Samarqand viloyati mahalliy davlat hokimiyati organlarining eskirgan va oʻz ahamiyatini yoʻqotgan normativ tusdagi ayrim qarorlarini bekor qilish toʻgʻrisida (235/32-VI-son)
28.05.2021
Xalq deputatlari Samarqand viloyati Kengashining
Qarori
Oʻzbekiston Respublikasi Prezidentining “Oʻz ahamiyatini yoʻqotgan qonunchilik hujjatlarini qayta koʻrib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari toʻgʻrisida” 2020-yil 27-sentabrdagi PF-6075-son Farmoni ijrosini taʼminlash maqsadida “Mahalliy davlat hokimiyati toʻgʻrisida”gi Oʻzbekiston Respublikasi Qonunining 6, 24 va 25-moddalariga muvofiq, xalq deputatlari viloyat Kengashining VI chaqiriq, XXXII-sessiyasi qaror qiladi:
1. Oʻzbekiston Respublikasi Prezidentining 2020-yil 27-sentabrdagi “Oʻz ahamiyatini yoʻqotgan qonunchilik hujjatlarini qayta koʻrib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari toʻgʻrisida”gi PF-6075-son Farmoni ijrosini taʼminlash maqsadida, viloyat hokimligi tomonidan manfaatdor idoralar bilan birgalikda mahalliy davlat organlarining amaldagi normativ-huquqiy qarorlari xatlovdan oʻtkazilib, natijada 350 ga yaqin eskirgan va oʻz ahamiyatini yoʻqotgan normativ-huquqiy hujjatlari aniqlanganligi maʼlumot uchun qabul qilinsin.
2. Samarqand viloyati mahalliy davlat hokimiyati organlarining eskirgan va oʻz ahamiyatini yoʻqotgan normativ-huquqiy qarorlari ilovaga muvofiq oʻz kuchini yoʻqotgan deb hisoblansin.
3. Viloyat hokimligi axborot xizmati rahbari — matbuot kotibi (M. Mirzayev), viloyat hokimligi huzuridagi axborot kommunikatsiya texnologiyalarini rivojlantirish markazi davlat unitar korxonasi direktori (A. Anvarov) ushbu qaror lex.uz — Oʻzbekiston Respublikasi Qonun hujjatlari va maʼlumotlari milliy bazasiga va hokimlikning rasmiy veb-saytiga joylashtirilishini taʼminlasinlar.
4. Mazkur qaror rasman eʼlon qilingandan keyin kuchga kiradi.
5. Ushbu qarorning bajarilishini nazorat qilish viloyat hokimining birinchi oʻrinbosari J. Urakov zimmasiga yuklatilsin.
Kengash raisi E. TURDIMOV
Samarqand sh.,
2021-yil 28-may,
235/32-VI-son