Oʻzbekiston Respublikasi Turizm va sport vazirligi huzuridagi Madaniy meros agentligi faoliyatini tashkil etish hamda sohani innovatsion rivojlantirish chora-tadbirlari toʻgʻrisida (PQ-5150-son)

19.06.2021

Oʻzbekiston Respublikasi Prezidentining

Qarori

Oʻzbekiston xalqining boy tarixi va madaniyatini aks ettiruvchi noyob va nodir madaniy merosini asrab-avaylashni kuchaytirish, sohani raqamlashtirish, innovatsion rivojlantirish va moddiy-texnika bazasini mustahkamlash, jahonning ilgʻor tajribalarini samarali qoʻllash, shuningdek, Oʻzbekiston Respublikasi Prezidentining 2021-yil 6-apreldagi “Turizm, sport va madaniy meros sohalarida davlat boshqaruvi tizimini yanada takomillashtirish chora-tadbirlari toʻgʻrisida”gi PF-6199-son Farmoni ijrosini taʼminlash maqsadida:

1. Turizm va sport vazirligi huzurida Madaniy meros agentligi (keyingi oʻrinlarda — Agentlik) hamda uning Qoraqalpogʻiston Respublikasi, viloyatlar va Toshkent shahar boshqarmalari tashkil etilgani maʼlumot uchun qabul qilinsin.

2. Agentlikning asosiy vazifalari etib quyidagilar belgilansin:

a) moddiy madaniy meros obyektlarini muhofaza qilish sohasida:

moddiy madaniy meros obyektlarini aniqlash, hisobga olish, muhofaza qilish, targʻib qilish, davlat reyestri, elektron katalogi, pasporti va davlat kadastrini yuritish, qoʻriqlanadigan tegralarini belgilash hamda sohada davlat nazoratini amalga oshirish;

moddiy madaniy meros obyektlaridan oqilona foydalanish, shu jumladan ularni davlat-xususiy sheriklik asosida samarali boshqarish, sohani raqamlashtirish va zamonaviy axborot texnologiyalarini joriy etish;

moddiy madaniy merosning koʻchmas mulk obyektlarida asrashga doir ishlarni amalga oshirish, buyurtmachi funksiyasini bajarish, uzluksiz ravishda ilmiy-texnik nazorat qilish, tarixiy-madaniy ekspertiza va loyiha-smeta hujjatlarining tarixiy-madaniy qimmatga taʼsiri boʻyicha ekspertizasini amalga oshirish;

b) muzeylar sohasida:

milliy muzey fondining davlat katalogini yuritish, muzey ashyolari va muzey kolleksiyalarini milliy muzey fondi tarkibiga kiritish, undan chiqarish, universal huquqiy vorislik tartibida yoxud boshqa usulda bir shaxsdan ikkinchi shaxsga oʻtkazish hamda sohada davlat nazoratini amalga oshirish;

muzeylar faoliyatini muvofiqlashtirish, rivojlantirish, muzey xodimlarining malakasini oshirish, qayta tayyorlash, attestatsiyadan oʻtkazish, muzeylarning toifalarini belgilash, milliy muzey fondining ochiqligini taʼminlash va muzey ashyolari hamda muzey kolleksiyalarini oʻrganish, ommalashtirish, restavratsiya va asrashga doir ishlarni amalga oshirish;

v) alohida muhofaza qilinadigan tarixiy-madaniy hududlar sohasida:

alohida muhofaza qilinadigan tarixiy-madaniy hududlarni muhofaza qilish, ularning pasporti, boshqarish rejalari, rejimi, qoʻriqlanadigan tegralarini belgilash, ushbu hududlar va tarixiy mahallalarning tarixiy-madaniy qimmati, noyobligi, tabiiy landshafti va oʻziga xosligini saqlab qolish;

tarixiy joylarni Umumjahon merosi roʻyxatiga kiritishga tavsiya etish, Umumjahon madaniy va tabiiy merosini muhofaza qilish toʻgʻrisidagi konvensiya talablari, YUNESKO, Umumjahon merosi markazi, Umumjahon merosi qoʻmitasi tavsiyalarining mamlakat hududida bajarilishini nazorat qilish;

g) arxeologiya sohasida:

arxeologiya tadqiqotlarini qoʻllab-quvvatlash, muvofiqlashtirish, nazorat qilish, arxeologiya tadqiqoti uchun ruxsatnoma berish, ilmiy hisobotni ekspertizadan oʻtkazish va uning saqlanishini taʼminlash;

Arxeologiya ashyolari davlat katalogini yuritish, arxeologiya ashyolarining davlatga topshirilishini tashkil qilish hamda fan, madaniyat va taʼlim muassasalariga biriktirib qoʻyish va tasarrufdan chiqarish;

arxeologiya merosi obyektlarini muhofaza qilish, halokat yoqasidagi arxeologiya obyektlarida zudlik bilan tadqiqot oʻtkazilishini taʼminlash, arxeologiya obyektlarini konservatsiyalash, muzeylashtirish hamda arxeologiya parklarini yaratish;

d) mamlakatimiz va xorijdagi madaniy boyliklar sohasida:

madaniy boyliklarni muhofaza qilish, shu jumladan ularning Oʻzbekiston Respublikasi hududidan olib chiqilishi va uning hududiga olib kirilishi boʻyicha sertifikat berish va realizatsiya qilishni muvofiqlashtirish, madaniy boyliklarni badiiy ekspertizadan oʻtkazish, ularning toifasini aniqlash, davlat reyestrini yuritish, sohada davlat nazoratini amalga oshirish;

mamlakatimiz tarixi va madaniyatiga oid xorijdagi madaniy boyliklarni aniqlash, ularning toʻliq maʼlumotlar bazasini yaratish, muntazam yangilab borish hamda asl yoki koʻchirma nusxalari, foto va videotasvirlarini yurtimizga olib kelish;

ilmiy oʻrganish asosida olingan ilmiy maʼlumotlar va ularning tahliliy natijalariga oid bibliografik toʻplamlar, kataloglar, kitob-albomlar, axborot byulletenlari va boshqa matbaa mahsulotlarini turli tillarda nashr etish, ommaviy axborot vositalari va Internet tarmogʻida keng yoritish, xalqaro va xorijiy tashkilotlar bilan hamkorlik qilish.

3. Belgilansinki, Agentlik:

moddiy madaniy meros, muzeylar, arxeologiya, madaniy boyliklarning olib chiqilishi va olib kirilishi sohasida maxsus vakolatli davlat boshqaruv organi hisoblanadi;

oʻz vakolatlari doirasida qabul qilgan qarorlari davlat va xoʻjalik boshqaruvi organlari, mahalliy ijro etuvchi hokimiyat organlari, boshqa tashkilotlar va ularning mansabdor shaxslari, shuningdek, fuqarolar tomonidan bajarilishi majburiy hisoblanadi;

sohaga oid qonunchilik hujjatlarining buzilishiga yoʻl qoʻymaslik yoki qonun buzilishlarini bartaraf qilish haqida tegishlicha yozma ravishda ogohlantirishlar va ijro etilishi majburiy boʻlgan koʻrsatmalar beradi;

qonunbuzilish holatlarini, ularga imkon beruvchi sabablar va shart-sharoitlarni bartaraf etish hamda aybdor mansabdor shaxslarga nisbatan tegishli choralar koʻrish toʻgʻrisida koʻrib chiqilishi majburiy boʻlgan taqdimnomalar kiritadi.

