Ish beruvchilarga ular tomonidan 25 yoshdan oshmagan xodimlar uchun toʻlangan ijtimoiy soliq summasini Davlat budjetidan toʻliq qoplab berish tartibi toʻgʻrisidagi vaqtinchalik nizomni tasdiqlash haqida (460-son)
24.07.2021
Oʻzbekiston Respublikasi Vazirlar Mahkamasining
qarori
Oʻzbekiston Respublikasi Prezidentining “Yoshlarning tadbirkorlik faoliyatini qoʻllab-quvvatlash va bandligiga koʻmaklashish, ularni ijtimoiy himoya qilish hamda boʻsh vaqtini mazmunli tashkil etishga oid qoʻshimcha chora-tadbirlar toʻgʻrisida” 2021-yil 20-apreldagi PF-6208-son va “Yoshlarning bandligiga koʻmaklashish hamda ularni doimiy ish bilan taʼminlashga oid qoʻshimcha chora-tadbirlar toʻgʻrisida” 2023-yil 26-apreldagi PF-61-son farmonlari ijrosini taʼminlash maqsadida Vazirlar Mahkamasi qaror qiladi:
2. Quyidagilarni nazarda tutuvchi Ish beruvchilarga ular tomonidan 25 yoshdan oshmagan xodimlar uchun toʻlangan ijtimoiy soliq summasini Oʻzbekiston Respublikasi Davlat budjetidan toʻliq qoplab berish tartibi toʻgʻrisidagi vaqtinchalik nizom ilovaga muvofiq tasdiqlansin:
ish beruvchilarga 25 yoshdan oshmagan xodimlari uchun toʻlangan ijtimoiy soliq summasini maʼlum bir davr uchun Oʻzbekiston Respublikasi Davlat budjetidan toʻliq qoplab berish tartibi;
ish beruvchiga Iqtisodiyot va moliya vazirligi huzuridagi Soliq qoʻmitasi tomonidan ijtimoiy soliq summasini toʻlab berish yoki toʻlab berishni rad etish asoslari;
ish beruvchi tomonidan imtiyozdan foydalanish uchun topshiriladigan soliq hisobotlari;
Iqtisodiyot va moliya vazirligi huzuridagi Gʻaznachilik xizmati qoʻmitasi tomonidan Oʻzbekiston Respublikasi Davlat budjetidan qoplab beriladigan mablagʻlarni ish beruvchining bankdagi hisobvaragʻiga oʻtkazib berish tartibi.
3. Ish beruvchilarga ijtimoiy soliq summasining qoplab berilishi 2021-yilda Oʻzbekiston Respublikasining respublika budjetidan Oʻzbekiston Respublikasi Moliya vazirligi huzuridagi Budjetdan tashqari Pensiya jamgʻarmasiga ajratiladigan transfertlar hisobidan amalga oshiriladi.
31. Ish beruvchilarga ijtimoiy soliq summasining qoplab berilishi 2023-yilda Oʻzbekiston Respublikasining respublika budjetidan Oʻzbekiston Respublikasi Iqtisodiyot va moliya vazirligi huzuridagi budjetdan tashqari Pensiya jamgʻarmasiga ajratiladigan transfertlar hisobidan amalga oshiriladi.
4. Oʻzbekiston Respublikasi Moliya vazirligi 2022-yil va 2023-yil uchun Davlat budjetini shakllantirishda ijtimoiy soliq hisoboti ortib boruvchi yakun bilan har oyda hisobot davridan keyingi oyning 15 sanasidan kechiktirmasdan topshirilishini inobatga olib, 2022-yil va 2023-yilning I choragida ish beruvchilarga ijtimoiy soliq summasini qoplab berish xarajatlarini alohida qatorda rejalashtirishni nazarda tutsin.
41. Oʻzbekiston Respublikasi Iqtisodiyot va moliya vazirligi 2024-yil va 2025-yil uchun Davlat budjetini shakllantirishda ijtimoiy soliq hisoboti ortib boruvchi yakun bilan har oyda hisobot davridan keyingi oyning 15-sanasidan kechiktirmasdan topshirilishini inobatga olib, 2024-yil va 2025-yilning I choragida ish beruvchilarga ijtimoiy soliq summasini qoplab berish xarajatlarini alohida qatorda rejalashtirishni nazarda tutsin.
