Oʻzbekiston Respublikasi Oliy Majlisi Senati qoʻmitalari tomonidan oʻtkaziladigan koʻrik-tanlovlar toʻgʻrisida (KQ-214-IV-son)

22.04.2021

Oʻzbekicton Respublikasi Oliy Majlisi Senati Kengashining

Qarori

Oʻzbekiston Respublikasi Prezidenti tomonidan ilgari surilgan beshta muhim tashabbusni joylarda amalga oshirishda faollik koʻrsatayotgan mahallalarni moddiy va maʼnaviy jihatdan ragʻbatlantirish, shuningdek ijtimoiy tashabbus orqali aholining ijtimoiy himoyaga muhtoj qatlamini qoʻllab-quvvatlash, xorijiy mamlakatlarda yurtimiz manfaatlari va shaʼnini munosib himoya qilayotgan elchilarimizni munosib taqdirlash, ijtimoiy tashabbuskorlikka erishish masalalariga jamoatchilik eʼtiborini keng jalb etish maqsadida “Oʻzbekiston Respublikasi Oliy Majlisining Senati toʻgʻrisida”gi Oʻzbekiston Respublikasi Konstitutsiyaviy Qonunining 16-moddasiga asosan Oʻzbekiston Respublikasi Oliy Majlisi Senatining Kengashi qaror qiladi:

1. “Yil diplomati” koʻrik tanlovi 1 bosqichda, “Ijtimoiy tashabbus” hamda “Mahalla — besh tashabbus beshigi” koʻrik-tanlovlari 3 bosqichda (tuman (shahar)-viloyat-respublika bosqichlari) 2021-yilning may — dekabr oylarida tashkil etilsin.

Koʻrik-tanlovlarning respublika bosqichi Toshkent shahrida oʻtkazilishi belgilansin.

2. Koʻrik-tanlovlar toʻgʻrisidagi nizomlar mos ravishda 1-“a”, 3-“a”, 4-“a”-ilovalarga, tanlovni oʻtkazish boʻyicha Respublika komissiyalari tarkiblari mos ravishda 1-“b”, 3-“b”, 4-“b”-ilovalarga muvofiq tasdiqlansin.

3. Senatning Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qoʻmitasi, Yoshlar, madaniyat va sport masalalari qoʻmitasi, Fan, taʼlim va sogʻliqni saqlash masalalari qoʻmitasi, Xotin-qizlar va gender tenglik masalalari qoʻmitasi (bundan buyon matnda masʼul qoʻmitalar deb yuritiladi) mutasaddi vazirlik va idoralar bilan birgalikda koʻrik-tanlovlarni yuqori saviyada tashkil etish va oʻtkazish choralarini koʻrsin.

4. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari koʻrik-tanlovlarning tuman (shahar) va viloyat bosqichlarini oʻtkazish, gʻoliblarni taqdirlash va ularning respublika tanlov bosqichida ishtirok etishini taʼminlasin.

5. Masʼul qoʻmitalar bir oy muddatda koʻrik-tanlovlarning respublika bosqichini oʻtkazish joyi, sanasi va boshqa tashkiliy masalalarni hal etish yuzasidan takliflar tayyorlasin.

6. Quyidagilar:

Senatning Xalqaro munosabatlar, tashqi iqtisodiy aloqalar, xorijiy investitsiyalar va turizm qoʻmitasi hamda Oʻzbekiston Respublikasi Tashqi ishlar vazirligi “Yil diplomati”;

Senatning Yoshlar, madaniyat va sport masalalari qoʻmitasi, Xotin-qizlar va gender tenglik masalalari qoʻmitasi hamda Oʻzbekiston Respublikasi Mahalla va oilani qoʻllab-quvvatlash vazirligi “Mahalla — besh tashabbus beshigi”;

Senatning Fan, taʼlim va sogʻliqni saqlash masalalari qoʻmitasi, Oʻzbekiston Respublikasi Mahalla va oilani qoʻllab-quvvatlash, Oliy va oʻrta maxsus taʼlim, Xalq taʼlimi, Maktabgacha taʼlim, Sogʻliqni saqlash vazirliklari hamda Yoshlar ishlari agentligi “Ijtimoiy tashabbus” koʻrik-tanlovi boʻyicha gʻoliblarni diplom va esdalik sovgʻalar bilan taqdirlashni tashkil etishga masʼul etib belgilansin.

7. Oʻzbekiston Respublikasi Oliy Majlisi Senatining Axborot xizmati koʻrik-tanlovlarni tashkil etish va oʻtkazish jarayonlarini hamda tanlovlar yakunlarini ommaviy axborot vositalarida va Senatning rasmiy veb-saytida muntazam yoritib borish boʻyicha Media-reja ishlab chiqsin hamda uning ijrosini taʼminlasin.

8. Mazkur Qarorning ijrosini nazorat qilish Oʻzbekiston Respublikasi Oliy Majlisi Senati Raisining birinchi oʻrinbosari S. Safoyev zimmasiga yuklansin.

Oʻzbekiston Respublikasi Oliy Majlisi Senatining Raisi T. NARBAYEVA

Toshkent sh.,

2021-yil 22-aprel,

KQ-214-IV-son

Oʻzbekiston Respublikasi Oliy Majlisi Senati Kengashining 2021-yil 22-apreldagi KQ-214-IV-sonli qaroriga 1a-ILOVA

“Yil diplomati” respublika koʻrik-tanlovini tashkil etish va oʻtkazish tartibi toʻgʻrisida

NIZOM

1-bob. Umumiy qoidalar

1. Ushbu Nizom “Yil diplomati” respublika koʻrik-tanlovini (bundan buyon matnda tanlov deb yuritiladi) tashkil etish va oʻtkazish tartibini belgilaydi.

2. Tanlovning maqsadi:

Oʻzbekiston Respublikasi Prezidenti tomonidan ilgari surilgan tashqi siyosat sohasidagi ustuvor yoʻnalishlar boʻyicha belgilab berilgan muhim vazifalarni amalga oshirish, Oʻzbekiston manfaatlarini xalqaro maydonda faol ilgari surish, mamlakatda olib borilayotgan islohotlarni jahon hamjamiyatiga yetkazish, tasdiqlangan ish rejalarining sifatli ijrosini taʼminlash hamda respublika tashqi iqtisodiy salohiyatini oshirish borasida samarali faoliyat yuritib kelayotgan ishtirokchilarni qoʻllab-quvvatlash;

ishtirokchilar orasida professionallik, ishbilarmonlik, raqobatbardoshlik muhitini shakllantirishga imkon berish va xalqaro munosabatlar sohasidagi bilim darajasini oshirish uchun zarur shart-sharoitlar yaratish;

diplomatiya sohasida yuksak kasb mahoratiga ega boʻlgan, tashabbuskor, har jihatdan ibratli boʻlgan ishtirokchilarni aniqlash va ularning faoliyatini keng jamoatchilikka yaqindan tanishtirish, ilgʻor ish tajribasini ommalashtirish.

