Oʻzbekiston Respublikasi Vazirlar Mahkamasi huzuridagi Suv muammolari ilmiy-tadqiqot markazi faoliyatini takomillashtirish chora-tadbirlari toʻgʻrisida (453-son)
23.07.2021
Oʻzbekiston Respublikasi Vazirlar Mahkamasining
qarori
Xorazm viloyatida suv xoʻjaligi boʻyicha ilmiy-tadqiqot ishlarining samaradorligini yanada oshirish, suv resurslaridan foydalanishni toʻgʻri rejalashtirish, ilm-fan yutuqlarini, jumladan, viloyatning oʻziga xos tuproq-iqlim sharoitlarida innovatsion va resurslarni tejaydigan sugʻorish texnologiyalarini amaliyotga keng joriy qilish hamda Vazirlar Mahkamasi huzuridagi Suv muammolari ilmiy-tadqiqot markazi faoliyatini takomillashtirish maqsadida Vazirlar Mahkamasi qaror qiladi:
1. Oʻzbekiston Respublikasi Vazirlar Mahkamasining 2020-yil 25-noyabrdagi 744-son qarori bilan Oʻzbekiston Respublikasi Vazirlar Mahkamasi huzuridagi Suv muammolari ilmiy-tadqiqot markazi tashkil etilganligi, uning asosiy vazifalari va faoliyatini moliyalashtirish manbalari belgilanganligi maʼlumot uchun qabul qilinsin.
2. Oʻzbekiston Respublikasi Suv xoʻjaligi vazirligi va Xorazm viloyati hokimligining 2021-yil 1-iyuldan boshlab Vazirlar Mahkamasi huzuridagi Suv muammolari ilmiy-tadqiqot markazining (keyingi oʻrinlarda — Markaz):
xodimlari mehnatiga haq toʻlash, bino va inshootlarini saqlash xarajatlarini moliyalashtirish, shuningdek, joriy xarajatlarini qoplashni Oʻzbekiston Respublikasi Davlat budjeti mablagʻlari hisobidan amalga oshirish;
ilmiy va rahbar xodimlari ish haqini Oʻzbekiston Respublikasi Davlat budjeti mablagʻlari hisobiga fundamental, amaliy tadqiqotlar va innovatsion ishlarning ilmiy-texnik dasturlarini amalga oshirishda qatnashuvchi ilmiy-tadqiqot muassasalari ilmiy va rahbar xodimlarining bazaviy lavozim maoshlari miqdoriga hamda boshqaruv, texnik va xizmat koʻrsatuvchi xodimlarining ish haqini Fanlar akademiyasi ilmiy-tadqiqot institutlarining boshqaruv va yordamchi xodimlarining bazaviy lavozim maoshi miqdoriga tenglashtirish;
ilmiy xodimlari mehnatiga haq toʻlashni bosqichma-bosqich maqbullashtirgan tartibda oʻzini oʻzi moliyalashtirish tizimiga oʻtkazish toʻgʻrisidagi takliflariga rozilik berilsin.
3. Belgilab qoʻyilsinki, Oʻzbekiston Respublikasi Davlat budjeti mablagʻlari hisobidan Markazni saqlash boʻyicha qoʻshimcha xarajatlar 2021-yilda Xorazm viloyati mahalliy budjetining qoʻshimcha manbalari hisobidan moliyalashtiriladi, 2022-yildan boshlab Oʻzbekiston Respublikasi Davlat budjeti parametrlarida nazarda tutiladi.
4. Vazirlar Mahkamasi huzuridagi Suv muammolari ilmiy-tadqiqot markazining Oʻzbekiston Respublikasi Davlat budjeti mablagʻlari hisobiga moliyalashtiriladigan ilmiy xodimlari sonini 2026-yil 1-yanvargacha bosqichma-bosqich maqbullashtirish jadvali 1-ilovaga muvofiq tasdiqlansin.
5. Xorazm viloyati hokimligi:
2021-yilda Markazni saqlash boʻyicha qoʻshimcha xarajatlarni qoplash hamda yangi tashkil etilayotgan ilmiy-tadqiqot laboratoriyalariga zarur boʻlgan asbob-uskunalar va zamonaviy laboratoriya jihozlarini xarid qilish uchun Xorazm viloyati mahalliy budjetining qoʻshimcha manbalaridan mablagʻlar ajratish boʻyicha viloyat xalq deputatlari Kengashiga taklif kiritsin;
Urganch shahri hududida boʻsh turgan va zaxiraga olingan yerlardan maʼmuriy bino va inshootlarni qurish uchun 0,2 gektar yer uchastkasini Markazga doimiy foydalanish huquqi bilan ajratsin;
Xonqa tumani hududidagi Markazga tegishli boʻlgan jami 78,9 gektar yer uchastkasi, shundan 57,1 gektari ekin maydoni va 11,0 gektari bogʻdan iborat boʻlgan dala-tajriba yer uchastkasi bino va inshootlari, moddiy-texnik bazasi bilan birgalikda Xonqa tumani hokimligiga berilishini taʼminlasin.
