“Yangi Andijon” shahrini barpo etish ishlarini samarali tashkil etishga doir chora-tadbirlar toʻgʻrisida (PQ-5180-son)

12.07.2021

Oʻzbekiston Respublikasi Prezidentining

Qarori

Andijon viloyati aholisining uy-joy sharoitini yaxshilash, hududda zamonaviy shaharsozlik talablari asosida koʻp qavatli uy-joylar, ijtimoiy soha va infratuzilma obyektlari, muhandislik-kommunikatsiya tarmoqlari va shahar hududlari qurilishini jadallashtirish maqsadida:

1. Andijon viloyati xalq deputatlari Kengashining 440 ming aholi uchun turar joy, ijtimoiy va xizmat koʻrsatish sohasi obyektlari, kichik sanoat va yashil hududlarni oʻz ichiga olgan “Yangi Andijon” shahrini (keyingi oʻrinlarda — shahar) bosqichma-bosqich kompleks qurish uchun Andijon tumanining adirliklari hududidagi oʻzlashtirilmagan 4 ming gektar yer maydonini ajratish toʻgʻrisidagi taklifi maʼqullansin.

Bunda, shahar barpo etilishining birinchi bosqichida 121 ming aholi uchun koʻp qavatli turar joylar, ijtimoiy soha, savdo va xizmat koʻrsatish obyektlari, shuningdek, kichik sanoat zonasi qurilishi belgilanganligi maʼlumot uchun qabul qilinsin.

2. Quyidagilar:

“Yangi Andijon” shahrini barpo etish ishlarini tashkil etish va muvofiqlashtirish boʻyicha respublika komissiyasi (keyingi oʻrinlarda — Respublika komissiyasi) 1-ilovaga muvofiq tarkibda tuzilsin;

Respublika komissiyasi faoliyatini samarali tashkil etish maqsadida “Yangi Andijon” shahrini barpo etish boʻyicha doimiy faoliyat yurituvchi shtab (keyingi oʻrinlarda — Shtab) 2-ilovaga muvofiq tarkibda tuzilsin;

Andijon viloyati hokimligi huzurida “Yangi Andijon” shahrida obyektlarni qurish va ulardan foydalanish direksiyasi” davlat unitar korxonasi (keyingi oʻrinlarda — Direksiya) tashkil etilsin va uning tuzilmasi 3-ilovaga muvofiq tasdiqlansin.

3. Quyidagilar Respublika komissiyasining (A. Aripov) asosiy vazifalari etib belgilansin:

shaharning bosh rejasini hamda shahar hududlarini batafsil rejalashtirish loyihalarini koʻrib chiqish va tasdiqlash;

shaharni tasdiqlangan shaharsozlik hujjatlari asosida barpo etish boʻyicha kompleks chora-tadbirlarni amalga oshirish, Shtab va Direksiya faoliyatini samarali tashkil etish hamda muvofiqlashtirish va nazorat qilish;

vakolatli tashkilotlarning tashqi muhandislik-kommunikatsiya tarmoqlarini tortish boʻyicha ishini muvofiqlashtirish;

davlat va korporativ xaridlar ochiqlik va shaffoflik tamoyillari asosida amalga oshirilishini taʼminlash va ularning nazoratini olib borish;

mazkur qarorda koʻzda tutilgan hollarda toʻgʻridan-toʻgʻri bitimlar asosida tuziladigan shartnomalarning roʻyxatini tasdiqlash;

shaharni barpo etish uchun ajratilayotgan mablagʻlarning samarali va maqsadli ishlatilishi ustidan tizimli nazoratni olib borish hamda, zarur hollarda, ajratilayotgan mablagʻlar taqsimotiga tegishli oʻzgartirishlar kiritish;

shaharni barpo etish hamda hududda koʻp qavatli turar joylar, yoʻl-transport, muhandislik-kommunikatsiya, ijtimoiy va bozor infratuzilmalari obyektlarini samarali joylashtirish, loyihalashtirish va qurish ishlarini tashkil etish;