3. Ushbu Nizom Oʻzbekiston Respublikasi Oliy Majlisi Senatining (www.senat.uz) va Oʻzbekiston Respublikasi Tashqi ishlar vazirligining (www.mfa.uz) rasmiy veb-saytlarida eʼlon qilinadi.

4. Tanlovda ishtirok etish bepul.

5. Tanlov qonuniylik, xolislik, shaffoflik, kollegiallik va tenglik tamoyillari asosida oʻtkaziladi.

2-bob. Tanlovda ishtirok etish tartibi va shartlari

6. Tanlovda Oʻzbekiston Respublikasi Tashqi ishlar vazirligi tizimida, shuningdek xorijdagi diplomatik vakolatxonalar va konsullik muassasalarida ishlovchi diplomatik martabaga ega xodimlar (bundan buyon matnda ishtirokchilar deb yuritiladi) ishtirok etish huquqiga ega.

7. Tanlov 1 bosqichda oʻtkaziladi. Tanlovni oʻtkazish tartibi ushbu Nizomning 1-ilovasida batafsil yoritilgan.

8. Tanlov ishtirokchilari 30-oktabrga qadar [email protected] va [email protected] elektron pochta manzillariga yuborilgan ariza orqali roʻyxatdan oʻtkaziladi. Arizalar ushbu Nizomning 2-ilovasidagi shaklga muvofiq taqdim etiladi.

9. Arizalar ishtirokchilarning ushbu Nizom bilan tanishib chiqqanligini, shuningdek ularning shaxsiy maʼlumotlarini saqlash, foydalanish va amalga oshirilgan ishlar natijalarini ommaviy axborot vositalari hamda Internet tarmoqlarida eʼlon qilinishi mumkinligini tasdiqlaydi.

10. Ishtirokchi tanlovni tashkil etish va oʻtkazish boʻyicha masʼullar faoliyatiga, shuningdek tanlov natijalari va oʻtkazish jarayonlariga aralashish huquqiga ega emas.

11. Ishtirokchi tomonidan tanlovni oʻtkazish tartibi va shartlari buzilganligi holati aniqlanganda ishtirokchining tanlovda qatnashishi tashkilotchilar tomonidan toʻxtatilishi mumkin.

12. CEFR (Common European Framework of Reference) boʻyicha kamida V2 darajasiga, IELTS (International English Language Testing System) boʻyicha 6 ballga yoki TOEFL (Test of English as a Foreign Language) boʻyicha 72 ballga muvofiq keladigan chet tilini egallaganlikni rasmiy ravishda tasdiqlovchi amaldagi xalqaro sertifikatga ega boʻlgan tanlov ishtirokchilariga maksimal ball qoʻyiladi.

3-bob. Tanlovni tashkil etish va oʻtkazish komissiyasi

13. Tanlovni tashkil etish va oʻtkazish boʻyicha respublika komissiyasi (bundan buyon matnda Respublika komissiyasi deb yuritiladi) obroʻli jamoat arboblari, vazirlik va idoralarning tajribali, bilimli vakillaridan shakllantiriladi. Respublika komissiyasi tarkibi, raisi, rais oʻrinbosari va kotibi Oliy Majlis Senati Kengashining tegishli qarori bilan tasdiqlanadi.

14. Respublika komissiyasi:

ishtirokchilarning soʻrovnomalarini oʻrganish uchun tuzilgan ishchi guruhlari faoliyatini muvofiqlashtiradi;

talabgorlarni tanlovda ishtirok etishga qoʻyish yoki qoʻymaslik toʻgʻrisida qaror qabul qiladi;

ishtirokchilar tomonidan tanlov boʻyicha sinovlar bajarilishini baholaydi;

ishtirokchilarni tanlovning navbatdagi bosqichlariga qoʻyish, gʻoliblarini aniqlash toʻgʻrisida qaror qabul qiladi;

tanlov ishtirokchilari tomonidan tanlovni oʻtkazish qoidalarini buzish hollari aniqlangan taqdirda, ularni tanlovdan chetlashtirish toʻgʻrisidagi taqdimnomalarni, shuningdek, tanlovga oid sinovlarni oʻtkazish tartib-qoidalarini takomillashtirish boʻyicha takliflar ishlab chiqadi.

15. Respublika komissiyasining yigʻilishi uning aʼzolari umumiy sonining yarmidan koʻpi ishtirok etgan taqdirda vakolatli hisoblanadi.

16. Respublika komissiyasining qarorlari aʼzolarning oddiy koʻpchilik ovozi bilan qabul qilinadi. Ovozlar teng kelib qolgan hollarda Respublika komissiyasi raisining ovozi hal qiluvchi hisoblanadi.

17. Respublika komissiyasi qarorlari ikki nusxada tuziladigan va yigʻilishda ishtirok etgan barcha aʼzolar tomonidan imzolanadigan bayonnomalar bilan rasmiylashtiriladi.

18. Respublika komissiyasining faoliyatini tashkiliy-texnik jihatdan taʼminlash Oliy Majlis Senatining Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qoʻmitasi, uning kotibiyati va Senat devoni Xalqaro boʻlimi tomonidan amalga oshiriladi.

4-bob. Tanlovga hujjatlarni taqdim etish tartibi

19. Tanlovda qatnashmoqchi boʻlgan ishtirokchilar tanlov haqida eʼlon qilingan kundan eʼtiboran 20 kun ichida Respublika komissiyasiga ariza taqdim etadilar.

20. Tanlovda qatnashish istagini bildirgan ishtirokchilar oʻz arizalariga quyidagi hujjatlarni taqdim etishlari lozim:

shaxsni tasdiqlovchi hujjat (pasport);

tarjimai hol;

Oʻzbekiston Respublikasi Prezidenti, Oliy Majlis Senati hamda Vazirlar Mahkamasi tomonidan belgilangan vazifalar ijrosi toʻgʻrisida maʼlumotlar;

soʻnggi uch yildagi faoliyati boʻyicha maʼlumotlar;

diplom va sertifikatlar;

shu bilan birga, ishtirokchilar tanlovga doir boshqa qoʻshimcha materiallar ham taqdim etishi mumkin.

5-bob. Apellatsiya komissiyasi

21. Tanlovni oʻtkazish bilan bogʻliq shikoyat va arizalarni koʻrib chiqish uchun Respublika komissiyasining qarori bilan apellatsiya komissiyasi tuziladi.

Apellatsiya komissiyasining shaxsiy tarkibi va ish reglamenti Respublika komissiyasi tomonidan belgilanadi.

22. Apellatsiya komissiyasiga ariza tanlovda nazarda tutilgan sinovlarning natijalari eʼlon qilingandan soʻng uch kun ichida taqdim etiladi.