Oʻzbekiston Respublikasi Qishloq xoʻjaligi vazirligi, Suv xoʻjaligi vazirligi hamda Xorazm viloyati hokimligining Markazga Urganch tumanining suv taʼminoti qulay boʻlgan hududidan qishloq xoʻjaligi sohasida ilmiy-tadqiqot va tajriba-sinovlarni amalga oshirish uchun boʻsh turgan va zaxiraga olingan yerlardan 10,0 gektargacha boʻlgan sugʻoriladigan yer uchastkasini ijaraga berish toʻgʻrisidagi taklifiga rozilik berilsin.
6. Markaz:
suv xoʻjaligi va boshqa turdosh sohalardagi mahalliy yosh iqtidorli mutaxassislar va kadrlarni oʻrganib, ularni Markazga jalb qilish, Xorazm viloyati suv xoʻjaligini rivojlantirish, suv resurslaridan oqilona foydalanishni rejalashtirish, 2021 — 2026-yillarda ilm-fan yutuqlarini, jumladan, viloyatning oʻziga xos tuproq-iqlim sharoitlarida innovatsion va resurslarni tejaydigan sugʻorish texnologiyalarini amaliyotga keng joriy qilish boʻyicha ustuvor ilmiy-tadqiqot ishlarining qisqa va oʻrta muddatli dasturlarini ishlab chiqish;
Oʻzbekiston Respublikasi Davlat budjeti mablagʻlari hisobiga moliyalashtiriladigan Markaz ilmiy xodimlari mehnatiga haq toʻlashni 2022 — 2026-yillar davrida bosqichma-bosqich oʻzini oʻzi moliyalashtirish tizimiga oʻtkazish choralarini koʻrsin.
7. Quyidagilar Markazning ilmiy-tadqiqot laboratoriyalarining asosiy faoliyat yoʻnalishlari etib belgilansin:
irrigatsiya tizimi va sugʻorish tarmoqlarining foydali ish koeffitsiyentini oshirish, suv resurslarini oqilona boshqarish va hisobini yuritishda raqamli va innovatsion texnologiyalarni joriy etish;
qishloq xoʻjaligi ekinlarini tomchilatib, yomgʻirlatib, diskret va tuproq ostidan sugʻorish texnologiyalarini, suv tanqisligi sharoitida yangi usullar va texnologiyalarni, jumladan, axborot-kommunikatsiya texnologiyalarini va boshqa innovatsion texnologiyalarni joriy etish;
sugʻoriladigan yerlarning meliorativ holatini yaxshilash, kollektor-drenaj tarmoqlaridan foydalanish, shoʻrlangan yerlarning shoʻrini yuvish va sugʻorishda yerlarni lazer uskunali yer tekislagichlar bilan tekislash hamda boshqa innovatsion texnologiyalarni joriy qilish boʻyicha ilmiy asoslangan tavsiyalarni ishlab chiqish va amaliyotda qoʻllash;
suv xoʻjaligi tashkilotlari va qishloq xoʻjaligi mahsulotlari ishlab chiqaruvchilar bilan hamkorlikni kuchaytirish, ilmiy-tadqiqot ishlari samaradorligi oshirish.
8. Vazirlar Mahkamasining “Oʻzbekiston Respublikasi Vazirlar Mahkamasi huzuridagi Suv muammolari ilmiy-tadqiqot markazi faoliyatini tashkil etish chora-tadbirlari toʻgʻrisida” 2020-yil 25-noyabrdagi 744-son qaroriga 2-ilovaga muvofiq oʻzgartirishlar kiritilsin.