loyiha-qidiruv va qurilish ishlari manzilli dasturlarini tasdiqlash hamda shu asosda qurilish ishlarining olib borilishini muvofiqlashtirish;

koʻp qavatli turar joylar, yoʻl-transport, muhandislik-kommunikatsiya, ijtimoiy va bozor infratuzilmalari obyektlarini loyihalashtirish va qurishda eng maqbul meʼmoriy va texnologik yechimlarning qoʻllanilishi, energiya tejamkor uskunalar va materiallardan foydalanilishini taʼminlash;

koʻp qavatli turar joylar, yoʻl-transport, muhandislik-kommunikatsiya, ijtimoiy va bozor infratuzilmalari obyektlarini loyihalashtirish va qurish ishlariga malakali xorijiy mutaxassis va konsultantlarning jalb qilinishini, shuningdek, ilgʻor xorijiy texnologiyalarning joriy etilishini taʼminlash;

Direksiya rahbarini lavozimga tayinlash va lavozimdan ozod qilish hamda Direksiyaning yillik xarajatlar smetasini tasdiqlash.

4. Quyidagilar Shtabning (D. Adilov) asosiy vazifalari etib belgilansin:

shahar hududida koʻp qavatli turar joylar, yoʻl-transport, muhandislik-kommunikatsiya, ijtimoiy va bozor infratuzilmalari obyektlarini qurish boʻyicha loyiha hujjatlarni ishlab chiqish uchun topshiriqlarni tasdiqlash;

shahar hududlarini batafsil rejalashtirish loyihalarini tasdiqlash;

shaharsozlik, tarixiy-madaniy, ijtimoiy va yoʻl-transport tadqiqotlari hamda muhandislik qidiruvlari natijalarini kelishish;

birlamchi ruxsat beruvchi, loyihaoldi va loyiha hujjatlarining belgilangan muddatda sifatli tayyorlanishini nazorat qilish hamda ishlab chiqilgan loyiha hujjatlarini kelishish;

loyiha-qidiruv va qurilish-pudrat tashkilotlarini tanlash boʻyicha davlat xaridlari shartlarini belgilash va hujjatlarini tasdiqlash;

loyihalarni boshqarish va qurilish ishlari boʻyicha texnik va mualliflik nazorati olib borilishini muvofiqlashtirish;

loyiha-qidiruv va qurilish-pudrat ishlari manzilli dasturlarini ishlab chiqish va Respublika komissiyasiga tasdiqlash uchun kiritish hamda shu asosda qurilish ishlarining olib borilishini tashkil etish;

shaharni barpo etish jarayonida Respublika komissiyasi tomonidan belgilangan chora-tadbirlarning soʻzsiz bajarilishini muvofiqlashtirish va nazorat qilish;

shahar hududida investorlar tomonidan amalga oshiriladigan loyihalarni tizimli ravishda nazorat qilib borish;

qurilish-montaj ishlarining shaharsozlik norma va qoidalari hamda loyiha hujjatlari talablari asosida sifatli bajarilishi yuzasidan loyiha tashkilotlarining mualliflik nazorati va buyurtmachilarning texnik nazorati yuritilishi hamda qurilish sohasida davlat nazoratining oʻrnatilishini taʼminlash;

shaharni barpo etish va uning hududida obyektlarni qurish uchun ajratilayotgan mablagʻlardan maqsadli va samarali foydalanishni tashkil etish;

shaharni barpo etish va uning hududida obyektlarni qurish jarayonida yuzaga keladigan muammolarni oʻz vaqtida aniqlash hamda ularning yechimi boʻyicha choralar koʻrish;

shahar hududida loyihalarni amalga oshirish ustidan doimiy monitoring yuritish va uning natijalari yuzasidan maʼlumotlarni har haftada Respublika komissiyasiga taqdim etib borish;

shaharni barpo etish hamda hududda koʻp qavatli turar joylar, yoʻl-transport, muhandislik-kommunikatsiya, ijtimoiy va bozor infratuzilmalari obyektlarini samarali joylashtirish, loyihalashtirish va qurish ishlarini olib borish boʻyicha Respublika komissiyasiga takliflar kiritib borish.