23. Apellatsiya komissiyasi qabul qilingan arizani uch kun mobaynida koʻrib chiqishi va arizachi ishtirokida asoslantirilgan qaror qabul qilishi lozim.

6-bob. Tanlov ishtirokchilarini saralash shartlari

24. Tanlov ishtirokchilarini saralash ishlari Respublika komissiyasi tomonidan amalga oshiriladi.

25. Tanlov ishtirokchilari quyidagi mezonlar asosida saralab olinadi:

Oʻzbekiston Respublikasi Prezidenti, Oliy Majlis Senati hamda Vazirlar Mahkamasi tomonidan qabul qilingan tegishli hujjatlarda belgilab berilgan vazifalar ijrosi taʼminlanganligi;

Oʻzbekistonning xalqaro maydondagi manfaatlarini ilgari surish, respublikada olib borilayotgan islohotlarni jahon hamjamiyatiga yetkazishdagi faol harakatlari;

respublika tashqi iqtisodiy salohiyatini oshirishdagi faoliyati va tashabbuslari;

xorijdagi vatandoshlar bilan ishlash faoliyati;

axborot-tahlil faoliyati;

ommaviy axborot vositalaridagi chiqishlar.

7-bob. Koʻrik-tanlovni moliyalashtirish manbalari

26. Tanlovni oʻtkazish bilan bogʻliq mablagʻlar Oʻzbekiston Respublikasi Tashqi ishlar vazirligi hamda homiylar mablagʻlari hisobidan qoplanishi nazarda tutiladi.

8-bob. Tanlov gʻoliblarini taqdirlash

27. Gʻolib deb topilgan ishtirokchilar I, II, III darajali diplomlar va Oʻzbekiston Respublikasi Oliy Majlisi Senati va Respublika komissiyasining diplomatik martabani oshirish boʻyicha tegishli tavsiyanomalar hamda esdalik sovgʻalar bilan taqdirlanadi.

28. Tanlov gʻoliblari quyidagi nominatsiyalar boʻyicha taqdirlanishi ham nazarda tutiladi:

“Yil diplomati”;

“Yil diplomatik vakolatxonasi”.

9-bob. Yakunlovchi qoida

29. Mazkur Nizomga oʻzgartirish va qoʻshimchalar Oʻzbekiston Respublikasi Oliy Majlisi Senati Kengashining qarori bilan kiritiladi.

“Yil diplomati” respublika koʻrik-tanlovini tashkil etish va oʻtkazish tartibi toʻgʻrisidagi nizomga 1-ILOVA

“YIL DIPLOMATI” KOʻRIK-TANLOVINI OʻTKAZISh

TARTIBI

Bosqichlar Tadbirlar Muddat Tashkiliy bosqich Tanlovni tashkil etish va oʻtkazish boʻyicha Respublika komissiyasi tomonidan qatnashchilarni saralab olish uchun har bir nominatsiya boʻyicha tanlov komissiyasi tarkibini shakllantirish va tasdiqlash; Tanlov komissiyalari tomonidan qatnashchilarning soʻrovnomalarini oʻrganish uchun ishchi guruhlar tarkiblarini shakllantirish va tasdiqlash; onlayn saralash boshlanishidan oldin kamida bir oy oldin tanlovni oʻtkazish sanasi va shartlari toʻgʻrisida ommaviy axborot vositalari, shuningdek, Oliy Majlis Senati rasmiy veb-saytida davlat tili va rus tilida eʼlon berish. 1-sentabrga qadar Onlayn saralash Tanlovda ishtirok etayotgan fuqarolarning anketalarini va boshqa hujjatlarini (malaka oshirish sertifikatlari, chet tillarini bilish darajasi, motivatsiya xati va boshqalarni) yigʻish va umumlashtirish; Oʻzbekiston Respublikasining xorijdagi diplomatik vakolatxonalari tomonidan amalga oshirilgan ishlar toʻgʻrisidagi arizalar va hisobotlarni yigʻish va umumlashtirish; Respublika komissiyasiga kelib tushgan hujjatlarni oʻrganish va eng yaxshi arizalarni tanlash; Nomzodlar roʻyxatining Oliy Majlis Senati rasmiy veb-saytida eʼlon qilinishi, tanlovning navbatdagi bosqichi va topshiriqlar roʻyxati koʻrsatilgan. 30-oktabrga qadar Bevosita tur Ishtirokchilar tomonidan yozma tahliliy maʼruza tayyorlash; 30-noyabr Siyosiy-huquqiy va ijtimoiy-iqtisodiy islohotlar sohasida bilim darajasini aniqlash boʻyicha test sinovini oʻtkazish; 10-dekabr Tanlov komissiyalari aʼzolari bilan yakkama-yakka suhbat. 20-dekabr Final Gʻoliblarni aniqlash. Respublika komissiyasi tomonidan tanlov natijalarini veb-portalda eʼlon qilish; 25-dekabr Diplomatik darajani navbatdagi koʻtarilishi uchun gʻoliblarni taqdim etish. 27-dekabr

“Yil diplomati” respublika koʻrik-tanlovini tashkil etish va oʻtkazish tartibi toʻgʻrisidagi nizomga 2-ILOVA

Oʻzbekiston Respublikasi Oliy Majlisi Senati Kengashining 2021-yil 22-apreldagi KQ-214-IV-sonli qaroriga 1b-ILOVA

“Yil diplomati” koʻrik-tanlovini tashkil etish va oʻtkazish boʻyicha Respublika komissiyasi

TARKIBI

1. Safoyev Sodiq Solihovich — Oʻzbekiston Respublikasi Oliy Majlisi Senati Raisining birinchi oʻrinbosari, Komissiya raisi 2. Alimov Ravshanbek Azadbekovich — Oʻzbekiston Respublikasi Oliy Majlisi Senati Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qoʻmitasi raisi, Komissiya raisi oʻrinbosari 3. Aripov Eldor Taxirovich — Oʻzbekiston Respublikasi Prezidenti huzuridagi Xavfsizlik kengashi kotibining birinchi oʻrinbosari — Strategik va mintaqalararo tadqiqotlar instituti direktori 4. Arziyev Farhod Nuritdinovich — Oʻzbekiston Respublikasi tashqi ishlar vazirining birinchi oʻrinbosari 5. Kudratov Laziz Shavkatovich — Oʻzbekiston Respublikasi investitsiyalar va tashqi savdo vazirining birinchi oʻrinbosari 6. Akkulov Abdulaziz Urolboyevich — Oʻzbekiston Respublikasi turizm va sport vazirining oʻrinbosari 7. Kurbanov Doniyor Djavdatovich — Xalqaro munosabatlar boʻyicha axborot-tahlil markazi direktori 8. Karimov Komiljon Xamidovich — Jahon iqtisodiyoti va diplomatiya universiteti rektori 9. Azizov Xudoyqoʻl Tojiyevich — Oʻzbekiston Respublikasi Prezidenti huzuridagi Davlat boshqaruvi akademiyasining birinchi prorektori 10. Lavozim boʻyicha — Qoraqalpogʻiston Respublikasi Vazirlar Kengashi, viloyatlar va Toshkent shahar hokimlarining investitsiyalar va tashqi savdo masalalari boʻyicha oʻrinbosarlari 11. Azizov Ildar Rafaelyevich — Oʻzbekiston Respublikasi Oliy Majlisi Senati devoni bosh maslahatchisi, Komissiya kotibi

Izoh: Komissiyaning aʼzolari boshqa ishga oʻtgan taqdirda, uning tarkibiga ushbu lavozimga yangidan tayinlangan shaxslar kiritiladi.

