzbekiston Respublikasi Davlat gerbi tasvirlangan va oʻz nomi oʻzbek va rus tillarida yozilgan muhrga ega boʻladi.

Agentlik Toshkent shahar, X. Asomov koʻchasidagi 4-uyda joylashgan.

Agentlik Oʻzbekiston Respublikasida va uning tashqarisida oʻz korxonalari va tashkilotlarini, filiallari va boʻlimlarini, kichik korxonalarni belgilangan tartibda taʼsis etishi mumkin.

7. Agentlik tarkibiga kiruvchi tashkilotlar oʻz faoliyatlarini “Oʻzbekiston Respublikasidagi korxonalar toʻgʻrisida”gi Oʻzbekiston Respublikami Qonuniga, mazkur Nizomga va korxonalar va tashkilotlarning Agentlik tomonidan tasdiqlangan nizomlariga muvofiq amalga oshiradilar.

8. Agentlik tarkibiga kiruvchi, mustaqil balansda turuvchi tashkilotlar agentlikka boʻysunadilar, ularda Agentlik tashkil etilayotgan paytda oʻrnatilgan xoʻjalik aloqalarining barcha turlari saqlanib qoladi. Agentlikka, doimiy aʼzolardan tashqari, uyushmaga qoʻshib olingan aʼzolar ham kirishi mumkin.

II. Agentlikning maqsad va vazifalari

9. Xalq xoʻjaligi, fan va Oʻzbekiston Respublikasini ijtimoiy-iqtisodiy rivojlantirish manfaatlari yoʻlida koinot tadqiqotlarini rivojlantirish, quyidagi vazifalarni bajarish uchun mavjud ilmiy-texnik imkoniyatlardan va koinot tarmoqlarining infrastrukturalaridan samarali foydalanish Agentlik faoliyatining asosiy maqsadi hisoblanadi:

koinotni tadqiq qilish sohasida davlat siyosatini shakllantirish va uni amalga oshirish;

Agentlik tarkibiga kiruvchi korxonalar va tashkilotlarning faoliyatiga rahbarlik qilish hamda muvofiqlashtirish;

koinot texnikasi va texnologiyasi yutuqlarini xalq xoʻjaligi, fan va taʼlimning turli tarmoqlariga joriy qilish;

koinot texnologiyalari sohasida kadrlar tayyorlash;

boshqa manfaatdor tashkilotlar bilan birgalikda Oʻzbekiston Respublikasi koinot aloqasining kompleks tizimini ishlab chiqish, tashkil etish va barpo etish;

samarali ekologik nazoratni, ob-havo maʼlumotlarini, ehtimol tutilgan tabiiy ofatlar toʻgʻrisida ogohlantirishni koinotdan Yerni masofadan turib zond bilan tekshirish orqali tabiiy resurslarni tadqiq qilishni taʼminlash;

retranslatsiya va aloqaning mavjud va istiqboldagi tizimlaridan foydalanish asosida respublika xalq xoʻjaligining turli tarmoqlarini keng axborotlashtirish va avtomatlashtirish;

Oʻzbekiston Respublikasi Mudofaa vazirligining buyurtmalari boʻyicha ishlarni amalga oshirish;

koinotni tadqiq qilish sohasida xalqaro hamkorlikni kengaytirish va tijorat-koinot faoliyatini rivojlantirish;

respublikada kosmonavtika yutuqlarini va ulardan xalq xoʻjaligini turli sohalarida samarali foydalanish imkoniyatlarini ommalashtirish va targʻib qilish;

fundamental fanlarni rivojlantirish manfaatlarini koʻzlab Yerni, koinot olamini, boshqa sayyoralarni va Quyoshni tadqiq etish;

koinot faoliyati sohasida boshqa davlatlarning tashkilotlari, korxonalari va muassasalari bilan oʻzaro hamkorlikni amalga oshirish.

