26-modda. Shaxsni oʻzining roziligisiz yoki qonuniy vakilining roziligisiz psixiatriya tekshiruvidan oʻtkazish toʻgʻrisida ariza berish va qaror qabul qilish tartibi

Shaxsni oʻzining roziligisiz yoki qonuniy vakilining roziligisiz psixiatriya tekshiruvidan oʻtkazish toʻgʻrisidagi qaror shunday tekshiruv oʻtkazish uchun ushbu Qonun 24-moddasining yettinchi qismida sanab oʻtilgan asoslar mavjudligi haqidagi maʼlumotlarni oʻz ichiga olgan yozma arizaga binoan shifokor-psixiatr tomonidan qabul qilinadi, bundan ushbu Qonun 24-moddasining sakkizinchi qismida nazarda tutilgan hollar mustasno.

Yozma ariza psixiatriya tekshiruvidan oʻtkazilishi lozim boʻlgan shaxsning qarindoshlari, har qanday tibbiy ixtisoslikdagi shifokor, mansabdor shaxslar va boshqa fuqarolar tomonidan berilishi mumkin.

Ushbu Qonun 24-moddasi yettinchi qismining ikkinchi xatboshisida nazarda tutilgan hollarda ariza ogʻzaki shaklda ham berilishi mumkin. Shaxsni psixiatriya tekshiruvidan oʻtkazish toʻgʻrisidagi qaror shifokor-psixiatr tomonidan darhol qabul qilinadi va tibbiy hujjatlarga yozib qoʻyish orqali rasmiylashtiriladi.

Shaxs oʻzi uchun yoki atrofidagilar uchun bevosita xavf tugʻdirmagan taqdirda, psixiatriya tekshiruvi oʻtkazish toʻgʻrisidagi ariza yozma shaklda berilishi, shunday tekshiruv oʻtkazish zarurligini asoslovchi batafsil maʼlumotlarni va shaxs yoki uning qonuniy vakili shifokor-psixiatrga murojaat etishni rad etganligiga doir koʻrsatmani oʻz ichiga olgan boʻlishi kerak. Shifokor-psixiatr qaror qabul qilish uchun zarur boʻlgan qoʻshimcha maʼlumotlarni soʻrab olishga haqli. Arizada ushbu Qonun 24-moddasi yettinchi qismining uchinchi va toʻrtinchi xatboshilarida nazarda tutilgan holatlar mavjudligi toʻgʻrisida dalolat beruvchi maʼlumotlar mavjud emasligini aniqlab, shifokor-psixiatr psixiatriya tekshiruvi oʻtkazishni yozma ravishda asoslantirilgan holda rad etadi.

Shaxsni oʻzining roziligisiz yoki qonuniy vakilining roziligisiz psixiatriya tekshiruvidan oʻtkazish toʻgʻrisidagi ariza asosli boʻlganida shifokor-psixiatrning bunday tekshiruv oʻtkazish zarurligi haqidagi yozma xulosasi, shuningdek shaxsni tekshiruvdan oʻtkazish toʻgʻrisidagi ariza va boshqa mavjud materiallar tegishli tibbiyot muassasasi tomonidan shaxsning yashash joyidagi sudga yuboriladi.

Sud psixiatriya tekshiruvi oʻtkazish toʻgʻrisidagi masalani barcha materiallar olingan paytdan eʼtiboran qirq sakkiz soat ichida hal qiladi.