Oʻzbekiston Respublikasi Oliy Majlisi Senati Kengashining 2021-yil 22-apreldagi KQ-214-IV-sonli qaroriga 3a-ILOVA

“Eng yaxshi ijtimoiy tashabbus” respublika koʻrik-tanlovini tashkil etish va oʻtkazish tartibi toʻgʻrisida

NIZOM

1-bob. Umumiy qoidalar

1. Ushbu Nizom “Eng yaxshi ijtimoiy tashabbus” respublika koʻrik-tanlovini (bundan buyon matnda tanlov deb yuritiladi) tashkil etish va oʻtkazish tartibini belgilaydi.

2. Tanlovda ijtimoiy tashabbuslarni qoʻllab-quvvatlashda yuqori natijalarga erishgan, jamiyat rivoji uchun tashabbus koʻrsatayotgan, aholining ijtimoiy himoyaga muhtoj qatlamini qoʻllab-quvvatlagan, jumladan yoshlarni kasb-hunarga oʻrgatish, ularning bandligini taʼminlash, shuningdek ijtimoiy soha muassasalari infratuzilmasini yaxshilashda faol ishtirok etgan tuman (shahar) hokimliklari, davlat boshqaruvi organlari, nodavlat tashkilotlar, tadbirkorlik subyektlari, jismoniy shaxslar (bundan buyon matnda ishtirokchilar deb yuritiladi) qatnashadi.

3. Tanlov 2021-yildan boshlab har yili iyul — noyabr oylarida oʻtkaziladi.

4. Tanlov oʻtkazishning aniq muddatlari Oʻzbekiston Respublikasi Oliy Majlisi Senati, Qoraqalpogʻiston Respublikasi Joʻqorgʻi Kengesi, xalq deputatlari viloyatlar va Toshkent shahar Kengashlari tomonidan belgilanadi hamda ushbu tanlov boshlanishidan bir oy oldin ommaviy axborot vositalarida eʼlon qilinadi.

5. Tanlov oʻtkazishning muddatlari haqidagi eʼlonlar tuman (shahar) hokimliklari, mahalla fuqarolar yigʻinlari, davlat va nodavlat tashkilotlari binolarining hamma tanishib chiqishi uchun qulay boʻlgan joylariga ilib qoʻyiladi hamda hokimlik hududidagi tashkilotlar oʻrtasida keng targʻib qilinadi.

2-bob. Tanlovning maqsadi

6. Tanlov oʻtkazishdan koʻzlangan asosiy maqsad quyidagilardan iborat:

hududlarda ijtimoiy masalalarni muvaffaqiyatli hal etishga qaratilgan tashabbuslarni qoʻllab-quvvatlash va jamiyatda ijtimoiy tashbbusokrlikni rivojlantirish;

ijtimoiy tashabbuslar orqali aholining ijtimoiy himoyaga muhtoj qatlamini qoʻllab-quvvatlash;

ijtimoiy tashabbus yordamida hududdagi ijtimoiy soha muassasalari infratuzilmasini yaxshilash;

mamlakatimizda ijtimoiy tashabbuskorlikka erishish masalalariga jamoatchilik eʼtiborini keng jalb etish;

ijtimoiy tashabbus koʻrsatgan ishtirokchilarning ilgʻor tajribasini aniqlash, umumlashtirish va targʻib qilish.

3-bob. Tanlov oʻtkazish tartibi va shartlari

7. Mazkur tanlov quyidagi 3 ta bosqichda tashkil etiladi:

birinchi bosqich — tuman (shahar) miqyosida iyul-avgust oylarida;

ikkinchi bosqich — viloyatlar miqyosida (birinchi bosqich gʻoliblari oʻrtasida) sentyabr-oktyabr oylarida;

uchinchi bosqich — respublika miqyosida (ikkinchi bosqich gʻoliblari oʻrtasida) noyabr oyida.

8. Tanlov quyidagi nominatsiyalarda oʻtkaziladi:

“Eng yaxshi ijtimoiy tashabbuskor davlat boshqaruv organi”;

“Eng yaxshi ijtimoiy tashabbuskor nodavlat notijorat tashkiloti”;

“Eng yaxshi ijtimoiy tashabbuskor tadbirkorlik subyekti”;

“Eng yaxshi ijtimoiy tashabbuskor fuqaro”;

“Eng yaxshi ijtimoiy tashabbuskor hokimlik” (ikkinchi bosqichdan).

9. Birinchi bosqichni tashkil etish uchun xalq deputatlari tuman (shahar) Kengashlari deputatlaridan iborat tarkibda ishchi guruh tuziladi.

10. Ishchi guruh tomonidan Nizom talablari asosida tuman va shaharlardan ishtirokchilar orasidan 5 tagacha eng yaxshi ijtimoiy tashabbus koʻrsatganlar tanlab olinib, ular toʻgʻrisidagi maʼlumotlar xalq deputatlari tuman (shahar) Kengashlari kotibiyatlariga (keyingi oʻrinlarda kotibiyatlar deb yuritiladi) taqdim etiladi.

11. Kotibiyatlar Ishchi guruh tomonidan saralangan ishtirokchilarning hujjatlarini xalq deputatlari tuman (shahar) Kengashlariga eng yaxshi ijtimoiy tashabbus koʻrsatgan ishtirokchilar haqidagi 5 daqiqadan oshmagan videolavhani hujjatlar bilan birgalikda koʻrib chiqish uchun kiritadilar.

12. Taqdim etilgan nomzodlarni koʻrib chiqib, xalq deputatlari tuman (shahar) Kengashi oʻz xulosasi bilan tanlovning tuman bosqichi gʻolibini aniqlaydi.

13. Tuman bosqichlarida gʻolib deb topilgan 1 tadan nomzod haqidagi maʼlumotlar ikkinchi bosqichda ishtirok etishi uchun Qoraqalpogʻiston Respublikasi Joʻqorgʻi Kengesi, xalq deputatlari viloyatlar va Toshkent shahar Kengashlari kotibiyatlariga taqdim etiladi.