4. Shunday tartib oʻrnatilsinki, unga muvofiq:

sohaga oid normativ-huquqiy hujjatlar loyihalari va moddiy madaniy merosning koʻchmas mulk obyektlari joylashgan aholi punktlarining bosh rejalari Agentlik bilan kelishilishi majburiy hisoblanadi;

moddiy madaniy merosning koʻchmas mulk obyektlarida, alohida muhofaza qilinadigan tarixiy-madaniy hududlarda, Umumjahon merosi roʻyxatiga kiritilgan hududlarda va ularning qoʻriqlanadigan tegralarida obyektlarni qurish, buzish va obodonlashtirish ishlarining loyihalari Agentlik bilan majburiy tartibda kelishiladi. Bunda, Umumjahon merosi roʻyxatiga kiritilgan hududlar (obyektlar) boʻyicha loyihalar Agentlik tomonidan YUNESKO ishlari boʻyicha Milliy komissiya orqali YUNESKOning Umumjahon merosi markazi bilan kelishiladi;

moddiy madaniy meros koʻchmas mulk obyektlarining davlat reyestri Vazirlar Mahkamasi tomonidan tasdiqlanadi;

davlat koʻchmas mulki hisoblangan moddiy madaniy merosning koʻchmas mulk obyektlarini operativ boshqaruv huquqi asosida yoki tekin foydalanish huquqi asosida biriktirish Oʻzbekiston Respublikasi Prezidenti va Vazirlar Mahkamasi qarori asosida amalga oshiriladi;

moddiy madaniy meros obyektiga yetkazilayotgan zarar haqidagi holat boʻyicha xabardor boʻlgan paytdan boshlab davlat nazoratining dastlabki natijalari 24 soat ichida Agentlik rasmiy sayti orqali jamoatchilikka maʼlum qilinishi shart;

asrashga doir ishlarni rejalashtirish va amalga oshirishning barcha bosqichlarini ilmiy-texnik tadqiq etish uchun har bir obyektning oʻziga xosligi va holatidan kelib chiqib, Ilmiy-texnik tadqiqot guruhlari tuziladi, asrashga doir ishlarning loyiha-smeta hujjatlarida guruh aʼzolari mehnatiga haq toʻlash nazarda tutiladi;

Davlat budjeti mablagʻlari hisobidan asrashga doir ishlar amalga oshiriladigan moddiy madaniy meros koʻchmas mulk obyektlari manzilli roʻyxati Ilmiy-texnik tadqiqot guruhlari va Agentlikning Ilmiy-ekspert kengashining ijobiy xulosalari asosida Bosh vazir oʻrinbosari — turizm va sport vaziri tomonidan tasdiqlanadi;

asrashga doir ishlarni amalga oshirish uchun Ilmiy-texnik tadqiqot guruhlari va Ilmiy-ekspert kengashining ijobiy xulosalariga asosan Agentlik tomonidan berilgan ruxsatnoma boʻlishi shart, ushbu qoidaga rioya qilmagan holda berilgan ruxsatnoma haqiqiy hisoblanmaydi;

Ilmiy-ekspert kengashi va Ilmiy-texnik tadqiqot guruhlari aʼzolariga davlat sud ekspertlari uchun qonunchilik hujjatlarida belgilangan huquq va majburiyatlar tatbiq etiladi. Ilmiy-ekspert kengashi xulosasi Agentlik uchun majburiy hisoblanadi.

5. Quyidagilar:

Turizm va sport vazirligi huzuridagi Madaniy meros agentligining tashkiliy tuzilmasi 1-ilovaga muvofiq;

Turizm va sport vazirligi huzuridagi Madaniy meros agentligi markaziy apparatining boshqaruv xodimlari umumiy cheklangan soni 65 nafardan iborat boʻlgan tuzilmasi 2-ilovaga muvofiq tasdiqlansin.

Agentlikning Qoraqalpogʻiston Respublikasi, viloyatlar va Toshkent shahar boshqarmalari (keyingi oʻrinlarda — hududiy boshqarmalar) boshqaruv xodimlarining cheklangan soni 145 nafar etib belgilansin.

Belgilansinki, Agentlikning markaziy apparati va hududiy boshqarmalarning tuzilmalariga qoʻshimcha 30 ta shtat birligi davlat muzeylari xodimlari sonini maqbullashtirish hisobiga ajratiladi.

Bosh vazir oʻrinbosari — turizm va sport vaziri A. Abduhakimov manfaatdor vazirlik va idoralar bilan birgalikda ikki oy muddatda davlat muzeylari xodimlari sonining maqbullashtirilishini inobatga olib, davlat muzeylarining namunaviy shtatlar jadvalining belgilangan tartibda tasdiqlanishini taʼminlasin.

6. Turizm va sport vaziriga:

Agentlikning markaziy apparati, hududiy boshqarmalar, Agentlik tizimidagi boshqa tashkilotlarning tuzilmasiga boshqaruv xodimlarining cheklangan umumiy soni va ish haqi fondi doirasida oʻzgartirishlar kiritish;

hududiy boshqarmalar tuzilmalari va nizomlarini tasdiqlash, shuningdek, ularda boshqaruv xodimlarining cheklangan sonini belgilash huquqi berilsin.

7. Belgilansinki:

Agentlik direktorining maqomi mehnatga haq toʻlash, tibbiy va transport xizmati koʻrsatish shart-sharoitlariga koʻra turizm va sport vazirining birinchi oʻrinbosariga tenglashtiriladi;

Agentlik direktori va uning oʻrinbosarlari turizm va sport vazirining taqdimnomasiga asosan Vazirlar Mahkamasi tomonidan lavozimga tayinlanadi va lavozimidan ozod etiladi;

Agentlik xodimi sifatidagi ish staji boshqa davlat organlariga, shu jumladan huquqni muhofaza qiluvchi va nazorat qiluvchi organlarga ishga oʻtish chogʻida navbatdagi harbiy va maxsus unvonlar olish, shuningdek, harbiy va maxsus unvonlar uchun ustamalar hamda uzoq muddatli xizmat uchun qoʻshimcha haqlar hisoblash uchun ish stajiga qoʻshib hisoblanadi;

moddiy madaniy meros koʻchmas mulk obyektlarida asrashga doir ishlarni rejalashtirish, amalga oshirish, muvofiqlashtirish va ilmiy-texnik nazorat qilish 3-ilovaga muvofiq sxema boʻyicha amalga oshiriladi.

8. Agentlikning budjetdan tashqari Madaniy meros jamgʻarmasini (keyingi oʻrinlarda — Jamgʻarma) moliyalashtirish manbalari etib quyidagilar belgilansin:

