Axborot-kommunikatsiya texnologiyalari sohasida kadrlar tayyorlash tizimini yanada takomillashtirish chora-tadbirlari toʻgʻrisida (288-son)

07.05.2021

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining 2021-yil 3-fevraldagi “2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Yoshlarni qoʻllab-quvvatlash va aholi salomatligini mustahkamlash yili”da amalga oshirishga oid davlat dasturi toʻgʻrisida”gi PF-6155-son Farmoni ijrosini taʼminlash maqsadida Vazirlar Mahkamasi qaror qiladi:

1. Axborot texnologiyalari va kommunikatsiyalarini rivojlantirish vazirligi (keyingi oʻrinlarda — Vazirlik) hamda Oliy va oʻrta maxsus taʼlim vazirligining:

Muhammad al-Xorazmiy nomidagi Toshkent axborot texnologiyalari universitetining Nurafshon filialini (keyingi oʻrinlarda — Filial) tashkil etish;

Muhammad al-Xorazmiy nomidagi Toshkent axborot texnologiyalari universitetining (keyingi oʻrinlarda — Universitet) Axborot-resurs markazida “Raqamli kutubxona” tashkil etish toʻgʻrisidagi takliflariga rozilik berilsin.

2. Quyidagilar Filialning asosiy vazifalari etib belgilansin:

iqtisodiyot tarmoqlarining ehtiyojlarini hisobga olgan holda, raqamli iqtisodiyotni jadal rivojlantirishga hissa qoʻshadigan, zamonaviy talablarga javob beradigan va axborot-kommunikatsiya texnologiyalari sohasida ilgʻor texnologiyalar boʻyicha bilim va koʻnikmalarni egallagan yuqori malakali kadrlarni tayyorlash;

axborot-kommunikatsiya texnologiyalari sohasida kadrlarni tayyorlash jarayonida oʻquv rejalariga zamonaviy fanlarni kiritib borish, innovatsion hamda ilm-fanga asoslangan texnologiyalarni tatbiq qilish hamda ilgʻor xorijiy tajribani qoʻllagan holda oʻquv jarayonini taʼlimning kredit-modul tizimi asosida tashkil qilish;

ilmiy-tadqiqot institutlari bilan manfaatdor vazirliklar, idoralar va boshqa tashkilotlar hamkorligida fundamental, amaliy va innovatsion tadqiqotlarni olib borish hamda ularning natijalarini ishlab chiqarishga keng joriy etish;

Filialga biriktirilgan informatika va axborot texnologiyalarini chuqurlashtirib oʻqitishga ixtisoslashtirilgan tayanch maktablar faoliyatini metodik qoʻllab-quvvatlash;

aholining barcha qatlamlarida raqamli koʻnikmalarni oshirish maqsadida dasturlash, robototexnika, “Buyumlar interneti”, sunʼiy intellekt texnologiyalarini qoʻllash va oʻrganish.

3. Universitet huzurida faoliyat yurituvchi, oliy taʼlim tizimi bilan integratsiyalashgan oʻrta maxsus professional taʼlim bosqichida axborot-kommunikatsiya texnologiyalari yoʻnalishlari boʻyicha kadrlar tayyorlaydigan texnikumlar (keyingi oʻrinlarda — Texnikumlar) ilovaga muvofiq tashkil etilsin.

4. Mazkur qarorga ilovada belgilangan taʼlim muassasalarining bino va inshootlari Vazirlikka operativ boshqaruv huquqi asosida bepul berilsin hamda Texnikumlarning moddiy-texnik vositalari va axborot texnologiyalari sohasida kadrlar tayyorlashga oid oʻquv ustaxona jihozlari belgilangan tartibda topshirilsin.

Vazirlik manfaatdor vazirlik va idoralar bilan birgalikda bir oy muddatda mazkur qarorga ilovada nazarda tutilgan taʼlim muassasalarining bino va inshootlari berilishi hamda boshqa moddiy-texnika vositalarining topshirilishi va qabul qilinishini taʼminlasin.