5. Oʻzbekiston Respublikasi Davlat soliq qoʻmitasi ish beruvchilarga qoplab beriladigan ijtimoiy soliq summasi toʻgʻri hisoblanishi ustidan qonunchilik hujjatlariga muvofiq soliq nazoratini amalga oshirsin.
6. Mazkur qarorning bajarilishini nazorat qilish Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari — iqtisodiy taraqqiyot va kambagʻallikni qisqartirish vaziri J.A. Qoʻchqorov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2021-yil 24-iyul,
460-son
Vazirlar Mahkamasining 2021-yil 24-iyuldagi 460-son qaroriga ILOVA
Ish beruvchilarga ular tomonidan 25 yoshdan oshmagan xodimlar uchun toʻlangan ijtimoiy soliq summasini Davlat budjetidan toʻliq qoplab berish tartibi toʻgʻrisidagi
VAQTINCHALIK NIZOM
1-bob. Umumiy qoidalar
1. Ushbu Vaqtinchalik nizom (keyingi oʻrinlarda — Nizom) ish beruvchilarga ular tomonidan 25 yoshdan oshmagan xodimlar (keyingi oʻrinlarda — yosh xodimlar) uchun toʻlangan ijtimoiy soliq summasini Davlat budjetidan toʻliq qoplab berish tartibini belgilaydi.
2. Ushbu Nizom budjet tashkilotlari, davlat korxonalari, ustav jamgʻarmasi (kapitali)da davlat ulushi 50 foiz va undan ortiq boʻlgan yuridik shaxslarga, shuningdek, ijtimoiy soliqni 1 foiz stavkada toʻlovchilarga nisbatan tatbiq etilmaydi.
3. Ushbu Nizomda quyidagi asosiy tushunchalar qoʻllaniladi:
avtomatlashtirilgan dastur — ish beruvchilarga ular tomonidan yosh xodimlar uchun toʻlangan ijtimoiy soliq summasini qoplab berish yoki qoplab berishni rad etish asoslarini tekshiradigan, Iqtisodiyot va moliya vazirligi Davlat moliyasini boshqarishning axborot tizimiga (keyingi oʻrinlarda — DMBAT) integratsiya qilingan Iqtisodiyot va moliya vazirligi huzuridagi Soliq qoʻmitasining avtomatlashtirilgan dasturi;
ish beruvchining arizasi — ish beruvchining ijtimoiy soliq summasi koʻrsatilgan, Soliq organlarining elektron davlat xizmatlari portalidagi (my.soliq.uz) soliq toʻlovchining shaxsiy kabineti (keyingi oʻrinlarda — soliq toʻlovchining shaxsiy kabineti) orqali ushbu Nizomga 1-ilovada keltirilgan namunaga muvofiq arizasi.
4. Ijtimoiy soliq hisoboti ortib boruvchi yakun bilan har oyda hisobot davridan keyingi oyning 15 sanasidan kechiktirmasdan topshirilishini inobatga olib, ushbu Nizom 2021-yil 1-maydan 2023-yil 15-yanvarga qadar toʻlangan ijtimoiy soliq summasini Davlat budjetidan qoplab berishga nisbatan tatbiq etiladi. Bunda, 2022-yil dekabr oyi uchun toʻlangan ijtimoiy soliq summasini qoplab berish uchun ish beruvchi tomonidan ariza berishning oxirgi muddati 2023-yil 1-aprel kuni etib belgilanadi.
41. Ijtimoiy soliq hisoboti ortib boruvchi yakun bilan har oyda hisobot davridan keyingi oyning 15-sanasidan kechiktirmasdan topshirilishini inobatga olib, ushbu Nizom 2023-yil 1-maydan 2025-yil 15-yanvarga qadar toʻlangan ijtimoiy soliq summasini Davlat budjetidan qoplab berishga nisbatan tatbiq etiladi. Bunda, 2024-yil dekabr oyi uchun toʻlangan ijtimoiy soliq summasini qoplab berish uchun ish beruvchi tomonidan ariza berishning oxirgi muddati 2025-yil 1-aprel kuni etib belgilanadi.