Agentlik, uning hududiy boshqarmalari va davlat muzey-qoʻriqxonalariga tegishli moddiy madaniy merosning koʻchmas mulk obyektlarini ijaraga berishdan tushgan mablagʻlarning 90 foiz miqdori;

davlat mulki boʻlgan boshqa tashkilotlarga tegishli moddiy madaniy merosning koʻchmas mulk obyektlarini ijaraga berish va chiptalar sotilishidan tushgan pul mablagʻlarining 50 foiz miqdori;

muzey-qoʻriqxonalarda chiptalar sotilishidan tushgan pul mablagʻlarining 50 foiz miqdori va davlat muzeylarida chiptalar sotilishidan tushgan pul mablagʻlarining 10 foiz miqdori;

madaniy boyliklarni badiiy ekspertizadan oʻtkazish, realizatsiya qilish uchun davlat xizmati koʻrsatish, olib chiqish huquqini beruvchi sertifikat, Milliy muzey fondining davlat katalogida muzey ashyolari va muzey kolleksiyalari roʻyxatdan oʻtkazilganligi toʻgʻrisida guvohnoma berish hamda uning tarkibidan muzey ashyolari va muzey kolleksiyalarini chiqarish uchun toʻlovlar;

moddiy madaniy merosning koʻchmas mulk obyektlarini davlat kadastriga kiritish va chiqarish, tarixiy-madaniy hududning pasportini koʻrib chiqish va tasdiqlash, aholi punktlari bosh rejalarining loyihalarini koʻrib chiqish va ularga xulosa berish uchun toʻlovlar;

moddiy madaniy merosning koʻchmas mulk obyektlarini asrashga doir ishlar uchun ruxsatnoma va litsenziya berish, ilmiy-texnik nazorat qilish, shuningdek, tarixiy-madaniy va loyiha-smeta hujjatlarining tegishli ekspertizalari, restavrator-ustalarga malaka sertifikati berish uchun toʻlovlar;

moddiy madaniy merosning koʻchmas mulk obyektlari, alohida muhofaza qilinadigan tarixiy-madaniy hududlarda, Umumjahon merosi roʻyxatiga kiritilgan hududlar va ularning qoʻriqlanadigan tegralarida yer qazish, yer tuzish, qurilish, melioratsiya va boshqa xoʻjalik ishlarini oʻtkazishga oid loyihalar, merosga boʻlgan taʼsirini baholash hisobotlarini koʻrib chiqish uchun toʻlovlar;

moddiy madaniy meros obyektlarini muhofaza qilish va ulardan foydalanish qoidalarini buzganligi hamda nobud qilish, buzish yoki ularga shikast yetkazganligi uchun toʻlanadigan jarimalar, shuningdek, davlat mulki hisoblangan moddiy madaniy meros obyektlariga yetkazilgan zararni qoplash boʻyicha mablagʻlar;

vakolatli organlar tomonidan Agentlik, uning tizimidagi tashkilotlar va davlat muzeylari, muzey-qoʻriqxonalari faoliyatini, shuningdek, moddiy madaniy meros koʻchmas mulk obyektlarida asrashga doir ishlarni amalga oshirishni tekshirish natijalari boʻyicha aniqlangan noqonuniy sarflangan budjet mablagʻlarining, talon-toroj, rastratalar, kamomadlar summalarining Davlat budjetiga yoʻnaltiriladigan qismi;

Jamgʻarmaning vaqtincha boʻsh turgan mablagʻlarini joylashtirishdan olinadigan daromadlar, xalqaro moliya tashkilotlari va xorijiy davlatlarning grantlari va texnik koʻmaklashish mablagʻlari, shuningdek, qonunchilik hujjatlari bilan taqiqlanmagan boshqa tushumlar.

9. Belgilansinki, Jamgʻarma mablagʻlari:

moddiy madaniy meros obyektlarini, shu jumladan arxeologiya merosi obyektlari, madaniy boyliklar hamda muzey ashyolari va kolleksiyalarini muhofaza qilish, konservatsiyalash, restavratsiya qilish, tuzatish, taʼmirlash, hozirgi zamonda foydalanishga moslashtirish, shuningdek, ular bilan bogʻliq ilmiy va ilmiy-texnik tadqiqotlar, loyihalash hamda ishlab chiqarish ishlarini amalga oshirish;

moddiy madaniy meros obyektlarining davlat kadastrini, arxeologiya ashyolari, milliy muzey fondining davlat kataloglari va pasportlarini yuritish, muzeylar faoliyati va arxeologiya tadqiqotlarini qoʻllab-quvvatlash, targʻibot va ommalashtirish ishlarini tashkil etish;

alohida muhofaza qilinadigan tarixiy-madaniy hududlar, Umumjahon merosi roʻyxatiga kiritilgan hududlar va tarixiy mahallalarni muhofaza qilish;

Agentlik va hududiy boshqarmalarning moddiy-texnik bazasini mustahkamlash, axborot-kommunikatsiya texnologiyalarini joriy etish, elektron xizmatlarni rivojlantirish va raqamlashtirish, sohada huquqbuzarliklarning oldini olish, ularga samarali qarshi kurashish boʻyicha ishlarni tashkil etish;

ekspertlarni, jumladan xorijiy mutaxassislar, Ilmiy-ekspert kengashi, Ilmiy-texnik tadqiqot guruhlari aʼzolari mehnatiga haq toʻlash, jamoatchi inspektorlar, Agentlik va hududiy boshqarmalarning xodimlarini moddiy ragʻbatlantirish, Agentlik faoliyati bilan bogʻliq masalalar boʻyicha mutaxassislarni fuqarolik-huquqiy shartnoma asosida jalb etish;

qonunchilik hujjatlari bilan belgilangan Agentlik faoliyati bilan bogʻliq boshqa tadbirlarni amalga oshirish uchun sarflanadi.

Jamgʻarma mablagʻlarini shakllantirish va ulardan foydalanish tartibi Vazirlar Mahkamasi tomonidan belgilanadi.

10. Quyidagilar:

2021-2022-yillarda moddiy madaniy meros obyektlarini muhofaza qilish, muzeylar faoliyatini rivojlantirish va sohani raqamlashtirish boʻyicha “yoʻl xaritasi” 4-ilovaga muvofiq;

2021-2022-yillarda moddiy madaniy meros koʻchmas mulk obyektlarini qayta tarixiy-madaniy ekspertizadan oʻtkazish, ularning raqamlashtirilgan pasporti va katalogini ishlab chiqishning maqsadli koʻrsatkichlari 5-ilovaga muvofiq;

2021 — 2023-yillarda moddiy madaniy meros koʻchmas mulk obyektlarining qoʻriqlanadigan tegralarini belgilash va raqamlashtirishning maqsadli koʻrsatkichlari 6-ilovaga muvofiq;

2021 — 2023-yillarda davlat muzeylaridagi muzey ashyolari va muzey kolleksiyalarini elektron identifikatsiya qilish maqsadli koʻrsatkichlari 7-ilovaga muvofiq tasdiqlansin.

Belgilab qoʻyilsinki, ushbu qaror bilan tasdiqlangan maqsadli koʻrsatkichlar 2021-yilda Jamgʻarma va madaniy meros obyektlarini asrash uchun ajratilgan Davlat budjeti mablagʻlari hisobidan amalga oshiriladi, 2022-2023-yillarda Davlat budjeti parametrlarini shakllantirishda nazarda tutiladi.

11. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Agentlik, Fanlar akademiyasi, Qurilish vazirligi, Kadastr agentligi bilan birgalikda har yil yakunida oʻz hududlarida joylashgan moddiy madaniy meros obyektlari va madaniy boyliklarni aniqlash, hisobga olish, muhofaza qilish, asrash va ulardan oqilona foydalanish, muzey ashyolari va muzey kolleksiyalarining but saqlanishi holati haqida xalq deputatlari mahalliy Kengashlariga axborot berib borsin.

Vazirlar Mahkamasi har chorakda mazkur qaror bilan tasdiqlangan “yoʻl xaritasi” va maqsadli koʻrsatkichlarning toʻliq bajarilishini tanqidiy tahlil qilib, Agentlik, tegishli vazirlik va idoralar hamda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari rahbarlari faoliyatiga baho berib borsin.