9. Mazkur qarorning bajarilishini nazorat qilish Oʻzbekiston Respublikasi Bosh vazirining agrar va oziq-ovqat sohalarini rivojlantirish masalalari boʻyicha oʻrinbosari Sh.M. Gʻaniyev hamda Xorazm viloyati hokimi F.Oʻ. Ermanov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2021-yil 23-iyul,
453-son
Vazirlar Mahkamasining 2021-yil 23-iyuldagi 453-son qaroriga 1-ILOVA
Vazirlar Mahkamasi huzuridagi Suv muammolari ilmiy-tadqiqot markazining Oʻzbekiston Respublikasi Davlat budjeti mablagʻlari hisobiga moliyalashtiriladigan ilmiy xodimlari sonini 2026-yil 1-yanvargacha bosqichma-bosqich maqbullashtirish
JADVALI
T/r Laboratoriyalar nomi Ilmiy xodimlarning shtat birligi soni 2022-2023-yillar 2024-2025-yillar 2026-yildan boshlab 1. Irrigatsiya tizimi va oʻzan jarayonlari laboratoriyasi 3 2 1 2. Sugʻorish va suvni tejaydigan texnologiyalar laboratoriyasi 3 2 1 3. Melioratsiya va kollektor-drenaj tarmoqlari laboratoriyasi 3 2 1 4. Suv xoʻjaligida raqamli va innovatsion texnologiyalar laboratoriyasi 2 1 1 5. Gidrometriya laboratoriyasi 2 1 1 6. Tuproq va suv tadqiqotlari hamda meliorativ jarayonlar laboratoriyasi 2 1 1 Jami 15 9 6
Vazirlar Mahkamasining 2021-yil 23-iyuldagi 453-son qaroriga 2-ILOVA
Vazirlar Mahkamasining “Oʻzbekiston Respublikasi Vazirlar Mahkamasi huzuridagi Suv muammolari ilmiy-tadqiqot markazi faoliyatini tashkil etish chora-tadbirlari toʻgʻrisida” 2020-yil 25-noyabrdagi 744-son qaroriga kiritilayotgan oʻzgartirishlar
1. 6-bandning ikkinchi xatboshisi quyidagi tahrirda bayon qilinsin:
“Oʻzbekiston Respublikasi Davlat budjeti mablagʻlari”.
2. 7-bandda:
a) ikkinchi xatboshi quyidagi tahrirda bayon qilinsin:
“Markazning ilmiy va rahbar xodimlariga Oʻzbekiston Respublikasi Davlat budjeti mablagʻlari hisobiga fundamental, amaliy tadqiqotlar va innovatsion ishlarning ilmiy-texnik dasturlarini amalga oshirishda qatnashuvchi ilmiy-tadqiqot muassasalari ilmiy va rahbar xodimlari uchun hamda boshqaruv, texnik va xizmat koʻrsatuvchi xodimlariga Fanlar akademiyasi ilmiy-tadqiqot institutlarining tegishli lavozimlari uchun nazarda tutilgan mehnatga haq toʻlash va moddiy ragʻbatlantirish shartlari tatbiq etiladi”;
b) uchinchi xatboshida:
“(ilmiy xodimlardan tashqari)” soʻzlari chiqarib tashlansin;
“2021-yil” soʻzlari “2022-yil” soʻzlari bilan almashtirilsin.
3. Qarorga 1-ilova matni quyidagi tahrirda bayon qilinsin:
“Oʻzbekiston Respublikasi Vazirlar Mahkamasi huzuridagi Suv muammolari ilmiy-tadqiqot markazining TUZILMASI
Direktor Direktor oʻrinbosari — ilmiy kotib Irrigatsiya tizimi va oʻzan jarayonlari laboratoriyasi 3 Suv xoʻjaligida raqamli va innovatsion texnologiyalar laboratoriyasi 2 Tuproq va suv tadqiqotlari hamda meliorativ jarayonlar laboratoriyasi 2 Bosh buxgalter 1 Xodimlar va hujjatlar bilan ishlash boʻyicha mutaxassis 1 Sugʻorish va suvni tejaydigan texnologiyalar laboratoriyasi 3 Melioratsiya va kollektor-drenaj tarmoqlari laboratoriyasi 3 Gidrometriya laboratoriyasi 2
Jami ilmiy xodimlar va muhandislar 19 nafar.
Yordamchi xodimlarning soni
belgilangan meʼyorlarga asosan belgilanadi.
Ilmiy-tadqiqot ishlarini amalga oshirish uchun mutaxassislar va olimlar shartnoma asosida qoʻshimcha ravishda jalb qilinishi mumkin”.
4. Qarorga 2-ilovaning 26-bandi ikkinchi xatboshisi quyidagi tahrirda bayon qilinsin:
“Markazning bino va inshootlarini saqlash hamda xodimlar mehnatiga haq toʻlash xarajatlarini moliyalashtirish uchun Oʻzbekiston Respublikasining Davlat budjetidan ajratiladigan mablagʻlar”.