14. Kotibiyatlar ishtirokchilarning hujjatlarini Qoraqalpogʻiston Respublikasi Joʻqorgʻi Kengesi, xalq deputatlari viloyatlar va Toshkent shahar Kengashlariga eng yaxshi ijtimoiy tashabbus koʻrsatgan ishtirokchilar haqidagi 5 daqiqadan oshmagan videolavhani hujjatlar bilan birgalikda koʻrib chiqish uchun kiritadilar.

15. Taqdim etilgan nomzodlarni koʻrib chiqib, Kengash oʻz xulosasi bilan tanlovning ikkinchi bosqichi gʻolibini aniqlaydi.

16. Ikkinchi bosqichda gʻolib deb topilgan 1 tadan nomzod haqidagi maʼlumotlar “Eng yaxshi ijtimoiy tashabbus” respublika koʻrik-tanlovini tashkil etish va oʻtkazish boʻyicha respublika komissiyasiga (bundan buyon matnda Respublika komissiyasi deb yuritiladi) taqdim etadi.

17. Respublika komissiyasiga taqdim etilgan maʼlumotlar zaruratga qarab joyiga chiqqan holda oʻrganiladi.

18. Tanlovning respublika bosqichi Toshkent shahrida tashkil etiladi. Respublika bosqichiga chiqqan har bir nominatsiya boʻyicha 14 tadan ishtirokchi (har bir hududdan bittadan) ijtimoiy tashabbus doirasida olib borgan namunali faoliyatini koʻrgazmali tarzda himoya qiladi.

19. Respublika bosqichida eng yaxshi deb topilgan ishtirokchilar hujjatlari Respublika komissiyasi tomonidan Nizom talablari asosida tahlil etilib, ular orasidan I, II, III-oʻrinni olganlar aniqlanadi.

4-bob. Tanlovga rahbarlik qilish

20. Tanlovni oʻtkazish boʻyicha umumiy rahbarlik Oliy Majlis Senati tomonidan amalga oshiriladi.

21. Tanlovning birinchi va ikkinchi bosqichlari adolatli va shaffof oʻtkazilishi Qoraqalpogʻiston Respublikasi Joʻqorgʻi Kengesi hamda xalq deputatlari mahalliy Kengashlari kotibiyatlari zimmasiga yuklanadi. Respublika bosqichi esa Senatning bevosita ishtiroki va nazorati ostida oʻtkaziladi.

5-bob. Tanlovning Respublika komissiyasi

22. Respublika komissiyasi Senat aʼzolari, vazirlik va idoralar vakillaridan shakllantiriladi. Respublika komissiyasi tarkibi va raisi Oliy Majlis Senati Kengashining tegishli qarori bilan tasdiqlanadi. Respublika komissiyasi tarkibi 9 nafar aʼzodan iborat boʻladi.

23. Respublika komissiyasi aʼzolari tanlov jarayonida quyidagi huquqlarga ega boʻladi:

tanlovning respublika bosqichi ishtirokchilaridan Nizom talablari asosida tegishli hujjatlarni talab qilish;

tanlov jarayonida tanlov gʻolibini obyektiv baholash maqsadida ishtirokchilardan qoʻshimcha maʼlumotlar olish;

tanlov yakunlarini sarhisob qilish va gʻoliblarni aniqlashda oʻz ovozi bilan ishtirok etish.

24. Komissiya aʼzolari tanlov jarayonida quyidagi majburiyatlarga ega:

tanlovning respublika bosqichi uchun taqdim etilgan maʼlumotlar va hujjatlarni oʻrganish;

tanlov ishtirokchilarini saralashda adolatlilik, shaffoflik mezonlariga rioya qilish.

Respublika komissiyasi aʼzolariga qonunchilikda belgilangan boshqa majburiyatlar ham yuklatilishi mumkin.

6-bob. Tanlovga hujjatlarni taqdim etish tartibi

25. Tanlovda ishtirokchilar yakka holda ishtirok etadi va hujjatlar taqdim etadi.

26. Tanlovda qatnashmoqchi boʻlgan ishtirokchilar tanlov haqida eʼlon qilingan kundan eʼtiboran 20 kun mobaynida xalq deputatlari tuman (shahar) Kengashi kotibiyatlari nomiga ariza beradilar.

27. Tanlovda qatnashish istagini bildirgan ishtirokchilar oʻz arizalariga quyidagi hujjatlarni ilova qilishlari lozim:

ishtirokchilar toʻgʻrisidagi umumiy maʼlumot;

Nizomning 6-bandiga asosan ijtimoiy tashabbus doirasida olib borilgan faoliyatiga oid materiallar (maʼlumotlar, hisobotlar, bayonnomalar, dasturlar, loyihalar, albom, 15x20 sm oʻlchamdagi fotosuratlar va hokazolar);

ijtimoiy tashabbusni amaliyotga tatbiq etish boʻyicha amalga oshirilgan ishlarni aks ettiruvchi 5 daqiqadan oshmagan videorolik (sifati yuqori, ND formatda);

ommaviy axborot vositalarida ijtimoiy tashabbusni yoritishga oid chop etilgan maqolalar, televideniye yoki radiodagi chiqishlarni asoslovchi hujjatlar.

Ishtirokchilar tanlovga doir boshqa qoʻshimcha materiallar ham taqdim etishi mumkin.

Arizalar tuman Kengashlari kotibiyatlari tomonidan tegishli hududdagi xalq deputatlari viloyat Kengashi kotibiyatlariga yuboriladi.

7-bob. Tanlov ishtirokchilarini saralash mezonlari

28. Tanlov ishtirokchilarini saralash ishlari birinchi bosqichda Ishchi guruh tomonidan, ikkinchi bosqichda Qoraqalpogʻiston Respublikasi Joʻqorgʻi Kengesi, xalq deputatlari viloyatlar va Toshkent shahar Kengashlari kotibiyatlari tomonidan, uchinchi bosqichda Respublika komissiyasi tomonidan amalga oshiriladi.

29. Tanlov ishtirokchilari quyidagi mezonlar asosida saralab olinadi:

Nizomning 6-bandida belgilangan maqsadlarni bajarilganligi;

aholini ijtimoiy himoya qilish borasida amalga oshirilayotgan chora-tadbirlarning samaradorligi;

ijtimoiy soha obyektlariga koʻrsatilgan ijtimoiy tashabbus natijasida voyaga yetmagan shaxslarning taʼlim olishi, ularning sogʻligʻini saqlash sohasida zarur sharoitlar yaratilganligi va keng qamrab olinganligi;

hududiy birlik doirasida ijtimoiy tashabbuslarni qoʻllab-quvvatlashga turli toifadagi (jismoniy va yuridik shaxslar) homiylarni keng jalb etish boʻyicha tizimli ishlarning tashkil etilganligi;

ishtirokchilarning ijtimoiy sohani qoʻllab-quvvatlashdagi tajribasini aniqlash va keng targʻib qilish, hududlardagi soha obyektlarining moddiy-texnika bazasini mustahkamlash va qoʻllab-quvvatlash borasida amalga oshirilgan ishlar samaradorligi;

ijtimoiy tashabbuskorlikda fuqarolar bilan ishlashda yangi yondashuvlarni qoʻllaganlik va amalda joriy etganlik darajasi.