III. Agentlikning huquqlari

10. Agentlikka quyidagi huquqlar beriladi:

koinot texnikasi va boshqa texnikani (koinot apparatlari ham shu jumlaga kiradi), binolar va inshootlarni, boshqa mulklarni sotib olish, ijaraga olish, qurish, qayta qurish va foydalanish, patentlar va ruxsatnomalarni sotib olish;

koinotni tadqiq qilishning yillik ishlar dasturi asosida va qonun hujjatlari bilan belgilangan tartibda Oʻzbekiston Respublikasi va boshqa davlatlarning vazirliklari, idoralari va tashkilotlari bilan ilmiy-tadqiqot ishlari, alohida konstruktorlik ishlarini oʻtkazish va texnikadan foydalanish boʻyicha shartnomalar tuzish;

koinot olamidan foydalanish va tadqiqotlar oʻtkazish sohasida faoliyat koʻrsatayotgan xalqaro tashkilotlarda oʻz vakolati doirasida vakil boʻlish;

tegishli masalalarni maslahatlashish, tayyorlash va koʻrib chiqish uchun shartnoma asosida ekspertlarni jalb qilish, vaqtinchalik ijodiy jamoalar va ishchi guruhlar tuzish;

qonun hujjatlari bilan belgilangan tartibda tashqi iqtisodiy faoliyatni amalga oshirish;

Agentlik xodimlarini belgilangan tartibda chet elga xizmat safariga yuborish va xorijiy mutaxassislarni qabul qilish;

Agentlikka yuklatilgan vazifalarni hal etish manfaatlarini koʻzlab har xil xizmatlar koʻrsatish, shu jumladan harbiy mutaxassislar koinot apparatlarini tashuvchi yuk raketalarni uchishga tayyorlash, uchirish ishlarini oʻtkazilayotganda Rossiya Federatsiyasi Mudofaa vazirligining harbiy-koinot kuchlari bilan, uchib yurgan yoʻldoshlarni boshqarish, koinot axborotlarini olish, ularga ishlov berish va isteʼmolchilarga yetkazib berish boʻyicha shartnomalar tuzish;

koinot faoliyatining samaradorligini oshirish maqsadida respublika hududida uyushmalar va boshqa tijorat tuzilmalari tashkil etish;

respublika korxonalari va tashkilotlari tomonidan mustaqil davlatlar tashkilotlarining koinot mavzulari boʻyicha buyurtmalari boʻyicha bajariladigan ishlarni muvofiqlashtirish;

respublika idoralari, korxonalari, tashkilotlari, muassasalarining va xususiy shaxslarning koinot faoliyati tartibi va shartlarini belgilaydigan litsenziyalar berish va Oʻzbekiston Respublikasining davlat direktiv hujjatlariga muvofiq respublika koinot loyihalarini amalga oshirish;

koinot mavzulari boʻyicha tanlov ishlanmalarini tashkil etish, muqobil loyihalar va takliflarni ekspertiza qilish;

investitsiya mablagʻlari asosidagi ishlarni imtiyozli shartlarda oʻtkazish;

respublikada koinot texnikasini ishlab chiqish, yaratish, sinash va ishlatish hamda koinot faoliyatining xavfsizligini taʼminlash tartibini belgilovchi hujjatlarni tasdiqlash;

koinot olamidan foydalanish va tadqiq qilish Davlatlararo dasturiga kiritish uchun respublikada koinotni tadqiq qilish sohasidagi ishlar boʻyicha takliflarni, shuningdek ushbu dasturni amalga oshirishda respublika qoʻshadigan ulush hajmlari boʻyicha takliflarni tayyorlash va asoslash;

Oʻzbekiston Respublikasining koinotni tadqiq qilish sohasidagi xalqaro hamkorligiga oid takliflarni Vazirlar Mahkamasiga taqdim etish, koinot faoliyati masalalari boʻyicha muzokaralarda respublika manfaatlarini himoya qilish, Vazirlar Mahkamasining roziligi bilan kontraktlar, shartnomalar va bitimlar tuzish.

IV. Agentlikning boshqa davlatlarning koinot faoliyatini boshqarish idoralari bilan oʻzaro hamkorlik qilish prinsiplari

11. Agentlik quyidagi asosiy prinsiplarga amal qiladi:

Oʻzbekiston Respublikasining davlat koinot siyosati xalq xoʻjaligi, fan, texnika manfaatlarini mudofaa qobiliyatini taʼminlashni, toʻplangan koinot potensialini saqlash va rivojlantirishni, xalqaro hamkorlik qilishni koʻzlab quriladi;

boshqa davlatlar bilan koinot olamini tadbiq qilish va foydalanish boʻyicha birgalikdagi faoliyat barcha tomonlarning manfaatlariga, shu jumladan davlatlarning umumiy xavfsizligi manfaatlariga javob beruvchi oʻzaro foydalilik negiziga asoslanadi;

ishlarni birgalikda oʻtkazishda yoki respublika hududidan tashqarida joylashgan koinot infrastruktura obyektlaridan foydalanishda respublikaning koinot dasturlari boshqa davlatlarning tegishli boshqaruv organlari bilan kelishib olinadi.

