Davlat qisqa muddatli obligatsiyalar bozorida dilerlik vazifalarini bajarish boʻyicha shartnoma tuzish (525-son)

09.11.1998

tartibi

[Oʻzbekiston Respublikasi Adliya vazirligi tomonidan 1998-yil 9-noyabrda roʻyxatdan oʻtkazildi, roʻyxat raqami 525]

1. Umumiy qoidalar

1.1. Ushbu Tartib Oʻzbekiston Respublikasining “Oʻzbekiston Respublikasining Markaziy banki toʻgʻrisida”gi Qonuni va 1996-yil 26-martdagi 119-sonli va 1997-yil 30-yanvardagi 57-sonli Vazirlar Mahkamasining qarorlariga muvofiq ishlab chiqilgan.

Davlat qisqa muddatli obligatsiyalar (bundan buyon matnda DQMO deb yuritiladi) bozorida dilerlik vazifasini amalga oshirish toʻgʻrisida Oʻzbekiston Respublikasi Markaziy banki bilan shartnoma tuzish uchun Markaziy bank tomonidan tasdiqlangan, Moliya vazirligi bilan kelishilgan, Adliya vazirligida 1998-yil 30-noyabrdagi 552-son roʻyxat raqami bilan roʻyxatga olingan Davlat qisqa muddatli obligatsiyalari bilan ishlash va ularning muomalada boʻlishi toʻgʻrisidagi nizomga muvofiq nomzodlar hujjatlar taqdim etishi va mazkur Tartib bilan belgilanadigan talablarga muvofiq boʻlishi lozim.

1.2. Nomzodlar hujjatlar toʻplamini Oʻzbekiston Respublikasi Markaziy bankining Monetar operatsiyalar departamentiga taqdim etadilar.

2. DQMO bozorida dilerlikka nomzodning maqomi va moliyaviy holatiga qoʻyiladigan talablar

2.1. Hujjatlar taqdim etish vaqtida investitsiya vositachisi (bank boʻlmagan tashkilotlar uchun) sifatida professional faoliyatni amalga oshirish huquqini beruvchi litsenziyaga ega boʻlganiga 3 oydan kam boʻlmagan yoki Markaziy bank litsenziyasiga (banklar uchun) ega boʻlgan rezident yuridik shaxs boʻlishi.

Sugʻurta kompaniyalari va investitsiya fondlari DQMO bozorida diler boʻlish huquqiga ega emas.

2.2. Oʻz mablagʻlari (kapitali)ga ega boʻlish:

tijorat banklari uchun — Tijorat banklari kapitalining monandligiga quyiladigan talablar toʻgʻrisidagi nizomda (roʻyxat raqami 2693, 2015-yil 6-iyul) belgilangan ustav kapitalining tegishli minimal miqdoridan kam boʻlmagan;

bank boʻlmagan tashkilotlar uchun — 800 mln soʻmdan kam boʻlmagan.

Bunda xususiy mablagʻlar (kapital) hisob-kitobi Oʻzbekiston Respublikasining buxgalteriya hisobi toʻgʻrisidagi qonun hujjatlariga muvofiq amalga oshiriladi.

2.3. Tijorat banklari qonun hujjatlarida belgilangan Oʻzbekiston Respublikasi Markaziy bankining majburiy zaxira talablarini oʻz vaqtida va toʻliq hajmda bajarishlari lozim.

2.5. Qonunchilik va normativ hujjatlar bilan belgilangan minimal miqdordan kam boʻlmagan toʻliq toʻlangan ustav kapitaliga ega boʻlishi.

2.6. Tegishli malakali mutaxassislar shtatiga ega boʻlishi.

2.7. Nomzodning hisobvaragʻidagi pul mablagʻlari xatlanmagan va hisobvaraq boʻyicha operatsiyalar toʻxtatib qoʻyilmagan boʻlishi lozim .

2.8. Nomzodning arizalari koʻrib chiqilmaydi, agar ularga nisbatan:

bajariladigan operatsiyalar doirasi chegaralanganligi toʻgʻrisida taqdimnoma chiqarilgan boʻlsa;

vaqtinchalik maʼmuriyat tayinlanishi toʻgʻrisida buyruq chiqarilgan boʻlsa;

nochorlik (bankrotlik) jarayonini qoʻzgʻatish toʻgʻrisida ajrim qabul qilingan boʻlsa;

yuridik shaxsni tugatish toʻgʻrisida qaror qabul qilingan boʻlsa.