12. Shunday tartib oʻrnatilsinki, unga muvofiq moddiy madaniy meros obyektlari va muzeylar sohasidagi davlat xizmatlari 8-ilovaga muvofiq 2023-yil 1-yanvardan boshlab elektron shaklda koʻrsatiladi. Bunda, ushbu roʻyxatga kiritilgan davlat xizmatlarini koʻrsatishda:

Davlat xizmatlari markazlari va Yagona interaktiv davlat xizmatlari portali orqali yoki arizachining oʻzi bevosita Agentlikning tegishli tuzilmasiga murojaat qilish tartibi joriy etiladi. Arizachining oʻzi bevosita murojaat qilganda uning murojaati Agentlik xodimi tomonidan maxsus elektron tizimda roʻyxatdan oʻtkazilishi shart;

davlat xizmatlari uchun toʻlovlarni elektron shaklda amalga oshirish orqali kvitansiya talab qilish bekor qilinadi;

Agentlik masʼul xodimlari va fuqarolik-huquqiy shartnoma asosida jalb etilgan mutaxassislar, ekspertlar tomonidan tegishli koʻchmas mulk va koʻchar ashyolar shaxsan ekspertizadan oʻtkaziladi;

ekspertiza oʻtkaziladigan manzil, vaqt va maʼlumot uchun telefon raqamlari hamda davlat xizmati koʻrsatish natijasi haqida SMS yuborish orqali arizachi xabardor qilinadi;

davlat xizmatini koʻrsatish natijasida beriladigan hujjatlar QR-kod (matrik shtrixli kod) qoʻyish orqali beriladi.

13. Belgilansinki, moddiy madaniy meros obyektlari, muzey, sport majmualari va boshqa namoyish obyektlari (keyingi oʻrinlarda — namoyish obyektlari):

roʻyxati Oʻzbekiston Respublikasi Prezidentining 2021-yil 6-apreldagi PF-6199-son Farmoni bilan tuzilgan Turizm, sport, madaniy meros, transport logistikasi va xizmatlar sohalarida davlat-xususiy sheriklik hamda raqamlashtirishni rivojlantirish masalalari boʻyicha muvofiqlashtiruvchi kengash tomonidan tasdiqlanadi;

roʻyxatiga kiritilgan namoyish obyektlariga kirish-chiqish joylarida 2021-yil 1-oktabrga qadar elektron turniketlar yoki tashrif buyuruvchilarni avtomatik hisobga olishga moʻljallangan boshqa moslamalar “Raqamlashtirish va avtomatlashtirish markazi” DUK tomonidan, jumladan, davlat-xususiy sheriklik asosida oʻrnatilishi hamda ular tegishli yagona elektron tizimga integratsiya qilinishi shart.

2022-yil 1-yanvardan boshlab namoyish obyektlari roʻyxatiga kiritilgan namoyish obyektlarida chiptalar savdosini tegishli yagona elektron tizimga integratsiya qilmagan holda amalga oshirish nazorat-kassa texnikasini va hisob-kitob terminallarini qoʻllash tartibini buzish deb baholanadi.

14. Turizm va sport vazirligi (A.A. Abduxakimov) ikki oy muddatda:

tizimga integratsiya qilinishi lozim boʻlgan namoyish obyektlari roʻyxatini shakllantirsin hamda belgilangan tartibda tasdiqlangan roʻyxatning eʼlon qilinishini taʼminlasin;

qonunchilik hujjatlariga mazkur qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

15. Oʻzbekiston Respublikasi Prezidentining 2018-yil 19-dekabrdagi “Moddiy madaniy meros obyektlarini muhofaza qilish sohasidagi faoliyatni tubdan takomillashtirish chora-tadbirlari toʻgʻrisida”gi PQ-4068-son qarori oʻz kuchini yoʻqotgan deb hisoblansin.

16. Mazkur qarorning ijrosini samarali tashkil etishga masʼul va shaxsiy javobgar etib Turizm va sport vazirligi huzuridagi Madaniy meros agentligi direktori, Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari belgilansin.

Qaror ijrosini muhokama qilib borish, ijro uchun masʼul idoralar faoliyatini muvofiqlashtirish va nazorat qilish Oʻzbekiston Respublikasi Prezidentining maslahatchisi A.A. Abduvaxitov va Oʻzbekiston Respublikasi Bosh vazirining oʻrinbosari — turizm va sport vaziri A.A. Abduxakimov zimmasiga yuklansin.

Amalga oshirilayotgan chora-tadbirlar natijadorligi yuzasidan 2021-yil 1-oktabr va 2022-yil 1-iyulga qadar Oʻzbekiston Respublikasi Prezidentiga axborot berilsin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2021-yil 19-iyun,

PQ-5150-son

Oʻzbekiston Respublikasi Prezidentining 2021-yil 19-iyundagi PQ-5150-son qaroriga 1-ILOVA

Turizm va sport vazirligi huzuridagi Madaniy meros agentligining tashkiliy tuzilmasi

Oʻzbekiston Respublikasi Prezidentining 2021-yil 19-iyundagi PQ-5150-son qaroriga 2-ILOVA

Turizm va sport vazirligi huzuridagi Madaniy meros agentligi markaziy apparatining TUZILMASI

Boshqaruv xodimlarining umumiy cheklangan soni — 65 nafar.

Texnik va xizmat koʻrsatuvchi xodimlar soni oʻrnatilgan meʼyorlarga muvofiq belgilanadi.

Oʻzbekiston Respublikasi Prezidentining 2021-yil 19-iyundagi PQ-5150-son qaroriga 3-ILOVA

Moddiy madaniy meros koʻchmas mulk obyektlarida asrashga doir ishlarni rejalashtirish, amalga oshirish, muvofiqlashtirish va ilmiy-texnik nazorat qilish

SXEMASI

Oʻzbekiston Respublikasi Prezidentining 2021-yil 19-iyundagi PQ-5150-son qaroriga 4-ILOVA

2021-2022-yillarda moddiy madaniy meros obyektlarini muhofaza qilish, muzeylar faoliyatini rivojlantirish va sohani raqamlashtirish boʻyicha

“YOʻL XARITASI”