5. Ish beruvchilarga nisbatan ular tomonidan toʻlangan ijtimoiy soliq summasini qoplab berish shaklidagi qoʻllab-quvvatlash chorasi qoʻllanilishi uchun ularning yosh xodimlari quyidagi talablarga mos kelishi shart:
ijtimoiy soliq summasi qoplab berilishi soʻralayotgan hisobot oyida yosh xodim 25 yoshdan oshmagan boʻlishi;
uzluksiz 6 oy davomida mehnat faoliyatini amalga oshirgan hamda ish beruvchi tomonidan belgilangan tartibda ijtimoiy soliq uzluksiz toʻlanganligini tasdiqlovchi hujjat (elektron qayd) mavjudligi;
Ish beruvchining arizasini ushbu bandda nazarda tutilgan talablardan boshqa asoslarga koʻra rad etish taqiqlanadi.
6. Ish beruvchilarga ular tomonidan yosh xodimlar uchun toʻlangan ijtimoiy soliq summasini Davlat budjetidan toʻliq qoplab berish ushbu Nizomga 2-ilovada keltirilgan sxemaga muvofiq amalga oshiriladi.
2-bob. Ish beruvchi tomonidan ariza taqdim etish hamda uni koʻrib chiqish tartibi
7. Ish beruvchi tomonidan ariza u soliq toʻlovchi sifatida roʻyxatda turgan soliq organiga (keyingi oʻrinlarda — soliq organi) ijtimoiy soliq hisoboti taqdim etilganidan keyin 3 oydan kechiktirmasdan soliq toʻlovchining shaxsiy kabineti orqali taqdim etiladi.
8. Ish beruvchining arizasi kelib tushgan sanadan boshlab 5 ish kuni mobaynida soliq organi tomonidan avtomatlashtirilgan dastur yordamida arizaning ushbu Nizom talablariga muvofiq yoki muvofiq emasligi oʻrganiladi. Bunda, ish beruvchining arizasidagi maʼlumotlar va toʻlangan ijtimoiy soliq summasi qoplab berilishi soʻralayotgan hisobot oyidagi hisobot maʼlumotlari oʻrtasida farq aniqlansa, soliq organi tomonidan soliq toʻlovchining shaxsiy kabinetiga ish beruvchining arizasi koʻrilmasdan qoldirilganligi haqida xabar yuboriladi.
9. Toʻlangan ijtimoiy soliq summasini qoplab berish toʻgʻrisida qaror qabul qilinganda, avtomatlashtirilgan dasturda 1 ish kunida soliq organining xulosasi shakllantiriladi, shakllangan xulosa bilan ish beruvchining arizasi Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasiga (keyingi oʻrinlarda — Gʻaznachilik) yuboriladi hamda bu haqda ish beruvchi soliq toʻlovchining shaxsiy kabineti orqali xabardor qilinadi.
10. Soliq organi toʻlangan ijtimoiy soliq summasini qoplab berishni rad etish toʻgʻrisida qaror qabul qilganda, ushbu qaror avtomatlashtirilgan dastur orqali soliq toʻlovchining shaxsiy kabinetiga ijtimoiy soliq summasini qoplab berishni rad etishni sabablari asoslantirilgan holda yuboriladi.
11. Ish beruvchi ijtimoiy soliq summasini qoplab berishni rad etish toʻgʻrisidagi qaror ustidan qonunchilik hujjatlarida belgilangan tartibda yuqori turuvchi organga yoki sudga shikoyat qilishga haqli.
12. Ish beruvchining arizasi kelib tushganda, uning soliqlar boʻyicha qarzdorligi mavjud boʻlsa, ijtimoiy soliq summasi mavjud qarzdorliklar toʻlaligicha bartaraf etilgandan soʻng ushbu Nizom talablari doirasida qoplab beriladi.
3-bob. Ijtimoiy soliq summasini ish beruvchining bankdagi hisobvaragʻiga oʻtkazib berish tartibi
13. Gʻaznachilik avtomatlashtirilgan dastur orqali DMBATga kelib tushgan hujjatlarni 3 ish kuni davomida koʻrib chiqadi va qoplab beriladigan ijtimoiy soliq summasini ish beruvchining bankdagi hisobvaragʻiga oʻtkazib beradi.
