6-modda. Psixiatriya yordami koʻrsatish va ijtimoiy himoya qilish kafolatlari

Davlat tomonidan quyidagilar kafolatlanadi:

davlat tibbiyot muassasalarida birlamchi tibbiy-sanitariya yordami, ixtisoslashtirilgan tibbiy yordam, tez yordam, shu jumladan ixtisoslashtirilgan tibbiy tez yordam koʻrsatish chogʻidagi bepul psixiatriya yordami;

qonunchilikka muvofiq barcha turdagi psixiatriya ekspertizalarini oʻtkazish;

tibbiy-ijtimoiy ekspertiza komissiyasining tegishli xulosasi mavjud boʻlgan taqdirda, ruhiy holati buzilgan shaxslarga ijtimoiy-maishiy yordam koʻrsatish va ularni ishga joylashtirishga koʻmaklashish;

ruhiy holati buzilgan shaxslarning vasiylik masalalarini hal qilish;

psixiatriya yordami koʻrsatuvchi tibbiyot muassasalarida, ruhiy holati buzilgan shaxslar uchun moʻljallangan tibbiy-ijtimoiy muassasalarda huquqiy masalalar boʻyicha maslahatlar berish va yuridik yordamning boshqa turlari;

favqulodda vaziyatlar chogʻidagi psixiatriya yordami.

Ruhiy holati buzilgan shaxslarni psixiatriya yordami bilan taʼminlash va ijtimoiy jihatdan himoya qilish uchun davlat:

psixiatriya yordami koʻrsatuvchi barcha turdagi muassasalarni, imkoniyati boricha, ruhiy holati buzilgan shaxslarning yashash joyida barpo etadi;

ruhiy holati buzilgan voyaga yetmagan shaxslarning davlat ixtisoslashtirilgan taʼlim muassasalarida, umumiy oʻrta va oʻrta maxsus taʼlim tashkilotlarida taʼlim olishini tashkil etadi;

ruhiy holati buzilgan shaxslarni reabilitatsiya qilish va jamiyatga qayta integratsiya qilish maqsadida ular uchun moslashtirilgan ishlab chiqarish jarayonini tashkil etgan holda, psixiatriya muassasalari hududida mehnat terapiyasi, yangi kasb-hunarlarga oʻqitish va ruhiy holati buzilgan shaxslarni, shu jumladan nogironligi boʻlgan shaxslarni ishga joylashtirish uchun davlat-xususiy sheriklik shartlari asosida davolash-ishlab chiqarish korxonalarini barpo etadi;

ruhiy holati buzilgan shaxslarni ishga joylashtiruvchi korxonalar, muassasalar va tashkilotlar uchun iqtisodiy ragʻbatlantirish (imtiyozlar, preferensiyalar berish va boshqalar) usullarini qoʻllaydi;

ruhiy holati buzilgan shaxslarni ijtimoiy jihatdan himoya qilish uchun zarur boʻlgan boshqa choralarni koʻradi.

Ruhiy holati buzilgan shaxslarni ijtimoiy jihatdan himoya qilish davlat hokimiyati va boshqaruvi organlari, shuningdek fuqarolarning oʻzini oʻzi boshqarish organlari tomonidan qonunchilikka muvofiq ularga berilgan vakolatlar doirasida amalga oshiriladi.