Sirdaryo viloyatining Mirzaobod tumanida qishloq xoʻjaligi sohasini rivojlantirish chora-tadbirlari toʻgʻrisida (284-son)
06.05.2021
Oʻzbekiston Respublikasi Vazirlar Mahkamasining
qarori
Sirdaryo viloyatining Mirzaobod tumanida qishloq xoʻjaligi ekin yerlaridan samarali foydalanish, suv taʼminotini yaxshilash, qishloq xoʻjaligi mahsulotlarini yetishtirish va qayta ishlashda yaratiladigan qoʻshilgan qiymat hajmlarini koʻpaytirish, aholini ish bilan taʼminlash, daromadini oshirish, muhandislik-kommunikatsiya tarmoqlarini modernizatsiya qilish, sanoat salohiyatini yanada oshirish maqsadida Vazirlar Mahkamasi qaror qiladi:
1. Quyidagilar:
2021 — 2023-yillarda Sirdaryo viloyatining Mirzaobod tumanida qishloq xoʻjaligiga moʻljallangan yerlarning suv taʼminoti va meliorativ holatini yaxshilash chora-tadbirlari dasturi 1-ilovaga muvofiq;
2021 — 2023-yillarda Sirdaryo viloyatining Mirzaobod tumanida sugʻorish tarmoqlari taʼmirlanishi hisobiga qishloq xoʻjaligiga moʻljallangan yer maydonlarini qayta foydalanishga kiritish prognoz koʻrsatkichlari 2-ilovaga muvofiq;
2021-2022-yillarda Sirdaryo viloyatining Mirzaobod tumanida tomchilatib sugʻorish texnologiyasini joriy etishning prognoz koʻrsatkichlari 3-ilovaga muvofiq;
2021-2022-yillarda Sirdaryo viloyatining Mirzaobod tumanida qishloq xoʻjaligi mahsulotlarining asosiy turlarini yetishtirish, qayta ishlash va eksport qilishning prognoz koʻrsatkichlari 4-ilovaga muvofiq tasdiqlansin.
2. Oʻzbekiston Respublikasi Qishloq xoʻjaligi vazirligi, Suv xoʻjaligi vazirligi, Veterinariya va chorvachilikni rivojlantirish qoʻmitasi, Oʻzbekiston fermer, dehqon xoʻjaliklari va tomorqa yer egalari kengashi, Sirdaryo viloyati hokimligi:
Mirzaobod tumanida xoʻjalik ichki sugʻorish tarmoqlarini toʻliq xatlovdan oʻtkazib, taʼmirtalab suv yoʻllarini rekonstruksiya qilish va yangi suv tarmoqlarni barpo etish;
tumandagi sugʻoriladigan yerlarning suv taʼminotini yaxshilash, suvni tejovchi texnologiyalarni joriy qilish va qishloq xoʻjaligi korxonalarining suv isteʼmolini optimallashtirish boʻyicha manzilli dasturni ishlab chiqish;
tumandagi foydalanishga kiritiladigan yer maydonlariga qishloq xoʻjaligi ekinlarini joylashtirish, oziq-ovqat mahsulotlarini yetishtirish, qayta ishlash va eksport hajmlarini oshirish prognoz koʻrsatkichlari bajarilishini hamda hududda amalga oshirilishi rejalashtirilgan muzlatkichli omborxona, logistika, issiqxona va dorivor oʻsimliklar boʻyicha loyihalarni belgilangan muddatlarda ishga tushishini taʼminlash;
tumanda ekin yer maydonlari, shu jumladan, paxta va gʻalla ekin maydonlarining tuproq unumdorligini yaxshilash va hosildorlikni oshirishga qaratilgan almashlab ekish ishlarini tizimli tashkil etish;
ozuqabop ekinlarni koʻpaytirish hisobiga nasldor chorva mollari bosh sonini koʻpaytirish;
tomorqa yer egalariga mineral oʻgʻitlarni yetkazib berish, tuproq tarkibini aniqlash va oʻgʻit solish meʼyorlarini belgilash, sifatli urugʻ yetkazib berish, agrotexnika xizmatlari va boshqa xizmatlarni koʻrsatish ishlarini tashkil etish;
tumanda agrosanoat sohasining “oʻsish nuqtalarini” aniqlash va ularni yanada kuchaytirish boʻyicha takliflarni ishlab chiqish;
tumandagi tomorqa xoʻjaliklarini xatlovdan oʻtkazib, ularning samaradorligini yanada oshirish boʻyicha kompleks chora-tadbirlarni amalga oshirsin.
3. Sirdaryo viloyati hokimligi, Oʻzbekiston Respublikasi Qishloq xoʻjaligi vazirligi, Investitsiyalar va tashqi savdo vazirligi, Oʻzbekiston fermer, dehqon xoʻjaliklari va tomorqa yer egalari kengashi va Savdo-sanoat palatasi Mirzaobod tumanida anorchilikni yanada rivojlantirish maqsadida:
anor ekin maydonlarini kengaytirish, qayta foydalanishga kiritilayotgan yerlar anorchilik bilan shugʻullanish istagini bildirgan tadbirkorlik subyektlari, shu jumladan, yoshlarga ajratilishini taʼminlash;
xalqaro tashkilotlarning grant va kreditlarini jalb qilgan holda anorni qayta ishlash quvvatlarini tashkil qilish va eksportbop mahsulotlar ishlab chiqarishni tashkil etish;
zamonaviy texnologiyalar asosida anor va boshqa mevalarni yetishtirish, qayta ishlash va saqlash boʻyicha yirik klastyerlarni tashkil etish uchun xorijiy investorlarni jalb qilish choralarini koʻrsin.
4. Mazkur qarorning bajarilishini nazorat qilish Oʻzbekiston Respublikasi Bosh vazirining agrar va oziq-ovqat sohalarini rivojlantirish masalalari boʻyicha oʻrinbosari Sh.M. Gʻaniyev va Sirdaryo viloyati hokimi Gʻ.Gʻ. Mirzayev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2021-yil 6-may,
284-son
Vazirlar Mahkamasining 2021-yil 6-maydagi 284-son qaroriga 1-ILOVA
2021 — 2023-yillarda Sirdaryo viloyatining Mirzaobod tumanida qishloq xoʻjaligiga moʻljallangan yerlarning suv taʼminoti va meliorativ holatini yaxshilash chora-tadbirlari
DASTURI
Vazirlar Mahkamasining 2021-yil 6-maydagi 284-son qaroriga 2-ILOVA
2021 — 2023-yillarda Sirdaryo viloyatining Mirzaobod tumanida sugʻorish tarmoqlari taʼmirlanishi hisobiga qishloq xoʻjaligiga moʻljallangan yer maydonlarini qayta foydalanishga kiritish
PROGNOZ KOʻRSATKIChLARI
Vazirlar Mahkamasining 2021-yil 6-maydagi 284-son qaroriga 3-ILOVA
2021-2022-yillarda Sirdaryo viloyatining Mirzaobod tumanida tomchilatib sugʻorish texnologiyasini joriy etishning
PROGNOZ KOʻRSATKIChLARI
Vazirlar Mahkamasining 2021-yil 6-maydagi 284-son qaroriga 4-ILOVA
2021-2022-yillarda Sirdaryo viloyatining Mirzaobod tumanida qishloq xoʻjaligi mahsulotlarining asosiy turlarini yetishtirish, qayta ishlash va eksport qilishning
PROGNOZ KOʻRSATKIChLARI