Oʻzbekiston Respublikasi Oliy Majlisi Qonunchilik palatasining 2021-yil ikkinchi yarim yilligiga moʻljallangan ish rejasini tasdiqlash toʻgʻrisida (1123-IV-son)

30.06.2021

Oʻzbekiston Respublikasi Oliy Majlisi Qonunchilik palatasi Kengashining

qarori

2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasi doirasida davlat boshqaruvini takomillashtirish, jamiyatni demokratlashtirish, aholining turmush darajasi va sifatini oshirish, hududlarni kompleks rivojlantirish borasida mamlakatimizda amalga oshirilayotgan keng koʻlamli islohotlar parlament oldiga yangidan-yangi vazifalarni qoʻymoqda.

Islohotlarning shiddati Qonunchilik palatasi, uning qoʻmitalari va komissiyalari faoliyati samaradorligini yanada oshirish, parlament vakillarining xalq bilan doimiy muloqotini sifat jihatidan yangi darajaga koʻtarish, quyi palataning qonun ijodkorligiga, parlament va deputatlik nazoratiga doir faoliyatini kuchaytirish, parlamentlararo hamkorlik aloqalarini rivojlantirish kabi muhim yoʻnalishlarni yanada takomillashtirishni, deputatlar korpusi ishini bugungi kun talablari asosida olib borishni taqozo etmoqda.

Shundan kelib chiqib, Oʻzbekiston Respublikasi Oliy Majlisi Qonunchilik palatasining 2021-yil ikkinchi yarim yilligiga moʻljallangan faoliyatining asosiy yoʻnalishlarini mamlakatda barcha sohalarda olib borilayotgan islohotlardan, Oʻzbekiston Respublikasi Prezidentining Farmon va qarorlarida hamda oʻtkazilayotgan videoselektor yigʻilishlarida belgilab berilayotgan ustuvor yoʻnalishlardan kelib chiqqan holda tanqidiy jihatdan qayta koʻrib chiqish hamda uni bugungi kun talablariga mos ravishda yanada takomillashtirish talab etilmoqda.

Yuqoridagilarni inobatga olib, demokratik islohotlarni amalga oshirish va mamlakatni modernizatsiya qilishda Oʻzbekiston Respublikasi Oliy Majlisi Qonunchilik palatasining faol ishtirokini taʼminlash maqsadida hamda siyosiy partiyalar fraksiyalari, qoʻmitalar hamda komissiyalarning taklif va fikr-mulohazalaridan kelib chiqqan holda, Oʻzbekiston Respublikasi Oliy Majlisi Qonunchilik palatasining Kengashi qaror qiladi:

1. Oʻzbekiston Respublikasi Oliy Majlisi Qonunchilik palatasining 2021-yil ikkinchi yarim yilligiga moʻljallangan ish rejasi (bundan buyon matnda Ish reja deb yuritiladi) ilovaga* muvofiq tasdiqlansin.

*Ilova berilmaydi.

2. Ish rejasida nazarda tutilgan vazifa va tadbirlarni oʻz vaqtida, sifatli bajarish uchun Oʻzbekiston Respublikasi Oliy Majlisi Qonunchilik palatasi Spikerining birinchi oʻrinbosari va oʻrinbosarlari, qoʻmitalari (komissiyalari) raislari, Devoni rahbari masʼul ekanligi belgilab qoʻyilsin.

3. Ish rejasida belgilangan masʼul ijrochilar uning bajarilishi holati toʻgʻrisida har oyning 25 sanasiga qadar (yoki soʻrovga koʻra) Oʻzbekiston Respublikasi Oliy Majlisi Qonunchilik palatasi Devonining Nazorat va monitoring boʻlimiga axborot taqdim etib borilishini taʼminlasin.

4. Oʻzbekiston Respublikasi Oliy Majlisi Qonunchilik palatasi Devonining Nazorat va monitoring boʻlimi (A. Abdukodirov) Ish rejasining ijrosi yuzasidan doimiy monitoring oʻrnatib, uning borishi toʻgʻrisida har oyda Oʻzbekiston Respublikasi Oliy Majlisi Qonunchilik palatasi Kengashiga umumlashtirilgan maʼlumot kiritib borsin.

5. Ish rejasida nazarda tutilgan vazifalar va tadbirlarning bajarilishini nazorat qilish Oʻzbekiston Respublikasi Oliy Majlisi Qonunchilik palatasi Spikerining birinchi oʻrinbosari va oʻrinbosarlari zimmasiga yuklatilsin.

6. Oʻzbekiston Respublikasi Oliy Majlisi Qonunchilik palatasi Kengashining 2021-yil 15-fevraldagi “Oʻzbekiston Respublikasi Oliy Majlisi Qonunchilik palatasining 2021-yilga moʻljallangan ish rejasini tasdiqlash toʻgʻrisida”gi 750-IV-sonli Qarori bilan tasdiqlangan Oʻzbekiston Respublikasi Oliy Majlisi Qonunchilik palatasining 2021-yilga moʻljallangan ish rejasiga muvofiq iyul — dekabr oylarida oʻtkazilishi nazarda tutilgan tadbirlar bekor qilinsin.

7. Ushbu Qaror tasdiqlash uchun Oʻzbekiston Respublikasi Oliy Majlisi Qonunchilik palatasining majlisiga kiritilsin.

8. Ushbu Qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Qonunchilik palatasining Spikeri N. ISMOILOV

Toshkent sh.,

2021-yil 30-iyun,

1123-IV-son