V. Agentlikning mol-mulki va mablagʻlari

12. Agentlikning mol-mulkini quyidagi manbalar hisobiga vujudga kelgan mablagʻlar tashkil etadi:

oʻziga qarashli tashkilotlarning ilmiy-texnik ishlab chiqarish va ijtimoiy rivojlantirishning aniq dasturlari va muammolarini mablagʻ bilan taʼminlash uchun maqsadli badallari;

oʻziga qarashli tashkilotlarning zaxira (sugʻurta) jamgʻarmasini yaratish uchun maqsadli badallari. Jamgʻarmaning ishlatilmay qolgan qoldiqlari keyingi yilga oʻtkaziladi va olib qoʻyilmaydi;

valyuta jamgʻarmasi;

bank kreditlari;

Oʻzbekiston Respublikasi Moliya vazirligi tomonidan ajratiladigan budjet mablagʻlari;

oʻz moliya xoʻjalik faoliyatidan tushgan daromadlar;

qonun bilan taqiqlanmagan boshqa manbalar.

13. Tashkilotlarning maqsadli badallari va toʻlovlari miqdorlari, ulardan foydalanish tartibi Agentlik hayʼati tomonidan belgilanadi.

14. Agentlik oʻziga qarashli mulk va mablagʻdan tasarrufidagi tashkilotlar manfaatlari yoʻlida foydalanadi, ham respublikada, ham respublika tashqarisida har xil koʻchar va koʻchmas mulkni qurishi, qayta qurishi, sotib olishi, ijaraga olishi va ijaraga berish, qonun bilan taqiqlanmagan boshqa xil harakatlarni sodir etishi mumkin.

15. Agentlikning mulki mustaqil balansda aks ettiriladi.

16. Oʻziga qarashli tashkilotlarning moliya-xoʻjalik faoliyatini taftish qilish kamida ikki yilda bir marta oʻtkaziladi.

VI . Agentlikni boshqarish

17. Agentlikka Oʻzbekiston Respublikasi Vazirlar Mahkamasi tomonidan lavozimga tayinlanadigan va lavozimdan ozod etiladigan bosh direktor boshchilik qiladi.

Bosh direktorning Oʻzbekiston Respublikasi Vazirlar Mahkamasi tomonidan lavozimga tayinlanadigan va lavozimdan ozod etiladigan bir nafar oʻrinbosari boʻladi.

Bosh direktor Agentlik faoliyatiga umumiy rahbarlikni amalga oshiradi, jamoa oldida turgan vazifalarning bajarilishini tashkil etadi, Agentlikning barcha boʻlinmalari va unga boʻysunadigan korxonalar va tashkilotlar uchun bajarilishi majburiy boʻlgan buyruqlar, farmoyishlar, yoʻriqnomalar chiqaradi.

Agentlikning bosh direktori:

ish haqi fondi doirasida xodimlar shtat jadvalini tasdiqlaydi;

xodimlarni va xorijiy mutaxassislarni amaldagi qonun hujjatlarida nazarda tutilgan tartibda va Oʻzbekiston Respublikasi Mehnat vazirligi va Adliya vazirligi bilan kelishilgan nizomga muvofiq ular bilan tuzilgan shartnomalar asosida ishga qabul qiladi;

Agentlik xoʻjalik hisobidagi faoliyat hisobiga boʻlinmalarning sonini koʻpaytirishi, shuningdek Agentlikning yangi tarkibiy boʻlinmalarini tashkil etishi mumkin.

18. Respublikaning koinot faoliyatida yagona texnikaviy siyosatni yurgizish, fan va texnikaning eng yangi yutuqlarini hisobga olish boʻyicha tavsiyanomalarni ishlab chiqish uchun Agentlikda rahbar xodimlardan, olimlardan, konstruktorlardan, Agentlik mutaxassislaridan va boshqa manfaatdor vazirliklar va idoralar vakillaridan iborat idoralararo ilmiy-texnika kengashi tuziladi.