T/r Chora-tadbirlar nomi Bajarish muddatlari Moliyalashtirish manbalari Masʼullar 1. Quyidagilarni nazarda tutgan holda qonun loyihasini belgilangan tartibda Oliy Majlis Qonunchilik palatasiga kiritish: moddiy madaniy meros obyektlarini nobud qilish, buzish yoki ularga shikast yetkazganlik uchun javobgarlikni kuchaytirish, bunday toifadagi obyektlarga juda koʻp miqdorda zarar yetkazganlikni ifodalovchi qilmishlarni ogʻir jinoyatlar toifasiga kiritish; moddiy madaniy meros obyektlarini nobud qilish, buzish yoki ularga shikast yetkazishga oid jinoyatlar boʻyicha dastlabki tergovni oʻtkazishni prokuratura organlariga yuklash; Agentlikning ijro etilishi majburiy boʻlgan koʻrsatma va taqdimnomalarini belgilangan muddatda va toʻliq bajarilmaganligi yuzasidan javobgarlikni belgilash. 2021-yil 1-oktabr - Bosh prokuratura (Yoʻldoshev), Madaniy meros agentligi, Adliya vazirligi (Davletov) 2. Madaniyat vazirligi huzuridagi Badiiy ekspertlar kengashi faoliyatini tanqidiy oʻrganish. Oʻrganish natijalarini inobatga olib, Badiiy ekspertlar kengashi faoliyatini takomillashtirish va uni Madaniy meros agentligi huzuriga oʻtkazish. 2021-yil 1-oktabr - Madaniy meros agentligi, Bosh prokuratura (Yoʻldoshev), Madaniyat vazirligi (Nazarbekov), Madaniyat va sanʼatni rivojlantirish jamgʻarmasi (Umerova) 3. Muzeylar ekspozitsiyasi va fond saqlash sharoitlarini bosqichma-bosqich yaxshilash boʻyicha aniq manzilli chora-tadbirlar rejasini ishlab chiqish hamda tasdiqlash uchun Vazirlar Mahkamasiga kiritish. 2021-yil 1-noyabr - Madaniy meros agentligi, Fanlar akademiyasi (Yuldashev), Moliya vazirligi (Ishmetov), tarkibida muzeylar boʻlgan vazirlik va idoralar 4. Moddiy madaniy meros koʻchmas mulk obyektlarida asrashga doir ishlarning loyiha hujjatlarini ishlab chiqish, tasdiqlash va ekspertizadan oʻtkazish tartibini belgilash. 2022-yil 1-iyun - Madaniy meros agentligi, Qurilish vazirligi (Zakirov), Moliya vazirligi (Ishmetov) 5. 2023-yil 1-yanvardan boshlab moddiy madaniy meros obyektlari va muzeylar sohasidagi elektron shaklda koʻrsatiladigan davlat xizmatlarini amalga oshirish bilan bogʻliq kompleks chora-tadbirlarni amalga oshirish. Bunda: moliyalashtirishning aniq manbalari va miqdorini; ijro uchun masʼullarni; davlat xizmatlarini amalga oshirish bosqichlarini va boshqa tadbirlarni belgilash. 2021-yil 1-dekabr Madaniy meros sohasiga Davlat budjetidan ajratilgan mablagʻlar, Madaniy meros jamgʻarmasi (keyingi oʻrinlarda — Jamgʻarma) Madaniy meros agentligi, Adliya vazirligi (Davletov), Axborot texnologiyalari va kommunikatsiyalarini rivojlantirish vazirligi (Sadikov) 6. Madaniy meros obyektlarining oʻziga xos xususiyatini inobatga olib, ularga har qanday salbiy taʼsirlarni oldini olish, uzluksiz ravishda davlat va ilmiy-texnik nazorat olib borishni nazarda tutgan holda sohada davlat-xususiy sheriklikni joriy etish tartibini ishlab chiqish va belgilangan tartibda Vazirlar Mahkamasiga kiritish. 2022-yil iyun - Madaniy meros agentligi, Moliya vazirligi (Ishmetov), Qurilish vazirligi (Zokirov) 7. Xorijiy va ilgʻor tajribalarni oʻrgangan holda muzeylar va moddiy madaniy meros koʻchmas mulk obyektlarida pullik xizmatlar koʻrsatish tartibini belgilash. 2021-yil 30-dekabr - Madaniy meros agentligi, Moliya vazirligi (Ishmetov) 8. Malakali mutaxassislar iborat tarkibda idoralararo komissiya tuzgan holda madaniy meros obyektlarida olib borilgan asrashga doir ishlarning 3 yillik holatini tekshirish hamda kelgusida bu boradagi salbiy holatlar takrorlanishini oldini olishga qaratilgan chora-tadbirlar belgilash. 2021-yil dekabr - Vazirlar Mahkamasi (Abduxakimov), Bosh prokuratura (Yoʻldoshev), Davlat xavfsizlik xizmati (Azizov), Hisob palatasi (Turabov), Ichki ishlar vazirligi (Bobojonov), Moliya vazirligi (Ishmetov), Qurilish vazirligi (Zokirov), Fanlar akademiyasi (Yuldashev), Monopoliyaga qarshi kurashish qoʻmitasi (Sharahmetov), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 9. Qoraqalpogʻiston Respublikasi Vazirlar Kengashi Raisining, viloyatlar hamda Toshkent shahar hokimlarining turizm, sport, madaniyat, madaniy meros va ommaviy kommunikatsiyalar masalalari boʻyicha oʻrinbosarlari mutasaddiligidagi tegishli hududiy boshqarmalarni bitta binoga tekin foydalanish huquqi asosida joylashtirish. 2022-yil 1-yanvar - Vazirlar Mahkamasi (Abduhakimov), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 10. Tegishli oliy taʼlim muassasasida madaniy merosni boshqarish boʻyicha taʼlim yoʻnalishi va fakultet tashkil etish masalasini oʻrganib, uning natijalari toʻgʻrisida Vazirlar Mahkamasiga taklif kiritish. 2022-yil 1-mart - Madaniy meros agentligi, Oliy va oʻrta maxsus taʼlim vazirligi (Tashkulov), Iqtisodiy taraqqiyot va kambagʻallikni qisqartirish vazirligi (Norqulov) 11. Moddiy madaniy meros obyektlarining tarixiy va badiiy qimmatiga yetkazilgan zarar miqdorini har bir holat boʻyicha obyektning oʻziga xos xususiyatidan kelib chiqqan holda maxsus ekspert komissiyasi tomonidan aniqlashni takomillashtirish. Bunda ekspertlar (mutaxassislar)ning malakasini oshirish, ularni oʻqitish, moddiy madaniy meros obyektining tarixiy va badiiy qimmatiga yetkazilgan zararni aniqlash boʻyicha uslubiy qoʻllanmalarni yaratish, xalqaro va xorijiy ilgʻor tajribalarni atroflicha oʻrganish va amaliyotga joriy etish. 2022-yil 1-mart - Madaniy meros agentligi, Adliya vazirligi (Davletov), Bosh prokuratura (Yoʻldoshev), Fanlar akademiyasi (Yuldashev), Badiiy akademiya (Nuridinov) 12. Samarqand arxeologiya institutining moddiy-texnik bazasini tubdan yaxshilash maqsadida: arxeologiya tadqiqotlari uchun zarur boʻladigan maxsus texnika, transport, asbob-uskuna va jihozlar roʻyxatini Turizm va sport vazirligi tomonidan tasdiqlash; ushbu roʻyxat asosida maxsus texnika, transport, asbob-uskuna va jihozlarni xarid qilish uchun mablagʻ ajratish va ularning xarid qilinishini taʼminlash. 2022-yil 1-mart Jamgʻarma mablagʻlari Turizm va sport vazirligi (Azamov), Madaniy meros agentligi 13. Madaniy meros obyektlarini restavratsiya qilishda Eron va Turkiya davlatlari bilan hamkorlikni, jumladan, ularning tajribali usta-restavratorlarini Oʻzbekistonga olib kelib va mahalliy ustalarni xorijiy mamlakatlarga olib borish orqali ularning malakasini oshirish tizimini yoʻlga qoʻyish. Bunda Eron va Turkiya davlatlaridan 15 kishidan kam boʻlmagan malakali mutaxassisni Oʻzbekistonga taklif qilish va ular ishtirokida asrashga doir ishlarni tashkil etish. 2022-yil 1-martdan reja asosida Oʻzbekiston Respublikasi Prezidentining 2021-yil 9-fevraldagi PF-6165-son Farmonining 9-bandiga muvofiq ajratilgan mablagʻlar hisobidan Madaniy meros agentligi, Tashqi ishlar vazirligi (Kamilov), Moliya vazirligi (Ishmetov) 14. Xususiy muzeylarni tashkil etish tartibini soddalashtirish, ularga davlat tomonidan subsidiya berish va boshqa moddiy qoʻllab-quvvatlash tizimini yaratish. Bu boradagi ilgʻor xorijiy tajribalarni atroflicha oʻrganib, Vazirlar Mahkamasiga tegishli qaror loyihasini kiritish. 