14. Gʻaznachilik ish beruvchining bankdagi hisobvaragʻiga oʻtkazib berilgan ijtimoiy soliq summasi toʻgʻrisidagi maʼlumotlarni DMBAT orqali avtomatlashtirilgan dasturga yuboradi.
4-bob. Hisob va hisobotni yuritish tartibi
15. Soliq organi ish beruvchilarga Davlat budjetidan toʻliq qoplab berilgan ijtimoiy soliq summasining hisobi va hisobotini yuritadi.
16. Ish beruvchilarga Davlat budjetidan toʻliq qoplab berilgan ijtimoiy soliq summasiga doir choraklik hisobot Iqtisodiyot va moliya vazirligi huzuridagi Soliq qoʻmitasi tomonidan har chorakda hisobot davridan keyingi oyning 25-sanasiga qadar Iqtisodiyot va moliya vazirligiga kiritib boriladi.
17. Ish beruvchi tomonidan qayta hisobot berish orqali umumiy ish haqi fondi doirasida xodimlarga hisoblangan mehnatga haq toʻlash tarzidagi daromadlar qayta taqsimlangan taqdirda, qoplab berilgan ijtimoiy soliq summasi ish beruvchi yoki soliq organining tashabbusiga koʻra oʻzaro qayta hisob-kitob qilinadi.
5-bob. Yakunlovchi qoidalar
18. Ushbu Nizom 2025-yil 1-yanvarga qadar amal qiladi.
19. Ushbu Nizom talablarini buzgan shaxslar qonunchilik hujjatlarida belgilangan tartibda javobgar boʻladilar.
Ish beruvchilarga ular tomonidan 25 yoshdan oshmagan xodimlar uchun toʻlangan ijtimoiy soliq summasini Davlat budjetidan toʻliq qoplab berish tartibi toʻgʻrisidagi vaqtinchalik nizomga 1-ILOVA
Ish beruvchilarga ular tomonidan 25 yoshdan oshmagan xodimlar uchun toʻlangan ijtimoiy soliq summasini Davlat budjetidan toʻliq qoplab berish tartibi toʻgʻrisidagi vaqtinchalik nizomga 2-ILOVA
Ish beruvchilar tomonidan yosh xodimlar uchun toʻlangan ijtimoiy soliq summasini Davlat budjetidan toʻliq qoplab berish
SXEMASI
Bosqichlar Subyektlar Tadbirlar Ijro muddati 1-bosqich Ish beruvchi Soliq toʻlovchi sifatida roʻyxatda turgan soliq organiga soliq toʻlovchining shaxsiy kabineti orqali ariza taqdim etadi. Hisobot taqdim etish muddatidan soʻng, lekin 3 oydan kechiktirmasdan 2-bosqich Soliq organi Kelib tushgan arizada koʻrsatilgan maʼlumotlarning Ish beruvchilarga ular tomonidan 25 yoshdan oshmagan xodimlar uchun toʻlangan ijtimoiy soliq summasini Davlat budjetidan toʻliq qoplab berish tartibi toʻgʻrisidagi vaqtinchalik nizom talablariga muvofiq yoki muvofiq emasligini oʻrganadi. 5 ish kunida 3-bosqich Avtomatlashtirilgan dastur Ijtimoiy soliq summasini qoplab berish toʻgʻrisida qaror qabul qilinganda, avtomatlashtirilgan dastur 1 ish kunida soliq organining xulosasini shakllantiradi va shakllangan xulosa bilan ish beruvchining arizasini Iqtisodiyot va moliya vazirligi huzuridagi Gʻaznachilik xizmati qoʻmitasiga yuboradi hamda bu haqda ish beruvchini soliq toʻlovchining shaxsiy kabineti orqali habardor qiladi. 1 ish kunida 4-bosqich Iqtisodiyot va moliya vazirligi huzuridagi Gʻaznachilik xizmati qoʻmitasi Avtomatlashtirilgan dastur orqali DMBATga kelib tushgan hujjatlarni koʻrib chiqadi va qoplab beriladigan ijtimoiy soliq summasini ish beruvchining bankdagi hisobvaragʻiga oʻtkazib beradi va bir vaqtning oʻzida oʻtkazib berilgan ijtimoiy soliq summasi toʻgʻrisidagi maʼlumotlarni avtomatlashtirilgan dasturga yuboradi. 3 ish kunida