5. Belgilab qoʻyilsinki:

Filial va Texnikumlar yuridik shaxs maqomiga ega Universitetning tarkibiy boʻlinmalari hisoblanadi;

Filial va Texnikumlarda oʻquv jarayoni 2021/2022 oʻquv yilidan boshlanadi;

Filialga talabalarni qabul qilish soni belgilangan tartibda har yili tasdiqlanadigan respublika oliy taʼlim muassasalariga oʻqishga qabul qilishning davlat buyurtmasi va qoʻshimcha qabul parametrlaridan kelib chiqqan holda belgilanadi;

Filial faoliyatini yoʻlga qoʻyish uchun zarur saqlash xarajatlari, shu jumladan maʼmuriy boshqaruv, texnik va oʻquv-yordamchi xodimlar mehnatiga haq toʻlash xarajatlari 2021-yilda Oʻzbekiston Respublikasining respublika budjetidan birinchi darajali budjet mablagʻlarini taqsimlovchi sifatida Vazirlikka ajratilgan mablagʻlar doirasida, 2022-yildan boshlab esa Oʻzbekiston Respublikasi Davlat budjeti parametrlarida nazarda tutiladi;

Texnikumlarda taʼlim dasturlari Taʼlimning xalqaro standart tasniflagichi 5-darajasi asosida tashkil etiladi;

Texnikumlarga 2020/2021 oʻquv yilida qabul qilingan oʻquvchilar belgilangan tartibda amaldagi taʼlim dasturlari boʻyicha mazkur texnikumlarning bino va inshootlarida oʻqishni yakunlaydi;

Filialga 2 ta, shu jumladan 1 ta xizmat va 1 ta navbatchi yengil avtotransport vositalarini saqlash uchun limit ajratiladi.

6. Quyidagilar:

a) Filial faoliyatini moliyalashtirish manbalari etib belgilansin:

Oʻzbekiston Respublikasi Davlat budjeti mablagʻlari;

toʻlov-kontrakt asosida oʻqitishdan tushadigan mablagʻlar;

xoʻjalik faoliyatidan va shartnoma asosida xizmatlar koʻrsatishdan tushadigan tushumlar;

jismoniy va yuridik shaxslarning homiylik xayriyalari;

xalqaro moliya tashkilotlarining grantlari;

qonunchilik hujjatlari bilan taqiqlanmagan boshqa manbalar.

b) Texnikumlarni joriy saqlash, ularning faoliyat yuritishi, moddiy-texnik bazasini mustahkamlash va kadrlar tayyorlash hamda “Raqamli kutubxona”ni tashkil etish bilan bogʻliq xarajatlar Vazirlik hamda Universitet va uning hududiy filiallarining budjetdan tashqari mablagʻlari, oʻquvchilarni davlat buyurtmasi va toʻlov-kontrakt asosida oʻqitishdan tushadigan mablagʻlar hamda qonunchilikda taqiqlanmagan boshqa manbalar hisobidan amalga oshiriladi.

7. Toshkent viloyati hokimligi:

Filial hamda Toshkent viloyati axborot texnologiyalari texnikumi binosini qurish uchun yer maydonini Toshkent viloyatining Nurafshon shahri “Nurafshon business city” hududidan belgilangan tartibda ajratsin;

Filialga faoliyat yuritish uchun boshqa hududlardan taklif etilgan professor-oʻqituvchilarni uy-joy bilan, shu jumladan 4 ta ikki xonali xizmat uyi bilan taʼminlasin.

8. Vazirlik va Toshkent viloyati hokimligi 2022/2023 oʻquv yiliga qadar Filialning zamonaviy oʻquv binosi, sport zali va talabalar turar joyi binosi hamda Toshkent viloyati axborot texnologiyalari texnikumi oʻquv binosining qurib bitkazilishini taʼminlasin.

9. Filial va Toshkent viloyati axborot texnologiyalari texnikumining oʻquv binolari qurib bitkazilguniga qadar Oliy va oʻrta maxsus taʼlim vazirligining Oʻrtachirchiq tumani 2-son kasb-hunar maktabining oʻquv binosiga tekin foydalanish huquqi asosida vaqtincha joylashtirilsin.