2022-yil 1-aprel - Madaniy meros agentligi, Moliya vazirligi (Ishmetov), Adliya vazirligi (Davletov), Savdo-sanoat palatasi (Ikramov), Madaniyat va sanʼatni rivojlantirish jamgʻarmasi (Umerova) 15. Arxeologiya sohasiga oid qonunchilik hujjatlarini tizimlashtirish va takomillashtirish boʻyicha takliflar ishlab chiqish va Vazirlar Mahkamasiga kiritish. 2022-yil 1-may - Madaniy meros agentligi, Fanlar akademiyasi (Yuldashev), Adliya vazirligi (Davletov) 16. Zamonaviy sanʼat muzeylari (Museum of modern art) boʻyicha xorijiy ilgʻor tajribalarni oʻrganish, zamonaviy sanʼatni rivojlantirish chora-tadbirlarini belgilash. 2022-yil 1-may - Madaniy meros agentligi, Madaniyat va sanʼatni rivojlantirish jamgʻarmasi (Umerova), Badiiy akademiya (Nuridinov), Toshkent shahar hokimligi (Artikxodjayev) 17. Madaniy meros agentligi va uning hududiy boshqarmalarini quyidagilar bilan taʼminlash: transport vositasi — 18 ta, shu jumladan, 4 ta markaziy apparatga va 14 tasi hududiy boshqarmalarga; maxsus planshetlar — 30 ta; zamonaviy kompyuter jamlanmasi — 70 ta. 2022-yil 1-iyun Davlat budjeti, Jamgʻarma va mahalliy budjet mablagʻlari Madaniy meros agentligi, Moliya vazirligi (Ishmetov), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 18. Moddiy madaniy meros koʻchmas mulk obyektlarini ularning tarixiy-madaniy qimmati, jahon va mamlakat miqyosidagi ahamiyati, noyobligi kabi mezonlar asosida toifalash, shundan kelib chiqqan holda ularni muhofaza qilish tartibini belgilash. 2022-yil 1-iyun - Madaniy meros agentligi, Fanlar akademiyasi (Yuldashev), Qurilish vazirligi (Zakirov), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 19. Muzeylar faoliyatini keng targʻib qilish maqsadida tajribali ekspert, mutaxassis va dizaynerlarni jalb etib: har bir muzeyning “Museum brendbook”ini yaratish; Wikipedia — ommaviy ochiq ensiklopediyada har bir muzey boʻyicha 6 ta jahon tilida material joylashtirish; har bir muzeyning rasmiy veb-saytini zamon talabidan kelib chiqib, toʻliq yangilash, ularning mobil ilovasini yaratish; Youtube, Facebook, Twitter va boshqa ijtimoiy tarmoqlarda verifikatsiya qilingan holda muzeylarning akkauntlarini tashkil etish, yuritib borish. 2022-yil 1-iyul Jamgʻarma va muzeylarning budjetdan tashqari mablagʻlari Madaniy meros agentligi, tarkibida muzeylari boʻlgan vazirlik va idoralar 20. Madaniy meros obyektlari, shu jumladan, muzey ashyolari va kolleksiyalari, madaniy boyliklar haqidagi barcha axborotlarni toʻplash va ularni qayta ishlash maqsadida maxsus server moslamalarini xarid qilish hamda uning samarali ishlashini taʼminlash. 2022-yil 1-iyul Jamgʻarma, Oʻzbekiston Respublikasi Prezidentining 2021-yil 9-fevraldagi PF-6165-son Farmonining 9-bandiga muvofiq ajratilgan mablagʻlar, Davlat budjeti mablagʻlari Madaniy meros agentligi, Moliya vazirligi (Ishmetov), Axborot texnologiyalari va kommunikatsiyalarini rivojlantirish vazirligi (Sadikov) 21. Birinchi va ikkinchi renessans, jumladan buyuk daholar va davlatchilik tarixi boʻyicha muzeylar turkumini yaratish boʻyicha tegishli qaror loyihasini Vazirlar Mahkamasiga kiritish. Bunda jumladan: buyuk allomalar — Muhammad al-Xorazmiy, Abu Rayhon Beruniy, Abu ali ibn Sino, Ahmad Fargʻoniy, Abu Nasr Forobiy, Yusuf Xos Hojib, Mahmud Koshgʻariy, Mahmud Zamaxshariy, Buxoriy, Termiziy, Moturudiy, Nasafiy, Rumiy, Mirzo Ulugʻbek, Gʻiyosiddin Koshiy, Ali Qushchi, Lutfiy, Abdurahmon Jomiy, Alisher Navoiy, Bobur Mirzo, Sharafiddin Ali Yazdiy, Kamoliddin Behzod singari mutafakkirlar hayoti va ijodiga bagʻishlangan; davlatchilik tarixi — Katta Xorazm va Baqtriya, Xorazm, Qangʻ, Qadimgi Fargʻona va Kushon, Xorazmshohlar, Temuriylar kabi sivilizatsiyaga kuchli taʼsir koʻrsatgan davlatlar toʻgʻrisida ekzpozitsiyalarni nazarda tutish. 2022-yil 1-avgust - Madaniy meros agentligi, Fanlar akademiyasi (Yuldashev), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 22. Madaniy boyliklar, ayniqsa, rang-tasvir asarlarini yuqori aniqlikda fotofiksatsiya, material tarkibi, yaratilgan vaqti boʻyicha spektr va boshqa usullarda tahlil qilish tizimini yoʻlga qoʻyish. Ushbu maqsadlar uchun zamonaviy rentgen-spektr tahlili uskuna va jihozlarini xarid qilish, ulardan samarali foydalanish boʻyicha mutaxassislarni oʻqitish. 2022-yil 1-avgust Oʻzbekiston Respublikasi Prezidentining 2021-yil 9-fevraldagi PF-6165-son Farmonining 9-bandiga muvofiq ajratilgan mablagʻlar, Jamgʻarma mablagʻlari Madaniy meros agentligi, Moliya vazirligi (Ishmetov), Tashqi ishlar vazirligi (Kamilov), Madaniyat va sanʼatni rivojlantirish jamgʻarmasi (Umerova) 23. Madaniy meros agentligi tizimida arxeologiya tadqiqotini samarali tashkil etish maqsadida tegishli hududlarda arxeologiya-ekspeditsiya baza va otryadlarini tashkil qilish, ularning moddiy-texnik bazasini mustahkamlash. 2022-yil 1-noyabr Davlat budjeti mablagʻlari, Oʻzbekiston Respublikasi Prezidentining 2021-yil 9-fevraldagi PF-6165-son Farmonining 9-bandiga muvofiq ajratilgan mablagʻlar Madaniy meros agentligi, Moliya vazirligi (Ishmetov), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 24. Madaniy meros obyektlari restavratsiyasi direksiyasi va uning mintaqaviy restavratsiya markazlari faoliyatini bosqichma-bosqich tashkil etish. Direksiyaning moddiy-texnik bazasini yaratish uchun zarur boʻladigan texnika, asbob-uskuna va jihozlar roʻyxatini Turizm va sport vazirligi tomonidan tasdiqlash, ushbu roʻyxat asosida ularni xarid qilish. 2022-yil 1-dekabr Oʻzbekiston Respublikasi Prezidentining 2021-yil 9-fevraldagi PF-6165-son Farmonining 9-bandiga muvofiq ajratilgan mablagʻlar hisobidan Turizm va sport vazirligi (Azamov), Moliya vazirligi (Ishmetov), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 25. “Virtual Museum” (Virtual muzey) loyihasini ishlab chiqish va amalga oshirish. Virtual muzey boʻyicha Xalqaro muzeylar kengashi (ICOM), ilgʻor xorijiy tajribalarni oʻrganish va Oʻzbekistonda qoʻllash boʻyicha takliflar ishlab chiqish. 2022-yil 1-dekabr Jamgʻarma va muzeylarning budjetdan tashqari mablagʻlari Madaniy meros agentligi, Fanlar akademiyasi (Yuldashev), Badiiy akademiya (Nuridinov) , Innovatsion rivojlanish vazirligi (Abdurahmonov), Axborot texnologiyalari va kommunikatsiyalarini rivojlantirish vazirligi (Sadikov), tarkibida muzeylar boʻlgan vazirlik va idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 26. Muzeylar va turistik yoʻnalishlardagi madaniy meros obyektlarida “Museum shop” (muzey doʻkon) tizimini yoʻlga qoʻyish. “Museum shop”larni tashkil qilish boʻyicha: Turkiya, Xitoy, Fransiya, AQSH kabi davlatlarning tajribasini oʻrganish va ularning ilgʻor tajribalarini Oʻzbekistonda tatbiq etish boʻyicha takliflarni, oʻziga xos brend va savdo belgilarini, noyob muzey ashyolari nusxalarini ishlab chiqish; savdo maydonlari tashkil etish uchun joy ajratish va faoliyatini yoʻlga qoʻyish. 