8-bob. Koʻrik-tanlovni moliyalashtirish manbalari

30. Tanlov oʻtkazilishining moliyalashtirish shartlari:

tanlovning birinchi bosqichi uchun talab etiladigan zarur mablagʻlar tuman (shahar) hokimliklari tomonidan;

ikkinchi bosqichi uchun talab etiladigan zarur mablagʻlar Qoraqalpogʻiston Respublikasi Vazirlar Kengashi va viloyatlar hokimliklari tomonidan;

tanlovning uchinchi — respublika bosqichi uchun talab etiladigan zarur mablagʻlar manfaatdor vazirlik va idoralar hamda homiylar tomonidan qoplanishi nazarda tutiladi.

9-bob. Tanlov gʻoliblarini taqdirlash

31. Gʻolib deb topilgan ishtirokchilar I, II, III darajali diplomlar va Oʻzbekiston Respublikasi Oliy Majlisi Senati, Oʻzbekiston Respublikasi Vazirlar Mahkamasi, hamkor tashkilotlar hamda homiylarning esdalik sovgʻalari bilan taqdirlanadi.

10-bob. Yakuniy qoidalar

32. Tanlovning respublika bosqichida gʻolib boʻlgan hamda faol qatnashgan ishtirokchilar faoliyatiga oid fotoalbomlar, videolavhalar, hujjatlar (shu jumladan, ularning elektron nusxalari) tegishincha Senatning tegishli qoʻmitasida 3 yil muddatda saqlanadi.

33. Mazkur Nizomga oʻzgartirish va qoʻshimchalar Oʻzbekiston Respublikasi Oliy Majlisi Senati Kengashining qarori bilan kiritiladi.

Oʻzbekiston Respublikasi Oliy Majlisi Senati Kengashining 2021-yil 22-apreldagi KQ-214-IV-sonli qaroriga 3b-ILOVA

“Ijtimoiy tashabbus” respublika koʻrik-tanlovini tashkil etish va oʻtkazish boʻyicha Respublika komissiyasi

TARKIBI

1. Iminov Odiljon Karimovich — Oʻzbekiston Respublikasi Oliy Majlisi Senatining Fan, taʼlim va sogʻliqni saqlash masalalari qoʻmitasi raisi, komissiyaraisi 2. Parpiyev Maxmud Mamatovich — Oʻzbekiston Respublikasi Oliy Majlisi Senatining Fan, taʼlim va sogʻliqni saqlash masalalari qoʻmitasi raisi oʻrinbosari 3. Maʼrupova Gulnora Maxmudovna — Oʻzbekiston Respublikasi mahalla va oilani koʻllab quvvatlash vazirining birinchi oʻrinbosari 4. Sharifxodjayev Usmon Ulfatovich — Oʻzbekiston Respublikasi xalq taʼlimi vazirining birinchi oʻrinbosari 5. Inoyatov Amrillo Shodiyevich — Oʻzbekiston Respublikasi sogʻliqni saqlash vazirining birinchi oʻrinbosari 6. Begimqulov Uzoqboy Shoimqulovich — Oʻzbekiston Respublikasi oliy va oʻrta maxsus taʼlim vaziri oʻrinbosari 7. Umurzakov Baxodir Xamidovich — Oʻzbekiston Respublikasi bandlik va mehnat munosabatlari vaziri oʻrinbosari 8. Yuldashev Maqsudjon Abdullayevich — Oʻzbekiston Respublikasi maktabgacha taʼlim vaziri oʻrinbosari 9. Kattaxonova Durdona Sobir qizi — Oʻzbekiston Respublikasi Yoshlar ishlari agentligi direktori oʻrinbosari, komissiya kotibi

Izoh: Komissiyaning aʼzolari boshqa ishga oʻtgan taqdirda, uning tarkibiga ushbu lavozimga yangidan tayinlangan shaxslar kiritiladi.

Oʻzbekiston Respublikasi Oliy Majlisi Senati Kengashining 2021-yil 22-apreldagi KQ-214-IV-sonli qaroriga 4a-ILOVA

“Mahalla — besh tashabbus beshigi” respublika koʻrik-tanlovini tashkil etish va oʻtkazish tartibi toʻgʻrisida

NIZOM

1-bob. Umumiy qoidalar

1. Ushbu Nizom “Mahalla — besh tashabbus beshigi” respublika koʻrik-tanlovini (keyingi oʻrinlarda tanlov deb yuritiladi) tashkil etish va oʻtkazish tartibini belgilaydi.

2. Tanlov Oʻzbekiston Respublikasida faoliyat olib borayotgan fuqarolarning oʻzini oʻzi boshqarish organlari (keyingi oʻrinlarda — ishtirokchilar) oʻrtasida oʻtkaziladi.

2-bob. Tanlovning maqsadi

3. Tanlovning maqsadi quyidagilardan iborat:

Oʻzbekiston Respublikasi Prezidenti tomonidan ilgari surilgan besh muhim tashabbusni (keyingi oʻrinlarda — besh muhim tashabbus) xalq harakatiga aylantirish;

besh muhim tashabbusni amalga oshirish boʻyicha faol ish olib borayotgan fuqarolarning oʻzini oʻzi boshqarish organlarini moddiy va maʼnaviy ragʻbatlantirish;

mahallalarda yoshlarning musiqa, rassomlik, adabiyot, teatr va sanʼatning boshqa turlariga qiziqishlarini oshirish, isteʼdodlarini yuzaga chiqarish, jismoniy chiniqtirish, sport bilan shugʻullanishlari uchun zarur sharoitlar yaratish, kompyuter texnologiyalari va internetdan samarali foydalanishni tashkil etish, kitobxonlikni keng targʻib qilish hamda xotin-qizlarni ish bilan taʼminlashga doir ishlar samaradorligini oshirish.

3-bob. Tanlovni oʻtkazish tartibi va shartlari

4. Mazkur tanlov quyidagi 3 ta bosqichda tashkil etiladi:

birinchi bosqich — tuman va shaharlar miqyosida iyun oyida;

ikkinchi bosqich — Qoraqalpogʻiston Respublikasi, viloyatlar va Toshkent shahri miqyosida (keyingi oʻrinlarda — hududiy) birinchi bosqich gʻoliblari oʻrtasida avgust oyida;

uchinchi bosqich — Respublika miqyosida ikkinchi bosqich gʻoliblari oʻrtasida dekabr oyida.