10. Qoraqalpogʻiston Respublikasi Vazirlar Kengashi va viloyatlar hokimliklari mahalliy budjetning qoʻshimcha manbalari hisobidan 2021/2022 oʻquv yili boshlanguniga qadar Texnikumlarning bino va inshootlarini rekonstruksiya qilish, kapital taʼmirlash, hududlarini obodonlashtirish, moddiy-texnik bazasini mustahkamlash choralarini koʻrsin.

11. Vazirlik:

a) ikki hafta muddatda Filialni yuqori malakali pedagog kadrlar bilan toʻldirish uchun respublikaning yetakchi oliy taʼlim muassasalarida tegishli magistratura mutaxassisliklari boʻyicha maqsadli qabul parametrlariga takliflarni belgilangan tartibda Iqtisodiy taraqqiyot va kambagʻallikni qisqartirish vazirligiga taqdim etsin;

b) Oliy va oʻrta maxsus taʼlim vazirligi, Qoraqalpogʻiston Respublikasi Vazirlar Kengashi va tegishli viloyatlar hokimliklari bilan birgalikda:

bir oy muddatda Filial va Texnikumlarning ustavlarini belgilangan tartibda tasdiqlash;

Filial va Texnikumlarni oliy taʼlim va ilmiy-tadqiqot muassasalari, tegishli yoʻnalishlar boʻyicha ishlab chiqarish tashkilotlarining katta amaliy tajribaga ega mutaxassislaridan iborat boʻlgan yuqori malakali kadrlar bilan toʻldirish;

Filial va Texnikumlarni zamonaviy oʻquv-laboratoriya jihozlari va ilgʻor kompyuter texnikasi bilan taʼminlash hamda uning shtatlar jadvali va xarajatlar smetasini tasdiqlash;

Filial va Texnikumlar professor-oʻqituvchilarining respublika va xorijiy davlatlarning yetakchi taʼlim muassasalarida, ilmiy-tadqiqot markazlarida, axborot-kommunikatsiya texnologiyalari sohasidagi ishlab chiqarish tashkilotlarida davriy ravishda stajirovkasini tashkil etish;

Filial va Texnikumlarning axborot-resurs markazini oʻquv, ilmiy va badiiy adabiyotlar bilan toʻldirib borish choralarini koʻrsin.

v) Toshkent viloyati hokimligi, Oliy va oʻrta maxsus taʼlim vazirligi bilan birgalikda 2021/2022 oʻquv yili boshlanguniga qadar sohaning innovatsion rivojlanishdagi istiqbollarini inobatga olgan holda Filialda oʻquv va ilmiy laboratoriyalarni tashkil etish, uning moddiy-texnik bazasini shakllantirish, zamonaviy oʻquv adabiyotlari, laboratoriya va ishlab chiqarish trenajyorlari bilan butlash choralarini koʻrsin;

g) Oliy va oʻrta maxsus taʼlim vazirligi, Fanlar akademiyasi bilan birgalikda 2021/2022 oʻquv yilidan boshlab:

talabalarning amaliy koʻnikmalarini shakllantirish maqsadida soha mutaxassislarini dars jarayonlariga jalb etsin;

professor-oʻqituvchilar va talabalarning ilmiy-tadqiqot institutlari hamda yetakchi tashkilotlarning laboratoriyalaridan foydalanishi uchun tegishli shart-sharoitlar yaratsin;

d) “Raqamli kutubxona”ni 2022-yil 1-sentabrga qadar axborot-kommunikatsiya texnologiyalari sohasiga oid zamonaviy milliy va xorijiy maʼlumotlar bazalariga, ularda maʼlumotlar qidirish imkonini yaratgan holda, ulanishini taʼminlasin.

12. Vazirlik Oliy va oʻrta maxsus taʼlim vazirligi, Qoraqalpogʻiston Respublikasi Vazirlar Kengashi va tegishli viloyatlar hokimliklari bilan birgalikda ikki oy muddatda axborot texnologiyalari sohasidagi ish beruvchi tashkilotlarni Texnikumlarga biriktirish va oʻquvchilarning ishlab chiqarish amaliyotlarini tashkil etish boʻyicha quyidagilarni nazarda tutuvchi “yoʻl xaritasi”ni ishlab chiqsin:

Texnikumlarda oʻquvchilarni, shu jumladan axborot texnologiyalari sohasidagi mutaxassislarni tayyorlash boʻyicha korxonalarning yillik tarmoq buyurtmasini;

Texnikumlarda Universitet va uning filiallari, Toshkent shahridagi Inxa universiteti, Toshkent shahridagi Amiti universiteti hamda tegishli oliy taʼlim muassasalarining talabalarini jalb qilgan holda, shu jumladan masofaviy oʻqitish orqali oʻquv mashgʻulotlarini oʻtkazishga koʻmaklashish.