5. Quyidagilar Direksiyaning asosiy vazifalari etib belgilansin:

geodeziya, geologiya, gidrometeorologiya va ekologik muhandislik-qidiruv va tadqiqot ishlarini tashkil etish;

shaharsozlik, tarixiy-madaniy, ijtimoiy va yoʻl-transport tadqiqotlari olib borilishini tashkil etish;

shaharni barpo etish hamda uning hududida koʻp qavatli turar joylar, yoʻl-transport, muhandislik-kommunikatsiya, ijtimoiy va bozor infratuzilmalari obyektlarini qurish boʻyicha loyiha hujjatlarini ishlab chiqish uchun topshiriqlarni tayyorlash;

birlamchi ruxsat beruvchi, loyihaoldi va loyiha hujjatlarining belgilangan muddatda sifatli tayyorlanishini taʼminlash, shaharsozlik toʻgʻrisidagi qonunchilik hujjatlari talablariga rioya qilish;

loyiha hujjatlarining ekspertizadan oʻtkazilishini taʼminlash;

ochiqlik va shaffoflik tamoyillari asosida, loyiha-tadqiqot va qurilish-pudrat tashkilotlarini tanlash boʻyicha davlat xaridlarini amalga oshirish hamda ular bilan shartnomalarni imzolash;

shaharni barpo etish va uning hududida obyektlarni qurish uchun yer uchastkalarini ajratish bilan bogʻliq jarayonlarda belgilangan tartibda ishtirok etish;

obyektlarda qurilish-montaj ishlarini amalga oshirish uchun zarur shart-sharoitlar yaratish;

loyihalarni boshqarish va qurilish ishlari boʻyicha texnik va mualliflik nazoratini olib borilishini taʼminlash hamda shaharsozlik normalari va qoidalariga rioya qilgan holda obyektlarni foydalanishga qabul qilish ishlarini tashkil etish;

subyektlarning shaharsozlik faoliyati sohasidagi oʻzaro munosabatlari shaffofligini taʼminlash;

shaharni qurish ishlariga salohiyatli tadbirkorlik subyektlarini, shu jumladan xorijiy investorlarni jalb qilish maqsadida ommaviy axborot vositalarida, internetdagi saytlar va ijtimoiy tarmoqlarda taqdimot tadbirlarini va keng reklama kampaniyasini olib borish ishlarini tashkil etish;

shahar hududida obyektlar qurilishini loyihalashtirishda loyiha tashkilotlari tomonidan energiyani tejaydigan zamonaviy texnologiyalar joriy etilishi hamda yuqori texnologik materiallar va buyumlardan samarali foydalanilishini taʼminlash;

qabul qilingan majburiyatlar investorlar tomonidan lozim darajada bajarilishini nazorat qilish, shuningdek, investorlar tomonidan majburiyatlar bajarilmagan yoki lozim darajada bajarilmagan taqdirda, bitimlarni muddatidan oldin bekor qilish toʻgʻrisida qarorlar qabul qilish;

shahar hududida, jumladan boshqaruv kompaniyalarini tuzish va tadbirkorlik subyektlarini jalb etish yoʻli bilan muhandislik-kommunikatsiyalari va umumiy foydalaniladigan joylardan foydalanishni va ularga xizmat koʻrsatishni tashkil qilish;

investorlar, tadbirkorlik subyektlari, ishlarni bajaruvchilar va xizmat koʻrsatuvchi shaxslar, binolar, inshootlar va koʻp qavatli uy-joylar mulkdorlari va ulardan foydalanuvchilar tomonidan qurilish-montaj ishlarini bajarishda va obyektlardan foydalanishda belgilangan yongʻin va texnika xavfsizligi qoidalariga, shaharsozlik normalari va qoidalariga rioya etilishi ustidan nazoratni amalga oshirish.

