Oʻzbekiston Respublikasi davlat qisqa muddatli obligatsiyalarini chiqarishning asosiy shartlari (524-son)

09.11.1998

Asosiy shartlari

[Oʻzbekiston Respublikasi Adliya vazirligi tomonidan 1198 yil 9-noyabrda roʻyxatdan oʻtkazildi, roʻyxat raqami 524]

1. Mazkur shartlar Oʻzbekiston Respublikasi Vazirlar Mahkamasining 1996-yil 26-martdagi 119-sonli Qaroriga asosan ishlab chiqilgan va davlat qisqa muddatli obligatsiyalarining (bundan buyon matnda Obligatsiyalar deb yuritiladi) chiqarilishi va muomalada boʻlishini tartibga soladi. Obligatsiyalarning emitenti Oʻzbekiston Respublikasi Moliya vazirligi hisoblanadi. Obligatsiyalarning joylashtirilishi va toʻlovlarining amalga oshirilishi Markaziy bank tomonidan Moliya vazirligi nomidan va hisobidan amalga oshiriladi.

2. Obligatsiyalar emissiyasi muntazam ravishda alohida chiqarilishlar shaklida amalga oshiriladi. Har bir chiqarilish, qoida tariqasida, oyiga bir marotaba amalga oshiriladi. Obligatsiyalar bir yilgacha boʻlgan muddatga chiqariladi.

3. Obligatsiyalarning nominal bahosi 1000 (ming) soʻmni tashkil etadi.

4. Yuridik shaxslar obligatsiyalarning egalari boʻlishi mumkin. Obligatsiyalarning har bir chiqarilishi uchun ularning boʻlajak egalari boʻyicha cheklovlar belgilanishi mumkin.

Obligatsiya egasi toʻlovi amalga oshirilgan obligatsiyalar qiymatiga teng summadagi keyingi chiqarilish obligatsiyalarini sotib olish huquqiga ega.

5. Obligatsiyalar toʻlovi Oʻzbekiston Respublikasi Moliya vazirligi nomidan va hisobidan Markaziy bank tomonidan vakolatli tashkilotlarga (bundan buyon matnda Dilerlar deb yuritiladi) obligatsiyalarning nominal qiymatini naqd pulsiz shaklda oʻtkazish yoʻli bilan amalga oshiriladi. Dilerlar obligatsiyalar toʻlovini ularning egalariga, tuzilgan shartnomalarga muvofiq obligatsiyalarni toʻlash paytida ularning nominal qiymatini naqd pulsiz shaklda oʻtkazish yoʻli bilan amalga oshiradilar.

6. Obligatsiyalardan olingan daromad xarid bahosi bilan sotish bahosi (yoki toʻlov bahosi) oʻrtasidagi farq hisoblanadi.

7. Obligatsiyalar maxsus qogʻoz blanklari shaklida tayyorlanmaydi. Obligatsiyalarning har bir chiqarilishi maxsus Global sertifikat koʻrinishida, ikkita asl nusxada rasmiylashtiriladi, ulardan bittasi Oʻzbekiston Respublikasi Moliya vazirligida, ikkinchisi esa Oʻzbekiston Respublikasi Markaziy bankida saqlanadi. Obligatsiyalarga egalik qilish huquqi Oʻzbekiston Respublikasi valyuta birjasi savdo tizimida obligatsiyaga egalik qilish huquqi va uni saqlash boʻyicha ochilgan tegishli hisobvaraqqa (bundan buyon matnlarda “depo” hisobvaragʻi) kirim yozuvi kiritilishi bilan yuzaga keladi.

8. Oʻzbekiston Respublikasi Markaziy banki obligatsiyalar chiqarilishiga xizmat koʻrsatish boʻyicha bosh agent hisoblanadi. U Moliya vazirligi bilan kelishgan holda, ushbu Asosiy shartlarda belgilanmagan obligatsiyalarni joylashtirish va muomalada boʻlish masalalarini tartibga soladi.

9. Obligatsiyalarni joylashtirish, muomalada boʻlishi va soʻndirish, kliring va hisob-kitoblarni amalga oshirish hamda obligatsiya egalari hisobini yuritish va ular bilan hisob-kitob qilish Oʻzbekiston Respublikasi Valyuta birjasi tomonidan Oʻzbekiston Respublikasi Markaziy banki bilan tuzilgan shartnoma asosida amalga oshiriladi.

Diler Oʻzbekiston Respublikasi Markaziy banki bilan obligatsiyalar bozorida dilerlik vazifasini bajarish boʻyicha shartnoma tuzadi.

10. Obligatsiyalarni chiqarishga doir qaror Oʻzbekiston Respublikasi Markaziy banki bilan kelishilgan holda Oʻzbekiston Respublikasi Moliya vazirligi tomonidan qabul qilinadi. Obligatsiyalar chiqarish uchun qaror qabul qilishda uning chegaraviy miqdori, joylashtirish sanasi va boʻlajak egalariga qoʻyiladigan cheklovlar belgilanadi.

11. Ushbu Asosiy shartlarning 10-bandida koʻrsatilgan obligatsiyalarning keyingi chiqarilishiga doir maʼlumotlar ularni joylashtirish boshlanishidan kamida 7 kundan kam boʻlmagan muddatda eʼlon qilinadi. Chiqarishga moʻljallangan obligatsiyalar miqdorining kamida 20 foizi sotilgan taqdirda chiqarilish amalga oshgan hisoblanadi.

12. Oʻzbekiston Respublikasi Markaziy banki obligatsiyalarni ikkilamchi bozorda sotib olishi mumkin.

13. Oʻzbekiston Respublikasi Moliya vazirligi obligatsiyalarni ikkilamchi bozorda qayta sotib olish operatsiyasini amalga oshirishi mumkin.