3. DQMO bozorida dilerlik vazifalarini bajarish toʻgʻrisida shartnoma tuzish uchun hujjatlarni taqdim etish

3.1. DQMO bozorida dilerlik vazifasini amalga oshirish toʻgʻrisida shartnoma tuzish uchun nomzod Oʻzbekiston Respublikasi Markaziy bankining Monetar operatsiyalar departamentiga quyidagilarni taqdim etadi:

ushbu Tartibning 1-ilovasiga muvofiq shaklda ariza;

tijorat banklari uchun ushbu Tartibning 2-ilovasiga muvofiq va bank boʻlmagan tashkilotlar uchun ushbu Tartibning 3-ilovasiga muvofiq shaklda anketa;

auditorlik tashkilotining moliyaviy hisobotlarning ishonchliligi va buxgalteriya hisobining qonun hujjatlarida belgilangan talablarga muvofiq yuritilganligi toʻgʻrisidagi xulosasi.

Yuqorida keltirilgan hujjatlardan tashqari, bank boʻlmagan tashkilotlar quyidagilarni taqdim etadi:

oxirgi yil uchun buxgalteriya balansi;

tashkilotning hisobvaragʻidagi mablagʻlari xatlanmaganligi toʻgʻrisida unga xizmat koʻrsatuvchi bankning maʼlumotnomasi.

3.2. Oʻzbekiston Respublikasi Markaziy banki mustaqil ravishda DQMO bozorida dilerlik vazifasini bajarish toʻgʻrisida tuziladigan shartnoma uchun boshqa vakolatli organlarda mavjud boʻlgan hujjatlar va maʼlumotlarni, mazkur Tartibning 3.1. bandida koʻrsatilgan hujjatlar va maʼlumotlar bundan mustasno, belgilangan tartibda axborot almashinuvi orqali, shu jumladan elektron shaklda oladi.

3.3. Mazkur Tartibning 3.1. bandida koʻrsatilgan hujjatlarni toʻliq taqdim etmagan nomzodlar bilan DQMO bozorida dilerlik vazifalarini bajarish toʻgʻrisida shartnoma tuzilmaydi.

4. Hujjatlarni koʻrib chiqish

4.1. DQMO bozorida Diler maqomini olish uchun hujjatlar kelib tushganda Monetar operatsiyalar departamentining masʼul xodimlari ish kuni davomida Nomzodlarni roʻyxatga olish jurnalini (4-son Ilova) toʻldiradi.

4.2. Monetar operatsiyalar departamenti nomzodlardan hujjatlarni qabul qilgan kundan keyingi ish kunida soʻrovnomalar joʻnatadi:

tijorat banklari boʻyicha — Kredit tashkilotlari prudensial nazorati departamentiga nomzodlar bilan shartnoma tuzish boʻyicha tavsiyalar hamda moliyaviy faoliyat toʻgʻrisida maʼlumot taqdim etish toʻgʻrisida;

bank boʻlmagan tashkilotlar boʻyicha — Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi huzuridagi Qimmatli qogʻozlar bozorini muvofiqlashtirish va rivojlantirish markaziga (bundan buyon matnda Markaz deb yuritiladi) nomzod bilan shartnoma tuzish boʻyicha tavsiyalar taqdim etish toʻgʻrisida.

Tijorat banklari boʻyicha soʻrovnomaga javob quyidagi maʼlumotlarni oʻz ichiga olishi lozim:

Markaziy bankdan olingan litsenziyaning raqami va sanasi;

ustav kapitali toʻlanganligi;

xususiy kapitali;

Markaziy bankning majburiy zaxira talablari bajarilganligi;

tijorat bankining korrespondent hisobvaragʻi xatlanmaganligi;

oʻtgan yil va oxirgi tugagan chorak uchun sof foyda mavjudligi;

tijorat bankining moliyaviy holati toʻgʻrisidagi xulosa.

4.3. Har bir nomzodga tegishli soʻrovga javob kelib tushishi bilan Nomzodlarni qayd etish jurnalining “Mazkur koʻrib chiqish natijasi” ustuni toʻldiriladi va nomzodni tekshirish yakuni boʻyicha xizmat varaqasi tayyorlanadi.

4.4. Toʻldirilgan Nomzodlarni roʻyxatga olish jurnali hamda xizmat varaqasi Markaziy bank Raisining vakolatli oʻrinbosariga koʻrib chiqish va yakuniy qaror qabul qilish uchun taqdim etiladi.

5. Qaror qabul qilish

5.1. Koʻrib chiqish natijasida DQMO bozorida dilerlik vazifasini bajarish toʻgʻrisida shartnomalar tuzish boʻyicha ijobiy yoki salbiy qaror qabul qilinishi mumkin.