6. Belgilab qoʻyilsinki, shaharni barpo etishning birinchi bosqichi doirasida:

a) Direksiya tomonidan oʻz mablagʻlari hisobidan Respublika komissiyasi bilan kelishilgan holda, obyektlarni loyihalashtirish va qurilish ishlarida ishtirok etish, mualliflik va texnik nazoratni amalga oshirish uchun yuqori malakali xorijiy mutaxassis va konsultantlar toʻgʻridan-toʻgʻri shartnoma asosida jalb qilinishi mumkin;

b) quyidagilar:

ichki yoʻllarni, ijtimoiy soha va obodonlashtirish obyektlarini qurish boʻyicha — Direksiya;

tashqi muhandislik, aloqa va transport kommunikatsiya obyektlarini qurish boʻyicha — tegishliligi boʻyicha vazirlik va idoralar hamda ularning buyurtmachi xizmatlari buyurtmachi vazifasini bajaradi;

v) istisno tariqasida, toʻgʻridan-toʻgʻri shartnoma asosida:

shaharning shaharsozlik hujjatlarini ishlab chiqish uchun — bosh loyiha tashkiloti “OʻzshaharsozlikLITI” DUK tomonidan “Keym Kentsel Yenileme Merkezi A.Ş.” kompaniyasi (Turkiya);

ichimlik suvi va kanalizatsiya tarmoqlari qurilishi boʻyicha loyiha-smeta hujjatlarini ishlab chiqish uchun — “Oʻzkommunalloyihaqurilish” MCHJ hamda mustaqil injiniring va konsalting kompaniyalari;

avtomobil yoʻllari qurilishi boʻyicha loyiha-smeta hujjatlarini ishlab chiqish uchun — “Yoʻl loyiha byurosi” MCHJ, “Oʻzyoʻlloyiha” loyiha-qidiruv instituti” DUK, Avtomobil yoʻllari qoʻmitasi tizimidagi boshqa loyiha tashkilotlari hamda mustaqil injiniring va konsalting kompaniyalari;

elektr energiyasi, tabiiy gaz va issiqlik tarmoqlari qurilishi boʻyicha loyiha-smeta hujjatlarini ishlab chiqish uchun — Energetika vazirligi tizimidagi loyiha tashkilotlari hamda mustaqil injiniring va konsalting kompaniyalari;

ijtimoiy soha, infratuzilma obyektlari va umumiy foydalanish maydonlari qurilishi boʻyicha loyiha-smeta hujjatlarini ishlab chiqish uchun — buyurtmachilar tomonidan eng yaxshi takliflar tanlovi orqali aniqlangan loyiha tashkilotlari hamda mustaqil injiniring va konsalting kompaniyalari jalb qilinadi;

g) shaharda koʻp qavatli uy-joylarni qurish uchun metall prokat va sement mahsulotlarini pudratchi tashkilotlarga yetkazib berish Oʻzbekiston Respublikasi Prezidentining 2021-yil 11-martdagi PF-6186-son Farmonida koʻzda tutilgan alohida birja savdo seksiyasi orqali sotish tartibi asosida amalga oshiriladi.

7. Direksiyaning faoliyatini moliyalashtirish manbalari etib Oʻzbekiston Respublikasi Prezidentining 2021-yil 21-iyundagi PQ-5154-sonli qarorida koʻzda tutilgan mablagʻlar, Andijon viloyati mahalliy budjeti mablagʻlari va uning qoʻshimcha manbalari, xoʻjalik faoliyatidan tushadigan mablagʻlar, homiylik xayriyalari va qonunchilikda taqiqlanmagan boshqa manbalar belgilansin.

Bunda, Direksiyaning shtatlar jadvali va xarajatlar smetalari oʻrnatilgan tartibda moliya organlarida roʻyxatdan oʻtkaziladi.