19. Oʻzbekiston davlat koinotni tadqiq etish agentligining idoralararo ilmiy-texnika kengashi toʻgʻrisidagi nizom va ushbu kengashining shaxsiy tarkibi Agentlik bosh direktorining taqdimnomasiga koʻra Oʻzbekiston Respublikasi Vazirlar Mahkamasi tomonidan tasdiqlanadi.

20. Agentlikda bosh direktor hayʼat raisi, lavozimi boʻyicha uning oʻrinbosari va “Oʻzbekkoinot”ning boshqa rahbar xodimlaridan ibora tarkibda hayʼat tuziladi. Hayʼat tarkibiga koinot tadqiqotlar bilan aloqador boshqa davlat boshqaruv idoralari, korxonalar, muassasalar va tashkilotlarning vakillari ham kirishlari mumkin.

“Oʻzbekiston” agentligining hayʼat aʼzolari Oʻzbekiston Respublikasi Vazirlar Mahkamasi tomonidan tasdiqlanadi.

Hayʼat oʻz majlislarida Agentlik siyosatini, uning joriy va istiqboldagi vazifalarni belgilaydi, respublikada va chet elda Oʻzbekkoinot tuzilmalarini rivojlantirish, moliyaviy-iqtisodiy faoliyatning ahvoli, kadrlar bilan ishlash masalalarini koʻrib chiqadi, Agentlik boʻlinmalarining, shuningdek Agentlikka boʻysunuvchi korxonalar, muassasalar va tashkilotlarning hisobotlarini eshitadi.

Hayʼat, odatda, Agentlik bosh direktorining buyruqlari bilan hayotga joriy etiladigan qarorlar qabul qiladi.

21. Agentlikning markaziy apparati:

Hukumatning, Agentlik hayʼatining, idoralararo ilmiy-texnika kengashining qarorlari bajarilishini taʼminlaydi;

Agentlik faoliyatiga taalluqli barcha masalalarni oldindan ishlab chiqishni amalga oshiradi;

Agentlik faoliyatining istiqbollarini, dasturlarini va rejalarini ishlab chiqishni olib boradi;

Agentlik nomidan bank kreditlarini olish toʻgʻrisida qaror tayyorlaydi;

Keyinchalik Agentlik hayʼati tomonidan tasdiqlanadigan zaxira fondidan Agentlikning korxonalari va muassasalariga moddiy va texnikaviy yordam koʻrsatish toʻgʻrisida qaror tayyorlaydi;

boshqaruvni va Agentlikning tashkiliy tuzilmalarini takomillashtirish yuzasidan takliflar tayyorlaydi va ularni tasdiqlash uchun Agentlik hayʼatiga kiritadi.

Agentlikning yangi aʼzolarini qabul qilish toʻgʻrisida asoslangan qaror tayyorlaydi, bu masala keyinchalik Agentlik hayʼatida tasdiqlanadi.

VII. Hisobot va nazorat

22. Agentlik oʻziga qarashli tashkilotlardan Agentlik funksiyalarini amalga oshirish uchun zarur boʻlgan tezkor maʼlumotlar va faoliyati toʻgʻrisida davriy hisobotlar olib turadi, Agentlikka qarashli tashkilotlar belgilangan statistika hisobotlarini taqdim etadilar.

23. Agentlik belgilangan tartibda tezkor buxgalteriya va statistika hisobini yuritadi, tasdiqlangan shakllar boʻyicha va belgilangan muddatlarda ishlab chiqarish-xoʻjalik faoliyatining barcha turlariga oid hisobot tayyorlaydi va Vazirlar Mahkamasiga hamda tegishli idoralarga taqdim etadi, hisobotlar va balanslarning ishonchliligini taʼminlaydi.

Agentlik amalda qonun hujjatlariga qatʼiy rioya etilishini taʼminlaydi.

VIII . Agentlik faoliyatini toʻxtatish va uni qayta tashkil etish

24. Agentlik faoliyatini toʻxtatish yoki uni qayta tashkil etish Oʻzbekiston Respublikasi Vazirlar Mahkamasining qarori bilan belgilangan tartibda amalga oshiriladi.