Qishloq xoʻjaligiga ishlab chiqarish-texnika xizmati koʻrsatish sohasida shartnoma munosabatlarini chuqurlashtirish chora-tadbirlari toʻgʻrisida (432-son)
06.12.1996
Oʻzbekiston Respublikasi Vazirlar Mahkamasining
qarori
[Koʻchirma]
Qishloq xoʻjaligiga ishlab chiqarish-texnika xizmati koʻrsatishni yanada takomillashtirish, traktorlar, mashinalar va mexanizmlarning mavjud parkidan foydalanish samaradorligini oshirish maqsadida Vazirlar Mahkamasi qaror qiladi:
1. Oʻzbekiston Respublikasi Qishloq va suv xoʻjaligi vazirligi, “Oʻzqishloqxoʻjaliktaʼminottuzatish” davlat-kooperativ qoʻmitasi, Qoraqalpogʻiston Respublikasi Vazirlar Kengashi va viloyatlar hokimliklarining respublikaning barcha tumanlarida 1-ilovaga* muvofiq mashina-traktor parklarini tashkil etishni asosan 1997-yilda tugallash toʻgʻrisidagi taklifi qabul qilinsin.
* Ilova berilmaydi.
Qoraqalpogʻiston Respublikasi Vazirlar Kengashi Raisi, viloyatlar va tumanlar hokimlari mashina-traktor parklari tashkil etish boʻyicha ishlarni tashkil qilish va ularga berilgan texnika vositalaridan yuqori unum bilan foydalanish uchun shaxsan javobgar ekanliklari toʻgʻrisida ogohlantirilsinlar.
2. Qishloq va suv xoʻjaligi vazirligi, “Oʻzqishloqxoʻjaliktaʼminottuzatish” davlat-kooperativ qoʻmitasi, Qoraqalpogʻiston Respublikasi Vazirlar Kengashi, viloyatlar va tumanlar hokimliklari mashina-traktor parklarida birinchi navbatda haydov traktorlari va pluglarni, gʻalla, sholi va yem-xashak oʻrish-yigʻish kombaynlarini, ularni xoʻjaliklardan shartnoma narxlarida sotib olgan yoki uzoq muddatli ijaraga olgan holda jamlasinlar, bunda sotib olinayotgan texnikaning resursiga, texnik holatiga va ish unumiga alohida eʼtiborni qaratsinlar.
“Oʻzqishloqxoʻjaliktaʼminottuzatish” davlat-kooperativ qoʻmitasi olinadigan barcha yangi traktorlar, gʻalla oʻrish kombaynlari va paxta terish mashinalarini butlash uchun mashina-traktor parklariga yuborsin.
1997-yilda sotib olinadigan 400 ta “Magnum–7240” traktori va 200 ta “Keys” kombayni mashina-traktor parklari boʻyicha 2-ilovaga* muvofiq taqsimlansin.
* Ilova berilmaydi.
3. Texnikani tayyorlash, ehtiyot qismlar va tuzatish materiallari yetkazib berishga doir vazifalarni operativ hal etish uchun tumanlarda “Oʻzqishloqxoʻjaliktaʼminottuzatish” davlat-kooperativ qoʻmitasining tuman boʻlinmalari va ularning tarkibiy tuzilmalari negizida aksionerlik va boshqa xoʻjalik jamiyatlarining qishloq xoʻjaligiga ishlab chiqarish texnika xizmati koʻrsatish boʻyicha uyushmalarini tashkil etish maqsadga muvofiq deb hisoblansin. Shu sababli “Oʻztexchorvaservis” respublika birlashmasi va viloyatlardagi tegishli xizmatlar tugatilsin.
4. Oʻzbekiston Respublikasi Moliya vazirligi 1997-yilda yangidan tashkil etiladigan mashina-traktor parklariga zamonaviy qishloq xoʻjaligi texnikasi, shuningdek ularga ehtiyot qismlar sotib olish va ularni yangilash uchun zarur aylanma mablagʻlar ajratsin.
5. “Oʻzqishloqxoʻjaliktaʼminottuzatish” davlat-kooperativ qoʻmitasi Qishloq va suv xoʻjaligi vazirligi bilan birgalikda 1995-1996-yillarda mashina-traktor parklarining toʻplangan ish tajribasini hisobga olib Mashina-traktor parklarini tashkil etish va ularning faoliyat koʻrsatishi toʻgʻrisidagi Nizomga va Mexanizatsiyalashtirilgan ishlar bajarilganligi uchun xoʻjaliklar bilan hisob-kitob qilish Tartibiga bir oy muddatda aniqliklar va oʻzgartirishlar kiritsin.
6. Oʻzbekiston Respublikasi Qishloq va suv xoʻjaligi vazirligi, “Oʻzqishloqxoʻjaliktaʼminottuzatish” davlat-kooperativ qoʻmitasi, “Oʻzqishloqxoʻjalikmash-xolding” xolding kompaniyasi va Moliya vazirligi Dehqonchilik sanoati majmuini lizing asosida mashinasozlik mahsulotlari bilan taʼminlash tartibini ikki oy muddatda ishlab chiqsinlar va tasdiqlash uchun Vazirlar Mahkamasiga kiritsinlar.
7. “Oʻzqishloqxoʻjaliktaʼminottuzatish” davlat-kooperativ qoʻmitasi mashina-traktor parklari xoʻjaliklarga shartnoma narxlarida xizmatlar koʻrsatajagini oʻz tarkibiga kiruvchi korxonalar va tashkilotlarga maʼlum qilsinlar. Iqtisodiy jihatdan asoslanmagan (monopol) narxlar (xizmatlarga tariflar) qoʻllanilgan taqdirda ularga nisbatan raqobat va isteʼmolchilarning huquqlarini himoya qilish toʻgʻrisidagi qonun hujjatlarida nazarda tutilgan choralar qoʻllaniladi.
8. Qishloq xoʻjaligi korxonalari, fermer xoʻjaliklari va boshqa xoʻjaliklarning rahbarlariga mashina-traktor parklariga ishga oʻtgan mexanizatorlar va boshqa xodimlarga tomorqa uchastkasi, yaylovlardan foydalanish, kommunal xizmatlar, mazkur xoʻjalikda bajarilgan ishlar hisobiga naturada haq toʻlash boʻyicha imtiyozlarni saqlab qolish tavsiya etilsin.
9. “Oʻzqishloqxoʻjaliktaʼminottuzatish” davlat-kooperativ qoʻmitasi “Keys-korporeyshn” korporatsiyasi bilan birgalikda Qoraqalpogʻiston Respublikasida va viloyatlarda ushbu korporatsiyaning hamda traktorlar va qishloq xoʻjaligi mashinalari yetkazib beruvchi boshqa xorijiy firmalarning qishloq xoʻjaligi texnikasiga servis xizmati koʻrsatish boʻyicha texnik markazlar tashkil etsin.
11. Vazirlar Mahkamasining 1995-yil 24-martdagi 95-son qarori oʻz kuchini yoʻqotgan deb hisoblansin.
12. Mazkur qarorning bajarilishini nazorat qilish Bosh vazirning birinchi oʻrinbosari Q.Gʻ. Obidov zimmasiga yuklansin.
Vazirlar Mahkamasining Raisi I. KARIMOV
Toshkent sh.,
1996-yil 6 dekarb,
432-son