Markaziy bankka hujjatlar taqdim etilgan vaqtdan 30 kundan oshmagan muddatda DQMO bozorida dilerlik vazifasini amalga oshirish toʻgʻrisida shartnoma tuzish boʻyicha qaror qabul qilish toʻgʻrisida nomzodga yozma ravishda javob yuboriladi. Yuqorida koʻrsatilgan muddat ichida javob olinmagan taqdirda, nomzod tushuntirish berilishi yuzasidan Markaziy bankka murojaat qilish huquqiga ega.

Bunda, salbiy qaror toʻgʻrisida javobda rad etish sababi koʻrsatilgan boʻlishi lozim.

5.2. Salbiy qaror quyidagi hollarda qabul qilinishi mumkin:

ushbu Tartibning 2-boʻlimiga muvofiq dilerlikka nomzodlarga qoʻyiladigan talablar bajarilmaganda;

bank boʻlmagan tashkilotlar boʻyicha Markazdan salbiy xulosa olinganda.

5.3. DQMO bozorida dilerlik vazifasini amalga oshirish toʻgʻrisida shartnoma tuzish uchun Markaziy bankning koʻrib chiqish natijalari boʻyicha roziligini ololmagan nomzodlar, aniqlangan kamchiliklarni bartaraf qilgan xolda, hujjatlarni qaytadan koʻrib chiqish uchun taqdim etish huquqiga ega.

5.4. Qaror qabul qilingandan soʻng 2 ish kunidan kechikmagan muddatda Oʻzbekiston Respublikasi Markaziy bankining Monetar operatsiyalar departamenti DQMO bozorida dilerlik vazifasini amalga oshirish toʻgʻrisida shartnoma tuzish uchun Markaziy bank roziligini olgan tashkilotlarning roʻyxatini OʻzRVBga yuboradi.

5.5. Monetar operatsiyalar departamenti OʻzRVBdan nomzodga savdo identifikatori berilganligi toʻgʻrisida xat olganidan soʻng, nomzodlarga roʻyxat kodini beradi. DQMO bozorida dilerlik vazifasini amalga oshirish toʻgʻrisida shartnoma 2 nusxada Markaziy bank roziligini olgan tashkilot manziliga yuboriladi.

5.6. Markaziy bankdan 2 nusxada DQMO bozorida dilerlik vazifasini amalga oshirish toʻgʻrisida shartnomani olgandan soʻng, tashkilot oʻz tomonidan shartnomani imzolaydi va uni Monetar operatsiyalar departamentiga Markaziy bank tomonidan imzolash uchun taqdim etadi.

1-ILOVA

2-ILOVA

3-ILOVA

4-ILOVA

Nomzodlarni roʻyxatga olish

JURNALI

T/r Tashkilot nomi Ariza va anketa kelib tushgan sana KTUT kodi Litsenziya raqami va olingan sanasi Ustav kapitali miqdori Oʻz kapitali miqdori Mazkur koʻrib chiqish natijasi Qaror qabul qilingan sana 1 2 3 4 5 6 7 8 9

Nomzodlarni roʻyxatga olish Jurnalini yuritish

TARTIBI

1. Nomzodlar arizalarini roʻyxatga olish uchun maxsus jurnal ochiladi.

2. Nomzodlarni roʻyxatga olish jurnali elektron shaklda barcha yozuvlarni chop etish sharti bilan yuritiladi. Jurnalning har bir varagʻi raqamlanib, Monetar operatsiyalar departamentining masʼul xodimi tomonidan imzolanadi va alohida jildga tikiladi.

3. Jurnal quyidagicha toʻldiriladi:

a) 1 ustunda nomzodning tartib raqami qoʻyiladi;

b) 2 ustunda nomzodni toʻliq nomi koʻrsatiladi;

v) 3 ustunda ariza va anketa kelib tushgan sana qoʻyiladi;

g) 4 ustunda KTUT kodi koʻrsatiladi;

d) 5 ustunda nomzod tomonidan olingan bank litsenziyasi raqami va sanasi — tijorat banklari uchun; Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi huzuridagi Qimmatli qogʻozlar bozorini muvofiqlashtirish va rivojlantirish markazi tomonidan olingan qimmatli qogʻozlar bozorida investitsion vositachi sifatida faoliyatni amalga oshirish huquqini beruvchi litsenziya raqami va sanasi — bank boʻlmagan boshqa tashkilotlar uchun qoʻyiladi;

e) 6-7 ustunlar nomzod tomonidan taqdim etilgan anketa maʼlumotlari asosida toʻldiriladi;

i) 8 ustun koʻrib chiqish natijalari asosida toʻldiriladi;

l) 9 ustunda qaror qabul qilingan sana koʻrsatiladi.