5. Birinchi bosqichni tashkil etish uchun besh muhim tashabbusga masʼul boʻlgan vazirlik idoralarning tuman va shahar tuzilmalari (boʻlimlari) vakillari hamda Yoshlar parlamenti aʼzolaridan iborat Ishchi guruh tuziladi.

Ishchi guruh aʼzolari tomonidan Nizom talablari asosida tuman va shaharlardan ishtirokchilar orasidan 5 tasini saralab, xalq deputatlari tuman va shahar Kengashlari kotibiyatlariga (keyingi oʻrinlarda kotibiyatlar deb yuritiladi) taqdim etiladi.

Kotibiyatlar Ishchi guruh tomonidan saralangan ishtirokchilarning hujjatlarini xalq deputatlari tuman va shahar Kengashlariga besh muhim tashabbusga doir 5 daqiqadan oshmagan videolavhasi bilan birgalikda koʻrib chiqish uchun kiritadilar.

Xalq deputatlari tuman va shahar Kengashlari kotibiyatlari tomonidan kiritilgan nomzodlarni koʻrib chiqib, Kengash xulosasi asosida eng yaxshi deb topilgan 1 tadan nomzodni 2-bosqichda ishtirok etishi uchun Qoraqalpogʻiston Respublikasi Joʻqorgʻi Kengesi, xalq deputatlari viloyatlar hamda Toshkent shahar Kengashlari kotibiyatlariga taqdim etadi.

6. Kotibiyatlar ikkinchi bosqichga taqdim etilgan hujjatlarni Nizom talablari asosida koʻrib chiqib, nomzodlar hujjatlarini Respublika bosqichiga tavsiya etish uchun Qoraqalpogʻiston Respublikasi Joʻqorgʻi Kengesi, xalq deputatlari viloyatlar hamda Toshkent shahar Kengashlari muhokamasiga kiritadi.

Koʻrik-tanlovning hududiy bosqichi koʻrgazmali tarzda (koʻrgazmali qurollar, planshetlar, albomlar, videoroliklar, sahnalar va hokazo) tashkil etiladi.

Qoraqalpogʻiston Respublikasi Joʻqorgʻi Kengesi, xalq deputatlari viloyatlar hamda Toshkent shahar Kengashlari xulosasi asosida hududiy bosqichda ishtirok etgan nomzodlar orasidan eng yaxshi deb topilgan 1 tadan ishtirokchi Respublika bosqichiga tavsiya etiladi.

7. Tanlovning respublika bosqichi Toshkent shahrida Senat tomonidan tashkil etiladi. Respublika bosqichiga chiqqan jami 14 ta ishtirokchi (har bir hududdan bittadan) besh muhim tashabbus borasida olib borgan namunali faoliyatini koʻrgazmali tarzda himoya qiladi. Respublika bosqichi ishtirokchilari faoliyati tanlovning Respublika komissiyasi tomonidan Nizom talablari asosida tahlil etilib, ular orasidan Respublika bosqichi gʻoliblari aniqlanadi.

4-bob. Tanlovga rahbarlik qilish

8. Tanlovni oʻtkazishga umumiy rahbarlik Oliy Majlis Senati tomonidan amalga oshiriladi.

9. Tanlovni oʻtkazish boʻyicha respublika komissiyasi tarkibi Oliy Majlis Senati Kengashi tomonidan tasdiqlanadi.

10. Tanlovning birinchi va ikkinchi bosqichlari adolatli va shaffof oʻtkazilishi Qoraqalpogʻiston Respublikasi Joʻqorgʻi Kengesi, xalq deputatlari viloyatlar, Toshkent shahri hamda tuman (shahar) Kengashlari kotibiyatlari zimmasiga yuklatiladi. Respublika bosqichi esa Senatning bevosita ishtiroki va nazorati ostida oʻtkaziladi.

5-bob. Tanlovning respublika komissiyasi

11. Tanlovni oʻtkazish boʻyicha respublika komissiyasi (keyingi oʻrinlarda — Komissiya) obroʻli jamoat arboblari, vazirlik va idoralar, jamoat va notijorat tashkilotlarining tajribali, bilimli va koʻnikmaga ega vakillaridan shakllantiriladi. Komissiya tarkibi 9 nafar vakildan iborat etib belgilanadi.

12. Komissiya aʼzolari tanlov jarayonida quyidagi huquqlarga ega:

tanlovning respublika bosqichi ishtirokchilaridan Nizom talablari asosida tegishli hujjatlarni talab qilish;

tanlov jarayonida tanlov gʻolibini obyektiv baholash maqsadida ishtirokchilardan qoʻshimcha maʼlumotlar olish;

tanlov yakunlarini sarhisob qilish va gʻoliblarni aniqlashda oʻz ovozi bilan ishtirok etish.

13. Komissiya aʼzolari tanlov jarayonida quyidagi majburiyatlarga ega:

Tanlovning respublika bosqichi uchun taqdim etilgan maʼlumotlar va hujjatlarni tanlov asosida joyiga borish orqali oʻrganish;

tanlov hujjatlariga oid maʼlumotlarni oshkor etmaslik;

tanlov ishtirokchilarini saralashda adolatlilik, shaffoflik mezonlariga rioya qilish;

Komissiya aʼzolariga qonunchilikda belgilangan boshqa majburiyatlar ham yuklatilishi mumkin.

6-bob. Tanlovga hujjatlarni taqdim etish tartibi

14. Tanlovda ishtirokchilar yakka holda ishtirok etadi va hujjatlar taqdim etadi.

15. Tanlovda qatnashmoqchi boʻlgan nomzodlar tanlov haqida eʼlon qilingan kundan eʼtiboran 20 kun mobaynida xalq deputatlari tuman (shahar) Kengashi kotibiyatlari nomiga ariza taqdim etadilar.

16. Tanlovda qatnashish istagini bildirgan nomzodlar oʻz arizalariga quyidagi hujjatlarni taqdim etishlari lozim:

ishtirokchilar toʻgʻrisidagi umumiy maʼlumot (mavjud boʻlsa pasporti);

Oliy Majlis palatalari, Oʻzbekiston Respublikasi Prezidenti hamda Vazirlar Mahkamasi tomonidan besh muhim tashabbus boʻyicha qabul qilingan tegishli hujjatlarida belgilangan vazifalar ijrosi toʻgʻrisida maʼlumotlar;

besh muhim tashabbus doirasida olib borilgan faoliyatiga oid materiallar (maʼlumotlar, hisobotlar, bayonnomalar, dasturlar, loyihalar, foto, albom va hokazolar);

besh muhim tashabbusni amaliyotga tatbiq etish boʻyicha amalga oshirilgan ishlarni aks ettiruvchi 5 daqiqadan oshmagan videorolik (sifati yuqori, DVD formatida);

ommaviy axborot vositalarida besh muhim tashabbusga oid chop etilgan maqolalar, televideniye yoki radioda chiqishlarni asoslovchi hujjatlar.