14. Mazkur qarorning ijrosini nazorat qilish Oʻzbekiston Respublikasi Bosh vazirining maslahatchisi — IT-texnologiyalar, telekommunikatsiyalar va innovatsion faoliyatni rivojlantirish masalalari departamenti boshligʻi O.M. Umarov va Oʻzbekiston Respublikasi axborot texnologiyalari va kommunikatsiyalarini rivojlantirish vaziri Sh.M. Sadikov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2021-yil 7-may,

288-son

Vazirlar Mahkamasining 2021-yil 7-maydagi 288-son qaroriga ILOVA

Axborot texnologiyalari va kommunikatsiyalari yoʻnalishlari boʻyicha kadrlar tayyorlaydigan yangi tashkil etilayotgan texnikumlar

ROʻYXATI

T/r Texnikum nomi Texnikumlar tashkil etilayotgan bino va inshoot 1. Qoraqalpogʻiston Respublikasi Agro IT texnikumi Nukus shahri, Toʻrtkoʻl guzari koʻchasi (Nukus kompyuter lingvistikasi texnikumi) 2. Andijon axborot texnologiyalari texnikumi Andijon tumani, “Xartum” QFY, “Islomobod” MFY, Islomobod koʻchasi, 163-uy (Andijon mashinasozlik texnikumi) 3. Buxoro axborot texnologiyalari texnikumi Shofirkon tumani, “Iskogare” QFY (Buxoro davlat tibbiyot institutiga oʻquv poligoni) 4. Jizzax axborot texnologiyalari texnikumi Forish tumani, Fayzobod koʻchasi, 25- uy (Jizzax davlat pedagogika instituti oʻquv paligoni) 5. Qashqadaryo axborot texnologiyalari texnikumi Nishon tumani, “Yangi Nishon” QFY (TATU Qarshi filiali oʻquv paligoni) 6. Navoiy axborot texnologiyalari texnikumi Karmana tumani, Jaloyir mahallasi, Quyibugʻ qishlogʻi, 57-uy (Karmana sanoat va iqtisodiyot texnikumi) 7. Sirdaryo axborot texnologiyalari texnikumi Sayxun shaharchasi, Ravonlik shoh koʻchasi, 49-uy (Guliston davlat universiteti oʻquv poligoni) 8. Surxondaryo axborot texnologiyalari texnikumi Angor tumani, Yuqori Xoʻjaqiya mahallasi, 34-uy (Angor iqtisodiyot va tadbirkorlik texnikumi) 9. Toshkent viloyati axborot texnologiyalari texnikumi Toshkent viloyati, Oʻrtachirchiq tumani, “Navoiy” QFY, Yangihayot mahallasi, Ibn Sino koʻchasi (Oʻrtachirchiq tumani 2-son kasb-hunar maktabi)* 10. Fargʻona axborot texnologiyalari texnikumi Qoʻqon shahar, Guzar koʻchasi, 2-uy (Qoʻqon noshirlik va axborot texnologiyalari texnikumi) 11. Urganch axborot texnologiyalari texnikumi Urganch shahar, Tinchlik koʻchasi, 6-uyda joylashgan binoning 3- va 6-bloklari (Axborot texnologiyalari va kommunikatsiyalarini rivojlantirish vazirligining operativ boshqaruvida)

Izoh. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi Oliy va oʻrta maxsus taʼlimi vazirligi, Qoraqalpogʻiston Respublikasi Vazirlar Kengashi va viloyatlar hokimliklari bilan birgalikda ushbu roʻyxatga tegishli oʻzgartirish va qoʻshimchalar kiritilishi mumkin.

* 2021/2022 oʻquv yilida Oʻrtachirchiq tumani 2-son kasb-hunar maktabiga vaqtinchalik joylashtiriladi.