8. Shaharni barpo etishning birinchi bosqichini moliyalashtirish manbalari etib quyidagilar belgilansin:

ijtimoiy soha, yoʻl-transport, irrigatsiya va muhandislik-kommunikatsiya infratuzilmalari obyektlarini barpo etish, loyihalashtirish ishlari, qurilish ishlarini nazorat qilish va boshqarish xarajatlari — Oʻzbekiston Respublikasi Prezidentining 2021-yil 21-iyundagi PQ-5154-sonli qarorining 1-bandi “a” kichik bandida nazarda tutilgan mablagʻlar;

shahar hududlarini obodonlashtirish va koʻkalamzorlashtirish uchun — Andijon viloyatining mahalliy budjet mablagʻlari va uning qoʻshimcha manbalari, tadbirkorlik subyektlarining mablagʻlari va tijorat banklarining kreditlari;

koʻp qavatli uy-joylar qurilishi — tadbirkorlik subyektlarining mablagʻlari va tijorat banklarining kreditlari, “Tadbirkorlikni rivojlantirish kompaniyasi” aksiyadorlik jamiyati tomonidan kafillik va kompensatsiya toʻlovlari;

bozor infratuzilmasi va xususiy ijtimoiy soha obyektlari qurilishi — tadbirkorlik subyektlari mablagʻlari va tijorat banklarining kreditlari;

elektr energiyasi, tabiiy gaz va aloqa tarmoqlari qurilishi — Oʻzbekiston Respublikasi Prezidentining 2021-yil 21-iyundagi PQ-5154-sonli qarorida koʻzda tutilgan mablagʻlar va tegishliligiga koʻra ekspluatatsiya qiluvchi korxonalarning oʻz mablagʻlari.

9. Shtab rahbari (D. Adilov):

a) toʻgʻridan-toʻgʻri shartnomalar asosida jalb qilinadigan tajribali injiniring kompaniyalar, shuningdek, xorijiy mutaxassis va konsultantlar tomonidan loyiha hujjatlarini qoʻshimcha ekspertiza qilish va bajariladigan ishlarning loyiha hujjatlariga muvofiqligini nazorat qilib borishni taʼminlasin;

b) Davlat geologiya qoʻmitasi (B. Islamov) bilan birgalikda, zaruratga koʻra chet ellik mutaxassislarni jalb qilgan holda:

ikki oy muddatda shaharsozlik hujjatlarini ishlab chiqish uchun muhandislik-geologiya ishlarini tashkillashtirsin;

uch oy muddatda Andijon shahrining yangi hududlarini qamrab olgan holda Andijon shahrining mikroseysmik hududlashtirish xaritasini qayta koʻrib chiqib, yangilasin.

10. Qurilish vazirligi (D. Adilov) tegishli vazirlik va idoralar bilan birgalikda uch oy muddatda Andijon shahrida xorijiy qurilish sohasida tajribali loyiha kompaniyasi filialini tashkil etib, mahalliy mutaxassislarni oʻqitish ishlarini yoʻlga qoʻysin.

11. Investitsiyalar va tashqi savdo vazirligi (A. Voitov), Andijon viloyati hokimligi (Sh. Abduraxmanov) uch oy muddatda “Yangi Andijon” shahrida yashovchi aholini ish bilan taʼminlash maqsadida shahar atrofida amalga oshirish moʻljallanayotgan investitsiya loyihalari roʻyxatini shakllantirib, ularning amalga oshirilishini nazoratga olsin.