2022-yil 1-dekabr Jamgʻarma va muzeylarning budjetdan tashqari mablagʻlari Madaniy meros agentligi, Madaniyat va sanʼatni rivojlantirish jamgʻarmasi (Umerova), Fanlar akademiyasi (Yuldashev), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 27. Masofadan turib nazorat qilish va oʻrganish maqsadida uchuvchisiz uchish apparatlarini xarid qilish. Uchuvchisiz uchish apparatlaridan belgilangan tartibda foydalangan holda respublika boʻyicha video-kuzatuv shaklida quyidagilarni har oyda: moddiy madaniy merosning koʻchmas mulk obyektini; 2022-yil dekabr Jamgʻarma va Davlat budjeti mablagʻlari Madaniy meros agentligi, Parvozlar xavfsizligini nazorat qilish davlat inspeksiyasi, Ichki ishlar vazirligi (Bobojonov), Bosh prokuratura (Yoʻldoshev), Qurilish vazirligi (Zakirov), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari “Buxoro”, “Samarqand”, “Ichan qalʼa”, “Sarmishsoy”, “Shahrisabz”, “Termiz” va “Qoʻqon” davlat muzey-qoʻriqxonalari hududlari va qoʻriqlanadigan tegralarini monitoring qilish. Monitoring natijalarini belgilangan tartibda koʻrib chiqib, aniqlangan qonunbuzilish holatlariga nisbatan qonunchilikda belgilangan tartibda javobgarlikni taʼminlash. Monitoring davomida toʻplangan video, foto materiallarni yagona axborot bazaga jamlash. doimiy 28. Alohida ahamiyatga ega boʻlgan madaniy meros obyektlarining Bosh vazir oʻrinbosari — turizm va sport vaziri tomonidan tasdiqlangan roʻyxati boʻyicha: maxsus toʻsiq, xususan, 3D metall panjara bilan toʻsish, bunda obyektning umumiy koʻrinishni buzmaslik; videokuzatuv moslamalarini oʻrnatish va ularni huquqni muhofaza qiluvchi organlarning nazorat maskanlari bilan integratsiya qilish; Davlat budjeti hisobidan maxsus kiyimga (nimcha) ega boʻlgan nazoratchi lavozimini joriy etish. 2022-yil dekabr Mahalliy budjet mablagʻlari Madaniy meros agentligi, Axborot texnologiyalari va kommunikatsiyalarini rivojlantirish vazirligi (Sadikov), Ichki ishlar vazirligi (Bobojonov), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 29. Birinchi navbatda, turistik yoʻnalishlardagi madaniy meros obyektlarini badiiy yoritishni tashkil etish. Bunda: quyosh energiyasidan foydalanish tizimini joriy qilish; badiiy yoritish tashkil etiladigan obyektlar roʻyxatini Bosh vazir oʻrinbosari — turizm va sport vaziri tomonidan tasdiqlash. 2022-yil 1-dekabr Jamgʻarma, muzey-qoʻriqxonalar, Davlat budjeti mablagʻlari Madaniy meros agentligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 30. Oʻzbekiston Respublikasi Prezidentining 2021-yil 6-apreldagi PQ-5054-son qaroriga asosan tegishli madaniy meros obyektlarida asrashga doir ishlar ustuvor ravishda toʻgʻridan-toʻgʻri shartnoma asosida Madaniy meros obyektlari restavratsiyasi direksiyasi va uning mintaqaviy restavratsiya markazlari tomonidan amalga oshiriladi. Bunda: Madaniy meros obyektlari restavratsiyasi direksiyasi tomonidan asrashga doir ishlar amalga oshiriladigan obyektlar roʻyxati Ilmiy-ekspert kengash tavsiyasiga muvofiq, Bosh vazir oʻrinbosari — turizm va sport vaziri tomonidan tasdiqlanishini; ushbu alohida roʻyxatga kiritilmagan obyektlarda asrashga doir ishlar tegishli lizensiyaga ega boʻlgan tadbirkorlik subyektlari tomonidan umumiy tartibda amalga oshirilishini nazarda tutish. Har yili tasdiqlangan roʻyxat asosida Madaniy meros sohasiga Davlat budjetidan ajratilgan mablagʻlar Turizm va sport vazirligi (Azamov), Moliya vazirligi (Ishmetov), Madaniy meros agentligi 31. Eng muhim yodgorliklarning innovatsion texnologiyalar asosida 3D modelini yaratish. Bunda ushbu yodgorliklar roʻyxatini Bosh vazir oʻrinbosari — turizm va sport vaziri tomonidan tasdiqlash. 2022-yil 1-dekabr Davlat budjeti mablagʻlari va qonunchilik hujjatlari bilan taqiqlanmagan manbalar Madaniy meros agentligi, Innovatsion rivojlanish vazirligi (Abdurahmonov), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 32. Birinchi bosqichda kamida 100 ta alohida muhim ahamiyatga ega boʻlgan obyektlarda quyidagilarni tashkil qilish: tashrif markazi (Visitor center); tomosha minorasi (Watchtower). Ularni tashqi koʻrinishi boʻyicha yodgorlikka uygʻun holda yengil konstruksiya asosida qurish hamda ularda turistlar uchun savdo-xizmat koʻrsatishni yoʻlga qoʻyish. 2022-yil 1-dekabr Qonunchilik hujjatlari bilan taqiqlanmagan manbalar, mahalliy budjet mablagʻlari Madaniy meros agentligi, Qurilish vazirligi (Zakirov), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 33. Moddiy madaniy meros koʻchmas mulk obyektlarining mustahkamligi va alohida muhim badiiy bezaklarning saqlanishi kabi texnik holatlarini toʻliq ilmiy-texnik tadqiq etish. Bunda: ushbu obyektlar roʻyxatini Bosh vazir oʻrinbosar? — turizm va sport vaziri tomonidan tasdiqlash; ilmiy-texnik tadqiq etish natijalari boʻyicha har biri uchun aniq takliflar ishlab chiqish. 2022-yil 1-dekabr Jamgʻarma va Davlat budjeti mablagʻlari Madaniy meros agentligi, Badiiy akademiya (Nuridinov), Fanlar akademiyasi (Yuldashev), Qurilish vazirligi (Zakirov), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 34. Madaniy meros sohasi boʻyicha 1 000 nafar mutaxassisni, xususan arxitektura yodgorliklari, arxeologiya, muzeyshunoslik, badiiy ekspertiza kabi yoʻnalishlardagi ixtisoslashgan mutaxassis-ekspertlar roʻyxatini shakllantirish, malakasini oshirish hamda ularni sohaga keng jalb etish. Roʻyxat — 2021-yil 1-noyabr, malaka oshirish — 2022-yil 1-dekabr Jamgʻarma mablagʻlari Madaniy meros agentligi, Badiiy akademiya (Nuridinov), Fanlar akademiyasi (Yuldashev), Oliy va oʻrta maxsus taʼlim vazirligi (Tashkulov), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 35. Tarixiy xaritalarni oʻrganish, toʻplash, tiklash va ularning ahamiyatini ommalashtirish. Tarixiy xaritalardagi yoʻnalishlar boʻyicha reja asosida ekspeditsiyalar oʻtkazish va turistik yoʻnalishlar tashkil qilish. 2022-yil 1-dekabr Jamgʻarma mablagʻlari Turizm va sport vazirligi (Azamov), Fanlar akademiyasi (Yuldashev), Kadastr agentligi (Umarov), Qurilish vazirligi (Zakirov), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 36. Xususiy mulk hisoblangan madaniy boyliklarni sotib olish maqsadida Davlat budjetidan doimiy ravishda mablagʻ ajratishni yoʻlga qoʻyish. Har yili Jamgʻarma va Davlat budjeti mablagʻlari Madaniy meros agentligi, Moliya vazirligi (Ishmetov), Madaniyat va sanʼatni rivojlantirish jamgʻarmasi (Umerova) 37. Arxeologiya tadqiqotlari uchun maxsus asbob-uskunalar xarid qilish: Georadar — 5 ta Teodolit — 15 ta GPS — 15 ta 2021-2022-yillar Jamgʻarma va Davlat budjeti mablagʻlari Madaniy meros agentligi, Moliya vazirligi (Ishmetov) 38. Arxeologiya tadqiqotlari olib boruvchi davlat tashkilotlarida arxeologiya laboratoriyalarini tashkil etish. 2021-2022-yillar Jamgʻarma va Davlat budjeti mablagʻlari Madaniy meros agentligi, vazirlik va idoralar 39. Kamoliddin Behzod nomidagi Sharq miniatura sanʼati muzeyi xiyobonini zamonaviy qiyofada qayta tashkil etish. 2022-yil Mahalliy budjet mablagʻlari, qonunchilik hujjatlari bilan taqiqlanmagan manbalar Toshkent shahar hokimligi (Artikxodjayev), Badiiy akademiya (Nuridinov)