Nomzodlar tanlovga doir boshqa qoʻshimcha materiallar ham taqdim etishi mumkin.

Arizalar tegishli hududdagi xalq deputatlari tuman (shahar) Kengashi kotibiyatlariga beriladi.

7-bob. Tanlov ishtirokchilarini saralash shartlari

17. Tanlov ishtirokchilarini saralash ishlari 1-bosqichda xalq deputatlari tuman (shahar) Kengashi kotibiyatlarida tashkil etilgan Ishchi guruhi tomonidan, 2-bosqichda Qoraqalpogʻiston Respublikasi Joʻqorgʻi Kengesi, xalq deputatlari viloyatlar va Toshkent shahar Kengashlari tomonidan, 3-bosqichda Respublika komissiyasi tomonidan amalga oshiriladi.

18. Tanlov ishtirokchilari quyidagi mezonlar asosida saralab olinadi:

Oʻzbekiston Respublikasi Prezidenti, Oliy Majlis Senati hamda Vazirlar Mahkamasi tomonidan besh muhim tashabbus boʻyicha qabul qilingan tegishli hujjatlarda belgilab berilgan vazifalar ijrosi taʼminlanganligi;

besh muhim tashabbusning mazmun-mohiyatini xalqqa yetkazilganligi hamda targʻibot tashviqot ishlarining olib borilganligi;

yoshlarning musiqa, rassomlik, adabiyot, teatr va sanʼatning boshqa turlariga qiziqishlarini oshirish, isteʼdodini yuzaga chiqarish samaradorligi;

yoshlarni jismoniy chiniqtirish va sport sohasida qobiliyatini namoyon qilishlari uchun zarur sharoitlar yaratilganligi va keng qamrab olinganligi;

aholi va yoshlar oʻrtasida kompyuter texnologiyalari va internetdan samarali foydalanishni tashkil etish samaradorligi;

yoshlar maʼnaviyatini yuksaltirish, ular va oilalar oʻrtasida kitobxonlikni keng targʻib qilish boʻyicha tizimli ishlarning tashkil etilganligi;

xotin-qizlarning ish bilan taʼminlanganlik darajasi.

8-bob. Koʻrik-tanlovni moliyalashtirish manbalari

19. Tanlov oʻtkazilishining moliyalashtirish shartlari:

Tanlovning 1-bosqichi uchun talab etiladigan zarur mablagʻlar tuman (shahar) hokimliklari tomonidan;

Tanlovning 2-bosqichi uchun talab etiladigan zarur mablagʻlar Qoraqalpogʻiston Respublikasi Vazirlar Kengashi, viloyatlar hamda Toshkent shahar hokimliklari tomonidan;

Tanlovning uchinchi — Respublika bosqichi uchun talab etiladigan zarur mablagʻlar Oʻzbekiston Respublikasi Mahalla va oilani qoʻllab-quvvatlash vazirligi hamda homiylar mablagʻlari hisobidan qoplanishi nazarda tutiladi.

Shuningdek, tanlovni oʻtkazishdan manfaatdor vazirlik va idoralar yoki homiylar mablagʻlari ham jalb etilishi mumkin.

9-bob. Tanlov gʻoliblarini taqdirlash

20. Gʻolib deb topilgan ishtirokchilar I, II, III darajali diplomlar va esdalik sovgʻalari bilan taqdirlanadi.

21. Koʻrik-tanlovning respublika bosqichida faol ishtirok etgan ishtirokchilar quyidagi nominatsiyalar boʻyicha taqdirlanishi ham nazarda tutiladi:

“Birinchi tashabbus boʻyicha eng faol mahalla”;

“Ikkinchi tashabbus boʻyicha eng faol mahalla”;

“Uchinchi tashabbus boʻyicha eng faol mahalla”;

“Toʻrtinchi tashabbus boʻyicha eng faol mahalla”;

“Beshinchi tashabbus boʻyicha eng faol mahalla”.

22. Koʻrik-tanlov ishtirokchilari “Besh tashabbus boʻyicha eng namunali oila” nominatsiyasi boʻyicha ham taqdirlanishlari mumkin.

10-bob. Yakunlovchi qoidalar

23. Mazkur koʻrik-tanlovni tashkil etish va oʻtkazishni Senatning Yoshlar, madaniyat va sport masalalari qoʻmitasi muvofiqlashtirib boradi.

24. Ushbu Nizomga Oʻzbekiston Respublikasi Oliy Majlisi Senati Kengashining qarori bilan oʻzgartish va qoʻshimchalar kiritiladi.

Oʻzbekiston Respublikasi Oliy Majlisi Senati Kengashining 2021-yil 22-apreldagi KQ-214-IV-sonli qaroriga 4b-ILOVA

“Mahalla — besh tashabbus beshigi” respublika koʻrik-tanlovini tashkil etish va oʻtkazish boʻyicha Respublika komissiyasi

TARKIBI

1. Sayfullayev Baxtiyor Sayfullayevich — Oʻzbekiston Respublikasi Oliy Majlisi Senatining Yoshlar, madaniyat va sport masalalari qoʻmitasi raisi, komissiya raisi 2. Kadirxanova Malika Akbarovna — Oʻzbekiston Respublikasi Oliy Majlisi Senatining Xotin-qizlar va gender tenglik masalalari qoʻmitasi raisi 3. Parpiyev Maxmudjon Mamatovich — Oʻzbekiston Respublikasi Oliy Majlisi Senatining Fan, taʼlim va sogʻliqni saqlash masalalari qoʻmitasi raisi oʻrinbosari 4. Ahmedov Bahodir Majidovich — Oʻzbekiston Respublikasi madaniyat vazirining birinchi oʻrinbosari 5. Azamov Ulugʻbek Adxamovich — Oʻzbekiston Respublikasi turizm va sport vazirining birinchi oʻrinbosari 6. Pekos Oleg Andreyevich — Oʻzbekiston Respublikasi axborot texnologiyalari va kommunikatsiyalarini rivojlantirish vazirining birinchi oʻrinbosari 7. Maʼrupova Gulnora Maxmudovna — Oʻzbekiston Respublikasi mahalla va oilani koʻllab quvvatlash vazirining birinchi oʻrinbosari 8. Muxitdinov Erkin Madorbekovich — Oʻzbekiston Respublikasi bandlik va mehnat munosabatlari vazirining birinchi oʻrinbosari 9. Quronov Muhammadjon — Respublika maʼnaviyat va maʼrifat markazi rahbarining birinchi oʻrinbosari, komissiya kotibi

Izoh: Komissiyaning aʼzolari boshqa ishga oʻtgan taqdirda, uning tarkibiga ushbu lavozimga yangidan tayinlangan shaxslar kiritiladi.