12. Andijon viloyati hokimligi (Sh. Abduraxmanov):

lizing korxonalarini jalb qilgan holda shahardagi koʻp qavatli uy-joylar qurilishida ishtirok etayotgan qurilish-pudratchi korxonalarga Respublika komissiyasi tomonidan tasdiqlanadigan roʻyxatga muvofiq qurilish texnikalari va mashina-mexanizmlarni lizing asosida yetkazib berish choralarini koʻrsin;

tegishli vazirlik va idoralar bilan birgalikda uch oy muddatda shaharni barpo etish hamda buning uchun Andijon tumanidan zarur yer maydonini Andijon shahriga berishni tashkil etish yuzasidan tegishli qaror loyihalarini belgilangan tartibda Vazirlar Mahkamasiga kiritsin;

Direksiya faoliyatini yoʻlga qoʻyish, uning taʼsis hujjatlarini tasdiqlash, moddiy-texnika bazasini yaratish, malakali kadrlar bilan taʼminlash va boshqa tashkiliy-texnik masalalarni hal etish choralarini koʻrsin.

13. Respublika komissiyasi (A. Aripov) tegishli vazirlik va idoralar bilan birgalikda:

bir oy muddatda “Yangi Andijon” shahrini barpo etish bilan bogʻliq boʻlgan bir yillik “yoʻl xaritasi”ni tasdiqlasin;

shaharni barpo etish va uning bosh rejasini amalga oshirish boʻyicha tegishli vazirlik, idora va tashkilotlarning faoliyatini muvofiqlashtirib, yuzaga kelgan muammoli va tashkiliy-texnik masalalarni oʻz vaqtida hal etib borsin;

shaharni barpo etish va uning bosh rejasini amalga oshirish ishlari borishi yuzasidan har chorak yakuni bilan Oʻzbekiston Respublikasi Prezidenti Administratsiyasiga maʼlumot kiritib borsin.

14. Ushbu qarorning ijrosini nazorat qilish Oʻzbekiston Respublikasi Bosh vaziri A.N. Aripov, qurilish vazirining birinchi oʻrinbosari D.K. Adilov va Andijon viloyati hokimi Sh.K. Abduraxmanov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2021-yil 12-iyul,

PQ-5180-son

Oʻzbekiston Respublikasi Prezidentining 2021-yil 12-iyuldagi PQ-5180-son qaroriga 1-ILOVA

“Yangi Andijon” shahrini barpo etish ishlarini tashkil etish va muvofiqlashtirish boʻyicha respublika komissiyasi

TARKIBI

Izoh: Komissiya aʼzolari boshqa ishga oʻtgan taqdirda, uning tarkibiga ushbu lavozimlarga yangi tayinlangan yoki zimmasiga tegishli funksiyalarni bajarish yuklangan shaxslar kiritiladi.

Zaruratdan kelib chiqqan holda tegishli vazirlik, idora va xoʻjalik birlashmalari rahbarlari Komissiya ishiga jalb qilinishi mumkin.

Oʻzbekiston Respublikasi Prezidentining 2021-yil 12-iyuldagi PQ-5180-son qaroriga 2-ILOVA

“Yangi Andijon” shahrini barpo etish boʻyicha doimiy faoliyat yurituvchi shtab

TARKIBI

Izoh: Shtab aʼzolari boshqa ishga oʻtgan taqdirda, uning tarkibiga ushbu lavozimlarga yangi tayinlangan yoki zimmasiga tegishli funksiyalarni bajarish yuklangan shaxslar kiritiladi.

Zaruratdan kelib chiqqan holda tegishli vazirlik, idora va xoʻjalik birlashmalari mutaxassislari shtab ishiga jalb qilinishi mumkin.

Oʻzbekiston Respublikasi Prezidentining 2021-yil 12-iyuldagi PQ-5180-son qaroriga 3-ILOVA

Andijon viloyati hokimligi huzuridagi “Yangi Andijon” shahrida obyektlarni qurish va ulardan foydalanish direksiyasi” davlat unitar korxonasi

TUZILMASI

Boshqaruv xodimlarning umumiy cheklangan soni — 17 — 32 nafar.

* Bir xodimga obyektlar qiymati bazaviy hisoblash miqdorining 100 000 baravaridan oshmagan holda bir vaqtning oʻzida koʻpi bilan 10 ta obyekt biriktirilishi mumkin.