Oʻzbekiston Respublikasi Prezidentining 2021-yil 19-iyundagi PQ-5150-son qaroriga 5-ILOVA

2021-2022-yillarda moddiy madaniy meros koʻchmas mulk obyektlarini qayta tarixiy-madaniy ekspertizadan oʻtkazish, ularning raqamlashtirilgan pasporti va katalogini ishlab chiqishning

MAQSADLI KOʻRSATKICHLARI

Izoh. Obyektlar soni tarixiy-madaniy ekspertiza xulosasini inobatga olib, oʻzgarishi mumkin.

Oʻzbekiston Respublikasi Prezidentining 2021-yil 19-iyundagi PQ-5150-son qaroriga 6-ILOVA

2021 — 2023-yillarda moddiy madaniy meros koʻchmas mulk obyektlarining qoʻriqlanadigan tegralarini belgilash va raqamlashtirishning

MAQSADLI KOʻRSATKICHLARI

Izoh. Obyektlar soni tarixiy-madaniy ekspertiza xulosasini inobatga olib, oʻzgarishi mumkin.

Oʻzbekiston Respublikasi Prezidentining 2021-yil 19-iyundagi PQ-5150-son qaroriga 7-ILOVA

2021 — 2023-yillarda davlat muzeylaridagi muzey ashyolari va muzey kolleksiyalarini elektron identifikatsiya qilish

MAQSADLI KOʻRSATKICHLARI

Oʻzbekiston Respublikasi Prezidentining 2021-yil 19-iyundagi PQ-5150-son qaroriga 8-ILOVA

2023-yil 1-yanvardan boshlab moddiy madaniy meros obyektlari va muzeylar sohasida elektron shaklda koʻrsatiladigan davlat xizmatlari

roʻyxati

1. Moddiy madaniy meros obyektini davlat kadastriga belgilangan tartibda kiritish.

2. Moddiy madaniy meros obyektini davlat kadastridan belgilangan tartibda chiqarish.

3. Moddiy madaniy meros obyektlarini tarixiy-madaniy ekspertizadan oʻtkazish.

4. Moddiy madaniy merosning koʻchmas mulk obyektlarini asrashga doir ishlar uchun ruxsatnoma berish.

5. Moddiy madaniy merosning koʻchmas mulk obyektlari sohasida restavrator-ustalarga malaka sertifikati berish.

6. Moddiy madaniy merosning koʻchmas mulk obyektlari va ularning qoʻriqlanadigan tegralarida yer qazish, yer tuzish, qurilish, melioratsiya va boshqa xoʻjalik ishlarini oʻtkazishga oid loyihalarni koʻrib chiqish.

7. Alohida muhofaza qilinadigan tarixiy-madaniy hududlarda, shu jumladan Umumjahon madaniy merosi roʻyxatiga kiritilgan hududlarda bino va inshootlarni qurish yoki ularni buzish boʻyicha loyihalarni koʻrib chiqish.

8. Moddiy madaniy merosning koʻchmas mulk obyektidan foydalanish boʻyicha xulosa berish.

9. Moddiy madaniy merosning koʻchmas mulk obyektini tekin foydalanish uchun biriktirish boʻyicha xulosa berish.

10. Ushlab qolingan yoki musodara qilingan madaniy boyliklarni tegishli davlat organlaridan qabul qilib olish, ularni ekspertizadan oʻtkazish.

11. Madaniy boyliklarni realizatsiya qilish faoliyatini amalga oshirish uchun ruxsatnoma berish.

12. Olib chiqilayotgan va olib kirilayotgan madaniy boyliklarni hisobga olish va olib chiqish huquqini beruvchi sertifikatlar berish.

13. Arxeologiya ashyosini Davlat katalogiga kiritish.

14. Arxeologiya ashyosini Davlat katalogidan chiqarish.

15. Arxeologiya ashyosi Davlat katalogiga kirgan yoki kirmaganligi haqida maʼlumot berish.

16. Milliy muzey fondi Davlat katalogi tarkibiga muzey ashyolari va muzey kolleksiyalarini belgilangan tartibda kiritish.

17. Milliy muzey fondi Davlat katalogi tarkibidan muzey ashyolari va muzey kolleksiyalarini belgilangan tartibda chiqarish.

18. Milliy muzey fondi Davlat katalogi tarkibiga muzey ashyolari kirgan yoki kirmaganligi haqida maʼlumot berish.

19. Milliy muzey fondining Davlat katalogida muzey ashyolari va muzey kolleksiyalarining roʻyxatdan oʻtkazilganligi toʻgʻrisida guvohnoma berish.

Izoh.

Ushbu roʻyxatda keltirilgan davlat xizmatlarini elektron shaklda koʻrsatishga 2023-yil 1-yanvarga qadar bosqichma bosqich oʻtiladi.

Tegishli litsenziyalash, ruxsat berish va xabardor qilish tartib-taomillari bosqichma-bosqich toʻliq elektron tarzda “Litsenziya” axborot tizimi orqali amalga oshiriladi.

Tegishli litsenziyalash, ruxsat berish xususiyatiga ega hujjatlar oʻrniga qonunchilik hujjatlarida belgilangan hollarda xabarnoma berish tartibi joriy etiladi.